வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



இந்துத்துவ கருத்தியல்களுக்கு எதிராக நடவடிக்கை அவசியம்

இந்தியாவின் கர்நாடக மாநிலத்தில் வருகிற மாதத்தில் நடைபெறவுள்ள தேர்தல்கள், அம்மாநில மக்களின் அமைதிக்கும் முன்னேற்றத்திற்கும் மட்டுமல்ல, இந்திய அரசியல் அமைப்பில் பொறிக்கப்பட்டுள்ள, அனைத்துக் குடிமக்களின் அடிப்படை உரிமைகள் நிலைபெறுவதற்கும் மிக முக்கியமானது என்று, பெங்களூரு முன்னாள் பேராயர் பெர்னார்டு மொராஸ் அவர்கள் கூறியுள்ளார். கர்நாடகாவின் 224 தொகுதிகளில் வருகிற மே 12ம் தேதி நடைபெறவுள்ள சட்டசபை தேர்தல்கள் குறித்து ஆசியச் செய்தியிடம் இவ்வாறு பேசியுள்ள பேராயர் பெர்னார்டு மொராஸ் அவர்கள், அடிப்படைவாத அமைப்புகள் பரவி வருவதற்கு எதிராகவும் கருத்து தெரிவித்தார். உண்மையான தேசியவாதம் என்ற முகமூடியுடன் சேரும் கூட்டம், ஒரே நாடு, ஒரே மதம், ஒரே கலாச்சாரம் என்ற நஞ்சுகலந்து கருத்தியலைப் பரப்பி வருகின்றது, இக்கருத்தியல், இந்தியாவின் சிறப்புப்பண்புக்கு முற்றிலும் அந்நியமானது என்றும், பேராயர் பெர்னார்டு மொராஸ் அவர்கள் கூறியுள்ளார். தற்போது இந்தியாவை ஆட்கொண்டிருக்கும் ஆபத்தான சூழ்நிலை குறித்து மக்களுக்கு விழிப்புணர்வு ஊட்ட வேண்டுமெனவும், நாம் எல்லாரும், கவனம், ஞானம் மற்றும் விவேகத்துடன் நம் பிரதிநிதிகளைத் தேர்ந்தெடுக்க வேண்டுமெனவும் கூறியுள்ளார், பேராயர் பெர்னார்டு மொராஸ். (ஆதாரம் : AsiaNews / வத்திக்கான் வானொலி) [2018-04-29 16:47:54]


மரண தண்டனை சிறார் பாலியல் வன்செயல் பிரச்சனையை நிறுத்தாது

இந்தியாவில், 12 வயதுக்கு உட்பட்ட சிறுமிகளை பாலியல் வன்கொடுமைக்கு உள்ளாக்கும் குற்றவாளிகளுக்கு மரண தண்டனை வழங்கப்படும் என்று மத்திய அரசு கொண்டு வந்துள்ள அவசர சட்டம் குறித்து கேள்வி எழுப்பியுள்ளனர் திருஅவைத் தலைவர்கள். சிறுமிகள் பாலியல் வன்கொடுமைக்கு உள்ளாக்கப்படுவதைத் தடுப்பதற்கு கடுமையான சட்டங்கள் கொண்டுவரப்பட வேண்டும் என்று, இந்தியா எங்கும் மக்கள் கிளர்ந்தெழுந்ததையடுத்து, குடியரசுத் தலைவர் ராம்நாத் கோவிந்த் அவர்களின் ஒப்புதல் பெற்று, மத்திய அரசு, அக்குற்றவாளிகளுக்கு மரண தண்டனை வழங்கும் சட்டத்தை அமலுக்குக் கொண்டு வந்துள்ளது. இச்சட்டம் குறித்து கருத்து தெரிவித்த போபால் பேராயர் லியோ கொர்னேலியோ அவர்கள், முதலில் இத்தகைய குற்றவாளிகளின் மனப்போக்கை மாற்றுவதற்கு சமுதாயம் முன்வரவேண்டும் என்று கூறினார். மத்திய பிரதேச மாநிலத்தில் பணியாற்றும் சமூக ஆர்வலரான அருள்சகோதரி லிசி தாமஸ் அவர்கள் கூறுகையில், மத்திய அரசின் தற்போதைய நடவடிக்கை, நாடெங்கும் காணப்படும் பொதுமக்களின் கோபத்திற்கு ஆறுதல் அளிப்பதாய் உள்ளது எனத் தெரிவித்துள்ளார். மேலும், குற்றவாளிகளுக்கு மரண தண்டனையோ அல்லது நீண்ட கால சிறைத்தண்டனையோ அளிப்பது, பாலியல் வன்செயலை ஒழித்து விடுமா என்ற சந்தேகத்தை எழுப்பியுள்ளார், அருள்சகோதரி லிசி. இதற்கிடையே, இச்சட்டம் குறித்து மத்திய அரசிடம் கேள்வி எழுப்பியுள்ள தில்லி உயர்நீதிமன்றம், பாலியல் குற்றங்களுக்கு அடிப்படை காரணம் என்ன என்பதையும், 18 வயதுக்கு உட்பட்ட சிறுவர்கள் இத்தகைய குற்றங்களில் ஈடுபடுவதைத் தடுக்க அவர்களுக்குக் கல்வி கற்பிப்பது பற்றியும் மத்திய அரசு சிந்திக்கவில்லை, பாலியல் குற்றவாளிகளுக்கு தண்டனை அளிப்பதைப் பொருத்தவரை மத்திய அரசு அறிவியல் ரீதியாக ஏதாவது ஆய்வு நடத்தியதா? இதனால் பாதிக்கப்படும் சிறுமிக்கு ஏற்படும் விளைவுகளைச் சிந்தித்து பார்த்ததா? போன்ற கேள்விகளை கேட்டுள்ளது. (ஆதாரம் : UCAN / வத்திக்கான் வானொலி) [2018-04-24 20:21:41]


நாக்பூர் பேராயர் ஆபிரகாம் இறைவனடி சேர்ந்தார்

இந்தியாவின் நாக்பூர் உயர் மறைமாவட்டத்தின் பேராயராகப் பணியாற்றிய ஆபிரகாம் விருத்தகுலங்கரா (Abraham Viruthakulangara) அவர்கள், ஏப்ரல் 19, இவ்வியாழன் அதிகாலையில் இறைவனடி சேர்ந்தார். 1943ம் ஆண்டு ஜூன் 5ம் தேதி கேரளாவில் பிறந்த ஆபிரகாம் அவர்கள், 1969ம் ஆண்டு, அக்டோபர் 28ம் தேதி, அருள்பணியாளராக அருள்பொழிவு பெற்றார். 1977ம் ஆண்டு ஜூலை 13ம் தேதி, தன் 34வது வயதில் ஆயராக அருள்பொழிவு பெற்ற ஆபிரகாம் அவர்கள், புதிதாக உருவாக்கப்பட்ட கந்துவா (Khandwa) மறைமாவட்டத்தின் முதல் ஆயராகப் பொறுப்பேற்றார். அங்கு 20 ஆண்டுகளுக்கும் மேலாக பணியாற்றியபின், 1998ம் ஆண்டு, ஏப்ரல் 22ம் தேதி, நாக்பூர் உயர் மறைமாவட்டத்தின் பேராயராக பொறுப்பேற்று, தன் 20 ஆண்டுகள் பணியை வருகிற ஞாயிறன்று நிறைவு செய்வதற்கு முன் இறையடி சேர்ந்தார். ஏப்ரல் 19, இவ்வியாழன் அதிகாலை, தன் 75வது வயதில் இறைவனடி சேர்ந்த பேராயர் அவர்களுக்கு இறைவன் நிறையமைதி வழங்க வேண்டுமென, இந்திய ஆயர் பேரவையின் செயலர் ஆயர் தியடோர் மாஸ்க்ரீனஸ் அவர்கள் பேரவை சார்பில் வெளியிட்டுள்ள அறிக்கையில் கூறியுள்ளார். (ஆதாரம் : CBCI / வத்திக்கான் வானொலி) [2018-04-20 00:26:59]


கேரளாவில் கிறிஸ்தவர்களுக்கு எதிரான தாக்குதல்கள்

ப்ரல் மாதத்தின் துவக்கத்திலிருந்து, கடந்த 16 நாள்களில், இந்தியாவின் கேரளா மாநிலத்தில் மூன்று கிறிஸ்தவ வழிபாட்டுத் தலங்கள் தாக்கப்பட்டுள்ளன. ஏப்ரல் 16, இத்திங்களன்று கேரளாவின் காசரக்கோடு மாவட்டத்திலுள்ள உக்கிநட்கா என்ற ஊரில் அமைந்துள்ள இயேசுவின் திரு இருதயக் கோவில் கல்லறைத் தோட்ட வாசல் சிலுவையும், 7 கல்லறைகளும் சேதமாக்கப்பட்டுள்ளன. இதற்கு முன்னதாக, ஏப்ரல் 10ம் தேதி, நெய்யாற்றின்கரா மறைமாவட்டத்திலுள்ள மேய்ப்புப்பணி மையத்தை, ஏறத்தாழ 500 பேர் கொண்ட கும்பல், கல்லெறிந்து சேதப்படுத்தியுள்ளனர். மேலும், உயிர்ப்பு விழாவுக்கு முந்திய நாளான புனித சனிக்கிழமையன்று, ஆலப்புழா மாவட்டத்திலுள்ள புன்னமூடு என்ற இடத்தில், ஆர்த்தடாக்ஸ் கோவில் ஒன்றை சேதப்படுத்தியதோடு, அக்கோவிலில் பணியாற்றும் கிறிஸ்தவப் போதகரையும் தாக்கியுள்ளனர். இத்தாக்குதல்கள் குறித்து கண்டனத்தை வெளியிட்ட இந்தியக் கிறிஸ்தவர்களின் உலக அவைத்தலைவர், சஜன் ஜார்ஜ் அவர்கள், கிறிஸ்தவர்களுக்கு எதிராக எழுந்துள்ள விரோதப் போக்கு அண்மைய ஆண்டுகளில் அதிகம் வளர்ந்துள்ளது என்றும், இது தடுத்து நிறுத்தப்பட வேண்டும் என்றும் கூறினார். (ஆதாரம் : AsiaNews / வத்திக்கான் வானொலி) [2018-04-17 23:31:12]


வெறுப்புணர்வுக்கு எதிராகச் செயல்பட மதத் தலைவர்கள் உறுதி

இந்தியாவில், சகிப்பற்றதன்மையும், வகுப்புவாத வன்முறைகளும் அதிகரித்துவருகின்றவேளை, பல்வேறு மதங்களின் உண்மையான போதனைகளைப் பரப்புவதற்கு, நாட்டின் பல்சமயத் தலைவர்கள் உறுதி எடுத்துள்ளனர். இப்புதன், வியாழன் ஆகிய இரு நாள்களில் (ஏப்ரல் 11,12) மத்திய பீரதேச மாநிலத்தின் இந்தோரில், இந்தியாவின் 1,500க்கும் மேற்பட்ட, இந்து, முஸ்லிம், கிறிஸ்தவ, சீக்கிய, ஜைன மற்றும் புத்த மதங்களின் பிரதிநிதிகள் கலந்துகொண்ட கூட்டத்தில், இந்தியாவில் காணப்படும் வெறுப்புணர்வுக்கு எதிராகச் செயல்பட உறுதி எடுக்கப்பட்டது. இந்தியாவில் மத நல்லிணக்கத்திற்காக உழைக்கும் மூன்று நிறுவனங்கள் இணைந்து நடத்திய இக்கூட்டம் பற்றி யூக்கா செய்தியிடம் பேசிய, Adil Sayeed அவர்கள், நாட்டில் வகுப்புவாத வன்முறை அதிகரித்து வருவதால், அதற்குத் தீர்வு காண வேண்டிய நிலையில் நாம் உள்ளோம் என்று தெரிவித்தார். இந்தியாவில், 2017ம் ஆண்டில் கிறிஸ்தவர்க்கெதிராக 736 தாக்குதல்கள் இடம்பெற்றுள்ளன, 2016ம் ஆண்டில் இவ்வெண்ணிக்கை 348 ஆக இருந்தது என்று செய்திகள் கூறுகின்றன. (ஆதாரம் : UCAN / வத்திக்கான் வானொலி) [2018-04-15 10:42:48]


விபத்தில் இறந்த குழந்தைகளுக்காக இந்திய ஆயர்களின் அனுதாபம்

இந்தியாவின் இமாலய மலைப்பகுதியில் நிகழ்ந்த பேருந்து விபத்தில் கொல்லப்பட்ட குழந்தைகளுக்காக இந்திய ஆயர் பேரவை தன் ஆழ்ந்த அனுதாபங்களையும் செபங்களையும் தெரிவித்துள்ளது. ஏப்ரல் 9, இத்திங்களன்று, இமாச்சல பிரதேச மாநிலத்தின் நுர்பூர் (Nurpur) என்ற இடத்தில், 40 குழந்தைகளை ஏற்றிச் சென்ற பேருந்து ஒன்று, ஏறத்தாழ 330 அடி ஆழமான பள்ளத்தாக்கில் கவிழ்ந்ததால், பயணம் செய்த 30க்கும் அதிகமான குழந்தைகள் கொல்லப்பட்டனர். இந்த விபத்தைக் குறித்து, வத்திக்கான் வானொலிக்கு பேட்டியளித்த, இந்திய ஆயர் பேரவையின் செயலர், ஆயர் தியடோர் மாஸ்கரீனஸ் அவர்கள், சரியாகப் பராமரிக்கப்படாத சாலைகள், சாலை விதி முறைகளை மீறுதல் ஆகிய காரணங்களால் பெருமளவு உயிர்கள் இந்தியாவில் பலியாகின்றன என்று கூறினார். குழந்தைகளின் மரணம், இந்திய ஆயர்களுக்கு பெரும் வேதனையைத் தந்துள்ளது என்று கூறிய ஆயர் மாஸ்கரீனஸ் அவர்கள், இக்குழந்தைகளைப் பறிகொடுத்துள்ள பெற்றோருக்கும், குடும்பத்தினருக்கும், தங்கள் அனுதாபங்களையும், செபங்களையும், பேரவை சார்பாகத் தெரிவிப்பதாகக் கூறினார். அடிபட்ட குழந்தைகளில் பலர், சரியான, உடனடியான மருத்துவ உதவிகள் கிடைக்காததால் உயிரிழந்துள்ளனர் என்பதை தன் பேட்டியில் குறிப்பிட்ட, ஆயர் மாஸ்கரீனஸ் அவர்கள், இந்தியாவின் பல பகுதிகளில் நிலவும் பரிதாபமான மருத்துவ பராமரிப்பைக் குறித்து தன் வேதனையை வெளியிட்டார். (ஆதாரம் : வத்திக்கான் வானொலி) [2018-04-12 02:17:07]


பிரிவினையை உண்டாக்கும் சக்திகளிடம் சரணடைய வேண்டாம்

ஒடிசா மாநிலத்தின், சுந்தர்கார் மாவட்டத்தில், கிறிஸ்து உயிர்ப்பு திருவிழிப்பு திருவழிபாட்டின்போது, சேதப்படுத்தப்பட்ட கிறிஸ்தவ ஆலயங்களை, இந்திய ஆயர்களின் பிரதிநிதிகள் குழு ஒன்று பார்வையிட்டு, இந்திய ஆயர் பேரவையின் சார்பில், அப்பகுதி கத்தோலிக்கருடன் தனது ஒருமைப்பாட்டுணர்வைத் தெரிவித்துள்ளது. இக்குழுவினரை வரவேற்ற அப்பகுதி கத்தோலிக்கரோடு சேர்ந்து செபித்த இக்குழு, இக்குற்றச் செயல்களைப் புரிந்தவர்களை மன்னிக்கவும், அவர்களின் மனமாற்றத்திற்காகச் செபிக்கவும் கேட்டுக்கொண்டுள்ளது. ஏப்ரல் 07, இச்சனிக்கிழமையன்று, இந்திய ஆயர் பேரவையின் செயலர், ஆயர் தியோடர் மஸ்கரீனஸ் அவர்கள் தலைமையில், கட்டக்-புவனேஸ்வர் பேராயர் ஜான் பார்வா, ரூர்கேலா ஆயர், கிஷோர் குமார் குஜூர் மற்றும், ஏனைய ஆயர்களும், சேதப்படுத்தப்பட்ட கிறிஸ்தவ ஆலயங்களைப் பார்வையிட்டனர். Salangabahal நகரிலுள்ள புனித தோமையார் ஆலயத்திற்கு முதலில் சென்ற அக்கழு, சேதப்படுத்தப்பட்ட அன்னை மரியா திருவுருவம் மற்றும் அந்த ஆலயத்தின் முன்புறக் கெபியில் தலைதுண்டிக்கப்பட்ட குழந்தை இயேசு திருவுருவத்தையும் பார்வையிட்டது. சேதப்படுத்தப்பட்ட ஏனைய ஆலயங்களையும் இக்குழு பார்வையிட்டது. அச்சமயத்தில் கருத்து தெரிவித்த, ஆயர் மஸ்கரீனஸ் அவர்கள், அமைதியைக் குலைப்பதற்குத் திட்டமிட்டு ஆற்றப்பட்ட செயல் இது என்று கூறினார். மேலும், அறிக்கை ஒன்றை வெளிட்ட இந்த ஆயர்கள் பிரதிநிதிகள் குழு, சரியான நேரத்தில் காவல்துறை வந்து, அந்த மாவட்டத்தில் அனைத்து ஆலயங்களுக்கும் பாதுகாப்பு அளித்ததற்கு நன்றி தெரிவித்துள்ளது. அத்துடன், பிரிவினையை உண்டாக்கும் சக்திகளிடம் சரணடைய வேண்டாமெனவும், கத்தோலிக்கரைக் கேட்டுக்கொண்டுள்ளது அக்குழு. (ஆதாரம் : AsiaNews / வத்திக்கான் வானொலி) [2018-04-09 20:39:16]


'சத்யமேவ ஜயதே' என்ற கூற்றின் வெளிப்பாடாக உயிர்ப்பு

இந்தியாவின் மத்திய, மாநில அரசுகளில் பணியாற்றும் அரசியல் தலைவர்கள், அரசு அதிகாரிகள் அனைவரும், நீதியோடும், உண்மையோடும் மக்களுக்கென உழைக்கவேண்டும் என்ற வேண்டுதலை, இந்த புனித வாரத்தில் கிறிஸ்தவர்கள் எழுப்பவேண்டும் என்று, இந்திய ஆயர் பேரவையின் செயலர், ஆயர் தியோடோர் மஸ்கரீனஸ் அவர்கள் கூறினார். நடைபெறும் புனித வாரத்தைக் குறித்து பீதேஸ் (Fides) செய்திக்கு வழங்கிய ஒரு பேட்டியில், இப்புனித வாரத்தில் கடைபிடிக்கப்படும் அனைத்து வழிபாட்டு நிகழ்வுகளும், இந்திய தலத்திருஅவை அனுபவித்துவரும் பல்வேறு நிகழ்வுகளை நினைவுறுத்துகின்றன என்று ஆயர் மஸ்கரீனஸ் அவர்கள் எடுத்துரைத்தார். இயேசுவின் வாழ்வு மற்றும் மரணம் குறித்து பேசிய காந்தியடிகள், குற்றமற்ற ஒருவர், பிறரின் நலனுக்கென தன்னையே பலியாக வழங்கியதால், இவ்வுகிற்கு மீட்பைக் கொணர்ந்தார் என்று கூறியுள்ளதை, ஆயர் மஸ்கரீனஸ் அவர்கள் தன் பேட்டியில் சுட்டிக்காட்டினார். 'சத்யமேவ ஜயதே' அதாவது, வாய்மையே வெல்லும் என்ற இந்திய கூற்றின் ஒரு வெளிப்பாடாக, இயேசுவின் உயிர்ப்பு விளங்கியது என்று ஆயர் மஸ்கரீனஸ் அவர்கள் வலியுறுத்திக் கூறினார். (ஆதாரம் : Fides / வத்திக்கான் வானொலி) [2018-03-31 01:45:17]


இந்தியாவில் மதச்சார்பற்ற அரசு ஆட்சிக்கு வரவேண்டுமென்று செபம்

இந்தியாவில் அடுத்த ஆண்டில் நடைபெறவிருக்கும் நாடாளுமன்றத் தேர்தலில், மதச்சார்பற்ற அரசு, ஆட்சிக்கு வரவேண்டும் என்பதற்காக, மார்ச் 18, கடந்த ஞாயிறு முதல், மார்ச் 25, இஞ்ஞாயிறுவரை, இந்தியக் கிறிஸ்தவர்கள் செப வாரத்தைக் கடைப்பிடித்து வருகின்றனர்,. தேர்தலில் மக்களாட்சி வெல்லவும், பணம் விநியோகிக்கப்படுவது தவிர்க்கப்படவும் நாட்டின் பொதுநலனில் அக்கறையுள்ள தலைவர்கள் தேர்ந்தெடுக்கப்படவும், கிறிஸ்தவர்களுக்கு எதிரான தாக்குதல்கள் நிறுத்தப்படவும், இச்செப வாரத்தில் உண்ணா நோன்பிருந்து செபிக்குமாறு, கிறிஸ்தவர்களுக்கு அழைப்பு விடுக்கப்பட்டுள்ளது. இதற்கிடையே, ஒடிசா மாநிலத்தில், கிறிஸ்தவர்களுக்கு எதிரான வன்முறைகள் மீண்டும் இடம்பெறுவதாக, இம்மாதத்தில், பீதேஸ் செய்தி கூறியுள்ளது. Tangaguda கிராமத்தில், 35 இந்துக் குடும்பங்களுக்கு அருகில் வாழ்கின்ற, மூன்று கிறிஸ்தவக் குடும்பங்கள், கடுமையாய்த் தாக்கப்பட்டனர் என்று, மார்ச் 3ம் தேதியன்று, பீதேஸ், செய்தி ஒன்றை வெளியிட்டிருந்தது. மேலும், இந்தியாவில், இந்து தேசியவாதப் போக்கும், சகிப்பற்றதன்மைச் சூழலும் அதிகரித்து வரும்வேளை, இந்திய ஊடகவியலாளர்கள், பதியமுறையில் அச்சுறுத்தல்களை எதிர்கொள்கின்றனர் என்று, ஓர் ஊடக உரிமைக் குழு கூறியுள்ளது. இந்தியாவில், ஒவ்வோர் ஆண்டும், மூன்று செய்தியாளர்கள் வீதம் கொல்லப்படுகின்றனர் எனவும், பத்திரிகை சுதந்திரத்தைப் பொருத்தவரை, 180 நாடுகளில் இந்தியா 136வது நாடாக உள்ளது எனவும், பத்திரிகை சுதந்திரக் குறியீடு, மதிப்பிட்டுள்ளது. இந்தியாவில், கடந்த 24 ஆண்டுகளில், 70க்கும் மேற்பட்ட செய்தியாளர்கள் கொல்லப்பட்டுள்ளனர் என்றும் கூறப்பட்டுள்ளது. (ஆதாரம் : UCAN/Agencies / வத்திக்கான் வானொலி) [2018-03-25 01:16:08]


இந்தியாவில், ஏப்ரலை, 'தலித் வரலாற்று மாதமாக’க் கொண்டாட...

ஒவ்வோர் ஆண்டும் ஏப்ரல் மாதத்தை, 'தலித் வரலாற்று மாதம்' என்று சிறப்பிக்க, இந்திய கத்தோலிக்க ஆயர்கள் மக்களை கேட்டுக்கொண்டுள்ளனர் என்று ஆசிய செய்தி கூறுகிறது. தலித் மக்களின் விடுதலைக்காக போராடி, தங்கள் வாழ்வைத் தியாகம் செய்தவர்களை நினைவுகூர, ஏப்ரல் மாதம் தகுந்ததொரு தருணம் என்று, இந்திய ஆயர் பேரவையின், தாழ்த்தப்பட்டோர் மற்றும் பிற்படுத்தப்பட்டோர் பணிக்குழு, மடல் ஒன்றை வெளியிட்டுள்ளது. இந்த வரலாற்று மாதத்தைச் சிறப்பிக்கும் வகையில், தலித் மக்களின் மேம்பாட்டிற்காக உழைத்தோரின் வாழ்க்கை குறிப்புக்களை இப்பணிக்குழுவினருக்கு மார்ச் 25ம் தேதிக்குள் அனுப்பி வைக்குமாறு விண்ணப்பிக்கப்பட்டுள்ளது. இந்திய அரசு வெளியிட்டுள்ள புள்ளிவிவரங்களின்படி, இந்தியாவின் 120 கோடி மக்கள் தொகையில், 20 கோடியே 10 இலட்சம் பேர் தாழ்த்தப்பட்ட வகுப்பைச் சேர்ந்தவர்கள் என்றும், இந்தியாவில் வாழும் தலித் கிறிஸ்தவர்களின் எண்ணிக்கை 2 கோடியே 78 இலட்சம் என்றும் ஆசிய செய்தி கூறுகிறது. (ஆதாரம் : AsiaNews / வத்திக்கான் வானொலி) [2018-03-22 23:18:06]


பக்க இலக்கங்களை அழுத்தி எல்லா செய்திகளையும் பார்வையிடவும்