வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்


நிரந்தர இல்லமொன்றை அமைத்துள்ளனர்.

இந்திய மண்ணலிருந்து மன்னார் மறைமாவட்டத் திற்கு வந்து பணியாற்றிக் கொண்டிருக்கும் அமல உற்பவ அன்னை துறவறசபை அருட்சகோதரிகள் தங்களுக்கான நிரந்தர இல்லமொன்றை மன்னார் சாந்திபுரம் பங்கின் பணி எல்லைக்குள் அமைந்துள்ள சவுத்பார் என்னும் பகுதியில் அமல அன்னை நகர் என்னும் இடத்தில் அமைத்துள்ளனர். இன்று (06.06.2018) புதன்கிழமை மன்னார் ஆயர் பேரருட் கலாநிதி பி.ல.இம்மானுவேல் பெனாண்டோ அவர்கள் ஆசீர்வதிக்க , அமல உற்பவ அன்னை துறவறசபை அருட்சகோதரிகளின் இலங்கைக்கான இணைப்பாளர் அருட்சகோதரி தைனிஸ் மேரி அவர்கள் இல்லத்தினை திறந்து வைத்தார்.

இந்நிகழ்வில் அருட்பணியாளர்கள், துறவிகள், அரச, அரச சார்பற்ற பணியாளர்கள், நலன் விரும்பிகள், பொதுமக்கள் எனப் பலரும் கலந்து கொண்டனர். [2018-06-06 22:54:15]


நற்கருணைப் பேரணியை ஒழுங்கு செய்திருந்தது.

உலகெங்கும் பரந்து வாழும் கத்தோலிக்க திருச்சபை (03.06.2018 ஞாயிற்றுக்கிழமை) கிறிஸ்துவின் திருவுடல் திரு இரத்தப் பெருவிழாவை மிகவும் ஆன்மிக அர்த்தத்தோடு நினைவு கூர்ந்து கொண்டாடிய அதே வேளை மன்னார் மறைமாவட்டத்தின் அனைத்துப் பங்குகளிலும் இப் பெருவிழா மிகவும் ஆன்மிகச் செழுமையோடு கொண்டாடப்பட்டது.இந் நாளில் பல இடங்களிலும் சிறுவர்களுக்கு முதல் நன்மை அருட்சாதனம் வழங்கப்பட்டது. அத்தோடு சில பங்குகளில் நற்கருணைப் பேரணியும் ஆன்மிக அருள் நிலையோடு முன்னெடுத்துச் செல்லப்பட்டது.

மாலை (03.06.2018 ஞாயிற்றுக்கிழமை) மன்னார் தூய செபஸ்தியார் பேராலயப் பங்குச் சமூகம் சிறப்பானதொரு நற்கருணைப் பேரணியை ஒழுங்கு செய்திருந்தது. நேற்று மாலை 04.30 மணிக்கு மன்னார் தூய மரியன்னை ஆலயத்தில் நடைபெற்ற திருப்பலியோடு இப் பேரணி ஆரம்பமாகியது. அருட்பணி ச.பிரான்சிஸ் மரி டிக்கோல் அடிகளாரின் தலைமையில் திருப்பலி நடைபெற்று அதன்பின் சிறிய நற்கருணைப் புகழ் ஆராதனையுடன் பவனி ஆரம்பமானது. சிறப்பாக மெருகூட்டப்பட்ட இயந்திர ஊர்தியிலே நற்கருணை நாதர் அரியணை அமர்த்தப்பட்டு ஊர்வலமாக எடுத்துவரப்பட்டார்.

இப்பவனி மன்னார் -தலைமன்னார் பிரதான வீதி வழியாக, மன்னார் வைத்தியசாலை சந்திலை வந்தடைந்து அற்கிருந்து கடலேரி வீதி வழியாக மன்னார் தொலைத் தொடர்பு மையத்தை வந்தடைந்து அதற்கு எதிர்ப்புறமாக அமைக்கப்பட்ட தற்காலிக சிறப்புபு; பீடத்திலே நற்கருணை வைக்கப்பட்டு வழிபாடுகள் நடைபெற்ற பின்னர் மீண்டும், மன்னார் தூய செபஸ்தியார் பேராலய வீதி வழியாக பேராலயத்தை வந்தடைந்து அங்கு நற்கருணை ஆசீர் வழங்கப்பட்டது. அருட்பணி ச.தேவறாஜா கொடுதோர் அடிகள் நற்கருணை ஆசீரை வழங்கினார். பங்குத் தந்தை அருட்பணி.ச.ஜொ.பெப்பி சோசை அடிகளார் அங்கு பணியாற்றும் ஏனைய அருட்பணியாளர்களோடும், துறவிகளோடும், பங்கின் பல்வேறு பணிக்குழக்களின் பங்களிப்போடும் இப் பேரணியை சிறப்பாக ஒழுங்குபடுத்தி முன்னெடுத்துச் சென்றார். [2018-06-06 22:51:54]


ஆனைக்கோட்டைப்பங்கு இளையோர் ஒன்றுகூடல்

03.06.2018 ஞாயிற்றுக்கிழமை அன்று ஆனைக்கோட்டை பங்கு இளையோருக்கான கருத்தரங்கு ஆனைக்கோட்டை புனித அடைக்கல அன்னை ஆலயத்தில் காலை 8.30 மணிக்கு ஆனைக்கோட்டைப்பங்குத்தந்தை அருட்திரு றோய் அடிகளாரின் தலைமையில் நடைபெற்றது. இந்நிகழ்வு சண்டிலிப்பாய் பிரதேச செயலகத்தின் கிறிஸ்த அலுவல்கள் திணைக்களத்தின் அனுசரணையுடன் யாழ். மறைமாவட்ட இளையோர் ஒன்றிய ஆணைக்குழுவின் நெறிப்படுத்தலில் நடைபெற்றது. இந்நிகழ்வில்

யாழ். மறைமாவட்ட இளையோர் ஒன்றிய ஆணைக்குழுவின் இயக்குனர் அருட்திரு அன்ரன் ஸ் ரீபன் இளையோரும் சமூகத்தொடர்பு சாதனமும் என்ற தலைப்பில் தற்கால இளையோரின் வாழ்வில் சமூகத்தொடர்பு சாதனங்கள் ஏற்படுத்திவரும் சாதகபாதக விளைவுகள் பற்றி விளக்கினார். இந்நிகழ்வில் யாழ்ப்பாண மறைமாவட்ட இளையோர் ஒன்றிய செயற்குழுவினரும் ஆனைக்கோட்டைப் பங்கைச் சேர்ந்த 40ற்கு அதிகமான இளையோரும் பங்குபற்றினர். [2018-06-05 21:58:22]


குருத்துவம் திருமணம்: கொடையும் மறைபொருளும் தேவரட்ணம் செல்வரட்ணம் அடிகளாரின் நூல் வெளியீடு

தேவரட்ணம் செல்வரட்ணம் அடிகளார் எழுதிய குருத்துவம் திருமணம் : கொடையும் மறைபொருளும்; என்ற நூல் வெளியீடு 28 மே 2018 அன்று கொழும்புத்துறை புனித பிரான்சீஸ் சவேரியார் குருத்துவக்கல்லூரியில் கல்லூரி அதிபர் ரீ.ஜே. கிருபாகரன் அடிகளார் தலைமையில் நடைபெறவுள்ளது. மேற்படி குருத்துவம் திருமணம் : கொடையும் மறைபொருளும்; என்ற நூல் வெளியீட்டில் யாழ் ஆயர் முதன்மை விருந்தினராக கலந்து கொள்வார்.

இந்நூலின் ஆசிரியர் தேவரட்ணம் செல்வரட்ணம் அடிகளார் 2004ஆம் ஆண்டு குருவாக திருநிலைப்படுத்தப்பட்டார். இவர் மெய்யியலில் இளமாணிப் பட்டத்தையும் இறையியலில் உரோமாபுரி ஊர்பானியானா பல்கலைக்கழகத்தில் கோட்பாட்டு இறையியலில் முதுமாணிப் பட்டத்தையும் பெற்றுள்ளார். இவர் யாழ்ப்பாணம் புனித பிரான்சிஸ்கு சவேரியார் குருத்துவக் கல்லூரியில் இறையியல் விரிவுரையாளராகவும் உருவாக்குனராகவும் பணியாற்றுகின்றார். இன்;னும் புனித யோசேவ் வாஸ் இறையியல் கவ்வியகத்தின் யாழ்ப்பாணத் தமிழ் பிரிவிலும் விரிவுரையாளராக பணியாற்றுகின்றார். இவர் இறையியல் கோலங்கள் சஞ்சிகையிலும் பாதுகாவலன் பத்திரிகையிலும் பல ஆக்கங்களை எழுதியுள்ளார். [2018-05-26 16:58:33]


மன்னார் ஆயர் தலைமையில் இடம்பெற்ற உயர்மட்ட கலந்துரையாடல்

மன்னார் - மடு திருத்தள பகுதியில் யாத்திரிகர்களுக்கான தற்காலிக வீடுகள் அமைப்பது தொடர்பாக உயர் மட்ட கலந்துரையாடல் இடம்பெற்றுள்ளது.

குறித்த கலந்துரையாடல் இன்று காலை 11 மணியளவில் மடு திருத்தளத்தில் மன்னார் மறைமாவட்ட ஆயர் இம்மானுவேல் பெனாண்டோ ஆண்டகை தலைமையில் நடைபெற்றுள்ளது.

இதன்போது, இந்திய அராசங்கம் வழங்கும் 300 மில்லியன் ரூபா நிதி ஒதுக்கீட்டில் மடு திருத்தளத்திற்கு வரும் பக்தர்களின் நலனை கருத்தில் கொண்டு யாத்திரிகர்களுக்கான 300 தற்காலிக வீடுகள் அமைப்பது தொடர்பாக விரிவாக ஆராயப்பட்டுள்ளது.

இதனை தொடர்ந்து, 300 வீடுகள் அமைக்கப்படவுள்ள இடத்தினை மன்னார் மறைமாவட்ட ஆயர் இம்மானுவேல் பெனாண்டோ ஆண்டகை தலைமையிலான குறித்த குழுவினர் நேரடியாக சென்று பார்வையிட்டனர்.

இறுதியாக இந்த வீட்டு திட்டம் அமைக்கும் பணிகளை ஆரம்பிக்கும் வகையில் எதிர்வரும் மாதம் 1ஆம் திகதி அடிக்கல் நாட்டி திட்டத்தை ஆரம்பிப்பதாகவும், அதற்கான துரித நடவடிக்கைகளை உரிய திணைக்களங்கள் முன்னெடுக்க வேண்டும் என கோரிக்கை விடுக்கப்பட்டுள்ளது.

மேலும், கலந்துரையாடலில் , மடு திருத்தள பரிபாலகர் அருட்தந்தை எமிலியானுஸ் பிள்ளை,கிறிஸ்தவ மத விவகார அமைச்சின் பணிப்பாளர் எம்.குனவர்தன, சுற்றுலாத்துறை அமைச்சின் செயலாளர், இந்திய துனைத்தூதரகத்தின் அபிவிருத்தி ஒருங்கிணைப்பாளர் டி.சி.மஞ்சுநாத், மடு பிரதேசச் செயலாளர் வி.ஜெயகரன், மன்னார் உதவி திட்டமிடல் பணிப்பாளர் எல்.ஜே.றொசான் குரூஸ் உள்ளிட்ட திணைக்கள அதிகாரிகள் என பலரும் கலந்து கொண்டுள்ளனர் [2018-05-26 16:56:00]


பணிக் குருக்களாக திருநிலைப்படுத்தல்

இன்று காலை மன்னார் புனித செபஸ்ரியார் பேராலயத்தில் பணிக் குருக்களாக திருநிலைப்படுத்தப்பட்டுள்ள, திருத்தொண்டர் தேவராஜன், திருத்தொண்டர் றஞ்சன் சேவியர், திருத்தொண்டர் சதாஸ்கர், திருத்தொண்டர் மேரி பஸ்ரியன் ஆகியோர்கள் இறைவன் முன்னிலையில், பேரருட்கலாநிதி.பிடலிஸ் லயனல் இம்மானுவேல் பெர்னாண்டோ ஆண்டகையினாள், அருட்பணியாளர்களாக திருநிலைப்படுத்தப்பட்டுள்ளார்கள், இவர்களின் பணி சிறக்க நல்வாழ்த்துக்கள்! [2018-05-26 16:44:08]


இளையோரோடு, இளையோருக்காக.....

2019ம் ஆண்டு தை மாதம் 22ம் திகதி தொடக்கம் 27ந் திகதி வரை கோஸ்ரா றிக்கா எல்லைப் பகுதியில் அமைந்துள்ள பனாமா நாட்டில் நடைபெறவுள்ள உலக கத்தோலிக்க இளைஞர் ஒன்று கூடலுக்கு ஆயத்தமாக இவ்வாண்டு இறுதியில் வத்திக்கானில் நடைபெறவுள்ள ஆயர் மாமன்றத்தின் ஒன்று கூடலில் கலந்துரையாடப்படவேண்டிய விடயங்களை பெற்றுக் கொள்வதற்காக உலகமெங்கும் உள்ள மறைமாவட்டங்களில் நடைபெற்று வரும் ஒன்று கூடலின் ஒரு நிலையாக இளைஞர் மத்தியில் விழிப்புணர்வை ஏற்படுத்த மன்னார் மறைமாவட்டத்தில் பணி புரியும் இளைஞர் பணிக்கான தூய டொன்பொஸ்கோவின் சலேசியன் சபை அருட்பணியாளர்கள் இன்று 13.05.2018 ஞாயிற்றுக்கிழமை நாள்முழுவதும் முருங்கனில் உள்ள தூய டொன் பொஸ்கோ தொழில் நுட்பக் கல்லூரியில் மன்னார் மறைமாவட்ட இளைஞர்களுக்கான நிகழ்ச்சித் திட்டங்களை இளையோரோடு, இளையோருக்காக என்னும் சிந்தனைக் கருத்தோடு முன்னெடுத்துச் சென்றனர்.

மறைமாவட்டதின் பல்வேறு பங்குகளிலுமிருந்து ஆயிரத்திற்கும் அதிகமான இளைஞர்களும், இளம் பெண்களும் இந் நிகழ்வுகளில் ஆர்வத்தோடு பங்கேற்றனர். இந் நிகழ்வில் ஏனைய சமயங்களைச் சேர்ந்த இளைஞர்களும், இளம் பெண்களும் கலந்து கொண்டது குறிப்பிடத் தக்கது. இன்றைய காலை நிகழ்வுகளை மன்னார் மறைமாவட்ட குருமுதல்வர் அருட்பணி.அ.விக்ரர் சோசை அடிகளார் ஆரம்பித்து வைத்தார்.

மாலையில் மன்னார் மறைமாவட்ட ஆயர் பேரருட்கலாநிதி ல.பி.இம்மானுவேல் பெனாண்டோ ஆண்டகை அவர்கள் இந் நிகழ்விற்கு வருகைதந்து சிறப்பித்தார். இந் நிகழ்வுக்கு வருகை தந்த ஆயரை தூய டொன்பொஸ்கோவின் சலேசியன் அருட்பணியாளர்களின் முருங்கன் தொழில் நுட்பக் கல்லூரி அதிபரும், குழுத் தலைவருமான அருட்பணி போல் அடிகளாரும், ஏனைய குருக்களும், அங்கு தொழிற்பயிற்சி பெறும் மாணவர்களும் வரவேற்க, மன்/ பரிகாரிகண்டல் மகாவித்தியாலய மாணவர்கள் தமிழ்ப் பண்பாட்டு இன்னிய வாத்திய மகிழ்வொலியோடு அழைத்துச் செல்ல நிகழ்விற்கு வருகை தந்திருந்த அனைத்து இளைஞர்களும், இளம் பெண்களும் கரவொலி எழுப்பி தங்கள் மகிழ்வையும் பாசத்தையும் தெரிவித்து ஆயர் தந்தையை வரவேற்றனர். பல்சுவை அம்சங்களைக் கொண்டிருந்த இந் நிகழ்வின் இறுதியில் ஆயர் மாமன்ற கலந்துரையாடலுக்கு உதவியாக அனுப்பப்பட்டிருந்த வினாக்கள் இளைஞர்களால் கலந்துரையாடப்பட்டு அதன் அடிப்படையில் எழுந்த கருத்துக்கள் கோவையாக்கப்பட்டு ஆயர் மாமன்றத்திற்கு அனுப்புவதற்காக மன்னார் ஆயரிடம் இளைஞர்கள் சார்பில் மன்னார் மறைமாவட்ட இளைஞர் ஒன்றியத் தலைவர் செல்வன் டன்ஸ்ரன் அவர்கள் கையளித்தார். இறுதியாக ஆயர் ஆசியுரை கூறி , நடைபெற்ற கலை பண்பாட்டுப் போட்டிகளில் வெற்றி பெற்றவர்களுக்கான பரிசினை வழங்கி , தனது ஆசீரையும் வழங்கினார். அருட்பணி போல் தலைமையிலான தூய டொன்பொஸ்கோவின் சலோசியன் சபை அருட்பணியாளர்கள் இந் நிகழ்வை மிகவும் அர்த்தமுள்ள, பயனுள்ள விதத்தில் ஒழுங்குபடுத்தி நடாத்தியது பாராட்டப்படவேண்டியதொன்று. [2018-05-26 16:41:03]


விடத்தல் தீவு பங்கில் புனரமைக்கப்பட்ட தூய மரியன்னை ஆலய அர்ச்சிப்பு விழா

விடத்தல் தீவு பங்குச் சமூகம் 02.05.2018 புதன் கிழமை தங்கள் பங்கில் புனரமைக்கப்பட்ட தூய மரியன்னை ஆலய அர்ச்சிப்பு விழாவோடு தங்கள் பங்கிற்கு முதன் முதலாக வருகை தந்த மன்னார் மறைமாவட்ட புதிய ஆயர் பேரருட் கலாநிதி இம்மானுவேல் பெனாண்டோ ஆண்டகை அவர்களுக்கும் மகத்தான வரவேற்பளித்தது. மன்னார் சங்குப்பிட்டி பிரதான வீதியில் அமைந்தள்ள பள்ளமடுச் சந்தியிலிருந்து உந்துரளி பவனியாக ஆயரை தூய யாக்கோப்பு ஆலயத்திற்கு முன்னுள்ள சந்தி வரை அழைத்து வந்தனர். அவ்வித்தில் அருட்பணியாளர்களும், துறவிகளும், பங்கு மக்களும் ஆயரை வரவேற்றனர். தொடர்ந்து மாணவர்களின் மேலைநாட்டு இசைக் கருவிகளின் மகிழ்வொலியோடு ஆயர் அவர்கள் ஆலயத்திற்கு அழைத்து வரப்பட்டார். பின்னர் ஆயர் அவர்களினால் புனரமைக்கப்பட்ட தூய மரியன்னை ஆலய அர்ச்சிப்பு ஆரம்ப வழிபாடுகள் முன்னெடுத்துச் செல்லப்பட்டன.

அதனைத் தொடர்ந்து ஆயர் தலைமையில் கூட்டுத் திருப்பலி ஒப்புக் கொடுக்கப்பட்டு திருச்சபையின் திருவழிபாட்டு திருமரபுப்படி பீடம், நற்கருணைப் பேழை என்பன அர்சிக்கப்பட்டன. முடிவில் நன்றி நிகழ்வு இடம் பெற்றது. இவ்விழாவிற்கு இப் பங்கைச் சேர்ந்த குருக்கள், துறவிகள்,பாராளுமன்ற உறுப்பினர்கள், அரச, அரச சார்பற்ற பணியாளர்கள் மற்றும், ஏனைய சமயத் தலைவர்கள், அரச அரச சார்பற்ற பணியாளர்கள், பொது மக்கள் எனப் பலரும் கலந்த கொண்டனர். இப் பங்குச் சமூகத்தோடு இணைந்து பங்குத் தந்தை அருட்பணி. செல்வநாதன் பீரிஸ் அவர்கள் மிக அழகாக இவ் ஆலயத்தை மீள் அமைப்புச் செய்துள்ளார். [2018-05-26 16:37:40]


மட்டக்களப்பு மறைமாவட்டத்தில் கத்தோலிக்க இளைஞர் ஒன்றியத்தின் 72வது தேசிய மாநாடு

இளைஞர் ஒன்றியத்தின் 72ஆவது தேசிய மாநாடு 21 ஏப்பிறல் 2018 அன்று முதல் தொடர்ச்சியாக 03 நாட்கள் தன்னாமுனை மியானி மண்டபத்தில் மட்டக்களப்பு மறைமாவட்ட கத்தோலிக்க இளைஞர் ஒன்றிய இயக்குனர் ஜெரிஸ்ரன் வின்சன் அடிகளார் தலைமையில் கடவுள் பேசுவதைக் கேளுங்கள் என்னும் தலைப்பில் நடைபெற்றது. இந்நிகழ்வில் பிரதம அதிதியாக யாழ்ப்பாணம் மறைமாவட்ட ஆயரும் இலங்கை தேசிய கத்தோலிக்க இளைஞர் ஒன்றியத்தின் தலைவருமாகியயாழ் ஆயர் மேதகு கலாநிதி யஸ்ரின் பேணாட் ஞானப்பிரகாசம் ஆண்டகை மட்டக்களப்பு மறைமாவட்ட ஆயர் மேதகு கலாநிதி ஜோசப் பொன்னையா ஆண்டகை தேசிய கத்தோலிக்க இளைஞர் ஒன்றியத்தின் இயக்குனர் மல்கம் பெரேரா அடிகளார் ஆகியோர் கலந்து கொண்டனர். இவர்களோடு கூட இலங்கையின் அனைத்து மறைமாவட்டங்களின் கத்தோலிக்க இளைஞர் ஒன்றியங்களின் இயக்குனர்களும் இளைஞர் ஒன்றிய உறுப்பினர்கள் பங்கு பற்றினர். 72வது கத்தோலிக்க இளைஞர் ஒன்றிய தேசிய மாநாட்டின் ஆரம்ப நிகழ்வின் போது யாழ்ப்பாணம் மறைமாவட்ட ஆயர் மேதகு கலாநிதி யஸ்ரீன் பேணாட் ஞானப்பிரகாசம் ஆண்டகைக்கும் மட்டக்களப்பு மறைமாவட்ட ஆயர் மேதகு கலாநிதி ஜோசப் பொன்னையா ஆண்டகைக்கும் 72ஆவது கத்தோலிக்க இளைஞர் ஒன்றிய தேசிய மாநாட்டின் நினைவுச் சின்னங்கள் வழங்கி கௌரவிக்கப்பட்டமை குறிப்பிடத்தக்கது. [2018-05-26 16:33:20]


பண்ணிசைப்போம் இறுவெட்டு வெளியீட்டு விழா

வங்காலை தூய ஆனாள் ஆலயப் பங்கைச் சேர்ந்த இளைப்பாறிய ஆசிரியர் திரு.பிரான்சிஸ் பீரிஸ் மற்றும் அவருடைய மகன் செல்வன் செரூபா பீரிஸ் ஆகியோர் இணைந்து உருவாக்கிய கத்தோலிக்கப் பாடல்கள் அடங்கிய பண்ணிசைப்போம் என்னும் இறுவெட்டு வெளியீட்டு விழா இன்று 22.04.2018 ஞாயிற்றுக் கிழமை மாலை வங்காலையில் நடைபெற்றது. இவ் விழாவின் முதன்மை விருந்தினராக மன்னார் மறைமாவட்ட ஆயர் பேரருட் கலாநிதி பி.ல.இம்மானுவேல் பெனாண்டோ ஆண்டகை அவர்கள் அழைக்கப்பட்டிருந்தார். இவ் வெளியிட்டு விழாவிற்கு ;, மன்னார் மறைமாவட்டக் குரு முதல்வர் அருட்பணி.அ.விக்ரர் சோசை அடிகளார், மற்றும் குருக்கள், துறவிகள், அரச-அரச சார்பற்ற பணிமையத் தலைவர்கள் பொது மக்கள் எனப் பலர் கலந்து கொண்டனர்.

நிகழ்ச்சிகளை அருட்பணி. பெய்லன் குரூஸ் அவர்கள் தொகுத்து வழங்க, தலைமையுரையினை அருட்பணி.பா.கி.நேசரெட்ணம் (தமிழ்நேசன்) அடிகளாரும், இறுவெட்டு மதிப்பீட்டுரையை செபமாலைத் தாசர் சபையைச் சேர்ந்த அருட்பணி. நிர்மலறாஜ் அடிகளாரும் வழங்கினார்கள்.

முதல் இறுவெட்டினை மன்னார் ஆயர் பேரருட் கலாநிதி பி.ல.இம்மானுவேல் பெனாண்டோ ஆண்டகை அவர்கள் வெளிட அதன் முதல் பிரதியை வங்காலை தூய ஆனாள் ஆலயப் பங்கைச் சேர்ந்த மூத்த அருட்பணியாளர்களுள் ஒருவரான அருட்பணி. மொறாயஸ் அ.ம.தி. அவர்கள் பெற்றுக் கொண்டாhர். இந் நிகழ்வில் சில பாரம்பரியக் கலை நிகழ்வுகளும் இடம் பெற்றன. [2018-04-24 21:02:07]


பக்க இலக்கங்களை அழுத்தி எல்லா செய்திகளையும் பார்வையிடவும்