வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



வாரம் ஓர் அலசல்: மூன்று புனித நாள்களுக்கு ஒரு முன்தயாரிப்பு

உலகெங்கும் கிறிஸ்தவர்கள், மார்ச் 28, இஞ்ஞாயிறன்று புனித வாரத்தைத் துவக்கியுள்ளனர். ஆண்டவரின் பாடுகள் குருத்தோலை ஞாயிறன்று தொடங்கியுள்ள இப்புனித வாரம், இயேசுவின் உயிர்ப்புப் பெருவிழாவோடு நிறைவடைகின்றது. இந்த புனித வாரம், இயேசுவின் பாஸ்கா பேருண்மையைச் சிந்தித்து தியானித்து, நம் வாழ்வு மாற்றத்திற்கு அழைப்பு விடுக்கிறது. இறைவார்த்தையைத் தியானித்து இயேசுவோடு ஆழ்ந்த உறவில் வளரவும், திருநற்கருணையில் அவரோடு வாழவும், திருச்சிலுவைக்கு அருகில் நின்று அவரோடு ஒன்றித்திருப்பதில் ஊக்கம்பெறவும் இப்புனித வாரம் அழைப்பு விடுக்கின்றது. இவ்வாரத்தில், கிறிஸ்தவர்கள், நற்செய்தியில் விவரிக்கப்பட்டுள்ள கிறிஸ்துவின் பாடுகள், மரணம் மற்றும், உயிர்ப்புப் பற்றிய பகுதிகளை வாசித்து தியானிக்கவும், நம் முறிந்த உறவுகளைச் சரிசெய்யவும், குறிப்பாக, நம் உறவுநிலை எவரோடு சரியில்லை என உணர்கின்றோமோ, அவர்களுக்காகச் இறைவேண்டல் செய்யவும், அவர்களுக்கு நம் மன்னிப்பு மற்றும், ஆண்டவரின் நன்மைத்தனத்தை வழங்கவும், கிறிஸ்தவ வாழ்வில் மேலும் வளர்வதற்குத் தேவையான நற்பண்புகளைப் பேணவும், நம்மிடமிருக்கின்ற தவறான பழக்கவழக்கங்களைத் தவிர்த்து வாழவும் இப்புனித வாரத்தில் தாய்த்திருஅவை கிறிஸ்தவர்களுக்கு அழைப்பு விடுக்கிறது. சேலம் மறைமாவட்டத்தின் முன்னாள் ஆயர் மேதகு சிங்கராயன் அவர்கள், இப்புனித வாரத்தில் நாம் வாழவேண்டியமுறை பற்றி இன்றைய நிகழ்ச்சி வழியாக எடுத்துரைக்கிறார். மூன்று புனித நாள்களுக்கு ஒரு முன்தயாரிப்பு – ஆயர் சிங்கராயன் யாராவது நம்மை மனம்நோகச்செய்திருந்தால் அதை மணலில் எழுதிவிடவேண்டும். ஏனென்றால் மன்னிப்பு எனும் காற்று அதனை அழித்துவிடும். மாறாக, யாராவது நமக்கு நன்மை செய்தால் அதைக் கல்லில் எழுதிவிடவேண்டும். ஏனென்றால் அது எப்போதும் மனதிலிருந்து அழியாது. எனவே, கிறிஸ்தவர்கள் மட்டுமல்ல, அனைவருமே, இப்புனித நாள்களில் முறிந்துபோன உறவுகளைச் சரிசெய்வது, உடலுக்கும் உள்ளத்திற்கும் எப்போதுமே நலமளிக்கும். [2021-03-31 00:17:00]


தமிழகத்தில் அறவழிப்பட்ட அரசியல் காப்போம், ஆயர்கள்

வருகிற ஏப்ரல் 6ம் தேதி தமிழகத்தில் நடைபெறவிருக்கும் சட்டமன்றத் தேர்தல் குறித்த ஆயர்களின் நிலைப்பாடு குறித்த மேய்ப்புப்பணி அறிக்கை ஒன்றை, தமிழக ஆயர் பேரவையின் தலைவர், மதுரை பேராயர் அந்தோனி பாப்புசாமி அவர்கள் கையெழுத்திட்டு, மார்ச் 24, இப்புதனன்று வெளியிட்டுள்ளார். தமிழகம் சந்திக்கவிருக்கின்ற தேர்தல், தமிழுக்கும், தமிழகத்திற்கும், இந்தியாவின் கூட்டாட்சித் தத்துவத்திற்கும், அரசியல் சாசனம் வகுக்கும் சனநாயகம், சமத்துவம், சமயச்சார்பின்மை என்னும் மதிப்பீடுகளுக்கும் மிகப் பெரிய சவால்களைச் சந்திக்கும் ஒன்று எனக் கூறும் ஆயரின் அறிக்கை, இத்தேர்தலில், மதச்சார்பற்ற கூட்டணியை ஆதரிப்போம் என்று கூறியுள்ளது. இந்திய நடுவண் அரசின் அண்மைக்கால கொள்கைகள், திட்டங்கள் ஆகிய அனைத்தும் குடிமக்களை அதிகாரப்படுத்துவதாய் இல்லை என்றும், சனநாயக விதிகள் மீறப்படும் வகையில் நடைமுறைப்படுத்தப்படும் கொடுங்கோல் சட்டங்களால், மானுட உரிமைகள் மோசமாக மீறப்படுகின்றன என்றும், அவ்வறிக்கை கூறியுள்ளது. தமிழகத்தை தற்போது ஆளும் அரசு, நடுவண் அரசின் எந்தக் கொள்கையையும் கேள்விக்குள்ளாக்குவதில்லை, மற்றும், அதற்கு வெளிப்படையாக ஆதரவும் அளித்துவருவது, வருத்தம் தருகிறது என்றும், அவ்வறிக்கை கூறியுள்ளது. அ.இ.அ.தி.மு.க. கூட்டணி வெற்றி பெறுவது, மதவாத சக்திகளின் வெற்றியாகவே அமையும் என நம்புகிறோம் என்றும், தமிழக மக்களைக் காத்துவரும் சமுதாய நல்லிணக்கம், தமிழரின் வேலைவாய்ப்பு, மொழிவழிப்பட்ட அடையாளமெல்லாம் சிதைந்துவிடுமோ என்றும் அஞ்சுகிறோம் என்றும் அவ்வறிக்கை கூறுகிறது. சனநாயகம், சமுதாய நீதி, சமத்துவம், உடன்பிறந்த உணர்வு, சமுதாய நல்லிணக்கம், போன்ற இயேசுவின், மற்றும், இந்திய அரசியல் சாசனத்தின் மதிப்பீடுகளை உயிர்பெறச்செய்வதற்கும், தமிழ்மொழி, மரபுகள், தமிழர்தம் வளர்ச்சி மற்றும், சிறுபான்மையினர் நலன் காக்கப்படுவதற்கும், மதச்சார்பற்ற முற்போக்குக் கூட்டணியின் வெற்றியை உறுதிசெய்யும் நோக்குடன் இத்தேர்தலில் கவனத்தோடு கடமையாற்றவேண்டும் என்று அன்புடன் வேண்டுகிறோம் என, தமிழக ஆயர் பேரவையின் அறிக்கை கேட்டுக்கொண்டுள்ளது. (Ind.Sec/Tamil) [2021-03-28 01:24:12]


டெல்லியில் வாழும் புலம்பெயர்ந்த தொழிலாளர்களின் நிலை

இந்தியத் தலைநகரில் வாழும் புலம்பெயர்ந்த தொழிலாளர்கள், குறிப்பாக, வேறு மாநிலத்திலிருந்து வந்து பணிபுரியும் பூர்வீக குடிமக்களின் நிலைகள் குறித்து ஆய்வு ஒன்றை நடத்தியுள்ளது இந்திய திருஅவை கிறிஸ்டோபர் பிரான்சிஸ் - வத்திக்கான் செய்திகள் இந்தியத் தலைநகர் புது டெல்லியில் வாழும் புலம்பெயர்ந்த தொழிலாளர்களின் நிலை மிகவும் சீர்குலைந்த நிலையில் உள்ளதாக, அண்மையில் இந்தியத் திருஅவையால் நடத்தப்பட்ட ஆய்வு ஒன்று தெரிவிக்கிறது. தலைநகரில் வாழும் புலம்பெயர்ந்த தொழிலாளர்கள், குறிப்பாக, வேறு மாநிலங்களிலிருந்து வந்து பணிபுரியும் பூர்வீக குடிமக்களின் நிலைகள் குறித்து ஆய்வு ஒன்றை நடத்திய இந்திய திருஅவையின் புலம்பெயர்ந்த தொழிலாளர் அமைப்பு, இம்மக்கள் போதிய வருமானமின்றியும், போதிய பணியிடப் பாதுகாப்பு இன்றியும், மிகவும் ஏழ்மையில் வாடுவதாகத் தெரிவித்துள்ளது. 'டெல்லிக்கு குடிபெயர்ந்துள்ள பூர்வீக இனத்தவர்: கோவிட் பெருந்தொற்றுக்கு முன்னும் பின்னும்', என்ற தலைப்பில் வெளியிடப்பட்டுள்ள இந்திய ஆயர்களின் அறிக்கையில், மக்களின் புலம்பெயர்தலுக்கு பின்புலத்திலிருக்கும் காரணங்கள், இவர்களின் இன்றையநிலை, அரசு, மற்றும், அரசு-சாரா அமைப்புக்களின் கடமை ஆகியவை ஆராயப்பட்டு, அது குறித்த விவரங்கள் வெளியிடப்பட்டுள்ளன. வறுமை, மற்றும், பிறரால் எளிதில் ஏமாற்றப்படும் நிலை ஆகியவற்றால் துன்புறும் புலம்பெயர்ந்த பூர்வீக இனத்தவரை எவ்வழிகளில் மேம்படுத்தலாம், மற்றும் அவர்களுக்கு உதவலாமென்பது குறித்த ஆலோசனைகளை, அரசுக்கும், அரசு-சாரா அமைப்புகளுக்கும் முன்வைத்துள்ளது, இந்தியத் திருஅவையின் அறிக்கை. புது டெல்லியில் புலம் பெயர்ந்தவர்களாக கட்டடப் பணியில் ஈடுபட்டிருக்கும் பூர்வீக குடியினருள், 91 விழுக்காட்டினர் 50 வயதிற்கு கீழ்ப்பட்டவர் எனவும், மொத்த கட்டடத் தொழிலாளர்களில், 93.3 விழுக்காட்டினர், ஆண்கள் எனவும், பெரும்பான்மையினர், இந்து மதத்தைப் பின்பற்றுபவர்கள் எனவும் தெரிவிக்கிறது, ஆயர்களின் அறிக்கை. டெல்லியில் புலம்பெயர்ந்தவர்களாக வாழும் தொழிலாளர்களுள், 51 விழுக்காட்டினர் இராஜஸ்தானைச் சேர்ந்தவர்களெனவும், 19 விழுக்காட்டினர் மேற்கு வங்கம், 9 விழுக்காட்டினர், அஸ்ஸாம், ஜார்கண்ட், மத்திய பிரதேசம் ஆகியவைகளைச் சேர்ந்தவர்கள் எனவும் கூறும் இந்த ஆய்வறிக்கை, இந்த மக்கள் குடிபெயர்ந்துள்ளதற்கு காரணம், கல்வியின்மை, ஏழ்மை, சொந்த இடங்களில் குறைந்த கூலியுடைய வருமானம் ஆகியவையே என்பதையும் சுட்டிக்காட்டியுள்ளது. (UCAN) [2021-03-28 01:20:15]


அருள்பணி சுவாமிக்கு 4வது முறையாக பிணையல் மறுப்பு

மும்பை டலோஜா சிறையில் 150 நாள்களாக அடைக்கப்பட்டுள்ள 84 வயது நிரம்பிய இயேசு சபை அருள்பணி ஸ்டான் சுவாமி அவர்களை, பிணையலில் விடுவிக்கவேண்டும் என்ற மனுவை, நான்காம் முறையாகத் தள்ளி வைத்துள்ளது, சிறப்பு நீதிமன்றம் ஒன்று. அருள்பணி ஸ்டான் சுவாமி அவர்கள், பார்க்கின்சன் நோயால் பாதிக்கப்பட்டிருப்பது, மற்றும், அவரது முதிர்ந்த வயதைக் காரணம் காட்டி, அவருக்குப் பிணையல் வழங்கப்படவேண்டும் என்று, அவரது வழக்கறிஞர்கள் சமர்ப்பித்திருந்த மனுவை ஏற்க முடியாது என்று, NIA எனப்படும், இந்திய தேசிய புலனாய்வு அமைப்பின், சிறப்பு நீதிமன்றத்தின் சிறப்பு நீதிபதி D.E. Kothlikar அவர்கள் அறிவித்துள்ளார். அருள்பணி ஸ்டான் சுவாமி அவர்களுக்கு பிணையல் மறுக்கப்பட்டுள்ள செய்தி, இந்திய கத்தோலிக்க சமுதாயத்தை மிகவும் வேதனையடையச் செய்துள்ளவேளை, இது குறித்து இயேசு சபையினரின் இந்திய தலைவர் அருள்பணி ஜெரோம் ஸ்தனிஸ்லாஸ் டி’சூசா அவர்களும், தனது ஆழ்ந்த கவலையைத் தெரிவித்து, அறிக்கை ஒன்றையும் வெளியிட்டுள்ளார். நீதி நிலைநாட்டப்படவேண்டும் என்பதற்காக நம்பிக்கையோடு தொடர்ந்து செபிப்போம் என்றும், இந்த வழக்கு, நீதியான முறையில் விசாரிக்கப்பட்டபின், அருள்பணி ஸ்டான் சுவாமி அவர்கள், விடுதலை செய்யப்படுவார் என்றும், அருள்பணி ஜெரோம் டி’சூசா அவர்கள் கூறியுள்ளார். மேலும், அருள்பணி ஸ்டான் சுவாமி அவர்களுக்கு பிணையல் வழங்கப்படவேண்டும் என்பதற்காக, தெற்கு ஆசிய இயேசு சபை அமைப்பும், இணையம்வழி சிறப்பு செபங்களையும் நடத்தி வருகிறது. அருள்பணி ஸ்டான் சுவாமி என்று அவர்களைப் பிணையலில் விடுதலை செய்யவேண்டும் என்று சமர்ப்பிக்கப்பட்ட மனுவை முதலில், பிப்ரவரி 16, பின்னர், மார்ச் 02, பின்னர், மார்ச் 16, பின்னர் மார்ச் 22 என ஒவ்வொரு முறையும் விசாரணை தேதிகளை தள்ளிவைத்து வருகிறது, சிறப்பு நீதிமன்றம். ஜார்க்கண்ட் மாநிலத்தில் பழங்குடி இன மக்களின் உரிமைகள் பாதுகாக்கப்படுவதற்காக உழைத்துவந்த அருள்பணி ஸ்டான் சுவாமி அவர்கள், தேசத் துரோக நடவடிக்கையில் ஈடுபட்டார் என அநீதியாய்க் குற்றம் சுமத்தப்பட்டு கடந்த ஆண்டு அக்டோபர் 8ம் தேதி கைது செய்யப்பட்டு சிறையில் அடைக்கப்பட்டார். (AsiaNews) [2021-03-24 23:51:47]


அருள்பணி சுவாமி: பிணையல் வழங்கும் விசாரணை தள்ளி வைப்பு

தேசத் துரோக நடவடிக்கையில் ஈடுபட்டார் என அநீதியாய் குற்றம் சுமத்தப்பட்டு, ஐந்து மாதங்களுக்குமேல் மும்பை டலோஜா சிறையில் அடைக்கப்பட்டுள்ள வயதுமுதிர்ந்த இயேசு சபை அருள்பணி ஸ்டான் சுவாமி அவர்களை, பிணையலில் விடுவிக்கவேண்டும் என்ற மனுவை, மூன்றாம் முறையாக தள்ளி வைத்துள்ளது, சிறப்பு நீதிமன்றம் ஒன்று. 84 வயது நிரம்பிய அருள்பணி ஸ்டான் சுவாமி அவர்களுக்குப் பிணையல் வழங்கவேண்டும் என்று சமர்ப்பிக்கப்பட்ட மனுவை முதலில், பிப்ரவரி 16, பின்னர், மார்ச் 02, பின்னர், மார்ச் 16 என ஒவ்வொரு முறையும் விசாரணை தேதிகளை தள்ளிவைத்த நீதிமன்றம், தற்போது அந்த தேதியை மார்ச் 22ம் தேதிக்கு தள்ளி வைத்துள்ளது. NIA எனப்படும், இந்திய தேசிய புலனாய்வு அமைப்பின், சிறப்பு நீதிமன்றம், அருள்பணி ஸ்டான் சுவாமி அவர்கள் தொடர்பான பிணையல் மனுவை விசாரிக்கும் தேதிகளை தள்ளிவைத்து வருவதுபற்றி கருத்து தெரிவித்த, இயேசு சபை வழக்கறிஞர் அருள்பணி சந்தானம் அவர்கள், நீதிமன்றம், இந்த விசாரணையை தாமதப்படுத்துவதற்கு, பல்வேறு சாக்குப்போக்குகளைப் பயன்படுத்துகின்றது என்று கூறியுள்ளார். இந்த சிறப்பு நீதிமன்றம், மார்ச் 22ம் தேதியில் இந்த வழக்கை விசாரித்து, அருள்பணி ஸ்டான் சுவாமி அவர்களை விடுதலை செய்யும் என்று நம்பிக்கையோடு உள்ளோம் என்றும், அருள்பணி சந்தானம் அவர்கள், யூக்கா செய்தியிடம் கூறினார். அருள்பணி ஸ்டான் சுவாமி அவர்களைத் தாக்கியுள்ள நரம்பு தளர்ச்சி (பார்க்கின்சன்) நோய், மற்றும், அவரது முதிர்ந்த வயதைக் காரணம் காட்டி பிணையலுக்கு விண்ணப்பிக்கப்பட்டிருந்த மனு பற்றிய விசாரணை தேதி, தொடர்ந்து தள்ளிவைக்கப்பட்டுவருகிறது. (UCAN) [2021-03-22 22:57:00]


இந்தியாவுக்கு புதிய திருப்பீட தூதர், பேராயர் ஜிரெல்லி

இந்தியாவுக்கு, திருப்பீடத்தின் புதிய தூதராக, பேராயர் லெயோபோல்தோ ஜிரெல்லி (Leopoldo Girelli) அவர்களை, மார்ச் 13, இச்சனிக்கிழமையன்று நியமித்துள்ளார், திருத்தந்தை பிரான்சிஸ். 1953ம் ஆண்டு மார்ச் 13ம் தேதி, இத்தாலியின் பெர்கமோ மாவட்டத்தில் Predore எனும் நகரில் பிறந்த பேராயர் ஜிரெல்லி அவர்கள், 1978ம் ஆண்டில் பெர்கமோ மறைமாவட்டத்திற்கென அருள்பணித்துவ வாழ்வுக்குத் திருநிலைப்படுத்தப்பட்டார். 1987ம் ஆண்டில் திருப்பீடத்தின் தூதரகப் பணிகளில் பணியாற்றத் தொடங்கிய பேராயர் ஜிரெல்லி அவர்கள், 2006ம் ஆண்டு ஏப்ரல் 13ம் தேதி, முன்னாள் திருத்தந்தை 16ம் பெனடிக்ட் அவர்களால், இந்தோனேசியாவிற்கும், பின்னர், அதே ஆண்டில் East Timorக்கும் திருப்பீடத் தூதராக நியமிக்கப்பட்டார். இவர், 2011ம் ஆண்டில், சிங்கப்பூர் நாட்டிற்கு, திருப்பீடத் தூதராகவும், மலேசியா, புரூனெய், வியட்நாம் ஆகிய நாடுகளுக்கு, திருப்பீடப் பிரதிநிதியாகவும் நியமிக்கப்பட்டார். 1975ம் ஆண்டில் வியட்நாமிலிருந்து திருப்பீடப் பிரதிநிதி வெளியேற்றப்பட்டபின், அந்நாட்டிற்கு முதன்முறையாக நியமிக்கப்பட்ட பேராயர் ஜிரெல்லி அவர்கள், 2011ம் ஆண்டு ஜூன் 18ம் தேதி, தென்கிழக்கு ஆசிய நாடுகள் அமைப்பிற்குத் (ASEAN) திருப்பீடத் தூதராகவும் நியமிக்கப்பட்டார். 2017ம் ஆண்டு செப்டம்பர் 13ம் தேதியிலிருந்து, இஸ்ரேல் மற்றும், சைப்ரசின் திருப்பீடத் தூதராகவும், எருசலேம் மற்றும், பாலஸ்தீனாவின் திருத்தூதுப் பிரதிநிதியாகவும் பணியாற்றிவந்த பேராயர் ஜிரெல்லி அவர்கள், இச்சனிக்கிழமையன்று, இந்தியாவிற்குத் திருப்பீடத் தூதராக நியமிக்கப்பட்டுள்ளார். [2021-03-14 23:11:29]


மதமாற்றத் தடைச்சட்டத்தால் கிறிஸ்தவ மறையில் ஆர்வம்

இந்தியாவின் பல்வேறு மாநிலங்களில் விதிக்கப்பட்டுள்ள மதமாற்றத் தடைச்சட்டம், இந்துக்கள் உட்பட பல்வேறு மக்களை, கிறிஸ்துவ மறையைப் பற்றி அறிவதற்குத் தூண்டுதலாக அமைந்துள்ளது என்று, போபால் உயர் மறைமாவட்டப் பேராயர் லியோ கொர்னேலியோ அவர்கள் ஆசிய செய்தியிடம் கூறினார். மத உரிமைச் சட்டம் என்ற பெயரில், மத்தியப் பிரதேச மாநிலம், 2020ம் ஆண்டு உருவாக்கி, 2021ம் ஆண்டு சனவரி மாதம் வெளியிட்ட சட்டத்தின்படி, அம்மாநிலத்தில், மதமாற்றமும், இரு மதத்தவருக்கிடையே திருமணங்களும் தடை செய்யப்பட்டுள்ளன. இந்தச் சட்டத்தின்படி, ஒருவர் மதமாற்றம் பெறுவதற்கு முடிவு செய்தால், அவரும், அவருக்கு உதவிசெய்ய முன்வரும் மதப்பணியாளரும், இந்த மதமாற்றம் நடைபெறுவதற்கு 60 நாள்களுக்கு முன்னர், மாவட்ட அலுவலகத்தில் தங்கள் பெயர்களைப் பதிவு செய்யவேண்டும் என்று கூறப்பட்டுள்ளது. இந்த சட்டம் அமலுக்கு வந்த ஒரு மாதத்திற்குள், இந்தச் சட்டத்திற்கு எதிராக செயல்பட்டவர்கள் என்று குற்றம் சாட்டப்பட்டுள்ள 28 பேரில், பாதிக்கும் மேற்பட்டோர் கிறிஸ்தவர்கள் என்று, ஆசிய செய்தி கூறுகிறது. இதைக் குறித்து ஆசிய செய்தியிடம் பேசிய பேராயர் கொர்னேலியோ அவர்கள், அரசு ஏன் கிறிஸ்தவ மதத்தின் மீது இவ்வளவு அச்சம் கொண்டுள்ளது என்ற கேள்வியை, உண்மையான இந்துக்களே தன்னிடம் கேட்பதாகக் கூறியுள்ளார். ஒவ்வோர் ஆண்டும், புனித வாரம், உயிர்ப்பு பெருவிழாவையொட்டி, திருமுழுக்கு வழிபாடுகள் நடைபெறுவது வழக்கம் என்று கூறிய பேராயர் கொர்னேலியோ அவர்கள், இவ்வாண்டும், கோவிட்-19 தடை உத்தரவுகளை மதித்து, திருமுழுக்குகள் நடைபெறும் என்று ஆசிய செய்தியிடம் கூறினார். [2021-02-25 23:02:36]


Dibrugarh மறைமாவட்ட ஆயராக, வாரிசுரிமை ஆயர் நியமனம்

டகிழக்கு இந்தியாவின் அஸ்ஸாம் மாநில Dibrugarh மறைமாவட்ட ஆயர் Joseph Aind அவர்கள், நிர்வாகப் பொறுப்பிலிருந்து ஓய்வுப் பெற்றுள்ளதைத் தொடர்ந்து, அம்மறைமாவட்டத்தின் வாரிசுரிமை ஆயர் Albert Hemrom அவர்களை, மறைமாவட்ட ஆயராக நியமித்துள்ளார் திருத்தந்தை பிரான்சிஸ். 1945ம் ஆண்டு பிறந்து, சலேசிய சபையில் அருள்பணியாளராக திருநிலைப்படுத்தப்பட்டு, Dibrugarh மறைமாவட்ட ஆயராக, கடந்த 25 ஆண்டுகளாக பணியாற்றிய ஆயர் Joseph Aind அவர்கள், பணி ஒய்வு பெறும் வயதை, கடந்த ஆண்டு நவம்பரில் எட்டியதைத் தொடர்ந்து, அவர் சமர்ப்பித்த ஓய்வு விண்ணப்பத்தை ஏற்று, புதிய ஆயரை நியமித்துள்ளார் திருத்தந்தை. Dibrugarh மறைமாவட்டத்தின் Konapathar என்ற இடத்தில் 1969ம் ஆண்டு பிப்ரவரி 27ம் தேதி பிறந்த புதிய ஆயர் Albert Hemrom அவர்கள், 1999ம் ஆண்டு அதே மறைமாவட்டத்தின் அருள்பணியாளராக திருநிலைப்படுத்தப்பட்டதுடன், 2019ம் ஆண்டு பிப்ரவரி மாதம், ஆயராக திருநிலைப்படுத்தப்பட்டு, அம்மறைமாவட்டத்தின் வாரிசுரிமை ஆயராக பொறுப்பேற்றார். [2021-02-16 00:51:10]


வட இந்திய மக்களுக்காக திருத்தந்தையின் செபம்

இந்தியாவின் உத்தரகண்ட் மாநிலத்தில் பனிப்பாறை உடைந்து விழுந்ததில் உருவான வெள்ளம், இரு மின் நிலையங்களின் பணியாளர்களுக்கு ஏற்படுத்திய பாதிப்புக்களை நினைவுகூர்ந்து, திருத்தந்தை பிரான்சிஸ் அவர்கள், பிப்ரவரி 10, இப்புதனன்று தன் அனுதாபங்களையும் இறைவேண்டல்களையும் தெரிவித்தார். திருத்தந்தையர் இல்ல நூலகத்திலிருந்து புதன் மறைக்கல்வி உரையை நேரடி ஒளிபரப்பின் வழியே வழங்கிய திருத்தந்தை, இவ்வுரையின் இறுதியில், வடஇந்தியாவில், மூன்று நாள்களுக்கு முன்னர், பனிப்பாறை உடைந்ததால் உருவான வெள்ளம் ஏற்படுத்திய அழிவினால் பாதிக்கப்பட்ட அனைவரோடும் நான் உள்ளத்தால் நெருங்கியிருக்கிறேன் என்று கூறினார். இந்த இயற்கைப் பேரிடரால் இரு மின்சக்தி நிலையங்களின் பணிகளில் ஈடுபட்டிருந்த தொழிலாளர்கள், உயிரிழந்துள்ளனர் மற்றும் பாதிக்கப்பட்டுள்ளனர் என்று கூறிய திருத்தந்தை பிரான்சிஸ் அவர்கள், இறந்தோருக்காகவும், அவர்களது குடும்பத்தினருக்காகவும் தான் இறைவேண்டல் செய்வதாகவும், வெள்ளத்தால் பாதிக்கப்பட்டோர் அனைவரோடும் தான் உள்ளத்தால் ஒன்றித்திருப்பதாகவும் கூறினார். இந்த பேரிடரில் சிக்கி இதுவரை 32 பேர் உயிரிழந்துள்ளனர். இன்னும் 170க்கும் மேற்பட்டோரை தேடும் பணி தொடர்ந்து நடந்துவருகிறது. அங்குள்ள நீர்மின்நிலையத்தில் அமைந்திருக்கும் சுரங்கப்பாதையில் பணியாளர்கள் பலர் சிக்கிக் கொண்டுள்ளனர். அவர்களை மீட்கும் பணியும், தீவிரமாக நடைபெற்று வருகிறது. மேலும், பிப்ரவரி 12, இவ்வெள்ளியன்று, நிலவு புதிய ஆண்டைச் சிறப்பிக்கும் கோடிக்கணக்கான மக்களுக்கு, தன் வாழ்த்துக்களைத் தெரிவித்த திருத்தந்தை, இந்த புதிய ஆண்டு, அனைத்து மக்களையும் உடன்பிறந்த உணர்வில் ஒருங்கிணைக்க தான் வாழ்த்துவதாகக் கூறினார். உலகளாவிய இந்த பெருந்தொற்று உருவாக்கியுள்ள நெருக்கடிகள், நம் உடல் நலத்தையும், மனநலத்தையும் மட்டும் பாதிக்கவில்லை, மாறாக, நம் சமுதாய நலனையும் பாதித்துள்ளது என்று கூறிய திருத்தந்தை, நிலவின் புதிய ஆண்டைக் கொண்டாடும் வேளையில், அனைவரும் அமைதி நிறைந்த வாழ்வை அனுபவிக்க தான் வாழ்த்துவதாகக் கூறினார். இவ்விரு விண்ணப்பங்களையும் தொடர்ந்து, எல்லா மனிதருக்கும், குறிப்பாக, மிகவும் நலிந்தோரும் வறியோரும் அமைதி, மற்றும் அனைத்து நலன்களை அடைய இறைவேண்டல் செய்வோம் என்று கூறி, தன் உரையை நிறைவு செய்தார். இதற்கிடையே, பிப்ரவரி 9, இச்செவ்வாயன்று, 'இன்னும் பாதுகாப்பான இணையதள நாள்' சிறப்பிக்கப்பட்டதையொட்டி, திருத்தந்தை பிரான்சிஸ் அவர்கள், @pontifex என்ற தன் டுவிட்டர் பக்கத்தில் செய்தியொன்றை வெளியிட்டார். "அனைவரும், நாம் மேற்கொள்ளும் தொடர்புகளுக்கும், பகிர்ந்துகொள்ளும் தகவல்களுக்கும், பொய்யான செய்திகளை வெளிப்படுத்துவதற்கும் பொறுப்பாளர்கள். நாம் அனைவரும் உண்மையின் சாட்சிகள்" என்ற சொற்களை, தன் டுவிட்டர் பதிவாக திருத்தந்தை வெளியிட்டிருந்தார். ஒவ்வோர் ஆண்டும், இரண்டாம் மாதத்தின் இரண்டாம் வாரத்தின் இரண்டாம் நாள், 'இன்னும் பாதுகாப்பான இணையதள நாள்' சிறப்பிக்கப்படுகிறது. 2005ம் ஆண்டு முதல் சிறப்பிக்கப்படும் இந்த உலக நாள், இவ்வாண்டு 18வது முறையாக சிறப்பிக்கப்பட்ட வேளையில், "இன்னும் சிறந்த இணையத்தளத்திற்காக இணைந்து வர" என்பது மையக்கருத்தாக தெரிவு செய்யப்பட்டிருந்தது. [2021-02-10 22:42:40]


பனிப்பாறை சரிவில் பாதிக்கப்பட்டுள்ள குடும்பங்களுக்கு உதவி

உத்தரகாண்ட் மாநிலத்தில் பெரிய பனிப்பாறை சரிந்து விழுந்ததில் ஏற்பட்ட திடீர் வெள்ளப்பெருக்கால் பாதிக்கப்பட்டுள்ள குடும்பங்களுக்குத் தேவையான, அவசரகால உதவிகளை உடனடியாக அனுப்பத் தீர்மானித்துள்ளது, இந்திய கத்தோலிக்க காரித்தாஸ் பிறரன்பு அமைப்பு. உத்தரகாண்ட் மாநிலம், சமோலி மாவட்டத்தில் பனிப்பாறை சரிந்து விழுந்ததில் அலெக்நந்தா, மற்றும், தவுலிகங்கா ஆறுகளில் திடீர் வெள்ளப்பெருக்கு ஏற்பட்டதைத் தொடர்ந்து, அங்குள்ள இரண்டு நீர்மின் நிலையங்கள் அடித்துச் செல்லப்பட்டன. அப்போது அங்கு பணியில் இருந்த 200க்கும் மேற்பட்ட ஊழியர்கள் வெள்ளத்தில் சிக்கிக் கொண்டுள்ளன்னர். இந்தப் பேரிடரில் உயிரிழந்த, காணாமல்போயுள்ள மற்றும், பாதிக்கப்பட்டுள்ள குடும்பங்களுக்கு, தனது ஆறுதலையும், செபங்களையும் தெரிவித்துள்ள, இந்திய ஆயர் பேரவைத் தலைவரான, மும்பை பேராயர் கர்தினால் ஆசுவால்டு கிரேசியஸ் அவர்கள், காணாமல்போயுள்ளவர்கள் விரைவில் கண்டுபிடிக்கப்படுவார்கள் மற்றும், அவர்களுக்குத் தேவையான மருத்துவ உதவிகள் கிடைக்கும் என்ற தன் நம்பிக்கையையும் தெரிவித்துள்ளார். அப்பகுதியில் இடர்துடைப்புப் பணிகளை ஆற்றும் அதிகாரிகளுக்கு, இந்திய காரித்தாஸ் அமைப்பு தேவையான உதவிகளையும் செய்யத் தயாராக உள்ளது என்றும், கர்தினால் கிரேசியஸ் அவர்கள் கூறியுள்ளார். ஆயர் வின்சென்ட் நெல்லைப்பரம்பில் இந்தப் பேரிடர் குறித்து ஆசியச் செய்தியிம் கருத்து தெரிவித்த, உத்தரகாண்ட் மாநிலத்தின் Bijnor ஆயர் வின்சென்ட் நெல்லைப்பரம்பில் (Vincent Nellaiparambil) அவர்கள், பாதிக்கப்பட்டுள்ள பகுதிகளின் கிராமங்களுக்கு ஏற்பட்டுள்ள சேதங்களை இன்னும் சரியாகக் கணிக்க முடியவில்லை என்று கூறினார். பேரிடர் நடைபெற்ற இடத்திலிருந்து 25 கிலோ மீட்டர் தூரத்தில், Bijno மறைமாவட்டத்தின் அருள்பணி Ajo Thelappilly அவர்கள், நிவாரணப் பணிக்குழுவுடன் இருக்கிறார் என்றும், அப்பகுதியின் நிலவரத்தை அவரால் இன்னும் சரியாகக் கூற முடியவில்லை என்றும், அவர் கேட்கும் உதவிகளை மறைமாவட்டம் அனுப்பத் தயாராக உள்ளது என்றும், ஆயர் நெல்லைப்பரம்பில் அவர்கள் கூறியுள்ளார். அந்தோனியோ கூட்டேரஸ் இதற்கிடையே, இந்த பேரிடரில் பலியான மற்றும், பாதிக்கப்பட்ட மக்களுக்கும், இந்திய அரசுக்கும் தன் அனுதாபங்களைத் தெரிவித்துள்ள, ஐக்கிய நாடுகள் நிறுவனத்தின் தலைமைப் பொதுச்செயலர் அந்தோனியோ கூட்டேரஸ் அவர்கள், அப்பகுதியில் இடம்பெறும் மீட்புப்பணிக்கு, தேவைப்பட்டால், ஐ.நா. உதவத் தயார் என்றும் கூறியுள்ளார். இந்த பேரிடரில் சிக்கி இதுவரை 26 பேர் உயிரிழந்துள்ளனர். இன்னும் 197 பேரை தேடும் பணி தொடர்ந்து நடந்து வருகிறது. அங்குள்ள நீர்மின்நிலையத்தில் அமைந்திருக்கும் சுரங்கப்பாதையில் பணியாளர்கள் பலர் சிக்கிக் கொண்டுள்ளனர். அவர்களை மீட்கும் பணியும், தீவிரமாக நடைபெற்று வருகிறது. (AsiaNews/UN) இந்த விபத்து நடந்த பகுதியையொட்டியுள்ள 13 கிராமங்களில் வாழ்கின்ற மக்கள் வெளியே வர முடியாமல் தவிக்கிறார்கள். அவர்களுக்கு ஹெலிகாப்டர்கள் மூலம் உதவிகள் வழங்கப்பட்டு வருகின்றன. [2021-02-10 02:08:18]