தமிழ் ஆன்மீகப் பணியகம், யேர்மனி

வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)

பக்க இலக்கங்களை அழுத்தி எல்லா செய்திகளையும் பார்வையிடவும்

சவேரியார் புரம் தூய பிரான்சிஸ் சவேரியார் ஆலயம்அர்சிப்பு

திதாக அமைக்கப்பட்ட சிலாவத்துறைப் பங்கின் தலைமை ஆலயமான சவேரியார் புரம் தூய பிரான்சிஸ் சவேரியார் ஆலயம் கடந்த திங்கள் மாலை ( 18.06.2018) மன்னார் மறைமாவட்ட ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகை அவர்கள் ஆசீர்வாதித்து, திருச்சபையின் திரு வழிபாட்டு திருமரபிற்கேற்ப ஆரம்ப வழிபாடுகளை முன்னெடுத்து, ஆலயம், திருப்பீடம், நற்கருணைப் பேழை ஆகியவற்றை முறைப்படி அர்சித்துப் புனிதப்படுத்தினார்.

கடந்த 18.06.2018 மாலை 05.00 மணிக்கு சிலாவத்துறை, முத்தரிப்புத்துறை பிரதான விதியிலிருந்து ஆலயத்திற்குச் செல்லும் நுழைவாயியிலிருந்து, ஆயர் அவர்கள் ஆலய முன்றல் வரை அழைத்து வரப்பட்டு அங்கு மரபு ரீதியான வரவேற்ப்பளிக்கப்பட்டது.

அதனைத் தொடர்ந்து ஆயர் அவர்கள் புதிய ஆலயத்தை அர்ச்சித்து புனிதப்படுத்தும் திரு நிகழ்வை முறைப்படி முன்னெடுத்துச் சென்றார். பங்குத் தந்தை அருட்பணி.செ.அன்ரன் தவறாஜா அடிகளார் ஆலய இறைமக்கள் சமூகத்தோடும், பணியாற்றும் துறவிகளோடு இணைந்தும் புதிய ஆலய அமைப்புப் பணியையும், இத் திருநிகழ்வையும் மிகவும் சிறப்பாகச் செய்து முடித்திருந்தார்.

இந் நிகழ்வில் பெருந்தொiயான இறைமக்களும், அரச, அரச சார்பற்ற பணியக முதன்மைப் பணியார்களும், குருக்கள் துறவியரும் கலந்து கொண்டனர். [2018-06-26 23:32:18]

வாழ்க்கைப் பெற்றான் கண்டல் தூய நீக்கிலார் ஆலயத்தை அர்சித்துப் புனிதப்படுத்தினார்.

அளவக்கைப் பங்கின் துணை ஆலயமான வாழ்க்கைப் பெற்றான் கண்டல் தூய நீக்கிலார் ஆலயப் பங்குச் சமூகம் நேற்று ஞாயிற்றுக்கிழமை மாலை ( 17.06.2018) மன்னார் மறைமாவட்ட ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகை அவர்களுக்கு வரவேற்ப்பளித்ததோடு, புதிதாக அமைக்கப்பட்ட தூய நீக்கிலார் ஆலயத்தையும் மன்னார் ஆயர் அவர்கள் ஆசீர்வாதித்து, திருச்சபையின் திரு வழிபாட்டு திருமரபிற்கேற்ப ஆரம்ப வழிபாடுகளை முன்னெடுத்து, ஆலயம், திருப்பீடம், நற்கருணைப் பேழை ஆகியவற்றை முறைப்படி அர்சித்துப் புனிதப்படுத்தினார்.

நேற்று மாலை 05.00 மணிக்கு முருங்கன் நானாட்டான் பிரதான விதியிலிருந்து வாழ்க்கைப் பெற்றான் கண்டல் கிராமத்திற்குச் செல்லும் நுழைவாயியிலிருந்து, வாழ்க்கைப் பெற்றான் கிராமம் வரை உந்துரளி அணிவகுப்போடு ஆயர் அவர்கள் ஆலய முன்றல் வரை அழைத்து வரப்பட்டு அங்கு மரபு ரீதியான வரவேற்ப்பளிக்கப்பட்டது. நானாட்டான் மகாவித்தியாலய இசைக்குழவின் மேலைநாட்டு மகிழ்வொலியோடு ஆயர் அவர்கள் மதிப்பளித்து வரவேற்கப்பட்டார்.

அதனைத் தொடர்ந்து ஆயர் அவர்கள் புதிய ஆலயத்தை அர்ச்சித்து புனிதப்படுத்தும் திரு நிகழ்வை முறைப்படி முன்னெடுத்துச் சென்றார். பங்குத் தந்தை அருட்பணி.லீ.சுரெந்திரன் றெவல் அடிகளார் ஆலய இறைமக்கள் சமூகத்தோடும், பணியாற்றும் துறவிகளோடு இணைந்தும் புதிய ஆலய அமைப்புப் பணியையும், இத் திருநிகழ்வையும் மிகவும் சிறப்பாகச் செய்து முடித்திருந்தார்.

இந் நிகழ்வில் பெருந்தொiயான இறைமக்களும், அரச, அரச சார்பற்ற பணியக முதன்மைப் பணியார்களும், குருக்கள் துறவியரும் கலந்து கொண்டனர். [2018-06-19 21:40:52]

முப்பெரும் நிகழ்வுகளை தமது பங்கில் முன்னெடுத்துச் சென்றனர்.

முத்தரிப்புத்துறை தூய செங்கோல் மாதா பங்குச் சமூகம் நேற்று 13.06.2018 புதன்கிழமை முப்பெரும் நிகழ்வுகளை தமது பங்கில் முன்னெடுத்துச் சென்றனர்.
ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகைக்கு மாபெரும் வரவேற்பளித்தனார்.

ஆலயத்திற்கான அடிக்கல் நடுகை செய்யப்பட்டது.
தூய அந்தோனியார் சிற்றாலயத்தை; ஆயர் அவர்கள் அர்ச்சித்து திறந்து வைத்தார்.1: தமது பங்கிற்கு, மன்னார் மறைமாவட்டத்தைப் பணிப்பொறுப்பேற்றதன்பின் முதன் முதலாக வருகை தந்த மன்னார் ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகைக்கு மாபெரும் வரவேற்பளித்தனார்.நேற்று மாலை முத்தரிப்புத்துறை நானாட்டான் பிரதான வீதியில் அமைந்துள்ள அரிவி ஆற்றுப்பாலத்தில் வைத்து பங்குத்தந்தை அருட்பணி.எ.டெனி கலிஸ்ரஸ் அடிகளாரும் பங்கின் அருட்பணிப் பேரவையினரும் வரவேற்று, உந்துருளிகள் அணிவகுத்து வர, ஆயர் அவர்களை அலங்கரிக்கப்பட்ட ஊர்தியில் தமது கிராமத்தின் நடுப்பகுதி வரை அழைத்து வர அங்கிருந்து அரிப்பு பாடசாலையின் இசைக்குழு மேற்கத்திய இசைக்கருவிகளின் மகிழ்வொலியோடு ஆலய பிரதான நுழைவாயில் வரை அழைத்து வர, அங்கிருந்து முத்தமிழ்க் கலைஞர்களும், ஊர்ப் பெரியவர்களும் கவிபாடி தங்கள் கரங்களால் அதற்கு தாளமிசைத்து மெரூகூட்டி அழைத்து வந்தனர். ஆலயத்தை வந்தடைந்த பின் ஆயர் அவர்கள் இறைமக்களுக்கு ஆசீர் வழங்கினார்.

இதனைத் தொடர்ந்து, தற்போதுள்ள மிகப் பெரும் பழைமைவாய்ந்த பங்கு ஆலயம் மக்களின் பயன்பாட்டிற்குப் பேதாமல் இருப்பதால், புதிய ஆலயத்தின் தேவை கருதி புதிய ஆலயத்திற்கான அடிக்கல் நடுகை செய்யப்பட்டது. இறை வேண்டுதலின் பின் ஆயர் அவர்களும் அங்கு வருகை தந்திருந்த முதன்மை விருந்தினர்களும் அடிக்கற்களை நடுகை செய்தனர். இதனைத் தொடர்ந்து முத்தரிப்புத்துறை ஆண்டி ஓடை என்னும் இடத்திற்கு அருகில் அமைந்துள்ள பகுதியில்: தூய யோசேவ்வாஸ் அவர்களால் நடப்பட்ட திருச்சிலுவை உள்ள இடத்தில் அமைக்கப்பட்டுள்ள தூய அந்தோனியார் சிற்றாலயத்தை; ஆயர் அவர்கள் அர்ச்சித்து திறந்து வைத்தார். இங்கு மறையுரையாற்றிய ஆயர் அவர்கள், குடும்பங்களில் தேவ அழைத்தல்கள் பெருகவேண்டுமென்றும், அதற்கு, விலிலியத்தில் சொல்லப்படுகின்ற மக்கட்பேறு, கடவுள் அருளும் செல்வம் என்னும் உண்மையை உணர்ந்து, குடும்பங்களில் பிள்ளைப்பேற்றிற்கு முக்கிய இடம் கொடுக்க வேண்டும் எனவும் குறிப்பிட்டார்.

இந்நிகழ்வுக்கு பெருந்தொகையான இறைமக்கள், குருக்கள், துறவிகள் வன்னிப்பாராளுமன்ற உறுப்பினரும், பாராளுமன்றக் குழுக்களின் பிரதித் தலைவருமான கௌரவ செல்வம் அடைக்கலநாதன்,வன்னிப் பாராளுமன்ற உறுப்பினர் கௌரவ சாள்ஸ் நிர்மலநாதன், வடமாகாண சபை உறுப்பினர் கெரவ பிறிமூஸ் சிராய்வா, சட்டத்தரணியும், மன்னார் மறைமாவட்ட கத்தோலிக்க ஒன்றித்தின் தலைவருமான திரு. ஆன்ரன் புனிதநாயகம், முன்னைநாள் வன்னிப்பாராளுமன்ற உறுப்பினர் திரு.வினோதரலிங்கம் ஆகியோரும் கலந்து சிறப்பித்தனர்.

அனைத்து நிகழ்வுகளையும் ஆலய அருட்பணிப் பேரவையோடும், அருட்சகோதரிகளோடும், மக்களோடும் இணைந்து, பங்குத் தந்தை அருட்பணி.எ.டெனி கலிஸ்ரஸ் அடிகளார் நெறிப்படுத்தி நடாத்தியிருந்தார். [2018-06-15 12:09:37]

வரலாற்றுச் சிறப்பு மிக்க தள்ளாடி தூய அந்தோனியார் திருத்தலத் திருவிழா இன்று

மன்னார் தூய செபஸ்தியார் பேராலயப் பங்கின் அருட்பணிப் பரப்பெல்லைக்குள் அமைந்துள்ள, வரலாற்றுச் சிறப்பு மிக்க தள்ளாடி தூய அந்தோனியார் திருத்தலத் திருவிழா இன்று 13.06.2018 புதன்கிழமை காலை சிறப்பாகக் கொண்டாடப்பட்டது. ஒன்பது நாட்கள் ஆயத்த வழிபாடுகளின் பின்னர், நேற்று 12.06.2016 செவ்வாயக் கிழமை மாலைப் புகழ் ஆராதனையும், இன்று திருவிழாத் திருப்பலியும் இடம் பெற்றன.இன்றைய விழாவில் அருட்பணியாளர்கள், துறவிகள், பெருந்தொகையான இறைமக்கள் கலந்து கொண்டனர். ஆயத்த வழிபாடுகளில் மன்னார் தூய பேராலயப்பங்கு மக்கள், வங்காலை தூய ஆனாள் பங்கு மக்கள், பள்ளிமுனை தூய லூசியா பங்குமக்கள் தங்களுடைய ஆன்மிகப் பங்களிப்பையும் வழங்கியிருந்தனர்.

பணிக்குழுக்களோடும், மன்னார் தூய செபஸ்தியார் பேராலயப் பங்கில் பணியாற்றும் ஏனைய அருட்பணியாளர்களோடும் இணைந்து பங்குத்தந்தை அருட்பணி.ச.ஜொ.பெப்பி சோசை அனைத்து திருவிழா ஒழுங்குகளையும் சிறப்பாகச் செய்திருந்தார். [2018-06-13 23:08:18]

அருட்பணி ஜோசவ் ஜெயசீலன் அவர்களின் ஆங்கில நூல்

கிளறீசியன் மறைபரப்பு துறவற சபையின் குருவாகிய அருட்பணி ஜோசவ் ஜெயசீலன் அவர்களின் இரண்டாவது படைப்பான Reconciliation and Peacebuilding in Post-war Sri Lanka: through the Healing of Memories and the Role of the Catholic Church ( கசப்பான நினைவுகளைக் குணமாக்குவதன் வழியாக இலங்கையில் போருக்குப் பின்னரான ஒப்புரவும், சமாதானத்தைக் கட்டியெழுப்புதலும்: இந்த வழிமுறையில் கத்தோலிக்க திருச்சபையின் வகிபாகம்) என்னும் ஆங்கில நூல் கிளறீசியன் பதிப்பக வெளியீடாக 02.06.2018 சனிக்கிழமை கொழும்பில் வெளியிட்டு வைக்கப்பட்டது.ஏற்கனவே 2016ம் ஆண்டில் அருட்பணி ஜோசவ் ஜெயசீலன் அவர்கள் Look at the Lilies of the Field: Musings of the Heart.. என்னும் படைப்பினையும் வெளிக்கொணர்ந்துள்ளார். தற்போது போரினால் பாதிக்கப்பட்டுவர்களுக்கான மன்னார் மறைமாவட்டத்தின் வவுனியாவில் அமைந்துள்ள VAROD புனர்வாழ்வு மையத்தில் பணியாற்றுவதோடு, வவுனியாவில் பணியாற்றும் கிளறீசியன் அருட்பணியாளர் குழுமத்தின் குழு முதல்வராகவும் பணியாற்றுகின்றார். இவர் சிக்காக்கோ கத்தோலிக்க இறையியல் பல்கலைக்கழகத்தில் நடைமுறைச் சாத்திய இறையியல் துறையில் கலாநிதி பட்டத்தையும் பெற்றுள்ளார்.

இவருடைய இந்தப் புத்தக வெளியீட்டிற்கு முதன்மை விருந்தினராக இலங்கைக்கான திருத் தந்தையின் பிரதிநிதி அதி மேன்மைமிகு கலாநிதி பியர் நுயென் வான் ரொற் அவர்கள் கலந்து சிறப்பித்தார். நூலுக்கான அறிமுக உரையை இலங்கை தேசிய சமாதானப் பேரவையின் நிறைவேற்று இயக்குனர் கலாநிதி ஜெகான் பெரேரா வழங்க, நூல் ஆய்வினை கொழும்பு களனியப் பல்கலைக் கழகத்தின் பேராசிரியர் ஸ்ரன்லி விஜயசிங்க முன்வைத்தார். இலங்கைக் கத்தோலிக்க ஆயர் பேரவையின் தலைவர் பேரருட் கலாநிதி வின்ஸ்ரன் பெனாண்டோ ஆண்டகை நூலாசிரியருக்கு சிறப்புச் செய்தியொன்றினை அனுப்பிவைத்தார்.

பேராசிரியர் ஸ்ரன்லி விஜயசிங்க தனது நூல் ஆய்வுரையில் : இந்தப் புத்தகமானது கிறிஸ்தவர்களுக்கும் குறிப்பாக கத்தோலிக்க திருச்சபைக்கும் தாக்குமானதும், ஆக்கபூர்வமானதுமான நடைமுறைச் சாத்தியங்களை முன் வைத்திருக்கின்றது. என்பதோடு நூலாசிரியரின் இந்த அற்புதமான பணிக்காக அவரை வெகுவாகப் பாராட்டினார்.

இந்நிகழ்வுக்கு அமைச்சர்கள், இலங்கைக் கத்தோலிக்க துறவற சபைகளின் மேலாளர், கிளறிசியன் சபை ஆண், பெண் துறவிகள், அருட்பணி ஜோசவ் ஜெயசீலன் அவர்களின் உறவினர்கள், நண்பர்கள், பெருந்தொகையான குருக்கள், துறவிகள், அரச சார்பற்ற நிறுவனங்களின் பிரதிநிதிகள் எனப் பலரும் கலந்து கொண்டனர். [2018-06-13 23:03:47]

நிரந்தர இல்லமொன்றை அமைத்துள்ளனர்.

இந்திய மண்ணலிருந்து மன்னார் மறைமாவட்டத் திற்கு வந்து பணியாற்றிக் கொண்டிருக்கும் அமல உற்பவ அன்னை துறவறசபை அருட்சகோதரிகள் தங்களுக்கான நிரந்தர இல்லமொன்றை மன்னார் சாந்திபுரம் பங்கின் பணி எல்லைக்குள் அமைந்துள்ள சவுத்பார் என்னும் பகுதியில் அமல அன்னை நகர் என்னும் இடத்தில் அமைத்துள்ளனர். இன்று (06.06.2018) புதன்கிழமை மன்னார் ஆயர் பேரருட் கலாநிதி பி.ல.இம்மானுவேல் பெனாண்டோ அவர்கள் ஆசீர்வதிக்க , அமல உற்பவ அன்னை துறவறசபை அருட்சகோதரிகளின் இலங்கைக்கான இணைப்பாளர் அருட்சகோதரி தைனிஸ் மேரி அவர்கள் இல்லத்தினை திறந்து வைத்தார்.

இந்நிகழ்வில் அருட்பணியாளர்கள், துறவிகள், அரச, அரச சார்பற்ற பணியாளர்கள், நலன் விரும்பிகள், பொதுமக்கள் எனப் பலரும் கலந்து கொண்டனர். [2018-06-06 22:54:15]

நற்கருணைப் பேரணியை ஒழுங்கு செய்திருந்தது.

உலகெங்கும் பரந்து வாழும் கத்தோலிக்க திருச்சபை (03.06.2018 ஞாயிற்றுக்கிழமை) கிறிஸ்துவின் திருவுடல் திரு இரத்தப் பெருவிழாவை மிகவும் ஆன்மிக அர்த்தத்தோடு நினைவு கூர்ந்து கொண்டாடிய அதே வேளை மன்னார் மறைமாவட்டத்தின் அனைத்துப் பங்குகளிலும் இப் பெருவிழா மிகவும் ஆன்மிகச் செழுமையோடு கொண்டாடப்பட்டது.இந் நாளில் பல இடங்களிலும் சிறுவர்களுக்கு முதல் நன்மை அருட்சாதனம் வழங்கப்பட்டது. அத்தோடு சில பங்குகளில் நற்கருணைப் பேரணியும் ஆன்மிக அருள் நிலையோடு முன்னெடுத்துச் செல்லப்பட்டது.

மாலை (03.06.2018 ஞாயிற்றுக்கிழமை) மன்னார் தூய செபஸ்தியார் பேராலயப் பங்குச் சமூகம் சிறப்பானதொரு நற்கருணைப் பேரணியை ஒழுங்கு செய்திருந்தது. நேற்று மாலை 04.30 மணிக்கு மன்னார் தூய மரியன்னை ஆலயத்தில் நடைபெற்ற திருப்பலியோடு இப் பேரணி ஆரம்பமாகியது. அருட்பணி ச.பிரான்சிஸ் மரி டிக்கோல் அடிகளாரின் தலைமையில் திருப்பலி நடைபெற்று அதன்பின் சிறிய நற்கருணைப் புகழ் ஆராதனையுடன் பவனி ஆரம்பமானது. சிறப்பாக மெருகூட்டப்பட்ட இயந்திர ஊர்தியிலே நற்கருணை நாதர் அரியணை அமர்த்தப்பட்டு ஊர்வலமாக எடுத்துவரப்பட்டார்.

இப்பவனி மன்னார் -தலைமன்னார் பிரதான வீதி வழியாக, மன்னார் வைத்தியசாலை சந்திலை வந்தடைந்து அற்கிருந்து கடலேரி வீதி வழியாக மன்னார் தொலைத் தொடர்பு மையத்தை வந்தடைந்து அதற்கு எதிர்ப்புறமாக அமைக்கப்பட்ட தற்காலிக சிறப்புபு; பீடத்திலே நற்கருணை வைக்கப்பட்டு வழிபாடுகள் நடைபெற்ற பின்னர் மீண்டும், மன்னார் தூய செபஸ்தியார் பேராலய வீதி வழியாக பேராலயத்தை வந்தடைந்து அங்கு நற்கருணை ஆசீர் வழங்கப்பட்டது. அருட்பணி ச.தேவறாஜா கொடுதோர் அடிகள் நற்கருணை ஆசீரை வழங்கினார். பங்குத் தந்தை அருட்பணி.ச.ஜொ.பெப்பி சோசை அடிகளார் அங்கு பணியாற்றும் ஏனைய அருட்பணியாளர்களோடும், துறவிகளோடும், பங்கின் பல்வேறு பணிக்குழக்களின் பங்களிப்போடும் இப் பேரணியை சிறப்பாக ஒழுங்குபடுத்தி முன்னெடுத்துச் சென்றார். [2018-06-06 22:51:54]

ஆனைக்கோட்டைப்பங்கு இளையோர் ஒன்றுகூடல்

03.06.2018 ஞாயிற்றுக்கிழமை அன்று ஆனைக்கோட்டை பங்கு இளையோருக்கான கருத்தரங்கு ஆனைக்கோட்டை புனித அடைக்கல அன்னை ஆலயத்தில் காலை 8.30 மணிக்கு ஆனைக்கோட்டைப்பங்குத்தந்தை அருட்திரு றோய் அடிகளாரின் தலைமையில் நடைபெற்றது. இந்நிகழ்வு சண்டிலிப்பாய் பிரதேச செயலகத்தின் கிறிஸ்த அலுவல்கள் திணைக்களத்தின் அனுசரணையுடன் யாழ். மறைமாவட்ட இளையோர் ஒன்றிய ஆணைக்குழுவின் நெறிப்படுத்தலில் நடைபெற்றது. இந்நிகழ்வில்

யாழ். மறைமாவட்ட இளையோர் ஒன்றிய ஆணைக்குழுவின் இயக்குனர் அருட்திரு அன்ரன் ஸ் ரீபன் இளையோரும் சமூகத்தொடர்பு சாதனமும் என்ற தலைப்பில் தற்கால இளையோரின் வாழ்வில் சமூகத்தொடர்பு சாதனங்கள் ஏற்படுத்திவரும் சாதகபாதக விளைவுகள் பற்றி விளக்கினார். இந்நிகழ்வில் யாழ்ப்பாண மறைமாவட்ட இளையோர் ஒன்றிய செயற்குழுவினரும் ஆனைக்கோட்டைப் பங்கைச் சேர்ந்த 40ற்கு அதிகமான இளையோரும் பங்குபற்றினர். [2018-06-05 21:58:22]

குருத்துவம் திருமணம்: கொடையும் மறைபொருளும் தேவரட்ணம் செல்வரட்ணம் அடிகளாரின் நூல் வெளியீடு

தேவரட்ணம் செல்வரட்ணம் அடிகளார் எழுதிய குருத்துவம் திருமணம் : கொடையும் மறைபொருளும்; என்ற நூல் வெளியீடு 28 மே 2018 அன்று கொழும்புத்துறை புனித பிரான்சீஸ் சவேரியார் குருத்துவக்கல்லூரியில் கல்லூரி அதிபர் ரீ.ஜே. கிருபாகரன் அடிகளார் தலைமையில் நடைபெறவுள்ளது. மேற்படி குருத்துவம் திருமணம் : கொடையும் மறைபொருளும்; என்ற நூல் வெளியீட்டில் யாழ் ஆயர் முதன்மை விருந்தினராக கலந்து கொள்வார்.

இந்நூலின் ஆசிரியர் தேவரட்ணம் செல்வரட்ணம் அடிகளார் 2004ஆம் ஆண்டு குருவாக திருநிலைப்படுத்தப்பட்டார். இவர் மெய்யியலில் இளமாணிப் பட்டத்தையும் இறையியலில் உரோமாபுரி ஊர்பானியானா பல்கலைக்கழகத்தில் கோட்பாட்டு இறையியலில் முதுமாணிப் பட்டத்தையும் பெற்றுள்ளார். இவர் யாழ்ப்பாணம் புனித பிரான்சிஸ்கு சவேரியார் குருத்துவக் கல்லூரியில் இறையியல் விரிவுரையாளராகவும் உருவாக்குனராகவும் பணியாற்றுகின்றார். இன்;னும் புனித யோசேவ் வாஸ் இறையியல் கவ்வியகத்தின் யாழ்ப்பாணத் தமிழ் பிரிவிலும் விரிவுரையாளராக பணியாற்றுகின்றார். இவர் இறையியல் கோலங்கள் சஞ்சிகையிலும் பாதுகாவலன் பத்திரிகையிலும் பல ஆக்கங்களை எழுதியுள்ளார். [2018-05-26 16:58:33]

மன்னார் ஆயர் தலைமையில் இடம்பெற்ற உயர்மட்ட கலந்துரையாடல்

மன்னார் - மடு திருத்தள பகுதியில் யாத்திரிகர்களுக்கான தற்காலிக வீடுகள் அமைப்பது தொடர்பாக உயர் மட்ட கலந்துரையாடல் இடம்பெற்றுள்ளது.

குறித்த கலந்துரையாடல் இன்று காலை 11 மணியளவில் மடு திருத்தளத்தில் மன்னார் மறைமாவட்ட ஆயர் இம்மானுவேல் பெனாண்டோ ஆண்டகை தலைமையில் நடைபெற்றுள்ளது.

இதன்போது, இந்திய அராசங்கம் வழங்கும் 300 மில்லியன் ரூபா நிதி ஒதுக்கீட்டில் மடு திருத்தளத்திற்கு வரும் பக்தர்களின் நலனை கருத்தில் கொண்டு யாத்திரிகர்களுக்கான 300 தற்காலிக வீடுகள் அமைப்பது தொடர்பாக விரிவாக ஆராயப்பட்டுள்ளது.

இதனை தொடர்ந்து, 300 வீடுகள் அமைக்கப்படவுள்ள இடத்தினை மன்னார் மறைமாவட்ட ஆயர் இம்மானுவேல் பெனாண்டோ ஆண்டகை தலைமையிலான குறித்த குழுவினர் நேரடியாக சென்று பார்வையிட்டனர்.

இறுதியாக இந்த வீட்டு திட்டம் அமைக்கும் பணிகளை ஆரம்பிக்கும் வகையில் எதிர்வரும் மாதம் 1ஆம் திகதி அடிக்கல் நாட்டி திட்டத்தை ஆரம்பிப்பதாகவும், அதற்கான துரித நடவடிக்கைகளை உரிய திணைக்களங்கள் முன்னெடுக்க வேண்டும் என கோரிக்கை விடுக்கப்பட்டுள்ளது.

மேலும், கலந்துரையாடலில் , மடு திருத்தள பரிபாலகர் அருட்தந்தை எமிலியானுஸ் பிள்ளை,கிறிஸ்தவ மத விவகார அமைச்சின் பணிப்பாளர் எம்.குனவர்தன, சுற்றுலாத்துறை அமைச்சின் செயலாளர், இந்திய துனைத்தூதரகத்தின் அபிவிருத்தி ஒருங்கிணைப்பாளர் டி.சி.மஞ்சுநாத், மடு பிரதேசச் செயலாளர் வி.ஜெயகரன், மன்னார் உதவி திட்டமிடல் பணிப்பாளர் எல்.ஜே.றொசான் குரூஸ் உள்ளிட்ட திணைக்கள அதிகாரிகள் என பலரும் கலந்து கொண்டுள்ளனர் [2018-05-26 16:56:00]