வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



கர்தினால் ஆசுவால்ட் கிரேசியஸ் வழங்கிய தவக்காலச் செய்தி

ஆன்மீகச் செல்வங்களை அடைவதற்கும், உண்ணாநோன்பு மற்றும் இரக்கச்செயல்கள் ஆற்றுவதற்கும் தவக்காலம் தகுந்ததொரு காலமாக அமையவேண்டும் என்று, இந்திய ஆயர் பேரவையின் தலைவர், கர்தினால் ஆசுவால்ட் கிரேசியஸ் அவர்கள், தன் தவக்காலச் செய்தியில் அழைப்பு விடுத்துள்ளார். பிப்ரவரி 14, இப்புதனன்று, மும்பையின் கொலாபாவில் அமைந்துள்ள புனித நாமம் பேராலயத்தில் திருநீற்றுப் புதன் திருப்பலியை தலைமையேற்று நடத்திய மும்பைப் பேராயர், கர்தினால் கிரேசியஸ் அவர்கள், ஒப்புரவு அருளடையாளத்தின் வழியே, தவக்காலம், கூடுதல் பொருளுள்ளதாக அமையும் என்று கூறினார். வறியோருக்கு உணவளித்தல், பிறரன்பு நிறுவனங்களில் தன்னார்வத் தொண்டு புரிதல், நோயுற்றோரையும், தனித்து விடப்பட்ட முதியோரையும் சந்தித்தல், மற்றும் இரத்த தானம் செய்தல் போன்ற செயல்கள், தவக்காலத்தின் தனிப்பட்ட முயற்சிகளாக அமையவேண்டும் என்று கர்தினால் கிரேசியஸ் அவர்கள் விண்ணப்பித்துள்ளார். போலி இறைவாக்கினர்களின் வழிநடத்துதல் குறித்து, திருத்தந்தை பிரான்சிஸ் அவர்கள், தன் தவக்காலச் செய்தியில், எச்சரிக்கை விடுத்துள்ளதை, தன் செய்தியில் சுட்டிக்காட்டியுள்ள கர்தினால் கிரேசியஸ் அவர்கள், உலகம் கூறிவரும் ஆலோசனைகள், நம் உள்ளத்தில், இரக்கம், பரிவு, ஆகிய நற்பண்புகளை குறைத்து விடுகின்றன என்று, சுட்டிக்காட்டியுள்ளார். (ஆதாரம் : AsiaNews / வத்திக்கான் வானொலி) [2018-02-15 22:20:59]


இந்தியாவின் வருங்காலம் பற்றி இந்திய ஆயர்கள்

இந்தியாவில் கத்தோலிக்க விசுவாசம் பரவுவதற்குக் காரணமான திருத்தூதர் தோமையார், புனித பிரான்சிஸ் சவேரியார் போன்ற மாபெரும் புனிதர்களுக்கு, இந்தியத் திருஅவை நன்றி செலுத்துகின்றது என்று, கர்தினால் பசிலியோஸ் கிளீமிஸ் அவர்கள் கூறியுள்ளார். கடந்த வாரத்தில் பெங்களூருவில் நிறைவடைந்த இந்திய ஆயர் பேவையின் 33வது பொதுக் கூட்டத்தின் இறுதி அறிக்கையை, பிப்ரவரி 11, இஞ்ஞாயிறன்று வெளியிட்டுப் பேசிய கர்தினால் கிளீமிஸ் அவர்கள், இந்தியாவில் சமய தேசியவாதம் புறக்கணிக்கப்படுமாறு அழைப்பு விடுத்தார். பெண்கள், தலித்துகள், சிறுபான்மை மதத்தவர் போன்றோருக்கு எதிராக, வன்முறையை உற்பத்திசெய்யும் சமய தேசியவாதத்தை, இந்திய நாடு புறக்கணிக்குமாறு கேட்டுக்கொண்டுள்ள கர்தினால் கிளீமிஸ் அவர்கள், உண்மையான அமைதி, நல்லிணக்கம், முன்னேற்றம், வளமை ஆகியவற்றுக்கு தாய் நாட்டை இட்டுச்செல்லும் ஓர் உறுதியான சமய தேசியவாதம் அவசியம் என்று கூறினார். இந்திய அரசியல் அமைப்பால் உறுதி வழங்கப்பட்டுள்ள சட்டங்கள் காக்கப்படுமாறு, நன்மனம் கொண்ட எல்லாருக்கும் அழைப்புவிடுத்துள்ளார், கர்தினால் கிளீமிஸ். பன்மைத்தன்மையில் ஒற்றுமையாய் வாழ்வது குறித்த பல பரிந்துரைகளையும் இந்திய ஆயர்கள், இக்கூட்டத்தின் இறுதியில் வெளியிட்டுள்ளனர். (ஆதாரம் : Fides /வத்திக்கான் வானொலி) [2018-02-14 03:48:41]


ஒடிசாவிலுள்ள ஏழு கிறிஸ்தவ கைதிகளின் விடுதலைக்காக செபம்

ஒடிசா மாநிலத்தில், இந்துமத குரு ஒருவர் கொலை செய்யப்பட்ட வழக்கில், ஒன்பது ஆண்டுகளாக சிறையிலுள்ள ஏழு குற்றமற்ற கிறிஸ்தவர்கள் விடுதலை செய்யப்படுமாறு, இந்திய ஆயர்கள் எல்லாரும் இணைந்து செபம் செய்துள்ளனர். இந்தியாவின் 174 மறைமாவட்டங்களின் ஆயர்கள் பெங்களூருவில் நடத்திய 33வது ஆண்டுக் கூட்டத்தில், கர்தினால் பசிலியோஸ் கிளீமிஸ் அவர்கள், இந்தச் செபத்தை வழிநடத்தியுள்ளார். 2008ம் ஆண்டு ஆகஸ்ட் 8ம் தேதி, 81 வயது நிரம்பிய இந்துமதக் குரு சுவாமி லஷ்மானந்தா அவர்கள், தனது ஆசிரமத்தில், கொல்லப்பட்டதையடுத்து, கந்தமால் மாவட்டத்தில் கிறிஸ்தவர்க்கெதிரான வன்முறை தொடங்கியது. ஆயினும், இக்கொலைக்கு முன்னதாகவே, கிறிஸ்தவர்க்கெதிராகச் சதித்திட்டம் உருவானது என்று செய்திகள் கூறுகின்றன. மேலும், பெங்களூருவில் நடைபெற்ற 33வது ஆண்டுக் கூட்டத்தில், தலித் மக்களின் வாழ்வையும், சமூக நிலையையும் ஊக்குவிப்பதற்கு, இந்திய ஆயர்கள் தங்களின் அர்ப்பணத்தை மீண்டும் உறுதி செய்தனர் என்று, பீதேஸ் செய்தி கூறுகிறது. இவ்வெள்ளியன்று நிறைவடைந்த இக்கூட்டத்தில், தலித் மக்களின் வாழ்வை முன்னேற்றுவது மட்டுமல்லாமல், திருஅவையிலும், நாட்டிலும், அம்மக்கள் பாகுபடுத்தப்படுவது குறித்த விழிப்புணர்வை ஏற்படுத்தவும் ஆயர்கள் தீர்மானித்தனர் என்று, இயேசு சபை அருள்பணி மரிய அருள் ராஜா அவர்கள் கூறியுள்ளார். (ஆதாரம் : Fides /UCAN/வத்திக்கான் வானொலி) [2018-02-11 00:03:31]


கந்தமாலில் கொல்லப்பட்ட கிறிஸ்தவர்களுக்காக செபம்

இந்தியாவின் ஒடிஸ்ஸா மாநிலத்தில் கந்தமால் பகுதியில் ஏற்பட்ட வன்முறைகளில் கொல்லப்பட்ட கிறிஸ்தவர்களை அருளாளர்களாக அல்லது புனிதர்களாக உயர்த்தும் வழிமுறைகள் விரைவில் நிகழவேண்டும் என்ற கோரிக்கையை இறைமக்கள் எழுப்பும் வண்ணம், செபம் ஒன்று உருவாக்கப்பட்டுள்ளது. இந்து அடிப்படை வாதிகளால் கொல்லப்பட்ட கிறிஸ்தவர்களுக்கு புனிதர் பட்டம் வழங்கும் வழிமுறைகளை ஒருங்கிணைப்பதற்காக, கட்டக்-புபனேஸ்வர் உயர்மறைமாவட்டத்தில், உருவாக்கப்பட்டுள்ள உயர் மட்டக் குழுவினர், இந்த செபத்தை, அம்மறைமாவட்டத்தின் அனைத்து பங்குகளுக்கும் கத்தோலிக்க நிறுவனங்களுக்கும் அனுப்பியுள்ளனர். ஆங்கிலத்திலும், ஒடியா மொழியிலும் உருவாக்கப்பட்டுள்ள இந்தச் செபத்தின் பயனாக, கொல்லப்பட்ட கிறிஸ்தவர்கள், மறைசாட்சிய புனிதர்களாக அறிவிக்கப்பட்டால், அது, ஒடிஸ்ஸா மக்களுக்கு மட்டுமல்லாமல், இந்தியத் திருஅவைக்கே ஒரு பெரும் உந்து சக்தியாக அமையும் என்று, ஒருங்கிணைப்புக் குழுவினர் கூறியுள்ளனர். கிறிஸ்தவர்களுக்கு எதிராக, இந்து அடிப்படைவாதிகள், 2007 மற்றும் 2008ம் ஆண்டுகளில், நான்கு மாதங்களாக நடத்திய வன்முறைகளில், ஏறத்தாழ 100 கிறிஸ்தவர்கள் கொல்லப்பட்டனர், 300 ஆலயங்கள் மற்றும் 6000த்திற்கும் அதிகமான இல்லங்கள் தீயிட்டு கொளுத்தப்பட்டன என்று, UCA செய்தி கூறுகிறது. (ஆதாரம் : வத்திக்கான் வானொலி) [2018-02-07 23:44:43]


இந்திய ஆயர்களின் 33வது பொதுக்கூட்டம், ஆரம்ப நிகழ்வுகள்

இயேசு ஆலயத்தில் காணிக்கையாக அர்ப்பணிக்கப்பட்ட விழா, ஆண்டவரோடு சந்திப்பு நடத்த அழைப்பு விடுக்கின்றது, இச்சந்திப்பு, மக்களோடு சந்திப்பு நடத்த நம்மை இட்டுச் செல்கின்றது என்று, இந்திய திருப்பீடத் தூதர் பேராயர் ஜாம்பத்திஸ்தா திகுவாத்ரோ அவர்கள், இந்திய ஆயர்களிடம் கூறினார். இயேசு ஆலயத்தில் காணிக்கையாக அர்ப்பணிக்கப்பட்ட விழாவான பிப்ரவரி 02, இவ்வெள்ளியன்று, இந்திய ஆயர் பேரவையின் 33வது பொதுக்கூட்டத்தின் துவக்கத் திருப்பலியை தலைமையேற்று நிறைவேற்றி மறையுரையாற்றிய பேராயர் திகுவாத்ரோ அவர்கள், ஆயர்கள் மக்களைச் சந்திப்பது பற்றிக் கூறினார். மேலும், இக்கூட்டத்தில், சிறப்பு விருந்தினராகக் கலந்துகொள்கின்ற, மியான்மாரின் யாங்கூன் பேராயர் கர்தினால் சார்லஸ் மாங் போ அவர்கள் நிகழ்த்திய துவக்க உரையில், மியான்மாரில், திருஅவை, பன்மையில் ஒருமையில் எவ்வாறு வாழ்கின்றது என்பதை விளக்கினார். மியான்மாரில் கத்தோலிக்கப் பள்ளிகள் மற்றும் அவற்றின் செயல்பாடுகள் அரசுடைமையாக்கப்பட்டது உட்பட தலத்திருஅவை எதிர்கொண்ட பெரும் சவால்கள், விசுவாசம் மற்றும் துணிச்சலுடன் எவ்வாறு சமாளிக்கப்பட்டன என்பதையும் விளக்கினார், கர்தினால் போ. இந்தியத் திருஅவையில் நூற்றுக்கும் மேற்பட்ட கலாச்சாரக் குழுக்கள் உள்ளன என்றும், காஷ்மீர் முதல் கன்னியாகுமரி வரையிலும், மும்பை முதல் மிசோராம் வரையிலும், இந்திய திருஅவை, பணியே அதிகாரம் என்பதை நிரூபித்துள்ளது என்றும், இம்முறையில், இந்தியத் திருஅவை, உண்மையிலேயே கத்தோலிக்கப் பண்பைக் கொண்டுள்ளது என்றும், கர்தினால் போ அவர்கள் பாராட்டினார். மேலும், இந்நிகழ்வில் உரையாற்றிய, இந்திய ஆயர் பேரவையின் தலைவர் கர்தினால், பசிலியோஸ் கிளீமிஸ் அவர்கள், நாட்டைக் கட்டியெழுப்புவதில் கத்தோலிக்க திருஅவை ஆற்றியுள்ள பணிகளை விளக்கினார். இந்திய ஆயர் பேரவையின் செயலரான, ஆயர் தியோடர் மஸ்கரீனஸ் அவர்கள், இந்திய கத்தோலிக்கத் திருஅவையின் வாழ்வு மற்றும் நடவடிக்கைகள் பற்றிய அறிக்கையை, இக்கூட்டத்தில் சமர்ப்பித்தார். திருத்தந்தை பிரான்சிஸ், நற்செய்தி அறிவிப்பு பேராயத் தலைவர், கீழை வழிபாட்டுமுறை பேராயத் தலைவர், இந்திய குடியரசுத் தலைவர் ராம்நாத் கோவிந்த் ஆகியோர் அனுப்பியிருந்த வாழ்த்துக்களும், செய்திகளும் இந்த தொடக்க நிகழ்வில் வாசிக்கப்பட்டன. பெங்களூரு புனித ஜான் மருத்துவ கல்லூரியில், பிப்ரவரி 2, இவ்வெள்ளியன்று தொடங்கியுள்ள இந்திய ஆயர்களின் 33வது கூட்டம், பிப்ரவரி 9ம் தேதி வரை நடைபெறும். (ஆதாரம் : CBCI /வத்திக்கான் வானொலி) [2018-02-05 20:19:26]


பெங்களூருவில் இந்திய ஆயர்கள் கூட்டம் பிப்ரவரி 2-9

இந்தியாவின் 170க்கும் மேற்பட்ட மறைமாவட்டங்களைச் சேர்ந்த ஏறத்தாழ 200 ஆயர்கள், பெங்களூருவில், பிப்ரவரி 2, இவ்வெள்ளியன்று, தங்களின் 33வது கூட்டத்தைத் தொடங்கியுள்ளனர். பிப்ரவரி 9ம் தேதி வரை நடைபெறும் இக்கூட்டத்தில், மியான்மாரின் யாங்கூன் பேராயர் கர்தினால் சார்லஸ் மாங் போ அவர்கள், சிறப்பு விருந்தினராகக் கலந்துகொண்டு, சிறப்புரையாற்றுவார். இந்தியாவில் திருஅவையின் மறைப்பணியை வலியுறுத்தும் அதேவேளை, பன்மையில் ஒற்றுமையைக் காக்கும் பல்வேறு வழிகளை, ஆயர்கள் இந்தக் கூட்டத்தில், கலந்துரையாட உள்ளனர். இரண்டு ஆண்டுகளுக்கு ஒருமுறை நடைபெறும் இந்திய ஆயர்களின் இக்கூட்டம் “உலகம் முடியும்வரை நான் எந்நாளும் உங்களோடு இருப்பேன் (மத்.28:20)” என்ற தலைப்பில் இடம்பெற்று வருகிறது. CBCI எனப்படும் இந்திய ஆயர்கள் பேரவை, 174 மறைமாவட்டங்களையும், 204 ஆயர்களையும், 64 ஓய்வு பெற்ற ஆயர்களையும் கொண்டு, உலகில் நான்காவது பெரிய கத்தோலிக்க ஆயர்கள் பேரவையாக விளங்குகிறது. (ஆதாரம் : UCAN /வத்திக்கான் வானொலி) [2018-02-03 19:28:06]


சிறுபான்மை கிறிஸ்தவர்கள் ஒன்றுபட்டு வாழ வேண்டும்

இந்தியாவிலுள்ள சிறுபான்மை கிறிஸ்தவ சமூகத்தினர், ஒன்றிணைந்து வாழ வேண்டுமென்று, புதுடெல்லியில், கிறிஸ்தவ ஒன்றிப்பு வாரத்தை முன்னிட்டு நடைபெற்ற நிகழ்வில் கேட்டுக்கொண்டார், டெல்லி பேராயர் அனில் கூட்டோ. ‘மோதல்கள் முதல், ஒன்றிப்பு வரை’ என்ற தலைப்பில், பேராயர் அனில் கூட்டோ அவர்கள் தலைமையில் நடைபெற்ற ஒரு நாள் கருத்தரங்கு மற்றும் செப நிகழ்வில், பல்வேறு கிறிஸ்தவ சபைகளைச் சார்ந்த ஏறத்தாழ 200 பிரதிநிதிகள் கலந்துகொண்டனர். கத்தோலிக்கத் திருஅவையில் புதுப்பித்தலைக் கொணரும் நோக்கத்தில், மார்ட்டின் லூத்தர் ஆரம்பித்த சீர்திருத்த நிகழ்வின் 500ம் ஆண்டு இவ்வாண்டு சிறப்பிக்கப்படுவதைக் குறிப்பிட்டுப் பேசிய பேராயர் அனில் கூட்டோ அவர்கள், பல்வேறு கிறிஸ்தவ சபைகள் பற்றிய சரியான புரிதல் இல்லாத இந்தியா போன்ற நாடுகளில், கிறிஸ்தவர்களிடையே ஒற்றுமை மிகவும் அவசியம் என்று கூறினார். 130 கோடி மக்கள் வாழும் இந்தியாவில், 2 கோடியே 70 இலட்சம் பேர், அதாவது 2.3 விழுக்காட்டினரே கிறிஸ்தவர்கள் என்பது குறிப்பிடத்தக்கது. மேலும், பாகிஸ்தான் ஆயர் பேரவையின் பல்சமய மற்றும் கிறிஸ்தவ ஒன்றிப்பு பணிக்குழு, கிறிஸ்தவ ஒன்றிப்பு வாரத்தை முன்னிட்டு, செப நிகழ்வு ஒன்றை நடத்தி, இந்தியாவுக்கும், பாகிஸ்தானுக்கும் இடையே அமைதி நிலவ வேண்டுமென்று செபித்துள்ளது. இவ்விரு நாடுகளும் பிரிந்து எழுபது ஆண்டுகளுக்குமேல் ஆகியுள்ள இவ்வேளையில், ஒப்புரவு இயலக்கூடியதே என்றும், இச்செப நிகழ்வில் கூறப்பட்டது என, பீதேஸ் செய்தி கூறியுள்ளது. (ஆதாரம் : UCAN/Fides/வத்திக்கான் வானொலி) [2018-01-28 22:19:12]


தாக்கப்பட்டவர்களை மட்டும் கைது செய்துள்ள காவல்துறை

ஜம்மு-காஷ்மீர் பகுதியில் 300 மத தீவிரவாதிகளைக் கொண்ட கும்பல் ஒன்று, பெந்தக்கோஸ்தே கோவில் ஒன்றையும், கிறிஸ்தவர்களின் பல கடைகளையும் தீயிட்டுக் கொளுத்தியுள்ளது. இரண்டு ஆண்டுகளுக்கு முன்னர், இந்து மதத்திலிருந்து கிறிஸ்தவத்திற்கு மாறிய ஒரு பெண்ணை, அவரின் கணவர் கொலை செய்திருக்கலாம் என சந்தேகத்தை எழுப்பி, அந்த பெண் கட்டாயமாக மதம்மாற வைக்கப்பட்டார் எனவும் தற்போது கூறி, கிறிஸ்தவர்களைத் தாக்கியுள்ளது இந்து மத கும்பல் ஒன்று. காஷ்மீர் பகுதியில், கிறிஸ்தவர்கள் எப்போதும் பட்டறைக் கல்லுக்கும் சுத்தியலுக்கும் இடையே அகப்பட்டவர்களாக இருப்பதாகக் கூறும் இந்திய கிறிஸ்தவர்களின் உலக அவையின் தலைவர் Sajan K George அவர்கள், பாரதீய ஜனதா கட்சியும், இஸ்லாமிய கட்சியும் இணைந்து கூட்டணி ஆட்சி நடத்தும் மாநிலத்தில், மிகச்சிறுபான்மையினராக இருக்கும் கிறிஸ்தவர்கள், அதிலும் குறிப்பாக பெந்தக்கோஸ்தே கிறிஸ்தவ சபையினர், மிகப்பெரும் நெருக்கடிகளை அனுபவித்து வருகின்றனர் என்றார். கிறிஸ்தவ மதத்திற்கு மாறிய ரிங்கு குமார் எனபவரை திருமணம் புரிந்து, தானும் கிறிஸ்தவ மதத்தைத் தழுவிய சீமா தேவி என்பவர், இம்மாதம் 15ம் தேதி, நோயின் காரணமாக உயிரிழந்ததைத் தொடர்ந்து, அவர் இரண்டாண்டுகளுக்கு முன்னர் கட்டாயமாக மதமாற்றம் செய்யப்பட்டார் எனவும், அவர் கணவரே சீமாதேவியைக் கொலை செய்துள்ளார் எனவும் பொய்க் குற்றம் சாட்டி, பஜ்ரங்தள் இளையோர் தீவிரவாத கும்பல் ஒன்று, Nowshera கிராமத்தில் உள்ள கோவிலினுள் புகுந்து, அங்கு வழிபாட்டில் கலந்துகொண்டோரைத் தாக்கி, கோவிலை சேதப்படுத்தியுள்ளதுடன், அனைவரும் இந்து மதத்திற்குத் திரும்ப வேண்டும் என அச்சுறுத்தியுள்ளது. சீமாதேவியின் கணவர் ரிங்கு குமார் உட்பட 7 கிறிஸ்தவர்களைக் கைது செய்துள்ள காவல்துறை, கோவிலையும், கிறிஸ்தவர்களின் கடைகளையும் தாக்கியுள்ள தீவிரவாதிகளைச் சுதந்திரமாக அலையவிட்டுள்ளது என்று செய்திகள் கூறுகின்றன. (ஆதாரம் : AsiaNews /வத்திக்கான் வானொலி) [2018-01-23 23:11:21]


சாகர், இடுக்கி சீரோ-மலபார் மறைமாவட்டங்களுக்கு புதிய ஆயர்கள்

இந்தியாவின் சாகர் சீரோ-மலபார் மறைமாவட்டத்தின் புதிய ஆயராக, அருள்பணி ஜேம்ஸ் அத்திக்கலாம் அவர்களை, திருத்தந்தை பிரான்சிஸ் அவர்கள், இவ்வெள்ளியன்று நியமித்துள்ளார். சாகர் சீரோ-மலபார் மறைமாவட்டத்தின் ஆயராகப் பணியாற்றிய அந்தோனி சிரியாத் அவர்களின் பணி ஓய்வை ஏற்றுக்கொண்ட திருத்தந்தை, அம்மறைமாவட்டத்திற்குப் புதிய ஆயரை நியமித்துள்ளார். போபாலில், நிர்மல் ஜோதி மனநல மையத்தின் இயக்குனராகப் பணியாற்றிவந்த, புதிய ஆயர், ஜேம்ஸ் அத்திக்கலாம் அவர்கள், 1958ம் ஆண்டு, கேரளாவின் சங்கனாச்சேரி மறைமாவட்டத்தைச் சார்ந்த புலின்குன்னு என்ற ஊரில் பிறந்தவர். இவர், உரோம் அகுஸ்தீனியானம் பல்கலைக்கழகத்தில் திருஅவைத்தந்தையர் இறையியலில் முனைவர் பட்டம் பெற்றிருப்பவர். மேலும், இந்தியாவின் இடுக்கி சீரோ-மலபார் மறைமாவட்டத்தின் புதிய ஆயராக, அருள்பணி ஜான் நெல்லிக்குன்னல் அவர்கள், இவ்வெள்ளியன்று நியமிக்கப்பட்டுள்ளார். கேரளாவின் மங்களப்புழா புனித யோசேப்பு பாப்பிறை குருத்துவக் கல்லூரியில், மெய்யியல் துறைக்குத் தலைவராகப் பணியாற்றிவரும் புதிய ஆயர், அருள்பணி ஜான் நெல்லிக்குன்னல் அவர்கள், பாளை மறைமாவட்டத்தின், கடப்பிளாமாட்டம் என்ற ஊரில், 1973ம் ஆண்டு பிறந்தவர். உரோம் ஆஞ்சலிக்கம் பாப்பிறை பல்கலைக்கழகத்தில் மெய்யியலில் முனைவர் பட்டம் பெற்றிருப்பவர், புதிய ஆயர், அருள்பணி ஜான் நெல்லிக்குன்னல். (ஆதாரம் : வத்திக்கான் வானொலி) [2018-01-13 00:54:26]


கத்தோலிக்கப் பள்ளிகளில் இந்துசமய வழிபாட்டைத் திணிப்பது..

இந்தியாவில், கத்தோலிக்கப் பள்ளிகளில் இந்துக் கடவுள்கள் வழிபாட்டைத் திணிக்க விரும்பும் அனைவரும், தேசபக்தர்கள் அல்ல, மாறாக, தேசபக்திக்கு எதிரானவர்கள் மற்றும் பயங்கரவாதி போன்றவர்கள் என்று, இந்திய ஆயர் பேரவையின் பொதுச் செயலர், ஆயர் தியோடர் மஸ்கரீனஸ் அவர்கள் கூறினார். இந்தியாவின் மத்திய பிரதேச மாநிலத்தின் Vidishaவில் புனித மேரி கத்தோலிக்க கல்லூரிக்கு முன்பாக, அகில் பாரத்ய வித்யார்த்தி பரிஷத் (ABVP) அமைப்பின் ஏறத்தாழ 900 உறுப்பினர்கள் கூடி, பாரத மாதாவுக்கு ஆரத்தி எடுப்பதற்கு அனுமதியளிக்க வேண்டும் என்று வலியுறுத்தி வருகின்றனர். இந்நிகழ்வையொட்டி ஆசியச் செய்தியிடம் கருத்து தெரிவித்த, ஆயர் மஸ்கரீனஸ் அவர்கள், இந்த அமைப்பினரின் இந்நடவடிக்கை, இந்திய அரசியல் அமைப்புக்கு முரணானது, சனநாயகத்திற்கு எதிரானது மற்றும், தனிப்பட்டவரின் சுதந்திரத்தை மீறுவதாக உள்ளது என்று குறை கூறினார். ஏறத்தாழ 900 பயங்கரவாதிகள், தங்களின் வழிபாட்டை நடத்துவோம் என்று, கல்லூரிக்கு முன்பாக அச்சுறுத்திக்கொண்டிருக்கும்வேளை, இந்நிலைமையைச் சீர்படுத்தி, பாதுகாப்பு அளிப்பதற்கென, இந்திய உள்துறை அமைச்சகம் 400 காவல்துறையினரை நிறுத்தியுள்ளதற்கு தனது நன்றியையும் தெரிவித்துள்ளார், ஆயர் மஸ்கரீனஸ். (ஆதாரம் : AsiaNews /வத்திக்கான் வானொலி) [2018-01-06 01:35:22]