வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



அருள்பணி சுவாமி: மருத்துவமனையைவிட, சிறையே மேல்

கடந்த 2020ம் ஆண்டு அக்டோபர் 9ம் தேதியிலிருந்து மும்பை டலோஜா சிறையில், வைக்கப்பட்டிருக்கும், 84 வயது நிறைந்த இயேசு சபை அருள்பணியாளர் ஸ்டான் சுவாமி அவர்கள், சிறையில் தனது உடல்நிலை மோசமடைந்து வருகிறதென்று, மும்பை உயர்நீதி மன்றத்தில் கூறியுள்ளார். மே 19, இப்புதனன்று, ஒளிவலைக்காட்சி வழியாக, நீதிமன்றத்திடம் தன் உடல்நிலை பற்றி விவரித்த அருள்பணி ஸ்டான் சுவாமி அவர்கள், சிறைக்கு வரும்போது தனது உடல்நிலை ஓரளவு நல்ல நிலையில் இருந்தது என்றும், சிறையிலிருக்கும் ஏழு மாதங்களுக்கு மேற்பட்ட இக்காலக்கட்டத்தில், உடல்நிலை நாளுக்கு நாள் மோசமடைந்து வருகின்றதென்றும் விளக்கிக் கூறினார். சிறையில் வைக்கப்படுவதற்குமுன், நானாக உணவு உண்ண, குளிக்க, ஏதாவது எழுத என்ற நிலை இருந்தது, ஆனால் இவையெல்லாம் மறைந்து, தற்போது, யாராவது ஒருவர் எனக்கு உணவு ஊட்டுகின்றார், மேலும், நானாக எழுதவோ, அல்லது நடக்கவோ முடியாத சூழலுக்கு, டலோஜா சிறை என்னை வைத்துள்ளது, இவையனைத்தையும் கருத்தில் வைத்து, எனக்கு பிணையல் வழங்குமாறு கேட்கிறேன் என்று, அருள்பணி ஸ்டான் சுவாமி அவர்கள், நீதிமன்றத்தில் கூறியுள்ளார். தனது உடல்நிலை காரணமாக, தனக்கு இடைக்கால பிணையல் வழங்கப்படவும், இராஞ்சியில் தன் இல்லத்தில் இருக்கவும், அனுமதி கேட்பதாக, அருள்பணி ஸ்டான் சுவாமி அவர்கள் கூறியவேளை, மும்பை உயர் நீதிமன்றம், அவருக்கு, மும்பையில், அரசு அல்லது, தனியார் மருத்துவமனையில் சிகிச்சை வழங்க முன்வந்துள்ளது. மும்பை JJ அரசு மருத்துவமனையில் சிகிச்சை பெற நீதிமன்றம் கூறியதற்கு மறுப்பு தெரிவித்துள்ள அருள்பணி ஸ்டான் சுவாமி அவர்கள், அந்த மருத்துவமனையில் மூன்று முறை அனுமதிக்கப்பட்டுள்ளேன், அங்குள்ள நிலைமை எனக்கு நன்றாகவே தெரியும், எனவே, எனது உடல்நிலை மோசமடைந்து வந்தாலும் பரவாயில்லை, மருத்துவமனையில் அனுமதிக்கப்படுவதைவிட, சிறையிலேயே இறப்பது மேல் என்று தெரிவித்துள்ளார். மும்பை உயர்நீதிமன்றம், அருள்பணி ஸ்டான் சுவாமி அவர்களுக்கு, பிணையல் வழங்குவது குறித்த விசாரணையை, வரும் ஜூன் மாதத்திற்குத் தள்ளிவைத்துள்ளது. இதற்கிடையே, 84 வயது நிறைந்த இயேசு சபை அருள்பணி ஸ்டான் சுவாமி அவர்கள், கோவிட் 19 பெருந்தொற்றினால் பாதிக்கப்பட்டிருக்கக்கூடும் என்ற ஐயம் எழுந்துள்ளது என்று, உரோம் நகரில் உள்ள இயேசு சபையின் தலைமையகம், அண்மையில் வெளியிட்ட ஓர் அறிக்கையில் கூறப்பட்டுள்ளது. (UCAN) [2021-05-23 23:39:42]


உடல்நலம் குன்றியுள்ள அருள்பணி ஸ்டான் சுவாமி

மும்பை டலோஜா சிறையில் வைக்கப்பட்டிருக்கும் 84வயது நிறைந்த இயேசு சபை அருள்பணியாளர் ஸ்டான் சுவாமி அவர்கள், கோவிட் 19 பெருந்தொற்றினால் பாதிக்கப்பட்டிருக்கக்கூடும் என்ற ஐயம் எழுந்துள்ளது என்று, உரோம் நகரில் உள்ள இயேசு சபையின் தலைமையகம் வெளிட்ட ஓர் அறிக்கையில் கூறப்பட்டுள்ளது. மே 15, கடந்த சனிக்கிழமை முதல், குறிப்பாக, மே 18, இச்செவ்வாய் முதல், அருள்பணி ஸ்டான் சுவாமி அவர்கள் தொடர்பாக நிகழ்ந்துள்ள விவரங்களை, இயேசு சபை தலைமையகம், மே 19, இப்புதன் மாலையில் வெளியிட்டது. அருள்பணி ஸ்டான் சுவாமியைக் குறித்த மருத்துவ அறிக்கையொன்றை, மே 15ம் தேதிக்குள் டலோஜா சிறை சமர்ப்பிக்கவேண்டும் என்று, மே 4ம் தேதி, மும்பை உயர்நீதி மன்றம், கூறியிருந்தும், அவ்வறிக்கையை சிறை அதிகாரிகள் சமர்ப்பிக்கவில்லை. தன் குறைகளைக் குறித்து ஒருபோதும் பெரிதுபடுத்தாத குணம் கொண்ட அருள்பணி ஸ்டான் அவர்கள், பெங்களூருவில் உள்ள இயேசு சபை அருள்பணி ஜோ சேவியர் அவர்களுடன், அண்மையில் மேற்கொண்ட தொலைப்பேசி அழைப்பில், தனக்கு காய்ச்சல், வயிற்றுப்போக்கு இருப்பதாகவும், உடலில் பெரும் சோர்வு இருப்பதாகவும் முதல்முறை கூறினார் என்று, அருள்பணி சேவியர் அவர்கள், செய்தியாளர்களிடம் கூறியுள்ளார். டலோஜா சிறையில் கோவிட் பெருந்தொற்று பரவியிருக்கும் நிலையில், அச்சிறையில் அடைக்கப்பட்டிருந்த பேராசிரியரான முனைவர் Hany Babu அவர்கள், கோவிட் பெருந்தொற்று காரணமாக, மும்பை அரசு மருத்துவமனையில் அனுமதிக்கப்பட்டார். இதைத் தொடர்ந்து, மே 18, இச்செவ்வாயன்று, அருள்பணி ஸ்டான் அவர்களுக்கும், இன்னும் சில சிறைக் கைதிகளுக்கும், கோவிட் கிருமி குறித்த சோதனைகள் ஏதும் நடத்தப்படாமல், கோவிட் தடுப்பூசிகள் அவசர, அவசரமாக வழங்கப்பட்டன என்று, இயேசு சபை தலைமையகத்தின் அறிக்கை கூறுகிறது. உடல்நலம் குன்றிய நிலையில், இச்செவ்வாய் மாலையில், அருள்பணி ஸ்டான் அவர்கள், மும்பையில் உள்ள Jamshedjee Jeejeebhoy மருத்துவமனைக்கு எடுத்துச் செல்லப்பட்டார் என்றும், மீண்டும் அவர் டலோஜா சிறைக்கு கொண்டுவரப்பட்டார் என்றும் இவ்வறிக்கை கூறுகிறது. இந்நிலையில், JJ மருத்துவமனையைச் சார்ந்த மருத்துவர்கள், அருள்பணி ஸ்டான் அவர்களின் உடல்நிலையைக் குறித்த ஒரு முழுமையான அறிக்கையை, மே 21, இவ்வெள்ளி காலை 11 மணிக்குள் மும்பை உயர் நீதி மன்றத்தில் சமர்ப்பிக்கவேண்டும் என்று கட்டளை பிறப்பிக்கப்பட்டுள்ளது. இதற்கிடையே, மும்பை அரசு மருத்துவமனையில் சேர்க்கப்பட்ட முனைவர் Hany Babu அவர்கள், உயர் நீதி மன்றத்தில், அவரது குடும்பத்தினர் விடுத்த விண்ணப்பத்தின் பேரில், மும்பையின் Bridge Candy மருத்துவமனைக்கு மாற்றப்பட்டுள்ளார் என்றும், அங்கு கோவிட் பெருந்தொற்றுக்கென மேற்கொள்ளப்படும் மருத்துவச் செலவை, Hany Babu அவர்கள் குடும்பம் ஏற்றுக்கொள்ளும் என்றும் கூறப்படுகிறது. (SJCuria/ AsiaNews) [2021-05-23 23:34:26]


உடல்நலம் குன்றியுள்ள அருள்பணி ஸ்டான் சுவாமி

மும்பை டலோஜா சிறையில் வைக்கப்பட்டிருக்கும் 84வயது நிறைந்த இயேசு சபை அருள்பணியாளர் ஸ்டான் சுவாமி அவர்கள், கோவிட் 19 பெருந்தொற்றினால் பாதிக்கப்பட்டிருக்கக்கூடும் என்ற ஐயம் எழுந்துள்ளது என்று, உரோம் நகரில் உள்ள இயேசு சபையின் தலைமையகம் வெளிட்ட ஓர் அறிக்கையில் கூறப்பட்டுள்ளது. மே 15, கடந்த சனிக்கிழமை முதல், குறிப்பாக, மே 18, இச்செவ்வாய் முதல், அருள்பணி ஸ்டான் சுவாமி அவர்கள் தொடர்பாக நிகழ்ந்துள்ள விவரங்களை, இயேசு சபை தலைமையகம், மே 19, இப்புதன் மாலையில் வெளியிட்டது. அருள்பணி ஸ்டான் சுவாமியைக் குறித்த மருத்துவ அறிக்கையொன்றை, மே 15ம் தேதிக்குள் டலோஜா சிறை சமர்ப்பிக்கவேண்டும் என்று, மே 4ம் தேதி, மும்பை உயர்நீதி மன்றம், கூறியிருந்தும், அவ்வறிக்கையை சிறை அதிகாரிகள் சமர்ப்பிக்கவில்லை. தன் குறைகளைக் குறித்து ஒருபோதும் பெரிதுபடுத்தாத குணம் கொண்ட அருள்பணி ஸ்டான் அவர்கள், பெங்களூருவில் உள்ள இயேசு சபை அருள்பணி ஜோ சேவியர் அவர்களுடன், அண்மையில் மேற்கொண்ட தொலைப்பேசி அழைப்பில், தனக்கு காய்ச்சல், வயிற்றுப்போக்கு இருப்பதாகவும், உடலில் பெரும் சோர்வு இருப்பதாகவும் முதல்முறை கூறினார் என்று, அருள்பணி சேவியர் அவர்கள், செய்தியாளர்களிடம் கூறியுள்ளார். டலோஜா சிறையில் கோவிட் பெருந்தொற்று பரவியிருக்கும் நிலையில், அச்சிறையில் அடைக்கப்பட்டிருந்த பேராசிரியரான முனைவர் Hany Babu அவர்கள், கோவிட் பெருந்தொற்று காரணமாக, மும்பை அரசு மருத்துவமனையில் அனுமதிக்கப்பட்டார். இதைத் தொடர்ந்து, மே 18, இச்செவ்வாயன்று, அருள்பணி ஸ்டான் அவர்களுக்கும், இன்னும் சில சிறைக் கைதிகளுக்கும், கோவிட் கிருமி குறித்த சோதனைகள் ஏதும் நடத்தப்படாமல், கோவிட் தடுப்பூசிகள் அவசர, அவசரமாக வழங்கப்பட்டன என்று, இயேசு சபை தலைமையகத்தின் அறிக்கை கூறுகிறது. உடல்நலம் குன்றிய நிலையில், இச்செவ்வாய் மாலையில், அருள்பணி ஸ்டான் அவர்கள், மும்பையில் உள்ள Jamshedjee Jeejeebhoy மருத்துவமனைக்கு எடுத்துச் செல்லப்பட்டார் என்றும், மீண்டும் அவர் டலோஜா சிறைக்கு கொண்டுவரப்பட்டார் என்றும் இவ்வறிக்கை கூறுகிறது. இந்நிலையில், JJ மருத்துவமனையைச் சார்ந்த மருத்துவர்கள், அருள்பணி ஸ்டான் அவர்களின் உடல்நிலையைக் குறித்த ஒரு முழுமையான அறிக்கையை, மே 21, இவ்வெள்ளி காலை 11 மணிக்குள் மும்பை உயர் நீதி மன்றத்தில் சமர்ப்பிக்கவேண்டும் என்று கட்டளை பிறப்பிக்கப்பட்டுள்ளது. இதற்கிடையே, மும்பை அரசு மருத்துவமனையில் சேர்க்கப்பட்ட முனைவர் Hany Babu அவர்கள், உயர் நீதி மன்றத்தில், அவரது குடும்பத்தினர் விடுத்த விண்ணப்பத்தின் பேரில், மும்பையின் Bridge Candy மருத்துவமனைக்கு மாற்றப்பட்டுள்ளார் என்றும், அங்கு கோவிட் பெருந்தொற்றுக்கென மேற்கொள்ளப்படும் மருத்துவச் செலவை, Hany Babu அவர்கள் குடும்பம் ஏற்றுக்கொள்ளும் என்றும் கூறப்படுகிறது. (SJCuria/ AsiaNews) [2021-05-20 23:41:21]


கோவா, கர்நாடகா ஆந்திரா – கத்தோலிக்கரின் கொரோனா பணி

வானகத்தந்தையின் பேரன்பிலும், பராமரிப்பிலும் நம்பிக்கை கொண்டு கோவிட்-19 பெருந்தொற்றின் வீரியத் தாக்குதலை நாங்கள் எதிர்கொண்டு வருகிறோம் என்று, டில்லி உயர் மறைமாவட்ட பேராயர் அனில் கூட்டோ அவர்கள் பீதேஸ் செய்திக்கு வழங்கிய ஒரு பேட்டியில் கூறியுள்ளார். கோவிட்-19 பெருந்தொற்றின் நெருக்கடியை சரிவரப் புரிந்துகொள்ளாத அரசு அதிகாரிகளின் அக்கறையற்ற செயல்பாடுகளாலும், தற்போதைய பெரும் தாக்குதலுக்கு ஏற்ற முறையில் தயாரிப்புகளை செய்யாததாலும், இவ்வளவு இழப்புக்களையும், துன்பங்களையும் சந்தித்துவருகிறோம் என்று பேராயர் கூட்டோ அவர்கள் தன் பேட்டியில் சுட்டிக்காட்டினார். இந்தியாவில் உருவாகியிருக்கும் பெரும் நெருக்கடியைக் களைவதற்கு, கோவா, கர்நாடகா ஆந்திரா ஆகிய மாநிலங்களில் கத்தோலிக்கத் திருஅவை மேற்கொண்டுவரும் முயற்சிகளை பீதேஸ் செய்தி குறிப்பிட்டுள்ளது. கோவா-டாமன் உயர் மறைமாவட்டத்தில், கத்தோலிக்க நிறுவனங்கள் பலவும், கொரோனா சிகிச்சை மையங்களாக மாற்றப்பட்டுள்ளன என்றும், ஒய்வுபெற்ற மருத்துவர்கள், தாதியர்கள் உட்பட, பலர், இந்தப் பணிகளில் ஈடுபடுத்தப்பட்டுள்ளனர் என்றும் பேராயர் Filippe Neri Ferrao அவர்கள் கூறியுள்ளார். கர்நாடகா மாநிலத்தில், பல்வேறு துறவுசபைகள், கத்தோலிக்க பிறரன்பு அமைப்புக்களோடு இணைந்து, கொரோனா தொற்றினால் பாதிக்கப்பட்டுள்ள ஆயிரத்திற்கும் மேற்பட்ட மக்களுக்கு, ஒவ்வொரு நாளும், இலவச உணவு வழங்கும் முயற்சிகளை மேற்கொண்டுவருகிறது என்று பீதேஸ் செய்தி கூறுகிறது. ஆந்திர மாநிலத்தில், ஹைதராபாத் எவஞ்செலிக்கல் கிறிஸ்தவ சபை, 'கல்வாரி ஆலயம்' என்ற பெயரில், 300 படுக்கை வசதி கொண்ட ஒரு மையத்தில், பெருந்தொற்றினால் பாதிக்கப்பட்டுள்ள வறியோருக்கு இலவச மருத்துவ உதவிகளும், உணவும் வழங்கி வருகிறது. (Fides) [2021-05-12 21:57:39]


இந்தியாவிற்கு சிங்கப்பூர் கத்தோலிக்க காரித்தாஸ் உதவி

இந்தியாவில் கோவிட்-19 பெருந்தொற்றினால் பாதிக்கப்பட்டுள்ள மக்களுக்கு உதவும் நோக்கத்தில், 3 இலட்சம் சிங்கப்பூர் டாலர்களை உடனடியாக அனுப்ப உள்ளதாக, சிங்கப்பூர் கத்தோலிக்க காரித்தாஸ் அமைப்பு அறிவித்துள்ளது. சிங்கப்பூரின் காரித்தாஸ் அமைப்பும் இந்திய காரித்தாஸும் இணைந்து, தொற்று நோய் பாதிப்பாளர்களுக்காக விடுத்த விண்ணப்பத்தைத் தொடர்ந்து, ஒரு சில நாட்களிலேயே அவர்கள் எதிர்பார்த்ததைவிட மும்மடங்கு நிதியுதவிகள் கிட்டியுள்ளதாக உரைத்த சிங்கப்பூர் காரித்தாஸின் மனிதாபிமான, மற்றும் இடர்துடைப்பு அமைப்பு, நிதி திரட்டல் பிரச்சாரத்தை தற்போது நிறுத்தி, திரட்டிய நிதியை எவ்வகையில் விநியோகிப்பது என்பது குறித்து திட்டமிட்டுவருவதாக தெரிவித்தது. இந்தியாவின் கோவிட் பெருந்தொற்று மீட்புப் பணிகளுக்கு நிதியுதவிகளை ஆற்றவேண்டும் என, சிங்கப்பூர் கத்தோலிக்க காரித்தாஸ் அமைப்பு, சிங்கப்பூரின் செஞ்சிலுவைச் சங்கத்துடன் இணைந்து ஏப்ரல் 28ம் தேதி விண்ணப்பம் ஒன்றை விடுத்ததைத் தொடர்ந்து, நான்கே நாட்களில் 5 இலட்சம் டாலர்களைப் பெற்றுள்ளது. கோவிட் தொற்று நோயால் பாதிக்கப்பட்டுள்ள இந்திய மக்களுக்கு சிகிச்சை வழங்க, ஏழு சிகிச்சை மையங்களை இந்திய காரித்தாஸ் அமைப்புடன் உருவாக்க உள்ளதாக அறிவித்துள்ளது, சிங்கப்பூர் காரித்தாஸ் அமைப்பு. இது தவிர, சுவாசிப்பதற்கு உதவும் மருத்துவக் கருவிகளையும் வாங்கி அனுப்ப உள்ளது, இக்கத்தோலிக்க பிறரன்பு அமைப்பு. 130 கோடி மக்கள் தொகையைக் கொண்ட இந்தியாவில், தற்போது கோவிட் பெருந்தொற்று பரவலின் இரண்டாவது அலை இடம்பெற்றுவரும் நிலையில், கடந்த வாரம் ஒவ்வொரு நாளும் இந்தியாவில் மூன்று இலட்சம் புதிய தொற்றுகளும், ஒவ்வொரு நாளும் மூவாயிரம் இறப்புகளும் இடம்பெற்றதாக அறிவிக்கப்பட்டுள்ளது. இதுவரை இந்தியாவில் 2 கோடிக்கும் மேற்பட்டோர் இந்நோயால் பாதிக்கப்பட்டுள்ளதாகவும், 2 இலட்சத்து 20 ஆயிரம்பேர் இந்நோயால் உயிரிழந்துள்ளதாகவும் பதிவாகியுள்ளது. [2021-05-09 23:39:57]


மே 7ல், இந்தியாவில் கோவிட் 19 ஒழிய நோன்பு, செபம்

கோவிட்-19 பெருந்தொற்றின் இரண்டாவது அலையில், பெரும் உயிரிழப்புக்களையும், மற்ற நெருக்கடிகளையும், இந்தியா எதிர்கொண்டுவரும் இவ்வேளையில், அத்தொற்றுநோய் ஒழியும்படியாக, கிறிஸ்தவர்கள் அனைவரும், மே 07, இவ்வெள்ளியன்று, தேசிய அளவில், உண்ணாநோன்பு மற்றும், இறைவேண்டல்களைக் கடைப்பிடித்தனர். இந்தியாவில் கொரோனா பெருந்தொற்று முற்றிலும் ஒழிய, கிறிஸ்தவர்கள் அனைவரும் ஒரே குடும்பமாக, இணைந்து இறைவனை நோக்கி மன்றாடுவோம் என்று, இந்திய கத்தோலிக்க ஆயர் பேரவையின் தலைவர், கர்தினால் ஆசுவால்டு கிரேசியஸ் அவர்கள், விடுத்திருந்த அழைப்பை ஏற்று, இந்திய இவாஞ்சலிக்கல் கூட்டமைப்பு (EFI), இந்திய தேசிய கிறிஸ்தவ சபைகள் அவை (NCCI) ஆகிய அனைத்து கிறிஸ்தவ சபைகளும், இவ்வெள்ளியன்று, செபங்களோடு, தவ முயற்சிகளையும் மேற்கொண்டன. இச்செப நாளில், இந்தியாவில் கத்தோலிக்கர் அனைவரும், குறைந்தது ஒரு மணி நேரம் திருநற்கருணை ஆராதனையில் பங்குகொண்டு, திருவிவிலியத்தை வாசித்து தியானித்தனர், மற்றும், செபமாலையும் செபித்தனர். இப்பெருந்தொற்றால் உயிரிழந்தவர்கள் இறைவனில் நிறையமைதி அடையவும், உறவுகளை இழந்து தவிக்கும் குடும்பங்கள் இறைவனின் ஆறுதலை அனுபவிக்கவும், இந்நோயால் துன்புறுவோர் விரைவில் குணம்பெறவும், இந்நோயாளிகளுக்குச் சிகிச்சை அளிப்போர் மற்றும், பல்வேறு வழிகளில் உதவுவோரை இறைவன் பாதுகாக்கவும் வேண்டும் என்று, இந்நாளில் கிறிஸ்தவர்கள் அனைவரும் சிறப்பாக இறைவேண்டல்களை எழுப்பினர். இந்தியாவில் இவ்வெள்ளியன்று, கிறிஸ்தவர்கள், இரவு 8 மணிக்கு, வீடுகளில் விளக்கேற்றி, பெருந்தொற்றால் துன்புறுவோருடன் தங்களின் ஒருமைப்பாட்டைத் தெரிவித்தனர்.(Agencies) [2021-05-08 16:27:10]


இந்தியாவில் கோவிட்-19ஆல் துன்புறுவோருடன் திருத்தந்தை தோழமை

இந்தியாவில் கோவிட்-19 பெருந்தொற்றின் இரண்டாவது அலை, வரலாறு காணாத அளவுக்கு பாதிப்புக்களையும், உயிரிழப்புக்களையும் ஏற்படுத்திவரும் இவ்வேளையில், திருத்தந்தை பிரான்சிஸ் அவர்கள், அந்நாட்டினர் அனைவரோடும், தனது ஆன்மீக அருகாமை, மற்றும், ஒருமைப்பாட்டுணர்வைத் தெரிவித்துள்ளார்,. இந்திய கத்தோலிக்க ஆயர் பேரவையின் தலைவரான, மும்பை பேராயர் கர்தினால் ஆசுவால்டு கிரேசியஸ் அவர்களுக்கு, மே 06, இவ்வியாழனன்று அனுப்பியுள்ள செய்தியில், இந்த பயங்கரமான தொற்றுக் கிருமியால் தாக்கப்பட்டுள்ள ஒவ்வொருவரும் குணமடையவும், இறைவனின் ஆறுதலைப் பெறவும், தான் செபிப்பதாகக் குறிப்பிட்டுள்ளார், திருத்தந்தை பிரான்சிஸ். கோவிட்-19 பெருந்தொற்றால் தாக்கப்பட்டுள்ளவர்கள், அவர்களின் குடும்பங்கள், அவர்களுக்குச் சிகிச்சை அளிப்பவர்கள், குறிப்பாக, இத்தொற்றால் தங்களின் உறவுகளை இழந்து கண்ணீர் சிந்துவோர், ஆகிய அனைவரையும் தான் நினைத்து செபிப்பதாகக் கூறியுள்ள திருத்தந்தை, மருத்துவர்கள், செவிலியர்கள், மருத்துவமனை ஊழியர்கள், மருத்துவ அவசர வாகனம் ஓட்டுனர்கள் போன்ற, ஓய்வின்றி பணியாற்றும் அனைவரையும் தன் செய்தியில் குறிப்பிட்டுள்ளார். இந்த பெருந்தொற்று சூழலில் பிறரன்பு மற்றும், உடன்பிறந்த உணர்வோடு பணியாற்றும், இந்திய கத்தோலிக்க சமுதாயத்திற்கு, தன் நன்றியைத் தெரிவித்துள்ள திருத்தந்தை, இந்த பெருந்தொற்றால் உயிரிழந்த பொதுநிலை விசுவாசிகள், அருள்பணியாளர்கள், இருபால் துறவியர் ஆகிய எல்லாரையும் நினைவுகூர்ந்துள்ளார். மீளாத் துயர்நிறைந்த இந்நாள்களில், அனைவரும், கிறிஸ்துவின் உயிர்ப்பிலிருந்து பிறக்கும் எதிர்நோக்காலும், உயிர்ப்பு, மற்றும், புதிய வாழ்வுக்கு கிறிஸ்து அளித்துள்ள வாக்குறுதியில் அசைக்கமுடியாத நம்பிக்கையாலும் அனைவரும் ஆறுதலடைவார்களாக என்று, தன் செய்தியை நிறைவுசெய்துள்ளார், திருத்தந்தை பிரான்சிஸ். இதற்கிடையே, இந்தியாவில், ஒரு வாரத்தில், இரண்டாவது முறையாக, கோவிட்-19 தொற்றுக்கிருமியால் புதிதாகத் தாக்கப்பட்டுள்ளவர்களின் எண்ணிக்கை, நான்கு இலட்சத்தைத் தாண்டியுள்ளது. கடந்த 24 மணி நேரத்தில், SARS-CoV-2 தொற்றுக்கிருமியால், 4,12,262 பேர் பாதிக்கப்பட்டுள்ளனர், மற்றும், 3,980 பேர் இறந்துள்ளனர். இந்தியாவில், கொரோனா பெருந்தொற்று தொடங்கியதிலிருந்து இதுவரை 2,30,168 பேர் மரணமடைந்துள்ளனர். இத்தாலி உதவி கடும் நெருக்கடியை எதிர்கொள்வதற்கு இந்தியா, நாடுகளின் உதவிக்கு அழைப்புவிடுத்திருக்கும்வேளை, இத்தாலி நாடு உத்தரப் பிரதேச மாநிலத்தின் நொய்டாவிலுள்ள மருத்துவமனைக்கு, ஆக்சிஜன் தயாரிக்கும் கருவியை அனுப்பியுள்ளது. மேலும், இந்தியாவில் 17 இத்தாலிய குடிமக்களுக்கு கோவிட்-19 சிகிச்சையளித்துள்ள இந்திய அரசுக்கு, இத்தாலிய அரசு நன்றி தெரிவித்துள்ளது. தலத்திருஅவை பணியாளர்கள் இறப்பு இந்தியாவில், இந்த பெருந்தொற்றை ஒழிப்பதற்கு மேற்கொள்ளப்படும் நடவடிக்கைகளில், கத்தோலிக்கத் திருஅவை பல்வேறு உதவிகளை ஆற்றிவருகின்றது. மேலும், இப்பெருந்தொற்றால், மே 5, இப்புதனன்று, பாண்டிச்சேரி முன்னாள் பேராயர் அந்தோனி அனந்தராயர் அவர்கள் இறைபதம் அடைந்தவேளை, மே 6, இவ்வியாழனன்று மத்திய பிரதேச மாநிலத்தின் Jhabua ஆயர் Basil Bhuriya அவர்கள் இறைவனடி சேர்ந்தார். இந்தியாவில் ஒரு மாத கால அளவில், குறைந்தது இருபது அருள்பணியாளர்கள் இறைபதம் சேர்ந்துள்ளனர். இன்னும் சிலர் அக்கிருமியால் தாக்கப்பட்டுள்ளனர், மற்றும் சிலர் இறந்துகொண்டிருக்கின்றனர் என்று, Matters India செய்திகள் கூறுகின்றன. [2021-05-07 00:34:59]


வேளாங்கண்ணியில் மே 14ம் தேதி, உலகோடு இணைந்து செபமாலை

இந்த மே மாதத்தின் ஒவ்வொரு நாளும் உலகின் ஒவ்வொரு திருத்தலத்திலிருந்து இணையம் வழியாக விசுவாசிகள் ஒன்றுகூடி செபமாலை செபிக்கும் திட்டத்தில், இந்தியாவின் வேளாங்கண்ணி திருத்தலத்திலிருந்து, மே மாதம் 14ம் தேதி, உலகோடு இணைந்து செபமாலை செபித்தல் இடம்பெறும். மே மாதம் 14ம் தேதி உள்ளூர் நேரம் காலை 5.40 மணிக்கு செபமாலை செபிப்பதுடன் துவங்கும் இந்த பக்தி முயற்சி, அன்று இரவு திருப்பலியுடன் எட்டு மணிக்கு நிறைவுக்குவரும். பகல் முழுவதும் இடம்பெறும் இந்த செபமாலை வழிபாட்டில், தமிழ், ஆங்கிலம் ஆகிய இருமொழிகளில் செபமாலை செபிக்கப்படுமென அறிவித்துள்ளார், வேளாங்கண்ணி திருத்தல அதிபர், அருள்பணி பிரபாகர். வத்திக்கான் தகவல் தொடர்பகத்தால் ஒவ்வொரு நாளும் நேரடி ஒளிபரப்பு செய்யப்படும் இந்த தினசரி பக்திமுயற்சி, 14ம் தேதியன்று, vailankannishrine என்ற வேளாங்கண்ணி திருத்தல இணைய பக்கத்திலும், அவர்களின் யுடியூப் பக்கத்திலும் ஒளிபரப்புச் செய்யப்படும். மே மாதத்தின் 31 நாட்களின் இறுதி நாளில், இத்தொடர் செபமாலை பக்திமுயற்சியின் நிறைவு நிகழ்வு, வத்திக்கானில் திருத்தந்தையுடன் இடம்பெறும் என்பதால், உலகின் பல்வேறு பகுதிகளைச் சேர்ந்த 30 திருத்தலங்கள் தேர்ந்தெடுக்கப்பட்டு, ஒவ்வொரு நாளும் ஒரு திருத்தலம் என செபமாலை வழிபாடுகள், உலக மக்களின் இணைய வழி பங்கேற்புடன் இடம்பெற்று வருகின்றன. மே மாதம் முதல் தேதி திருத்தந்தை பிரான்சிஸ் அவர்கள் வத்திக்கானிலிருந்து இந்த மே மாத பக்தி முயற்சியை, உலகில் பெருந்தொற்றால் பாதிக்கப்பட்ட மக்களுக்கென துவக்கி வைக்க, அதே நாளில், இங்கிலாந்தின் Walsingham அன்னை மரியா திருத்தலத்தில் செபமாலை செபித்தலுடன் இந்த உலகளாவிய பக்திமுயற்சி ஆரம்பித்தது. கோவிட்-19 பெருந்தொற்றால் இறந்தோர், இறக்கும்போது அவர்களின் அருகில் இருக்கமுடியாத உறவினர், நோயுற்றோர், குழந்தையை கருவில் சுமக்கும் அன்னையர், மற்றும், பிறக்கவிருக்கும் குழந்தைகள், குழந்தைகள், குடும்பங்கள், சிறார், தகவல் தொடர்பு பணியாளர்கள், முதியோர், மாற்றுத்திறனாளிகள், ஏழைகள், தனியாக வாழ்வோர், சிறையிலிருப்போர், புலம்பெயர்வோர், வன்முறைக்கும் ஆள்கடத்தலுக்கும் உட்படுவோர், உலகத்தலைவர்கள், மருத்துவப்பணியாளர்கள், உலக அமைதி, இராணுவத்தினர், தீயணைப்புப் படையினர், கல்வித்துறையில் இருப்போர், தொழிலாளர்கள், தொழில் தொடர்புடையோர், திருஅவை பணியாளர்கள், திருஅவை என, ஒவ்வொரு நாளும் ஒவ்வொரு நோக்கத்திற்காகச் செபிக்கப்படும் இந்த தொடர் செபமாலை பக்தி முயற்சியில், வேளாங்கண்ணி மாதா திருத்தலம் மே மாதம் 14ம் தேதி கலந்துகொண்டு, அறிவியலாளர்கள், மற்றும் மருத்துவ ஆய்வு நிறுவனங்களுக்காக இந்த செபமாலை பக்தி முயற்சியை ஒப்புக்கொடுக்கும். இறுதி நாளான மே 31ம் தேதி. வத்திக்கான் தோட்டத்தில் இடம்பெறும் இந்த பக்தி முயற்சியின் நிறைவு நிகழ்ச்சியில், இப்பெருந்தொற்று முடிவுக்கு வரவும், சமுதாய, மற்றும், பொருளாதார இயல்பு வாழ்வு தொடங்கப்படவும், என்ற கருத்திற்காகச் செபிக்கப்படும். [2021-05-05 00:45:38]


வேளாங்கண்ணி உட்பட, 30 திருத்தலங்களில் செபமாலை

உலகை வதைத்துவரும் கோவிட்-19 பெருந்தொற்று முடிவுக்கு வரவேண்டும் என்ற வேண்டுதலுடன், உலகெங்கும் உள்ள திருத்தலங்களிலிருந்து செபமாலை பக்தி முயற்சி மேற்கொள்ளப்படும் என்பதை, ஏற்கனவே அறிவித்திருந்த திருப்பீடம், பல்வேறு நாடுகளிலிருந்து, இம்முயற்சியில் இணையும் 30 திருத்தலங்களின் பெயர்களை, ஏப்ரல் 28, இப்புதனன்று வெளியிட்டுள்ளது. அனைத்து கண்டங்களிலிருந்தும் திருத்தலங்கள் இந்தியாவின் தமிழ்நாட்டைச் சேர்ந்த வேளாங்கண்ணி ஆரோக்கிய அன்னை திருத்தலம், பிரான்ஸ் நாட்டின் லூர்து நகர் அன்னை மரியா திருத்தலம், போர்த்துக்கல் நாட்டின் பாத்திமா அன்னை மரியா திருத்தலம், உட்பட, உலகின் அனைத்து கண்டங்களிலிருந்தும் இத்திருத்தலங்கள் தெரிவு செய்யப்பட்டுள்ளன. "திருஅவை முழுவதிலுமிருந்து இறைவனை நோக்கி இடைவிடாத செபம் எழுந்தது" என்ற தலைப்பில் நடைபெறும் இந்த உலகளாவிய முயற்சியை, மே மாதம் முதல் நாள், திருத்தந்தை பிரான்சிஸ் அவர்கள் துவக்கிவைப்பார் என்றும், மே மாதம் 31ம் தேதி, இந்த பக்தி முயற்சியை அவர் நிறைவு செய்துவைப்பார் என்றும், புதியவழி நற்செய்தி அறிவிப்புப்பணி திருப்பீட அவை அறிவித்துள்ளது. நேரடியாக ஒளிபரப்பாகும் செபமாலை மே 1, வருகிற சனிக்கிழமை முதல், ஒவ்வொரு நாளும், உரோம் நேரம் மாலை 6 மணிக்கு நடைபெறவிருக்கும் இந்த பக்தி முயற்சி, திருப்பீடத்தின் அதிகாரப்பூர்வமான அலைவரிசைகளின் வழியே, நேரடி ஒளிபரப்பு செய்யப்படும். புனித பூமியின் நாசரேத்தில் உள்ள கிறிஸ்து பிறப்பு அறிவிப்பு பெருங்கோவில், இத்தாலியின் பொம்பேயி செபமாலை அன்னை திருத்தலம், லொரேத்தோவில் அன்னை மரியாவின் இல்லத்தைக் கொண்டுள்ள திருத்தலம், தென் அமெரிக்காவின் மெக்சிகோவில் அமைந்துள்ள புகழ்பெற்ற குவாதலூப்பே அன்னை மரியா திருத்தலம், பிரேசில் நாட்டின் Aparecida திருத்தலம், அர்ஜென்டீனா நாட்டின் Lujan திருத்தலம் ஆகியவை திருப்பீடம் அறிவித்துள்ள 30 திருத்தலங்களில் இடம்பெற்றுள்ளன. அத்துடன், போஸ்னியாவின் Medjugorje, போலந்து நாட்டின் Częstochowa, துருக்கியின் Meryem Ana, அயர்லாந்தின் Knock, இங்கிலாந்தின் Walsingham ஆகிய இடங்களில் அமைந்துள்ள புகழ்பெற்ற அன்னை மரியா திருத்தலங்களும் இந்த செபமாலை பக்தி முயற்சியில் இணைகின்றன. [2021-04-29 19:11:11]


கத்தோலிக்கப் பள்ளிகள், தற்காலிக மருத்துவ மனைகளாக...

கோவிட்-19 பெருந்தொற்றின் இரண்டாவது அலை, இந்தியாவில் கடும் நெருக்கடியை உருவாக்கியுள்ள வேளையில், பெங்களூரு உயர் மறைமாவட்டம், கத்தோலிக்கப் பள்ளிகளை, தற்காலிக மருத்துவ மனைகளாகப் பயன்படுத்த முன்வந்துள்ளது. இந்த 2வது அலையின் வீரியத்தால், மருத்துவத் துறையினர் சந்தித்துவரும் நெருக்கடியை உணர்கிறோம் என்று கூறிய பெங்களூரு பேராயர் பீட்டர் மச்சாடோ அவர்கள், இந்த நெருக்கடியைக் குறைப்பதற்கு, தங்களால் இயன்ற உதவியை செய்யும் நோக்கத்தில், பள்ளிகளை, மருத்துவ மனைகளாக மாற்றிவருகிறோம் என்று கூறினார். கோவிட் கிருமிக்கு எதிராக, மிக அவசரமான, முக்கியமான சிகிச்சைகளை மருத்துவ மனைகளில் முதலில் பெற்று, ஓரளவு சக்தி அடைந்துள்ள நோயாளிகள், இரண்டாம் நிலை சிகிச்சைகளைப் பெறுவதற்கு, பள்ளிகளில் உருவாக்கப்படும் ஏற்பாடுகள் உதவியாக இருக்கும் என்று, பேராயர் மச்சாடோ அவர்கள் சுட்டிக்காட்டினார். இந்த 2வது அலையுடன் போராடிவரும் மருத்துவப் பணியாளர்கள் அனைவருக்கும் மனமார்ந்த நன்றியை வெளியிட்ட பேராயர் மச்சாடோ அவர்கள், இவர்களுக்குத் தேவையான அனைத்து உதவிகளையும் பெங்களூரு உயர் மறைமாவட்டம் செய்யும் என்ற உறுதியையும் வழங்கியுள்ளதாக, பீதேஸ் செய்திக்குறிப்பு கூறுகிறது. இந்தப் பெருந்தொற்றின் வீரியத்தை கட்டுப்படுத்தாமல் போனால், இன்னும் மிக நெருக்கடியான சூழல்களைச் சந்திக்கவேண்டியிருக்கும் என்று தான் அஞ்சுவதாக, புனித யோவான் மருத்துவக் கல்லூரி மருத்துவமனையின் இயக்குனர், அருள்பணி பால் பரத்தாழம் அவர்கள் கூறியுள்ளார். 'கிறிஸ்தவ மறைப்பணி மருத்துவமனைகள்' என்ற ஒரு கூட்டு முயற்சியின் வழியே, இந்தப் பெருந்தொற்று நேரத்தில், மிக வறுமையுற்றோருக்கு உதவிகள் செய்வதில், புனித மார்த்தா மருத்துவமனை ஈடுபட்டிருப்பதாக, இம்மருத்துவமனையின் தலைவர், அருள்சகோதரி கிரேசி தாமஸ் அவர்கள், பீதேஸ் செய்தியிடம் கூறினார். (Fides) ஒவ்வோர் இல்லத்திற்குள்ளும் திருத்தந்தையின் வார்த்தையை நாங்கள் கொணர்வதில் உங்களின் ஆதரவு [2021-04-29 19:05:32]


பக்க இலக்கங்களை அழுத்தி எல்லா செய்திகளையும் பார்வையிடவும்