இதோ! ஓநாய்களிடையே ஆடுகளை அனுப்புவதைப்போல நான் உங்களை அனுப்புகிறேன். எனவே பாம்புகளைப்போல முன்மதி உடையவர்களாகவும் புறாக்களைப்போலக் கபடு அற்றவர்களாகவும் இருங்கள்.
(மத்தேயு 10:16)

நீங்கள் போய் எல்லா மக்களினத்தாரையும் சீடராக்குங்கள்; தந்தை, மகன், தூய ஆவியார் பெயரால் திருமுழுக்குக் கொடுங்கள். நான் உங்களுக்குக் கட்டளையிட்ட யாவையும் அவர்களும் கடைப்பிடிக்கும்படி கற்பியுங்கள். இதோ! உலக முடிவுவரை எந்நாளும் நான் உங்களுடன் இருக்கிறேன்
(மத்தேயு 28:19-20)

நீ அவற்றை உன் பிள்ளைகளின் உள்ளத்தில் பதியுமாறு சொல். உன் வீட்டில் இருக்கும்போதும், உன் வழிப்பயணத்தின் போதும், நீ படுக்கும்போது, எழும்போதும் அவற்றைப் பற்றிப் பேசு.
(இணைச்சட்டம் 6:7)









திரும்பி வாருங்கள்...

ஆண்டின் பொதுக்காலம் 24ஆம் ஞாயிறு

(விடுதலைப் பயணம் 32:7-11,13-14
1 திமொத்தேயு 1:12-17
லூக்கா 15:1-32)

மேற்கத்திய கலாச்சாரத்தில்
கால் ஊன்றி
கண்ணால் கண்டவற்றையெல்லாம்
அன்றாட வாழ்வில்
பழக்கப்படுத்திக் கொண்ட
நம்முடைய வாழ்க்கையைச்
சற்று சீர்தூக்கி பார்க்க
வேண்டிய காலமும் நேரமும்
வெகு தொலைவில் இல்லை என்பதை
மணிக்கொருமுறை
அறிவுறுத்த தவறவதில்லை
இன்றைய உலகமும்
தரம் கெட்ட ஊடகமும்
நீதியை நிதியில் மறைத்து
நியாயத்தைச் சாயத்தால் நனைத்து
சமயத்தைச் சாக்கடையில் தொய்த்து
சாமியைக் கண்ணிலிருந்து மறைத்து
சாமானியரைத் துவைத்து
நடுத்தெருவில் தொங்கவிடும்
சங்கட்டமான சூழலில்
பழமையை நோக்கிப் பயணிப்போம்
பரம்பரியத்தை மீட்டோம் என்ற
பயங்கரமான வார்த்தைகளும்
வசனங்களும்
அன்றாட வாழ்வில் அவ்வப்போது
எட்டிப்பார்க்கதான் செய்கின்றன
செய்வதையெல்லாம் திருந்த செய்யாமல்
ஓட்டுக்கும் நோட்டுக்கும்
அடமானம் வைத்த நம்முடைய
வாழ்க்கை இன்று சரிவில்
சிக்கி சகதியில் மாட்டி நிற்பதை
கண்கூட பார்க்க முடிகிறது
கால்வயிற்றுக்கு கஞ்சிக்குகூட
கால்கடுக்க நிற்கவேண்டிய நிலைமை
விரைவில் வந்துவிடுமோ என்ற
அச்சம் எழுகிறது...
அன்பிற்கினியவர்களே,
இன்றைய இறைவாக்கு வழிபாடு
எல்லாத் தளத்திலும் வைத்து
பொருள் காணக்கூடிய பகுதி
என்றால் அது மிகையாகாது
கடவுளி;ன் இரக்கம்
தந்தையின் பரிவு
தகப்பனின் பாசம்
படைத்தவரின் பராமரிப்பு
உண்டாக்கியவரின் உரிமை
இப்படியாய் நாம் இறைவார்த்தையைப்
புரிந்து கொண்டாலும்
இன்றைய மக்களின் எதார்த்த நிலையோடு
நாம் இணைத்து
இந்த ஞாயிறு வாசகங்களைச்
சிந்தித்துப் பார்க்க விரும்புகின்றேன்!
நடந்தவைகளை மறந்து
கண்களுக்கு களிப்பூட்டும்
தொலைக்காட்சி தொடர்களில்
தங்களைத் தொலைத்து நிற்கும்
எண்ணற்ற மக்களின்
இதயக்கதவுகள் இன்றளவும்
அடைக்கப்பட்டுதான் உள்ளன என்பதை
உணர்த்துவதாய் இருக்கின்றன
இன்றைய இறைவாக்கு வழிபாடு
எப்படி?
தங்களைத்தான் அடிக்கிறார்கள்
என்பதைக்கூட உணராமல்
அடிப்பவர்களைப் பார்த்து
சரணம் போடும் அறியாமையில்
அவதியுறுகிறார்கள் மக்கள்
அவ்வப்போது கிடைக்கும்
காந்தியின் புன்னகைக்கு
வணக்கம் சொல்லும் மனிதர்கள்
நிரந்தரமான தங்களின் புன்னகைக்கு
எப்போது
கொடுக்கப்போகிறார்கள் என்பது
தெரியவில்லை...
தாங்கள் செய்வது தவறு என்பதை
மோசே வந்து சொன்னவுடன்
திரும்பி வர முயற்சித்தார்கள்
இஸ்ரயேல் மக்கள்
இது முதல் வாசகத்தின் சுருக்கம்
தான் எப்படிப்பட்டவன்
என்ற எண்ணம் தெளிவாய் அறிந்தும்கூட
கிறிஸ்துவின் அழைப்பிற்காய்
அனைத்தையும் உதறித்தள்ளிவிட்டு
கிறிஸ்துவின் பின்னால் செல்ல
பழைய வாழ்விலிருந்து
திரும்பி வருகிறார் பவுல்
இது இரண்டாம் வாசகத்தின் சுருக்கம்
நற்செய்தியிலோ
ஊதாரி மைந்தன் உவமையில்
இளைய மகன் தன் நிலை உணர்ந்து
தந்தையிடம் திரும்பி வருகின்றான்
இந்த மூன்று வாசகங்களிலுமே
திரும்பி வருதல் என்பது அவசியமாகிறது
இத்தகைய அவசியத்தைத்தான்
நம்மிடமிருந்து ஆண்டவர் எதிர்பார்க்கிறார்
பொருளாதாரத்தில் வீழ்ச்சி
உறவில் சிக்கல்
உணர்வில் தேக்கம்
ஆன்மிகத்தில் தொய்வு
அறிவில் தெளிவின்மை
படிப்பில் மந்தநிலை
புரிந்துகொள்வதில் தயக்க நிலை
தன்னை அறிவில் சிரமம்
பிறரைப் புரிந்துகொள்வதில் தயக்கம்
இவ்வாறாக எல்லாவற்றிலிருந்தும்
திரும்பி வர இயலாத நிலையில்
நான் கடவுளிடம் வந்துவிட்டேன்
என்று சொல்வது எவ்வளவு
பெரிய முட்டாள்தனம்
உணர முயற்சிப்போம்
திரும்பி வர முற்படுவோம்
தளர்வுற்ற நம் முழங்கால்கள்
ஆண்டவர்முன் மண்டியிடட்டும்
திரும்பி வருவதற்கான முயற்சிகள்
எடுக்க முடிவுகள் எடுக்க
கடவுளிடத்தில் கரம் விரித்து கேட்போம்
கரம் விரித்து
நமக்காய் உயிர் விட்டவர்
திரும்பி வருவதற்கான வழியைக் காண்பிப்பார்!


எழுத்துருவாக்கம்
சகோ.மாணிக்கம்
திருச்சி மறைமாவட்டம்