இதோ! ஓநாய்களிடையே ஆடுகளை அனுப்புவதைப்போல நான் உங்களை அனுப்புகிறேன். எனவே பாம்புகளைப்போல முன்மதி உடையவர்களாகவும் புறாக்களைப்போலக் கபடு அற்றவர்களாகவும் இருங்கள்.
(மத்தேயு 10:16)

நீங்கள் போய் எல்லா மக்களினத்தாரையும் சீடராக்குங்கள்; தந்தை, மகன், தூய ஆவியார் பெயரால் திருமுழுக்குக் கொடுங்கள். நான் உங்களுக்குக் கட்டளையிட்ட யாவையும் அவர்களும் கடைப்பிடிக்கும்படி கற்பியுங்கள். இதோ! உலக முடிவுவரை எந்நாளும் நான் உங்களுடன் இருக்கிறேன்
(மத்தேயு 28:19-20)

நீ அவற்றை உன் பிள்ளைகளின் உள்ளத்தில் பதியுமாறு சொல். உன் வீட்டில் இருக்கும்போதும், உன் வழிப்பயணத்தின் போதும், நீ படுக்கும்போது, எழும்போதும் அவற்றைப் பற்றிப் பேசு.
(இணைச்சட்டம் 6:7)









நல்ல சமாரியன் யார்?

பொதுக்காலம் 15ஆம் ஞாயிறு

(இணைச்சட்டம் 30:10-14
கொலோசையர் 1:15-20
லூக்கா 10:25-37)

சுழன்று வரும் உலகில்
உண்மையான உறவையும்
நேர்மையான நட்பையும்
உணர்வுபூர்வமான காதலையும்
கண்டுபிடிப்பது என்பது
அரிதாய் மாறிற்று!
மெய்மை இருந்த இடத்தில்
பொய்மை புகலிடம் தேடிற்று
ஒளி இருந்த இடத்தில்
இருள் ஆதிக்கம் செலுத்துகிறது
கனிவு
கண்ணுக்குத் தெரியாமல்
மறைந்து ரொம்ப நாளாயிற்று
அன்பும்கூட
அழிவை நோக்கி
தன் பயணத்தைத் தொடங்கிவிட்டதாய்
எண்ணத்தோன்றுகிறது
இந்த சூழலில்
விஞ்ஞானத்தின் தாக்கம்
கருவில் இருக்கும்
சிசுவைக்கூட சிதைக்க வழிதேடும்
பாதுகாப்பாற்ற உலகமாய் உருவாயிற்று
அரசியல்வாதிகளால்
அனுதின அவஸ்தையும்
அரசுகளின் முகமூடித்தனத்தால்
அன்றாட வேதனையும் அனுபவிக்கும்
மனித குலத்திற்கு ஆறுதலாய்
தேற்றுதலாய் அமைகிறது
இன்றைய இறைவாக்கு வழிபாடு!
கிறித்தவ சமயத்தைத்தாண்டி
மற்ற எல்லாராலும்
மேற்கோள் காட்டப்படும்
உவமைகளில் ஒன்று
இந்த நல்ல சமாரியன் உவமை!
மிகவும் சிறப்பாய்
சிந்தனைக்குரியதாய்
சிறிதளவு மாற்றத்தை
நம்மில் உதிக்கச் செய்யும்
அற்புத ஆற்றல் இந்த உவமைக்கு உண்டு!
வழக்கமாய்
மனிதநேயம்
மனித மாண்பு
உதவிடும் மனப்பான்மை
அயலாருக்கு அன்பு
அடுத்திருப்பவருக்கு உதவி
என அழகாய் வாழ்வியலைக்
கற்பிக்கும் இந்த உவமையைச்
சற்று வித்தியாசமாய் யோசித்துப்பார்க்க
விரும்புகிறேன்...
யார் இவர்கள்?
நற்செய்தியின் கூற்றுப்படி
ஐந்து நபர்கள் இருக்கிறார்கள்
இவர்களுக்கான
விவிலியப் பின்னணி வேறு உண்டு
அதில் நான் நுழையவில்லை
ஆனால் இவர்களை
நான் குடும்பப்பின்னணியிலும்
உலகத்தின் சமூகத்தின் பின்னணியிலும்
அடையாளப்படுத்த விழைகிறேன்...
யார் அவர்கள்?
அடிப்பட்டவர்
கள்வர்கள்
குரு
லேவி
நல்ல சமாரியன்
இவர்களே அந்த ஐவர்!
இன்று அடிப்பட்டவர் யார்
நம்முடைய குழந்தைகளும் இளையோரும்
இன்று கள்வர்கள் யார்
ஏராளம் - ஆனால்
நான் சுட்டிக்காட்டுவது நான்கு
கல்விமுறை
ஊடகமும், தகவல் தொடர்பு சாதனங்களும்
போலியான உறவுகள்
தீய பழக்க வழக்கங்கள்
இன்று குரு
சமயத்திற்கும் சடங்கிற்கும் அடையாளம்
இன்று லேவி
சமூகத்திற்கும் சட்டத்திற்கும் அடையாளம்
நல்ல சமாரியன் என்பவர் யார்
நம் பெற்றோர்கள்!
எப்படி?
நீட் தேர்வினால்
நீடிக்க வேண்டிய நம் கல்விப்பயணம்
முடக்கப்பட்டது
ஆங்கில மோகமும் மும்மொழி கொள்கையும்
தமிழ்மொழியின் தன்மையைக் கொல்கிறது
பண்பைப் பின்னுக்குத்தள்ளி
படிப்பை முன்னுக்கு நிறுத்தும் எதாhர்த்தம்
இப்படி கல்விமுறையால்
அடிக்கப்பட்டு குற்றுயிராய்
நாம் நிற்கும் போது நம் அருகில்
இருப்பவர் யார்?
அலைபேசியால் அவதியும்
கணினியால் கடும்கோபம்
வாட்ஸ் அப்பில் வதந்தியும்
ஊடகத்தால் ஊனமும்
ஏற்படும் தருணங்களில் எல்லாம்
நாம் நொடிந்து நிற்கும் போது
நம் அருகில் இருப்பவர் யார்?
மதுவுக்கும் மாதுவுக்கும்
நிலத்துக்கும் சுகத்துக்கும்
பொன்னுக்கும் பெண்ணுக்கும்
அடிமையாகி ஆசையில் திளைக்கும் போது
எதிர்வரும் சவால்களில்
அடிப்பட்டு நிற்கும் தருவாயில்
நம் அருகில் இருப்பவர் யார்?
உண்மையான உறவுக்கும்
பொய்மையான உறவுக்கும்
காதலுக்கும் காமத்திற்கும்
வித்தியாசம்; தெரியாத உலகில்
போலியான உறவுகளால்
நாம் சீரழியும்போது
நம் அருகில் நிற்பவர் யார்?
அசிங்கத்தை அலங்காரமாகவும்
வேதனையை வேடிக்கையாகவும்
பார்க்ககூடிய சமூகத்தில்
குறைச்சொல்பவர்கள்
அதிகமாகிவிட்டனர்
குறித்த நேரத்தில் உதவி செய்பவர்கள்
குறைந்துவிட்டனர்
ஆனால் எது எப்படியிருந்தாலும்
நல்ல சமாரியனான
இறுதிவரை நம்முடன் வருபவர்கள்
நம் பெற்றோர்களே!
குரு விலகி சென்றார்
அது சமயமும் சடங்குகளும் செய்யும் செயல்
லேவி விலகிச் சென்றார்
அது சமூகமும் சட்டமும்
முன்னிறுத்தும் பாடம்
அடிப்பட்டவரைத் தூக்கி
தன் மடியில் கிடத்தி
மதுவும் எண்ணெயும் வார்த்து
கட்டுப்போட்டு
காயத்திற்கு மருந்திட்டு
விலங்கின்மீது ஏற்றி
சாவடிக்கு அழைத்துச்சென்று
மீண்டும் வருகிறேன்
அதுவரை பாதுகாத்துக்கொள்ளும் என கூறும்
சமாரிய மனநிலைக்குச் சொந்தக்காரர்கள்
உண்மையிலேயே
நம் பெற்றோர்கள்தான்
இதைத்தான் முதல்வாசகம்
கடவுளின் அன்பாகவும்
இரண்டாம் வாசகம்
ஒப்புரவின் தன்மையாகவும்
நமக்குச் சுட்டிக்காட்டுகின்றன
உணர்ந்து கொள்வோம்
அடிப்பட்டவர்களாகிய நம்மை
அன்புச்செய்து அரவணைத்து
இரக்கம் காட்டியவர்கள்
நம் பெற்றோர்
அவர்கள்தான் என்னைப் பொறுத்தவரையில்
என் கண்களுக்கு தெரியும்
நல்ல சமாரியன்!


எழுத்துருவாக்கம்
சகோ.மாணிக்கம்
திருச்சி மறைமாவட்டம்