வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்


சிறப்புப் பயிற்சிப் பாசறை ‎2018-01-15

வங்காலை தூய ஆனாள் பங்கில் வரும் ஞாயிறு 21.01.2018 ஞாயிற்றுக்கிழமை காலை மன்னார் மறைமாவட்ட ஆயர் பேரருட்கலாநிதி இம்மானுவேல் பெனாண்டோ ஆண்டகை அவர்களால் இளம் பராயத்தினருக்கு உறுதிப் பூசுதல் அருட்சாதனம் வழங்கப்படவிருக்கின்றது. அதற்கு ஆயத்தமாக இன்று (15.01.2018) செவ்வாய்க்கிழமை மாலை உறுதிப்பூசுதல் பெறவிருக்கும் மாணவர்களுக்கான சிறப்புப் பயிற்சிப் பாசறை நடாத்தப்பட்டது. அத்தோடு வரும் ஞாயிற்றுக்கிழமை 21.01.2018 அன்று மன்னார் மறைமாவட்டத்தின் புதிய ஆயர் பேரருட்கலாநிதி இம்மானுவேல் பெனாண்டோ ஆண்டகை அவர்களுக்கு வங்காலை தூய ஆனாள் பங்குச் சமூகத்தால் வரவேற்பும், கௌரவிப்பும் இடம் பெறவுள்ளது.

அடுத்து பல ஆண்டு காலமாக வங்காலை தூய ஆனாள் பங்கில் பணியாற்றிய யாழ் மாகாண திருக்குடும்ப அருட்சகோதரிகள் தமது பணியினை நிறுத்திவிட்டு சென்றுள்ள நிலையிலே, புதிதாக வங்காலைப் பங்கிற்கு லீயொன் தூய சூசையப்பர் சபை அருட்சகோதரிகள் வருகை தந்து பணியினை வழங்கவுள்ளனர். அவர்களது பணியும் அன்றைய புதிய ஆயரால் தொடங்கி வைக்கப்படுவதோடு அவர்களது இல்லமும் ஆயரால் ஆசீர்வதிக்கப்படும். [2018-01-16 22:29:59]


சிறிய குருமடத்தில் பொங்கல் பண்பாட்டுத் திருப்பலி

வருங்கால அருட்பணியாளர்களை உருவாக்கும் பணி மையமான, மன்னார் மடுமாதா சிறிய குருமடத்தில் இன்று காலை பொங்கல் விழா மிகவும் சிறப்பாக நடைபெற்றது. தாம் சார்ந்திருக்கும் கலாச்சாரப் பண்பாட்டுக் கோலங்களை வழிபாட்டுடிலும், நற்செய்தி அறிவிப்புப் பணியிலும் பயன்படுத்தலாம் என்ற இரண்டாம் வத்திக்கான் சங்கத்தின் பெருந்தன்மை அறிவுறுத்தலை மனதிற்கொண்டு, இன்று நன்றியின் பொங்கல் பண்பாட்டுத் திருப்பலி மன்னார் மடுமாதா சிறிய குருமடத்தில் நடைபெற்றது.

மன்னார் மறைமாவட்ட சமூகத் தொடர்பு அருட்பணி மைய இயக்குனர் அருட்பணி.பா.கிறிஸ்து நேசரெட்ணம் அடிகளர் பண்பாட்டுத் திருப்பலியை நிறைவேற்றினார். சிறிய குருமட அதிபர் அருட்பணி.அ.ஞானப்பிரகாசம் அடிகளார் அனைத்து நிகழ்வுகளையும் சீராக நெறிப்படுத்தி ஒழுங்கமைத்து மாணவர்களை பயிற்றுவித்திருந்தார் [2018-01-16 22:24:54]


தமிழ் மக்களின் உணர்வுகளைப் புரிந்து செயற்படுவேன் - மன்னார் மறைமாவட்ட புதிய ஆயர்

தமிழ் மக்களின் உணர்வுகளைப் புரிந்து செயற்படுவேன் - மன்னார் மறைமாவட்ட புதிய ஆயர் கலாநிதி இம்மானுவேல் பர்ணாண்டோ ஆண்டகை

மன்னார் மாவட்ட பொது அமைப்புக்களின் ஒன்றிய பிரதிநிதிகளுக்கும் மன்னார் மறைமாவட்ட புதிய ஆயர் கலாநிதி இம்மானுவேல் பர்ணாண்டோ ஆண்டகை இடையில் இடம்பெற்ற விசேட சந்திப்பின் போதே தமிழ் மக்களின் உணர்வுகளைப் புரிந்து செயற்படுவேன் என ஆயர் தெரிவித்தார். மேற்படி சந்திப்பு 5 ஜனவரி 2018 அன்று மன்னார் மாவட்ட பொது அமைப்புக்களின் ஒன்றிய தலைவர் வி.எஸ்.சிவகரன் தலைமையில் மன்னார் ஆயர் இல்லத்தில் இடம் பெற்றது. முதலில் மன்னார் ஆயர் பொன்னாடை போர்த்திக் கௌரவிக்கப்பட்டார். மன்னார் மாவட்ட பொது அமைப்புக்களின் ஒன்றிய தலைவர் வி.எஸ்.சிவகரன் கருத்து தெரிவிக்கும் போது மன்னார் மறைமாவட்டத்தின் ஓய்வு நிலை ஆயர் இராயப்பு ஜோசவ் ஆண்டகை முன்னெடுத்துச் சென்ற தமிழ் தேசிய பணிகளை முன்னெடுக்க வேண்டுமென வேண்டியதாக தெரிவித்தார். மன்னார் மறைமாவட்டத்தின் 3ஆவது புதிய ஆயர் மேதகு கலாநிதி இம்மானுவேல் பர்ணாண்டோ ஆண்டகை யாழ்ப்பாணத்தில் பிறந்தும் அவரின் சகோதரக்குரு ஜோ பெனாண்டோ அடிகளார் யாழ் மறைமாவட்டத்தில் பணியாற்றியிருந்தும் ‎(1962 - 1980) வடபகுதியைப் பொறுத்தவரை புதிய மன்னார் ஆயர் அதிகம் அறியப்படாத ஒருவராகவே இருந்துள்ளார். அவர் பற்றி பலருக்கும் ழுழுமையான விபரம் தெரியாத நிலையில் அவர் பற்றிய எதிர்பார்ப்பு மிக உயர்வாகவே உள்ளது. மன்னார் மறைமாவட்டத்தின் 3ஆவது ஆயர் மேதகு கலாநிதி இம்மானுவேல் பெனாண்டோ ஆண்டகை 45 ஆண்டுகள் கொழும்பு உயர் மறைமாவட்டத்தில் பணியாற்றி சிங்கள மொழியை மிகசிறப்பாக பேசவும் சிங்கள அரசுத் தலைவர்கள் பலரை நன்கு அறிந்தும் இருக்கின்ற நிலையில் தமது பொறுப்பை புதிய ஆயரும் தன்னினத்தின்பால் உவந்து முன்னைய ஆயர்களைப்போல் சிறப்பாக அருள்பணியாற்றுவார் என எதிர்பார்க்கலாம். மன்னார் மறைமாவட்ட புதிய ஆயர் கண்டி அம்பிற்றிய தேசிய குருத்துவக் கல்லூரியில் பேராசிரியராகவும் அதிபராகவும் பணியாற்றிய காலத்தில் இவரின் நெறிப்படுத்தலிலும் கல்வி அறிவிப்பிலும் உருவாக்கப்பட்ட பல குருக்கள் இன்று மன்னார் மறைமாவட்டத்தில் சீரோடும் சிறப்போடும் பணியாற்றுகின்றனர். இவர்களின் ஒத்துளைப்புடன் மன்னார் மறைமாவட்டத்தை இன்னும் வளர்ச்சிப்பாதையில் இட்டுச்செல்ல ஆயரையும் குருக்களையும் இறைமக்களையும் வாழ்த்துகின்றோம். வளர்க மன்னார் மறைமாவட்டம் வாழ்க புதிய ஆயர்.

செய்தி வெளியீடு : அருள்திரு ரூபன் மரியாம்பிள்ளை இயக்குநர் - பிசப் சவுந்தரம் மீடியா சென்ரர் மற்றும் ரீ.சி.என்.எல். ரீவி - ஆசிரியர் (ரீ.சி.என்.எல்.) தமிழ் கத்தோலிக்க செய்தி லங்கா இணையத்தளம் ஊடக வருகை விரிவுரையாளர் யாழ் பல்கலைக்கழகம் ஊடக வருகை விரிவுரையாளர் இலங்கை திறந்த பல்கலைக்கழகம் [2018-01-14 13:58:56]


புனித யோசே வாஸ் ஆண்டு நிறைவு

புனித யோசே வாஸ் ஆண்டு நிறைவு தின ஆரம்ப நிகழ்வுகள் சன.13.புனித யோசே வாஸ் ஆண்டு நிறைவு தின ஆரம்ப நிகழ்வுகள் 13.01.2018 இன்று சனிகிழமை காலை 10.30 மணிக்குஇ சில்லாலை புனித கதிரைமாதா ஆலயத்தில் ஆரம்பமானது. இன் நிகழ்வில் யாழ்ப்பாணம் மறைமாவட்ட குருமுதல்வர் அருட்திரு ஜோசெப்தாஸ் ஜெபரட்ணம் ஆசிஉரை வழங்கி புனித யோசே வாசின் வாழ்கை வரலாற்றை சித்தரிக்கும் கண்காட்சியை நாடவை வெட்டி ஆரம்பித்து வைத்தார். இந் நிகழ்வில் அதிகமான மறைமாவட்டக் குருக்களும்ää மறைமாவட்டத்தில் பணியாற்றும் அருட்சகோதரிகளும் நூற்றுக்கணக்கான இறைமக்களும் கலந்துகொண்டனர். [2018-01-14 13:57:16]


யாழ்ப்பாணம் புனித.பத்திரிசியார் கல்லூரியின் புதிய அதிபர்

யாழ்ப்பாணம் புனித.பத்திரிசியார் கல்லூரியின் புதிய அதிபர் சன.11. யாழ்ப்பாணம் புனித.பத்திரிசியார் கல்லூரியின் புதிய அதிபராக அருட்திரு. திருமகன், இன்றையதினம் அதிகாரபூர்வமாக அறிவிக்கப்பட்டுள்ளார். யாழ்ப்பாணம் மறைமாவட்ட ஆயரின் இவ்வதிகரபூர்வமான அறிவிப்பை யாழ்ப்பாணம் மறைமாவட்ட குருமுதல்வர் அருட்திரு.ஜெபரட்ணம், புனித பத்திரிசியார் கல்லூரியில் விசேடமாக நடைபெற்ற ஆசிரியர்களுக்கான ஒன்றுகூடலில் அறிவித்தார். அருட்திரு. திருமகன் 2004 இல் மறைமாவட்ட குருவாக திருநிலைப்படுத்தப்பட்டு நீண்ட காலமாக ஆசிரியர் பணியில் தன்னை இணைத்துக்கொண்டவர். இவர் தனது கற்பித்தல் பணிக்கான மேற்படிப்பை லண்டன் நாட்டில் சிறப்பான முறையில் மேற்கொண்டு நிறைவு செய்தமையும் இங்கு குறிப்பிடத்தக்கது. [2018-01-11 22:52:26]


தமிழ்த் திருப்பலிப் புத்தகத்தில் திருத்தங்கள்

உரோமன் திருவழிபாட்டுத் தமிழ்த் திருப்பலிப் புத்தகத்தில் மீளவும் சில திருத்தங்கள் மேற்கொள்ளப் பட்டுள்ளன.இத் திருத்தங்களோடு புதிய திருப்பலிப் புத்தகம் இம்மாதம் இறுதிப் பகுதியில் வெளியிடப்பட்டு திருப்பலியில் பயன்படுத்தப்படும். கத்தோலிக்க ஆயர் பேரவையின் முயற்சியினால் புதிய திருப்பலிப் புத்தகம் திருத்தியமைக்கப்பட்டுள்ளது. இதற்கு உரோமை வத்திக்கான் திரு அவையின் திருவழிபாட்டுத் திருப் போராயத்தினதும், மற்றும் திருவழிபாட்டு, அருளடையாளங்களின் ஒழுங்குமறைப் பேராயமும் ஒப்புதலும், அனுமதியும் வழங்கியுள்ளன. இத் திருப்பலிப் புத்தகத்தில் மாற்றங்களுக்குள்ளான சில பகுதிகளை இங்கே குறிப்பிட்டுக் காட்டப்படுகின்றன.

அருட்பணியாளர்: தந்தை, மகன், தூய ஆவியாரின் பெயராலே. மக்கள்: ஆமென். அருட்பணியாளர்: நம் ஆண்டவராகிய இயேசு கிறிஸ்துவின் அருளும் கடவுளின் அன்பும் தூய ஆவியாரின் நட்புறவும் உங்கள் அனைவரோடும் இருப்பதாக. மக்கள்: உம் ஆன்மாவோடும் இருப்பதாக. (முன்னைய திருப்பலிப் புத்தகத்தில் உம்மோடும் இருப்பதாக என்று உள்ளது) அருட்பணியாளர்: ஆண்டவர் உங்களோடு இருப்பாரக. மக்கள்: உம் ஆன்மாவோடும் இருப்பாராக. (முன்னைய திருப்பலிப் புத்தகத்தில் உம்மோடும் இருப்பதாக என்று உள்ளது)

உன்னதங்களிலே உன்னதங்களிலே கடவுளுக்கு மாட்சி உண்டாகுக. உலகினிலே நல் மனத்தோருக்கு அமைதி ஆகுக. உம்மைப் புகழ்கின்றோம். உம்மை வாழ்த்துகின்றோம். உம்மை ஆராதிக்கின்றோம். உம்மை மாட்சிப்படுத்துகின்றோம். உமது மேலான மாட்சியின் பொருட்டு உமக்கு நன்றி கூறுகின்றோம். ஆண்டவராகிய இறைவா, வானுலக அரசரே,எல்லாம் வல்ல தந்தையாகிய இறைவா ஒரே மகனாய் உதித்த ஆண்டவரே, இயேசு கிறிஸ்துவே, ஆண்டவராகிய இறைவா. இறைவனின் செம்மறியே, தந்தையின் திருமகனே, உலகின் பாவங்களை போக்குபவரே, எங்கள் மேல் இரக்கமாயிரும். உலகின் பாவங்களை போக்குபவரே,எங்கள் மன்றாட்டை ஏற்றருளும்.தந்தையின் வலப்பக்கம் வீற்றிருப்பவரே, எங்கள் மேல் இரக்கமாயிரும். ஏனெனில் இயேசுகிறிஸ்துவே, நீர் ஒருவரே தூயவர். நீர் ஒருவரே ஆண்டவர். நீர் ஒருவரே உன்னதர். தூய ஆவியாரோடு, தந்தையாகிய இறைவனின்மாட்சியில் இருப்பவர் நீரே. ஆமென்.

விசுவாச அறிக்கை. ஒரே கடவுளை நம்புகின்றேன். விண்ணகமும் மண்ணகமும், காண்பவை காணாதவை யாவும் படைத்த எல்லாம் வல்ல தந்தை அவரே. கடவுளின் ஒரே மகனாய் உதித்த ஆண்டவர் இயேசு கிறிஸ்துவை நம்புகின்றேன். இவர் காலங்களுக்கெல்லாம் முன்பே தந்தையிடமிருந்து பிறந்தார். கடவுளினின்று கடவுளாக, ஒளியினின்று ஒளியாக, உண்மைக் கடவுளினின்று உண்மைக்கடவுளாக உதித்தவர். இவர் உதித்தவர், உண்டாக்கப்பட்டவர் அல்லர். தந்தையோடு ஒரே பொருளானவர். இவர் வழியாகவே யாவும் படைக்கப்பட்டன. மனிதர் நமக்காகவும் நம் மீட்புக்காகவும் விண்ணகம் இருந்து இறங்கினார். தூய ஆவியால் கன்னி மரியாவிடம் உடல் எடுத்து மனிதர் ஆனார். மேலும் நமக்காக பொந்தியு பிலாத்துவின் அதிகாரத்தில் சிலுவையில் அறையப்பட்டு, பாடுபட்டு இறந்து, அடக்கம் செய்யப்பட்டார். மறைநூல்களின்படி மூன்றாம் நாள் உயிர்த்தெழுந்தார். விண்ணகத்துக்கு எழுந்தருளி, எல்லாம் வல்ல தந்தையின் வலப்பக்கம் வீற்றிருக்கின்றார். வாழ்வோரையும் இறந்தோரையும் தீர்ப்பிட மாட்சியுடன் மீண்டும் வர இருக்கின்றார். அவரது ஆட்சிக்கு முடிவிராது. தந்தையிடமிருந்தும் மகனிடமிருந்தும் புறப்படும் ஆண்டவரும் உயிர் அளிப்பவருமான தூய ஆவியாரை நம்புகின்றேன். இவர் தந்தையோடும் மகனோடும் ஒன்றாக ஆராதனையும் மாட்சியும் பெறுகின்றார். இறைவாக்கினர்கள் வாயிலாக பேசியவர் இவரே. ஒரே, புனித, கத்தோலிக்க, திருத்தூதர் வழிவரும் திரு அவையை நம்புகின்றேன். பாவ மன்னிப்புக்கான ஒரே திருமுழுக்கை ஏற்றுக்கொள்கின்றேன். இறந்தோரின் உயிர்ப்பையும் வரவிருக்கும் மறு உலக வாழ்வையும் எதிர்பார்க்கின்றேன். ஆமென்.

அருட்பணியாளர்: ஆண்டவர் உங்களோடு இருப்பாராக. மக்கள்: உம் ஆன்மாவோடும் இருப்பாராக. (முன்னைய திருப்பலிப் புத்தகத்தில் உம்மோடும் இருப்பதாக என்று உள்ளது) அருட்பணியாளர்: இதயங்களை மேலே எழுப்புங்கள். மக்கள்: ஆண்டவரிடம் எழுப்பியுள்ளோம். அருட்பணியாளர்: நம் இறைவனாகிய ஆண்டவருக்கு நன்றி கூறுவோம். மக்கள்:அது தகுதியும் நீதியும் ஆனதே. [2018-01-11 22:46:38]


கச்சத்தீவு திருவிழா பெப்ரவரி மாதம் 23 மற்றும் 24ம் திகதிகளில்

வரலாற்று சிறப்புமிக்க கச்சத்தீவு புனித அந்தோனியார் ஆலய வருடாந்த திருவிழா எதிர்வரும் பெப்ரவரி மாதம் 23, 24 ஆம் திகதிகளில் நடைபெறவுள்ள நிலையில், இம்முறை இலங்கையில் இருந்து பத்தாயிரம் பக்தர்கள் கலந்து கொள்வர்கள் என தெரிவித்த யாழ் மாவட்ட அரச அதிபர் நா.வேதநாயகன் திருவிழாவுக்கான அனைத்து ஏற்பாடுகளும் நடைபெற்று வருவதாகவும் தெரிவித்தார்.

கச்சத்தீவு திருவிழாவுக்கான முன்னாயத்த கலந்துரையாடல் இன்று (09) யாழ் மாவட்ட அரச அதிபர் தலமையில் அரச அதிபர் அலுவலகத்தில் நடைபெற்றது. அது தொடர்பில் ஊடகங்களுக்கு கருத்து தெரிவிக்கும் போதே அவர் இவ்வாறு தெரிவித்தார்.

கச்சத்தீவில் இம்முறை இரு நாட்டில் இருந்தும் அதிகளவான பக்தர்கள் கலந்து கொள்வார்கள் என எதிர்பார்க்கப்படுகிறது. அதாவது இந்த முறை இலங்கையில் இருந்து 10 ஆயிரம் பக்தர்கள் கலந்துகொள்வார்கள் என எதிர்பார்க்கப்படுகிறது. அதற்கு ஏற்ற வகையில் விசேட ஏற்பாடுகள் மேற்கொள்ளப்பட்டு வருகிறது. படகுச்சேவைக்கான ஒருவழி கட்டணமாக 300 ரூபாய் அறவிடப்படவுள்ளது. நெடுந்தீவில் இருந்து கச்சதீவுக்கு ஒரு வழி கட்டணமாக 225 ரூபாய் அறவிடப்படவுள்ளது. அத்துடன் சேவையில் ஈடுபடும் படகுகள் பரிசோதனைக்கு உட்படுத்தப்பட்ட பின்னரே சேவைக்கு அனுமதிக்கப்படவுள்ளது. பயணிகள்பாதுகாப்பு அங்கி அணிய வேண்டும் என்பது கட்டாயமாக்கப்பட்டுள்ளது. அத்துடன் இம்முறை பொலிஸ் பாதுகாப்பு வசதிகள் பலப்படுத்தப்பட்டுள்ளன 200 பொலிஸார் சேவையல் ஈடுபடவுள்ளனர். பயணிகள் படகு சேவை இடம்பெறும் போது கடற்படை ரோந்து நடவடிக்கைகள் நடைபெறும் என்றார். (யாழ் நிருபர் சுமித்தி)

எதிர்வரும் பெப்ரவரி மாதம் 23 ஆம் திகதி யாழ்ப்பாணத்தில் இருந்து குறிகட்டுவன் வரையான பேருந்து சேவை அதிகாலை 4 மணியில் இருந்து நண்பகல் 1 மணிவரை நடைபெறும். அதே போன்று குறிகட்டுவனில் இருந்து கச்சதீவு வரை காலை 5.00 மணிக்கு ஆரம்பித்து 2 மணி வரை நடைபெறும். படகுச்சேவைக்கான ஒருவழி கட்டணமாக 300 ரூபாய் அறவிடப்படவுள்ளது. நெடுந்தீவில் இருந்து கச்சதீவுக்கு ஒரு வழி கட்டணமாக 225 ரூபாய் அறவிடப்படவுள்ளது. அத்துடன் சேவையில் ஈடுபடும் படகுகள் பரிசோதனைக்கு உட்படுத்தப்பட்ட பின்னரே சேவைக்கு அனுமதிக்கப்படவுள்ளது. பயணிகள்பாதுகாப்பு அங்கி அணிய வேண்டும் என்பது கட்டாயமாக்கப்பட்டுள்ளது. அத்துடன் இம்முறை பொலிஸ் பாதுகாப்பு வசதிகள் பலப்படுத்தப்பட்டுள்ளன 200 பொலிஸார் சேவையல் ஈடுபடவுள்ளனர். பயணிகள் படகு சேவை இடம்பெறும் போது கடற்படை ரோந்து நடவடிக்கைகள் நடைபெறும் என்றார். (யாழ் நிருபர் சுமித்தி) [2018-01-11 22:39:13]


புனித. யோசே வாஸ் ஆண்டு நிறைவு நிகழ்வு – 13.01.2018

சன.06. யாழ்ப்பாணம் மறைமாவட்டத்தில் 2017 தை மாதம் தொடக்கம் கடைபிடிக்கப்பட்டு வந்த புனித.யோசே வாஸ் அண்டை நிறைவு செய்யும் இறுதிநாள் நிகழ்வுகள் 13.01.2018 சனிக்கிழமை கலை 10 மணி தொடக்கம் மாலை 6 மணிவரை புனித. யோசே வாஸ் பணியாற்றிய சில்லாலை ஊரில் நடைபெற உள்ளது. இந்நிகழ்வுகள் பற்றிய விசேட அறிவுறுத்தல்கள் யாழ்ப்பாணம் மறைமாவட்ட குருமுதல்வர் அருட்திரு. யோசப்தாஸ்ஜெபரட்ணம் அடிகளாரால் வழங்கப்பட்டுள்ளது. [2018-01-11 22:35:21]


குருமட மாணவர்களின் ஒன்று கூடல்

கண்டி அம்பிட்டிய தேசிய குருமடம், யாழ்ப்பாணம் தூய பிரான்சிஸ் சவேரியார் பெரிய குருமடம், கழுத்துறை ஆயத்த மெய்யியல் குருமடம் அகியவற்றில் தங்களது குருத்துவக் கல்வியை மேற்கொள்ளும் மன்னார் மறைமாவட்ட பெரிய குருமட மாணவர்களின் கிறிஸ்து பிறப்புப் பெருவிழா ஒன்று கூடல் இன்று ( 26.12.2017) செவ்வாய்க்கிழமை காலை மன்னார் ஆயர் இல்லத்தில் நடைபெற்றது.

மன்னார் மறைமாவட்டத்திற்கான திருத்தூதரக நிர்வாகி பேரருட்கலாநிதி ஜோசவ் கிங்சிலி சுவாம்பிள்ளை, மன்னார் மறைமாவட்டக் குருமுதல்வர் அருட்பணி. அ.விக்ரர் சோசை, மறைமாவட்ட நிதியாளர் அருட்பணி.அ.இராஜநாயகம் ஆகியோரின் நெறிப்படுத்துதலோடு இவ் விழா ஒழுங்கு செய்யப்பட்டிருந்தது.

இந் நிகழ்வில் மன்னார் மறைமாவட்டத்தைச் சேர்ந்த 22 பெரிய குருமட மாணவர்கள் கலந்து கொண்டனர். இவர்களோடு பல அருட்பணியாளர்களும் கலந்து சிறப்பித்தனர் [2017-12-27 00:48:41]


யாழ் ஆயர் மேதகு கலாநிதி யஸ்ரீன் பேணாட் ஞானப்பிரகாசம் ஆண்டகையின் கிறிஸ்மஸ் வாழ்த்துச் செய்தி 2017

கிறிஸ்து பிறப்பு பெருவிழா இன்று கிறிஸ்தவ உலகு மட்டும் கொண்டாடும் ஒரு விழாவாக இல்லாமல் உலக மக்கள் அனைவரும் கொண்டாடும் ஒரு உலகப் பெருவிழாவாக மாறிவிட்டது. இந்த உலகப் பெருவிழாவைக் கொண்டாடும் அனைவருக்கும் ஆண்டவர் இயேசுவின் பிறப்பு விழா வாழ்த்துக்களை தெரிவிக்கிறோம். உன்னதங்களிலே கடவுளுக்கு மகிமை உண்டாகுக. பூவுலகில் நன்மனது கொண்டோருக்கு அமைதி ஆகுக என வாழ்த்துகிறோம். கிறீஸ்து பிறப்பு பெருவிழா ஒரு மகிழ்ச்சியின் விழா. ஒரு அன்புறவின் உறவின் விழா. ஒரு ஒன்று கூடலின் விழா. குடும்பமாக - உறவுகளாக - நண்பர்களாக - பங்கு சமூகமாக இணைந்து குதூகலிக்கும் ஒரு விழா. கன்னி கருத்தாங்கி ஒரு மகனைப் பெறுவார். அவருக்கு இம்மானுவேல் என்று பெயரிடுவர். இம்மானுவேல் என்றால் கடவுள் நம்போடு என்று பொருள்படும் என மத்தேயு நற்செய்தியாளர் (மத்தேயு 1:23) இவ்விழா பற்றி விளக்கம் தருகிறார்.

நமது இந்த கிறிஸ்து பிறப்பு பெருவிழாக் கொண்டாட்டங்;கள் அனைத்திலும் கடவுள் நம்மோடு இருக்கிறார் என்ற உண்மையை தெளிவாக உணரவேண்டும். கடவுள் நம்மோடு இருக்கிறார் என்ற உண்மையை உறுதிப்படுத்த வேண்டும். கடவுள் நம்மோடு இருக்கிறார் என்ற உண்மையை இவ்விழாவைக் கொண்டாடும் அனைவருக்கும் அறிவிக்க வேண்டும். இந்த உண்மைக்கு ஏற்ற விதமாக இவ்விழாவை அமைத்துக் கொள்ள வேண்டும். ஆடைகள் அறுசுவை உணவு பட்டாஸ் கோலங்கள் கொண்டாட்டங்கள் என மகிழ்ந்திருக்கும் போது அயல் வீட்டில் இவற்றைப் பெற முடியாதவர்கள் இருக்கிறார்கள் என்பதை மறக்காது பகிரக்கூடியவற்றை அவர்களோடு பகிர்ந்து மகிழ்ச்சியை இரட்டிப்பாக்குவோம.; கடவுள் நம்போடு இருக்கிறார் என்ற உண்மையை அவர்களும் உணரச்செய்வோம.;

போர் முடிந்து பல ஆண்டுகளாகியும்; மக்களின் இயல்பு வாழ்வை மேம்படுத்துவதில் நல்லெண்ண அரசு வேகமாக செயற்படவில்லை. பல விடயங்களை இன்னும்; முழுமையாக ஆற்றவில்லை என திரும்ப திரும்ப குறை கூறவேண்டியே உள்ளது. இவற்றில் காணாமற்போனோர் விடயம் - அரசியற் கைதிகள் விடயம் - சொந்த நிலங்கள் விடுவிப்பு விடயம் என்பன முன்னுரிமைப்படுத்தப்பட வேண்டியன. காணாமற் போனோர் விடயத்திற்கு உடன் முடிவு காணுங்கள். இறந்தவர்களை உயிர்ப்பிக்க முடியாது அதே வேளை உயிரோடு இருப்பவர்களை காலம் காலமாக மறைத்தே வைத்திருக்க முடியாது. மனித உயிர் சம்பந்தமான இப்பிரச்சனைக்கு இனியும் காலம் தாழ்;த்தாது உடன் முடிவு காணுங்கள். இறந்தவர்களுக்கு சமயக் கடமைகளை நிறைவேற்றி உறவுகள் தம் மனசுகளை ஆறுதற்படுத்தவும் இறந்தவர்களுக்கான இறப்பு சான்றிதழைப் பெறவும் இழப்பீடு பெறவும் வழி செய்யுங்கள்.

அரசியற் கைதிகளை உடன் விடுதலை செய்யுங்கள். அவர்கள் வாழ்வை சிறைக்கம்பிகளின் பின்னால் இனியும் வீணடிக்காதீர்கள். ஏற்கனவே மனதளவில் பாதிக்கப்பட்ட அவர்கள் முழுமையான விடுதலை பெற விரைவாக செயற்படுங்கள் என தமிழ் மக்கள் பெயரால் வேண்டுகிறோம். சொந்த நிலங்களில் மக்கள் சென்று குடியமர்ந்தால்தான் யுத்தம் முடிந்து விட்டதென மக்கள் மன அமைதி கொள்வர். மக்கள் குடியிருப்புக்களில் இருந்து இராணுவத்தை முழுமையாக அகற்றுங்கள். அவர்களுக்கு அரச காணிகள் நிறையவே உண்டு. போராட்டம் முடிந்தமையால் அவர்கள் தள்ளி இருப்பதே சிறந்தது. இவற்றை செயற்படுத்த காலம் கடத்துவதால் எதுவும் நடைபெறப் போவதில்லை. நல்லெண்ண அரசு இந்த அடிப்படை வசதிகளை நேரகாலத்தோடு செய்து தமது நல்லெண்ணத்தை வெளிப்படுத்தி இந்த நாட்டில் இனி வருங்காலத்தில் தமிழ் சிங்களம் என்ற இரு இனங்களும் இணைந்தே வாழவேண்டும் என்ற சமாதான சமிக்கையைக் காட்டி இருக்க வேண்டும். இன்று என்றுமில்லாத அரசியல் யாப்பு ஒன்றை உருவாக்க நிலமைகள் சாதகமாக இருப்பதால் தமிழ் மக்களின் நீண்டகால பிரச்சினைக்கு அரசியல் யாப்பில் உறுதிப்படுத்தப்பட்ட தீர்வினைக்காண அரசியலில் சம்மந்தப்பட்ட அனைவரும் அனைத்து வேறுபாடுகளையும் மறந்து உழைக்க வேண்டுமென அன்பு அழைப்பு விடுக்கிறோம். அனைவருக்கும் கிறிஸ்து பிறப்பின் இறையாசீர்மிக்க வாழ்த்துக்களை தெரிவிக்கிறோம். மேதகு கலாநிதி யஸ்ரீன் பேணாட் ஞானப்பிரகாசம் யாழ் ஆயர்

செய்தி வெளியீடு : அருள்திரு ரூபன் மரியாம்பிள்ளை இயக்குநர் - பிசப் சவுந்தரம் மீடியா சென்ரர் மற்றும் ரீ.சி.என்.எல். ரீவி - ஆசிரியர் (ரீ.சி.என்.எல்.) தமிழ் கத்தோலிக்க செய்தி லங்கா இணையத்தளம் ஊடக வருகை விரிவுரையாளர் யாழ் பல்கலைக்கழகம் ஊடக வருகை விரிவுரையாளர் இலங்கை திறந்த பல்கலைக்கழகம் [2017-12-25 12:29:42]


பக்க இலக்கங்களை அழுத்தி எல்லா செய்திகளையும் பார்வையிடவும்