வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



இத்தாலிய கர்தினால் Luigi De Magistris இறைவனடிச் சேர்ந்தார்.

பிப்ரவரி 16, புதன்கிழமையன்று இத்தாலிய கர்தினால் Luigi De Magistris அவர்கள் இறைவனடிச் சேர்ந்ததையொட்டி, தன் ஆழ்ந்த அனுதாபங்களைத் தெரிவித்து இரங்கல் செய்தி ஒன்றை வெளியிட்டுள்ளார் திருத்தந்தை பிரான்சிஸ். பிப்ரவரி 16, புதன்கிழமையன்று காலை 1.00 மணியளவில் 96 வயது நிரம்பிய இத்தாலிய கர்தினால் Luigi De Magistris அவர்கள் இறைவனடிச் சேர்ந்தார் என்றும், அவர் தனது அடுத்த பிறந்த நாளை வரும் 23ம் தேதி கொண்டாடவிருந்தார் என்றும் திருப்பீடம் அறிவித்துள்ளது. Cagliari என்னும் இடத்தில் 1926ம் ஆண்டு பிறந்த இவர், Cagliari பல்கலைக்கழகத்தில் தனது தத்துவவியல் படிப்பை முடித்து உரோமன் குருமடத்தில் தனது குருத்துவப் பயிற்சியை முடித்தார். Cagliariன் பேராலயத்தில் 1952ம் ஆண்டு, ஏப்ரல் 12ம் தேதியன்று பேராயர் Paolo Botto அவர்களால் குருவாக அருள்பொழிவுப் பெற்றார். திருத்தந்தையின் பணிகளில் இவர் தனது பெரும்பாலான ஆண்டுகளை செலவிட்டார் என்றும், 1996ம் ஆண்டு மார்ச் மாதம் 6ம் தேதி, திருத்தந்தை புனித இரண்டாம் ஜான் பால் அவர்களால் ஆயராகத் தேர்வு செய்யப்பட்டு அதே ஆண்டு ஏப்ரல் 28ம் தேதி Cagliariல் உள்ள Sant'Anna ஆலயத்தில் கர்தினால் Giovanni Canestri அவர்களால் ஆயராக அருள்பொழிவு செய்யப்பட்டார் என்றும், 2015ம் ஆண்டு பிப்ரவரி 4ம் தேதி திருத்தந்தை பிரான்சிஸ் இவரை கர்தினாலாக உயர்த்தினார் என்றும் திருப்பீடச் செய்தியில் தெரிவிக்கப்பட்டுள்ளது. [2022-02-18 00:08:17]


தாத்தா பாட்டிகள், முதியோர்கள் குறித்த திருத்தந்தையின் டுவிட்டர்

இவ்வாண்டு ஜூலை மாதம் 24ம் தேதி சிறப்பிக்கப்படவுள்ள தாத்தா பாட்டிகள் மற்றும் முதியோருக்கான உலகத் தினத்திற்குத் தன்னால் தேர்வுசெய்யப்பட்டுள்ள தலைப்பு, தலைமுறைகளுக்கிடையே கலந்துரையாடல்கள்களை ஊக்குவிக்கும் நோக்கமுடையது எனத் தன் டுவிட்டர் செய்தியில் குறிப்பிட்டுள்ளார் திருத்தந்தை பிரான்சிஸ். 'அவர்கள் முதிர் வயதிலும் கனி தருவர்' எனத் திருப்பாடல் 92லிருந்து எடுக்கப்பட்டுள்ள தலைப்பு, தலைமுறையினரிடையே, குறிப்பாக, தாத்தா பாட்டிகள் மற்றும் பேரக்குழந்தைகளிடையே கலந்துரையாடலை ஊக்குவிக்கும் நோக்கத்துடன் எடுக்கப்பட்டதாக, பிப்ரவரி 15, செவ்வாய்க்கிழமையன்று திருத்தந்தை பிரான்சிஸ் அவர்கள் வெளியிட்ட முதல் டுவிட்டரில் கூறப்பட்டுள்ளது. அதேநாளில் திருத்தந்தை வெளியிட்ட இரண்டாவது டுவிட்டர் செய்தியில், மனித குலத்தின் பெரும் புதையலாக இருக்கும் முதியோர் பராமரிக்கப்படவேண்டும், அவர்களே நம் ஞானமும் நினைவும், மனிதகுல, மற்றும் ஆன்மிக மதிப்பீடுகளின் உறைவிடமாக இருக்கும் முதியோர், நம் ஆணிவேராகவும் இருப்பதால் அவர்களுடன் பேரக்குழந்தைகள் இணைந்திருப்பது, இன்றியமையாதது எனக் கூறியுள்ளார். மேலும், பொருளாதார, மற்றும் சமூகப் பதட்ட நிலைகளை எதிர்நோக்கி இருக்கும் இன்றைய காலக்கட்டத்தில், தாத்தா பாட்டிகளுக்கும் பேரக்குழந்தைகளுக்கும் இடையேயான சந்திப்பில், தாத்தா பாட்டிகளின் ஞானமும் பேரக்குழந்தைகளின் ஆர்வமும் ஒன்றிணைவது முக்கியத்துவம் நிறைந்தது எனத் தன் மூன்றாவது டுவிட்டர் செய்தியில் விண்ணப்பித்துள்ளார் திருத்தந்தை பிரான்சிஸ். [2022-02-16 00:15:01]


தாத்தா பாட்டிகள், முதியோருக்கான சிறப்பு நாள் கொண்டாட்டம்

உலகில் தாத்தா பாட்டிகள் மற்றும் முதியோருக்கான ஒரு சிறப்பு நாளைக் கடந்த ஆண்டு துவக்கி வைத்துக் கொண்டாடியதைத் தொடர்ந்து, இவ்வாண்டு ஜூலை மாதம் 24ம் தேதி இத்தினம் சிறப்பிக்கப்படுமென திருப்பீடம் அறிவித்துள்ளது. வரலாற்றின் இந்த இரண்டாவது உலகத் தினத்திற்குத் தலைப்பாக 'அவர்கள் முதிர் வயதிலும் கனி தருவர்' என்ற 92ம் திருப்பாடல் வாக்கியத்தை திருத்தந்தை பிரான்சிஸ் அவர்கள் தேர்வு செய்துள்ளதாகத் திருப்பீடத்தின் பொதுநிலையினர், குடும்பம், மற்றும் வாழ்வு அவை வெளியிட்ட செய்தி தெரிவிக்கிறது. தாத்தா பாட்டிகளும் முதியோரும் எவ்வாறு திருஅவைக்கும் சமுதாயத்திற்கும் முக்கியத்துவம் நிறைந்தவர்கள் என்பதை உணர்த்தும் இவ்வண்டிற்கான இத்தலைப்பு, அவர்களின் மதிப்பையும் தேவையையும் குறித்து மீண்டும் சிந்திக்க நமக்கு அழைப்பு விடுப்பதாக உள்ளது எனத் தன் அறிக்கையில் தெரிவிக்கிறது இத்திருப்பீட அவை. வாழ்விலும் விசுவாசத்திலும் முதியோர் அடைந்துள்ள அனுபவங்கள், சமுதாயத்தைக் கட்டி எழுப்புவதற்கு உதவ முடியும் எனக் கூறும் இவ்வவை, திருஅவையின் ஒன்றிணைந்த பாதையில் இது மிக முக்கியத்துவம் நிறைந்தது என்பதையும் சுட்டிக்காட்டியுள்ளது. திருஅவையின் அனைத்து மறைமாவட்டங்களும், பங்குத்தளங்களும், அமைப்புகளும், சமுதாயங்களும் இச்சிறப்பு தினத்தை ஜூலை 24ம் தேதி ஞாயிறன்று நன்முறையில் கொண்டாடவேண்டும் என்றும், அதற்குத் தேவையான வழிகாட்டிகளையும் விவர ஏடுகளையும் விரைவில் வழங்கவுள்ளதாகவும், திருப்பீடத்தின் பொதுநிலையினர், குடும்பம், மற்றும் வாழ்வு அவை தன் அறிக்கையில் குறிப்பிட்டுள்ளது. [2022-02-16 00:09:28]


புனித லூர்து அன்னை பெருவிழா: திருத்தந்தையின் காணொளிச் செய்தி

பிப்ரவரி 11, வெள்ளிக்கிழமை, அர்ஜென்டினா நாட்டின் El Challaoல் உள்ள புனித லூர்து அன்னை திருத்தலத்தின் பெருவிழாக் கொண்டாட்டத்தையொட்டி காணொளிச் செய்தி ஒன்றை வழங்கியுள்ளார் திருத்தந்தை பிரான்சிஸ். புனித லூர்து அன்னையின் விழாவை மிகுந்த தயாரிப்புடன் கொண்டாட ஒன்றாக வந்துள்ள பக்தர்களை வாழ்த்திய திருத்தந்தை பிரான்சிஸ் அவர்கள், அன்னை மரியாவைப் போல வெளியே சென்று பிறருக்கு உதவும் ஒரு சமூகமாக வாழவேண்டும் என்று அவர்களுக்கு அழைப்பு விடுத்துள்ளார். சந்திப்பு என்பது உண்மையிலியேயே சவால் நிறைந்த ஒன்று என்றும், அது தன் உயிரையே பணயம் வைக்கும் உன்னதமான செயல் என்றும் எடுத்துக்காட்டிய திருத்தந்தை பிரான்சிஸ் அவர்கள், சந்திப்பு என்பது ஒன்றாக நடப்பது என்றும் தனிமையில் இருப்பதைத் தவிர்த்து, மற்றவர்களுடன், நண்பர்களுடன், குடும்பத்தினருடன், கடவுளின் மக்களுடன், அன்னை மரியாவுக்கு முன்பாக இறைவேண்டலில் ஒன்றாகப் பயணிப்பது என்றும் அதில் விளக்கியுள்ளார். இதன் காரணமாகத்தான் நாம் எப்போதும் ஒரே சமூகமாக ஒன்றாகப் பயணிக்க அன்னை மரியாவின் செப உதவியையும், பரிந்துரையையும், பாதுகாப்பையும் வேண்டுகிறோம் என்றும், நாம் வெளியில் சென்று பிறரைச் சந்தித்து உதவிகள் புரிய ஒரே குழுமமாகச் செல்வோம் என்றும் விசுவாசிகளைக் கேட்டுக்கொண்டுள்ளார். சந்திப்பு என்பது எப்போதும் மற்றவர்களுக்குத் திறந்த இதயத்தைக் காட்டுவது என்றும், இதற்கு நேர்மாறானது ஒருவரின் இதயத்தை எப்போதும் மூடியே வைத்திருப்பது என்றும் எடுத்துக்காட்டிய திருத்தந்தை பிரான்சிஸ், “அன்னையே, நாங்கள் எப்போதும் மூடிய இதயங்களைக் கொண்டிராமல், பிறருக்குப் பணியாற்றத் தாயாராக இருக்கும் திறந்த இதயங்களைக் கொண்டிருக்க உதவுங்கள்” என்று அன்னை மரியாவிடம் இறைவேண்டல் செய்வோம் என்றும் கேட்டுக்கொண்டுள்ளார். [2022-02-12 23:42:28]


லித்வேனியாவில் துயருறும் புலம்பெயர்ந்தோருக்குத் திருத்தந்தை உதவி

லித்வேனியாவின் கிழக்கு எல்லைப் பகுதியில் கோவிட் பெருந்தொற்றாலும், கடுங்குளிராலும் துன்புறும் மக்களுக்கு உதவுவதெற்கென 50 ஆயிரம் யூரோக்களைத் திருத்தந்தை வழங்கியுள்ளதாக ஒன்றிணைந்த மனிதகுல வளர்ச்சிக்கான திருப்பீட அவை அறிவித்துள்ளது. லித்வேனிய எல்லைப் பகுதியில் வாழும் புலம்பெயர்ந்தோருக்கென லித்வேனிய கத்தோலிக்க காரித்தாஸ் அமைப்பின் வழியாகத் திருத்தந்தை பிரான்சிஸ் அவர்கள் வழங்கியுள்ள இத்தொகை, அவர்களுக்கு உணவு, மருந்து, மற்றும் குளிர்கால உடைகள் வாங்க பயன்படுத்தப்படும் என உரைக்கிறது மனிதகுல வளர்ச்சிக்கான திருப்பீட அவை. கடந்த ஆண்டின் இறுதியிலும், இவ்வாண்டின் துவக்கத்திலும் ஞாயிறு மூவேளை ஜெப உரைகளில், லித்வேனிய கிழக்கு எல்லைப் பகுதிகளில் துயருறும் புலம்பெயர்ந்தோர் குறித்து கவலையை வெளியிட்டதன் தொடர்ச்சியாக இந்நிதியுதவியை வழங்கியுள்ளார் திருத்தந்தை பிரான்சிஸ். [2022-02-12 23:36:56]


Malta நாட்டிற்குத் திருத்தூதுப் பயணம் மேற்கொள்ளும் திருத்தந்தை

திருத்தந்தை பிரான்சிஸ் அவர்கள் வரும் ஏப்ரல் மாதம் 2 முதல் 3ம் தேதிவரை Malta நாட்டிற்குத் திருப்பயணம் மேற்கொள்வார் என, பிப்ரவரி 10, வியாழனன்று, வத்திக்கான் செய்தித்துறை அறிவித்துள்ளது. Malta குடியரசுத் தலைவர், சமூகத்தலைவர்கள், மற்றும் அந்நாட்டின் கத்தோலிக்க திருஅவையின் அழைப்பை ஏற்று, திருத்தந்தை பிரான்சிஸ் அவர்கள் 2022 ஏப்ரல் 2 முதல் 3 வரை Maltaவிற்கான திருத்தூதுப் பயணத்தை மேற்கொள்கிறார் என்றும், Valletta, Rabat, Floriana மற்றும் Gozo தீவு ஆகியவைகளுக்குச் செல்கிறார் என்றும், அவரது திட்டம் மற்றும் பயணத்தின் கூடுதல் விவரங்கள் வரும் நாட்களில் அறிவிக்கப்படும் என்றும் வத்திக்கான் செய்தித்துறை அறிவித்துள்ளது. திருத்தந்தை ஏற்கனவே மே 2020ல் Maltaவுக்குச் செல்லத் திட்டமிட்டிருந்தார், ஆனால் கொரோனா தொற்றுநோய் பரவல் காரணமாக, அவரது பயணம் ஏற்கனவே ஜனவரி 25, 2022க்கு மாற்றியமைக்கப்பட்டிருந்தது. இத்தாலிய தீவான சிசிலிக்கு தெற்கே அமைந்துள்ள மால்டா, கி.பி 60ல் உரோம் நகர் செல்லும் வழியில் புனித பவுலடியார் பயணம் செய்த கப்பல் விபத்துக்குள்ளான இடமாகத் திருத்தூதர்களின் பணிகளில் குறிப்பிடப்பட்டுள்ளது. Maltaவின் ஏறக்குறைய 5 இலட்சம் மக்கள்தொகையில் பெரும்பான்மையானவர்கள் திருமுழுக்குப்பெற்ற கத்தோலிக்கர்கள் ஆவர். Maltaவின் அரசியலமைப்பின் கீழ் கத்தோலிக்க மதம், இந்நாட்டின் தேசிய மதமாக ஏற்றுக்கொள்ளப்பட்டுள்ளது. புனித இரண்டாம் ஜான் பால் 1990ல் Maltaவுக்குச் சென்ற முதல் திருத்தந்தை ஆவார். [2022-02-10 23:56:37]


உலக நோயுற்றோர் தின வலைதளக் கருத்தரங்கில் திருத்தந்தை

பிப்ரவரி 11, வெள்ளிக்கிழமையன்று, 30வது உலக நோயுற்றோர் தினத்தை முன்னிட்டு. "உலக நோயுற்றோர் தினம்: பொருள், இலக்குகள் மற்றும் சவால்கள்" என்ற தலைப்பில், மனித ஒருங்கிணைந்த வளர்ச்சிக்கான திருப்பீட அவையால் ஏற்பாடு செய்யப்பட்ட வலைத்தள கருத்தரங்கில் திருத்தந்தை பிரான்சிஸ் அவர்கள் கலந்துகொண்டு உரை வழங்கினார். நோயின் அனுபவம் நம்மை பலவீனப்படுத்துவதுடன், அது மற்றவர்களின் தேவையையும் உணர வைக்கிறது என்றும், நோய் வாழ்க்கையின் அர்த்தத்தைப் பற்றிய கேள்வியை எழுப்புகிறது என்றும் கூறிய திருத்தந்தை, அந்தக் கேள்வியை, நாம் நம்பிக்கையில் கடவுளுக்கு முன் கொண்டு வந்து அதற்கான விடையைத் தேடவேண்டும் என்று கூறினார். மேலும், நோயுற்றவர்களைக் கவனித்துக்கொண்ட புனிதர்கள், “எப்பொழுதும் உடல் மற்றும் ஆன்மாவின் காயங்களை குணப்படுத்துங்கள்; உடல் மற்றும் ஆன்மிக சிகிச்சைக்காக ஒன்றாக இறைவேண்டல் செய்து செயல்படுங்கள் என்ற தங்கள் தலைவரின் போதனைகளை மறக்கவில்லை என்றும் தெரிவித்த திருத்தந்தை, அத்தகைய மனநிலையை நாமும் கொண்டிருக்கவேண்டியது அவசியம் என்பதையும் சுட்டிக்காட்டினார். தனிநபர்வாதம், பிறரை அலட்சியப்படுத்துதல் ஆகியவை சுயநலத்தின் வடிவங்களாகும் என்றும், இது எதிர்பாராதவிதமாக நுகர்வோர் நலன் மற்றும் பொருளாதார தாராளமயம் ஆகியவற்றால் சமுதாயத்தில் வளர்க்கப்பட்டு, அதன் விளைவாக நலவாழ்வு துறையில்கூட ஏற்றத்தாழ்வுகளை உருவாக்குகின்றன என்று எச்சரித்த திருத்தந்தை பிரான்சிஸ், அங்குச் சிலர் சிறப்புச் சலுகையை அனுபவிக்கிறார்கள் என்றும், பலர் அடிப்படை சுகாதாரத்தைக் கூடப் பெறமுடியாமல் போராடுகிறார்கள் என்றும் தன் வருத்தத்தைப் பதிவு செய்தார். திருஅவை, மனிதகுலத்தின் நல்ல சமாரியர் இயேசுவைப் பின்பற்றி, துன்பப்படுபவர்களுக்காக எப்போதும் தன்னால் முடிந்த அனைத்தையும் செய்து வருகிறது என்றும், தனிப்பட்ட, மற்றும் பொருளாதாரம் ஆகிய இரண்டிலும் நோயாளிகளுக்காக பெரிய வளங்களையும் வசதிவாய்ப்புகளையும் உருவாக்கித் தருகிறது என்று விளக்கிய திருத்தந்தை பிரான்சிஸ், ஒருங்கிணைந்த மனிதப் பாதுகாப்புக்கான இந்தத் தொழிலும் பணியும், இன்று சுகாதாரத் துறையில் புதுமையான விடயங்களை புதுப்பிக்கவேண்டும் என்றும் கேட்டுக்கொண்டார். மருத்துவர்கள், செவிலியர்கள், மருந்தாளுனர்கள் மற்றும் அனைத்து சுகாதாரப் பணியாளர்களுக்கும், அதே போல் மருத்துவமனையில் பணியாற்றும் இருபால் துறவியர், நோய்வாய்ப்பட்டவர்களின் பராமரிப்புக்காக அர்ப்பணிக்கப்பட்ட நிறுவனங்களின் ஆண்கள் பெண்கள், மற்றும் பல தன்னார்வலர்கள் ஆகிய அனைவரின் அர்ப்பணம் நிறைந்த பணிகளுக்கு நன்றி தெரிவித்து தன் உரையை நிறைவு செய்தார் திருத்தந்தை. [2022-02-10 23:52:19]


புலம்பெயர்ந்தோர்மீதான தாக்குதல் குறித்த இரங்கல் செய்தி

Congo ஜனநாயகக் குடியரசின் தென் பகுதியில் புலம்பெயர்ந்து வாழும் மக்கள்மீது நடத்தப்பட்டக் கொடூரத் தாக்குதல்கள் மற்றும் மரணங்கள் குறித்துத் தன் ஆழ்ந்த கவலையை வெளியிட்டார் திருத்தந்தை. Congo நாட்டில் புலம்பெயர்ந்து வாழும் மக்களிடையே நடத்தப்பட்ட தாக்குதல்கள் குறித்து திருத்தந்தையின் ஆழ்ந்த அனுதாபங்களை வெளியிட்டு திருப்பீடச் செயலர் கர்தினால் பியெத்ரோ பரோலின் அவர்கள், அந்நாட்டு அரசுத்தலைவர் Felix Tshisekedi அவர்களுக்கு அனுப்பியுள்ள இரங்கல் தந்தியில், இறந்தவர்களுக்கான திருத்தந்தையின் உறுதியும், உறவுகளை இழந்து தவிப்போருக்கு ஆறுதலுக்கான உறுதியும் வழங்கப்பட்டுள்ளது. இத்தாக்குதலில் காயம்பட்டுள்ள மக்களுக்குக் குணப்படுத்தலையும், ஆறுதலையும் வழங்க இறைவனைநோக்கி வேண்டுவதோடு, அனைவரோடும் திருத்தந்தை தன் ஆன்மிக நெருக்கத்தையும் ஆழமான அனுதாபத்தையும் வெளியிடுவதாகவும் அத்தந்தி செய்தியில் கூறப்பட்டுள்ளது. Congo குடியரசின் கிழக்குப் பகுதியிலுள்ள Ituri மாவட்டத்தின் Plaine Savo Djuga என்ற இடத்திலுள்ள புலம்பெயர்ந்தோர் குடியிருப்புகளில் ஆயுதம் தாங்கிய குழுக்கள் பிப்ரவரி மாதம் ஒன்றாம் தேதி நடத்திய தாக்குதலில், 12க்கும் மேற்பட்ட குழந்தைகள் உட்பட குறைந்தபட்சம் 60 பேர் உயிரிழந்துள்ளனர், 40க்கும் மேற்பட்டோர் காயமடைந்துள்ளனர். Congo குடியரசில் 56 இலட்சம் பேர் புலம்பெயர்ந்தவர்களாக வாழ்கின்றனர். இவர்களிடையே ஐ.நா. அமைப்புகளும், கத்தோலிக்கப் பிறரன்பு அமைப்பான காரித்தாஸ் நிறுவனமும் சேவையாற்றி வருகின்றன. [2022-02-09 23:17:49]


உக்ரைனுக்காக செபித்தவர்களுக்கு நன்றி தெரிவித்தார் திருத்தந்தை

பிப்ரவரி 9, புதைக்கிழமையன்று, தான் வழங்கிய மறைக்கல்வி உரைக்குப் பின்பு, கடந்த ஜனவரி 26 அன்று, உக்ரைனில் அமைதிக்காக இறைவேண்டலில் இணைந்து செபித்த அனைத்து மக்களுக்கும் சமூகங்களுக்கும் நன்றி தெரிவிக்க விரும்புவதாகக் கூறினார் திருத்தந்தை பிரான்சிஸ். பதட்டங்கள், மற்றும் போர் அச்சுறுத்தல்களைத் தீவிரமான உரையாடல் மூலம் கடக்க வேண்டும் என்றும், “Normandy Format” என்ற அமைதி பேச்சுக்கள் இதற்குப் பயனளிக்கக் கூடும் என்றும், இதற்காக அமைதியை அருளும் கடவுளிடம் தொடர்ந்து மன்றாடுவோம் என்றும் கூறிய திருத்தந்தை பிரான்சிஸ் அவர்கள், போர் என்பது ஒரு மூடத்தனம் என்பதை நாம் மறந்துவிடக்கூடாது என்றும் எச்சரித்தார். வரும் பிப்ரவரி 11ம் தேதி வெள்ளிக்கிழமையன்று, ‘உலக நோயாளர்கள் தினம்’ என்றும், நோய்வாய்ப்பட்டிருக்கும் அன்பான மக்களை தான் நினைவுகூர விரும்புவதாகவும், அனைவருக்கும் ஆரோக்கியம் மற்றும் ஆன்மீக துணையுடன் உத்தரவாதம் கிடைக்கும் என்றும் கூறிய திருத்தந்தை பிரான்சிஸ், நோயாளர்களான நம்முடைய சகோதரர் சகோதரிகளுக்காகவும், அவர்களின் குடும்பங்களுக்காகவும், சுகாதார மற்றும் மேய்ப்புப் பணியாளர்களுக்காகவும், அவர்களைப் பராமரிக்கும் அனைவருக்காகவும் இணைந்து இறைவேண்டல் செய்வோம் என்றும் கேட்டுக்கொண்டார். [2022-02-09 23:14:08]


Quito வெள்ளத்தில் இறந்தவர்களுக்கு திருத்தந்தையின் இரங்கல் செய்தி

கடந்த ஜனவரி 31ம் தேதி Quitoவில் ஏற்பட்ட வெள்ளத்தில் சிக்கி உயிரிழந்த 27க்கும் மேற்பட்டோருக்கு இரங்கல் செய்தி ஒன்றை அனுப்பியுள்ள திருத்தந்தை பிரான்சிஸ், இறந்தவர்களின் இளைப்பாறுதலுக்காகவும், அவர்களது குடும்பத்தினருக்கு இறைவன் ஆறுதலளிக்கவும் இறைவேண்டல் செய்வதாகத் தெரிவித்துள்ளார். "இந்த அன்பான தேசத்தைத் தாக்கி, உயிழப்புகளை ஏற்படுத்தியதுடன், பலரைப் பாதிப்புள்ளாக்கி பொருள் சேதங்களையும் ஏற்படுத்திய இயற்கை பேரழிவுகளைப் பற்றி அறிந்து தான் மிகவும் வேதனை அடைந்ததாகவும் கூறிய திருத்தந்தை பிரான்சிஸ், இறந்தவர்களின் ஆன்ம இளைப்பற்றிக்காக வேண்டுவதாகவும் திருப்பீடச் செயலர், கர்தினால் Pietro Parolin அவர்கள், Quito பேராயர் Alfredo José Espinoza Mateus, sdb அவர்களுக்கு அனுப்பிய தந்திச் செய்தியில் கூறியுள்ளார். அதேபோன்று, இந்த வலி, மற்றும் நிச்சயமற்ற நிலையில் தவிக்கும் உறவினர்கள், மற்றும் அனைவருக்கும் ஆறுதல் அளிக்கவும், காணாமல் போனவர்களைத் தேடும் கடினமான பணிகளில் ஈடுபட்டுள்ள அனைவரையும் இறைவன் தன் அருளால் நிரப்பவும், பாதிக்கப்பட்ட பகுதிகளை மீண்டும் கட்டியெழுப்பவும், தான் தொடர்ந்து இறைவேண்டல் செய்வதாகவும் தந்திச் செய்தியில் திருத்தந்தை பிரான்சிஸ் அவர்கள் கூறியுள்ளதாக கர்தினால் Pietro Parolin தெரிவித்துள்ளார். [2022-02-09 23:10:02]


பக்க இலக்கங்களை அழுத்தி எல்லா செய்திகளையும் பார்வையிடவும்