வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



500க்கும் அதிகமான இந்திய திருஅவைப் பணியாளர், கொரோனாவுக்கு பலி

கோவிட்-19 பெருந்தொற்றால் பாதிக்கப்பட்ட நாடுகளில், பல நூற்றுக்கணக்கான அருள்பணியாளர்களும், அருள்சகோதரிகளும் இந்நோயால் தாக்கப்பட்டு தங்கள் உயிர்களை இழந்துள்ளதாக, ICN செய்தி நிறுவனம் தெரிவிக்கிறது. பெருந்தொற்றால் அதிக அளவில் பாதிக்கப்பட்ட இத்தாலி, அமெரிக்க ஐக்கிய நாடு, இந்தியா, மற்றும் பிரேசில் ஆகிய நாடுகளில், திருஅவைப் பணியாளர்களின் இழப்பு அதிகமாக இருந்ததைச் சுட்டிக்காட்டும் செய்தி நிறுவனங்கள், இது திருஅவைக்கு மட்டும் பிரச்சனையல்ல, மாறாக, மருத்துவமனைகளிலும், முதியோர் இல்லங்களிலும் வாழும் மக்களின் தேவைகளைக் கவனித்துச் செயலாற்றும் திருஅவைப் பணியாளர்களின் எண்ணிக்கை குறைந்துவருவது, சமுதாயத்திற்கும் பெரும் இழப்பாகுமென தெரிவிக்கின்றன. ஏற்கனவே இறையழைத்தல்கள் குறைந்துவரும் நிலையில், கோவிட் பெருந்தொற்றால் மேலும் திருஅவைப் பணியாளர்களை இழந்துவருவது, சமூகப்பணிகளை மேலும் பெருமளவில் பாதிக்கும் என்று கூறியுள்ள அமெரிக்க ஐக்கிய நாட்டின் வெர்ஜினியா பல்கலைக்கழக கத்தோலிக்க கல்வித்துறையின் தலைவர் Andrew Chesnut அவர்கள், பங்குதளப் பணிகளும் பெருமளவில் பாதிக்கப்படும் ஆபத்து உள்ளது என்று கூறினார். இந்தியாவில் 500க்கும் மேற்பட்ட அருள்பணியாளர்களும் அருள்சகோதரிகளும் கொரோனா பெருந்தொற்றுக்கு பலியாகியுள்ளதாக உரைத்துள்ள புது டெல்லி உலக மீட்பர் ஆலய அருள்பணி சுரேஷ் மாத்யு அவர்கள், மே மாதத்தில் உயிரிழப்புக்கள் எண்ணிக்கை அதிகமாக இருந்ததாகத் தெரிவித்தார். இத்தாலி நாட்டில் 292 அருள்பணியாளர்கள் கொரோனா பெருந்தொற்றுக்குப் பலியாகியுள்ளதாகவும், அமெரிக்க ஐக்கிய நாட்டில் இந்நோய்க்குப் பலியான ஆறு இலட்சத்துக்கும் மேற்பட்டோரில், அருள்பணியாளர்கள் மற்றும் அருள்சகோதரிகளின் எண்ணிக்கை அதிகமெனவும், ஒரு துறவு சபையில் மட்டும் 21 அருள்சகோதரிகள் இந்நோய்க்குப் பலியாகியுள்ளதாகவும், பிரேசில் நாட்டில் ஒரு கர்தினால், இரண்டு ஆயர்கள் உட்பட குறைந்தது 65 அருள்பணியாளர்கள் மரணமடைந்துள்ளதாகவும் தெரிவிக்கப்பட்டுள்ளது. [2021-07-18 00:47:32]


ஆலயம் அழிக்கப்பட்டுள்ளது குறித்து கத்தோலிக்கர் அதிர்ச்சி

டெல்லியில் அரசு அதிகாரிகளால் அழிக்கப்பட்டுள்ள சிறு மலர் கத்தோலிக்க ஆலயத்தை மீண்டும் கட்டியெழுப்புவதற்கு, பிரதமர் நரேந்திர மோடி அவர்கள் உதவுமாறு, Faridabad ஆயர் Kuriakose Bharanikulangara அவர்கள் அழைப்புவிடுத்துள்ளார். டெல்லியின் Lado Sarai என்ற பகுதியில், சீரோ-மலபார் வழிபாட்டுமுறை கத்தோலிக்கரால் மேலாண்மை செய்யப்பட்டுவந்த சிறு மலர் கத்தோலிக்க ஆலயம், முறையான அனுமதியின்றி கட்டப்பட்டுள்ளது என்று கூறி, அது, ஜூலை 12, இத்திங்களன்று, டெல்லி வளர்ச்சித்திட்ட அதிகாரிகளால் தரைமட்டமாக்கப்பட்டுள்ளது. இது குறித்து யூக்கா செய்தியிடம் கூறிய, ஆயர் Bharanikulangara அவர்கள், இந்த ஆலயம் கட்டப்பட்டுள்ள நிலப்பகுதி, 2006ம் ஆண்டில் விலைக்கு வாங்கப்பட்டு, அவ்விடத்தில் ஆலயம் கட்டப்பட்டது என்றும், கடந்த 12 ஆண்டுகளாக, இவ்வாலயத்தில் திருவழிபாடுகள் நடைபெற்று வருகின்றன என்றும் கூறினார். இந்த நிலம் சார்ந்த ஆவணங்கள் எல்லாம் முறைப்படி உள்ளன என்றும், இவ்விவகாரம் குறித்து பிரதமர் மோடி அவர்கள், தேவையான நடவடிக்கைகளை மேற்கொள்ளாவிடில், இது தவறான செய்தியை வெளிப்படுத்தும் என்றும், ஆயர் Bharanikulangara அவர்கள் கூறியுள்ளார். தற்போது இறைவேண்டல் செய்வதற்கு இடமில்லாத கத்தோலிக்கருக்கு, அரசு மாற்று வழிகளை அமைத்துக் கொடுக்கவேண்டும் என்றும் ஆயர் கூறியுள்ளார். இதற்கிடையே, இந்த ஆலயம் தரைமட்டமாக்கப்பட்டுள்ளது குறித்து ஊடகங்களிடம் பேசிய, டெல்லி முதல்வர் அரவிந்த் கெஜ்ரிவால் அவர்கள், இந்த ஆலயம் அமைந்திருந்த பகுதி, மத்திய அரசின்கீழ் உள்ளது எனவும், ஆலயத்தை இழந்துள்ள கத்தோலிக்கருக்கு, தன்னால் இயன்ற அனைத்து உதவிகளையும், ஆதரவையும் வழங்குவதாகவும் கூறியுள்ளார். (UCAN) [2021-07-17 00:54:28]


ஆலயம் அழிக்கப்பட்டுள்ளது குறித்து கத்தோலிக்கர் அதிர்ச்சி

டெல்லியில் அரசு அதிகாரிகளால் அழிக்கப்பட்டுள்ள சிறு மலர் கத்தோலிக்க ஆலயத்தை மீண்டும் கட்டியெழுப்புவதற்கு, பிரதமர் நரேந்திர மோடி அவர்கள் உதவுமாறு, Faridabad ஆயர் Kuriakose Bharanikulangara அவர்கள் அழைப்புவிடுத்துள்ளார். டெல்லியின் Lado Sarai என்ற பகுதியில், சீரோ-மலபார் வழிபாட்டுமுறை கத்தோலிக்கரால் மேலாண்மை செய்யப்பட்டுவந்த சிறு மலர் கத்தோலிக்க ஆலயம், முறையான அனுமதியின்றி கட்டப்பட்டுள்ளது என்று கூறி, அது, ஜூலை 12, இத்திங்களன்று, டெல்லி வளர்ச்சித்திட்ட அதிகாரிகளால் தரைமட்டமாக்கப்பட்டுள்ளது. இது குறித்து யூக்கா செய்தியிடம் கூறிய, ஆயர் Bharanikulangara அவர்கள், இந்த ஆலயம் கட்டப்பட்டுள்ள நிலப்பகுதி, 2006ம் ஆண்டில் விலைக்கு வாங்கப்பட்டு, அவ்விடத்தில் ஆலயம் கட்டப்பட்டது என்றும், கடந்த 12 ஆண்டுகளாக, இவ்வாலயத்தில் திருவழிபாடுகள் நடைபெற்று வருகின்றன என்றும் கூறினார். இந்த நிலம் சார்ந்த ஆவணங்கள் எல்லாம் முறைப்படி உள்ளன என்றும், இவ்விவகாரம் குறித்து பிரதமர் மோடி அவர்கள், தேவையான நடவடிக்கைகளை மேற்கொள்ளாவிடில், இது தவறான செய்தியை வெளிப்படுத்தும் என்றும், ஆயர் Bharanikulangara அவர்கள் கூறியுள்ளார். தற்போது இறைவேண்டல் செய்வதற்கு இடமில்லாத கத்தோலிக்கருக்கு, அரசு மாற்று வழிகளை அமைத்துக் கொடுக்கவேண்டும் என்றும் ஆயர் கூறியுள்ளார். இதற்கிடையே, இந்த ஆலயம் தரைமட்டமாக்கப்பட்டுள்ளது குறித்து ஊடகங்களிடம் பேசிய, டெல்லி முதல்வர் அரவிந்த் கெஜ்ரிவால் அவர்கள், இந்த ஆலயம் அமைந்திருந்த பகுதி, மத்திய அரசின்கீழ் உள்ளது எனவும், ஆலயத்தை இழந்துள்ள கத்தோலிக்கருக்கு, தன்னால் இயன்ற அனைத்து உதவிகளையும், ஆதரவையும் வழங்குவதாகவும் கூறியுள்ளார். (UCAN) [2021-07-17 00:50:16]


டெல்லி உயர்மறைமாவட்டத்தின் துணை ஆயர் தீபக் வலேரியன்

இந்தியாவின், டெல்லி உயர்மறைமாவட்டத்திற்கு, புதிய துணை ஆயராக, அருள்பணி தீபக் வலேரியன் தவ்ரோ (Deepak Valerian Tauro) அவர்களை, திருத்தந்தை பிரான்சிஸ் அவர்கள், ஜூலை 16, இவ்வெள்ளியன்று நியமித்துள்ளார். 1967ம் ஆண்டு ஆகஸ்ட் 2ம் தேதி, கர்நாடக மாநிலத்தின் சிக்மகளூரில் பிறந்த, டெல்லி துணை ஆயர் தீபக் வலேரியன் அவர்கள், மெய்யியல் படிப்பை, பரக்பூரிலும் (1986-1990) இறையியல் படிப்பை இராஞ்சியிலும் (1992-1996), ஆன்மீகம் மற்றும், உளவியலில் முதுகலை பட்டப்படிப்பை பெங்களூருவிலும் முடித்து, 1996ம் ஆண்டில் முஸஃபர்பூர் மறைமாவட்டத்திற்கென, அருள்பணித்துவ வாழ்வுக்குத் திருப்பொழிவு செய்யப்பட்டார். பங்குத்தந்தை, மறைமாவட்ட இளையோர் அமைப்பு இயக்குனர், அருள்பணித்துவப் பயிற்சி கல்லூரி இயக்குனர், முஸஃபர்பூர் ஆயருக்குச் செயலர் போன்ற பல்வேறு பொறுப்புக்களை வகித்த இவர், பீகார், ஜார்க்கண்ட், மற்றும், அந்தமான் ஆயர் பேரவையின் செயலராகவும் பணியாற்றியுள்ளார். முஸஃபர்பூர் மறைமாவட்டத்தைச் சேர்ந்த, டெல்லி புதிய துணை ஆயர் தீபக் வலேரியன் அவர்கள், 2015ம் ஆண்டு முதல், இராஞ்சி, புனித ஆல்பர்ட் கல்லூரியின் தலைவராகப் பணியாற்றியவர். டெல்லி உயர்மறைமாவட்டம் 1910ம் ஆண்டு செப்டம்பர் 13ம் தேதி, சிம்லா உயர்மறைமாவட்டம் என்ற பெயரில் உருவாக்கப்பட்ட தற்போதைய டெல்லி உயர்மறைமாவட்டம், 1937ம் ஆண்டு ஏப்ரல் 13ம் தேதி டெல்லி, மற்றும், சிம்லா உயர்மறைமாவட்டமாகப் பெயர் மாற்றம் பெற்றது. பின்னர் 1959ம் ஆண்டு ஜூன் 4ம் தேதி, டெல்லி உயர்மறைமாவட்டம் என்று பெயர் மாற்றம் செய்யப்பட்டது. இவ்வுயர்மறைமாவட்டத்திற்கு, திருத்தந்தை புனித 2ம் யோவான் பவுல் அவர்கள், இருமுறை (பிப்.1986, நவ.1999) திருத்தூதுப் பயணங்களை மேற்கொண்டுள்ளார். [2021-07-17 00:28:06]


தந்தை ஸ்டான் சுவாமி, ஒடுக்கப்பட்டோரின் மனசாட்சி

இயேசு சபை அருள்பணி ஸ்டான் சுவாமி அவர்களின் இறப்பு, இந்திய ஒன்றிய அரசின் நிறுவனங்களான, தேசிய புலனாய்வு முகமை, சிறை நிர்வாகம், நீதிமன்றம் என, எல்லாம் இணைந்து நிகழ்த்திய படுகொலை என்று, தமிழக ஆயர் பேரவையின் இளைஞர் பணிக்குழுத் தலைவர், கோட்டாறு மறைமாவட்ட ஆயர் நசரேன் சூசை அவர்கள் கூறியுள்ளார். தந்தை ஸ்டான் அவர்களின் இறப்பைமுன்னிட்டு, மனித உரிமைக்காப்பாளர்கள், மற்றும், அரசியல் தலைவர்கள் என, பன்னாட்டு அளவிலும், இந்திய அளவிலும், எழுந்துள்ள கண்டனங்களால், இந்திய ஒன்றிய அரசு தலைகுனிந்து நிற்கிறது எனவும், ஆயர் நசரேன் அவர்கள் கூறியுள்ளார். தந்தை ஸ்டான் சுவாமியின் இறப்பையொட்டி, “அரசு படுகொலையை எதிர்த்து முழக்கம் செய்வோம்” என்ற தலைப்பில், கண்டன அறிக்கை ஒன்றை வெளியிட்டுள்ள ஆயர் நசரேன் அவர்கள், இவ்வாறு கூறியுள்ளார் தந்தை ஸ்டான் அவர்களின் இறப்பையொட்டி, ஜார்கண்ட் மாநில பழங்குடி மக்களுக்கும், இயேசு சபையினருக்கும், தந்தையின் உறவினர்களுக்கும், தமிழக ஆயர் பேரவையின் இளைஞர் பணிக்குழுத் தலைவர் என்ற முறையில், தனது ஆழ்ந்த இரங்கலைத் தெரிவிப்பதாகவும், ஆயர் நசரேன் அவர்கள் கூறியுள்ளார். UAPA சட்டத்தால் கைதுசெய்யப்பட்டு நடைபிணமாகியுள்ள கவிஞர் வரவர ராவ் அவர்கள் வெளியிட்ட, “குற்றம் அரசாளும்போதும், மக்களைக் குற்றவாளியாக்கி வேட்டையாடும்போதும், குரலிருந்தும் மவுனம் சாதிக்கும் ஒவ்வொருவரும் குற்றவாளிதான்” என்ற, கூற்றைக் குறிப்பிட்டுள்ள ஆயர் நசரேன் அவர்கள், இக்கூற்று, நம் அனைவருடைய மனச்சான்றை ஊடுருவட்டும் என்று கூறியுள்ளார். UAPA சட்டங்களைத் திரும்பப் பெறவும், தேசிய புலனாய்வு முகமையைக் கலைக்கவும் உழைப்போருடன் நம் தோழமையை வெளிப்படுத்திப் போராடுவதன் வழியாகவே, ஒடுக்கப்பட்டோரின் மனசாட்சியான தந்தை ஸ்டான் அவர்களுக்கு உண்மையான அஞ்சலியை நம்மால் செலுத்த முடியும் என்றும் ஆயரின் அறிக்கை கூறுகிறது. திருச்சி மாவட்டம், விரகாலூரில் பிறந்த அருள்பணி ஸ்டான் அவர்கள், 1990ம் ஆண்டு முதல், ஜார்க்கண்ட் மாநிலத்தில் பழங்குடியினருக்காக உழைத்து வந்தார். அரசின் வளர்ச்சித் திட்டங்களாலும், பெரும்தொழில் நிறுவனங்களின் அதீத பேராசையாலும், காடுகள் அழிக்கப்பட்டு, கனிம வளங்கள் கொள்ளையடிக்கப்பட்டதாலும், பழங்குடி மக்கள் பெரிதும் பாதிக்கப்பட்டனர். தந்தை ஸ்டான் அவர்கள், அம்மக்களது அரசியல் சட்ட உரிமை, நிலவுரிமை, மற்றும், மனித உரிமைகளுக்காகப் பாடுபட்டார். பழங்குடி மக்களில் ஏராளமானோர் மாவோயிஸ்ட்கள் என்று பொய்யாகக் குற்றம் சாட்டப்பட்டு சிறையில் அடைக்கப்பட்டிருந்தபோது, அவர்கள்மீது போடப்பட்டிருந்த பொய் வழக்குகளுக்கு எதிராக, இவர் சட்டப்போராட்டம் நடத்தினார் என்று, கோட்டாறு ஆயர் நசரேன் அவர்களது அறிக்கை கூறுகிறது. (Ind.Sec./Tamil) [2021-07-10 23:43:16]


ஸ்டான் சுவாமியின், அரசு படுகொலையை எதிர்த்து 'முழக்கம் செய்வோம்'

பாசிச ஒன்றிய அரசால், நீதிமன்றக் காவலில் படுகொலை செய்யப்பட்ட, குரலற்றவர்களின் குரலாக ஓங்கி ஒலித்த, மற்றும், விளிம்புநிலை மாந்தரின் இறைவாக்கினராகத் திகழ்ந்த, அருள்பணி ஸ்டான் சுவாமி அவர்களுக்கு, தமிழக கத்தோலிக்க இளைஞர் இயக்கம், ஜூலை 11, இஞ்ஞாயிறன்று, 'முழக்கம் செய்வோம்' என்ற அஞ்சலி செலுத்தும் நிகழ்வு ஒன்றை ஏற்பாடு செய்துள்ளது. இயேசு சபை அருள்பணி ஸ்டான் அவர்களது இறப்பிற்கு நீதி கேட்டும், UAPA சட்டத்தை நீக்கக்கோரியும், தேசியப் புலனாய்வு முகமையைக் கலைக்கக்கோரியும், அச்சட்டத்தினால் கைது செய்யப்பட்டு, சிறையில் வாடும் 14 மனித உரிமைக் காப்பாளர்களைக் காப்பாற்றக்கோரியும், இந்நிகழ்வில் வலியுறுத்தப்படவுள்ளது. இஞ்ஞாயிறன்று ஒவ்வொருவரும், தங்களது முகநூல் (Facebook), படவரி (Instagram), கீச்சகம் (Twitter), புலனம் (WhatsApp) ஆகியவற்றில், இந்நிகழ்வுக்கென்று, இளைஞர்கள் உருவாக்கியுள்ள காட்சிப்படத்தைப் பதிவுசெய்து, அருள்பணி ஸ்டான் அவர்களுக்கு, அஞ்சலி செலுத்த, தமிழ்நாடு கத்தோலிக்க இளைஞர் இயக்கத்தின் நிர்வாகக்குழு கேட்டுக்கொண்டுள்ளது. இந்த நிகழ்வு பற்றி தகவல்களை வெளியிட்டுள்ள, தமிழக கத்தோலிக்க இளைஞர் இயக்கம், தமிழக இளம் கத்தோலிக்க மாணாக்கர், மற்றும், இளம் மாணாக்கர் இயக்கத்தின் இயக்குனர் அருள்பணி மார்ட்டின் யோசு அவர்கள், இஞ்ஞாயிறு திருப்பலி முடிந்தவுடன், ஆலய வளாகத்திற்கு வெளியே, ‘முழக்கம் செய்வோம்’ என்ற அஞ்சலி நிகழ்வை, பதாகைகளுடன் முன்னெடுக்குமாறு அழைப்புவிடுத்துள்ளார். கைகளில் மெழுகுதிரிகளை ஏந்தி அமைதிப் பேரணியை மேற்கொள்ளலாம், ஆலய வளாகத்திற்கு வெளியே நின்று முழக்கமிடலாம் என்று கூறியுள்ள அருள்பணி மார்ட்டின் யோசு அவர்கள், மனித உரிமைக்காப்பாளர்கள் உரைப்பது போன்று, ஸ்டான் சுவாமியின் இறப்பு, ஒரு நிறுவனப் படுகொலை, பாசிச ஒன்றிய அரசின் படுகொலை என்று குறிப்பிட்டுள்ளார். (Ind.Sec./Tamil) [2021-07-10 23:36:39]


அருள்பணி ஸ்டான், வறியோர் நடுவே வாழ்ந்த இன்றைய புனிதர்

அருள்பணி ஸ்டான் சுவாமி அவர்கள், அநீதிகள் பெருகியிருக்கும் தெருக்களிலும், மலை முகடுகளிலும், தன் பலிபீடத்தை நிறுவி, அருள்பணித்துவத்திற்கு ஒரு புதிய இலக்கணத்தை வகுத்தார் என்று ஆசிய ஆயர் பேரவைகள் கூட்டமைப்பின் தலைவர், கர்தினால் சார்ல்ஸ் மாங் போ அவர்கள் கூறியுள்ளார். ஜூலை 5ம் தேதி இறையடி சேர்ந்த இயேசு சபை அருள்பணியாளர் ஸ்டான் சுவாமி அவர்களின் அடக்கத் திருப்பலி, மும்பையில் நடைபெற்ற நாளான ஜூலை 6ம் தேதி, கர்தினால் போ அவர்கள் வெளியிட்ட அறிக்கையில், அருள்பணி ஸ்டான் அவர்கள், பழங்குடியினரிடையே, மனிதமாண்பு, மற்றும், நீதி, ஆகிய நற்செய்தியை பகிர்ந்துகொண்டார் என்று கூறினார். பன்னாட்டு வர்த்தகப் பேராசையினால் ஒவ்வொரு நாளும் சிலுவையில் அறையப்பட்ட அப்பாவி பழங்குடியினரிடையே உழைத்துவந்த அருள்பணி ஸ்டான் அவர்கள், இறுதியில் தானே சிலுவையில் அறையப்பட்டு, கிறிஸ்துவின் உண்மையான சீடராக உயிர்துறந்தார் என்று, கர்தினால் போ அவர்கள், தன் அறிக்கையில் கூறியுள்ளார். கலகம் விளைவிக்கிறார் என்று பிரித்தானிய அரசால் தவறாக குற்றம் சுமத்தப்பட்ட காந்தியடிகளுடன், அருள்பணி ஸ்டான் சுவாமி அவர்களை ஒப்புமைப்படுத்தி பேசியுள்ள கர்தினால் போ அவர்கள், காந்தியடிகளின் வன்முறையற்ற அகிம்சை வழியைப் பின்பற்றிய அருள்பணி ஸ்டான் சுவாமி அவர்கள், இந்தியாவின் வறியோர் நடுவே வாழ்ந்த இன்றைய புனிதர் என்பதை சுட்டிக்காட்டியுள்ளார். ஆசியாவின் நுரையீரல்களாக உள்ள பகுதிகளைக் காப்பதற்கு, பழங்குடியின மக்கள் உழைத்துவருகின்றனர் என்பதை, தன் அறிக்கையில் குறிப்பிட்டுள்ள கர்தினால் போ அவர்கள், அரசின் துணையோடு, பன்னாட்டு நிறுவனங்கள், இந்த நுரையீரல்களை மூச்சடைக்கச் செய்வதற்கு மேற்கொள்ளும் முயற்சிகளை தடுக்கும் முக்கிய பணியில் அருள்பணி ஸ்டான் அவர்கள் ஈடுபட்டிருந்தார் என்று கூறினார். இந்தியாவிலும், உலகின் பல பகுதிகளிலும், தடையின்றி பரவிவரும் அநீதிகளை வெளிச்சத்திற்குக் கொணர்ந்துள்ள அருள்பணி ஸ்டான் சுவாமி அவர்கள் முன்னெடுத்த நீதிப்பணி, ஒருபோதும் தீமைக்கு அடிபணியாது என்று, கர்தினால் போ அவர்கள், தன் அறிக்கையில் வலியுறுத்திக் கூறியுள்ளார். இந்தியாவின் பழங்குடியினரோடு இணைந்து, அருளபணி ஸ்டான் அவர்களின் மறைவுக்கு வருந்தும் இவ்வேளையில், அவர் நிறுவவிழைந்த நீதியான சமுதாயத்திற்காக உழைக்க நாம் அனைவரும் நம்மையே அர்ப்பணிப்போம் என்ற விண்ணப்பத்துடன், மியான்மார் நாட்டின் கர்தினால் போ அவர்கள் தன் அறிக்கையை நிறைவு செய்துள்ளார். [2021-07-07 23:19:48]


அருள்பணி ஸ்டான் சுவாமியின் உடல் தகனம்

மும்பையின் திருக்குடும்ப மருத்துவ மனையில், ஜூலை 5, இத்திங்களன்று இறையடி சேர்ந்த அருள்பணி ஸ்டான் சுவாமி அவர்களின் உடல், ஜூலை 6, இச்செவ்வாயன்று, மாலை 6.30 மணியளவில் மின்சாரத் தகனம் செய்யும் கருவியின் உதவியுடன் தகனம் செய்யப்பட்டது என்று, இயேசு சபை அருள்பணியாளர் ஜோசப் சேவியர் அவர்கள், ஜூலை 7 இப்புதனன்று செய்தியாளர்களிடம் கூறினார். இச்செவ்வாய் மாலை 4 மணிக்கு, மும்பையின் பாண்ட்ரா புனித பேதுரு ஆலயத்தில், அருள்பணி ஸ்டான் சுவாமி அவர்களின் அடக்கத்திருப்பலி நிறைவேற்றப்பட்டபின், நீதி மன்றம் விடுத்திருந்த ஆணையை மதித்து, அவரது உடல் தகனம் செய்யப்பட்டது என்று அருள்பணி சேவியர் அவர்கள் கூறினார். அருள்பணி ஸ்டான் அவர்கள் மும்பை டலோஜா சிறையில் அடைக்கப்பட்டதையடுத்து, அவரது வழக்கு தொடர்பான விடயங்களை ஒருங்கிணைத்து வந்த பெங்களூரு இந்திய சமுதாய நிறுவனத்தின் இயக்குனர் அருள்பணி சேவியர் அவர்கள், இயேசு சபையின் மும்பை மாநிலத் தலைவர் அருள்பணி அருண் டி சூசா, அவர்களுடன் இணைந்து அருள்பணி ஸ்டான் அவர்களின் அடக்கத் திருப்பலியை நிறைவேற்றினார். பழங்குடியினரின் உரிமைகளுக்காக தொடர்ந்து போராடிவந்த அருள்பணி ஸ்டான் சுவாமி அவர்களின் சாம்பல், அவர் தன் இறுதி ஆண்டுகளில் பணியாற்றிவந்த இராஞ்சிக்கு எடுத்துச்செல்லப்பட்டு, அங்கு புதைக்கப்படும் என்று அருள்பணி சேவியர் அவர்கள் கூறினார். கடந்த இரண்டு ஆண்டுகளாக, இந்திய தேசிய புலனாய்வு துறையினரால் கேள்விகளுக்கு உள்ளாக்கப்பட்ட அருள்பணி ஸ்டான் சுவாமி அவர்கள், தான் எந்நேரமும் கைது செய்யப்படலாம் என்பதை உணர்ந்திருந்தார். "எனக்கு நிகழ்வது ஒன்றும் தனிப்பட்ட நிகழ்வு அல்ல. இந்நாட்டில் பல அறிஞர்கள், வழக்கறிஞர்கள், எழுத்தாளர்கள், கவிஞர்கள், மனித உரிமை போராளிகள், மாணவத்தலைவர்கள் ஆகியோர் சிறைப்படுத்தப்பட்டிருப்பதை நாம் அறிவோம். அவர்கள் அனைவரும், அரசு செய்துவரும் அநீதிகளுக்கு எதிராக குரல் எழுப்பி வந்ததால், சிறையில் அடைக்கப்பட்டுள்ளனர். இதே நிலை எனக்கும் ஏற்படலாம். என் பணிக்கென இந்த விலையைக் கொடுக்க நான் தயார்" என்று அருள்பணி ஸ்டான் சுவாமி அவர்கள், கடந்த ஆண்டு, அக்டோபர் மாதம் சிறைக்குச் செல்வதற்கு முன் கூறியது நினைவில கொள்ளத்தக்கது. (UCAN) [2021-07-07 23:15:17]


குடியரசுத் தலைவருக்கு இந்திய அரசியல் தலைவர்களின் மடல்

அருள்பணி ஸ்டான் சுவாமி அவர்களின் மரணம் எங்களுக்குள் உருவாக்கியுள்ள பெரும் துரயத்தையும், இவ்வாறு நடந்தது குறித்து ஏற்பட்ட கோபத்தையும், உங்களுக்குத் தெரிவிக்கிறோம் என்று, இந்திய அரசியல் தலைவர்கள் சிலர், இந்தியக் குடியரசுத் தலைவர் இராம் நாத் கோவிந்த் அவர்களுக்கு, ஜூலை 6 இச்செவ்வாயன்று மடல் ஒன்றை அனுப்பியுள்ளனர். இந்திய தேசிய காங்கிரஸ் கட்சியின் தலைவர் சோனியா காந்தி, தேசிய காங்கிரஸ் கட்சியைச் சேர்ந்த ஷரத் பவார், மேற்கு வங்க முதல்வர் மம்தா பானர்ஜீ, தமிழக முதல்வர் ஸ்டாலின், ஆகியோர் உட்பட, 10 அரசியல் தலைவர்கள் கையெழுத்திட்டு அனுப்பியுள்ள இம்மடலில், அருள்பணி ஸ்டான் சுவாமி அவர்களுக்கு நிகழ்ந்த அநீதிகளைக் குறிப்பிட்டுள்ளனர். பீமா கொரேகான் வன்முறையில் தொடர்புகொண்டார் என்ற குற்றச்சாட்டின் அடிப்படையில், இந்திய மக்கள் மீது மத்திய அரசால் திணிக்கப்பட்டுள்ள UAPA என்ற அநீதியானத் தடைச்சட்டத்தின் கீழ், கைது செய்யப்பட்ட அருள்பணி ஸ்டான் சுவாமி அவர்கள்மீது சுமத்தப்பட்ட குற்றம் எதுவும், கடந்த 9 மாதங்களாக நிரூபிக்கப்படவில்லை என்பதை, தலைவர்கள் இம்மடலில் சுட்டிக்காட்டியுள்ளனர். முதிர்ந்த வயது, நரம்புத்தளர்ச்சி நோய் என்ற எவ்வித கருணையும் காட்டாததால், அவர் விண்ணப்பித்திருந்த உறுஞ்சு குழல் பொருத்திய கிண்ணம், குளிருக்குப் பாதுகாப்பான உடைகள் என்று எதையும் சிறை அதிகாரிகள் அவருக்கு உடனடியாகக் வழங்கவில்லை என்பதை, இத்தலைவர்கள் வருத்தத்துடன் கூறியுள்ளனர். அருள்பணி ஸ்டான் சுவாமி அடைக்கப்பட்டிருந்த டலோஜா சிறையில் கோவிட் பெருந்தொற்று பரவியிருந்ததையும் நீதிமன்றம் தன் கவனத்தில் கொள்ளவில்லை என்பதால், அருள்பணி ஸ்டான் அவர்கள் இந்த பெருந்தொற்றால் பாதிக்கபப்ட்டு, உடல் நலம் மிகவும் குன்றிய நிலையில், மருத்துவ மனையில் அனுமதிக்கப்பட்டார் என்பதும் இம்மடலில் கூறப்பட்டுள்ளது. சட்டத்திற்குப் புறம்பான இந்த தவறுகளைச் சுட்டிக்காட்டியுள்ள தலைவர்கள், அருள்பணி ஸ்டான் அவர்கள் மீது தவறான குற்றங்களைச் சுமத்தியவர்கள், அவரது தொடர் சிறை தண்டனையை அனுமதித்தவர்கள் அனைவர் மீதும், தற்போதைய 'உங்கள் அரசு' நடவடிக்கை எடுக்கவேண்டும் என்று தலைவர்கள், குடியரசுத் தலைவரிடம் விண்ணப்பித்துள்ளனர். மேலும், பழிவாங்கும் ஒரே நோக்கத்துடன் புனையப்பட்டுள்ள பீமா கொரேகான் வழக்கு, அரசியல் நோக்கத்துடன் தொடுக்கப்பட்ட வழக்கு என்பதை குடியரசுத் தலைவர் உணர்ந்து, இந்த வழக்குடன் தொடர்புபடுத்தப்பட்டு சிறையில் வாடும் ஏனையோரை உடனடியாக விடுதலை செய்யவேண்டும் என்று, பத்து தலைவர்களும் இணைந்து விண்ணப்பித்துள்ளனர். [2021-07-07 23:10:59]


தந்தை ஸ்டான் சுவாமி – தமிழக கத்தோலிக்க ஆயர் பேரவை

'தந்தை ஸ்டான் சுவாமி அவர்களின் பணி வாழ்வை தொடர்ந்து முன்னெடுப்போம்' என்ற தலைப்பில், தமிழக கத்தோலிக்க ஆயர் பேரவையின் தலைவர், பேராயர் அந்தோனி பாப்புசாமி அவர்கள், ஜூலை 6, இச்செவ்வாயன்று அறிக்கையொன்றை வெளியிட்டுள்ளார். கடந்த 50 ஆண்டுகளாக ஒரு அருள்பணியாளராகவும், குறிப்பாக, பழங்குடியினரரின் வாழ்வாதார உரிமைகளை மீட்டுக்கொடுக்கும் பணியிலும் தன்னையே அர்பணித்துக்கொண்ட தந்தை ஸ்டான் சுவாமி அவர்கள் வேதசாட்சியாய் விதைக்கப்பட்டுள்ளார் என்றும், அவருக்கு தமிழக ஆயர் பேரவை தன் வீர வணக்கத்தை தெரிவித்துக்கொள்கிறது என்றும் பேராயர் பாப்புசாமி அவர்களின் அறிக்கை ஆரம்பமாகிறது. ஒடுக்கப்பட்ட மக்களுக்காகவும், பழங்குடியினர் விடுதலைக்காகவும் வாழ்ந்து மடிந்த அருள்பணி ஸ்டான் அவர்களின் அர்ப்பண வாழ்வையும், அவர் பின்பற்றிய மதிப்பீடுகளையும், பேராயர் பாப்புசாமி அவர்கள் இவ்வறிக்கையின் துவக்கத்தில் சுட்டிக்காட்டியுள்ளார். இதைத் தொடர்ந்து, அருள்பணி ஸ்டான் சுவாமி அவர்கள் மீது பொய்யான அவதூறுகளை சுமத்தி, அவரைச் சிறைப்படுத்திய அரசின் போக்கை, பேராயரின் அறிக்கை, வன்மையாக கண்டனம் செய்துள்ளது. கிறித்தவத் துறவியொருவர் தன் பணிவாழ்வில் காட்டிய நேர்மையை, நீதியின்பால் காட்டிய உறுதியை, மானுட மாண்பைக் காக்கின்றவகையில் அரை நூற்றாண்டு உழைத்த ஒரு துறவியை, சமுதாயத்தில் கலகம் விளைவிப்பவராகச் சித்தரித்து, நாளும் துரத்திவந்த அரசின் போக்கை வன்மையாகக் கண்டிக்கிறோம் என்று, பேராயர் பாப்புசாமி அவர்கள், இவ்வறிக்கையில் கூறியுள்ளார். ஒடுக்கப்பட்ட மக்களுக்காய் வாழ்ந்த ஒரு துறவியை மாபெரும் குற்றவாளியைப்போல் சிறைபிடித்து, உடல்நலம் குன்றிய நிலையிலும் அவர்தம் முதுமைக்குக்கூட கருணை காட்டாது, கடுமையாக நடந்துகொண்ட அரசு அதிகாரிகளையும், அவர்களுக்கு ஆதரவாக நின்ற அரசு நிறுவனங்களையும் வன்மையாகக் கண்டிக்கிறோம் என்று, தமிழக ஆயர் பேரவையின் தலைவர் தெளிவாகக் கூறியுள்ளார். மானுடத்தைப் போற்றும் வகையில் தளராது செயல்பட்ட இம்மனிதருக்கு இழைக்கப்பட்ட கொடுமைகளுக்கும், இக்கொடுமைகளால் இவர் சந்தித்த மரணத்திற்கும், அரசு பொறுப்பேற்க வேண்டும் என்பதை, பேராயரின் அறிக்கை வலியுறுத்துகிறது. குடியரசின் விழுமியங்களோடு நடத்தப்படும் ஆட்சியை மதிக்கத்தெரிந்தவர்கள் நாங்கள் என்றும், அதேவேளையில், மனிதத்தைக் கடந்த சட்டங்களை ஏற்கமாட்டோம் என்றும் பேராயர் பாப்புசாமி அவர்களின் அறிக்கை சுட்டிக்காட்டுகிறது. இனி வரும் காலங்களில், சனநாயக அரசும், அரசின் நிறுவனங்களும் அரசு நீதியைக் காக்கும் வகையில் செயல்பட வேண்டும் என்றும், இறையடி சேர்ந்த அருள்பணி ஸ்டான் சுவாமி அவர்களின் ஆன்மா நித்திய இளைப்பாறுதல் அடையவேண்டும் என்றும் இவ்வறிக்கையின் இறுதியில் விண்ணப்பங்கள் எழுந்துள்ளன. சனநாயக நாட்டில் மனித உரிமைகளைக் காக்க வாழ்ந்த ஒருவருக்கு சனநாயக அரசு இப்படித்தான் நடந்துகொள்ளுமானால், ஸ்டான் சுவாமியைப் பின்பற்றி, இனி எத்தனையோ சுவாமிகள் தோன்றி, மக்கள் விடுதலைப் பயணத்தில் பங்கேற்பது உறுதி, என்ற உறுதி மொழியுடன், தமிழக ஆயர் பேரவையின் சார்பாக, பேராயர் அந்தோனி பாப்புசாமி அவர்கள் வெளியிட்ட அறிக்கை நிறைவடைகிறது. [2021-07-07 23:02:50]