வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



இரஷ்யத் தூதரகத்தில் உக்ரைன் குறித்து திருத்தந்தை கவலை

திருத்தந்தை பிரான்சிஸ் அவர்கள், பிப்ரவரி 25, இவ்வெள்ளி நண்பகல் வேளையில், உரோம் நகரிலுள்ள, திருப்பீடத்திற்கான இரஷ்யத் தூதரகத்தின் தலைமையகத்திற்குச் சென்று, அரை மணி நேரத்திற்கு மேலாக, அத்தூதரகத்தில் செலவிட்டு, உக்ரைன் நாடு குறித்த தன் கவலையைத் தெரிவித்தார் என்று திருப்பீடம் அறிவித்துள்ளது. உக்ரைன் நாட்டில், பிப்ரவரி 24, இவ்வியாழனன்று போர் தொடங்கியுள்ளதை முன்னிட்டு, அது குறித்த தன் கவலையை வெளிப்படுத்துவதற்காக, திருத்தந்தை பிரான்சிஸ் அவர்கள், வத்திக்கானுக்கு அருகில், கொன்சீலியாஸ்ஸியோனே (Conciliazione) சாலையில் அமைந்துள்ள இரஷ்ய தூதரகத்திற்குச் சென்றார் என்று, திருப்பீட தகவல் தொடர்பகத்தின் இயக்குனர் மத்தேயு புரூனி அவர்கள் அறிவித்துள்ளார். பிளாரன்ஸ் பயணம் இரத்து மேலும், பிப்ரவரி 27, வருகிற ஞாயிறன்று, திருத்தந்தை பிரான்சிஸ் அவர்கள், பிளாரன்ஸ் நகருக்கு மேற்கொள்ளவிருந்த திருத்தூதுப் பயணம் இரத்துசெய்யப்பட்டது என்றும், மார்ச் 2ம் தேதி திருநீற்றுப் புதன் திருவழிபாட்டை, அவர் தலைமையேற்று நடத்தமாட்டார் என்றும், மத்தேயு புரூனி அவர்கள், இவ்வெள்ளியன்று அறிவித்துள்ளார் திருத்தந்தைக்கு, முழங்காலில் ஏற்பட்டுள்ள கடும் வலி காரணமாக ஓய்வுதேவை என்று, அவரது மருத்துவர் பரிந்துரைத்ததால், திருத்தந்தையின் பிளாரன்ஸ் பயணம் இரத்துச் செய்யப்பட்டுள்ளது, மற்றும், திருநீற்றுப் புதன் திருவழிபாட்டை, அவர் தலைமையேற்று நடத்தமாட்டார் என்று, புரூனி அவர்கள் தெரிவித்துள்ளார். [2022-02-26 00:17:36]


குடிபெயர்ந்தோர், மற்றும் புலம்பெயர்ந்தோர் 108வது உலக நாள்

“குடிபெயர்ந்தோர் மற்றும் புலம்பெயர்ந்தோருடன் உலகை கட்டியமைத்தல்” என்பது, உலகின் கட்டுமானப் பணியில், அவர்கள் ஆற்றவேண்டிய பங்கை அங்கீகரித்து, ஊக்குவிப்பதாகும் - திருப்பீடம் இவ்வாண்டு செப்டம்பர் மாதம் 25ம் தேதி ஞாயிறன்று சிறப்பிக்கப்படும் குடிபெயர்ந்தோர், மற்றும் புலம்பெயர்ந்தோர் 108வது உலக நாளுக்கென்று, திருத்தந்தை பிரான்சிஸ் அவர்கள் தெரிவுசெய்துள்ள தலைப்பை, பிப்ரவரி 22, இச்செவ்வாயன்று செய்தியாளர் கூட்டத்தில் வெளியிட்டுள்ளது, திருப்பீடம். “குடிபெயர்ந்தோர், மற்றும் புலம்பெயர்ந்தோருடன் வருங்காலத்தை கட்டியமைப்போம்" என்பது, குடிபெயர்ந்தோர், மற்றும் புலம்பெயர்ந்தோர் 108வது உலக நாளுக்குரிய தலைப்பாகத் திருத்தந்தை தெரிவுசெய்துள்ளார் என்று, ஒருங்கிணைந்த மனித முன்னேற்ற திருப்பீட அவையின், குடிபெயர்ந்தோர், மற்றும் புலம்பெயர்ந்தோர் துறை அறிவித்துள்ளது. இத்தலைப்பு, கடவுளின் திட்டத்திற்கேற்ப, எவரும் ஒதுக்கப்படாமல், வருங்கால உலகத்தைக் கட்டியமைக்கும் பணியில் நமது பங்கை ஆற்றுவதற்கு அழைப்பு விடுக்கிறது என்றும், குடிபெயர்ந்தோர், மற்றும் புலம்பெயர்ந்தோர் துறை கூறியுள்ளது. “குடிபெயர்ந்தோர் மற்றும் புலம்பெயர்ந்தோருடன் கட்டியமைத்தல்” என்பது, கட்டுமானப் பணியில், அவர்கள் ஆற்றவேண்டிய பங்கை அங்கீகரித்து, ஊக்குவிப்பதாகும் எனவும், இதன் வழியாக மட்டுமே, உலகினர் அனைவரின் ஒருங்கிணைந்த வளர்ச்சிக்குத் தேவைப்படுவதை உறுதிசெய்யும் ஓர் உலகத்தை அமைக்க இயலும் எனவும், அந்த துறை அறிவித்துள்ளது. [2022-02-23 18:27:08]


இயற்கைப் பேரிடர்களால் பாதிக்கப்பட்டுள்ள மக்களுடன் திருத்தந்தை

இயற்கைப் பேரிடர்களால் பாதிக்கப்பட்டுள்ள மக்களுக்கு, குறிப்பாக அண்மை நாட்களில் சூறாவளி, மற்றும் வெள்ளப்பெருக்கால் பாதிக்கப்பட்ட மடகாஸ்கர், மற்றும் பிரேசில் மக்களுக்காக, ஞாயிறு நண்பகல் மூவேளை செபவுரைக்குப்பின் மக்களோடு இணைந்து செபித்தார், திருத்தந்தை பிரான்சிஸ். பிப்ரவரி 20ம் தேதி புனித பேதுரு பெருங்கோவில் வளாகத்தில் குழுமியிருந்த திருப்பயணிகளுக்கு நண்பகல் மூவேளை செபவுரை வழங்கியபின், இயற்கை பேரிடர்களால் அண்மையில் இறந்தவர்களுக்காகச் செபித்ததுடன், இறந்தவர்களின் குடும்பத்தினருடன் தன் நெருக்கத்தையும், பாதிக்கப்பட்டோருக்கு உதவுபவர்களுக்கு தன் ஊக்கத்தையும் வழங்கினார். பல்வேறு சூறாவளிகளால் அண்மைக் காலத்தில் பாதிக்கப்பட்டுள்ள மடகாஸ்கர் குறித்தும், வெள்ளப்பெருக்காலும் நிலச்சரிவுகளாலும் பாதிக்கப்பட்டுள்ள பிரேசில் குறித்தும் அனுதாபங்களுடன்கூடிய ஆழ்ந்த கவலையை வெளியிட்ட திருத்தந்தை பிரான்சிஸ் அவர்கள், ஞாயிறன்று, இத்தாலியில் நலப்பணியாளர் தேசிய நாள் சிறப்பிக்கப்பட்டத்தையும் நினைவூட்டி, அனைத்து நலப்பணியாளர்களுக்கும் தன் வாழ்த்துக்களையும் தெரிவித்தார். நோயுற்றோருக்கு அருகில் நின்று, அவர்களுக்கு குணமளிப்பதிலும், அவர்களுக்கு நல்லுணர்வுகளை வழங்குவதிலும் என, பல்வேறு வழிகளில் பணியாற்றும் மருத்துவர்கள், தாதியர் மற்றும் தன்னார்வலர்களை இந்நாளில் நன்றியுடன் நினைவுகூர்வோம் என்ற அழைப்பையும் விடுத்தார் திருத்தந்தை பிரான்சிஸ். கோவிட் பெருந்தொற்று காலத்தில் மிகச்சிறந்த முறையில் பணியாற்றிய நலப்பணியாளர்கள் அனைவருக்கும் கைத்தட்டலுடன் நன்றியை வெளியிடுவோம் என்ற அழைப்பையும் முன்வைத்தார் திருத்தந்தை பிரான்சிஸ். கடந்த செவ்வாய்க்கிழமையன்று மடகாஸ்கரில் வீசிய டுமாக்கோ புயலால் குறைந்தபட்சம் 14 பேர் உயிரிழந்துள்ளனர், மற்றும் 4323 பேர் தங்கள் குடியிருப்புக்களை இழந்து தற்காலிக இடங்களில் தங்க வைக்கப்பட்டுள்ளனர். ஏற்கனவே, இம்மாதத் துவக்கத்தில் மடகாஸ்கரில் இடம்பெற்ற புயலால் 124 பேர் இறந்திருக்க, மேலும் ஒரு புயலால் அந்நாடு இந்நாட்களில் மீண்டும் தாக்கப்படவுள்ளதாக எச்சரிக்கை விடப்பட்டுள்ளது. பிரேசில் நாட்டின் Petropolis பகுதியில் இடம்பெற்றுவரும் கனமழையால் இதுவரை 120க்கும் மேற்பட்டோர் உயிரிழந்துள்ளனர். கடந்த நூறாண்டுகளிலேயே மிகப்பெரிய அளவில் பிரேசிலில் பெய்துவரும் கனமழையால் உயிரிழப்புக்களின் எண்ணிக்கை மேலும் அதிகரித்து வருவதாகத் தெரிவிக்கப்பட்டுள்ளது. [2022-02-23 18:23:49]


உக்ரைனின் அமைதிக்காக உண்ணாநோன்பிருந்து செபிக்க திருத்தந்தை அழைப்பு

பிப்ரவரி 23, இப்புதனன்று, தனது புதன் மறைக்கல்வி உரைக்குப் பின்பு உரை வழங்கிய திருத்தந்தை பிரான்சிஸ் அவர்கள், உக்ரைன் நாட்டின் அமைதிக்காக இறைவேண்டல் செய்ய அழைப்பு விடுத்துள்ளார். வரும் மார்ச் மாதம் 2ம் தேதி, அதாவது, திருநீற்றுப் புதனன்று, தங்களைத் தீவிரமாக அர்ப்பணித்து உண்ணாநோன்பிருந்து அமைதிக்காக இறைவேண்டல் செய்வதற்கு அனைவரையும் ஊக்குவிப்பதாகக் கூறியுள்ள திருத்தந்தை பிரான்சிஸ் அவர்கள், அமைதியின் அரசியாகத் திகழும் அன்னை மரியா, அறிவீனத்தால் நிகழ்ந்துவரும் போரிலிருந்து உலகத்தைக் காப்பாற்றட்டும் என்றும் தெரிவித்துள்ளார். உக்ரைனின் கிழக்கில் ஏற்பட்டுள்ள மோசமான நிலைமை காரணமாகத் தன் இதயத்தில் மிகுந்த வருத்தம் ஏற்பட்டுள்ளது என்றும், தன்னைப் போலவே, உலகெங்கிலும் உள்ள பலர் வேதனையையும் கவலையையும் உணர்கிறார்கள் என்றும் எடுத்துரைத்த திருத்தந்தை பிரான்சிஸ் அவர்கள், மீண்டும் போர்களாலும் பாகுபாடான செயல்முறைகளாலும் அமைதிக்கான அனைவரின் வாழ்வும் அச்சுறுத்தப்படுகிறது என்றும், தனது கவலையை வெளிப்படுத்தினார். அதனால், அரசியல் பொறுப்புணர்வு கொண்டுள்ள அனைவரும் கடவுளுக்கு முன்பாகத் தங்களின் மனசாட்சியைத் தீவிரமாகப் பரிசோதிக்க வேண்டும் என்று தான் வேண்டுகோள் விடுக்க விரும்புவதாகத் தெரிவித்த திருத்தந்தை பிரான்சிஸ் அவர்கள், நம் கடவுள் போரின் கடவுள் அல்ல, மாறாக அமைதியின் கடவுள் என்றும், நாம் எதிரிகளாக இல்லாமல், சகோதரர் சகோதரிகளாக இருக்க வேண்டும் என்று விரும்பும் சிலருக்கு மட்டுமல்ல, அனைவருக்கும் தந்தையாக இருக்கிறார் என்றும் எடுத்துரைத்தார். மக்களுக்கு மேலும் துன்பத்தை ஏற்படுத்தி நாடுகளுக்கிடையே அமைதி வாழ்வை சீர்குலைக்கும் மற்றும், அனைத்துலகச் சட்டத்தை இழிவுபடுத்தும் எந்தவொரு செயலையும் தவிர்க்குமாறு, சம்பந்தப்பட்ட அனைத்துத் தரப்பினரையும் தான் கேட்டுக்கொள்வதாகவும், அவர்களுக்காக இறைவேண்டல் செய்வதாகவும் கூறியுள்ளார், திருத்தந்தை பிரான்சிஸ். [2022-02-23 18:15:50]


உக்ரைனிலிருந்து புலம்பெயர்வோரை திறந்தமனதோடு வரவேற்க.

திருப்பீடத் தலைமையகத்தில் சீர்திருத்தப் பணிகளை மேற்கொள்வதற்கு திருத்தந்தைக்கு ஆலோசனைகூறும் C-9 கர்தினால்கள் அவை, பிப்ரவரி 21, இத்திங்களன்று, திருத்தந்தை பிரான்சிஸ் அவர்களின் தலைமையில் கூட்டம் ஒன்றைத் துவக்கியுள்ளது. மேலும், அவநம்பிக்கை மற்றும், புகார் கூறும் மனநிலைகளைக் கொண்டிருப்போர் கிறிஸ்தவர் என்று கூற முடியாது என்றும், கிறிஸ்தவர்களாகிய நாம் தாழ்த்தப்பட்டவர்களாக அல்ல, மாறாக, விண்ணை நோக்கவேண்டியவர்களாக ஆக்கப்பட்டுள்ளோம் என்றும், திருத்தந்தை பிரான்சிஸ் அவர்கள், பிப்ரவரி 21, இத்திங்களன்று தன் டுவிட்டர் பக்கத்தில் கூறியுள்ளார். இவ்வாறு தன் டுவிட்டர் செய்தியை வெளியிட்டுள்ள திருத்தந்தை, உக்ரைன் நாட்டில் பதட்டநிலைகள் அதிகரித்துவருவது குறித்த கவலையை வெளியிட்டு, அப்பகுதியில் ஆக்ரமிப்பு பேரச்சம் நீங்கவும் அழைப்பு விடுத்து வருகிறார். உக்ரைன் நாடு குறித்து கவலை மேலும், உக்ரைன் நாட்டின் டொன்பாஸ் தென்கிழக்கு மாநிலத்தில் பாலர் பள்ளி ஒன்றில் குண்டு விழுந்துள்ளது உட்பட, அந்நாட்டில் பதட்டநிலைகள் அதிகரித்துவருவது குறித்து கவலையை வெளியிட்டு, பிப்ரவரி 21, இத்திங்களன்று செய்தி ஒன்றை வெளியிட்டுள்ளார், போலந்து நாட்டு ஆயர் பேரவைத் தலைவர், பேராயர் Stanisław Gądecki . உக்ரைன் நாட்டின் மீது இராணுவத் தாக்குதல்கள் மேலும் இடம்பெறலாம் என்ற அச்சம் நிலவும்வேளை, அந்நாட்டிலிருந்து புலம்பெயரும் மக்களை, திறந்த இதயத்தோடு வரவேற்கவேண்டும் என்று, பேராயர் Gądecki அவர்கள், போலந்து மக்களுக்கு அழைப்புவிடுத்துள்ளார். அமைதி மற்றும், பாதுகாப்பில் வாழ்வதற்கும், தங்களுக்கும், தங்களைச் சார்ந்தவர்களுக்கும் பாதுகாப்பான வாழ்வை உறுதிசெய்வதற்குரிய வழிகளைத் தேடுவதற்கும் அனைவரும் உரிமையைக் கொண்டுள்ளனர் என்றும், போஸ்னான் பேராயர் Gądecki அவர்கள் குறிப்பிட்டுள்ளார். மத்திய ஐரோப்பிய நாடான போலந்து, இரஷ்யா மற்றும், உக்ரைன் நாடுகளை எல்லைகளாகக் கொண்டிருக்கிறது. ஏறத்தாழ 3 கோடியே 80 இலட்சம் மக்கள் வாழ்கின்ற போலந்தில், இருபது இலட்சம் உக்ரைன் நாட்டவர் வாழ்கின்றனர், மற்றும் பணியாற்றுகின்றனர். மேலும், உக்ரைன் நாட்டை இரஷ்யா ஆக்ரமிப்பு செய்யும் என்ற அச்சம் உள்ளவேளை, உக்ரைனின் 4 கோடியே 40 இலட்சம் மக்களில், பத்து இலட்சம் பேர் போலந்தில் புகலிடம் தேடக் கூடும் என்று, போலந்து அதிகாரிகள் எதிர்பார்க்கின்றனர். (CNA) [2022-02-21 23:48:02]


இயற்கைப் பேரிடர்களால் பாதிக்கப்பட்டுள்ள மக்களுடன் திருத்தந்தை

இயற்கைப் பேரிடர்களால் பாதிக்கப்பட்டுள்ள மக்களுக்கு, குறிப்பாக அண்மை நாட்களில் சூறாவளி, மற்றும் வெள்ளப்பெருக்கால் பாதிக்கப்பட்ட மடகாஸ்கர், மற்றும் பிரேசில் மக்களுக்காக, ஞாயிறு நண்பகல் மூவேளை செபவுரைக்குப்பின் மக்களோடு இணைந்து செபித்தார், திருத்தந்தை பிரான்சிஸ். பிப்ரவரி 20ம் தேதி புனித பேதுரு பெருங்கோவில் வளாகத்தில் குழுமியிருந்த திருப்பயணிகளுக்கு நண்பகல் மூவேளை செபவுரை வழங்கியபின், இயற்கை பேரிடர்களால் அண்மையில் இறந்தவர்களுக்காகச் செபித்ததுடன், இறந்தவர்களின் குடும்பத்தினருடன் தன் நெருக்கத்தையும், பாதிக்கப்பட்டோருக்கு உதவுபவர்களுக்கு தன் ஊக்கத்தையும் வழங்கினார். பல்வேறு சூறாவளிகளால் அண்மைக் காலத்தில் பாதிக்கப்பட்டுள்ள மடகாஸ்கர் குறித்தும், வெள்ளப்பெருக்காலும் நிலச்சரிவுகளாலும் பாதிக்கப்பட்டுள்ள பிரேசில் குறித்தும் அனுதாபங்களுடன்கூடிய ஆழ்ந்த கவலையை வெளியிட்ட திருத்தந்தை பிரான்சிஸ் அவர்கள், ஞாயிறன்று, இத்தாலியில் நலப்பணியாளர் தேசிய நாள் சிறப்பிக்கப்பட்டத்தையும் நினைவூட்டி, அனைத்து நலப்பணியாளர்களுக்கும் தன் வாழ்த்துக்களையும் தெரிவித்தார். நோயுற்றோருக்கு அருகில் நின்று, அவர்களுக்கு குணமளிப்பதிலும், அவர்களுக்கு நல்லுணர்வுகளை வழங்குவதிலும் என, பல்வேறு வழிகளில் பணியாற்றும் மருத்துவர்கள், தாதியர் மற்றும் தன்னார்வலர்களை இந்நாளில் நன்றியுடன் நினைவுகூர்வோம் என்ற அழைப்பையும் விடுத்தார் திருத்தந்தை பிரான்சிஸ். கோவிட் பெருந்தொற்று காலத்தில் மிகச்சிறந்த முறையில் பணியாற்றிய நலப்பணியாளர்கள் அனைவருக்கும் கைத்தட்டலுடன் நன்றியை வெளியிடுவோம் என்ற அழைப்பையும் முன்வைத்தார் திருத்தந்தை பிரான்சிஸ். கடந்த செவ்வாய்க்கிழமையன்று மடகாஸ்கரில் வீசிய டுமாக்கோ புயலால் குறைந்தபட்சம் 14 பேர் உயிரிழந்துள்ளனர், மற்றும் 4323 பேர் தங்கள் குடியிருப்புக்களை இழந்து தற்காலிக இடங்களில் தங்க வைக்கப்பட்டுள்ளனர். ஏற்கனவே, இம்மாதத் துவக்கத்தில் மடகாஸ்கரில் இடம்பெற்ற புயலால் 124 பேர் இறந்திருக்க, மேலும் ஒரு புயலால் அந்நாடு இந்நாட்களில் மீண்டும் தாக்கப்படவுள்ளதாக எச்சரிக்கை விடப்பட்டுள்ளது. பிரேசில் நாட்டின் Petropolis பகுதியில் இடம்பெற்றுவரும் கனமழையால் இதுவரை 120க்கும் மேற்பட்டோர் உயிரிழந்துள்ளனர். கடந்த நூறாண்டுகளிலேயே மிகப்பெரிய அளவில் பிரேசிலில் பெய்துவரும் கனமழையால் உயிரிழப்புக்களின் எண்ணிக்கை மேலும் அதிகரித்து வருவதாகத் தெரிவிக்கப்பட்டுள்ளது. [2022-02-21 23:42:06]


திருஅவை, அனைவரும் உடன்பிறந்தோராக வாழ்கின்ற ஒரு குடும்பம்

திருஅவை, ஒரே இறைத்தந்தையோடு அனைவரும் சகோதரர், சகோதரிகளாக வாழ்கின்ற ஒரு குடும்பம் என்று, திருத்தந்தை பிரான்சிஸ் அவர்கள், பிப்ரவரி 19, இச்சனிக்கிழமையன்று, தன் டுவிட்டர் பக்கத்தில் பதிவுசெய்துள்ளார். “இயேசுவை சகோதரராக நமக்குத் தந்துள்ள இறைத்தந்தையோடு அனைவரும் சகோதரர், சகோதரிகளாக வாழ்கின்ற ஒரு குடும்பமாகிய திருஅவை, அவர், உடன்பிறப்பு உணர்வை எவ்வளவு அன்புகூர்கிறார் என்பதைப் புரிந்துகொள்ள நமக்கு உதவுகின்றது. உண்மையில், அனைத்து மனித சமுதாயமும், ஒரே உலகளாவிய குடும்பமாக மாறவேண்டுமென்று அவர் விரும்புகிறார்” என்ற சொற்களை, திருத்தந்தை தன் டுவிட்டரில் எழுதியுள்ளார். அனைவரும் உடன்பிறந்தோர் (#FrattelliTutti) என்ற தனது திருமடலை மையப்படுத்தி, இச்சனிக்கிழமையன்று இவ்வாறு தன் டுவிட்டர் பக்கத்தில் எழுதியுள்ள திருத்தந்தை, கடவுள் மற்றும், அயலவர் மீதுள்ள அன்பு, விண்ணகம் செல்வதற்கு கடவுட்சீட்டு என்று, மற்றொரு டுவிட்டர் செய்தியில் பதிவுசெய்துள்ளார். “கடவுள் மற்றும், அயலவர் மீதுள்ள அன்பு, விண்ணகம் செல்வதற்கு கடவுட்சீட்டு. நம் இவ்வுலக உடைமைகள், சிதறுண்டிருக்கும் தூசியே. ஆனால், நம் குடும்பங்களில், பணியில், திருஅவையில், மற்றும், உலகில் நாம் பகிர்ந்துகொள்ளும் அன்பே நம்மைக் காப்பாற்றுகின்றது, இது என்றென்றும் நிலைத்திருக்கும்” என்ற வார்த்தைகள், திருத்தந்தையின் டுவிட்டர் செய்தியில் வெளியாகியுள்ளன. திருத்தந்தை பிரான்சிஸ் அவர்கள், Fratelli tutti அதாவது அனைவரும் உடன்பிறந்தோர் என்ற தலைப்பில், தனது மூன்றாவது திருமடலை, 2020ம் ஆண்டு அக்டோபர் மாதம் 3ம் தேதி இத்தாலியின் அசிசி நகரில், புனித பிரான்சிசின் கல்லறையில் கையெழுத்திட்டார் இன்னும், ஐ.நா.வின் உணவு மற்றும், வேளாண்மை நிறுவனம், வேளாண் வளர்ச்சி பன்னாட்டு நிதியகம், PAM அங்காடி (FAO, IFAD, PAM) ஆகியவற்றுக்கு திருப்பீடத்தின் நிரந்தரப் பார்வையாளராகப் பணியாற்றும் அருள்பணி Fernando Chica Arellanos, இஸ்தான்புல் அப்போஸ்தலிக்க நிர்வாகி ஆயர் Massimiliano Palinuro, திருப்பீடத்திற்கு இத்தாலி நாட்டு புதிய தூதர் Francesco Di Nitto, தென் அமெரிக்க தலத்திருஅவையின் பிரதிநிதிகள் போன்றோர் திருத்தந்தை பிரான்சிஸ் அவர்களை, பிப்ரவரி 19, இச்சனிக்கிழமையன்று திருப்பீடத்தில் தனித்தனியே சந்தித்து கலந்துரையாடினர். [2022-02-20 00:19:42]


நாடுகள் போரின் பேரச்சத்தை தவிர்க்க திருப்பீடம் அழைப்பு

உக்ரைன் நாட்டின் மீது இரஷ்யா மேற்கொண்டுவரும் ஆக்ரமிப்பு அச்சுறுத்தலால், கிழக்கு ஐரோப்பாவில் அதிகரித்துவரும் பதட்டநிலைகளை முடிவுக்குக் கொணர கலந்துரையாடல் அவசியம் என்று, திருப்பீட உயர் அதிகாரி ஒருவர், OSCE எனப்படும், ஐரோப்பாவில் பாதுகாப்பு மற்றும், ஒத்துழைப்பு அவை நடத்திய கூட்டத்தில் வலியுறுத்திக் கூறினார். OSCE அவையில், திருப்பீடத்தின் நிரந்தரப் பார்வையாளராகப் பணியாற்றும் அருள்பணி யானுஸ் உர்பான்சிஸ்க் அவர்கள், அந்த அவையின் 1355வது கூட்டத்தில், பிப்ரவரி 17 இவ்வியாழனன்று உரையாற்றியபோது, உக்ரைன் மற்றும், அந்நாட்டைச் சுற்றியுள்ள பகுதியில் நிலவிவரும் பதட்டநிலைகள் குறித்த திருப்பீடத்தின் கவலையை எடுத்துரைத்தார். அண்மை வாரங்களில், உக்ரைன் நாடு இரஷ்யாவின் ஆக்ரமிப்பு அச்சுறுத்தலை எதிர்கொண்டதைக் குறிப்பிட்டுப் பேசிய அருள்பணி உர்பான்சிஸ்க் அவர்கள், போர், முட்டாள்தனமானது எனவும், அதனால் துன்புறுவோர் அதனைத் தொடங்கியவர்கள் அல்ல, மாறாக, அப்பாவி குடிமக்களே எனவும் அனைவருக்கும் நினைவுபடுத்தினார். போரின் அச்சுறுத்தலுக்கு விடப்படும் எவ்வித சிறு குறிப்பும் நிறுத்தப்படவேண்டும் என்றும், ஆண்களும், பெண்களும், சிறாரும் போரின் பேரச்சத்திலிருந்து பாதுகாக்கப்படவேண்டும் என்றும், திருப்பீடம் விண்ணப்பிக்கின்றது என்று அருள்பணி உர்பான்சிஸ்க் அவர்கள், OSCE அவையில் கேட்டுக்கொண்டார். உக்ரைன் நாட்டில் அமைதி நிலவுமாறு, திருத்தந்தை பிரான்சிஸ் அவர்களும், கடந்த சில வாரங்களாக தொடர்ந்து விண்ணப்பித்து வருவதையும், கடந்த சனவரி மாதம் 23ம் தேதியன்று உக்ரைன் நாட்டிற்காக ஒரு நாள் இறைவேண்டல் மற்றும், நோன்புக்கு திருத்தந்தை அழைப்புவிடுத்ததையும், அருள்பணி உர்பான்சிஸ்க் அவர்கள் சுட்டிக்காட்டிப் பேசினார். உக்ரைன் எல்லையில் நிலவும் பதட்டநிலைகளைக் களைவதற்கு உலகளாவிய பேச்சுவார்த்தையைத் தொடங்குவதற்கு கிடைக்கும் எவ்வித வாய்ப்பையும் நழுவவிடக் கூடாது என்றுரைத்துள்ள திருத்தந்தையின் சொற்களையும் குறிப்பிட்டு, அருள்பணி உர்பான்சிஸ்க் அவர்கள், தன் உரையை நிறைவுசெய்தார். கிழக்கு ஐரோப்பிய நாடான உக்ரைன் எல்லையில் இருந்து, படைகள் அகற்றப்படும் என இரஷ்யா தெரிவித்ததற்கு மாறாக, அந்நாடு கூடுதலாக, 7,000 இராணுவ வீரர்களை அனுப்பியதால், மீண்டும் அப்பகுதியில் போர் பதட்டம் ஏற்பட்டுள்ளது. உக்ரைனின் எல்லையில், இரஷ்யா ஏற்கனவே ஒன்றரை இலட்சம் இராணுவத்தினரை நிறுத்தியுள்ளது என்று செய்திகள் கூறுகின்றன. [2022-02-20 00:10:09]


திருத்தந்தைக்கு நன்றி கூறிய பிரிட்டனின் யூதக்குழுப் பிரதிநிதிகள்

பிப்ரவரி 16, புதன்கிழமையன்று, திருத்தந்தை வழங்கிய புதன் மறைக்கல்வி உரையில் கலந்துகொண்ட பிரிட்டனின் யூதப் பிரதிநிதிகள் இருவர் திருத்தந்தையை சந்தித்து நன்றி கூறினர். வத்திக்கான் புனித திருத்தந்தை ஆறாம் பவுல் அரங்கில் குழுமியிருந்த விசுவாசிகளுக்குப் புதன் மறைக்கல்வி உரையை வழங்கிய பின், பிரிட்டன் நாட்டின் யூதப் பிரதிநிதிகள் குழுவின் தலைவர் Marie van der Zyl, மற்றும் தலைமை நிர்வாகி Michael Wegier இருவரும் திருத்தந்தையை சந்தித்தனர். இந்தச் சந்திப்பின்போது திருத்தந்தை பிரான்சிஸ் அவர்களுக்கு பரிசுப் பொருள் ஒன்றை அவர்கள் வழங்கியதோடு, மதங்களுக்கு இடையேயான உரையாடலை மேம்படுத்துவதற்கும், யூத விரோதப் போக்கை எதிர்த்துப் போராடுவதற்கும் அவர் ஆற்றிவரும் நற்பணிகளுக்காக உளம்நிறைந்த பாராட்டுக்களையும் தெரிவித்தனர் என்று வத்திக்கான் செய்தித்துறை கூறியுள்ளது. உலக உடன்பிறந்த உணர்வுநிலை குறித்த திருத்தந்தையின் செய்திக்காகவும், கத்தோலிக்கக் கிறித்தவர், மற்றும் யூத இன மக்களின் நல்லுறவுக்கான அவரது முயற்சிகளுக்காகவும், புகழ்பெற்ற பிரிட்டன் யூத வரலாற்றாசிரியர் Cecil Roth எழுதி, முதல் கையெழுத்திட்ட “History of the Great Synagogue” என்ற நூலை திருத்தந்தைக்கு நினைவு பரிசாக இருவரும் வழங்கினர் என்றும் வத்திக்கான் செய்திதுறை மேலும் தெரிவிக்கிறது. தாங்கள் பணியாற்றுகின்ற யூத அமைப்பின் செயல்பாடுகள், குறிப்பாக யூத வெறுப்பினைக் களைந்து எல்லா மக்களுடனும் இணக்கமாக வாழ்வதற்காக அவர்கள் ஆற்றிவரும் பணிகள், மற்றும் எடுக்கும் புதிய முயற்சிகள் குறித்தும் தாங்கள் வழங்கிய செய்தியில் தெரிவித்துள்ளனர். ஜனவரி 27 வியாழனன்று, அனைத்துலக நாத்சி படுகொலைகள் நினைவு தினத்தை முன்னிட்டு செய்தி வழங்கிய திருத்தந்தை பிரான்சிஸ் அவர்கள், மில்லியன் கணக்கான யூதர்கள், பல்வேறு நாட்டவர்கள் மற்றும் மத நம்பிக்கையாளர்கள் கொன்றழிக்கப்பட்டதை உலகம் நினைவில் கொள்ள வேண்டும் என்றும், ஐரோப்பாவின் ஏறத்தாழ 6 மில்லியன் யூதர்கள், அல்லது கண்டத்தின் மூன்றில் இரண்டு பங்கு யூத மக்கள், நாத்சி ஆட்சியின் கைகளில் இனப்படுகொலை செய்யப்பட்டதாக வேதனைத் தெரிவித்தார். [2022-02-18 00:20:42]


பேராயரைப் புனிதராக்கும் முயற்சிகளை புதுப்பிக்கும் எஸ்தோனியர்கள்

Estoniaவின் அப்போஸ்தலிக்க நிர்வாகம், மறைசாட்சியாகக் இறந்த அதன் முன்னாள் பேராயர் Eduard Profittlich அவர்களைப் புனிதராக்கும் தற்போதைய செயல்முறைகளில் கவனத்தை ஈர்க்கும் வகையில் ஒரு வலைத்தளக் கருத்தரங்கை நடத்தியுள்ளது. இந்த இயேசு சபை பேராயரின் தியாக மரணத்தின் 81வது ஆண்டு நினைவு நாள் நெருங்கி வரும் நிலையில், புனிதர்பட்ட செயல்பாடுகள் குறித்த செய்திகளை மேலும் புதுப்பிக்கும் விதமாக எஸ்தோனியாவின் அப்போஸ்தலிக்க நிர்வாகம் பிப்ரவரி 15, செவ்வாய்க்கிழமை மாலை வலைதளக் கருத்தரங்கு ஒன்றை நடத்தியது. இயேசு சபை அருள்பணியாளர் Stephan Lipke அவர்களால் வழிநடத்தப்பட்ட இவ்வலைத்தளக் கருத்தரங்கில், மாஸ்கோவின் பேராயர் Paolo Pezzi, இயேசு சபை அருள்பணியாளர்கள், தலத் திருஅவையின் தலைவர்கள், கத்தோலிக்க கிறிஸ்தவர்கள் எனப் பலர் கலந்து கொண்டனர். “திருஅவையின் மிகச் சிறந்த மறைச்சாட்சியாக விளங்கும் பேராயர் Eduard Profittlich அவர்களின் வாழ்வைக் கொண்டாடுவதற்கான அரியதொரு வாய்ப்பு இது” என்று கூறி இவ்வலைதளக் கருத்தரங்கைத் தொடங்கிவைத்த பேராயர் Paolo Pezzi அவர்கள், உலகெங்கிலும் வாழும் கத்தோலிக்க விசுவாசிகளுக்கு ஒரு சிறந்த எடுத்துக்காட்டாக இவர் விளங்குகின்றார் என்றார். ஜெர்மனைச் சேர்ந்த இயேசு சபைத் துறவியான பேராயர் Eduard Profittlich அவர்கள் 1931 முதல் சைபீரியாவிற்கு நாடு கடத்தப்பட்டு பின்னர் கிரோவில் உள்ள சோவியத் சிறையில் தன் உயிரைத் தியாகம் செய்த 1941ம் ஆண்டு பிப்ரவரி 22 வரை எஸ்தோனியாவின் அப்போஸ்தலிக்க நிர்வாகியாகப் பணியாற்றினார். தற்போது ‘இறைஊழியர்’ என்று அழைக்கப்பட்டு எஸ்தோனியா மக்களுக்கும், மேலும், கத்தோலிக்கர்களுக்கும் நம்பிக்கையின் சாட்சியாக விளங்குகின்றார். [2022-02-18 00:14:50]


பக்க இலக்கங்களை அழுத்தி எல்லா செய்திகளையும் பார்வையிடவும்