நம்பிக்கை இழந்துவிடாதிருக்க

இறை நம்பிக்கை மனிதனை வாழவைத்துக்கொண்டிருக்கிறது. வாழ்வில் தோல்வியைச் சந்திக்கும் மனிதன் வாழ்க்கையை முடித்துக்கொள்வதற்குக் காரணம் இந்த இறை நம்பிக்கையில் இருக்கும் குறைவு அல்லது வெற்றிடம் ஆகும். நம்பிக்கை இறைவனின் மாபெரும் கொடை. கடவுள் நம்பிக்கைகொண்ட மனிதன் மட்டுமே நம்பிக்கையின் முழுமையைக் காணமுடியும். பொன்னோ பொருளோ ஆட்களோ இந்த நம்பிக்கையைத் தர முடியாது. நம்முள் குடி கொண்டிருக்கும் இறைவனின் ஆற்றல் மட்டுமே நிலைத்த முழுமையான இந்த நம்பிக்கையைத் தந்து எதையும் சாதிக்க வல்லது. நம்பிக்கை இல்லாதவர்களுக்கு, கடவுளே கூட இருந்தாலும் காரியங்கள் கைகூடாது. இயேசுவே உடன் இருந்;தாலும் காற்றும் கடலும் கொந்தளிக்கும்; கண்ணில் பட்டதெல்லாம் பூதமாகத் தெரியும்(மத்8:26). நம்பிக்கை எந்த நோயையும் குணமாக்கும் (மத் 9:22). நம்பிக்கை விரும்பியதை நிறைவேற்றும்(மத்15:28).மலையையும் அசைக்க முடியும். துன்பங்கள் தொடர்ந்து வருவதாலும், பட்ட காலிலே படுவதாலும், கெட்டுப்போன வாழ்கையை இன்னும் கேடு தொடர்ந்தாலும் கடவுள் நம்பிக்கையை இழந்துவிடாதீர்கள். உள்ளுயிராய் இருந்து உரமூட்டி, அவநம்பிக்கையை வேரறுத்து புத்தெழுச்சியூட்டி புது வாழ்வு தரும் தூய ஆவியைப் புறம் தள்ளிவிட வேண்டாம். இத்தகு சூழலில் நம்பிக்கையை அதிகமாக்க செபிப்போம். முயற்சிப்போம்.எல்லாம் வெற்றியே. எப்போதும் வெற்றியே. இனிது வாழ்வோம். வாழ்த்துக்கள். ஆசீர்.

அமைதியின் நாயகனே. இறைவா, உம்மைப் போற்றுகிறோம். நாங்கள் விரும்பித் தேடுகிற அமைதியை, நீர் மட்டுமே தரமுடிகின்ற அமைதியை எங்கள் நாட்டுக்கும், குடும்பங்களுக்கும், எங்களுக்கும் தந்தருள்வீராக. உமக்கே புகழ், உமக்கே நன்றி, உமக்கே மாட்சி, ஆமென்.