வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



கிறிஸ்தவ நம்பிக்கை, மூச்சுவிடும் காற்று போன்றது

நம்பிக்கை என்பது, ஆண்டவரைச் சந்திப்போம் என்ற எதிர்நோக்கில் வாழ்வதாகும். கையில் கயிற்றைப் பிடித்துக்கொண்டு, அடுத்த கரையில் நங்கூரத்தை போடுவது போலாகும் மேரி தெரேசா: வத்திக்கான் செய்திகள் நம்பிக்கை மனிதர்களாக வாழ்வதற்கு, நாம் எதன் மீதும் பற்று வைத்திருக்கக் கூடாது மாறாக, ஆண்டவரைச் சந்திப்பதை நோக்கி மிகவும் பதட்டத்தில் வாழ்பவர்களாக இருக்க வேண்டும் என்று, திருத்தந்தை பிரான்சிஸ் அவர்கள், இச்செவ்வாய் காலையில் வழங்கிய மறையுரையில் கூறினார். சாந்தா மார்த்தா இல்லச் சிற்றாலயத்தில், அக்டோபர் 29, இச்செவ்வாய் காலையில் நிறைவேற்றிய திருப்பலியில், கிறிஸ்தவ நம்பிக்கையை மையப்படுத்தி மறையுரையாற்றிய திருத்தந்தை பிரான்சிஸ் அவர்கள், ஆண்டவரைச் சந்திப்பதில் எப்பொழுதும் மிகுந்த ஆர்வமுள்ளவர்களாய் வாழாவிடில், கிறிஸ்தவர்களின் வாழ்வு தேக்க நிலையாக மாறும் என்று கூறினார். புனித பவுல் அடிகளார், உரோமையருக்கு எழுதிய மடலில் நம்பிக்கை பற்றிக் கூறும் இத்திருப்பலியின் முதல் வாசகத்தை (உரோம. 8:18-25) மையப்படுத்தி மறையுரையாற்றிய திருத்தந்தை, நம்பிக்கை என்பது, அடுத்த கரையில் ஒரு நங்கூரத்தை போடுவதுபோல் ஆகும் என்று கூறினார். கிறிஸ்தவ வாழ்வு என்பது, இவ்வுலகில் ஒரு கூடாரத்தை அமைக்க இயலாது என்பதை எப்போதும் அறிந்தவர்களாய், ஆண்டவரைச் சந்திப்பதிலே துடிப்புள்ளவர்களாய் வாழ்வதாகும் என்றுரைத்த திருத்தந்தை, தண்ணீர் ஓடாமல் இருந்தால், அது தேங்கியே இருக்கும், அதேபோல், கிறிஸ்தவ வாழ்வும் பரந்து விரியும் சக்தியைக் கொண்டிராவிடில், தேக்கநிலையை அடையும் மற்றும், அத்தகைய கிறிஸ்தவ வாழ்வு, மெய்யியல் கோட்பாடாக மாறும் என்று எச்சரித்தார். நாம் நம்பிக்கை மனிதர்களாக வாழ விரும்பினால், எதிலும் பற்று இல்லாத ஏழைகளாக திறந்தமனம் உள்ளவர்களாக வாழ வேண்டும், நம்பிக்கை என்பது தாழ்ச்சி என்ற புண்ணியமாகும், ஒவ்வொரு நாளும் இந்த நம்பிக்கையிலே நாம் வேலை செய்கிறோம், ஒவ்வொரு நாளும், கயிற்றை நம் கையில் பிடித்துக்கொண்டு, நங்கூரத்தை வைக்க வேண்டும், சிறிய செயல்களில்கூட நம்மில் தூய ஆவியார் வேலை செய்கிறார் என்ற பாதுகாப்பு உணர்வு நம்மில் இருக்க வேண்டும் என்றும் திருத்தந்தை கூறினார். நம்பிக்கையில் வாழ்வதற்கு, இந்நாளைய நற்செய்தி வாசகத்தில் (லூக்.13,18-21) இயேசு சொல்கிறார் என்றுரைத்த திருத்தந்தை, இறையாட்சி, தம் தோட்டத்தில் இடும் கடுகு விதைக்கு ஒப்பாகும், அது வளர்வது வரை காத்திருக்க வேண்டும், அது எவ்வாறு வளர்கின்றது என்பதை ஒவ்வொரு நாளும் நாம் சென்று பார்ப்பதில்லை, அதற்கு பொறுமை அவசியம் என்று கூறினார். நம்பிக்கைக்கும் பொறுமை அவசியம் என்று கூறியத் திருத்தந்தை, நம்பிக்கை பாதுகாப்பைத் தருகின்றது, அது ஒருபோதும் ஏமாற்றாது என்றும், நம் ஆண்டவர் அளித்துள்ள வாக்குறுதிகளுக்குத் திறந்த மனதுள்ளவர்களாய் இருப்பதற்கு அவரிடம் மன்றாடுவோம் என்றும், திருத்தந்தை கூறினார். மேலும், சாந்தா மார்த்தா இல்லச் சிற்றாலயத்தில் இச்செவ்வாய் காலையில் நிறைவேற்றிய திருப்பலியை மையப்படுத்தி, ஹாஸ்டாக் (#SantaMarta) குடன் தன் டுவிட்டர் செய்தியை வெளியிட்டுள்ள திருத்தந்தை பிரான்சிஸ் அவர்கள், நம்பிக்கை என்பது, ஆண்டவரைச் சந்திப்போம் என்ற எதிர்நோக்கில் வாழ்வதாகும். கையில் கயிற்றைப் பிடித்துக்கொண்டு, அடுத்த கரையில் நங்கூரத்தை எறிவது போலாகும் என்ற வார்த்தைகளைப் பதிவு செய்துள்ளார். [2019-10-30 00:52:53]


pachamama சிலைகள் ஆற்றில் எறியப்பட்டதற்கு திருத்தந்தை மன்னிப்பு

ஊடகங்களின் மிகுந்த கவனத்தை உருவாக்கியுள்ள pachamama சிலைகள் சேதமடையாமல், டைபர் நதியிலிருந்து மீட்கப்பட்டு, இத்தாலிய தேசிய காவல்துறையின் தலைமை அலுவலகத்தில் வைக்கப்பட்டுள்ளன மேரி தெரேசா: வத்திக்கான் செய்திகள் அமேசான் பகுதியைச் சேர்ந்த சர்ச்சைக்குரிய சிலைகள், உரோம் டைபர் நதியில் எறியப்பட்டது குறித்து, திருத்தந்தை பிரான்சிஸ் அவர்கள், அக்டோபர் 25, இவ்வெள்ளி மாலையில் நடைபெற்ற 15வது பொது அமர்வில் தனது வருத்தத்தைத் தெரிவித்தார். எவ்வித சிலைவழிபாட்டு நோக்கங்களின்றி, Traspontina ஆலயத்தில் வைக்கப்பட்டிருந்த pachamama சிலைகள் அகற்றப்பட்டு, டைபர் நதியில் எறியப்பட்டது பற்றி ஒருசில வார்த்தைகள் சொல்ல விரும்புகிறேன் என்று கூறியத் திருத்தந்தை, உரோம் ஆயர் என்ற முறையில், இந்த அடையாளத்தின் வழியாக, புண்பட்டவர்களிடம் மன்னிப்பு கேட்கிறேன் என்று தெரிவித்தார். ஊடகங்களில் இவ்வளவு கவனத்தை உருவாக்கியுள்ள இந்த சிலைகள் சேதமடையாமல், டைபர் நதியிலிருந்து மீட்கப்பட்டு, இத்தாலிய தேசிய காவல்துறையின் தலைமை அலுவலகத்தில் வைக்கப்பட்டுள்ளன என்றும் திருத்தந்தை அறிவித்தார். அமேசான் பகுதியில், கருவுற்ற பெண்களை ஆடையில்லாமல் வடிக்கப்பட்டுள்ள இந்த சிலைகள், உரோம் Santa Maria in Traspontina கார்மேல் சபை ஆலயத்தில் பாதுகாக்கப்பட்டு, அமேசான் மாமன்றத்தின் பல்வேறு நிகழ்வுகளில் வைக்கப்பட்டன. இந்த சிலைகள் அக்டோபர் 21ம் தேதி டைபர் நதியில் இருவரால் எறியப்பட்டதாகச் சொல்லப்படுகின்றது. இவை மீட்கப்பட்ட செய்தி, உரியவர்களிடம் தெரிவிக்கப்பட்ட பின்னரே, பொதுவில் அறிவிக்கப்பட வேண்டுமென, காவல்துறை தலைமை அதிகாரி விரும்பினார் எனவும் கூறப்பட்டுள்ளது. திருத்தந்தை, அமேசான் மான்றத்தை, அசிசி நகர் புனித பிரான்சிசிடம் அர்ப்பணித்த நிகழ்வில் இந்த சிலைகள் வைக்கப்பட்டிருந்தன மற்றும், இவை சர்ச்சையையும் ஏற்படுத்தின என்பது குறிப்பிடத்தக்கது. [2019-10-26 21:13:20]


நற்செய்தியின் கதவுகளை, அனைவருக்கும் திறந்துவைக்க...

'சிறப்பான மறைபரப்புப்பணி மாதத்'தைக் கொண்டாடும் வேளையில், இறையன்பிற்கு உன்னத சாட்சிகளாக இருக்க, தூய ஆவியார் நம்மைத் தூண்டவேண்டுமென்று மன்றாடுகிறோம்" - திருத்தந்தை பிரான்சிஸ் ஜெரோம் லூயிஸ் - வத்திக்கான் செய்திகள் திருத்தந்தை பிரான்சிஸ் அவர்கள், அக்டோபர் 23, தன் புதன் மறைக்கல்வி உரையில் பகிர்ந்துகொண்ட கருத்தையும், 'சிறப்பான மறைபரப்புப்பணி மாதம்' என்ற கருத்தையும் இணைத்து, இப்புதனன்று தன் டுவிட்டர் செய்தியை, #ExtraordinaryMissionaryMonth என்ற ‘ஹாஷ்டாக்’குடன் பதிவு செய்துள்ளார். "'சிறப்பான மறைபரப்புப்பணி மாதத்'தைக் கொண்டாடும் வேளையில், நற்செய்தியின் கதவுகளை, அனைத்து மக்களுக்கும் திறந்துவைக்கவும், இறையன்பிற்கு உன்னத சாட்சிகளாக இருக்கவும், தூய ஆவியார் நம்மைத் தூண்டவேண்டுமென்று மன்றாடுகிறோம்" என்ற சொற்கள், திருத்தந்தையின் டுவிட்டர் செய்தியில் இடம்பெற்றிருந்தன. மேலும், நற்செய்தி அறிவிப்பு பேராயத்தின் தலைவரான கர்தினால் ஃபெர்னாண்டோ ஃபிலோனி அவர்கள், Zenit கத்தோலிக்க இதழுக்கு அளித்த பேட்டியில், அக்டோபர் மாதம் சிறப்பிக்கப்படும் 'சிறப்பான மறைபரப்புப்பணி மாதத்'தைக் குறித்து தன் கருத்துக்களைப் பகிர்ந்துகொண்டார். ஒவ்வோர் ஆண்டும், அக்டோபர் மாதம் 'மறைபரப்புப்பணி மாதம்' என்று சிறப்பிக்கப்பட்டாலும், இவ்வாண்டு, திருமுழுக்கு பெற்ற அனைவருமே மறைபரப்புப்பணியில் முழுமனதோடு ஈடுபட உதவியாக, திருத்தந்தை பிரான்சிஸ் அவர்கள் இவ்வாண்டின் அக்டோபர் மாதத்தை, 'சிறப்பான மறைபரப்புப்பணி மாத'மாக அறிவித்தார் என்று கர்தினால் ஃபிலோனி அவர்கள் தன் பேட்டியில் குறிப்பிட்டார். 'நம்பிக்கை பரப்புதல் பாப்பிறைக் கழகத்தை', ஏறத்தாழ 200 ஆண்டுகளுக்கு முன் உருவாக்கிய வணக்கத்துக்குரிய Pauline Jaricot அவர்கள், திருமுழுக்கு பெற்றுள்ள அனைவரும், தங்கள் செபங்களின் வழியே, மறைபரப்புப்பணியில் ஈடுபடமுடியும் என்பதைச் சொல்லித்தந்தார் என்று, கர்தினால் ஃபிலோனி அவர்கள், தன் பேட்டியில் சுட்டிக்காட்டினார். [2019-10-26 21:07:14]


போலந்து நாட்டு ஆயர் பேரவை விண்ணப்பம்

புனிதத் திருத்தந்தை 2ம் ஜான்பால் அவர்களை, திருஅவையின் மறைவல்லுனர் என்றும், ஐரோப்பாவின் பாதுகாவலர்களில் ஒருவராகவும், திருத்தந்தை பிரான்சிஸ் அவர்கள் அறிவிக்கவேண்டும் என்ற விண்ணப்பம் ஜெரோம் லூயிஸ் - வத்திக்கான் செய்திகள் புனிதத் திருத்தந்தை 2ம் ஜான்பால் அவர்களை, திருஅவையின் மறைவல்லுனர் என்றும், ஐரோப்பாவின் பாதுகாவலர்களில் ஒருவராகவும் திருத்தந்தை பிரான்சிஸ் அவர்கள் அறிவிக்கவேண்டும் என்று, போலந்து நாட்டு ஆயர் பேரவை விண்ணப்பம் ஒன்றை அனுப்பியுள்ளது. அக்டோபர் 22, இச்செவ்வாயன்று, புனிதத் திருத்தந்தை 2ம் ஜான்பால் அவர்களின் திருவிழா சிறப்பிக்கப்பட்ட வேளையில், இந்த விண்ணப்பத்தை போலந்து ஆயர் பேரவையின் தலைவர், பேராயர் Stanisław Gądecki அவர்கள் திருத்தந்தைக்கு அனுப்பியுள்ளார். ஜான்பால் அவர்கள், 1920ம் ஆண்டு பிறந்ததன் முதல் நூற்றாண்டும், அவர் மரணமடைந்ததன் 15ம் ஆண்டும், 2020ம் ஆண்டு சிறப்பிக்கப்படுவதையொட்டி, போலந்து ஆயர்கள், இந்த விண்ணப்பத்தை வெளியிட்டுள்ளனர் என்று, போலந்து ஆயர் பேரவையின் அறிக்கையொன்று கூறுகிறது. திருத்தந்தை 2ம் ஜான்பால் அவர்களின் தலைமைப் பணியில், அவருக்கு பல வழிகளில் உறுதுணையாக வத்திக்கானிலும், திருத்தந்தையின் மறைவுக்குப்பின், போலந்து நாட்டின் கிரக்கோவ் பேராயராகவும் பணியாற்றிய கர்தினால் Stanisław Dziwisz அவர்கள், வார்சா நகரில், அக்டோபர் 22ம் தேதி நடைபெற்ற "Europa Christi" என்ற இயக்கத்தின் மாநாட்டில் பேசுகையில், திருத்தந்தை 2ம் ஜான்பால் அவர்கள், திருஅவையின் மறைவல்லுனராக உயர்த்தப்படுவது மிகவும் பொருத்தமானது என்று கூறினார். [2019-10-24 01:27:33]


தீபாவளித் திருவிழாவுக்காக திருப்பீடத்தின் சிறப்புச் செய்தி

ஒளியின் திருவிழா, இந்து நண்பர்கள் அனைவரின் இல்லங்களிலும், உள்ளங்களிலும் மகிழ்வு, அமைதி, செழிப்பு ஆகியவற்றைக் கொணரவேண்டும் – கர்தினால் Guixot கிறிஸ்டோபர் பிரான்சிஸ் - வத்திக்கான் செய்திகள் அக்டோபர் 27, வருகிற ஞாயிறன்று சிறப்பிக்கப்படவிருக்கும் தீபாவளித் திருவிழாவுக்கென, திருப்பீடத்தின் பல்சமய உரையாடல் அவை சிறப்புச் செய்தியொன்றை, இத்திங்களன்று வெளியிட்டுள்ளது. பல்சமய உரையாடல் அவையின் தலைவர், கர்தினால் Miguel Ángel Ayuso Guixot அவர்களும், இந்த அவையின் செயலர், அருள்பணி Indunil Janakaratne Kankanamalage அவர்களும் இணைந்து, அனுப்பியுள்ள இச்செய்தி, 'மத நம்பிக்கையாளர்கள்: உடன்பிறந்த நிலையையும், அமைதிநிறைந்த வாழ்வையும் கட்டியெழுப்புவோர்" என்று தலைப்பிடப்பட்டுள்ளது. மகிழ்வையும், அமைதியையும் கொணரும் ஒளியின் திருவிழா ஒளியின் திருவிழா, இந்து நண்பர்கள் அனைவரின் இல்லங்களிலும், உள்ளங்களிலும் மகிழ்வு, அமைதி, செழிப்பு ஆகியவற்றைக் கொணரவேண்டும் என்ற வாழ்த்துரையோடு இச்செய்தி ஆரம்பமாகியுள்ளது. மதங்களுக்கிடையிலும், கலாச்சாரங்களுக்கிடையிலும் உரையாடல்களும், கூட்டுறவு முயற்சிகளும் வளர்ந்துவரும் இக்காலத்தில், வெவ்வேறு சமயங்களைப் பின்பற்றுவோரிடையே, வெறுப்புணர்வும், அக்கறையற்ற மனநிலையும் வளர்ந்து வருகின்றன என்ற கவலை இச்செய்தியில் வெளியிடப்பட்டுள்ளது. உண்மையான மதங்கள் வலியுறுத்தும் பண்புகள் ஒவ்வொரு மனிதரின் அடிப்படை மாண்பையும், மனிதர்கள் அனைவரையும் சகோதரர், சகோதரிகளாக காணவேண்டிய பண்பையும் அனைத்து உண்மையான மதங்களும் வலியுறுத்துகின்றன என்று எடுத்துரைக்கும் இச்செய்தி, இந்த அடிப்படையில், அனைத்து மதத்தவரும் அமைதியை உருவாக்க அழைக்கப்பட்டுள்ளனர் என்று கூறுகிறது. ஒரு சில எதிர்மறையான செய்திகளே தலைப்புச் செய்திகளாக ஊடகங்களை நிறைத்தாலும், உடன்பிறந்த உணர்வை விதைக்கும் நன்மைத்தனம், மனிதர்கள் மத்தியில் கடலென பெருகியுள்ளது என்ற நம்பிக்கையில், நாம் அமைதியைக் கட்டியெழுப்பவேண்டும் என்று, இச்செய்தி அழைப்பு விடுக்கிறது. மகாத்மா காந்தியின் எடுத்துக்காட்டு உண்மை, அன்பு, அகிம்சை ஆகிய உயர்ந்த இலட்சியங்களுக்கு சாட்சியாக வாழ்ந்த மகாத்மா காந்தி அவர்களின் 150வது பிறந்தநாள் நினைவு, இந்த அக்டோபர் மாதத்தின் துவக்கத்தில் கொண்டாடப்பட்டது நமக்கு நல்லதொரு நினைவுறுத்தலாக விளங்குகிறது என்று கூறும் இச்செய்தி, காந்தி அவர்களின் வாழ்வு, நம் அனைவருக்கும் உந்துசக்தியாக விளங்கவேண்டும் என்ற வாழ்த்துடன் நிறைவு பெறுகிறது. [2019-10-21 23:50:11]


நாம் எந்த சிகரத்தை எட்டிப்பிடிக்க ஆவல் கொள்கிறோம்?

நீங்கள் நீங்களாகவே இருந்துகொண்டு, உங்களை சுற்றியிருப்போருக்கு உங்களை வழங்கவேண்டும் என இறைவன் அழைப்பு விடுக்கிறார் கிறிஸ்டோபர் பிரான்சிஸ் : வத்திக்கான் செய்திகள் நாம் இருக்கும் இடத்தில் நாம் நாமாகவே இருந்துகொண்டு, நம்மை பிறருக்கு வழங்க வேண்டும் என இறைவன் நம்மிடம் அதிகம் அதிகமாக எதிர்பார்க்கிறார் என, இத்திங்களன்று, தன் டுவிட்டர் செய்தி வழியே அழைப்பு விடுத்துள்ளார், திருத்தந்தை பிரான்சிஸ். 'இந்த மறைபரப்புப்பணி மாதத்தில், நீங்கள் இருக்கும் இடத்தில், நீங்களாகவே இருந்துகொண்டு, உங்களை சுற்றியிருப்போருக்கு உங்களை வழங்கவேண்டும் என இறைவன் அழைப்பு விடுக்கிறார். கடவுள் உங்களிடமிருந்து அதிகம் அதிகமாக எதிர்பார்க்கிறார்’, என்ற சொற்கள், திருத்தந்தையின் டுவிட்டர் செய்தியில் இடம் பெற்றன. மறைப்பரப்புப்பணி - மூன்று டுவிட்டர் செய்திகள் இம்மாதம் மறைப்பரப்புப்பணி மாதமாக சிறப்பிக்கப்படுவதையொட்டியும், இஞ்ஞாயிறு மறைபரப்புப்பணி ஞாயிறாக கொண்டாடப்பட்டதையொட்டியும் மையப்படுத்தி, இஞ்ஞாயிறன்று மறைபரப்புப்பணியின் முக்கியத்துவத்தை வலியுறுத்தி, மூன்று டுவிட்டர் செய்திகளை வெளியிட்டுள்ளார், திருத்தந்தை பிரான்சிஸ். 'மறைபரப்புப்பணி மாதத்தின் மத்தியிலிருக்கும் நாம், நம்மையே நோக்கி ஒரு கேள்வியை கேட்போம், நம் வாழ்வில் முக்கியத்துவம் வாய்ந்தது எது? நாம் எந்த சிகரத்தை எட்டிப்பிடிக்க ஆவல் கொள்கிறோம்?' என்ற கேள்வியை தன் முதல் டுவிட்டரில் எழுப்பியுள்ள திருத்தந்தை பிரான்சிஸ் அவர்கள், ''கடவுள் நம்மை அன்புகூர்கிறார், அவர் எவராலும் அயர்வடைவதில்லை என்பதை நம் வாழ்வாலும், நம் வார்த்தையாலும்கூட காண்பிப்போம்'' என தன் இரண்டாவது டுவிட்டரில் எழுதியுள்ளார். இஞ்ஞாயிறன்று திருத்தந்தை வெளியிட்ட மூன்றாவது டுவிட்டரோ, 'சென்று அவனைவரையும் அன்புகூருங்கள். ஏனெனில், உங்கள் வாழ்வு விலைமதிக்கப்பட முடியாத மறைப்பணியாகும். அது, தாங்கமுடியாத சுமையல்ல, மாறாக, வழங்கப்படவேண்டிய கொடையாகும்'' என உரைக்கிறது. [2019-10-21 23:28:54]


பூமித்தாயை மையப்படுத்தி திருத்தந்தையின் புதிய நூல்

"நமது பூமித்தாய். சுற்றுச்சூழல் விடுக்கும் சவாலை ஒரு கிறிஸ்தவ கண்ணோட்டத்துடன் வாசித்தல்" என்ற தலைப்பில், திருத்தந்தை பிரான்சிஸ் அவர்கள் எழுதியுள்ள ஒரு நூல், அக்டோபர் 24ம் தேதி வெளியாகும் ஜெரோம் லூயிஸ் - வத்திக்கான் செய்திகள் திருத்தூதர் பணிகள் நூலையும், அந்நூலில், திருத்தூதர்களை தூய ஆவியார் வழிநடத்தி வந்ததையும் மையப்படுத்தி கடந்த சில வாரங்களாக புதன் மறைக்கல்வி உரைகளை வழங்கிவரும் திருத்தந்தை பிரான்சிஸ் அவர்கள், மறைக்கல்வி உரையில் பகிர்ந்துகொண்ட ஒரு கருத்தை, தன் டுவிட்டர் செய்தியாக வெளியிட்டுள்ளார். "கடவுள் வழங்கும் ஆச்சரியங்களால் நாம் வியந்து மகிழும் வரத்திற்காக இன்று வேண்டுகிறோம். அவரது படைப்பாற்றலை தடை செய்யாமல், இறைவனை சந்திப்பதற்கு பிறர் மனங்களை ஊக்குவிக்கும் வரத்திற்காகவும் செபிப்போம்" என்ற சொற்கள் திருத்தந்தையின் டுவிட்டர் செய்தியாக வெளியாயின. அக்டோபர் 24 - திருத்தந்தையின் புதிய நூல் மேலும், பூமித்தாயை மையப்படுத்தி, திருத்தந்தை பிரான்சிஸ் அவர்கள் எழுதியுள்ள ஒரு நூல், "நமது பூமித்தாய். சுற்றுச்சூழல் விடுக்கும் சவாலை ஒரு கிறிஸ்தவ கண்ணோட்டத்துடன் வாசித்தல்" என்ற தலைப்பில், அக்டோபர் 24ம் தேதி வெளியாகும் என்று அறிவிக்கப்பட்டுள்ளது. வத்திக்கான் நூலகம் வெளியிடும் இந்நூலுக்கு, கிறிஸ்தவ ஒன்றிப்பு முதுபெரும் தந்தை, முதலாம் பார்த்தலோமேயு அவர்கள் அணிந்துரை வழங்கியுள்ளார். இந்நூலில், திருத்தந்தை பிரான்சிஸ் அவர்கள் பதிவு செய்துள்ள சில பகுதிகளை, Corriere della Sera என்ற இத்தாலிய நாளிதழ், அக்டோபர் 16 இப்புதனன்று வெளியிட்டுள்ளது. பேராசை கலாச்சாரத்தின் ஆட்சி இவ்வுலகம் நமக்கு வழங்கப்பட்டுள்ள ஒரு கொடை என்பதை மறந்து, பேராசையால், உலகத்தை அபகரிக்கும் கலாச்சாரம் ஆட்சி செய்வதால், நாம் அனைவரும் மன்னிப்பு கேட்கவேண்டியுள்ளது என்று, திருத்தந்தை, இந்நூலில் கூறியுள்ளார் என்று, இந்த நாளிதழ் சுட்டிக்காட்டியுள்ளது. வாழ்வை அச்சுறுத்தும் பிரச்சனைகளை, வெறும் சுற்றுச்சூழல் பிரச்சனைகளாக மட்டும் கண்ணோக்கி, மேலோட்டமான தீர்வுகளைக் காண்பதற்குப் பதில், ஒட்டுமொத்த மனித சமுதாயமும், உள்ளார்ந்த மனமாற்றம் பெறவேண்டும் என்றும், இந்த மனமாற்றம் மன்னிப்பு வேண்டுவதில் துவங்க வேண்டும் என்றும், திருத்தந்தை பிரான்சிஸ் அவர்கள் இந்நூலில் வலியுறுத்தியுள்ளார். [2019-10-21 02:27:16]


திருத்தந்தை: பூர்வீக இன மக்கள் பிரதிநிதிகள் சந்திப்பு

கிறிஸ்தவம், யூத உலகில் பிறந்து, கிரேக்க-இலத்தீன் உலகில் வளர்ந்து, பின்னர், ஸ்லாவிய, கீழை மற்றும், அமெரிக்காவுக்குப் பரவியது மேரி தெரேசா: வத்திக்கான் செய்திகள் நற்செய்தி, விதை போன்றது, அது விழுகின்ற மண்ணிற்கேற்ற பண்புகளுடன் வளர்கின்றது என்று, திருத்தந்தை பிரான்சிஸ் அவர்கள், பூர்வீக இனங்களின் பிரதிநிதிகளிடம், இவ்வியாழனன்று கூறினார். அக்டோபர் 17, இவ்வியாழன் மாலை 3.30 மணியளவில், பூர்வீக இனங்களின் ஏறத்தாழ நாற்பது பிரதிநிதிகளைச் சந்தித்துப் பேசிய, திருத்தந்தை பிரான்சிஸ் அவர்கள், காலனி ஆதிக்கத்தின் புதிய வடிவங்களின் ஆபத்துக்கள் பற்றி எச்சரித்தார். கிறிஸ்தவத்தின் துவக்கம் பற்றிக் கூறியத் திருத்தந்தை, கிறிஸ்தவம், யூத உலகில் பிறந்து, கிரேக்க-இலத்தீன் உலகில் வளர்ந்து, பின்னர், ஸ்லாவிய, கீழை மற்றும், அமெரிக்காவுக்குப் பரவியது என்றும், மக்கள், தங்களின் கலாச்சாரத்தோடு இயேசுவின் நற்செய்தியைப் பெறுவதற்கு, நற்செய்தி, பண்பாட்டுமயமாக்கப்பட வேண்டும் என்றும் கூறினார். இந்த சந்திப்பு பற்றி செய்தியாளர்களிடம் அறிவித்த, திருப்பீட தகவல் தொடர்பகத்தின் இயக்குனர் மத்தேயோ புரூனி அவர்கள், அமேசான் உலக ஆயர்கள் மாமன்றத்தில் கலந்துகொள்ளும் பூர்வீக இனங்களின் பிரதிநிதிகள் உட்பட, தற்போது உரோம் நகரில், அமேசான் பற்றிய பல்வேறு நிகழ்வுகளை நடத்திவருபவர்கள் இதில் கலந்துகொண்டனர் என்று கூறினார். இக்குழுவினரை, பிரேசில் நாட்டு கர்தினால் Claudio Hummes, அந்நாட்டின் Porto Velho பேராயர் Roque Paloschi ஆகிய இருவரும், திருத்தந்தையிடம் அழைத்துச் சென்றனர் எனவும், பூர்வீக இனங்களைச் சேர்ந்த ஓர் ஆண் மற்றும், ஒரு பெண் ஆகிய இருவரும், இம்மாமன்றத்திற்காக, திருத்தந்தைக்கு நன்றி தெரிவித்தனர் எனவும், புரூனி அவர்கள் கூறினார். அமேசானில் தங்களின் நிலமும், தண்ணீரும் பாதுகாக்கப்படவும், தங்களின் மக்கள் அமைதியுடனும், மகிழ்வுடனும் வாழவும், தங்களின் தலைமுறைகள் மகிழ்வாக வாழ்கின்ற முறையில், இந்தப் பூமியை விட்டுச் செல்லவும் உதவுமாறு, அவ்விருவரும் திருத்தந்தையை கேட்டுக்கொண்டனர். [2019-10-20 00:01:55]


கத்தோலிக்கத் திருஅவையின் புள்ளிவிவரங்கள் 2019

2017ம் ஆண்டில் உலக கத்தோலிக்கரின் எண்ணிக்கை 131,32,78,000. இவ்வெண்ணிக்கை, 2016ம் ஆண்டைவிட, 1,42,19,000 அதிகம் மேரி தெரேசா: வத்திக்கான் செய்திகள் சிறப்பு மறைபரப்பு மாதத்தில், அக்டோபர் 20, இஞ்ஞாயிறன்று 93வது மறைபரப்பு ஞாயிறு சிறப்பிக்கப்படுவதையொட்டி, உலகளாவிய கத்தோலிக்கத் திருஅவையின் புள்ளிவிவரங்களை மீண்டும் வெளியிட்டுள்ளது, திருப்பீடத்தின் பீதேஸ் செய்தி நிறுவனம். 2017ம் ஆண்டு டிசம்பர் 31ம் தேதி வரையுள்ள புள்ளி விவரங்களின்படி, திருஅவையின் உறுப்பினர்கள், திருஅவை அமைப்புகள், நலவாழ்வு மற்றும், கல்வி பணிகள் பல்வேறு விவரங்களை, திருஅவையின் புள்ளிவிவர நூலிலிருந்து வெளியிட்டுள்ளது பிதேஸ் நிறுவனம். உலக மக்கள் தொகை, 2017ம் ஆண்டில் 740 கோடியே 83 இலட்சத்து 74 ஆயிரமாக இருந்தது எனவும், இவ்வெண்ணிக்கை, 2016ம் ஆண்டைவிட, 5 கோடியே 6 இலட்சத்து 85 ஆயிரம் அதிகம் என்றும், 2017ம் ஆண்டில் உலக கத்தோலிக்கரின் எண்ணிக்கை 131 கோடியே 32 இலட்சத்து 78 ஆயிரமாக இருந்தது எனவும், இவ்வெண்ணிக்கை, 2016ம் ஆண்டைவிட, 1 கோடியே 42 இலட்சத்து 19 ஆயிரம் அதிகம் என்றும் கூறப்பட்டுள்ளது. 2017ம் ஆண்டில் ஆசியாவில் இரண்டு திருஅவை ஆட்சிப்பீடங்கள் புதிதாக உருவாக்கப்பட்டன, அதேநேரம், அமெரிக்காவில் ஒன்று குறைக்கப்பட்டதால், அவ்வெண்ணிக்கை 2016ம் ஆண்டை விட ஒன்று அதிகரித்து, அதற்கு அடுத்த ஆண்டில் 3017 ஆக இருந்தது எனவும் அறிவிக்கப்பட்டுள்ளது. 2017ம் ஆண்டில், 5,389 ஆயர்கள் மற்றும், 4,14,582 அருள்பணியாளர்கள் இருந்தனர் என்று கூறும் அந்நிறுவனம், 71,305 பாலர் பள்ளிகள், 1,01,527 ஆரம்ப பள்ளிகள், மற்றும், 48,560 நடுத்தர பள்ளிகள் இருந்தன என்றும் கூறியுள்ளது. 5,269 மருத்துவமனைகள், 16,068 மருந்தகங்கள், 646 தொழுநோயாளர் பராமரிப்பு மையங்கள், 15,735 முதியோர் பராமரிப்பு இல்லங்கள், 9,813 கருணை இல்லங்கள் போன்ற கத்தோலிக்கத் திருஅவை நடத்தும் நலவாழ்வு மையங்கள் பற்றிய விவரங்களும் கொடுக்கப்பட்டுள்ளன. திருத்தந்தை 15ம் பெனடிக்ட் அவர்கள், 1919ம் ஆண்டு நவம்பர் 30ம் தேதி வெளியிட்ட “Maximum illud” என்ற திருத்தூது மடலின் நூறாம் ஆண்டு நிறைவைச் சிறப்பிக்கும் விதமாக, திருத்தந்தை பிரான்சிஸ் அவர்கள், 2019ம் ஆண்டு அக்டோபர் மாதம், சிறப்பு மறைபரப்பு மாதமாகக் கொண்டாடப்படுமாறு அறிவித்தார். (Fides) [2019-10-19 23:50:53]


அக்டோபர் 20, 93வது மறைபரப்பு ஞாயிறு

பிரிவினைகளை மேற்கொள்வதற்கு, உடன்பிறந்தநிலை மற்றும், உரையாடலைக் கைக்கொண்டு, சுதந்திரம் மற்றும், இரக்கத்தின் சான்றுகளாக வாழுங்கள் - திருத்தந்தை மேரி தெரேசா: வத்திக்கான் செய்திகள் உடன் வாழ்கின்றவர்களுக்கு நற்செய்தியின் ஒளியைக் கொண்டு செல்ல உங்களுக்கு அழைப்பு விடுக்கிறேன் என்று, திருத்தந்தை பிரான்சிஸ் அவர்கள், இச்சனிக்கிழமை வெளியிட்ட டுவிட்டர் செய்தியில் கூறியுள்ளார். “நம் காலத்தில் வாழ்கின்றவர்களுக்கு நற்செய்தியின் ஒளியைக் கொண்டு செல்வதற்கு உங்களை ஊக்கப்படுத்துகிறேன். பிரிவினைகளை மேற்கொள்வதற்கு, உடன்பிறந்தநிலை மற்றும், உரையாடலைக் கைக்கொண்டு, சுதந்திரம் மற்றும், இரக்கத்தின் சான்றுகளாக வாழ்வீர்களாக” என்று, திருத்தந்தை கூறியுள்ளார். 2019ம் ஆண்டு அக்டோபர் மாதம் சிறப்பு மறைபரப்பு மாதமாகவும், அக்டோபர் 20, இஞ்ஞாயிறன்று 93வது மறைபரப்பு ஞாயிறாகவும் சிறப்பிக்கப்படுவதை முன்னிட்டு, #ExtraordinaryMissionaryMonth #MissionaryOctober என்ற ‘ஹாஷ்டாக்’களுடன், திருத்தந்தை பிரான்சிஸ் அவர்கள், தன் டுவிட்டர் செய்தியை வெளியிட்டுள்ளார். மேலும், அக்டோபர் 20, இஞ்ஞாயிறு காலை பத்து மணிக்கு, வத்திக்கான் புனித பேதுரு பசிலிக்கா பேராலயத்தில், 93வது மறைபரப்பு ஞாயிறு திருப்பலியை நிறைவேற்றுவார், திருத்தந்தை பிரான்சிஸ். பத்து இலட்சம் சிறார் செபமாலை இன்னும், “பத்து இலட்சம் சிறார் செபமாலை செபிக்கின்றனர்” என்ற தலைப்பில், உதவி தேவைப்படும் திருஅவைகளுக்கு உதவும் Aid to the Church in Need பிறரன்பு அமைப்பு நடத்தும் நடவடிக்கையைப் பாராட்டி ஊக்குவித்து #HolyRosary உடன், அக்டோபர் 18, இவ்வெள்ளி மாலையில், ஒரு டுவிட்டர் செய்தியை வெளியிட்டார், திருத்தந்தை பிரான்சிஸ். அன்பு இளையோரே, ஒன்றிப்பு மற்றும், அமைதிக்காக நீங்கள் செபிக்கும்போது, செபமாலை மணிகளில் ஒன்றில் நான் இருக்கிறேன் என்பதை நினைவில் இருத்துங்கள் என்ற சொற்களை, இவ்வெள்ளியன்று, தன் டுவிட்டர் செய்தியில் பதிவுசெய்துள்ளார், திருத்தந்தை பிரான்சிஸ். [2019-10-19 23:38:21]


பக்க இலக்கங்களை அழுத்தி எல்லா செய்திகளையும் பார்வையிடவும்