வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



தமிழகத்தில் தேர்தல் நாளை மாற்றக்கோரி வலியுறுத்தல்

கிறிஸ்தவர்களின் புனித வார பக்தியுணர்வை மதித்து, தமிழகத்தில் தேர்தல் நாள் மாற்றியமைக்கப்படுமாறு, இந்திய தேர்தல் ஆணையத்தைக் கேட்டுக்கொண்டுள்ளார், தமிழக ஆயர் பேரவை தலைவர், பேராயர் அந்தோனி பாப்புசாமி அவர்கள் மேரி தெரேசா - வத்திக்கான் செய்திகள் தமிழகத்தில், மக்களவைக்கு 39 தொகுதிகளுக்கும், சட்டசபைக்கு 18 தொகுதிகளுக்கும் தேர்தல் நடத்தப்படும் நாள், ஏப்ரல் 18 என அறிவிக்கப்பட்டுள்ளவேளை, புனித வாரத்தைச் சிறப்பிக்கும் கிறிஸ்தவர்களுக்கு, இந்த நாள் ஏற்றதல்ல என்று, தலத்திருஅவை அதிகாரி ஒருவர் தெரிவித்தார். இவ்வாண்டு ஏப்ரல் 18, புனித வியாழன் என்பதால், அந்த நாள் கிறிஸ்தவர்கள் அனைவருக்கும் மிக முக்கியமான நாள் என்றும், இந்நாளில் தேர்தலை நடத்துவது கிறிஸ்தவர்களுக்கு ஏற்றது அல்ல என்றும், தமிழக ஆயர் பேரவை தலைவர், மதுரை பேராயர் அந்தோனி பாப்புசாமி அவர்கள் கூறினார். இந்த நாளை மாற்றக்கோரி, இந்திய தேர்தல் ஆணையத்திடம் விண்ணப்பித்துள்ள பேராயர் பாப்புசாமி அவர்கள், தேர்தல் பணிகளில் ஈடுபடும், அரசு பள்ளி கிறிஸ்தவ ஆசிரியர்கள் மற்றும் ஏனைய கிறிஸ்தவ அலுவலகர்களுக்கு, புனித வியாழன் திருப்பலியில் கலந்துகொள்ள இயலாது என்று குறிப்பிட்டுள்ளார். ஆண்டவர் இயேசு கிறிஸ்து சிலுவையில் அறையுண்டு, இறப்பதற்கு முன்னர், தம் சீடர்களோடு இறுதி இரவு உணவை உண்டதை நினைவுகூரும் புனித வியாழன் திருவழிபாடுகளில், தேர்தல் களப்பணிகளில் ஈடுபட்டுள்ள கிறிஸ்தவர்களுக்கு இயலாத காரியம் என்றும், பேராயர் பாப்புசாமி அவர்கள் குறிப்பிட்டுள்ளார். தமிழகத்தில் மறைமாவட்டங்களின் பல பள்ளிகள், ஆலயங்களின் வளாகத்திற்குள்ளே இருப்பதாலும், இவற்றில் பல பள்ளிகள், வாக்குச்சாவடிகளாக அமைக்கப்படும் என்றும் கூறியுள்ள மதுரை பேராயர் பாப்புசாமி அவர்கள், இந்த நிலை, புனித வியாழன் மற்றும் புனித வெள்ளி திருவழிபாடுகளுக்கு ஆலயங்களுக்கு வருகின்ற கிறிஸ்தவர்களுக்கு இடையூறாக இருக்கும் என்றும் கூறியுள்ளார். இந்தியாவில், வருகிற ஏப்ரல் 11,18,23,29 ஆகிய நாள்களிலும், வருகிற மே 6,12, 19 ஆகிய நாள்களிலும், ஏறக்குறைய பத்து இலட்சம் வாக்குச்சாவடிகளில், ஏறக்குறைய 90 கோடி வாக்காளர்கள் வாக்களிக்கவுள்ளனர். (Fides) [2019-03-15 22:22:01]


நேர்காணல்:CCBI ஆயர் பேரவையின் 31வது நிறையமர்வு கூட்டம்

இந்திய இலத்தீன் வழிபாட்டுமுறை ஆயர்கள் பேரவையின் 31வது நிறையமர்வு கூட்டத்தில், சுற்றுச்சூழல் பாதுகாப்பு, அன்பியங்கள் (SCC) ஆகிய இரண்டிற்கும், புதிய பணிக்குழுக்களை ஆயர்கள் உருவாக்கியுள்ளனர் மேரி தெரேசா – வத்திக்கான் CCBI எனப்படும் இந்திய இலத்தீன் வழிபாட்டுமுறை ஆயர்கள் பேரவையின் 31வது நிறையமர்வு கூட்டம், ‘நற்செய்தியின் மகிழ்வு’ என்ற தலைப்பில், இவ்வாண்டு சனவரி 7ம் தேதி முதல், 14ம் தேதி வரை, மகாபலிபுரத்தில் நடைபெற்றது. ஈராண்டுக்கு ஒருமுறை நடைபெறும் இக்கூட்டத்தில், இந்தியாவின் இலத்தீன் வழிபாட்டுமுறையின் 133 ஆயர்கள் கலந்துகொண்டனர். அச்சமயத்தில், அப்பேரவைக்கு, புதிய பொறுப்பாளர்களும் தேர்ந்தெடுக்கப்பட்டனர். சென்னை மயிலை உயர்மறைமாவட்ட பேராயர் மேதகு ஜார்ஜ் ஆன்டனிசாமி அவர்கள், அதன் உதவித் தலைவராக, மறுமுறையும் தேர்ந்தெடுக்கப்பட்டார். அண்மையில், பேராயர் மேதகு ஜார்ஜ் ஆன்டனிசாமி அவர்கள், வத்திக்கான் வானொலி தலைமையிடத்திற்கு வருகைதந்திருந்த சமயத்தில், அக்கூட்டம் பற்றி பகிர்ந்துகொண்டார் நேர்காணல்:CCBI ஆயர் பேரவையின் 31வது நிறையமர்வு கூட்டம் [2019-03-15 01:31:06]


இந்தியப் பொதுத்தேர்தல்களுக்காக மாரத்தான் செபங்கள்

இந்தியப் பொதுத்தேர்தல்களுக்காக சத்திஸ்கர் மாநிலத்தில் நடைபெற்றுவரும் நீண்ட நேர செபங்களுக்கும், அரசியலுக்கும் எவ்விதத் தொடர்பும் இல்லை – Raigarh ஆயர் கிறிஸ்டோபர் பிரான்சிஸ் - வத்திக்கான் செய்திகள் இந்தியாவில் இவ்வாண்டில் நடைபெறவுள்ள பொதுத்தேர்தல்களை முன்னிட்டு, நீண்ட நேர பக்திமுயற்சிகளைத் தொடங்கியுள்ளனர் கத்தோலிக்கர். பொதுத்தேர்தல்கள் பாதுகாப்பாகவும், அமைதியான முறையிலும் நடைபெற வேண்டும் என, சத்திஸ்கர் மாநிலத்திலுள்ள Jashpur, Raigarh ஆகிய இரு மறைமாவட்டங்களின் 96 பங்குத்தளங்களிலுள்ள கத்தோலிக்கர், இரவு முழுவதும் இடம்பெறும் செப பக்திமுயற்சிகளில் கலந்துகொண்டு வருகின்றனர். கடந்த ஆண்டு நவம்பர் மாநிலத் தேர்தல்களின்போது இதேபோன்று நடத்தப்பட்ட செபங்களின் பலனாகக் கிடைத்த நன்மைகளால் ஊக்கப்படுத்தப்பட்ட கத்தோலிக்கர், இவ்வாண்டு தேசியப் பொதுத் தேர்தல்களுக்கும் அதே வழியைப் பின்பற்றத் தொடங்கியுள்ளனர் என்று, Raigarh ஆயர் Paul Toppo அவர்கள் தெரிவித்தார். கத்தோலிக்கத் தலைவர்கள் குழு ஒன்று, மரச்சிலுவையுடன் ஒவ்வொரு பங்குத்தளமாகச் சென்று, அங்குள்ள மக்களுடன் இரவு முழுவதும் செபத்தில் ஈடுபட்டு வருகிறது எனவும், இந்த செப முயறசிக்கும், அரசியலுக்கும் எந்தத் தொடர்பும் இல்லை என்றும், ஆயர் Paul Toppo அவர்கள் கூறினார். இந்த மாநிலத்தில் கனிம வளங்கள் நிறைந்திருந்தாலும் ஏறக்குறைய 50 விழுக்காட்டினர் வறுமைக்கோட்டிற்குக் கீழ் வாழ்கின்றனர் என்றும் ஆயர் Toppo அவர்கள் கூறினார். விவிலியம் வாசித்தல், செபமாலை செபித்தல், பாடல்கள், விவிலியத்தில் ஒரு தலைப்பு பற்றி விளக்குதல், திருநற்கருணை ஆராதனை, ஆசிர் போன்றவை இந்த இரவு செபத்தில் இடம்பெறுகின்றன. சத்திஸ்கர் மாநிலத்தின் 2 கோடியே 30 இலட்சம் மக்களில், ஏறக்குறைய 98 விழுக்காட்டினர் இந்துக்கள். (UCAN) [2019-03-14 00:20:09]


காஷ்மீர் எல்லைப் பிரச்சனையைத் தீர்ப்பதற்கு உரையாடல்...

மக்களுக்கு இடையேயுள்ள அனைத்து காழ்ப்புணர்வுகளும் கைவிடப்பட்டு, ஒருவர், ஒருவர் மீது நம்பிக்கை வைத்து, நட்புறவைக் கட்டியெழுப்புவதற்கு, உரையாடல் தொடங்கப்பட வேண்டும் மேரி தெரேசா – வத்திக்கான் செய்திகள் இந்தியாவுக்கும் பாகிஸ்தானுக்கும் இடையே நீண்ட காலமாக புகைந்துகொண்டிருக்கும் காஷ்மீர் எல்லைப் பிரச்சனையைத் தீர்ப்பதற்கு, இவ்விரு நாடுகளின் தலைவர்களும் பேச்சுவார்த்தையைத் தொடங்குமாறு, தலத்திருஅவைகளின் அதிகாரிகள் அழைப்பு விடுத்துள்ளனர். இந்தியா மற்றும் பாகிஸ்தான் நாடுகளின் பாப்பிறை மறைப்பணி கழகங்களின் தேசிய இயக்குனர்கள், அருள்பணி அம்புரோஸ் பிச்சைமுத்து அவர்களும், அருள்பணி ஆசிப் ஜான் அவர்களும், இணைந்து வெளியிட்டுள்ள அறிக்கையில் இவ்வாறு கேட்டுக்கொள்ளப்பட்டுள்ளது. காஷ்மீர் எல்லைப் பிரச்சனை, எழுபது ஆண்டுகளுக்கு மேற்பட்ட விவகாரம் மற்றும், இது அரசியல் சார்ந்தது எனினும், இவ்விரு நாடுகளின் பொதுநலனைக் கருத்தில்கொண்டு, நாடுகளின் தலைவர்கள் பேச்சுவார்த்தையைத் தொடங்குமாறு, அந்த இயக்குனர்கள் அழைப்பு விடுத்துள்ளனர். அருள்பணியாளர்கள் பிச்சைமுத்து அவர்களும், ஆசிப் ஜான் அவர்களும் இணைந்து பீதேஸ் செய்திக்கு அளித்த பேட்டியில், அரசியல் எல்லையையும் கடந்து, உடன்பிறப்பு உணர்வு காட்டப்பட வேண்டுமென்று, இந்தியா மற்றும் பாகிஸ்தான் நாடுகளின் கிறிஸ்தவர்கள் விரும்புகின்றனர் என்று தெரிவித்துள்ளனர். போர் அர்த்தமற்றது என்பதும், அமைதியே அனைவருக்கும் பொதுவான பாதை என்பதும் முதலில் தெளிவாக உணரப்பட வேண்டுமென்றும், இவ்விரு நாடுகளிலுள்ள அப்பாவி பொது மக்களுக்கு இடையே எந்தப் பிரச்சனையும் இல்லை என்றும், அவர்கள் பேட்டியில் கூறியுள்ளனர். [2019-03-10 01:00:33]


அபிநந்தனுக்கு, இந்திய திருஅவை ஆர்வமுடன் வரவேற்பு

கடந்த மூன்று நாள்களாக, பாகிஸ்தான் நாட்டின் பிடியில் இருந்து, மார்ச் 01, இவ்வெள்ளியன்று விடுவிக்கப்பட்டு, இந்தியா திரும்பியுள்ள இந்திய விமானப் படை வீரர் அபிநந்தன் வர்த்தமன் அவர்களை, இந்திய கத்தோலிக்கத் திருஅவை மிக ஆர்வமுடன் வரவேற்பதாக, இந்திய ஆயர் பேரவைத் தலைவர், கர்தினால் ஆசுவால்டு கிரேசியஸ் அவர்கள் தெரிவித்தார். விமானப்படை வீரர் அபிந்தன் அவர்கள் நாடு திரும்பியுள்ளது, அவரது குடும்பத்திற்கும், நாட்டிற்கும் மிகுந்த மகிழ்ச்சியளிக்கின்றது என்று தெரிவித்துள்ள, மும்பை பேராயரான, கர்தினால் கிரேசியஸ் அவர்கள், கைதியைத் திருப்பியளித்திருப்பது ஒரு நல்ல அடையாளம் என்று, ஆசியச் செய்தியிடம் தெரிவித்துள்ளார். ஜெனீவா ஒப்பந்தம் போரில் காயமடைந்த கைதிகளை மனிதாபிமானத்துடன் நடத்துவது உட்பட, போர்க் கைதிகளை நடத்துவது குறித்த, 1949ம் ஆண்டின் ஜெனீவா ஒப்பந்தத்தில் கையெழுத்திட்ட பாகிஸ்தான், அதை மதிக்கின்றது என்பதை, இந்நடவடிக்கையால் எண்பித்துள்ளது என்று தான் நம்புவதாகவும், கர்தினால் கிரேசியஸ் அவர்கள் தெரிவித்துள்ளார். இந்த நடவடிக்கையானது, இவ்விரு அண்டை நாடுகளுக்கு இடையே நிலவும் பதட்டநிலை அகற்றப்படவும், இந்திய துணை கண்டத்தில் இவ்விரு நாடுகளின், அமைதிக்கும், உரையாடலுக்கும், ஒத்துழைப்பை உறுதிப்படுத்துவதற்கும் வழிகளைத் திறந்துவிட்டுள்ளது எனவும் தெரிவித்துள்ளார், கர்தினால் ஆசுவால்டு கிரேசியஸ். (AsiaNews) இவ்வெள்ளியன்று, லாகூரிலிருந்து கார் மூலமாக, இந்திய எல்லையான வாகாவிற்கு அழைத்து வரப்பட்ட அபிநந்தன் அவர்கள், மாலை நான்கு மணியளவில் வாகா எல்லை வந்தடைந்தார். அவரை, பாகிஸ்தான் அதிகாரிகள், இந்திய வெளியுறவு துறை அமைச்சக அதிகாரிகள் மற்றும் இந்திய விமானப் படை அதிகாரிகளிடம் ஒப்படைத்தனர். அபிநந்தனை வரவேற்க வந்த பொதுமக்கள் அனைவரும், தத்தம் கைகளில் இந்திய தேசியக்கொடிகளை உற்சாகமாக அசைத்து வரவேற்றனர். [2019-03-02 03:45:10]


இந்தியா, பாகிஸ்தான் அமைதி உரையாடலை மீண்டும் துவங்க..

இந்திய-பாகிஸ்தான் பகுதியில் உயிரிழப்புகள் ஏற்படுவதற்குக் காரணமாகும் போரைத் தவிர்ப்பதற்கு, இவ்விரு நாடுகளின் தலைவர்களுக்கு இறைவன் ஞானத்தை வழங்குமாறு செபிப்போம் மேரி தெரேசா - வத்திக்கான் செய்திகள் பாகிஸ்தானின் இராணுவ மற்றும் அரசியல் தலைமைத்துவத்தின் மிதவாத மற்றும் நியாயமான மனநிலையைப் பாராட்டியுள்ள பாகிஸ்தான் ஆயர் பேரவையின் நீதி மற்றும் அமைதி அவை, இந்தியாவும் பாகிஸ்தானும் அமைதி பேச்சுவார்த்தையை மீண்டும் துவங்கி, கலந்துரையாடல் வழியாக, அனைத்து பிரச்சனைகளுக்கும் தீர்வு காணுமாறு அழைப்பு விடுத்துள்ளது. அந்த அவையின் தலைவர் பேராயர் ஜோசப் அர்ஷத், அந்த அவையின் தேசிய இயக்குனர் அருள்பணி இம்மானுவேல் யூசூப், செயல்திட்ட இயக்குனர் Cecil Shane Chaudhry ஆகிய மூவரும் கையெழுத்திட்டு வெளியிட்ட அறிக்கையில், இவ்வாறு கூறப்பட்டுள்ளது. பேராயர் அர்ஷத் அவர்கள் பீதேஸ் செய்திக்கு அனுப்பிய அறிக்கையில், பாகிஸ்தான் பிரதமர் இம்ரான் கான், இராணுவ அதிபர் Asif Ghafoor ஆகிய இருவரும், போரில் ஈடுபட மறுத்திருப்பது, உலகளாவிய ஆதரவைப் பெற்றுள்ளது எனவும், இந்தியத் தலைமை, உரையாடல் வழியே பிரச்சனைக்குத் தீர்வு காண அழைப்பு விடுப்பதாகவும் கூறப்பட்டுள்ளது. இந்தியா மற்றும் பாகிஸ்தானில் உயிரிழப்புகள் ஏற்படுவதற்குக் காரணமாகும் போரைத் தவிர்ப்பதற்கு, அனைத்து வகைகளிலும் முயற்சிகள் எடுக்கப்படுமாறும், இவ்விரு நாடுகளின் தலைவர்களுக்கு இறைவன் ஞானத்தை வழங்குமாறு செபிப்பதாகவும் அந்த அறிக்கை உரைக்கின்றது. பாகிஸ்தான் மக்கள் போரை அல்ல, அமைதியையே விரும்புகின்றோம் என, அருள்பணி இம்மானுவேல் யூசூப் அவர்கள் தெரிவித்துள்ளார். (Fides) [2019-03-02 03:39:49]


இந்திய, பாகிஸ்தான் அமைதிக்காக ஆயர்களின் முயற்சி

"இந்தியாவுக்கும், பாகிஸ்தானுக்கும் இடையே அமைதியை உருவாக்க, நாம் செபிப்போம், உழைப்போம்" - இந்திய ஆயர் பேரவைத் தலைவர், கர்தினால் ஆசுவால்ட் கிரேசியஸ் ஜெரோம் லூயிஸ் - வத்திக்கான் செய்திகள் "இந்தியா பாகிஸ்தான் ஆகிய இரு நாடுகளின் தலைவர்களும் உரையாடல் வழியைத் தெரிவு செய்யவேண்டும் என்று கேட்டுக்கொள்கிறோம். இந்தியாவுக்கும், பாகிஸ்தானுக்கும் இடையே அமைதியை உருவாக்க, நாம் செபிப்போம், உழைப்போம்" என்று, இந்திய ஆயர் பேரவைத் தலைவர், கர்தினால் ஆசுவால்ட் கிரேசியஸ் அவர்கள் பீதேஸ் செய்தியிடம் கூறினார். பிப்ரவரி 14ம் தேதி, ஜம்மு-காஷ்மீர் மாநிலத்தில், இந்திய இராணுவத்தினர் மீது நடத்தப்பட்ட தீவிரவாதத் தாக்குதலைத் தொடர்ந்து, இந்திய விமானப்படையினர் பாகிஸ்தானில் உள்ள தீவிரவாத முகாம்கள் மீது தாக்குதல்கள் நடத்தியுள்ளதையும், அதற்கு, பாகிஸ்தான் இராணுவம், பதில் தாக்குதல் நடத்தியுள்ளதையும் மனதில் கொண்டு, கர்தினால் கிரேசியஸ் அவர்கள் இவ்வாறு கூறினார். தீவிரவாதத்தையும், அதற்குப் பதிலிருப்பாக மேற்கொள்ளப்படும் போர் முயற்சியையும், நாங்கள் வன்மையாகக் கண்டனம் செய்கிறோம் என்று கூறிய கர்தினால் கிரேசியஸ் அவர்கள், உண்மையான அமைதிவேண்டி, இந்தியாவும், பாகிஸ்தானும் மேற்கொள்ளும் உரையாடல் முயற்சிகள், தெற்கு ஆசியாவுக்கும், உலகிற்கும் பொருளுள்ள முயற்சியாக விளங்கும் என்று எடுத்துரைத்தார். போரைத் தடுப்பது முக்கியம் என்ற கருத்து, பன்னாட்டளவில் ஆதரவு பெற்றுவரும் வேளையில், இந்தியாவும், பாகிஸ்தானும் தங்கள் கருத்து வேறுபாடுகளை, உரையாடல் வழியே தீர்ப்பதே பாகிஸ்தான் தலத்திருஅவையின் விருப்பமும், மன்றாட்டும் என்று அந்நாட்டு ஆயர் பேரவையின் நீதி, அமைதிப் பணிக்குழு அறிக்கையொன்றை வெளியிட்டுள்ளது. அப்பாவி மக்களின் உயிர்களைப் பலிவாங்கும் போர்ச் சூழலைத் தவிர்ப்பதற்கு, பேச்சு வார்த்தைகளில் ஈடுபட, இவ்விரு நாடுகளையும், பன்னாட்டு அரசுகள் வலியுறுத்த வேண்டும் என்று, பாகிஸ்தான் ஆயர் பேரவையின் தலைவர், பேராயர் ஜோசப் அர்ஷத் அவர்கள், பீதேஸ் செய்தியிடம் கூறினார். [2019-03-02 03:27:27]


இந்தியா பாகிஸ்தான் உறவு குறித்து பாகிஸ்தான் ஆயர்

இந்தியா பாகிஸ்தான் ஆகிய இரு அண்டை நாடுகளையும் துன்புறுத்தி வரும் காஷ்மீர் பிரச்சனை என்ற காயத்தைக் குணமாக்காமல் இருப்பது, இரு நாடுகளுக்கும் நல்லதல்ல - பேராயர் ஜோசப் அர்ஷத் ஜெரோம் லூயிஸ் - வத்திக்கான் செய்திகள் கடந்த 70 ஆண்டுகளுக்கும் மேலாக, இந்தியா, பாகிஸ்தான், ஆகிய இரு அண்டை நாடுகளையும் துன்புறுத்தி வரும் காஷ்மீர் பிரச்சனை என்ற காயத்தைக் குணமாக்காமல் இருப்பது, இரு நாடுகளுக்கும் நல்லதல்ல என்று, பாகிஸ்தான் ஆயர் பேரவைத் தலைவர், பேராயர் ஜோசப் அர்ஷத் அவர்கள் கூறினார். பிப்ரவரி 14ம் தேதி, ஜம்மு-காஷ்மீர் மாநிலத்தில் நிகழ்ந்த ஒரு தீவிரவாதத் தாக்குதலைத் தொடர்ந்து, இந்திய விமானப் படை, பிப்ரவரி 26ம் தேதி மேற்கொண்ட பதில் தாக்குதலைக் குறித்து, இஸ்லாமாபாத்-இராவல்பிண்டி பேராயர் அர்ஷத் அவர்கள் வத்திக்கான் நாளிதழ் L'Osservatore Romanoவுக்கு அளித்த பேட்டியில் இவ்வாறு கூறியுள்ளார். இவ்விரு நாடுகளிலும் உண்மையான சமாதானத்தை விரும்பும் அனைவரும் இந்நிகழ்வுகளால் அதிக வேதனை அடைந்துள்ளனர் என்று கூறிய பேராயர் அர்ஷத் அவர்கள், இந்தப் பிரச்சனையை அறிவுப்பூர்வமான உரையாடல் வழியே இரு நாட்டு அரசுகளும் தீர்த்துவைத்தால், அது, உலகிற்கே சிறந்ததோர் எடுத்துக்காட்டாக விளங்கும் என்று கூறினார். கலாச்சாரம், பொருளாதாரம், வர்த்தகம், விளையாட்டு, மதம் என்ற அனைத்து தளங்களிலும் இந்தியா பாகிஸ்தான் நாடுகளுக்கிடையே பரிமாற்றங்கள் உருவாகும்போது, இந்தப் பிரச்சனைக்கு நிரந்தரத் தீர்வுகள் ஏற்பட வாய்ப்புக்கள் அதிகம் உள்ளன என்ற நம்பிக்கையை, பாகிஸ்தான் ஆயர் பேரவைத் தலைவர், பேராயர் அர்ஷத் அவர்கள் வெளியிட்டார். கிறிஸ்தவர்கள் என்ற முறையில் சமாதானத்திற்காக செபிப்பது நம் கடமை என்று கூறிய பேராயர் அர்ஷத் அவர்கள், இந்த செபத்தில், இரு நாடுகளையும் சேர்ந்த இஸ்லாமியர், இந்துக்கள் அனைவரும் இணையவேண்டும் என்று கேட்டுக்கொண்டார். [2019-02-27 22:59:07]


உத்தரபிரதேசத்தில் கிறிஸ்தவர்கள் மீதான தாக்குதல் அதிகரிப்பு

கிறிஸ்தவ வழிபாட்டில் பங்குபெற்றோர் தாக்கப்பட்டுள்ளது, மற்றும், விவிலியப் பிரதிகள் கொளுத்தப்பட்டது குறித்து காவல்துறையின் மெத்தனமான நடவடிக்கை கிறிஸ்டோபர் பிரான்சிஸ் - வத்திக்கான் செய்திகள் அரசியல் இலாபத்திற்காக, கிறிஸ்தவர்களை கொடுமைப்படுத்துவது தொடர்வதன் ஒரு பகுதியாக, இந்தியாவின் உத்தரபிரதேசத்தில் கடந்த வியாழனன்று மூன்று கிறிஸ்தவர்கள் கடுமையாக தாக்கப்பட்டுள்ளதாக குற்றஞ்சாட்டினார் இந்திய கிறிஸ்தவர்கள் உலக அவையின் தலைவர். உத்தரபிரதேசத்தின் சுல்தான்பூர் மாவட்டத்தில் உள்ள சப்பார் கிராமத்தில் செப வழிபாட்டில் கலந்து கொண்டிருந்த கிறிஸ்தவக் குழு ஒன்றின்மீது, மதத் தீவிரவாதிகள் தாக்குதல் நடத்தியதில், பெண்கள் உட்பட பலர் காயமடைந்துள்ளனர் என்றும், இத்தாக்குதலில் மூவர் மிகத்தீவிரமாக பாதிக்கப்பட்டுள்ளனர் என்றும், இந்திய கிறிஸ்தவர்கள் உலக அவைத் தலைவர் சாஜன் ஜார்ஜ் அவர்கள் கூறியுள்ளார். பாதிக்கப்பட்டவர்கள் வழங்கிய புகாரை பதிவுச் செய்ய காவல்துறை மறுத்துள்ளது என சுட்டிக்காட்டிய சாஜன் ஜார்ஜ் அவர்கள், மத சுதந்திரம் என்பது உத்தரபிரதேசத்தில் மிகவும் சீர்குலைந்துவிட்டதால், கிறிஸ்தவர்கள் மீதான தாக்குதல் அதிகரித்து வருவதாக குற்றஞ்சாட்டினார். பெண்களும் இங்கு தாக்குதலுக்கு உள்ளாக்கப்பட்டுள்ளது, அவர்களின் மாண்புக்கு இழைக்கப்பட்டுள்ள அநீதி என்பதையும் சுட்டிக்காட்டிய சாஜன் ஜார்ஜ் அவர்கள், செபக்கூட்டத்திற்குள் புகுந்த ஏறத்தாழ 25 இந்து மத அடிப்படைவாதிகள், அங்கிருந்த விவிலியப் பிரதிகள் சிலவற்றையும் தீயிட்டுக் கொளுத்தியுள்ளதாக மேலும் கூறினார். தாக்கப்பட்ட இடத்திற்கு வந்த காவல்துறையினர், புகாரை வாங்க மறுத்ததோடு, காயம்பட்டவர்கள் சிகிச்சை பெறவும் அனுமதிக்கவில்லை என்ற குற்றச்சாட்டையும் முன்வைத்தார், இந்திய கிறிஸ்தவர்கள் உலக அவையின் தலைவர் சாஜன் ஜார்ஜ். [2019-02-12 01:44:41]


தூத்துக்குடி மறைமாவட்டத்தின் புதிய ஆயர் நியமனம்

திருத்தந்தை பிரான்சிஸ் அவர்கள், தூத்துக்குடி மறைமாவட்டத்தின் புதிய ஆயராக, அருள்பணி ஸ்டீஃபன் அன்டனி பிள்ளை அவர்களை நியமித்துள்ளார். ஜெரோம் லூயிஸ் - வத்திக்கான் செய்திகள் தூத்துக்குடி மறைமாவட்டத்தின் ஆயராகப் பணியாற்றிவந்த ஆயர் யுவான் அம்புரோஸ் அவர்கள், தன் பணியிலிருந்து ஒய்வு பெற விரும்பி, அனுப்பிய விண்ணப்பத்தை, திருத்தந்தை பிரான்சிஸ் அவர்கள் ஏற்றுக்கொண்டு, இம்மறைமாவட்டத்தின் புதிய ஆயராக, அருள்பணி ஸ்டீஃபன் அன்டனி பிள்ளை அவர்களை நியமித்துள்ளார். 76 வயது நிறைந்த ஆயர் யுவான் அம்புரோஸ் அவர்கள், 2005ம் ஆண்டு, தன் 62வது வயதில், தூத்துக்குடி மறைமாவட்டத்தின் ஆயராக, பொறுப்பேற்று, கடந்த 14 ஆண்டுகள் தன் பணிகளை நிறைவு செய்துள்ளார். 1952ம் ஆண்டு, ஜூன் 22ம் தேதி, கோட்டாறு மறைமாவட்டத்தின் கீழ மணக்குடி என்ற ஊரில் பிறந்த ஸ்டீஃபன் அன்டனி பிள்ளை அவர்கள், 1979ம் ஆண்டு, மே 7ம் தேதி, வேலூர் மறைமாவட்டத்தின் அருள்பணியாளராக திருநிலைப்படுத்தப்பட்டார். 1986ம் ஆண்டு முதல், 89ம் ஆண்டு முடிய, உரோம் நகரின் உர்பானியா பல்கலைக் கழகத்தில் விவிலிய இறையியலில் முனைவர் பட்டப்படிப்பை நிறைவு செய்த அருள்பணி அன்டனி பிள்ளை அவர்கள், 1990ம் ஆண்டு முதல் 6 ஆண்டுகள், கரீபியன் பகுதியில், குவாதலூப் தீவில் மறைபணியாளாராக உழைத்தார். பங்கு அருள்பணியாளராகவும், இறையியல் பேராசிரியராகவும், பணியாற்றிவந்த அருள்பணி அன்டனி பிள்ளை அவர்கள், வேலூர் மறைமாவட்ட பேராலயத்தின் பங்கு அருள்பணியாளராகவும், அம்மறைமாவட்டத்தின் முதன்மை அருள்பணியாளராகவும் பணியாற்றியுள்ளார். [2019-01-17 23:50:47]


பக்க இலக்கங்களை அழுத்தி எல்லா செய்திகளையும் பார்வையிடவும்