ஆண்டவரே இயேசுவே,
கார்மேகத்தில் வருபவரே! உம்மைத் துதிக்கிறேன். பாறைகளை எல்லாம் நீர்த் தடாகமாய் மாற்றுபவரே! உம்மைப் போற்றுகிறேன். "ஏழாம் முறை அவன் சென்று பார்த்து இதோ, மனித உள்ளங்கை அளவு சிறிய மேகம் ஒன்று கடலிலிருந்து எழும்பி மேலே வருகிறது” என; இறைவாக்கினர் எலியா மழையை வேண்டி உமது நாமத்தால் செபித்ததையும், அதனால் வானம் திறந்ததையும், இன்றைய இறை வார்த்தையில் வாசிக்கின்றேனே இயேசுவே. நானும் சோர்ந்து போகாமல் இடைவிடாது இறைவனிடம் மன்றாடவும்; செபத்தாலே வாழ்வில் ஜெயம் உண்டு என்பதை மனதில் வைத்து தினமும் இறைவனைப் புகழ்ந்து துதிக்க, அவரோடு உரையாட இறைவாஞ்சை தாரும். ஆண்டவரே இயேசுவே! 'சோதனைக்கு உட்படாதிருக்க விழித்திருந்து மன்றாடுங்கள்' என்றவரே! மனம் ஆர்வம் உடையதாகவும், உடல் வலுவற்றதாகவும் இருக்கும் நிலையை அறிபவரே! என் உடலுக்கும், உள்ளத்திற்கும் பலம் தாரும். “என்னிடம் மன்றாடு; உனக்கு நான் செவிசாய்ப்பேன்; நீ அறிந்திராத மாபெரும் செயல்களையும், மறைபொருள்களையும் உனக்கு நான் விளக்கிக் கூறுவேன்” என்று திருவாக்குத் தந்த தந்தையே! நான் உம்முடன் உரையாட, உம்முடன் நட்புக் கொள்ள, உம்முடன் சேர்ந்து பயணிக்க, உம் நாட்டங்களை எனதாக்க, உமது அன்பர்களுடன் நட்புக்கொள்ள இந்த நாளில் அருள் தர வேண்டும் என்று, இயேசுவின் நாமத்தில் செபிக்கிறேன். ஆமென்