வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்


யர் இராயப்பு ஜோசப் ஆண்டகையின் பூதவுடல் மன்னார் தூய செபஸ்தியார் பேராலயத்தில் மக்களின் அஞ்சலிக்காக

மறைந்த மன்னார் மறைமாவட்ட ஓய்வுநிலை ஆயர் இராயப்பு ஜோசப் ஆண்டகையின் பூதவுடல் மன்னார் தூய செபஸ்தியார் பேராலயத்தில் மக்களின் அஞ்சலிக்காக வைக்கப்பட்டுள்ளது. ஆயரின் பூதவுடல் இன்று மாலை மூன்று மணியளவில் ஊர்வலமாக செபஸ்தியார் போராலயத்திற்குக் கொண்டு வரப்பட்டிருந்தது.

ஆயர் இல்லத்தில் இருந்து மன்னார் பொது வைத்தியசாலைச் சந்தியூடாக மன்னார் பொது விளையாட்டு மைதானச் சந்தியை குறித்த ஊர்வலம் சென்றடைந்தது. அங்கிருந்து பெரிய கடை வழியாக மன்னார் நகரப் பகுதிக்கு வந்தடைந்ததுடன் அங்கிருந்து, மன்னார் நகரப்பகுதியில் உள்ள வீதி சுற்றுவட்டம் வழியாகச் சென்று மன்னார் புனித செபஸ்தியார் பேராலய வீதியூடாக டெலிகொம் சந்தியைச் சென்றடைந்தது. அங்கிருந்து ஆயரின் திருவுடல் தாங்கிய ஊர்தி செபஸ்தியார் பேராலயத்தை சென்றடைந்தது.

குறித்த ஊர்வலத்தில் அருட்தந்தையர்கள், பாடசாலை மாணவர்கள், மக்கள் என பல்லாயிரக் கணக்கானோர் கலந்து கொண்டிருந்தனர்.

இதேவேளை, பேராலயத்தில் மக்களின் அஞ்சலிக்காக பூதவுடல் வைக்கப்பட்டுள்ள நிலையில் நாளை மதியம் இரண்டு மணி வரை அஞ்சலிக்கு வைக்கப்பட்டு மாலை மூன்று மணியளவில் இலங்கையில் உள்ள மறைமாவட்ட ஆயர்களின் இரங்கல் திருப்பலியுடன் ஆலயத்தில் நல்லடக்கம் செய்யப்படவுள்ளது.

இதனிடையே மன்னார் மாவட்டத்தில் உள்ள அனைத்துப் பகுதிகளிலும் கறுப்பு, வெள்ளைக் கொடிகள் பறக்கவிடப்பட்டுள்ளன. [2021-04-05 00:03:12]


மன்னாரில் இராயப்பு ஜோசப் ஆண்டகைக்கு பெருமளவு மக்கள் அஞ்சலி!

மறைந்த மன்னார் மறைமாவட்ட ஓய்வு நிலை ஆயர் கலாநிதி இராயப்பு ஜோசப் ஆண்டகையின் பூதவுடல் மக்களின் அஞ்சலிக்காக மன்னார் ஆயர் இல்லத்தில் உள்ள சிற்றாலயத்தில் வைக்கப்பட்டுள்ளது. ஆண்டகையின் பூதவுடல், இன்று காலை 10 மணியளவில் யாழ்ப்பாணத்தில் இருந்து பேரணியாக மன்னாருக்கு எடுத்து செல்லப்பட்டது.

இதன்போது, மன்னார் மாவட்டம் முழுவதிலும் உள்ள அனைத்து மத மக்களும் இணைந்து வீதிக்கு இரு மருங்கிலும் கருப்புக் கொடிகளை நாட்டி பேரணியில் கலந்துகொண்டனர். தேவன் பிட்டிப் பகுதிகளில் இருந்து மக்கள் மலர் தூவி மோட்டார் வண்டிகளிலும் வாகனங்களிலும் முச்சக்கர வண்டிகளிலும் மன்னார் ஆயர் இல்லம் வரையில் ஊர்வலமாக ஆயரின் பூதவுடல் எடுத்துவரப்பட்டது.

மாலை 2.45 மணியளவில் மன்னார் ஆயர் இல்லத்திற்கு கொண்டு வரப்பட்ட பூதவுடல் மக்களினுடைய அஞ்சலிக்காக மன்னார் ஆயர் இல்லத்தில் உள்ள சிற்றாலயத்தில் வைக்கப்பட்டுள்ளது.

ஆயரின் உடலுக்கு அரசியல் பிரமுகர்கள், அரச அதிகாரிகள், அருட்தந்தையர்கள், அருட்சகோதரிகள் உட்பட மன்னார் மாவட்டத்தில் உள்ள பொது மக்களும் இணைந்து அஞ்சலி செலுத்தி வருகின்றனர்.
இதேவேளை, எதிர்வரும் ஞாயிற்றுக்கிழமை மாலை மூன்று மணியளவில் பவனியாக அவரது பூதவுடல் ஆயர் இல்லத்தில் இருந்து மன்னார் புனித செபஸ்தியார் பேராலயத்திற்கு எடுத்துச் செல்லப்படும்.

அங்கு ஞாயிற்றுக்கிழமை மாலை தொடக்கம் திங்கட்கிழமை மதியம் இரண்டு மணிவரை பேராலயத்தில் அஞ்சலிக்காக வைக்கப்படும். அதனைத் தொடர்ந்து திங்கட்கிழமை மாலை மூன்று மணியளவில் பேராலயத்தில் இறுதித் திருப்பலி ஒப்புக்கொடுக்கப்படும்.
இலங்கையின் அனைத்து ஆயர்களும் இணைந்து கூட்டுத் திருப்பலியை ஒப்புக் கொடுப்பார்கள். அதனைத் தொடர்ந்து பூதலுடல் குறித்த பேராலயத்தில் அடக்கம் செய்யப்படவுள்ளமை குறிப்பிடத்தக்கது. [2021-04-03 12:45:21]


நீ.மரியசேவியர் அடிகளாரின் புகழுடல் மக்கள் அஞ்சலிக்காக கலைத்தூது கலையகத்தில்…..

கடந்த 55 ஆண்டுகளுக்கு மேலாக கலைக்காக தன் வாழ்நாளை அர்ப்பணித்து நேற்றைய தினம் இவ்வுலக வாழ்வில் இருந்து விடைபெற்ற திருமறைக் கலாமன்ற இயக்குநர் நீ.மரியசேவியர் அடிகளாரின் புகழுடல் இன்று காலை முதல் இல.286,பிரதான வீதி,யாழ்ப்பாணத்தில் அமைந்துள்ள மன்றத்தின் கலைத்தூது கலையகத்தில் அஞ்சலிக்காக வைக்கப்பட்டுள்ளது.பெருமளமான மக்கள் தொடர்ச்சியாக தமது இறுதி அஞ்சலியை தந்தைக்கு செலுத்திக்கொண்டிருக்கின்றார்கள்.

தந்தை அவர்களின் இறுதி அஞ்சலி நிகழ்வுகள் எதிர்வரும் 06.04.2021 செவ்வாய்க்கிழமை காலை 9.30 மணிக்கு யாழ்.தூய மரியன்னை பேராலயத்தில் யாழ் மறைமாவட்ட ஆயர் மேதகு யஸ்ரின் பேனாட் ஞானப்பிரகாசம் ஆண்டகை தலைமையில் இடம்பெறும். [2021-04-03 12:34:41]


இறைவன் பாதம் சென்றார் எம் இனத்தின் இறுதி நம்பிக்கை.

அன்பான உறவுகளே ! மன்னார் மறை மாவட்டத்தின் ஓய்வு நிலை ஆயர் மேதகு இராயப்பு யோசேப்பு ஆண்டகை அவர்கள் 01 - 04 - 2021 இன்று இறைவனடி சேர்ந்துள்ளார் என்பதனை மிகவும் மனவருத்தத்துடன் பகிர்ந்து கொள்கிறோம். இறைவன் பாதம் சென்றார் எம் இனத்தின் இறுதி நம்பிக்கை. இப்படிப்பட்ட இறைவாக்கினர் ஒருவரின் காலத்தில் வாழக்கிடைத்தமைக்காக இறைவனுக்கு நன்றி.

ஆண்டவரே எம் ஆயனின் ஆன்மாவை உம் பாதம் ஏற்றுக்கொள்ளும். ஆன்மீகத் தாகத்துடன் மட்டுமல்லாது தழிழ் மக்களின் உரிமைக்காக அயராது குரல் கொடுத்த மேதகு ஆயர்ப் பெருந்தகையின் ஆன்மா இறை சந்நிதியில் நித்தியத்திற்கும் நிறைவான அமைதியுடன் இறைப்பாற யேர்மன் தழிழ் கத்தோலிக்க ஆன்மீக பணியகம் சார்பாக எல்லாம் வல்ல இறைவனை வேண்டி நிற்கின்றோம். [2021-04-01 12:01:57]


அருட்பணியாளர் ஜோ.பெ.தேவறாஜா அடிகளாரின் வித்துடல் இன்று

அமரத்துவமடைந்த மன்னார் மறைமாவட்டத்தின் மூத்த அருட்பணியாளரும், யேர்மன் தமிழ் ஆன்மீகப்பணியகம் ஆரம்பிக்கப்படும் முன்னைய காலப்பகுதிகளில் யேர்மனியில் சில நகரங்களில் தமிழ் திருப்பலிகளை நடாத்தி புலம்பெயர் தமிழ் மக்களின் ஆன்மீக தாகத்தை அன்றைய காலப்பகுதியில் தீர்த்தவருமான அருட்தந்தை
சிறந்ததொரு சமூகநலத் தொண்டருமாகிய அருட்பணியாளர் ஜோ.பெ.தேவறாஜா அடிகளாரின் வித்துடல் 12.08.2020 காலை மன்னார் ஆயர் இல்லத்திலிருந்து பவனியாக மன்னார் புனித செபஸ்தியார் பேராலயத்திற்கு எடுத்துவரப்பட்டது.

அமரத்துவமடைந்த மன்னார் மறைமாவட்டத்தின் மூத்த அருட்பணியாளரும் சிறந்ததொரு சமூகநலத் தொண்டருமாகிய அருட்பணியாளர் ஜோ.பெ.தேவறாஜா அடிகளாரின் வித்துடல் 12.08.2020 காலை மன்னார் ஆயர் இல்லத்திலிருந்து பவனியாக மன்னார் புனித செபஸ்தியார் பேராலயத்திற்கு எடுத்துவரப்பட்டது.

காலை மன்னார் ஆயர் இல்லச் சிற்றாலயத்தில் மன்னார் மறைமாவட்டக் குருமுதல்வர் அருட்பணி .அ.விக்ரர் சோசை தலைமையில் நடைபெற்ற கூட்டுத் திருப்பலியைத் தொடர்ந்து அருட்பணியாளர் ஜோ.பெ.தேவறாஜா அடிகளாரின் வித்துடல் தாங்கிய பேழையை ஆயர் இல்ல பிரதான நுழை வாயில் வரை மறைமாவட்டக் குருக்கள் எடுத்து வந்தனர். அலங்கரிக்கப்பட்ட ஊர்தியிலே அருட்பணியாளர் ஜோ.பெ.தேவறாஜா அடிகளாரின் வித்துடல் வைக்கப்பட்டு அருட்பணியாளர்கள் பொதுமக்கள் அணிவகுத்துச் செல்ல மன்னார் தாழ்வுபாடு பிரதான வீதி வழியாக இப்பவனி புனித செபஸ்தியார் பேராலயத்தை வந்தடைந்தது.

போராலத்திற்கு அண்மையிலே வைத்து பங்குத்தந்தை அருட்பணி.அ.ஞானப்பிரகாசம் அடிகளார் தலைமையிலே பேராலயப் பணியாளர்கள் அருட்பணியாளர் ஜோ.பெ.தேவறாஜா அடிகளாரின் வித்துடல் தாங்கிய பேழையை பேராலத்திற்குள் தூக்கிச் சென்றனர். இப்பொழுது மன்னார் புனித செபஸ்தியார் பேராலயப் பணிக்குழுக்களும் இறைமக்களும் வழிபாடுகளை தொடர்ந்து நடாத்திக் கொண்டிருக்கின்றனர். இன்று மாலை மன்னார் ஆயர் பேரருட்கலாநிதி இம்மானுவேல் பெனாண்டோ ஆண்டகை அவர்களின் தலைமையில் இடம் பெறும் இரங்கல் கூட்டுத் திருப்பலியைத் தொடர்ந்து மன்னார் கத்தோலிக்கக் கல்லறைத் தோட்டத்தின் குருக்கள் துறவியருக்கான பகுதியிலே அருட்பணியாளர் ஜோ.பெ.தேவறாஜா அடிகளாரின் வித்துடல் நல்லடக்கம் செய்யப்படும். [2020-08-13 22:55:56]


வஞ்சியன்குளம் புனித பேதுருவானவர் ஆலயம் அர்ச்சித்து திறந்து வைக்கப்பட்டது.

மன்னார் மறைமாவட்ட கத்தோலிக்க மக்களின் இறைநம்பிக்கையின் மற்றுமொரு பரிமாணமாக வஞ்சியன்குளம் புனித பேதுருவானவர் ஆலயம் புதிதாகக் கட்டப்பட்டு 01.08.2020 சனிக்கிழமை காலை மன்னார் மறைமாவட்ட ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகை அவர்களால் கத்தோலிக்க திரு அவையின் திருவழிபாட்டு திருமரபின் வழிகாட்டுதல்களுக்கமைவாக அர்ச்சித்து திறந்து வைக்கப்பட்டது.மன்னார் மறைமாவட்ட கத்தோலிக்க மக்களின் இறைநம்பிக்கையின் மற்றுமொரு பரிமாணமாக வஞ்சியன்குளம் புனித பேதுருவானவர் ஆலயம் புதிதாகக் கட்டப்பட்டு 01.08.2020 சனிக்கிழமை காலை மன்னார் மறைமாவட்ட ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகை அவர்களால் கத்தோலிக்க திரு அவையின் திருவழிபாட்டு திருமரபின் வழிகாட்டுதல்களுக்கமைவாக அர்ச்சித்து திறந்து வைக்கப்பட்டது.

16ம் நூற்றாண்டின் பதிவுகளோடு நீண்டகால கத்தோலிக்க நம்பிக்கையின் விழுதுகளை ஆழப்பதித்து வேருன்றியுள்ள வஞ்சியன்குளம் புனித பேதுருவானவர் ஆலயப் பங்கு முன்னர் நீண்ட காலம் வங்காலைப் பங்கின் கிளை ஆலயமாகவும் சிறிது காலம் நானாட்டான் பங்கின் கிளை ஆலயமாகவும் இருந்து வந்தது. ஓய்வு நிலை ஆயர் பேரருட்கலாநிதி இராயப்பு யோசேப்பு ஆண்டகையின் திருப்பணிக்காலத்தில் இது புதிய பங்காக அறிவிப்புச் செய்யப்பட்டது.

அதன் பின்னர் ஏற்கனவே இருந்து வந்த மிகவும் தொன்மை வாய்ந்த ஆலயம் இடவசதி இன்றியும் திருத்த வேலைகளையும் வேண்டி நின்றதனைக் கருத்திற் கொண்டு புதிய ஆலயம் கட்டப்படவேண்டுமென்ற எண்ணம் பலரிடமும் தோன்றியது. அதனால் 2004ம் ஆண்டு அப் பங்கின் முதல் பங்குத் தந்தையாக நியமனம் பெற்ற அருட்பணி.க.அருள்பிரகாசம் அடிகளாரின் காலத்தில் ஓய்வு நிலை ஆயர் பேரருட்கலாநிதி இராயப்பு யோசேப்பு ஆண்டகையின் பணிப்புரையின் பேரில் இவ்வாலய மக்களின் ஒத்துழைப்போடு புதிய ஆலயத்தை உருவாக்கும் பணி தொடங்கப்பட்டது.

தொடர்ந்து அப் பங்கின் பொறுப்பை பல்வேறு காலங்களில் ஏற்றுக் கொண்ட அருட்பணி.எ.டெனி கலிஸ்ரஸ் அடிகளார் அருட்பணி. க.அருள்றாஜ் குரூஸ் அடிகளார் அருட்பணி.ச.மரியதாஸ் லீயோன் அடிகளார் அருட்பணி அல்பன் இராஜசிங்கம் அமதி அடிகளார் அருட்பணி லோ.ஞானாதிக்கம் அடிகளார் அருட்பணி.யூட் ஞானறாஜ் குரூஸ் (நேரு) அடிகளார் அருட்பணி ப.ஜோண் ஸ்ரனின் சோசை ( சாந்தன்) அடிகளார் ஆகியோரின் அயரா உழைப்போடும் தற்போதைய மன்னார் மறைமாவட்ட ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகை அவர்களின் வழிகாட்டுதலோடும் ஆலய மற்றும் பங்குமக்களின் ஒத்துழைப்போடும் இப் புதிய ஆலயம் மிக அழகிய ஆலயமாகக் கட்டி முடிக்கப்பட்டுள்ளது.

இப் பங்கிலிருந்து இரண்டு அருட்பணியாளர்களும் ஒன்பது அருட்சகோதரிகளும் திரு அவையில் பணியாற்றிக் கொண்டிருக்கின்றார்கள். தற்போதைய பங்குத் தந்தை அருட்பணி ப.ஜோண் ஸ்ரனின் சோசை ( சாந்தன்) அவர்களின் நெறிப்படுத்துதலோடு ஆலய மற்றும் பங்குமக்கள் ஒன்றிணைந்து இந் நிகழ்வை சிறப்புற ஒழுங்கமைத்து நடாத்தினார்கள். [2020-08-13 22:44:36]


யாழ் மறைமாவட்டத்திற்கு நான்கு புதிய குருக்கள்

யாழ் மறைமாவட்டத்தைச் சேர்ந்த நான்கு திருத்தொண்டர்கள் 27.06.2020 சனிக்கிழமை காலை 9.30 மணிக்கு யாழ் புனித மரியன்னை பேராலயத்தில் ஆயர் தலைமையில் நடைபெற்ற திருப்பலியில் குருக்களாக திருநிலைப்படுத்தப்பட்டார்கள். திருத்தொண்டர்களான அலிஸ்ரன் நியூமன், ஜோன் குருஸ், நிதர்சன், எட்வின் நரேஸ் ஆகியோரே யாழ் மறைமாவட்ட புதிய குருக்களாக திருநிலைப்படுத்தப்பட்டவர்களாவார். [2020-06-28 07:36:37]


ஒறாசியோ பெற்றக்கினி அவர்களின் உருவச்சிலை திறந்துவைக்கப்பட்டது.

27.06.2020 சனிக்கிழமை மதியம் 12.00 மணிக்கு யாழ். மறைமாவட்ட ஆயர் இல்ல வளாகத்தில் அமைக்கப்பட்ட யாழ். மறை மாவட்டத்தின் முதலாவது அப்போஸ்தலிக்க விக்கார் ஆயர் ஒறாசியோ பெற்றக்கினி அவர்களின் உருவச்சிலை மறைமாவட்ட ஆயர் அருட்கலாநிதி யஸ்ரின் பேர்ணட் ஞானப்பிரகாசம் அவர்களினால் திறந்துவைக்கப்பட்டது.

ஆயர் பெற்றக்கினி ஒறற்ரோறியன் சபைச் சார்ந்த இத்தாலி நாட்டவர். இவர் 1846 ஆம் ஆண்டு கொழும்பு புனித லூசிய பேராலயத்தில் ஆயராக அருட்பொழிவு பெற்று 1849 ஆம் ஆண்டு யாழ்.மறைமாவட்ட அப்போஸ்தலிக்க விக்கராக நியமிக்கப்பட்டு பணிப்பொறுப்பை ஏற்றுகொண்டர். இவரின் உருவச்சிலை திருமறைக்கலாமன்றத்தில் சிற்பக்கலையை பயின்ற ஆசிரியர்களான திரு. கபேசன், திரு. கிருபா ஆகியோரினால் பேராசிரியர் சரத் சந்திரஜீவா அவர்களின் வழிகாட்டலில் யாழ். திருமறைக் கலாமன்ற இயக்குநர் அருட்கலாநிதி மரிய சேவியர் அடிகளின் ஆலோசனையுடன் அமைக்கப்பட்டமையும் இங்கு குறிப்பிடத்தக்கது. இந்நிகழ்வின் போது திருமறைக் கலாமன்ற இயக்குனர் தந்தையும், சிற்பக்கலைஞர்களும் ஆயர் அவர்களினால் பொன்னாடை அணிவித்துக் கௌரவிக்கப்பட்டனர். [2020-06-28 07:34:51]


பூலார் குடியிருப்பில் இறையிரக்கப் பெருவிழா.

கீளியன் குடியிருப்புப் பங்கின் கிளை ஆலயமான பூலார் குடியிருப்பு புனித பவுல் ஆலயமானது நீண்டதொரு ஆன்மிக வரலாற்றுப் பாரம்பரியத்தைக் கொண்டதாகும். பல நூற்றாண்டுகளுக்கு முன்னர் மன்னார்த் தீவில் இயேசுவின் திருத்தூதர்களின் பெயரில் பல ஆலயங்கள் அமைக்கப்பட்டு, அர்ப்பணிக்கப்பட்டன, இவ் ஆலயங்கள் கத்தோலிக்க மக்கள் தங்கள் இறை நம்பிக்கையை வளர்க்க வாய்ப்பாக அமைந்தன. அவ்வாறமைந்த ஆலயங்களில் ஒன்றுதான் பூலார் குடியிருப்பு புனித பவுல் ஆலயமாகும். காலக்கரைதலில் மக்களின் இடப்பெயர்வுகள், மற்றும் வேறு காரணங்களில் இவ்வாலயத்தில வழிபாடுகள் குறைந்தன, அத்தோடு இவ்வாலயத்தின் பயன்பாடும் குறைந்தது.

இதன் பின் அண்மைக் காலங்களில் இடிந்துபோய் சில சுவர்கள் மட்டுமே எஞ்சியிருந்த நிலையில் அவ் ஆலயம் மீளுருவாக்கம் செய்யப்பட்டு வருவதோடு அவ்வாலயத்தில் இறை இரக்க வழிபாட்டுடிற்கும் முக்கியத்துவம் கொடுக்கப்பட்டு வருகின்றது. தற்போதைய பங்குத் தந்தை அருட்பணி. ஜெஸ்லி ஜெகானந்தன் அடிகளாரின் அர்ப்பணிப்பான முயற்சியினால் நம் ஆண்டவர் இயேசுதாமே இறையிரக்கத்தின் மகிமையை அருட்சகோதரி புனித பவுஸ்தினாவுக்கு வெளிப்படுத்திய போலந்து நாட்டின் கிறாக்கோ நகரில் அமைந்துள்ள இரக்கத்தின் அன்னை மரியா அருட்சகோதரிகள் இல்லத்தில் அமைந்துள்ள இறை இரக்கத் திருத்தலத்தில் இருக்கும் அருட்சகோதரி புனித மரிய பவுஸ்தினாவின் முதல் தர புனித அருட்பொருள் – திருப்பண்டம் கொண்டுவரப்பட்டு அவ் ஆலயத்தில் வைக்கப்பட்டள்ளது.

இவ் ஆலயத்தில் இவ் ஆண்டு சித்திரை 19ந் திகதி ஞாயிற்றுக்கிழமை (19.04.2020) இறை இரக்கத் திருவிழாவன்று மாலையில் இறை இரக்கத் திருச் செபமாலையும் அதனைத் தொடர்ந்து திருவிழாத் திருப்பலியும் இடம் பெற்றது. மன்னார் மறைமாவட்ட ஆயர் பேரருட்கலாநிதி பி.ல.இம்மானுவேல் பெனாண்டோ ஆண்டகை அவர்கள் திருவிழாத் திருப்பலியை நிறைவேற்றினார். சமகால நிலைமைகளுக்கு அமைவாக ஒரு சில அருட்பணியாளர்கள் மட்டுமே இத் திருப்பலியில் கலந்து கொண்டனர்.

மன்னார் மறைமாவட்டத்தில் இரண்டு இறை இரக்கத் திருத்தலங்கள் உள்ளமை குறிப்பிடத் தக்கது. ஒன்று வவுனியா மாவட்டத்திலுள்ள பம்பைமடுப் பங்கிலும், இரண்டாவது மன்னார் மாவட்டத்திலுள்ள கீளியன் குடியிருப்புப் பங்கின் பூலார் குடியிருப்பு என்னும் இடத்திலும் அமைந்துள்ளன. இந்த இரண்டு திருத்தலங்களிலுமே அருட்சகோதரி புனித மரிய பவுஸ்தினாவின் திருப்பண்டம் இருப்பது குறிப்பிடத் தக்கது. [2020-04-21 22:04:34]


தாக்குதல்களில் உயிரிழந்தவர்கள் நினைவாக 2 நிமிட மௌனம்

2019ம் ஆண்டு ஏப்ரல் 21ம் தேதி நடத்தப்பட்ட பயங்கரவாதத் தாக்குதல்களில் உயிரிழந்தவர்களின் நினைவாக, ஏப்ரல் 21, வருகிற செவ்வாய் இலங்கை நேரம் காலை 8.40 மணிக்கு, நாட்டின் அனைத்து ஆலயங்களும், கோவில்களும் மணிகளை ஒலிக்குமாறும் அழைப்பு விடுத்துள்ளார், கர்தினால் மல்கம் இரஞ்சித்.

மேலும், அன்றைய நாள் காலை 8.45 மணிக்கு, இரண்டு நிமிடம் மௌனம் அனுசரிக்கவும், காலை 8.47 மணிக்கு, ஒவ்வொருவரும் அவரவர் வீடுகளில் விளக்கு அல்லது, மெழுகுதரிகளை ஏற்றவும், உயிரிழந்தவர்களின் நினைவாக மத சடங்குகளை ஆற்றவும், கர்தினால் இரஞ்சித் அவர்கள், இலங்கை மக்கள் அனைவருக்கும் அழைப்பு விடுத்துள்ளார். [2020-04-20 20:29:24]



பக்க இலக்கங்களை அழுத்தி எல்லா செய்திகளையும் பார்வையிடவும்