இணைந்து செபிப்போம் – 2026-10-16

ஆண்டவர் இயேசுவே, என் கற்பாறையான கடவுளே! உம்மை துதிக்கின்றேன். இடுக்கண் நாளில் உயரத்தில் இருந்து என்னை எட்டிபிடித்து காத்தவரே! நன்றி கூறுகின்றேன். யாழிசைத்து உமக்கு நன்றி செலுத்துகின்றேன். “உங்களுக்கு மீட்பளிக்கும் நற்செய்தியாகிய உண்மையின் வார்த்தையைக் கேட்டு, அவர் மீது நம்பிக்கை கொண்டு, வாக்களிக்கப்பட்ட தூய ஆவியால் அவருக்குள் முத்திரையிடப்பட்டீர்கள்" என்று இன்றைய இறைவார்தையில் உமது உயிருள்ள வார்த்தையின் மகத்துவத்தை எனக்கு விளக்குவதற்காய் நன்றி கூறுகின்றேன். இயேசுவே! உமது வார்த்தையே உண்மை; உமது வார்த்தையால் என்னை உமது தந்தைக்கு உரியவனாக இந்த நாளில் மாற்றும். என்னை முழுமையாக உமக்கு கையளிக்கின்றேன். நீர் முன் குறித்து வைத்தவை என் வாழ்வில் நிறைவேற நீர் அனுமதியும். ஆண்டவரே இயேசுவே! உமது மாட்சியை புகழ்ந்து பாட நீர் விரும்புகின்றீரே! என் நாவின் கட்டுக்களை அவிழ்த்து விடும். என் வாயை திறந்தருளும்; அப்பொழுது உமது மாட்சியை மகிமையை உமது வித்தகு செயல்களை உமது தூய ஆவியின் துணை கொண்டு பாடிப் புகழ்வேன். ஓ என் இயேசுவே! இன்றை நாளில் என்னை பொறுப்பெடும்; வார்த்தையை அனுப்பி குணமாக்குபவரே! உமது வார்த்தை என் நாவில் பரிசுத்தமாய் உச்சரிக்க ஆசீர் வழங்க வேண்டுமென்று இயேசுவின் நாமத்தால் செபிக்கின்றேன். ஆமென்