''அப்பொழுது பெருந்திரளான மக்கள் இயேசுவிடம் வந்தனர்.
அவர்கள் தங்களோடு கால் ஊனமுற்றோர், பார்வையற்றோர்,
உடல் ஊனமுற்றோர், பேச்சற்றோர், மற்றும் பிற நோயாளர் பலரையும் அவர் காலடியில்
கொண்டுவந்து சேர்த்தனர். அவர்களை அவர் குணமாக்கினார்'' (மத்தேயு 15:30)

இயேசு மகிழ்ச்சி தரும் நல்ல செய்தியை மக்களுக்கு அறிவித்தார். அது மனிதர்களுக்கு நலம் கொணர்ந்த செய்தி. மனிதரின் வாழ்வில் ஏற்படுகின்ற எல்லா இன்னல்களிலிருந்தும் அவர்களுக்கு விடுதலை அளிப்பதற்கே அச்செய்தி வழங்கப்பட்டது. இவ்வாறு மனிதர் பெறுகின்ற விடுதலையை விவிலியம் பல சொற்களால் விவரிக்கிறது. மனிதரின் உடல் சார்ந்த ஊனங்கள், அவர்களது உள்ளத்தைப் பாதிக்கின்ற ஊனங்கள், அவர்களுக்கும் கடவுளுக்கும் பிற மனிதருக்கும் இடையே நிலவ வேண்டிய நல்லுறவைக் குலைக்கின்ற ஊனங்கள் ஆகிய அனைத்துமே மனிதரைச் சிறுமைப்படுத்துகின்றன. இயேசு கொணர்ந்த விடுதலை மனிதருக்கு முழு நலன் வழங்கவே நமக்கு அருளப்படுகிறது. ''பெருந்திரளான மக்கள் இயேசுவிடம் வருகின்றனர்'' (மத் 15:30). இயேசு வழியாகக் கடவுளே தங்களோடு பேசுகிறார் என்பதை மக்கள் உணர்ந்ததால் அப்போதனையைக் கேட்க மக்கள் கூட்டம் கூட்டமாகக் குழுமி நிற்கிறார்கள். அவர்கள் இயேசுவிடமிருந்து எதிர்பார்த்தது என்ன? இயேசு நினைத்தால் தங்களுக்கு உடல், உள, ஆன்ம நலன் நல்க முடியும் என்னும் நம்பிக்கை அவர்களுக்கு இருந்தது.



இன்று இயேசுவில் நம்பிக்கை கொண்டு வாழ்கின்ற நாம் அக்காலத்தில் இயேசுவின் வல்லமையால் நலம் பெற்ற மனிதர்களைப் போல நலம் பெற முடியுமா? கடவுளின் வல்லமையை நம் வாழ்வில் உணர முடியுமா? நம் இதயமும் ஆன்மாவும் கடவுளின் அருளைப் பெற திறந்திருக்கும்போது நாம் கடவுளின் வல்லமையை இன்றும் உணர முடியும். எல்லா மக்களின் முன்னிலையிலும் நிகழ்கின்ற அதிசய செயல்கள் நடக்காமல் இருக்கலாம். ஆனால் நம் உள்ளத்தை மாற்றி, அதை இறையன்பிலும் பிறரன்பிலும் உறுதிப்படுத்துகின்ற அனுபவம் நமதாக மாறும். எல்லாரும் கண்டு வியக்கின்ற விதத்தில் உடல் சார்ந்த குணம் நமக்குக் கிடைக்காமல் இருக்கலாம். ஆனால் நம் உள்ளத்தில் நிலவுகின்ற தீமைகளை அகற்றி நாம் நிலைவாழ்வில் பங்கேற்க இறைவன் நம்மில் ஆற்றுகின்ற செயல்களைக் கண்டு நாம் உண்மையிலேயே வியப்படைய வேண்டும். நம் அகக் கண்கள் பார்வையிழந்து இருக்கும் போது நமக்குப் புதுப் பார்வை வழங்குகின்ற கடவுளின் வல்லமையை நாம் வியந்து போற்ற வேண்டும். ஊனமுற்றோரை நாம் இயேசுவிடம் கொண்டு சென்று அவர்கள் நலமடைய வழி வகுக்க வேண்டும்.

இறைவா, எங்களுக்கு முழு நலன் வழங்குபவர் நீரே என நாங்கள் உணர்ந்து வாழ்ந்திட அருள்தாரும்.