வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



முதல் ‘இந்திய கிறிஸ்தவ நாள்’ சிறப்பிக்கப்பட்டது

நாட்டின் ஓர் அங்கமாக இருக்கும் கிறிஸ்தவர்களை, வெளிநாட்டவர்கள் போல், காலனி ஆதிக்கத்துடன் வந்தவர்களாக சித்தரிக்கும் முயற்சிகள் இடம்பெற்றுவரும் வேளையில், ஜூலை மாதம் 3ம் தேதி, இந்திய கிறிஸ்தவ நாள் சிறப்பிக்கப்பட்டது, ஒவ்வொரு நாளும் சிறப்பிக்கப்பட வேண்டிய ஒன்று, என்று போபால் பேராயர் Leo Cornelio அவர்கள் கூறினார். கிறிஸ்தவ சபைகள் தங்களிடையே நிலவும் வேறுபாடுகளை மறந்து, கத்தோலிக்கர்கள், பிரிவினை சபையினர், ஆர்த்தடாக்ஸ் சபையினர் என அனைவரும் ஒரே குழுவாக ஜூலை 3ம் தேதியை இந்திய கிறிஸ்தவ நாளாக இணைந்து சிறப்பித்தது பற்றி, ஜூலை 5ம் தேதி திங்கள்கிழமையன்று கருத்து வெளியிட்ட பேராயர் கொர்னேலியோ அவர்கள், நாட்டில் கிறிஸ்தவர்களுக்கு எதிரான விரோதப்போக்குகள் அதிகரித்துவரும் சூழலில், கிறிஸ்தவர்கள் அனைவரும் ஒன்றிணைந்து, ஒன்றிப்பையும் அவர்களிடையே காணப்படும் கலாச்சாரப் பகிர்வையும் வலியுறுத்த வேண்டியது அவசியம் என்பதை எடுத்துரைத்தார். போர்த்துக்கீசியர்களோ, பிரித்தானியர்களோ இந்தியாவுக்கு வருமுன்னரே, இந்திய கலாச்சாரம், மற்றும் நாகரீகத்தின் ஓர் அங்கமாக கிறிஸ்தவம் இருந்தது என்று கூறிய பேராயர் கொர்னேலியோ அவரகள், கி.பி 52ம் ஆண்டிலேயே புனித தோமாவால் இந்தியாவில் நற்செய்தி அறிவிக்கப்பட்டுள்ளதை சுட்டிக்காட்டினார். இந்திய மக்கள் தொகையில் 2.3 விழுக்காட்டினராக இருக்கும் கிறிஸ்தவர்கள், நாட்டைக் கட்டியெழுப்புவதில், குறிப்பாக கல்வி, மற்றும் மருத்துவத்துறைகளில் ஆற்றியுள்ள பணி மகத்தானது, என்பதையும், இப்பணிகளால் இந்தியாவின் வறியோர் பயனடைந்து வருவதையும் சுட்டிக்காட்டினார் பேராயர் கொர்னேலியோ. இந்திய கிறிஸ்தவ நாள், இவ்வாண்டு முதல், ஜூலை மாதம் 3ம் தேதி, இந்தியாவில் நற்செய்தி அறிவித்த திருத்தூதர் புனித தோமாவின் திருவிழாவன்று, சிறப்பிக்கப்படுகின்றது. [2021-07-06 00:19:00]


மருத்துவமனையில் உயிரிழந்த அருள்பணி ஸ்டான் சுவாமி

மும்பை உயர் நீதிமன்றத்தின் அனுமதியின்பேரில், மே மாதம் 28ம் தேதி முதல் மும்பையின் திருக்குடும்ப மருத்துவமனையில் சிகிச்சை பெற்றுவந்த சமூக ஆர்வலர், இயேசு சபை அருள்பணி ஸ்டான் சுவாமி அவர்கள், ஜூலை 5ம் தேதி, திங்கள்கிழமையன்று, இந்திய நேரம் பிற்பகல் 1 மணி 24 நிமிடங்களுக்கு இறைபதம் சேர்ந்தார். பழங்குடியினர், தலித் மக்கள், மற்றும் வாழ்வின் கடைநிலைக்குத் தள்ளப்பட்டோரின் உரிமைகளுக்காகவும், வாழ்வு மேம்பாட்டிற்காகவும் உழைத்துவந்த இயேசு சபை அருள்பணி ஸ்டான் சுவாமி அவர்கள், இராஞ்சியில் பூர்வீகக் குடிமக்களிடையே பணியாற்றிவந்தபோது, NIA எனும் இந்திய தேசிய புலனாய்வு அமைப்பால் பயங்கரவாதச் சட்டத்தின்கீழ், கடந்த ஆண்டு, அக்டோபர் மாதம் 8ம் தேதி கைது செய்யப்பட்டார். அக்டோபர் 9ம் தேதி முதல் மும்பை டலோஜா சிறையில் அடைத்துவைக்கப்பட்டிருந்த அருள்பணி ஸ்டான் சுவாமி அவர்கள், கடினமான சட்ட போராட்டங்களுக்குப்பின் மே மாதம் 28ம் தேதி மருத்துவமனையில் அனுமதிக்கப்பட்டார். 84 வயதான இயேசு சபை அருள்பணி ஸ்டான் சுவாமி அவர்களின் உடல்நிலை மோசமானதைத் தொடர்ந்து, ஜூலை 3ம் தேதி சனிக்கிழமை இரவு செயற்கை சுவாசக்கருவி பொருத்தப்பட்டதாக அறிவிக்கப்பட்டது. மே மாதம் 28ம் தேதி முதல் 14 நாட்களுக்கு மருத்துமனையில் தங்கி சிகிச்சைப் பெறுவதற்கு அனுமதியளித்த மும்பை உயர்நீதிமன்றம், அருள்பணியாளரின் உடல்நிலையில் முன்னேற்றம் காணப்படாததைத் தொடர்ந்து, அவருக்கு சிகிச்சை வழங்க ஜூலை 5ம் தேதி வரை கால நீட்டிப்பை வழங்கியது, அந்த கால நீட்டிப்பின் இறுதி நாளில் இறைபதம் சேர்ந்தார், சமூக நடவடிக்கையாளர், அருள்பணி ஸ்டான் சுவாமி. பார்க்கின்சன் என்ற நரம்புத்தளர்ச்சி நோயாலும், செவித்திறன் குறைவாலும், வயது தொடர்புடைய ஏனைய நலப்பிரச்சனைகளாலும் பாதிக்கப்பட்டிருந்த இயேசு சபை அருள்பணி ஸ்டான் சுவாமி அவர்கள், கொரோனா பெருந்தொற்றுக்கு உள்ளாகியிருந்தது, மே 29ம் தேதி தெரியவந்தது. அருள்பணி ஸ்டான் சுவாமி அவர்களின் அடக்கச் சடங்கு விவரங்கள் விரைவில் அறிவிக்கப்படும் என இந்திய இயேசு சபை தலைவர், அருள்பணி ஸ்தனிஸ்லாஸ் டி சூசா அவர்கள் அறிவித்துள்ளார். அருள்பணியாளர் ஸ்டான் சுவாமி அவர்களின் வாழ்க்கை குறிப்பு இந்திய நடுவண் அரசின் வெறித்தனமான பழிவாங்கும் முயற்சியின் விளைவாக, 84 வயது நிறைந்த இயேசு சபை அருள்பணியாளர் ஸ்டான் சுவாமி அவர்கள், ஜூலை 5, இத்திங்களன்று இறைவனடி சேர்ந்தார். 1937ம் ஆண்டு, ஏப்ரல் 26ம் தேதி, தமிழ்நாட்டின் திருச்சியில் பிறந்த ஸ்டான் அவர்கள், தன் 20வது வயதில் இயேசு சபையில் இணைந்து, 1970ம் ஆண்டு, தன் 33வது வயதில் அருள்பணியாளராக திருப்பொழிவு பெற்றார். கடந்த 51 ஆண்டுகளாக அவர் ஆற்றிவந்த பணிகள் அனைத்தும் சமுதாய அக்கறை கொண்ட பணிகளாகவே இருந்தன. 1971ம் ஆண்டு ஜாம்ஷெட்பூர் மற்றும் சாய்பாசா பகுதிகளில் சமுதாயப் பணிகளைத் துவக்கிய அருள்பணி ஸ்டான் அவர்கள், 1975ம் ஆண்டு முதல், 1991ம் ஆண்டு முடிய, பெங்களூரு இந்திய சமுதாய நிறுவனத்தில் பணியாற்றினார். 1993ம் ஆண்டு முதல் பழங்குடியினர் நலனில் அக்கறை கொண்டு பணியாற்றிவந்த அருள்பணி ஸ்டான் அவர்கள், 2002ம் ஆண்டு, இராஞ்சி நகரில் Bagaicha என்ற மையத்தை உருவாக்கி, ஜார்க்கண்ட் மாநிலத்திலுள்ள பழங்குடியினரின் உரிமைகளுக்காக பல்வேறு விழிப்புணர்வு முகாம்கள், பயிற்சிப் பாசறைகள், சட்ட வழி போராட்டங்களை மேற்கொண்டார். பழங்குடியினரின் நிலங்களை, இந்திய நடுவண் அரசு, செல்வம் மிகுந்த சுறாமீன்களுக்கும், பன்னாட்டு நிறுவனங்களுக்கும் தாரைவார்த்து வந்ததை எதிர்த்து, பழங்குடியின இளையோரை ஒருங்கிணைத்து, அவர்களது உரிமைகளுக்காகப் போராடி வந்தார் அருள்பணி ஸ்டான். மாநில அரசு, இவ்விளையோரை எவ்வித ஆதாரமும் இன்றி, சிறைகளில் அடைத்தததை எதிர்த்து, பொதுநல வழக்குகளை அருள்பணி ஸ்டான் அவர்கள் தொடுத்தார். அருள்பணி ஸ்டான் சுவாமி அவர்களின் நீதி வழி போராட்டங்களை நிறுத்த இயலாத நடுவண் அரசு, அவரை, 2018ம் ஆண்டு சனவரி மாதம், புனேயில் நிகழ்ந்த பீமா கோரேகான் வன்முறை நிகழ்வுகளுடன் தொடர்புபடுத்தி, அவருக்கும் மாவோயிஸ்ட் தீவிரவாதிகளுக்கும் தொடர்பு உள்ளதென்ற பொய் வழக்கைப் புனைந்து, 2020ம் ஆண்டு அக்டோபர் 9ம் தேதி மும்பையின் டலோஜா சிறையில் அடைத்தது. எவ்வித ஆதாரமும் இன்றி, இந்திய தேசிய புலனாய்வுத் துறை இவர் மீது சுமத்திய குற்றங்களை நிரூபிக்க இயலாத போதும், இவருக்கு பிணையலில் விடுதலை அளிக்க மறுத்தது. பார்க்கின்சன்ஸ் எனப்படும் நரம்புத் தளர்ச்சி நோய், இதயம் தொடாபான குறைபாடுகள், செவித்திறன் குறைவு என்ற பல்வேறு குறைபாடுகளுடன் போராடிவந்த 84 வயதான அருள்பணி ஸ்டான் சுவாமி அவர்கள், குடிப்பதற்கு உறுஞ்சுக்குழல் பொருத்தப்பட்ட ஒரு கிண்ணம், குளிரிலிருந்து காத்துக்கொள்ளத தேவையான உடைகள் ஆகியவற்றை கேட்டபோது, அவற்றை முதலில் மறுத்தனர், சிறை அதிகாரிகள். பல மாதங்கள் சென்றே, இந்த உதவிகள் அவருக்கு வழங்கப்பட்டன. அருள்பணி ஸ்டான் அவர்களின் உடல்நலம் வெகுவாக தளர்ந்திருந்ததை கவனத்தில் கொண்டு, மும்பை உயர்நீதி மன்றம், அவர், மும்பையின் திருக்குடும்ப மருத்துவமனையில் அனுமதிக்கப்பட உத்தரவு வழங்கியது. மே 29ம் தேதி மருத்துவமனையில் அனுமதிக்கப்பட்ட அருள்பணி ஸ்டான் சுவாமி அவர்களுக்கு கோவிட் பெருந்தொற்றின் தாக்கம் இருந்ததென கண்டுபிடிக்கப்பட்டதையடுத்து, அவருக்குத் தேவையான மருத்துவ சிகிச்சைகள் வழங்கப்பட்டன. ஜூலை 3, இச்சனிக்கிழமை முதல் அவரது உடல் நிலை மிகவும் மோசமாகி, ஜூலை 5, இத்திங்களன்று காலை அவர் இறைவனடி சேர்ந்தார். [2021-07-06 00:15:40]


ஜூலை 3, புனித தோமா திருநாள் – ‘இந்திய கிறிஸ்தவ நாள்’

ஜூலை 3 இச்சனிக்கிழமை, திருத்தூதரான புனித தோமா திருநாள் சிறப்பிக்கப்படும் வேளையில், அதனை, ‘இந்திய கிறிஸ்தவ நாள்’ என்று இணைந்து கொண்டாட, இந்தியாவின் கத்தோலிக்கத் திருஅவை, மற்றும் ஏனைய கிறிஸ்தவ சபைகள் முடிவெடுத்துள்ளன என்று ஆசிய செய்தி கூறுகிறது. இந்தியாவில், கிறிஸ்தவ மறையானது, தொன்றுதொட்டு வளர்ந்துவரும் ஒரு மதம் என்பதையும், அது, இந்நாட்டில், ஒரு வெளிநாட்டு மதம் அல்ல என்பதையும் உணர்த்த, இந்தக் கொண்டாட்டம் ஏற்பாடு செய்யப்பட்டுள்ளது என்று, இந்திய கத்தோலிக்க ஆயர் பேரவையின் முன்னாள் செய்தித் தொடர்பாளர், அருள்பணி பாபு ஜோசப் அவர்கள் கூறினார். கி.பி. 52ம் ஆண்டில், இந்திய மண்ணில் காலடி வைத்து, 72ம் ஆண்டு முடிய இந்தியாவில் கிறிஸ்துவத்தை விதைத்து வளர்ந்துவந்த திருத்தூதரான புனித தோமா அவர்களின் திருநாள், இவ்வாண்டு முதல்முறையாக ‘இந்திய கிறிஸ்தவ நாள்’ என்று கொண்டாடப்படுகிறது என்பதை அருள்பணி ஜோசப் அவர்கள் கூறினார். 2021ம் ஆண்டு முதல் 2030ம் ஆண்டு முடிய 10 ஆண்டுகள், இந்திய கிறிஸ்தவத்தைக் கொண்டாடும் முடிவு எடுக்கப்பட்டுள்ளதென்றும், இயேசு கிறிஸ்து இறையரசை அறிவித்ததன் 2000மாம் ஆண்டைச் சிறப்பிக்கும் வண்ணம், இந்தக் கொண்டாட்டங்கள் அமையும் என்றும், அருள்பணி ஜோசப் அவர்கள் எடுத்துரைத்தார். இந்த பத்தாண்டு கொண்டாட்டங்களையொட்டி, யுனெஸ்கோ, இந்தியாவின் மிகப் பழமையான ஆலயங்களை, கலாச்சாரக் கருவூலங்களாக அறிவிக்கவேண்டும் என்றும், இந்தியக் கலாச்சாரம், வரலாறு ஆகிய தளங்களில் கிறிஸ்தவர்களின் பங்களிப்பை மக்கள் உணரவேண்டும் என்றும், அருள்பணி ஜோசப் அவர்கள் விண்ணப்பித்தார். [2021-07-02 23:34:06]


இந்தியாவின் Port Blair மறைமாவட்டத்திற்கு புதிய ஆயர்

மறைமாவட்டத்தின் புதிய ஆயராக, அதே மறைமாவட்டத்தைச் சேர்ந்த அருள்பணி விசுவாசம் செல்வராஜ் அவர்களை, ஜுன் 29, செவ்வாய்க்கிழமையன்று நியமித்தார் திருத்தந்தை பிரான்சிஸ். 1966ம் ஆண்டு ஜனவரி மாதம் 4ம் தேதி சென்னை, அண்ணாமலைபுரத்தில் பிறந்த அருள்பணி விசுவாசம் செல்வராஜ் அவர்கள், சென்னை சாந்தோம் இளங்குருமடத்திலும், சென்னை திரு இருதயக் குருத்துவக் கல்லூரியிலும் பயின்றபின், இராஞ்சி புனித ஆல்பர்ட் அருள்பணித்துவ பயிற்சிக் கல்லூரியிலும் படித்து, 1994ம் ஆண்டு, Port Blair மறைமாவட்டத்திற்கு அருள்பணியாளராக திருநிலைப்படுத்தப்பட்டார். மறைமாவட்ட நிர்வாகப்பணிகளில் பல்வேறு பொறுப்புகளை வகித்துள்ள அருள்பணி விசுவாசம் செல்வராஜ் அவர்கள், 2020ம் ஆண்டு முதல் Port Blair மறைமாவட்டத்தின் அப்போஸ்தலிக்க நிர்வாகியாக இருந்து வருகிறார். முன்னாள் ஆயர் Aleixo das Neves Dias அவர்கள், 2019ம் ஆண்டு ஜனவரி மாதம் 6ம் தேதி பணி ஒய்வு பெற்றதைத் தொடர்ந்து, Port Blair மறைமாவட்டம் ஆயரின்றி இருந்து வந்துள்ளது. [2021-06-29 17:13:44]


ஏறத்தாழ மூன்றாண்டுகளுக்குப்பின் திருச்சிக்கு புதிய ஆயர்

1954ம் ஆண்டு பிறந்து, திருச்சி மறைமாவட்டத்தில் பணியாற்றிவந்த அருள்பணி சவரிமுத்து ஆரோக்கியராஜ் அவர்களை, அம்மறைமாவட்டத்தின் ஆயராக, திருத்தந்தை பிரான்சிஸ் அவர்கள், ஜூன் 29, செவ்வாயன்று நியமித்துள்ளார். திருச்சி மறைமாவட்டத்தின் லாலாபேட்டை என்ற ஊரில் 1954ம் ஆண்டு அக்டோபர் 24ம் தேதி பிறந்த அருள்பணி சவரிமுத்து ஆரோக்கியராஜ் அவர்கள், பெங்களூருவிலும், பிரான்ஸ் நாட்டின் தலைநகர் பாரிசிலும் கல்வி பயின்றுள்ளார். 1981ம் ஆண்டு சனவரி 8ம் தேதி அருள்பணியாளராக திருநிலைப்படுத்தப்பட்ட இவர், சில பங்குத்தளங்களிலும், தமிழக ஆயர் பேரவையின் திருவழிபாட்டு பணிக்குழுவின் செயலராகவும், திருச்சி புனித பவுல் அருள்பணித்துவ பயிற்சிக் கல்லூரியின் அதிபராகவும் பணியாற்றியுள்ளார். திருச்சி மறைமாவட்டத்தின் முன்னாள் ஆயர் ஆன்டனி டிவோட்டா அவர்கள், 2018ம் ஆண்டு ஜூலை 14ம் தேதி பணி ஓய்வுப் பெற்றதைத் தொடர்ந்து, ஆயரின்றி இருந்த அம்மறைமாவட்டத்திற்கு, அதே மறைமாவட்டத்தைச் சேர்ந்த அருள்பணி சவரிமுத்து ஆரோக்கியராஜ் அவர்கள் புதிய ஆயராக நியமிக்கப்பட்டுள்ளார். முன்னாள் ஆயர் ஆன்டனி டிவோட்டா அவர்கள், 2019ம் ஆண்டு அக்டோபர் மாதம் 15ம் தேதி இறைபதம் சேர்ந்தார். புனித மரியா பேராலயம், திருச்சி புனித மரியா பேராலயம், திருச்சி [2021-06-29 17:04:33]


ஸ்டான் சுவாமிக்கு மருத்துவ சிகிச்சை காலம் நீட்டிப்பு

பயங்கராவாத்த்தில் ஈடுபட்டதாக, பொய்க்குற்றம் சாட்டப்பட்டு, அநீதியாய் மும்பை டலோஜா சிறையில் அடைக்கப்பட்ட 84 வயது நிறைந்த இயேசு சபை அருள்பணி ஸ்டான் சுவாமி அவர்களின் உடல்நிலை மோசமடைந்துவரும் நிலையில், மருத்துவமனையில் அவருக்கு அளிக்கப்பட்டுவரும் சிகிச்சை காலத்தை நீட்டிப்பதற்கு மும்பை உயர்நீதிமன்றம் அனுமதியளித்துள்ளது. இவ்வாண்டு மே மாதம் 28ம் தேதியிலிருந்து மும்பை திருக்குடும்ப மருத்துவமனையில் சிகிச்சை பெற்றுவரும் அருள்பணி ஸ்டான் சுவாமி அவர்களின் உடல்நிலை மோசமடைந்துவருவதை முன்னிட்டு, அவருக்கு தீவிர சிகிச்சை தேவைப்படுகின்றது என்று நீதிமன்றத்திடம் விண்ணப்பிக்கப்பட்டது. அதைத் தொடர்ந்து மும்பை உயர்நீதிமன்றம், அருள்பணி ஸ்டான் சுவாமி அவர்களின் சிகிச்சை காலத்தை, வருகிற ஜூலை 5ம் தேதி வரை நீட்டித்துள்ளது. அருள்பணி ஸ்டான் சுவாமி அவர்கள், மும்பை டலோஜா சிறையில் கோவிட்-19 பெருந்தொற்றால் பாதிக்கப்பட்டு, மருத்துவமனையில் சிகிச்சை பெற்று வருகிறார் என்று கூறப்படுகின்றது. கடந்த 2020ம் ஆண்டு அக்டோபர் 9ம் தேதியிலிருந்து சிறையில் வைக்கப்பட்டிருக்கும் அருள்பணி ஸ்டான் சுவாமி அவர்கள், தான் சிறைக்கு வந்தவேளையில் ஓரளவு நல்ல உடல்நலத்துடன் இருந்ததாகவும், சிறை வாழ்வில் தனது, உடல்நிலை நாளுக்கு நாள் மோசமடைந்து வருகின்றதென்றும், இதனால் தனக்கு பிணையல் வழங்கப்படவேண்டுமென்றும், மே 21ம் தேதி மும்பை உயர்நீதி மன்றத்தில், இணையம்வழியாக நடைபெற்ற விசாரணையில் கேட்டுக்கொண்டது குறிப்பிடத்தக்கது. மேலும், அருள்பணி ஸ்டான் சுவாமி அவர்களுக்கு, பிணையல் வழங்கப்படவேண்டும் என்று விண்ணப்பிக்கப்படும் மனுக்களை, நீதிமன்றம் தொடர்ந்து நிராகரித்து வருகிறது. (AsiaNews) [2021-06-19 23:01:35]


கோவிட் பெருந்தொற்றினால் மரணமடைந்த 4வது ஆயர்

இந்தியாவின் கும்லா (Gumla) மறைமாவட்டத்தின் ஆயராகப் பணியாற்றிவந்த பால் அலாய்ஸ் லாக்ரா (Paul Alois Lakra) அவர்கள், கோவிட் பெருந்தொற்றின் காரணமாக, ஜூன் 15, இச்செவ்வாயன்று, இறையடி சேர்ந்தார். சோட்டா நாக்பூர் பகுதியில் வாழும் பழங்குடியினருக்கென அயராது உழைத்த ஆயர் லாக்ரா அவர்களின் மறைவு ஈடுசெய்ய இயலாத பெரும் இழப்பு என்று, கட்டக்-புவனேஷ்வர் பேராயர் ஜான் பார்வா அவர்கள் ஆசிய செய்தியிடம் கூறினார். ஆயர் லாக்ரா அவர்களின் அடக்கத் திருப்பலியை, இராஞ்சி பேராயர் ஃபீலிக்ஸ் டோப்போ அவர்கள், கும்லா பேராலயத்தில், ஜூன் 16, இப்புதனன்று தலைமையேற்று நடத்தினார். 2006ம் ஆண்டு முதல், கும்லாவின் ஆயராகப் பணியாற்றிவந்த, 65 வயது நிறைந்த ஆயர் லாக்ரா அவர்கள், இந்தியாவில், கோவிட் பெருந்தொற்றின் காரணமாக இறந்த நான்காவது ஆயர் என்று ஆசிய செய்தி கூறுகிறது. இவருக்கு முன்னதாக, புதுச்சேரி-கடலூர் உயர் மறைமாவட்டத்தின் முன்னாள் பேராயர் அந்தனி அனந்தராயர், சாகர் மறைமாவட்டத்தின் முன்னாள் சீரோ மலபார் ஆயர் ஜோசப் நீலங்காவில், மற்றும் மத்திய பிரதேசத்தின் ஜாபுவா மறைமாவட்ட ஆயர் பேசில் பூரியா ஆகியோர், கோவிட் பெருந்தொற்றினால் பாதிக்கப்பட்டு உயிரிழந்துள்ளனர். கோவிட் பெருந்தொற்றினால் நோயுற்று, இதுவரை, இந்திய தலத்திருஅவையில், 283 அருள்பணியாளர்களும், 252 அருள் சகோதரிகளும் இறையடி சேர்ந்துள்ளனர் என்று, Indian Currents இதழில் பணியாற்றும் அருள்பணி சுரேஷ் மாத்யூ அவர்கள் கூறியுள்ளார்.(AsiaNews) [2021-06-17 00:32:28]


சேலம் மறைமாவட்டத்திற்கு புதிய ஆயர்

தமிழகத்தின் சேலம் மறைமாவட்டத்தின் புதிய ஆயராக, பாண்டிச்சேரி-கடலூர் உயர் மறைமாவட்ட அருள்பணி அருள்செல்வம் இராயப்பன் அவர்களை, மே 31, இத்திங்களன்று, திருத்தந்தை பிரான்சிஸ் அவர்கள் நியமித்துள்ளார். பெங்களூருவின் புனித பேதுரு குருத்துவக் கல்லூரியில், திருஅவை சட்டங்கள் துறையின் இயக்குநராகப் பணியாற்றிவரும் அருள்பணி அருள்செல்வம் அவர்கள், பாண்டிச்சேரி-கடலூர் உயர்மறைமாவட்டத்தின் நீதி சார்ந்த விவகாரங்களில் பொறுப்பாளராகவும் செயல்பட்டு வருகிறார். 1960ம் ஆண்டு, நவம்பர் மாதம் 18ம் தேதி, பாண்டிச்சேரி-கடலூர் உயர்மறைமாவட்டத்தின் பண்ருட்டிக்கு அருகேயுள்ள Sathipattu எனுமிடத்தில் பிறந்த அருள்பணி அருள்செல்வம் அவர்கள், 1986ம் ஆண்டு, அருள்பணியாளராக திருநிலைப்படுத்தப்பட்டு, பல்வேறு பங்குத்தளங்களில் பணியாற்றியபின், 1992 முதல், 94 வரை, உரோம் நகரின் உர்பான் பாப்பிறை பல்கலைக்கழகத்தில் முனைவர் படிப்பை மேற்கொண்டார். 1994ம் ஆண்டு பெங்களூரு புனித பேதுரு கல்லூரியின் விரிவுரையாளராக பணியைத் துவக்கிய அருள்பணி அருள்செல்வம் அவர்கள், இதுவரை அக்குருத்துவக் கல்லூரியில் பல்வேறு உயர் பதவிகளை வகித்துள்ளார். 2020ம் ஆண்டு மார்ச் மாதம், முன்னாள் ஆயர் சிங்கராயன் செபஸ்தியானப்பன் தன் 67ம் வயதில் பதவிவிலகியதைத் தொடர்ந்து, கடந்த ஓராண்டிற்கு மேலாக, ஆயர் இன்றி இருந்த சேலம் மறைமாவட்டத்திற்கு அருள்பணி அருள்செல்வம் அவர்களை, புதிய ஆயராக அறிவித்துள்ளார், திருத்தந்தை பிரான்சிஸ். [2021-06-05 01:28:15]


அருள்பணி சுவாமி மருத்துவமனையில் சிகிச்சை பெற அனுமதி

பல்வேறு நலவாழ்வுப் பிரச்சனைகளால் மும்பை டலோஜா சிறையில் துன்புற்றுவரும், 84 வயது நிறைந்த இயேசு சபை அருள்பணியாளர் ஸ்டான் சுவாமி அவர்கள், மும்பையில், திருக்குடும்ப மருத்துவமனையில் இரண்டு வாரங்களுக்கு சிகிச்சை பெறுவதற்கு, நீதிமன்றம் அனுமதியளித்துள்ளது என்று, உரோம் உலகளாவிய இயேசு சபை தலைமையகம் கூறியுள்ளது. விடுமுறை முடிந்து மும்பை உயர் நீதிமன்றம் மீண்டும் திறக்கப்படும்போது, அருள்பணி ஸ்டான் சுவாமி அவர்கள் விண்ணப்பித்திருந்த பிணையல் மனு மீண்டும் விசாரணைக்கு எடுத்துக்கொள்ளப்படும் என்றும், இயேசு சபை தலைமையகம் வெளியிட்ட அறிக்கையில் கூறப்பட்டுள்ளது. அருள்பணி ஸ்டான் சுவாமி அவர்களை வெகு விரைவில் மருத்துவமனையில் சேர்ப்பதற்கு முயற்சிகள் மேற்கொள்ளப்பட்டு வருகின்றன என்று கூறியுள்ள பெங்களூரு இந்திய சமுதாய நிறுவனத்தின் இயக்குனர், இயேசு சபை அருள்பணி ஜோ சேவியர் அவர்கள், இந்நடவடிக்கை, மே 28, இவ்வெள்ளிக்கிழமைக்குள் மேற்கொள்ளப்படும் என்ற நம்பிக்கையையும் தெரிவித்துள்ளார். கடந்த 2020ம் ஆண்டு அக்டோபர் 9ம் தேதியிலிருந்து சிறையில் வைக்கப்பட்டிருக்கும் அருள்பணி ஸ்டான் சுவாமி அவர்கள், தான் சிறைக்கு வந்தவேளையில் ஓரளவு நல்ல உடல்நலத்துடன் இருந்த்தாகவும், சிறை வாழ்வில் தனது, உடல்நிலை நாளுக்கு நாள் மோசமடைந்து வருகின்றதென்றும், இதனால் தனக்கு பிணையல் வழங்கப்படவேண்டுமென்றும், கடந்த வாரத்தில், மும்பை உயர்நீதி மன்றத்தில், இணையம்வழியாக நடைபெற்ற விசாரணையில் கேட்டுக்கொண்டது குறிப்பிடத்தக்கது. அச்சமயத்தில், நீதிமன்றம், அவருக்கு பிணையல் வழங்குவதை மறுத்ததோடு, மும்பையில், JJ அரசு மருத்துவமனையில் சிகிச்சை வழங்க முன்வந்தது. இதற்கு மறுப்பு தெரிவித்த அருள்பணி ஸ்டான் சுவாமி அவர்கள், அந்த அரசு மருத்துவமனையில் மூன்று முறை தான் அனுமதிக்கப்பட்டதால், அங்குள்ள நிலைமை தனக்கு நன்றாகவே தெரியும் என்றும், தனது உடல்நிலை மோசமடைந்து வந்தாலும் பரவாயில்லை, மருத்துவமனையில் அனுமதிக்கப்படுவதைவிட, சிறையிலேயே இறப்பது மேல் என்றும் தெரிவித்தார். (Ind.Sec/tamil [2021-05-30 01:03:15]


புதிய திருப்பீட தூதர் பேராயர் ஜிரெல்லி இந்தியாவுக்கு வந்துள்ளார்

இவ்வாண்டு மார்ச் 13ம் தேதி, திருத்தந்தை பிரான்சிஸ் அவர்கள், இந்தியாவுக்கென நியமித்துள்ள புதிய திருப்பீடத் தூதர், பேராயர் லெயோபோல்தோ ஜிரெல்லி (Leopoldo Girelli) அவர்கள், மே 28, இவ்வெள்ளியன்று இந்தியா வந்தடைந்துள்ளார். இவ்வெள்ளி அதிகாலையில் புது டெல்லி விமான நிலையம் வந்திறங்கிய, பேராயர் ஜிரெல்லி அவர்களை, டெல்லி பேராயர் அனில் கூட்டோ, Faridabad ஆயர் Kuriakose Bharanikulangara ஆகியோர் உட்பட, புது டெல்லியிலுள்ள திருப்பீட தூதரக அதிகாரிகள் சிலர் வரவேற்றனர். இந்த வரவேற்பு குறித்து Matters India ஊடகத்திடம் பேசிய, இந்திய கத்தோலிக்க ஆயர் பேரவையின் துணைப் பொதுச் செயலர் அருள்பணி Jervis D’Souza அவர்கள், கோவிட்-19 பெருந்தொற்று கட்டுப்பாட்டு விதிமுறைகளால், ஒரு சிலரே விமான நிலையம் சென்று, பேராயர் ஜிரெல்லி அவர்களை வரவேற்க முடிந்தது என்று கூறியுள்ளார். பேராயர் ஜிரெல்லி அவர்களின் வருகை, அகில இந்திய திருஅவைக்கு மகிழ்ச்சி அளித்துள்ளது என்றும், இவர் மிகவும் எளிமையானவர் என்றும், அருள்பணி D’Souza அவர்கள், மேலும் கூறியுள்ளார். இந்திய திருப்பீடத் தூதராகப் பணியாற்றிவந்த பேராயர் ஜாம்பத்திஸ்தா திகுவாத்ரோ அவர்கள் 2020ம் ஆண்டு ஆகஸ்ட் மாதத்தில், பிரேசில் நாட்டுக்குத் திருப்பீடத் தூதராக பணிமாற்றம் செய்யப்பட்டதையடுத்து, 68 வயது நிரம்பிய பேராயர் ஜிரெல்லி அவர்களை, திருத்தந்தை பிரான்சிஸ் அவர்கள், இந்தியாவுக்கு புதிய திருப்பீடத் தூதராக நியமித்தார். பேராயர் ஜிரெல்லி 1953ம் ஆண்டு மார்ச் 13ம் தேதி, இத்தாலியின் பெர்கமோ மாவட்டத்தில் Predore எனும் நகரில் பிறந்த பேராயர் ஜிரெல்லி அவர்கள், 1978ம் ஆண்டில் பெர்கமோ மறைமாவட்டத்திற்கென அருள்பணித்துவ வாழ்வுக்குத் திருநிலைப்படுத்தப்பட்டார். 1987ம் ஆண்டில் திருப்பீடத்தின் தூதரகப் பணிகளில் பணியாற்றத் தொடங்கிய பேராயர் ஜிரெல்லி அவர்கள், 2006ம் ஆண்டு ஏப்ரல் 13ம் தேதி, முன்னாள் திருத்தந்தை 16ம் பெனடிக்ட் அவர்களால், இந்தோனேசியாவிற்கும், பின்னர், அதே ஆண்டில் East Timorக்கும் திருப்பீடத் தூதராக நியமிக்கப்பட்டார். இவர், 2011ம் ஆண்டில், சிங்கப்பூர் நாட்டிற்கு, திருப்பீடத் தூதராகவும், மலேசியா, புரூனெய், வியட்நாம் ஆகிய நாடுகளுக்கு, திருப்பீடப் பிரதிநிதியாகவும் நியமிக்கப்பட்டார். 1975ம் ஆண்டில் வியட்நாமிலிருந்து திருப்பீடப் பிரதிநிதி வெளியேற்றப்பட்டபின், அந்நாட்டிற்கு முதன்முறையாக நியமிக்கப்பட்ட பேராயர் ஜிரெல்லி அவர்கள், 2011ம் ஆண்டு ஜூன் 18ம் தேதி, தென்கிழக்கு ஆசிய நாடுகள் அமைப்பிற்குத் (ASEAN) திருப்பீடத் தூதராகவும் நியமிக்கப்பட்டார். பேராயர் ஜிரெல்லி அவர்கள், 2017ம் ஆண்டு செப்டம்பர் 13ம் தேதியிலிருந்து, இஸ்ரேல் மற்றும், சைப்ரசின் திருப்பீடத் தூதராகவும், எருசலேம் மற்றும், பாலஸ்தீனாவின் திருத்தூதுப் பிரதிநிதியாகவும் பணியாற்றினார். (Matters India) [2021-05-30 00:55:32]


பக்க இலக்கங்களை அழுத்தி எல்லா செய்திகளையும் பார்வையிடவும்