வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



பெங்களூருவில் இந்திய ஆயர்கள் கூட்டம் பிப்ரவரி 2-9

இந்தியாவின் 170க்கும் மேற்பட்ட மறைமாவட்டங்களைச் சேர்ந்த ஏறத்தாழ 200 ஆயர்கள், பெங்களூருவில், பிப்ரவரி 2, இவ்வெள்ளியன்று, தங்களின் 33வது கூட்டத்தைத் தொடங்கியுள்ளனர். பிப்ரவரி 9ம் தேதி வரை நடைபெறும் இக்கூட்டத்தில், மியான்மாரின் யாங்கூன் பேராயர் கர்தினால் சார்லஸ் மாங் போ அவர்கள், சிறப்பு விருந்தினராகக் கலந்துகொண்டு, சிறப்புரையாற்றுவார். இந்தியாவில் திருஅவையின் மறைப்பணியை வலியுறுத்தும் அதேவேளை, பன்மையில் ஒற்றுமையைக் காக்கும் பல்வேறு வழிகளை, ஆயர்கள் இந்தக் கூட்டத்தில், கலந்துரையாட உள்ளனர். இரண்டு ஆண்டுகளுக்கு ஒருமுறை நடைபெறும் இந்திய ஆயர்களின் இக்கூட்டம் “உலகம் முடியும்வரை நான் எந்நாளும் உங்களோடு இருப்பேன் (மத்.28:20)” என்ற தலைப்பில் இடம்பெற்று வருகிறது. CBCI எனப்படும் இந்திய ஆயர்கள் பேரவை, 174 மறைமாவட்டங்களையும், 204 ஆயர்களையும், 64 ஓய்வு பெற்ற ஆயர்களையும் கொண்டு, உலகில் நான்காவது பெரிய கத்தோலிக்க ஆயர்கள் பேரவையாக விளங்குகிறது. (ஆதாரம் : UCAN /வத்திக்கான் வானொலி) [2018-02-03 19:28:06]


சிறுபான்மை கிறிஸ்தவர்கள் ஒன்றுபட்டு வாழ வேண்டும்

இந்தியாவிலுள்ள சிறுபான்மை கிறிஸ்தவ சமூகத்தினர், ஒன்றிணைந்து வாழ வேண்டுமென்று, புதுடெல்லியில், கிறிஸ்தவ ஒன்றிப்பு வாரத்தை முன்னிட்டு நடைபெற்ற நிகழ்வில் கேட்டுக்கொண்டார், டெல்லி பேராயர் அனில் கூட்டோ. ‘மோதல்கள் முதல், ஒன்றிப்பு வரை’ என்ற தலைப்பில், பேராயர் அனில் கூட்டோ அவர்கள் தலைமையில் நடைபெற்ற ஒரு நாள் கருத்தரங்கு மற்றும் செப நிகழ்வில், பல்வேறு கிறிஸ்தவ சபைகளைச் சார்ந்த ஏறத்தாழ 200 பிரதிநிதிகள் கலந்துகொண்டனர். கத்தோலிக்கத் திருஅவையில் புதுப்பித்தலைக் கொணரும் நோக்கத்தில், மார்ட்டின் லூத்தர் ஆரம்பித்த சீர்திருத்த நிகழ்வின் 500ம் ஆண்டு இவ்வாண்டு சிறப்பிக்கப்படுவதைக் குறிப்பிட்டுப் பேசிய பேராயர் அனில் கூட்டோ அவர்கள், பல்வேறு கிறிஸ்தவ சபைகள் பற்றிய சரியான புரிதல் இல்லாத இந்தியா போன்ற நாடுகளில், கிறிஸ்தவர்களிடையே ஒற்றுமை மிகவும் அவசியம் என்று கூறினார். 130 கோடி மக்கள் வாழும் இந்தியாவில், 2 கோடியே 70 இலட்சம் பேர், அதாவது 2.3 விழுக்காட்டினரே கிறிஸ்தவர்கள் என்பது குறிப்பிடத்தக்கது. மேலும், பாகிஸ்தான் ஆயர் பேரவையின் பல்சமய மற்றும் கிறிஸ்தவ ஒன்றிப்பு பணிக்குழு, கிறிஸ்தவ ஒன்றிப்பு வாரத்தை முன்னிட்டு, செப நிகழ்வு ஒன்றை நடத்தி, இந்தியாவுக்கும், பாகிஸ்தானுக்கும் இடையே அமைதி நிலவ வேண்டுமென்று செபித்துள்ளது. இவ்விரு நாடுகளும் பிரிந்து எழுபது ஆண்டுகளுக்குமேல் ஆகியுள்ள இவ்வேளையில், ஒப்புரவு இயலக்கூடியதே என்றும், இச்செப நிகழ்வில் கூறப்பட்டது என, பீதேஸ் செய்தி கூறியுள்ளது. (ஆதாரம் : UCAN/Fides/வத்திக்கான் வானொலி) [2018-01-28 22:19:12]


தாக்கப்பட்டவர்களை மட்டும் கைது செய்துள்ள காவல்துறை

ஜம்மு-காஷ்மீர் பகுதியில் 300 மத தீவிரவாதிகளைக் கொண்ட கும்பல் ஒன்று, பெந்தக்கோஸ்தே கோவில் ஒன்றையும், கிறிஸ்தவர்களின் பல கடைகளையும் தீயிட்டுக் கொளுத்தியுள்ளது. இரண்டு ஆண்டுகளுக்கு முன்னர், இந்து மதத்திலிருந்து கிறிஸ்தவத்திற்கு மாறிய ஒரு பெண்ணை, அவரின் கணவர் கொலை செய்திருக்கலாம் என சந்தேகத்தை எழுப்பி, அந்த பெண் கட்டாயமாக மதம்மாற வைக்கப்பட்டார் எனவும் தற்போது கூறி, கிறிஸ்தவர்களைத் தாக்கியுள்ளது இந்து மத கும்பல் ஒன்று. காஷ்மீர் பகுதியில், கிறிஸ்தவர்கள் எப்போதும் பட்டறைக் கல்லுக்கும் சுத்தியலுக்கும் இடையே அகப்பட்டவர்களாக இருப்பதாகக் கூறும் இந்திய கிறிஸ்தவர்களின் உலக அவையின் தலைவர் Sajan K George அவர்கள், பாரதீய ஜனதா கட்சியும், இஸ்லாமிய கட்சியும் இணைந்து கூட்டணி ஆட்சி நடத்தும் மாநிலத்தில், மிகச்சிறுபான்மையினராக இருக்கும் கிறிஸ்தவர்கள், அதிலும் குறிப்பாக பெந்தக்கோஸ்தே கிறிஸ்தவ சபையினர், மிகப்பெரும் நெருக்கடிகளை அனுபவித்து வருகின்றனர் என்றார். கிறிஸ்தவ மதத்திற்கு மாறிய ரிங்கு குமார் எனபவரை திருமணம் புரிந்து, தானும் கிறிஸ்தவ மதத்தைத் தழுவிய சீமா தேவி என்பவர், இம்மாதம் 15ம் தேதி, நோயின் காரணமாக உயிரிழந்ததைத் தொடர்ந்து, அவர் இரண்டாண்டுகளுக்கு முன்னர் கட்டாயமாக மதமாற்றம் செய்யப்பட்டார் எனவும், அவர் கணவரே சீமாதேவியைக் கொலை செய்துள்ளார் எனவும் பொய்க் குற்றம் சாட்டி, பஜ்ரங்தள் இளையோர் தீவிரவாத கும்பல் ஒன்று, Nowshera கிராமத்தில் உள்ள கோவிலினுள் புகுந்து, அங்கு வழிபாட்டில் கலந்துகொண்டோரைத் தாக்கி, கோவிலை சேதப்படுத்தியுள்ளதுடன், அனைவரும் இந்து மதத்திற்குத் திரும்ப வேண்டும் என அச்சுறுத்தியுள்ளது. சீமாதேவியின் கணவர் ரிங்கு குமார் உட்பட 7 கிறிஸ்தவர்களைக் கைது செய்துள்ள காவல்துறை, கோவிலையும், கிறிஸ்தவர்களின் கடைகளையும் தாக்கியுள்ள தீவிரவாதிகளைச் சுதந்திரமாக அலையவிட்டுள்ளது என்று செய்திகள் கூறுகின்றன. (ஆதாரம் : AsiaNews /வத்திக்கான் வானொலி) [2018-01-23 23:11:21]


சாகர், இடுக்கி சீரோ-மலபார் மறைமாவட்டங்களுக்கு புதிய ஆயர்கள்

இந்தியாவின் சாகர் சீரோ-மலபார் மறைமாவட்டத்தின் புதிய ஆயராக, அருள்பணி ஜேம்ஸ் அத்திக்கலாம் அவர்களை, திருத்தந்தை பிரான்சிஸ் அவர்கள், இவ்வெள்ளியன்று நியமித்துள்ளார். சாகர் சீரோ-மலபார் மறைமாவட்டத்தின் ஆயராகப் பணியாற்றிய அந்தோனி சிரியாத் அவர்களின் பணி ஓய்வை ஏற்றுக்கொண்ட திருத்தந்தை, அம்மறைமாவட்டத்திற்குப் புதிய ஆயரை நியமித்துள்ளார். போபாலில், நிர்மல் ஜோதி மனநல மையத்தின் இயக்குனராகப் பணியாற்றிவந்த, புதிய ஆயர், ஜேம்ஸ் அத்திக்கலாம் அவர்கள், 1958ம் ஆண்டு, கேரளாவின் சங்கனாச்சேரி மறைமாவட்டத்தைச் சார்ந்த புலின்குன்னு என்ற ஊரில் பிறந்தவர். இவர், உரோம் அகுஸ்தீனியானம் பல்கலைக்கழகத்தில் திருஅவைத்தந்தையர் இறையியலில் முனைவர் பட்டம் பெற்றிருப்பவர். மேலும், இந்தியாவின் இடுக்கி சீரோ-மலபார் மறைமாவட்டத்தின் புதிய ஆயராக, அருள்பணி ஜான் நெல்லிக்குன்னல் அவர்கள், இவ்வெள்ளியன்று நியமிக்கப்பட்டுள்ளார். கேரளாவின் மங்களப்புழா புனித யோசேப்பு பாப்பிறை குருத்துவக் கல்லூரியில், மெய்யியல் துறைக்குத் தலைவராகப் பணியாற்றிவரும் புதிய ஆயர், அருள்பணி ஜான் நெல்லிக்குன்னல் அவர்கள், பாளை மறைமாவட்டத்தின், கடப்பிளாமாட்டம் என்ற ஊரில், 1973ம் ஆண்டு பிறந்தவர். உரோம் ஆஞ்சலிக்கம் பாப்பிறை பல்கலைக்கழகத்தில் மெய்யியலில் முனைவர் பட்டம் பெற்றிருப்பவர், புதிய ஆயர், அருள்பணி ஜான் நெல்லிக்குன்னல். (ஆதாரம் : வத்திக்கான் வானொலி) [2018-01-13 00:54:26]


கத்தோலிக்கப் பள்ளிகளில் இந்துசமய வழிபாட்டைத் திணிப்பது..

இந்தியாவில், கத்தோலிக்கப் பள்ளிகளில் இந்துக் கடவுள்கள் வழிபாட்டைத் திணிக்க விரும்பும் அனைவரும், தேசபக்தர்கள் அல்ல, மாறாக, தேசபக்திக்கு எதிரானவர்கள் மற்றும் பயங்கரவாதி போன்றவர்கள் என்று, இந்திய ஆயர் பேரவையின் பொதுச் செயலர், ஆயர் தியோடர் மஸ்கரீனஸ் அவர்கள் கூறினார். இந்தியாவின் மத்திய பிரதேச மாநிலத்தின் Vidishaவில் புனித மேரி கத்தோலிக்க கல்லூரிக்கு முன்பாக, அகில் பாரத்ய வித்யார்த்தி பரிஷத் (ABVP) அமைப்பின் ஏறத்தாழ 900 உறுப்பினர்கள் கூடி, பாரத மாதாவுக்கு ஆரத்தி எடுப்பதற்கு அனுமதியளிக்க வேண்டும் என்று வலியுறுத்தி வருகின்றனர். இந்நிகழ்வையொட்டி ஆசியச் செய்தியிடம் கருத்து தெரிவித்த, ஆயர் மஸ்கரீனஸ் அவர்கள், இந்த அமைப்பினரின் இந்நடவடிக்கை, இந்திய அரசியல் அமைப்புக்கு முரணானது, சனநாயகத்திற்கு எதிரானது மற்றும், தனிப்பட்டவரின் சுதந்திரத்தை மீறுவதாக உள்ளது என்று குறை கூறினார். ஏறத்தாழ 900 பயங்கரவாதிகள், தங்களின் வழிபாட்டை நடத்துவோம் என்று, கல்லூரிக்கு முன்பாக அச்சுறுத்திக்கொண்டிருக்கும்வேளை, இந்நிலைமையைச் சீர்படுத்தி, பாதுகாப்பு அளிப்பதற்கென, இந்திய உள்துறை அமைச்சகம் 400 காவல்துறையினரை நிறுத்தியுள்ளதற்கு தனது நன்றியையும் தெரிவித்துள்ளார், ஆயர் மஸ்கரீனஸ். (ஆதாரம் : AsiaNews /வத்திக்கான் வானொலி) [2018-01-06 01:35:22]


கேரளாவில் சிலுவை சேதமாக்கப்பட்டதற்கு எதிராக ஊர்வலம்

கேரளாவில், சிலுவை ஒன்று சேதமாக்கப்பட்டதை எதிர்த்து, அம்மாநிலத் தலைநகரான திருவனந்தபுரத்தில், ஊர்வலம் மேற்கொண்ட மனித உரிமை ஆர்வலர்கள் மீது, காவல்துறை நடத்திய அடிதடியில், ஓர் அருள்சகோதரி உட்பட எட்டு ஆர்வலர்கள் காயமடைந்துள்ளனர் என்று செய்திகள் கூறுகின்றன. கேரள இலத்தீன் வழிபாட்டுமுறை திருஅவையின் கத்தோலிக்க பெண்கள் அமைப்பு ஏற்பாடு செய்த ஊர்வலத்தில், காவல்துறைக்கும், மனித உரிமை ஆர்வலர்களுக்கும் இடையே நடந்த மோதல், கேரள வனத்துறை அமைச்சர் கே.ராஜூ அவர்கள் இல்லத்திற்கு அருகில் இச்செவ்வாயன்று இடம்பெற்றுள்ளது. மலைப்பகுதியில் உள்ள கிராமம் ஒன்றில், சிலுவை ஒன்று சேதமாக்கப்பட்டதை எதிர்த்து நடந்த, இந்த ஊர்வலத்தில், பல அருள்சகோதரிகள், சிறார் உட்பட பெருமளவான மக்கள் கலந்துகொண்டனர். Bonacaud மலை உச்சியில், குருசுமாலா கிராமத்தில் சிலுவைகள் அழிக்கப்பட்டிருந்ததையொட்டி, உள்ளூர் அரசு நிர்வாகத்திற்கும், கிறிஸ்தவர்களுக்கும் இடையே, கடந்த ஆகஸ்ட் மாதத்திலேயே பிரச்சனை வெடித்தது என்று செய்திகள் தெரிவிக்கின்றன. (ஆதாரம் : Agencies /வத்திக்கான் வானொலி) [2018-01-03 20:58:52]


துன்புறுவோரின் உணர்வுகளைப் புரிந்துகொண்டவர்களாக வாழ.

இந்தியாவில், 2008ம் ஆண்டில் கந்தமால் மாவட்டத்தில் கிறிஸ்தவர்க்கெதிராக இடம்பெற்ற வன்முறைக்குப் பலியானவர்கள், மறைசாட்சிகள் என்று, இந்திய தலத்திருஅவை அதிகாரி ஒருவர் கூறினார். திருப்பீட சீர்திருத்தத்தில், திருத்தந்தைக்கு ஆலோசனை வழங்கும், C9 எனப்படும், கர்தினால்கள் அவையின் உறுப்பினராகிய, மும்பை பேராயர் கர்தினால் ஆசுவால்டு கிரேசியஸ் அவர்கள், அண்மையில் வத்திக்கானுக்கு வந்திருந்த சமயம், இவ்வாறு தெரிவித்தார். ஒடிசா மாநிலத்தின் கந்தமால் மாவட்டத்தில், இந்து தீவிரவாதிகளின் வன்முறைக்குப் பலியானவர்களின் குடும்பங்கள், மற்றும், அதில் பாதிக்கப்பட்டவர்களை நேரிடையாகச் சந்தித்து, அம்மக்களின் துயரங்களைக் கேட்டறிந்ததாகவும் கூறினார், கர்தினால் கிரேசியஸ். துன்புறும் மக்களின் உணர்வுகளைப் புரிந்துகொண்டவர்களாக நாம் வாழ வேண்டும் என்று கூறிய கர்தினால் கிரேசியஸ் அவர்கள், 2008ம் ஆண்டில் கந்தமாலில் வன்முறைக்குப் பலியான கிறிஸ்தவர்களை, மறைசாட்சிகள் என அறிவிப்பதற்கு எடுக்கப்பட்டுவரும் முயற்சிகளுக்கு, தான் ஆதரவளிப்பதாகவும் கூறினார். 2008ம் ஆண்டில் கந்தமால் மாவட்டத்தில் இடம்பெற்ற கிறிஸ்தவர்க்கெதிரான வன்முறையில், ஏறக்குறைய நூறு பேர் உயிரிழந்தனர் மற்றும், 56 ஆயிரத்துக்கு மேற்பட்டோர் வீடுகளை இழந்தனர். (ஆதாரம் : வத்திக்கான் வானொலி) [2017-12-29 21:59:00]


மத்திய பிரதேச மாநிலத்தில் கிறிஸ்மஸ் நிகழ்வுக்கு எதிர்ப்பு

இந்தியாவின் மத்திய பிரதேச மாநிலத்தில், டிசம்பர் 14, இவ்வியாழன் இரவில், குருத்துவ மாணவர்கள் மற்றும் அருள்பணியாளர்களுக்கு எதிராக இடம்பெற்றுள்ள வன்முறை, மிகுந்த வேதனையும் அதிர்ச்சியும் அளிக்கின்றது என்று, இந்திய ஆயர் பேரவை கூறியுள்ளது. Satna நகரின் புனித எப்ரேம் குருத்துவ கல்லூரியைச் சார்ந்த முப்பது குருத்துவ மாணவர்களும், இரு அருள்பணியாளர்களும், கிறிஸ்மஸ் பாடல் நிகழ்ச்சியை நடத்திக்கொண்டிருந்தவேளையில், அவர்கள் கைது செய்யப்பட்டனர். இந்நிகழ்வு குறித்து கண்டன அறிக்கை வெளியிட்ட, இந்திய ஆயர் பேரவை செயலர், ஆயர் தியோடர் மஸ்கரீனஸ் அவர்கள், கிறிஸ்மஸ் காலத்தில், கடந்த முப்பது ஆண்டுகளாக இந்நிகழ்ச்சி நடத்தப்பட்டு வருகின்றது என்றும், கைது செய்யப்பட்ட அருள்பணியாளர்கள் பற்றி விசாரிக்கச் சென்ற எட்டு அருள்பணியாளர்களும், கைது செய்யப்பட்டுள்ளது மேலும் அதிர்ச்சி தருகின்றது என்றும் தெரிவித்துள்ளார். இவர்கள் மதமாற்றம் செய்வதற்காக இந்நிகழ்ச்சியை நடத்தினர் என்ற குற்றச்சாட்டு, அற்பத்தனமாகவும், விளையாட்டுத்தனமாகவும் உள்ளது என்றுரைத்துள்ள ஆயர் மஸ்கரீனஸ் அவர்கள், தேசியவாதக் குழுவினரால் இந்த வன்முறை தூண்டிவிடப்பட்டுள்ளது என்று குறை கூறியுள்ளார். அருள்பணியாளர்களின் வாகனத்தையும் காவல்நிலையத்திற்கு முன்பாகவே, அந்தக் குழுவினர் தீயிட்டு கொளுத்தியுள்ளது வெட்கத்துக்குரியது எனறும் அந்த அறிக்கை கூறுகின்றது. குருத்துவ மாணவர்கள் கிறிஸ்மஸ் பாடல்களைப் பாடத் தொடங்கியவுடன், அந்தக் குழுவினர் எதிர்ப்புக் கோஷமிட்டனர் என்று, அருள்பணி George Mangalappally அவர்கள் கூறியுள்ளார். இந்தியாவில், 2017ம் ஆண்டில், இதுவரை சிறுபான்மை கிறிஸ்தவர்களுக்கு எதிராக, 650க்கும் மேற்பட்ட தாக்குதல்கள் நடத்தப்பட்டுள்ளன என்று செய்திகள் கூறுகின்றன. (ஆதாரம் : CBCI / வத்திக்கான் வானொலி) [2017-12-20 20:04:29]


பசுவைக் கொலை செய்பவருக்கு மரணதண்டனை அச்சுறுத்தலுக்கு எதிராக கண்டனம்

ஆடுமாடுளைக் கொலை செய்கின்ற அல்லது மாட்டிறைச்சியை ஏற்றுமதி செய்கின்ற மக்களைத் தூக்கிலிடுவோம் என்று இந்து தீவிரவாதக் குழு ஒன்று அச்சுறுத்தியிருப்பதற்கு எதிராக, தனது கண்டனத்தைத் தெரிவித்துள்ளார், இந்திய ஆயர் ஒருவர்.

விஷ்வ இந்து பரிஷத் குழுவின் அச்சுறுத்தல் பற்றி, யூக்கா செய்தியிடம் பேசிய, இந்திய ஆயர் பேரவையின் சிறுபான்மை இனக் குழுக்கள் மற்றும் பிற்படுத்தப்பட்டோர் பணிக்குழுவின் தலைவரான ஆயர் வின்சென்ட் பார்வா அவர்கள், இந்த அமைப்பு, இந்தியாவில் வன்முறை மற்றும் சமயங்களிடையே பிரிவினையை ஏற்படுத்த முயற்சிக்கின்றது என்று கூறினார்.

பசுக்கொலைக்கு எதிராக தேசிய அளவில் சட்டம் கொண்டுவரப்பட வேண்டும் என்றும், இச்சட்டத்தை மீறுகின்றவர்கள் கொலைசெய்யப்பட வேண்டும் என்றும், VHP அமைப்பு வலியுறுத்திவருவது பற்றிக் குறிப்பிட்ட ஆயர் பார்வா அவர்கள், மாட்டிறைச்சியைச் சாப்பிடுவதற்கு, தங்கள் மதங்களில் எந்தத் தடையையும் கொண்டிராத சிறுபான்மை மதத்தவரைக் குறிவைத்து, இவ்வாறு வலியுறுத்தப்படுகின்றது என்று கூறினார். இந்தியாவின் 29 மாநிலங்களில், பசுக்களும், எருதுகளும், காளை மாடுகளும் உள்ளன.

(ஆதாரம் : UCAN / வத்திக்கான் வானொலி) [2017-12-10 12:27:01]


ஆலப்புழை மறைமாவட்டத்தின் வாரிசு ஆயர் நியமனம்

ஆலப்புழை மறைமாவட்டத்தின் வாரிசு ஆயராக, அருள்பணி ஜேம்ஸ் இரபேல் அனப்பரம்பில் (James Raphael Anaparambil) அவர்களை, திருத்தந்தை பிரான்சிஸ் அவர்கள், டிசம்பர் 7, வியாழனன்று நியமித்துள்ளார்.

1962ம் ஆண்டு, கேரளாவின் கண்டக்கடவு எனும் ஊரில் பிறந்த ஜேம்ஸ் இரபேல் அவர்கள், 1986ம் ஆண்டு ஆலப்புழை மறைமாவட்டத்தின் அருள்பணியாளராக திருநிலைப்படுத்தப்பட்டார். உரோம் நகரின் உர்பானியா பல்கலைக் கழகத்தில், விவிலிய இறையியலில், முனைவர் பட்டம் பெற்ற அருள்பணி ஜேம்ஸ் இரபேல் அவர்கள், குரு மாணவர்களுக்கு ஆசிரியராகவும், அதிபராகவும் பணியாற்றியவர்.

கடந்த ஆண்டு முதல், விவிலியத்தின் மலையாள மொழிபெயர்ப்பில் திருத்தங்களைக் கொணரும் பணியில், அருள்பணி ஜேம்ஸ் இரபேல் அனப்பரம்பில் அவர்கள் ஈடுபட்டுள்ளார். ஆலப்புழை மறைமாவட்டத்தின் தற்போதைய ஆயராக 2001ம் ஆண்டு முதல் பணியாற்றிவரும் ஆயர் ஸ்டீபன் அத்திப்பொழியில் அவர்கள், 73 வயது நிறைந்தவர்.

(ஆதாரம் : வத்திக்கான் வானொலி) [2017-12-10 12:21:55]