வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



நோயுற்றோரையும், நோய்களையும் புரிந்துகொண்டு செயல்படுங்கள்

பொதுநலன் மற்றும் சமூகவளர்ச்சி குறித்த உண்மை நிலைகளை ஆராயும் நோக்கத்தில், இத்தாலியின் மருத்துவமனை மருந்தகங்கள், மற்றும், மருந்து தயாரிப்புப் பணிகளின் கூட்டமைப்பினர் நடத்திய தேசியக் கருத்தரங்கில் கலந்துகொண்டோருக்கு, அவர்களின் அர்ப்பண வாழ்விற்கு தேவையான மூன்று அறிவுரைகளை வழங்கியுள்ளார், திருத்தந்தை பிரான்சிஸ். அர்ப்பணத்தில் தொடர்ந்து செயல்பட, மூன்று வழிகள் கோவிட் பெருந்தொற்றால், பல நலவாழ்வுத் திட்டங்களில் குறிப்பிடத்தக்க அளவில் மாற்றங்கள் இடம்பெற்றுவருவதைச் சுட்டிக்காட்டியத் திருத்தந்தை, மருத்துவமனைகளில் மருந்துவழங்கும் பணியாளர்கள், தங்கள் அர்ப்பணத்தில் தொடர்ந்து செயல்பட, மூன்று வழிகளை முன்வைக்க விரும்புவதாக தெரிவித்து, முதல் வழியை, சமாரியர் உவமையிலிருந்து எடுத்துக்கொள்ளலாம் என உரைத்தார். பொறுமை, விடாமுயற்சி, நுணுக்கமான செயல்பாடு ஆகிய பண்புகளுடன் இடம்பெறும் மருந்தகப் பணியாளர்களின் சேவை, இறைவேண்டுதல், மற்றும் அன்புடன் இணையும்போது, ஒவ்வோர் நாள் வாழ்விலும் புனிதத்துவத்தை பிறப்பிக்கிறது என்பதை, அவர்களுக்குரிய முதல் பாதையாக எடுத்துரைத்தார் திருத்தந்தை. அக்கறையுடன் செயல்படுபவர்களாக... மருத்துவமனைகளில் நோயாளிகளுக்கு மருந்துக்களை வழங்கும் பணியில் ஈடுபடுவோர், ஆய்வுகள், சோதனைகள் போன்றவற்றில் ஈடுபடுவதோடு, நோயுற்றோரையும் அவர்களின் நோய்களையும் புரிந்துகொண்டு, அக்கறையுடன் செயல்படுபவர்களாக உள்ளனர் என்பதை, தன் இரண்டாவது பாதையாக எடுத்துரைத்த திருத்தந்தை பிரான்சிஸ் அவர்கள், மூன்றாவதாக, இவர்கள், பணியின் நன்னெறி கோட்பாடு குறித்து எடுத்துரைத்தார். ஒரு நோயாளியின் உயிரைக் காப்பாற்றும் பணியில் ஈடுபட்டிருக்கும் மருந்துகளை வழங்கும் பணியாளர்கள், எப்போதும் கவனமுடன் செயல்படவேண்டியவர்களாக உள்ளனர், அதேவேளை, பல வேளைகளில், தங்களுக்காக போராட இயலாத எளிய மக்களுக்கு எதிராக நிகழும் அநீதி நிலைகளை எதிர்த்து நிற்கவேண்டிய சுழலும் அவர்களுக்கு உருவாகலாம் என்பதையும் சுட்டிக்காட்டினார் திருத்தந்தை. கருக்கலைத்தல், உண்மையிலயே ஒரு கொலை குறிப்பாக, கருக்கலைத்தல் நிலைகள் பற்றிக் குறிப்பிட்ட திருத்தந்தை, கருச்சிதைவை மேற்கொள்வது உண்மையிலயே ஒரு கொலை என்பதால் அதில் உடந்தையாக இருப்பது அனுமதிக்கப்படாதது என்பதையும், கருக்கலைத்தல் என்பது எந்த பிரச்சனைக்கும் ஒரு தீர்வாக முடியாது என்பதையும் எடுத்தியம்பினார் திருத்தந்தை பிரான்சிஸ். சமூக நீதி பற்றியும் எடுத்துரைத்த திருத்தந்தை, இன்றைய சமுதாயத்தில், பயன்படுத்தி தூக்கியெறியும் கலாச்சாரம் பெருகியுள்ளதையும், சுற்றுச்சூழல் பாதுகாப்பின் தேவையையும், அறிவியலுக்கும், மனச்சான்றிற்கும் விசுவாசமாக இருக்கவேண்டிய தேவையையும், சுட்டிக்காட்டியத் திருத்தந்தை பிரான்சிஸ் அவர்கள், தன் இறுதி அறிவுரையாக, மருத்துவப்பணியாளர்கள் அனைவரும், ஒவ்வொருநாளும், குறைந்தது, 10 நிமிடங்கள் விவிலியத்தை வாசிக்குமாறு கேட்டுக்கொண்டார். [2021-10-14 23:25:25]


முழு அடைப்பு காலத்தில், இணையத்தில் மனித விற்பனை வளர்ச்சி

இணையவழி தொடர்புத் தொழில் நுட்பத்தைப் பயன்படுத்தி, மனித வர்த்தகம் வளர்ந்துள்ளதைக் குறித்து திருப்பீடம் மிகுந்த வேதனை அடைந்துள்ளது என்று, அக்டோபர் 12, இச்செவ்வாயன்று, வியென்னாவில், ஐ.நா. அவை ஏற்பாடு செய்திருந்த ஒரு கூட்டத்தில், திருப்பீடத்தின் சார்பில் அறிக்கையொன்று சமர்ப்பிக்கப்பட்டது. போதைப்பொருள் மற்றும் குற்றங்கள் குறித்து கண்காணிக்கும் ஐ.நா.அவையின் UNODC அலுவலகம், மனித வர்த்தகம் குறித்து, நடத்திய ஓர் அமர்வில், திருப்பீடத்தின் சார்பில் சமர்ப்பிக்கப்பட்ட அறிக்கையில், கோவிட்-19 பெருந்தொற்றினால் மனித வாழ்வு முடக்கப்பட்டக் காலத்திலும், மனித வர்த்தகம், இணையவழித் தொடர்புகளால் தழைத்து வந்துள்ளது என்று சுட்டிக்காட்டப்பட்டுள்ளது. கோவிட் பெருந்தொற்றின் காரண்மாக விதிக்கப்பட்ட முழு அடைப்பு காலத்தில், இணையவழி தேடல்களும், தொடர்புகளும் வளர்ந்துவந்ததையடுத்து, உணவுப்பொருள்களும், வீட்டுக்குத் தேவையான ஏனையப்பொருள்களும் விற்கப்பட்டதைப்போல், மனிதர்களும் விற்கப்பட்டனர் என்று, திருப்பீடம் தன் கவலையை வெளியிட்டுள்ளது. வளர்ந்துவரும் இந்த பெரும் குற்றத்தைக் குறித்து, திருத்தந்தை பிரான்சிஸ் அவர்கள் வெளியிட்டுள்ள வேதனைகளையும், கண்டனங்களையும் தன் அறிக்கையில் பதிவுசெய்துள்ள திருப்பீடம், இணையவழித் தொடர்புகளை, அரசுகள், தீவிரமாக கண்காணிப்பதன் வழியே, மனித வர்த்தகம் என்ற குற்றத்தை தடுக்கமுடியும் என்று கூறியுள்ளது. இணையவழி தொடர்புகள் குறித்து சட்டங்களை இயற்றுவதோடு அரசுகள் நின்றுவிடாமல், அவை நடைமுறைப்படுத்தப்படுவதையும் தொடர்ந்து கண்காணித்து வரவேண்டும் என்ற விண்ணப்பத்தை, திருப்பீடம், இவ்வறிக்கையின் வழியே விடுத்துள்ளது. மனித வர்த்தகத்திற்கு அடிப்படையாக இருக்கும் பணப்பரிமாற்றத்தின் வேர்களை ஒவ்வொரு அரசும், பன்னாட்டு நிறுவனங்களும் விரைவில் கண்டுபிடித்து, இந்த உலகளாவிய குற்றத்தைத் தடுக்கும் வழிகளை உறுதி செய்யவேண்டும் என்றும், திருப்பீடம் தன் அறிக்கை வழியே, அழைப்பு விடுத்துள்ளது. [2021-10-14 23:19:50]


திருத்தந்தையின் திருவழிபாடுகளுக்கு புதிய பொறுப்பாளர்

உலக ஆயர்கள் மாமன்றத்தை நடத்துவது என்பது, மனிதராகப் பிறந்த இறைவார்த்தையாம் இயேசு நடந்த பாதையில் பயணத்தைத் தொடர்வதாகும், அத்துடன், அவரின் அடிச்சுவடுகளைப் பின்பற்றி, மற்றவரின் வார்த்தைகளுக்குச் செவிமடுப்பதோடு, அவரது வார்த்தைகளையும் உற்றுக்கேட்பதாகும் என்று, திருத்தந்தை பிரான்சிஸ் அவர்கள், அக்டோபர் 12, இச்செவ்வாயன்று கூறியுள்ளார். 2023ம் ஆண்டு அக்டோபரில் வத்திக்கானில் நடைபெறவிருக்கும் 16வது உலக ஆயர்கள் மாமன்றத்திற்கு, உலக அளவில் ஈராண்டு தயாரிப்புப் பணிகளைத் துவக்கிவைத்துள்ள திருத்தந்தை, அம்மாமன்றம் பற்றி, இச்செவ்வாயன்று தன் டுவிட்டர் வலைப்பக்கத்தில் இவ்வாறு பதிவுசெய்துள்ளார். உலக ஆயர்கள் மாமன்றத்தை நடத்துவது என்பது, புதிய பாதைகள் மற்றும் மொழிகளைப் பரிந்துரைப்பதற்கு, எதிர்பாராத முறையில் திகைப்பூட்டும் வழியில், தூய ஆவியார் வரங்களைப் பொழிகிறார் என்பதை வியப்போடு கண்டுணர்வதாகும் என்றும், திருத்தந்தை தன் டுவிட்டர் செய்தியில் கூறியுள்ளார். மேலும், பேரருள்திரு தியோகோ ஜொவான்னி ரவெல்லி (Diego Giovanni Ravelli) அவர்களை, திருத்தந்தையின் திருவழிபாடுகளுக்குப் பொறுப்பாளராகவும், பாப்பிறை சிஸ்டீன் சிற்றாலய பாடகர் குழுவின் தலைவராகவும், திருத்தந்தை பிரான்சிஸ் அவர்கள் நியமித்துள்ளார். இத்தாலியில் 1965ம் ஆண்டில் பிறந்த பேரருள்திரு ரவெல்லி அவர்கள், திருவழிபாட்டியலில் முனைவர் பட்டம் பெற்றுள்ளவர். இதுவரை, திருத்தந்தையின் திருவழிபாடுகளுக்குப் பொறுப்பாளராகவும், பாப்பிறை சிஸ்டீன் சிற்றாலய பாடகர் குழுவின் தலைவராகவும் பணியாற்றிவந்த பேரருள்திரு குய்தோ மரினி அவர்கள், Tortona ஆயராக நியமிக்கப்பட்டுள்ளார் என்பது குறிப்பிடத்தக்கது. [2021-10-14 01:40:28]


மறைப்பணிகளுக்கென கொரிய கத்தோலிக்கர் செபமாலைகள்

மறைப்பணி நாடுகளில் பணியாற்றுவோருக்கு உதவுவதற்கென்று, தென் கொரியா நாட்டுக் கத்தோலிக்கர், செபமாலைகள் தயாரித்து வருகின்றனர் என்று யூக்கா செய்தி கூறுகிறது. Suwon மறைமாவட்டத்தின் Sanbon-dong பங்குத்தளத்தைச் சேர்ந்த கத்தோலிக்கர், ஆப்ரிக்கா மற்றும், இலத்தீன் அமெரிக்க நாடுகளில் பணியாற்றும் மறைப்பணியாளர்களுக்கு உதவுவதெற்கென்று, புதிய பொருள்கள், மற்றும், மறுசுழற்சி செய்யப்பட்ட பழைய செபமாலைகள் ஆகியவற்றிலிருந்து 18 மாதங்களுக்கு மேலாக, கைகளால் செபமாலைகளைத் தயாரித்துவருகின்றனர். இத்தயாரிப்புப் பணியில் ஈடுபட்டுள்ள, Sanbon-dong பங்குத்தளத்தின் செபமாலை பக்த சபையினர், இச்செபமாலைகளை இணையதளத்தில் விற்று அவற்றிலிருந்து கிடைக்கும் பணத்தை மறைப்பணி நாடுகளுக்கு அனுப்பிவருகின்றனர். அதோடு, அச்செபமாலைகளை, மறைப்பணி நாடுகளுக்கு, குறிப்பாக, அந்நாடுகளில் முதன்முறையாக திருநற்கருணை வாங்கும் சிறாருக்குப் பரிசாக வழங்கிவருகின்றனர். தங்கள் பங்குத்தளத்திலுள்ள மற்ற கத்தோலிக்கர் மத்தியில் செபமாலை செபிக்கவும் ஊக்குவித்து வருகின்றனர். செபமாலை அன்னை மரியாவுக்கு அர்ப்பணிக்கப்பட்ட இந்த அக்டோபர் மாதத்தில், 35 பேர் இப்பணியில் தீவிரமாக இறங்கியுள்ளனர் என்று யூக்கா செய்தி நிறுவனம், கூறியுள்ளது. Sanbon-dong பங்குத்தள ஆலயம், செபமாலை அன்னை மரியாவுக்கு அர்ப்பணிக்கப்பட்டதன் 25ம் ஆண்டு நிறைவு, கடந்த 2020ம் ஆண்டில் சிறப்பிக்கப்பட்டபோது. அந்நிகழ்வில், ஒரு கோடிச் செபமாலைகளைச் செய்து மறைப்பணி நாடுகளுக்கு அனுப்பும் திட்டம் உதித்தது என்று யூக்கா செய்தி மேலும் கூறியுள்ளது. (UCAN) [2021-10-14 01:35:29]


திருத்தந்தை முதலாம் யோவான் பவுல் – வாழ்க்கை குறிப்புகள்

திருத்தந்தை முதலாம் யோவான் பவுல் அவர்களின் பரிந்துரையை வேண்டியதால், அர்ஜென்டீனா நாட்டில், சிறுமி ஒருவர் முற்றிலும் குணமடைந்த நிகழ்வு, புதுமையென ஏற்றுக்கொள்ளப்பட்டதையடுத்து, வணக்கத்துக்குரிய இறையடியார் திருத்தந்தை முதலாம் யோவான் பவுல் அவர்கள் அருளாளராக உயர்த்தப்பட, திருத்தந்தை பிரான்சிஸ் அவர்கள், அக்டோபர் 13, இப்புதனன்று இசைவளித்துள்ளார். பத்து ஆண்டுகளுக்கு முன், அர்ஜென்டீனா நாட்டில், நரம்பு தொடர்பான நோயினால், இறக்கும் நிலையில் இருந்த பத்து வயது சிறுமிக்காக, அவரது பங்கு அருள்பணியாளர், திருத்தந்தை முதலாம் யோவான் பவுல் அவர்களின் பரிந்துரையை வேண்டியதன் பயனாக, அச்சிறுமி நலமடைந்த புதுமையின் விவரங்களை, புனித பட்ட வழிமுறைகளை ஒருங்கிணைக்கும் பேராயத்தின் தலைவர் கர்தினால் மார்செல்லோ செமராரோ அவர்கள் திருத்தந்தையிடம் சமர்ப்பித்தார். 1912ம் ஆண்டு அக்டோபர் 17ம் தேதி இத்தாலியின் Forno di Canale என்ற ஊரில் பிறந்த அல்பீனோ லூச்சியானி அவர்கள், 1978ம் ஆண்டு, ஆகஸ்ட் மாதம் 26ம் தேதி, அவரது 66வது வயதில் கத்தோலிக்கத் திருஅவையின் தலைமைப் பொறுப்பிற்கு தெரிவு செய்யப்பட்டார். இவரது தந்தை, ஓர் எளிய தொழிலாளியாக சுவிட்சர்லாந்து நாட்டில் பணிபுரிந்துவந்த வேளையில், இளையவர் அல்பீனோ லூச்சியானி அவர்கள், அருள்பணித்துவ பயிற்சிக்கு செல்ல விழைவதை அறிந்த வேளையில், இவரது தந்தை அவருக்கு, "நீ ஒரு அருள்பணியாளராக இருக்கும்போது, வறியோர் பக்கமே இருக்கவேண்டும், ஏனெனில் இயேசு அவர்கள் பக்கமே இருந்தார்" என்று எழுதி அனுப்பிய ஒரு மடலை, திருத்தந்தை முதலாம் யோவான் பவுல் அவர்கள், தன்னுடன், இறுதிவரை வைத்திருந்தார். 1935ம் ஆண்டு, அருள்பணியாளராக திருப்பொழிவு பெற்ற அல்பீனோ லூச்சியானி அவர்களை, 1958ம் ஆண்டு, திருத்தந்தை புனித 23ம் யோவான் அவர்கள், திருத்தந்தையாகப் பொறுப்பேற்ற சிறிது காலத்தில், Vittorio Venetoவின் ஆயராக நியமித்தார். இரண்டாம் வத்திக்கான் சங்கத்தில் முழுமையாகப் பங்கேற்ற ஆயர் லூச்சியானி அவர்களை, திருத்தந்தை புனித 6ம் பவுல் அவர்கள், 1969ம் ஆண்டு வெனிஸ் உயர் மறைமாவட்டத்தின் முதுபெரும் தந்தையாக நியமித்து, 1973ம் ஆண்டு அவரை கர்தினாலாக உயர்த்தினார். "தாழ்ச்சி" என்ற ஒரு சொல்லை, தன் ஆயர் பணியின் விருதுவாக்காக தெரிவு செய்திருந்த கர்தினால் லூச்சியானி அவர்கள், இரண்டாம் வத்திக்கான் சங்கத்தைத் தொடர்ந்துவந்த நாள்களில் வெனிஸ் உயர் மறைமாவட்டத்தில் பல சவால்கள் நிறைந்த சூழல்களைச் சந்தித்து, திறமையுடன் மறைமாவட்டத்தை வழிநடத்திச் சென்றார். 1978ம் ஆண்டு ஆகஸ்ட் 6ம் தேதி, கிறிஸ்து தோற்றமாற்றம் பெற்ற திருநாளன்று, திருத்தந்தை புனித 6ம் பவுல் அவர்கள் இறையடி சேர்ந்ததையடுத்து, ஆகஸ்ட் 26ம் தேதி கூடிய கர்தினால்கள் அவை, ஒரே நாளில், கர்தினால் லூச்சியானி அவர்களை, திருத்தந்தையாக தெரிவு செய்தது. திருஅவை வரலாற்றிலேயே முதல்முறையாக திருத்தந்தை ஒருவர், இரண்டு பெயர்களை இணைத்து ‘யோவான் பவுல்’ என்பதை, தன் பெயராகத் தெரிவு செய்தார். 'புன்னகைக்கும் திருத்தந்தை' என்ற பெயரைப் பெற்ற முதலாம் யோவான் பவுல் அவர்கள், அதுவரை திருத்தந்தையர் தங்கள் உரைகளில் பயன்படுத்தி வந்த 'நாம்' என்ற சொல்லை விட்டுவிட்டு, 'நான்' என்று தன்னைப்பற்றிக் குறிப்பிட்டுப் பேசினார். திருஅவை வரலாற்றில் மிகக் குறுகியகாலம் பணியாற்றிய திருத்தந்தையர் வரிசையில், 33 நாள்கள் மட்டுமே திருத்தந்தையாகப் பணியாற்றிய முதலாம் யோவான் பவுல் அவர்கள், 1978ம் ஆண்டு, செப்டம்பர் 28ம் தேதி இறையடி சேர்ந்தார். [2021-10-14 01:20:45]


பெரூஜியா-அசிசி 60வது நடைபயணம் – திருத்தந்தை செய்தி

உலக அமைதி வேண்டி, இத்தாலியின் பெரூஜியா நகரிலிருந்து, அசிசி நகர் நோக்கி நடைபெற்ற 60வது நடைப்பயணத்தில் கலந்துகொண்ட அனைவருக்கும் தன் பாராட்டுக்களையும், இறை வேண்டுதல்களையும், திருத்தந்தை பிரான்சிஸ் அவர்கள், ஒரு மடல் வழியே தெரிவித்துள்ளார். 1961ம் ஆண்டு முதல், ஒவ்வோர் ஆண்டும் நடைபெற்றுவரும் பெரூஜியா-அசிசி நடைபயணம், இவ்வாண்டு, அக்டோபர் 9,10 ஆகிய நாள்கள் நடைபெற்றதையொட்டி, அசிசி ஆயராகப் பணியாற்றும் பேராயர் Domenico Sorrentino அவர்களுக்கு, திருத்தந்தை, தன் வாழ்த்து மடலை அனுப்பியுள்ளார். "அமைதியின் புதிய பெயர் அக்கறை" என்ற மையக்கருத்துடன் இந்த நடைப்பயணம் மேற்கொள்ளப்பட்டதைக் குறித்து தன் மகிழ்வை வெளியிட்ட திருத்தந்தை பிரான்சிஸ் அவர்கள், அக்கறை என்ற கருத்து, தற்போதையை உலகில், பல நிலைகளில் பேசப்பட்டு வருகிறது என்பதை, சிறப்பாகக் குறிப்பிட்டார். அக்கறையற்ற நிலை, வெறுப்பு, வன்முறை ஆகியவை பெருகியுள்ள இவ்வுலகில், அக்கறை காட்டும் கலாச்சாரம், மனிதர்களிடையில் வளர்ந்து, அந்த அக்கறை, படைப்பின் மீதும் காட்டப்படவேண்டும் என்று, திருத்தந்தை, தன் செய்தியில் வலியுறுத்திக் கூறியுள்ளார். உலக அவைகளில் அமைதியைக் குறித்த அறிக்கைகள் வெளியாகிவரும் அதே வேளையில், அமைதியைக் குலைக்கும் போர்க்கருவிகளுக்கு ஒவ்வோர் அரசும் அதிக நிதியை ஒதுக்குவது குறித்து, தன் செய்தியில் குறிப்பிட்டுள்ள திருத்தந்தை பிரான்சிஸ் அவர்கள், இந்த வெளிவேட நிலையை மாற்ற, அக்கறைகாட்டும் சமுதாயத்தை வளர்ப்பது நம் கடமை என்று கூறினார். ஆண்டுக்கு ஒருமுறை நடைபயணம் மேற்கொள்வது மட்டும், உலகில் அக்கறையை வளர்க்க, போதுமான முயற்சி அல்ல என்பதை குறிப்பிட்ட திருத்தந்தை, ஒவ்வொரு நாளும், நம் தினசரி வாழ்வில், இந்த அக்கறையை, மனிதர்கள் மீதும், படைப்பு அனைத்தின் மீதும் வளர்ப்பது, நம் அனைவருக்கும் உள்ள கடமை என்று கூறி, தன் செய்தியை நிறைவுசெய்துள்ளார். [2021-10-12 00:18:53]


பிறரன்பு அருள்சகோதரிகள் துறவு சபையை சந்தித்த திருத்தந்தை

உலக ஆயர்கள் மாமன்ற நிகழ்வுகள், திருஅவையின் அனைத்து தளங்களிலும் துவங்கியுள்ள இவ்வேளையில், தங்கள் உலகப் பொதுஅவையை நடத்தியிருக்கும் பிறரன்பு அருள்சகோதரிகள் துறவு சபையை வாழ்த்துவதாக, திருத்தந்தை பிரான்சிஸ் அவர்கள், தன்னைச் சந்திக்க வந்திருந்த இத்துறவு சபையின் பிரதிநிதிகளிடம் கூறினார். புனித Joan Antida Thouret அவர்களின் பிறரன்பு அருள்சகோதரிகள் துறவு சபையைச் சேர்ந்தவர்கள், கோவிட் பெருந்தொற்றின் காரணமாக உருவான பல தடங்கல்களை தாண்டி, தங்கள் 21வது உலகப் பொதுஅவையை வெற்றிகரமாக நிறைவுசெய்து, திருத்தந்தையைச் சந்திக்க, வத்திக்கானுக்கு வருகை தந்ததையொட்டி, திருத்தந்தை அவர்களைப் பாராட்டினார். ஆயர்கள் மாமன்றத்தின் ஒருங்கிணைந்த பயணம் ஆரம்பமாகியுள்ள இவ்வேளையில், அர்ப்பணிக்கப்பட்ட வாழ்வை மேற்கொண்டோர், திருஅவையின் ஒரு முக்கிய அங்கம் என்பதை, பிறரன்பு அருள்சகோதரிகள் துறவு சபையைச் சேர்ந்தவர்கள் இன்னும் ஆழமாக உணரவேண்டும் என்று, திருத்தந்தை இச்சந்திப்பில் குறிப்பிட்டார். 'இயேசு நகர் நகராய், ஊர் ஊராய்ச் சென்று இறையாட்சிபற்றிய நற்செய்தியைப் பறைசாற்றிய' காலத்தில், அவருக்கு பெரும் துணையாக இருந்த பெண்களைக் குறித்து (காண்க. லூக்கா 8:1-3) இச்சந்திப்பில் பேசியத் திருத்தந்தை பிரான்சிஸ் அவர்கள், அந்த பெண்கள் குழுவின் ஒரு தொடர்ச்சியாக, பிறரன்பு அருள்சகோதரிகள் துறவு சபையை தான் காண்பதாகக் கூறினார். இயேசுவின் பறைசாற்றுதல் பயணத்தில், இத்துறவு சபையின் பங்கு என்னவாக இருக்கவேண்டும் என்ற கேள்வியை தன் உரையில் எழுப்பிய திருத்தந்தை, பெத்தானியாவில் வாழ்ந்த மார்த்தா, மரியா என்ற இரு சகோதரிகளில், இயேசுவின் காலடியில் அமர்ந்து செவிமடுத்த மரியா, இக்கேள்விக்கு விடையாக அமைகிறார் என்று கூறினார். இயேசுவின் காலடியில் அமர்ந்திருந்த மரியாவை, இத்துறவு சபையினர், தங்கள் உலக அவைக்கு ஒரு முக்கிய அடையாளமாக கொண்டிருந்ததைக் சுட்டிக்காட்டி பாராட்டியத் திருத்தந்தை பிரான்சிஸ் அவர்கள், இயேசுவுக்குச் செவிமடுக்கும் அதே வேளையில், வறியோரின் குரலுக்கும் இத்துறவு சபையின் உறுப்பினர்கள் செவிமடுக்கவேண்டும் என்று கேட்டுக்கொண்டார். இறைவனின் அன்பை இவ்வுலகிற்கு சொல்லித்தர அழைக்கப்பட்டுள்ள இத்துறவு சபையினர், தங்கள் சொற்கள் வழியாக அல்லாமல், செயல்கள் வழியே இந்த அன்பை பறைசாற்ற, புனித Joan Antida அனைவருக்கும் உதவி செய்வாராக என்று கூறி, திருத்தந்தை தன் உரையை நிறைவு செய்தார். [2021-10-12 00:11:07]


சிறந்த பங்கை வருங்காலத் தலைமுறைகளுக்கு வழங்க

வருகிற நவம்பரில் நடைபெறவிருக்கும் COP26 எனப்படும் காலநிலை மாற்றம் குறித்த 26வது உலகத் தலைவர்களின் மாநாட்டிற்கு தயாரித்துவரும் அரசியல்வாதிகள், பொறுப்புணர்வு, மற்றும் ஒருமைப்பாட்டுணர்வு ஆகிய இரு முக்கிய கொள்கைகளின் ஒளியால் தூண்டப்பட்டு செயல்படவேண்டும் என்று, திருத்தந்தை பிரான்சிஸ் அவர்கள் கேட்டுக்கொண்டார். “சனநாயகத்திற்காக, அனைத்து மக்களுக்காக” என்ற இலக்குடன் கடந்த 130 ஆண்டுகளுக்கு மேலாகப் பணியாற்றிவரும் IPU எனப்படும், தேசிய பாராளுமன்றங்களின் உலகளாவிய அமைப்பின் ஏறத்தாழ 500 பிரதிநிதிகள், அக்டோபர் 09, இச்சனிக்கிழமை நண்பகலில், வத்திக்கானின் திருத்தந்தை புனித 6ம் பவுல் அரங்கத்தில் திருத்தந்தை பிரான்சிஸ் அவர்களைச் சந்தித்தனர். COP26 உலக உச்சி மாநாட்டிற்குத் தயாரிப்பாக, அக்டோபர் 8, இவ்வெள்ளி, 9 இச்சனி ஆகிய இரு நாள்களில் உரோம் நகரில் கூட்டம் நடத்திய, இந்த அமைப்பின் உறுப்பினர்களுக்கு உரையாற்றிய திருத்தந்தை, இம்மாதம் 4ம் தேதி, பல்வேறு மதத் தலைவர்கள் மற்றும், அறிவியலாளர்களோடு இணைந்து, காலநிலை மாற்றத்தைக் குறைப்பதற்கு உலகத் தலைவர்களுக்கு தான் விடுத்த விண்ணப்பம் குறித்து எடுத்துரைத்தார். அக்டோபர் 04, கடந்த திங்களன்று வத்திக்கானில், “நம்பிக்கை மற்றும் அறிவியல்: COP26 நோக்கி” என்ற தலைப்பில் நடைபெற்ற கருத்தரங்கில் கலந்துகொண்ட மதத் தலைவர்களும், அறிவியலாளர்களும், தானும் இணைந்து கையெழுத்திட்டு வெளியிட்ட விண்ணப்ப அறிக்கை, பல மாதங்களாக இடம்பெற்ற ஆழமான உரையாடல்களின் வெளிப்பாடு என்றும் திருத்தந்தை கூறினார். இந்த விண்ணப்பத்தின் வழியாக, காலநிலை மாற்றத்தால், நாமும், நமது அழகான பொதுவான இல்லத்தின் வாழ்வும், முன்னெப்போதும் இல்லாத அளவுக்கு, எவ்வாறு அச்சுறுத்தலை எதிர்கொண்டு வருகிறது என்ற விழிப்புணர்வையும், குறிப்பாக, பெருந்தொற்றுச் சூழலில் ஒருமைப்பாட்டின் முக்கியத்துவத்தையும் வலியுறுத்திக் கூறியுள்ளோம் என்று திருத்தந்தை கூறினார். சூழலியல் கல்வி காலநிலை மாற்றத்தைக் குறைப்பதற்கு நாம் மேற்கொள்ளும் எண்ணற்ற அர்ப்பணங்களில் கல்வி முக்கிய அங்கம் வகிக்கின்றது என்றும், ஒருங்கிணைந்த சூழலியல் கல்வியை ஊக்குவிப்பதற்கு, மதங்களின் பிரதிநிதிகள் உறுதியெடுத்துள்ளனர் என்றும், திருத்தந்தை பிரான்சிஸ் அவர்கள் கூறினார். அதேநேரம், உலகளாவிய வெப்பநிலை உயர்வைக் குறைப்பதற்கு, பன்னாட்டு ஒத்துழைப்பை உறுதிப்படுத்தி, காலதாமதமின்றி துணிச்சலான நடவடிக்கைகளை உடனடியாக மேற்கொள்ளுமாறு, மதங்களின் பிரதிநிதிகள், அரசுகளுக்கு விண்ணப்பிக்கின்றனர் எனவும் திருத்தந்தை கூறினார். புதுப்பிக்கப்படக்கூடிய மின்சக்தி தயாரிப்பு, நிலங்களைப் பேணிக் காத்தல், நிலங்கள் தரிசு நிலங்களாக ஆவதைத் தடுத்தல், காடுகளைப் பாதுகாத்தல், பல்லுயிர்களைப் பாதுகாத்தல், உள்ளூர் கலாச்சாரங்களை மதிக்கின்ற மற்றும், சூழலியலை நட்போடு அணுகும் உணவு அமைப்புமுறைகளுக்கு ஆதரவளித்தல், பசி மற்றும் ஊட்டச்சத்துப் பற்றாக்குறையை நீக்குதல் உட்பட பல்வேறு விவகாரங்களில் அரசுகள் கவனம் செலுத்துமாறும் திருத்தந்தை அழைப்புவிடுத்தார். நல்ல அரசியல் தலைவர்களின் பண்புகள் இதில் அனைவருக்கும், குறிப்பாக அரசியல் மற்றும் அரசுத் தலைவர்களுக்கு மிக முக்கியமான பங்கு உள்ளது எனவும், இந்தச் சவால்களை எதிர்கொள்ள, மிகுந்த ஞானம், தொலைநோக்குப் பார்வை, மற்றும், பொதுநலன் மீது அக்கறை ஆகியவை தேவைப்படுகின்றன என்றும், இவையே நல்ல அரசியலின் அடிப்படைப் புண்ணியங்கள் எனவும் திருத்தந்தை கூறினார். இளையோரும் வருங்காலத் தலைமுறைகளும் நம்பிக்கையில் வாழ்வதை உறுதிப்படுத்தும்வண்ணம், பாராளுமன்ற உறுப்பினர்கள், ஞானத்தோடும் நீதியோடும் தீர்மானங்களை மேற்கொள்ளுமாறு கேட்டுக்கொண்டு தன் உரையை நிறைவுசெய்தார், திருத்தந்தை பிரான்சிஸ். IPU எனப்படும் தேசிய பாராளுமன்றங்களின் உலகளாவிய அமைப்பு, 1889ம் ஆண்டில் பிரித்தானியாவின் William Randal Cremer, பிரான்சின் Frédéric Passy ஆகிய அமைதியை விரும்பிய இரு பாராளுமன்ற உறுப்பினர்களால் ஆரம்பிக்கப்பட்டது. தற்போது இந்த அமைப்பில், 179 பாராளுமன்றங்களின் உறுப்பினர்கள் உள்ளனர். COP 26 உலக உச்சி மாநாடு, ஸ்காட்லாந்தின் கிளாஸ்கோ நகரில் இம்மாதம் 31ம் தேதியிலிருந்து நவம்பர் 12ம்தேதி வரை நடைபெறவுள்ளது. [2021-10-11 00:08:14]


மத்தியக் கிழக்குப் பகுதியில், கிறிஸ்தவம் தொடர்ந்து நிலைக்க...

கிறிஸ்தவம் முதன் முதலாக அறிவிக்கப்பட்ட மத்தியக் கிழக்குப் பகுதியில், கிறிஸ்தவம் தொடர்ந்து நிலைத்திருப்பது, அங்கு வாழும் கிறிஸ்தவர்களின் கரங்களில் உள்ளது என்று, ஈராக் நாட்டில் பணியாற்றும் கல்தேய வழிபாட்டுமுறை முதுபெரும் தந்தை, கர்தினால் லூயிஸ் இரபேல் சாக்கோ அவர்கள் கூறினார். மத்தியக் கிழக்குப் பகுதிகளில் வாழும் கிறிஸ்தவர்கள், தங்களையே ஒரு குறுகிய குழுவாக எண்ணிப்பார்க்காமல், ஒட்டுமொத்த சமுதாயத்தின் ஒரு பகுதியாகக் கருதி, சமுதாயத்தின் அனைத்து கடமைகளிலும் கலந்துகொள்வது, கிறிஸ்தவர்களுக்கு முன் உள்ள அழைப்பு என்று, கர்தினால் சாக்கோ அவர்கள் எடுத்துரைத்தார். அக்டோபர் 12ம் தேதி, ஈராக் நாட்டில் நடைபெறவிருக்கும் தேர்தல்களை மனதில் கொண்டு இவ்வாறு கூறிய கர்தினால் சாக்கோ அவர்கள், தாங்கள் சிறுபான்மையினர் என்ற எண்ணத்திலிருந்து விடுதலை பெற்று, கிறிஸ்தவர்கள், ஈராக் நாட்டின் மிக முக்கியமான கடமையான தேர்தலில், முழுமனதுடன் பங்கேற்பது அவசியம் என்று, வலியுறுத்திக் கூறினார். 2003ம் ஆண்டு, சதாம் ஹுசெயின் அவர்களின் வீழ்ச்சிக்குப் பின், கிறிஸ்தவர்களுக்கு எதிராக நிகழ்ந்த வன்முறைகளுக்கு பயந்து, 10 இலட்சத்திற்கும் அதிகமான கிறிஸ்தவர்கள் ஈராக் நாட்டை விட்டு வெளியேறினர் என்பதைச் சுட்டிக்காட்டிய கர்தினால் சாக்கோ அவர்கள், இதற்கு மாறாக, ஒரு சில கிறிஸ்தவர்கள், இந்நாட்டில், அரசியல் கட்சிகளைத் துவக்கியது, ஊக்கமளிக்கும் அடையாளமாக இருந்தது என்று கூறினார். பிரித்து ஆள்வது அரசியல்வாதிகளின் போக்கு என்பதை நினைவுறுத்திய கர்தினால் சாக்கோ அவர்கள், இந்த போக்கிற்கு மாறாக, கிறிஸ்தவர்கள், பிரிவுகளை ஆதரிக்கும் குழுக்களாக இல்லாமல், மற்றவர்களோடு இணைந்து, ஒட்டுமொத்த சமுதாயத்தின் நலனுக்காக உழைப்பவர்களாக மாறவேண்டும் என்று கேட்டுக்கொண்டார். (Fides) [2021-10-08 09:48:14]


உயிரினங்கள் அனைத்தையும் பாதிக்கும் மனித நடவடிக்கை

கிறிஸ்துவின் சீடர்கள் என்ற முறையில் நாம் மேற்கொள்ளும் சிந்தனைகள், குறிப்பாக, சுற்றுச்சூழல் மீது நாம் கொண்டுள்ள அக்கறை, பல பன்னாட்டு நிறுவனங்களின் எண்ணங்களில் ஊடுருவி இருப்பதை, இந்த அரங்கத்தில் காணமுடிகிறது என்று திருத்தந்தை பிரான்சிஸ் அவர்கள் அக்டோபர் 7, இவ்வியாழனன்று, ஒரு பன்னாட்டு கருத்தரங்கில் கூறினார். உரோம் நகரின் இலாத்தரன் பாப்பிறை பல்கலைக்கழகமும், UNESCO நிறுவனமும் இணைந்து, சுற்றுச்சூழலை மையப்படுத்தி, இலாத்தரன் பல்கலைக்கழகத்தில், நிறுவியுள்ள ஒரு புதிய பாடத்திட்டத்தை துவக்கிவைக்கும் நிகழ்வை தலைமையேற்று நடத்திய வேளையில், திருத்தந்தை, இவ்வாறு தன் உரையை துவக்கினார். அண்மையில், கிறிஸ்தவ ஒன்றிப்பு முதுபெரும் தந்தை முதலாம் பார்த்தலோமேயு, ஆங்கிலிக்கன் சபையின் உலகத்தலைவர் பேராயர் ஜஸ்டின் வெல்பி, ஆகியோருடன் தானும் இணைந்து, COP26 சுற்றுச்சூழல் உச்சி மாநாட்டில் கலந்துகொள்ளவிருக்கும் உலகத் தலைவர்களுக்கென உருவாக்கிய ஒரு சிறப்பு விண்ணப்பத்தைக் குறித்து, திருத்தந்தை பிரான்சிஸ் அவர்கள், தன் உரையில் குறிப்பிட்டார். மனிதர்களாகிய நாம் பூமிக்கோளத்தில் விளைவித்துவரும் அழிவுகள், சுற்றுச்சூழல், நீர், நிலம் ஆகியவற்றை மட்டும் பாதிக்கவில்லை, மாறாக, மனிதர்கள் உட்பட, உயிரினங்கள் அனைத்தையும் பாதிக்கின்றன என்பதை, திருத்தந்தை, தன் உரையின் துவக்கத்தில் ஓர் எச்சரிக்கையாக விடுத்தார். சிந்தனைகள் சந்திப்பதற்கும், அறிவை வளர்ப்பதற்கும் உருவாக்கப்பட்டுள்ள பல்கலைக்கழகங்கள், எதிர்காலத்திற்கென, இளம் தலைமுறையினரை உருவாக்கும் உன்னத இடங்கள் என்பதை தன் உரையில் சிறப்பாகக் குறிப்பிட்ட திருத்தந்தை பிரான்சிஸ் அவர்கள், இத்தகையப் பல்கலைக்கழகங்கள், சுற்றுச்சூழலைக் குறித்த மனமாற்றத்தை இளையோரிடம் உருவாக்க கடமைப்பட்டுள்ளன என்று எடுத்துரைத்தார். படைப்பிற்கும், மனித சமுதாயத்திற்கும் இடையே உள்ள தொடர்பை, இறையியல், மெய்யியல் மற்றும் நன்னெறி ஆகிய கோணங்களிலிருந்து சிந்திப்பதற்கு தற்போது துவங்கப்படும் பாடத்திட்டம் உதவியாக இருக்கும் என்று தான் நம்புவதாக திருத்தந்தை கூறினார். கல்வி, அறிவியல் மற்றும் கலாச்சாரம் ஆகியவற்றின் மேம்பாட்டிற்கென, ஐ.நா.நிறுவனத்தில் உருவாக்கப்பட்டுள்ள யுனெஸ்கோ நிறுவனத்தின் இயக்குனர், Audrey Azoulay அவர்களின் வருகைக்காக நன்றி கூறிய திருத்தந்தை பிரான்சிஸ் அவர்கள், ஐ.நா.வுடன் இணைந்து மேற்கொள்ளும் இந்த கல்வி முயற்சி, வருங்காலத்திற்கு பெரும் உதவியாக அமையும் என்ற தன் நம்பிக்கையை வெளியிட்டார். இலாத்தரன் கல்விக்குடும்பம், இன்றைய உலகின் அறிகுறிகளை, பணிவோடும், விடாமுயற்சியோடும் கண்டுணர்ந்து, தகுந்த பதிலிறுப்பை வழங்க இந்த புதிய முயற்சி உதவி செய்வதாக என்ற விருப்பத்தை வெளியிட்டு, இறைவனின் ஆசீரை வழங்கி, திருத்தந்தை, தன் உரையை நிறைவு செய்தார். [2021-10-08 09:44:25]


பக்க இலக்கங்களை அழுத்தி எல்லா செய்திகளையும் பார்வையிடவும்