வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



இந்தியத் திருஅவையின் சவால்களுக்குத் தீர்வுகள் தேவை

இந்தியாவில், கிறிஸ்தவர்களுக்கு எதிரான வன்முறைகள் அதிகரித்துவரும் சூழலில், தலத்திருஅவையின் கண்ணோட்டத்தில் மாற்றம் தேவை கிறிஸ்டோபர் பிரான்சிஸ்: வத்திக்கான் வானொலி இந்தியாவிலுள்ள திருஅவை, தனது வசதியான வாழ்விலிருந்து வெளியேறவும், தனது தொடக்ககால மறைப்பணி மீது, மீண்டும் கவனம் செலுத்தவும் விரும்பினால், அதன் அணுகுமுறையில் அடிப்படை மாற்றம் அவசியம் என்று, இந்திய கத்தோலிக்க அருள்பணியாளர் அவை (CPCI) கூறியுள்ளது. இந்தியாவில், கிறிஸ்தவர்களுக்கு எதிரான வன்முறைகள் அதிகரித்துவரும் சூழலில், தலத்திருஅவையின் கண்ணோட்டத்தில் மாற்றம் தேவை என்று, இதில் கலந்துகொண்ட அருள்பணியாளர்கள் கூறினர். மத்திய பிரதேச மாநிலத்தின் இன்டோரில், செப்டம்பர் 17ம் தேதி முதல்,19ம் தேதி வரை மாநாடு நடத்திய, CPCI எனப்படும், இந்திய கத்தோலிக்க அருள்பணியாளர் அவையில், 18 மறைமாவட்டங்களிலிருந்து 40 அருள்பணியாளர்கள் பங்குபெற்றனர். இம்மாநாட்டின் இறுதியில் வெளியிடப்பட்ட அறிக்கையில், தொழில்நுட்ப தகவல், நுகர்வு கலாச்சாரம் மற்றும், தன்னல உலகில், ஒன்றிணைந்து வாழவும், பிறரோடு தொடர்பு கொண்டு வாழவும், ஒருவர் ஒருவருக்கு ஆதரவாக வாழவும், அருள்பணியாளர்கள் சவால் விடுக்கப்படுகின்றனர் என்று கூறப்பட்டுள்ளது. இந்த மாநாட்டில், கிறிஸ்தவர்களுக்கு எதிரான வன்முறைகளை அதிகம் எதிர்கொள்ளும், உத்தர பிரதேசம், தமிழ் நாடு, சட்டீஸ்கர், ஜார்க்கண்ட், மத்திய பிரதேசம் ஆகிய மாநிலங்களிலிருந்து அதிக அளவில் அருள்பணியாளர்கள் கலந்துகொண்டனர். இவ்வாண்டின் முதல் எட்டு மாதங்களில், கிறிஸ்தவர்களுக்கு எதிராக இடம்பெற்றுள்ள 218 வன்முறைகளில் பாதிக்கும்மேல், நான்கு மாநிலங்களில், அதாவது உத்தர பிரதேசத்தில் 51, தமிழ் நாட்டில் 41, சட்டீஸ்கரில் 24, ஜார்க்கண்ட்டில் 17 என இடம்பெற்றுள்ளன. 2014ம் ஆண்டில் பாரதீய ஜனதா கட்சி (பிஜேபி) ஆட்சிக்கு வந்ததிலிருந்து, இந்தியாவை இந்து நாடாக அறிவிக்க முயற்சிக்கும் கருத்தியலின் அடிப்படையிலே இந்த வன்முறைகள் இடம்பெறுகின்றன என்று கிறிஸ்தவ தலைவர்கள் கூறுகின்றனர். இந்தியாவில், 174 மறைமாவட்டங்களில், ஏறத்தாழ பத்தாயிரம் மறைமாவட்ட அருள்பணியாளர்கள் இறைப்பணியாற்றுகின்றனர். (UCAN) [2019-09-25 02:09:14]


17 கிறிஸ்தவ ஆலயங்கள், ஓர் இந்து கோவிலுக்கு அதிகாரப்பூர்வ அனுமதி

ஐக்கிய அரபு அமீரகத்தில், 1965ம் ஆண்டு அர்ச்சிக்கப்பட்ட புனித யோசேப் கத்தோலிக்க பேராலயம், அந்நாட்டிலுள்ள பழங்கால ஆலயங்களில் ஒன்றாகும் கிறிஸ்டோபர் பிரான்சிஸ்: வத்திக்கான் வானொலி ஐக்கிய அரபு அமீரகத்தில், சகிப்புத்தன்மை மற்றும், இஸ்லாம் அல்லாத பிற மதங்களுக்குத் திறந்தமனம் ஆகியவற்றின் முக்கிய அடையாளமாக, பல ஆண்டுகளுக்குமுன் கட்டப்பட்ட கிறிஸ்தவ ஆலயங்கள் உட்பட, 17 கிறிஸ்தவ வழிபாட்டுத்தலங்கள் மற்றும், ஓர் இந்து கோவிலுக்கு, அந்நாட்டு அரசு அதிகாரப்பூர்வ அங்கீகாரம் வழங்கியுள்ளது. அமீரகத்தில் ஏனைய மதங்களின் வழிபாட்டுத் தலங்களுக்கு அதிகாரப்பூர்வ அனுமதியளித்த நிகழ்வு, கடந்த சனிக்கிழமையன்று அபு தாபியில் நடைபெற்றது. அபு தாபியில், அனைத்து மத நிறுவனங்களையும் ஒரே துறையின்கீழ் கொண்டுவருவதன் வழியாக, அவற்றுக்கு ஆதரவளிப்பதற்கு அதிகாரிகளுக்கு எளிதாக இருக்கும் என்ற நோக்கத்தில், அபு தாபியின் சமுதாய வளர்ச்சித்துறை, நல்லிணக்கத்திற்கு ஓர் அழைப்பு என்ற கொள்கையில், இந்த அனுமதியை வழங்கியுள்ளது. அமீரகத்தை அனைவருக்கும் உரிய இடமாக அமைக்கும் நோக்கத்தில், அந்நாட்டின் பெருந்தலைவர்கள், பல ஆண்டுகளாக, பல்வேறு மதங்களின் மக்களை நாட்டிற்குள் அனுமதித்தனர், தற்போது அபு தாபி, சகிப்புத்தன்மை மற்றும், நல்லிணக்கத்திற்கு எடுத்துக்காட்டாகத் திகழ்வதில் முன்னோடியாக உள்ளது என்று, அத்துறையின் தலைவர் முகீர் அல் கைலி அவர்கள் தெரிவித்தார். 2019ம் ஆண்டு பிப்ரவரியில் திருத்தந்தை பிரான்சிஸ் அவர்கள், அபு தாபிக்குத் திருத்தூதுப் பயணம் மேற்கொண்டார். அச்சமயத்தில் அவர், மனித உடன்பிறந்தநிலை என்ற வரலாற்றுச் சிறப்புமிக்க ஆவணத்தில், அல் அசார் பல்கலைக்கழக பெரிய குருவுடன் சேர்ந்து கையெழுத்திட்டார் என்பது குறிப்பிடத்தக்கது. (AsiaNews) [2019-09-25 02:05:55]


நேர்காணல் – இந்திய ஆயர்களின் அத் லிமினா சந்திப்பு

தமிழகம், ஆந்திரா, கர்நாடகம், கேரளா, தெலுங்கானா ஆகிய ஐந்து மாநிலங்கள் மற்றும், புதுச்சேரி யூனியன் பகுதியில் இறையாட்சிப் பணியாற்றும், இலத்தீன் வழிபாட்டுமுறையின் 54 ஆயர்கள், திருத்தந்தையை சந்தித்தனர் மேரி தெரேசா - வத்திக்கான் ஆயர்கள் ஐந்து ஆண்டுக்கு ஒருமுறை திருத்தந்தையை சந்தித்து, தங்கள் மறைமாவட்டங்களின் நிலவரம் பற்றி அறிவிக்கும் அத் லிமினா நிகழ்வையொட்டி, செப்டம்பர் 13, 17, 26 ஆகிய தேதிகளில் இந்திய இலத்தீன் வழிபாட்டுமுறை ஆயர்கள் மூன்று குழுக்களாக, திருத்தந்தை பிரான்சிஸ் அவர்களை, திருப்பீடத்தில் சந்தித்து கலந்துரையாடி வருகின்றனர். முதல் இரு குழுக்கள் ஏற்கனவே இச்சந்திப்பை நிறைவு செய்துள்ளனர். செப்டம்பர் 17, இச்செவ்வாயன்று இந்தியாவின் 54 ஆயர்கள், திருத்தந்தையைச் சந்தித்து, ஒன்றரை மணி நேரத்திற்குமேல் கலந்துரையாடினர். இவர்கள், தமிழகம், ஆந்திரா, கர்நாடகம், கேரளா, தெலுங்கானா ஆகிய ஐந்து மாநிலங்கள் மற்றும், புதுச்சேரி யூனியன் பகுதியில், இறையாட்சிப் பணியாற்றுகின்றவர்கள். இந்த இரண்டாவது குழுவில் இடம்பெற்றிருந்த தமிழகத்தின் 17 ஆயர்களில் ஒருவரான, தர்மபுரி மறைமாவட்ட ஆயர் மேதகு இலாரன்ஸ் பயஸ் துரை ராஜ் அவர்களை வத்திக்கான் வானொலியில் சந்தித்து, அத் லிமினா சந்திப்பு பற்றிக் கேட்டோம் நேர்காணல் – இந்திய ஆயர்களின் அத் லிமினா சந்திப்பு – ஆயர் இலாரன்ஸ் பயஸ் [2019-09-21 00:30:30]


இந்தியாவின் 38 ஆயர்கள் திருத்தந்தையை சந்தித்தனர்

இந்தியாவின் 38 ஆயர்கள் திருத்தந்தையை சந்தித்தனர் இந்தியாவின் இலத்தீன் வழிபாட்டுமுறை ஆயர்கள், மூன்று குழுக்களாக, திருத்தந்தையைச் சந்திக்கின்றனர். முதல் குழுவினரின் சந்திப்பு, இவ்வெள்ளியன்று இடம்பெற்றது மேரி தெரேசா– வத்திக்கான் அத் லிமினா நிகழ்வையொட்டி, செப்டம்பர் 13, இவ்வெள்ளி காலை 11 மணியளிவில், இந்தியாவின் 38 ஆயர்கள், திருத்தந்தை பிரான்சிஸ் அவர்களை திருப்பீடத்தில் சந்தித்து கலந்துரையாடினர். ஆந்திரா, ஆக்ரா, போபால், கட்டக்-புவனேஸ்வர், பாட்னா, ரெய்ப்பூர், இராஞ்சி ஆகிய ஆறு, இலத்தீன் வழிபாட்டுமுறை திருஅவை ஆட்சிப்பீடங்களைச் சேர்ந்த 38 ஆயர்கள் திருத்தந்தையைத் திருப்பீடத்தில் சந்தித்தனர். இந்த ஆயர்கள், பீஹார், சட்டீஸ்கர், ஜார்க்கண்ட், ஒடிசா, மத்திய பிரதேசம், இராஜஸ்தான், உத்தர பிரதேசம், உத்தராகண்ட் ஆகிய மாநிலங்கள் மற்றும், அந்தமான் நிகோபார் யூனியன் பகுதியில் இறையாட்சிப் பணியாற்றுகின்றவர்கள். இந்தியாவின் இலத்தீன் வழிபாட்டுமுறை ஆயர்கள், மூன்று குழுக்களாக, திருத்தந்தையைச் சந்திக்கின்றனர். முதல் குழுவினரின் சந்திப்பு இவ்வெள்ளியன்று இடம்பெற்றது. மேலும், இரு குழுவினர், செப்டம்பர் 17, 26, ஆகிய தேதிகளிலும், அக்டோபர் 3ம் தேதி சீரோ மலபார் வழிபாட்டுமுறை ஆயர்களும் திருத்தந்தையைத் திருப்பீடத்தில் சந்திப்பார்கள் என அறிவிக்கப்பட்டுள்ளது. திருத்தந்தையின் டுவிட்டர் மேலும், இயேசுவின் நட்புறவில் வளர விரும்பும் சீடர்கள் எத்தகைய மனநிலையைக் கொண்டிருக்க வேண்டும் என்பது பற்றி, திருத்தந்தை பிரான்சிஸ் அவர்கள், செப்டம்பர் 13, இவ்வெள்ளியன்று, தன் டுவிட்டர் செய்தியில் வெளியிட்டிருந்தார். “இயேசுவின் சீடர்கள் அவரின் நட்புறவில் வளர விரும்பினால், அவர்கள் புகார் சொல்லாமல், தங்களின் அகவாழ்வை நோக்க வேண்டும். ஆண்டவர், தங்களுக்கு ஆதரவாக இருப்பார் மற்றும், உடன்வருவார் என்ற உறுதியில், அவர்கள் செயல்பட வேண்டும் மற்றும், தங்களையே அர்ப்பணிக்க வேண்டும்” என்ற சொற்கள், திருத்தந்தை பிரான்சிஸ் அவர்களின் டுவிட்டர் செய்தியில் இவ்வெள்ளியன்று இடம்பெற்றிருந்தன. [2019-09-14 02:40:44]


இந்திய ஆயர்களின் அத் லிமினா சந்திப்பு செப்.13-அக்.3,2019

இந்தியாவில் 190 இலத்தீன் வழிபாட்டுமுறை ஆயர்கள் உள்ளனர். தமிழக ஆயர்கள் செப்டம்பர் 17, வருகிற செவ்வாயன்று திருத்தந்தை பிரான்சிஸ் அவர்களைச் சந்திக்கின்றனர் மேரி தெரேசா – வத்திக்கான் உலகெங்குமுள்ள ஆயர்கள், திருப்பீடத்தில் ஐந்து ஆண்டுகளுக்கு ஒருமுறை, திருத்தந்தையைச் சந்திக்கும், இந்திய ஆயர்களின் அத் லிமினா நிகழ்வு, செப்டம்பர் 13, வருகிற வெள்ளிக்கிழமையன்று துவங்குகிறது. இந்திய இலத்தீன் வழிபாட்டுமுறை ஆயர்கள், செப்டம்பர் 13, 17, 26 ஆகிய தேதிகளில் மூன்று குழுக்களாக, திருத்தந்தை பிரான்சிஸ் அவர்களைச் சந்திக்கின்றனர். வருகிற அக்டோபர் 3ம் தேதி, சீரோ மலபார் வழிபாட்டுமுறை ஆயர்கள், திருத்தந்தையைச் சந்திக்கின்றனர். இதில் இரண்டாவது குழுவிலுள்ள, தமிழக ஆயர்கள் செப்டம்பர் 17, வருகிற செவ்வாயன்று திருத்தந்தை பிரான்சிஸ் அவர்களைச் சந்திக்கின்றனர். கி.பி. 52ம் ஆண்டில், இயேசு கிறிஸ்துவின் திருத்தூதர் புனித தோமையார், இந்தியாவின் கேரளாவில் முதலில் நற்செய்தி அறிவித்து, சென்னை மயிலாப்பூரில் மறைசாட்சியாகக் கொல்லப்பட்டார். இவர் இந்தியாவில் விதைத்த நற்செய்தி விதை, 16ம் நூற்றாண்டில், கோவாவில் போர்த்துக்கீசியர்கள் வந்திறங்கியதிலிருந்து வளரத் தொடங்கியது. 2016ம் ஆண்டின் புள்ளி விவரங்களின்படி, ஏறத்தாழ 130 கோடி மக்கள் தொகையைக் கொண்ட இந்தியாவில், ஏறத்தாழ 2 கோடியே 17 இலட்சத்து 30 ஆயிரம் பேர் கத்தோலிக்கர். அதாவது நாட்டின் மொத்த மக்கள் தொகையில், கத்தோலிக்கர் ஏறத்தாழ 1.6 விழுக்காடாகும். 80 விழுக்காட்டினர் இந்துக்கள். 14 விழுக்காட்டினர் முஸ்லிம்கள். இந்தியாவில், இலத்தீன் வழிபாட்டுமுறை, சீரோ மலபார் வழிபாட்டுமுறை, சீரோ மலங்கரா வழிபாட்டுமுறை என மூன்று கத்தோலிக்க வழிபாட்டுமுறைகள் உள்ளன. கேரளா, தமிழ்நாடு, மகாராஷ்டிரா, ஆந்திரா, கர்நாடாகம் என, கத்தோலிக்கர் அதிகம் உள்ள மாநிலங்கள் வரிசைப்படுத்தப்பட்டுள்ளன. [2019-09-12 00:15:20]


நல்லிணக்கத்தை ஊக்குவிக்க புனித அன்னை தெரேசா திருவுருவம்

புனித அன்னை தெரேசா, ஓர் அன்னையைப் போல, நம் இதயங்களில் வாழ்கிறார் - மேற்கு வங்காள ஒரு மசூதியின் இமாம் Sahidulla Khan மேரி தெரேசா- வத்திக்கான் செய்திகள் மதங்களுக்கு இடையே நல்லிணக்கத்தையும், இந்தியாவின் சமயச்சார்பற்ற விழுமியங்களையும் ஊக்குவிக்கும் நோக்கத்தில், மேற்கு வங்காள மாநிலத்தில், ஒரு புகழ்பெற்ற சந்தையின் நடுவில், புனித அன்னை தெரேசாவின் திருவுருவம் வைக்கப்பட்டுள்ளது. கொல்கத்தா நகருக்கு 15 கிலோ மீட்டர் தூரத்திலுள்ள, Nepalgunge Hatt சந்தை அமைந்துள்ள இடத்தில், புனித அன்னை தெரேசாவின் 109வது பிறந்த நாளான, ஆகஸ்ட் 27, இச்செவ்வாயன்று, இந்நிகழ்வு நடைபெற்றது. பல்சமய உரையாடலை ஊக்குவிக்கும், Nepalgunge More Bebasahi எனப்படும் குழுவின் முயற்சியால், பலரும் கூடுகின்ற முக்கியமான சந்தையில், பல்வேறு மதங்களின் பிரதிநிதிகள் ஒன்றுகூடி, புனித அன்னை தெரேசாவின் திருவுருவத்தை வைத்துள்ளனர். இந்நிகழ்வில், கத்தோலிக்கர் சார்பாக கலந்துகொண்ட Baruipur மறைமாவட்ட வாரிசுரிமை ஆயர் Shyamal Bose அவர்கள் பேசுகையில், தான் பயிற்சி மாணவராக இருந்த சமயத்தில் அன்னை தெரேசா அவர்களைச் சந்தித்தேன் எனவும், ஏழைகளின் முகங்களில் அவர் கடவுளைக் கண்டார் எனவும் கூறினார். உள்ளூர் மசூதியின் இமாம் Sahidulla Khan அவர்கள் பேசுகையில், ஓர் அன்னையைப் போல, அவர் நம் இதயங்களில் வாழ்கிறார் என்றார். அந்த சந்தைக் குழுவின் செயலர், Sathya Ranjan Panja அவர்கள் பேசுகையில், விவேகானந்தர் உருவச்சிலைக்கு அருகில், புனித அன்னை தெரேசாவின் உருவச்சிலையும் இருக்க வேண்டுமென, அப்பகுதி மக்கள் விரும்பியதால், அவரின் பிறந்த நாளை, இதற்குத் தெரிவு செய்தோம் என்று தெரிவித்தார். (AsiaNews / Agencies) [2019-09-02 00:27:31]


புனிதர்களாக வாழ அன்னை மரியாவின் உதவியை இறைஞ்சுவோம்

நாம் விசுவாச வாழ்வில் ஆழப்படவும், புனிதர்களாக வாழவுமென, அனைத்திற்கும் அன்னை மரியாவின் உதவியை நாடுவோம் - திருத்தந்தை மேரி தெரேசா – வத்திக்கான் செய்திகள் “உறுதியான, மகிழ்வுநிறைந்த மற்றும், இரக்கமுள்ள விசுவாசத்தைக் கொண்டிருப்பதற்கு, அன்னை மரியாவின் பாதுகாப்பையும், ஆதரவையும் இறைஞ்சுவோம், அதன்வழியாக, நாம் புனிதர்களாக வாழவும், ஒருநாள், பேரின்ப பெருவாழ்வில் தம்மைச் சந்திக்கவும், அன்னை மரியா நமக்கு உதவிபுரிவார்” என்று, திருத்தந்தை பிரான்சிஸ் அவர்கள், இவ்வெள்ளியன்று கூறியுள்ளார். ஆகஸ்ட் 15, இவ்வியாழனன்று மரியாவின் விண்ணேற்புப் பெருவிழாவைச் சிறப்பித்து மகிழ்ந்திருக்கும் இவ்வேளையில், இவ்வுலகில், நாம் விசுவாச வாழ்வில் ஆழப்படவும், புனிதர்களாக வாழவுமென, அனைத்திற்கும் அன்னை மரியாவின் உதவியை நாடுவோம் என, ஆகஸ்ட் 16, இவ்வெள்ளியன்று, தன் டுவிட்டர் செய்தியில்,பதிவு செய்திருந்தார் திருத்தந்தை பிரான்சிஸ். மேலும், ஆகஸ்ட் 16, இவ்வெள்ளியன்று, கர்தினால் Seán Baptist Brady அவர்கள், எண்பது வயதை நிறைவுசெய்ததையடுத்து, திருஅவையில் மொத்த கர்தினால்களின் எண்ணிக்கை, 216 ஆகவும், திருத்தந்தையைத் தேர்ந்தெடுக்கும் தகுதியுடைய, எண்பது வயதுக்குட்பட்டவர்களின் எண்ணிக்கை 118 ஆகவும் மாறியுள்ளன என, திருப்பீடம் அறிவித்துள்ளது. 1939ம் ஆண்டு ஆகஸ்ட் 16ம் தேதி பிறந்த அயர்லாந்து நாட்டு கர்தினால் Seán Baptist Brady அவர்கள், 2007ம் ஆண்டில், கர்தினாலாக உயர்த்தப்பட்டார். இவர், 1996ம் ஆண்டு முதல், 2014ம் ஆண்டு வரை, அனைத்து அயர்லாந்து திருஅவையின் தலைவராகவும், அர்மாக் பேராயராகவும் பணியாற்றினார். கர்தினால்கள் விவரம் திருஅவையில், 1973ம் ஆண்டு நவம்பர் 5ம் தேதி நடைபெற்ற இரகசிய கர்தினால்கள் அவையில், புதிதாக ஒரு திருத்தந்தையைத் தேர்ந்தெடுக்கும் தகுதியுடைய கர்தினால்களின் எண்ணிக்கையை 120 ஆக வரையறுத்தார், புனித திருத்தந்தை 6ம் பவுல். இதை, புனித திருத்தந்தை 2ம் ஜான் பால் அவர்களும் உறுதிசெய்தார். ஆயினும் இவ்வெண்ணிக்கை இருமுறை மாறி, அது 135 ஆக உயர்ந்தது. பின்னர், முன்னாள் திருத்தந்தை 16ம் பெனடிக்ட் அவர்களும், மீண்டும், அவ்வெண்ணிக்கையை 120 என உறுதிசெய்திருந்தாலும், அதுவும் இருமுறை மாறி, 125 வரை உயர்ந்தது. திருத்தந்தை பிரான்சிஸ் அவர்கள், 2014ம் ஆண்டு பிப்ரவரி 22ம் தேதி கர்தினால்கள் அவையில், இந்த எண்ணிக்கையை 122 ஆகவும், 2015ம் ஆண்டில் 125 ஆகவும் உயர்த்தினார். இவர், 2016ம் ஆண்டு நவம்பர் 19ம் தேதி, கர்தினால்கள் அவையில் 17 புதிய கர்தினால்களை இணைத்தவேளை, மொத்த கர்தினால்களின் எண்ணிக்கை 228 ஆகவும், திருத்தந்தையைத் தேர்ந்தெடுக்கும் தகுதியுடைய கர்தினால்களின் எண்ணிக்கை 121 ஆகவும் இருந்தது. 2017ம் ஆண்டு ஜூன் 28ம் தேதி நடைபெற்ற கர்தினால்கள் அவையின்போது, திருத்தந்தையைத் தேர்ந்தெடுக்கும் தகுதியுடைய கர்தினால்களின் எண்ணிக்கை 121 ஆகவே இருந்தது. 2018ம் ஆண்டு ஜூன் 28ம் தேதி நடைபெற்ற கர்தினால்கள் அவையின்போது, இவ்வெண்ணிக்கை 125 ஆகவும், மொத்த கர்தினால்களின் எண்ணிக்கை 227 ஆகவும் இருந்தன. ஆகஸ்ட் 16, இவ்வெள்ளி நிலவரப்படி, திருஅவையில் மொத்த கர்தினால்களின் எண்ணிக்கை, 216 ஆகவும், திருத்தந்தையைத் தேர்ந்தெடுக்கும் தகுதியுடைய, எண்பது வயதுக்குட்பட்டவர்களின் எண்ணிக்கை 118 ஆகவும் மாறியுள்ளன. [2019-08-16 22:33:40]


கும்பல் கொலை வழக்கு தீர்ப்பு அதிர்ச்சியளிக்கிறது

கும்பல் கொலை நடைபெற்றதற்கு வலுவான காணொளி ஆதாரங்கள் இருக்கின்றபோதும், இக்கொலை தொடர்பான குற்றவாளிகள் விடுதலை செய்யப்பட்டிருப்பது கவலை தருகின்றது – ஆஜ்மீர் ஆயர் மேரி தெரேசா – வத்திக்கான் செய்திகள் இராஜஸ்தான் மாநிலத்தில், ஈராண்டுகளுக்குமுன், ‘பசு பாதுகாப்பு’ என்ற நடவடிக்கையில், நடத்தப்பட்ட கும்பல் கொலை வழக்கில், கைதான குற்றவாளிகள் விடுதலை செய்யப்பட்டிருப்பது அதிர்ச்சியளிக்கிறது என்று, அம்மாநில ஆயர் ஒருவர் தெரிவித்துள்ளார். 2017ம் ஆண்டு ஏப்ரல் முதல் தேதி, பெஹ்லு கான் (Pehlu Khan) என்ற 55 வயது நிரம்பிய முஸ்லிம், பொதுவான ஒரு சாலையில், ‘பசு பாதுகாப்பு’ கும்பலால் கொடூரமாய்த் தாக்கப்பட்டார். பின்னர் அவர் மருத்துவமனையில் உயிரிழந்தார். அதற்குப் பின்னர், தனது தந்தை, தனது கண்ணெதிரே கொடூரமாகத் தாக்கிக் கொல்லப்பட்டதற்கு, அவரது மகன், நீதி கேட்டு, இராஜஸ்தான் கீழ் நீதிமன்றத்தில் வழக்குத் தொடர்ந்திருந்தார். இந்த வழக்கில் போதிய ஆதாரமில்லை என்று சொல்லி, ஆகஸ்ட் 14, இப்புதனன்று நீதிமன்றம் விடுதலை செய்வதாக அறிவித்துள்ளது. நீதிமன்றத்தின் இத்தீர்ப்பு தனக்கு அதிர்ச்சியையும், ஏமாற்றத்தையும், வேதனையையும் அளித்திருப்பதாக, யூக்கா செய்தியிடம் கூறியுள்ள, ஆஜ்மீர் ஆயர் பயஸ் தாமஸ் டி சூசா அவர்கள், கும்பல் கொலை நடைபெற்றதற்கு வலுவான காணொளி ஆதாரங்கள் இருக்கின்றபோதும், இத்தகைய தீர்ப்பு வழங்கப்பட்டிருப்பது கவலை தருகின்றது என்று கூறியுள்ளார். இந்த வழக்கில் நீதி கிடைக்கும் என்று, தான் நம்புவதாகவும், ஆயர் டி சூசா அவர்கள், தெரிவித்துள்ளார். இதற்கிடையே, இத்தீர்ப்பு குறித்து ஊடகங்களிடம் பேசிய முதலமைச்சர் Ashok Gehlot அவர்கள், இராஜஸ்தான் அரசு, இத்தீர்ப்பு குறித்து உயர்நீதி மன்றத்தில் மேல்முறையீடு செய்யும் எனத் தெரிவித்துள்ளார். இந்த தாக்குதலின்போது, கான் அவர்களும், அவரின் இரு மகன்களும், அருகிலுள்ள ஹரியானா மாநிலத்திலிருந்து தங்களின் வீட்டிற்கு பிராணிகளை ஓட்டிச்சென்றபோது, அவர்கள், பசுக்களைக் கொல்வதற்காக கடத்திச் செல்கிறார் என, அந்தக் கும்பல் கான் மீது குற்றம் சுமத்தித் தாக்கியது. பல வட இந்திய மாநிலங்களைப் போல், இராஜஸ்தானிலும், பசுக்களைக் கொல்வது, சட்டத்தால் தடைசெய்யப்பட்டுள்ளது. (UCAN) 2015ம் ஆண்டு மே மாதம் முதல், 2018ம் ஆண்டு டிசம்பர் மாதம் வரையிலான காலகட்டத்தில், இந்தியாவின் 12 மாநிலங்களில் குறைந்தது 44 பேர், கும்பல்களால் கொலை செய்யப்பட்டனர். அவர்களில் 36 பேர் முஸ்லிம்கள் என்று, ஹியூமன் ரைட்ஸ் வாட்ச் எனப்படும் மனித உரிமைகள் அமைப்பு வெளியிட்டுள்ள அறிக்கையொன்றில் குறிப்பிடப்பட்டுள்ளது. [2019-08-16 22:24:05]


23 இந்திய மாநிலங்களில் கிறிஸ்தவர்களுக்கு எதிராக வன்முறைகள்

இந்தியாவில், 2014ம் ஆண்டிலிருந்து கிறிஸ்தவர்களுக்கு எதிரான வன்முறைகள் தொடர்ந்து அதிகரித்து வருகின்றன. 2019ம் ஆண்டில் ஒவ்வொரு மாதமும் 26 என, வன்முறைகள் நடத்தப்பட்டு வருகின்றன கிறிஸ்டோபர் பிரான்சிஸ் – வத்திக்கான் செய்திகள் 2019ம் ஆண்டின் முதல் ஆறு மாதங்களில், இந்தியாவின் 23 மாநிலங்களில், கிறிஸ்தவர்களுக்கு எதிராக, 158 வன்முறைகள் இடம்பெற்றுள்ளன, இவற்றில், 110 பெண்களும், 89 சிறாரும் காயமடைந்துள்ளனர் என்று, UCF எனப்படும், ஒன்றிணைந்த கிறிஸ்தவ கழகம் அறிவித்துள்ளது. வன்முறை நிகழ்வுகளில் பாதிக்கப்படுபவர்களுக்கு உதவுவதற்கென ஒரு சிறப்பு உதவி அமைப்பை நடத்திவரும் UCF கழகம், இவ்வாண்டின் முதல் ஆறு மாதங்களில் இடம்பெற்றுள்ள வன்முறைகளில் 130, வன்முறைக் கும்பல்களால் அச்சுறுத்தப்பட்ட, தாக்கப்பட்ட அல்லது மிரட்டப்பட்ட நிகழ்வுகளாகும் என்று குறிப்பிட்டுள்ளது. ஆலயத்தில் அல்லது செபக்கூடங்களில் அமைதியாக இறைவேண்டல் எழுப்பிக்கொண்டிருந்த கிறிஸ்தவர்கள் மீது தாக்குதல்கள் நடத்தப்பட்டுள்ளன என்றும், இந்த 158 வன்முறைகளில் 24 நிகழ்வுகளுக்கு மட்டுமே, FIR அதாவது, முதல் தகவல் பதிவு செய்யப்பட்டுள்ளது என்றும், UCF கழகம் கூறியுள்ளது. 11 மாநிலங்களில் காவல்துறை மந்தமாகச் செயல்பட்டது என்றுரைக்கும் இக்கழகம், கிறிஸ்தவர்களுக்கு எதிரான வன்முறைகள், உத்தர பிரதேச மாநிலத்தில் தொடர்ந்து அதிகமாக இடம்பெறுகின்றது என்றும், இதற்கு அடுத்த நிலையில் தமிழ்நாடு உள்ளது என்றும் கூறியுள்ளது. இந்தியாவில், 2014ம் ஆண்டிலிருந்து கிறிஸ்தவர்களுக்கு எதிரான வன்முறைகள் தொடர்ந்து அதிகரித்து வருகின்றன என்றும், 2019ம் ஆண்டில் ஒவ்வொரு மாதமும் 26 என, வன்முறைகள் நடத்தப்பட்டு வருகின்றன என்றும், UCF கழகம், பீதேஸ் செய்திக்கு தகவல் அனுப்பியுள்ளது (Fides) [2019-08-13 01:22:23]


இந்திய பெருமழை உயிரிழப்புகளுக்கு திருத்தந்தை அனுதாபம்

கேரளா, கர்நாடகா, மகாராஷ்டிரா, மற்றும், குஜராத்தில் பெய்துவரும் பெருமழையால் உயிரிழந்தவர்கள், மற்றும், தங்கள் உறைவிடங்களை இழந்தவர்கள் குறித்து திருத்தந்தை ஆழ்ந்த கவலை கொண்டுள்ளார் கிறிஸ்டோபர் பிரான்சிஸ் - வத்திக்கான் செய்திகள் இந்தியாவில் பெருமழையால் உயிரிழந்துள்ள மக்கள் குறித்த திருத்தந்தையின் ஆழ்ந்த அனுதாபங்களை வெளியிடும் இரங்கல் செய்தி அந்நாட்டு தலத்திருஅவைக்கு அனுப்பப்பட்டுள்ளது. திருத்தந்தையின் பெயரால் திருப்பீடச் செயலர் கர்தினால் பியெத்ரோ பரோலின் அவர்களால் அனுப்பப்பட்டுள்ள இச்செய்தி, அண்மைய நாட்களில் கேரளா, கர்நாடகா, மகாராஷ்டிரா, மற்றும், குஜராத்தில் பெய்துவரும் பெருமழையால் உயிரிழந்தவர்கள், மற்றும், தங்கள் உறைவிடங்களை இழந்தவர்கள் குறித்து திருத்தந்தை ஆழ்ந்த கவலை கொண்டுள்ளதாகத் தெரிவிக்கிறது. பாதிக்கப்பட்டோருக்கு தன் ஆழ்ந்த அனுதாபங்களை வெளியிடும் அதேவேளை, துயர் துடைக்கும் பணியில் ஈடுபட்டிருப்போருக்காக தான் செபிப்பதாகவும், இறையாசீரை இறைஞ்சுவதாகவும் திருத்தந்தையின் சார்பில் இந்தியாவிற்கு அனுப்பப்பட்டுள்ள செய்தி உரைக்கிறது. கடந்த சில நாட்களாக இந்தியாவின் தெற்கு மற்றும் மேற்கில் உள்ள 4 மாநிலங்களில் பெய்துவரும் தொடர்மழையால் 150க்கும் மேற்பட்டோர் உயிரிழந்துள்ளனர், 1 இலட்சத்து 65,000க்கும் அதிகமானோர் உறைவிடங்களிலிருந்து வெளியேறி, நிவாரண மையங்களில் குடியேறியுள்ளனர் [2019-08-13 01:16:06]