ஆண்டவரே இயேசுவே, அல்லேலூயா, அல்லேலூயா! நம் மீட்பராகிய கிறிஸ்து இயேசு சாவை அழித்தவரே! உம்மைத் துதிக்கின்றேன். மெல்கிசதேக்கின் முறைப்படி வந்த குருவே! உம்மை ஆராதிக்கின்றேன். “அழுகையோடு அவர்கள் திரும்பி வருவார்கள்; ஆறுதலளித்து அவர்களை நான் அழைத்து வருவேன்; நீரோடைகள் ஓரமாக அவர்களை நான் நடத்திச் செல்வேன்; இடறிவிழாதவாறு சீரான வழியில் அவர்களை நடக்கச் செய்வேன்.” என்று, இன்றைய இறைவார்த்தையில் என்னை நீர் பசும்புல் மேச்சலில் நடத்திச் செல்லப்போகும் தயவிற்காய் நன்றி கூறுகின்றேன். இயேசுவே, இதுவரை ஆசீர்வதித்தீரே! ஆளுகை செய்தீரே! உமது பிள்ளையாக கரம்பிடித்து நடத்திய தயவிற்காய் நன்றி அப்பா. நான் பாவியாய் இருந்தபோதே நீர் எனக்காய் உமது உயிரைக் கொடுத்தீர் அந்த அன்பிற்கு தகுதி உள்ளவனாக என் வாழ்வை நான் காத்துக்கொள்ள வரம் தாரும். நீரோடையோரம் நடப்பட்ட மரம் போல் இருக்கவும் பருவகாலத்தில் கனிதந்து, உமக்கு கனிதரும் மரமாய் என்றும் பசுமையாய் விழிப்பாய் இருந்து முடிவில்லா அரசிற்கு தகுதியானவனாய் என் செயல்களை மாற்றிட வரத் தாரும். உங்கள் அழுகைகளை களிநடனமாய் மாற்றுவேன். என்றவரே! இந்த நாளில் என் முன் இருக்கும் சோதனைகளை சாபங்களை பாவங்களை உமது திரு இரத்தம் கொண்டு தூய்மைப் படுத்தி உமது பாதையில் என்னை வழிநடத்த வேண்டுமாய், இயேசுவின் நாமத்தில் செபிக்கிறேன். ஆமென்