வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



அரைகுறையான ஆர்வத்துடன் வாழும் கிறிஸ்தவர்கள்

"அரைகுறை முயற்சிகளுடன் வாழ்ந்து, நம் அன்பின் ஆர்வத்தைத் தணித்து, மிதமான கிறிஸ்தவர்களாக இருக்கும் நிலையிலிருந்து நம்மைக் காத்தருள, இறைவனிடம் அருள் வேண்டுகிறோம்" – திருத்தந்தையின் டுவிட்டர் செய்தி ஜெரோம் லூயிஸ் - வத்திக்கான் செய்திகள் ஆயரும் மறைவல்லுநருமான புனித அகுஸ்தின் திருநாள், இப்புதனன்று கொண்டாடப்பட்டதையொட்டி, திருத்தந்தை பிரான்சிஸ் அவர்கள் வெளியிட்ட டுவிட்டர் செய்தியில், கிறிஸ்தவர்களாகிய நாம் அரைகுறையான ஆர்வத்துடன் வாழ்வதிலிருந்து நம்மை இறைவன் காத்தருள வேண்டுமென்ற கருத்தை வலியுறுத்தியுள்ளார். "அரைகுறை முயற்சிகளுடன் வாழ்ந்து, நம் அன்பின் ஆர்வத்தைத் தணித்து, மிதமான கிறிஸ்தவர்களாக இருக்கும் நிலையிலிருந்து நம்மைக் காத்தருள, இறைவனிடம் அருள் வேண்டுகிறோம்" என்ற சொற்களை, திருத்தந்தை தன் டுவிட்டர் செய்தியில் பதிவு செய்திருந்தார். மேலும், 2018ம் ஆண்டு, செப்டம்பர் 22ம் தேதி திருப்பீடத்திற்கும், சீன அரசுக்கும் இடையே உருவான ஓர் ஒப்பந்தத்திற்குப் பின், அந்நாட்டில், திருத்தந்தையின் ஒப்புதலோடு, Antonio Yao Shun என்ற அருள்பணியாளர், ஆயராக அருள்பொழிவு செய்யப்பட்டார் என்று, திருப்பீடம் அறிவித்துள்ளது. 54 வயதான அருள்பணி Yao Shun அவர்கள், ஆகஸ்ட் 26, இத்திங்களன்று, மங்கோலியாவின் Jining என்ற மறைமாவட்டத்தின் ஆயராக, அருள்பொழிவு பெற்றவேளையில், அவர், திருத்தந்தையின் ஒப்புதலோடு அருள்பொழிவு பெறுகிறார் என்ற அறிக்கையும் வாசிக்கப்பட்டதென்று, வத்திக்கான் செய்தித்துறை தலைவர், மத்தேயோ புரூனி (Matteo Bruni) அவர்கள் அறிவித்துள்ளார். திருவழிபாட்டின் பேராசிரியாராகப் பணியாற்றிய அருள்பணியாளர் Yao Shun அவர்கள், இரக்கத்தின் சிறப்பு யூபிலி ஆண்டின் விருதுவாக்கான, "தந்தை இரக்கமுள்ளவராக இருப்பதைப்போல்" ("Misericordes sicut Pater") என்ற சொற்களை, தன் ஆயர் பணியின் விருதுவாக்காகத் தெரிவு செய்துள்ளார் என்பது குறிப்பிடத்தக்கது [2019-08-29 03:27:26]


பரகுவாய் இளையோர்க்கு திருத்தந்தை செய்தி

தனி நபராகவும், குழுமமாகவும், ஆண்டவரின் குரலுக்குச் செவிசாய்த்து, மறைப்பணியாளர்களாக, ஏழைகள் மத்தியில், மீட்பின் நற்செய்திக்கு, சாட்சிகளாக விளங்குமாறு பரகுவாய் இளையோர்க்கு அழைப்பு கிறிஸ்டோபர் பிரான்சிஸ் - வத்திக்கான் செய்திகள் இயேசு கிறிஸ்துவை நண்பராக ஏற்று, அவரில் நிலைத்திருந்து, மிகுந்த பலன்தருமாறு, பரகுவாய் நாட்டு இளையோரைக் கேட்டுக்கொண்டார், திருத்தந்தை பிரான்சிஸ். தென் அமெரிக்க நாடான பரகுவாய் கத்தோலிக்கத் திருஅவை, ‘இளையோரின் மூன்று ஆண்டுகள்’ என்ற தலைப்பில், கடந்த மூன்று ஆண்டுகளாகச் சிறப்பித்துவந்த நிகழ்வுகளின் முத்தாய்ப்பாக, ஆகஸ்ட் 23, கடந்த வெள்ளி முதல், ஆகஸ்ட் 25 ஞாயிறு வரை, மூன்று நாள்கள் கருத்தரங்கை நடத்தியது. இதில், நாட்டின் எல்லா மறைமாவட்டங்கள் மற்றும், பல்வேறு இயக்கங்களிலிருந்து, ஏறத்தாழ 600 பிரதிநிதிகள் கலந்துகொண்டனர். இக்கருத்தரங்கின் நிறைவாக, இந்நிகழ்வுகளின் தலைவரும், San Pedro ஆயருமான Pierre Jubinville அவர்கள் திருப்பலி நிறைவேற்றியபின், இந்நிகழ்வுக்கு, திருத்தந்தை பிரான்சிஸ் அவர்கள் அனுப்பியிருந்த செய்தியை வாசித்தார். தம் நண்பர்களாக வாழ்வதற்கு அழைப்பு விடுக்கும் இயேசு கிறிஸ்துவை ஏற்றுக்கொள்ளுமாறு, பரகுவாய் இளையோரிடம் கேட்டுக்கொண்டுள்ள, திருத்தந்தை, அதன் வழியாக, இளையோர், இயேசுவோடு நிலைத்திருந்து, மிகுந்த கனி தருவார்கள் என்றும் கூறியுள்ளார். திருத்தந்தையின் இச்செய்தியை, திருப்பீடச் செயலர், கர்தினால் பியெத்ரோ பரோலின் அவர்கள் அனுப்பியுள்ளார். [2019-08-28 00:50:26]


புனித மோனிக்கா, இறையொளியை வரவேற்றவர்

ஆப்ரிக்கா செல்வதற்குமுன், சிவித்தா வெக்கியா மற்றும் ஓஸ்தியா கடற்கரைப் பகுதிகளில் தங்கியவேளை, கி.பி.387ம் ஆண்டில் இறைபதம் அடைந்தார், புனித மோனிக்கா கிறிஸ்டோபர் பிரான்சிஸ் - வத்திக்கான் செய்திகள் புனித அகுஸ்தீனின் அன்னையாகிய புனித மோனிக்காவின் திருவிழாவாகிய, ஆகஸ்ட் 27, இச்செவ்வாயன்று, அந்த புனித அன்னையின் ஆன்மீகத்தை மையப்படுத்தி, தன் டுவிட்டர் செய்தியில் எழுதியுள்ளார், திருத்தந்தை பிரான்சிஸ். திருத்தந்தை பிரான்சிஸ் அவர்கள், ஆகஸ்ட் 27, இச்செவ்வாயன்று வெளியிட்டுள்ள டுவிட்டர் செய்தியில், “கடவுளின் ஒளியை வரவேற்பவர்களை, அது ஒளிரச் செய்கின்றது” என்ற சொற்கள் இடம்பெற்றிருந்தன. புனித மோனிக்கா (கி.பி. 322-387) ஹிப்போ நகரின் மோனிக்கா எனவும் அறியப்படும் புனித மோனிக்கா, வட ஆப்ரிக்க நாடாகிய தற்போதைய அல்ஜீரியாவில், தகாஸ்தே எனும் ஊரில் கி.பி.331ம் ஆண்டு பிறந்தவர். இவரின் கிறிஸ்தவ பெற்றோர், கிறிஸ்தவரல்லாத பத்ரீசியுஸ் என்பவருக்கு, இளம் வயதிலேயே திருமணம் செய்து வைத்தனர். இவர், மாமியார் மற்றும் கணவரின் அறநெறியற்ற வாழ்வின் கொடுமைகளால் மிகவும் துன்புற்றார். இவருக்குப் பிறந்த மூன்று பிள்ளைகளில் மூத்தவரான அகுஸ்தீன், நோயாய் இருந்ததால், தனது கணவரிடம் கெஞ்சி அவருக்குத் திருமுழுக்கு அளித்தார். புனித மோனிக்காவின் புண்ணிய வாழ்வால், பத்ரீசியுஸ், இறப்பதற்கு ஓராண்டுக்குமுன் கிறிஸ்தவரானார். புனித மோனிக்காவின் மாமியும் திருநீராட்டுப் பெற்று இறந்தார். அக்காலத்தில் பெரிய மதமாக உருவெடுத்திருந்த மனிக்கேசிய தப்பறைக் கொள்கைப் பிரிவினரோடு இணைந்து நன்னெறியின்றி கட்டுப்பாடற்று வாழ்ந்துவந்த தனது மகன் அகுஸ்தீன் மனம் மாறுவதற்கு முப்பது ஆண்டுகள் கண்ணீர் சிந்தி இறைவனிடம் மன்றாடினார் புனித மோனிக்கா. இறுதியில், மிலான் ஆயர் புனித அம்புரோஸ் அவர்களின் மறையுரைகளால் அகுஸ்தீன் மனந்திரும்பி, திருநீராட்டுப் பெற்று, புதிய வாழ்வுப் பயணத்தைத் தொடர்ந்தார். புனித மோனிக்காவின் நம்பிக்கை நிறைந்த நீண்ட கால இறைவேண்டலும் கேட்கப்பட்டது. புனித மோனிக்கா அவர்கள் இறப்பதற்கு ஒரு சில நாள்களுக்கு முன் தன் மகன் அகுஸ்தீனிடம், 'மகனே இவ்வுலகில் எனக்கு இப்போது வேறு எதுவும் மகிழ்ச்சி தரமுடியாது. நான் இனிமேலும் ஏன் இவ்வுலகில் உயிருடன் இருக்க வேண்டுமென்றே தெரியவில்லை. இன்னும் சிறிது காலம் நான் வாழ விரும்பியது ஒரேயொரு வரத்திற்காகத்தான். நான் இறக்குமுன் உன்னைக் கத்தோலிக்க கிறிஸ்தவனாகப் பார்க்க விரும்பினேன். எனக்கு ஆண்டவர் இவ்வரத்தை அளவுக்கு அதிகமாகய்ப் பொழிந்துவிட்டார். இப்போது நீ அவருக்கே முழுவதும் சொந்தம் என்பதை உணருகிறேன். இவ்வுலக இன்பங்களை நீ விட்டொழித்ததையும் காண்கிறேன்" என்று கூறினார். புனித அகுஸ்தீனார், தனது தாய் புனித மோனிக்கா பற்றி, தனது Confessions என்ற நூலில் இவற்றையெல்லாம் எழுதியுள்ளார். [2019-08-28 00:31:00]


அமேசான் மழைக்காடுகளின் துன்பம், உலகின் துன்பம்

உலகின் நுரையீரல்களைக் காப்பாற்றுமாறு, அமேசான் பகுதி நாடுகளுக்கும், ஐ.நா. நிறுவனத்திற்கும், உலக சமுதாயத்திற்கும், இலத்தீன் அமெரிக்க மற்றும், கரீபியன் ஆயர்கள் அழைப்பு விடுத்துள்ளனர் மேரி தெரேசா – வத்திக்கான் செய்திகள் உலகிலுள்ள காடுகளில் தீப்பற்றி எரிவது, அதனால் காடுகள் அழிக்கப்படுவது குறித்து, இலத்தீன் அமெரிக்க மற்றும், கரீபியன் ஆயர் பேரவைகளின் கூட்டமைப்பு (CELAM) ஆழ்ந்த கவலை தெரிவித்துள்ளது. அலாஸ்கா, சைபீரியா, கிரீன்லாந்து, கானரித் தீவுகள், குறிப்பாக, அமேசான் பருவமழைக்காடுகளில் தீ பற்றியெரிவது, மிகுந்த கவலையை ஏற்படுத்தியுள்ளது என்றுரைக்கும், அக்கூட்டமைப்பின் அறிக்கை, அமேசான் மழைக்காடுகள் தீப்பிடித்து எரிவது, மிகப்பெரும் அளவில், இயற்கைப் பேரிடராக உள்ளது என்று கூறியுள்ளது. அமேசான் மழைக்காடுகளில் வாழ்கின்ற பழங்குடியின மக்களுடன் தங்களின் நெருங்கிய ஒருமைப்பாட்டைத் தெரிவித்துள்ள, இலத்தீன் அமெரிக்க மற்றும், கரீபியன் ஆயர்கள், இப்பெருந்துயரை அகற்றுவதற்கு, உலக சமுதாயத்தின் ஒருமைப்பாட்டுக்கும் அழைப்பு விடுத்துள்ளனர். உலகின் நுரையீரல்களாகிய பருவமழைக்காடுகள் காப்பாற்றப்படுமாறு உலகினருக்கு அழைப்பு விடுத்துள்ள, இலத்தீன் அமெரிக்க மற்றும், கரீபியன் ஆயர்கள், அமேசான் மழைக்காடுகள் துன்புற்றால், உலகமும் துன்புறும் என்றும் எச்சரித்துள்ளனர். வருகிற அக்டோபரில், வத்திக்கானில் அமேசான் குறித்து, நடைபெறவிருக்கும் உலக ஆயர்கள் சிறப்பு மாமன்றத்திற்கென தயாரிக்கப்பட்டுள்ள ஏட்டில், வளம்நிறைந்த பல்லுயிர்களைக் கொண்டிருக்கும் அமேசான் மழைக்காடுகள், இப்பூமிக்கோளத்திற்கு மிக முக்கியமானது என்று குறிப்பிடப்பட்டுள்ளதை, ஆயர்கள் சுட்டிக்காட்டியுள்ளனர். உலகின் மிகப்பெரிய அமேசான் பருவமழைக்காடுகள், கடந்த இரு வாரங்களாக தீப் பிடித்து எரிந்துகொண்டிருக்கின்றன. [2019-08-25 02:41:57]


திருத்தந்தை - அடிமைத்தனத்தை ஒழிப்போம்

உலகில் அடிமைமுறை சட்டப்படி தடைசெய்யப்பட்டிருந்தாலும், மனித வர்த்தகம் இன்றும் உலகளாவிய பிரச்சனையாக இருந்து வருகிறது. 2013ம் ஆண்டின் கணக்கெடுப்பின்படி, 25 மில்லியன் முதல், 40 மில்லியன் வரையிலான மக்கள், இதில் சிக்கியுள்ளனர் மேரி தெரேசா – வத்திக்கான் செய்திகள் “நாம் எல்லாரும், கடவுளின் சாயலாகவும், பாவனையாகவும் படைக்கப்பட்டுள்ளோம், மற்றும், ஒரே மாண்பைக் கொண்டுள்ளோம். எனவே, அடிமைத்தனத்தை ஒழிப்போம்” என்ற வார்த்தைகளை, திருத்தந்தை பிரான்சிஸ் அவர்கள், ஆகஸ்ட் 23, இவ்வெள்ளியன்று, ஹாஸ்டாக் (#IDRSTA) குடன் தன் டுவிட்டர் செய்தியை வெளியிட்டுள்ளார். ஆகஸ்ட் 23, இவ்வெள்ளியன்று, அடிமை வர்த்தகம் மற்றும், அதன் ஒழிப்பை நினைவுகூர்ந்த உலக நாள் நினைவுகூரப்பட்டதை முன்னிட்டு, திருத்தந்தை பிரான்சிஸ் அவர்களும், இந்நாளை மையப்படுத்தி, தன் டுவிட்டர் செய்தியில், உலகில் எல்லாவிதமான அடிமைமுறைகள் ஒழிக்கப்படுமாறு அழைப்பு விடுத்துள்ளார். அட்லாண்டிக் அடிமை வர்த்தகம் இப்போதைய ஹெய்ட்டி மற்றும், தொமினிக்கன் குடியரசாகிய, அப்போதைய சாந்தோ தொமிங்கோவில், 1791ம் ஆண்டு, ஆகஸ்ட் 22ம் தேதிக்கும், ஆகஸ்ட் 23ம் தேதிக்கும் இடைப்பட்ட இரவில் எழுந்த மாபெரும் கிளர்ச்சியே, அட்லாண்டிக் பெருங்கடல் வழியாக நடைபெற்ற அடிமை வர்த்தகம் ஒழிக்கப்பட வழியமைத்தது. ஆப்ரிக்கா, ஐரோப்பா, அமெரிக்கா மற்றும், கரீபியன் நாடுகளுக்கிடையே நடத்தப்பட்ட அடிமை வியாபாரங்களுக்குப் பலியானோர், மற்றும், பாதிக்கப்பட்டோரை நினைவுகூர்ந்து, இத்தகைய அடிமைமுறை உலகில் நிறுத்தப்பட வேண்டும் என்பதை வலியுறுத்த, ஐ.நா. நிறுவனம், ஒவ்வோர் ஆண்டும் ஆகஸ்ட் 23ம் தேதி, அடிமை வர்த்தகம் மற்றும், அதன் ஒழிப்பை நினைவுகூரும் உலக நாளை கடைப்பிடித்து வருகின்றது. ஆகஸ்ட் 23, இவ்வெள்ளியன்று, இந்த உலக நாளின் 25வது ஆண்டு நிறைவு கடைப்பிடிக்கப்படுகின்றது. மேலும், Jamestownக்கு ஆப்ரிக்கர்கள் அடிமைகளாகக் கொண்டுவரப்பட்ட 400ம் ஆண்டு நிறைவும், 2019ம் ஆண்டில் நினைவுகூரப்படுகின்றது 16ம் நூற்றாண்டு முதல், 19ம் நூற்றாண்டு வரையுள்ள காலகட்டத்தில், 400 ஆண்டுகளுக்கு மேலாக, ஏறத்தாழ 1 கோடியே 20 இலட்சம் முதல், 1 கோடியே 28 இலட்சம் வரையிலான ஆப்ரிக்க மக்கள், அட்லாண்டிக் பெருங்கடல் வழியே, அடிமைகளாக, வர்த்தகம் செய்யப்பட்டுள்ளனர் [2019-08-24 02:29:52]


மனிதநேயமிக்க துணிச்சலான பெண்களை நினைவுகூர்வோம்

2003ம் ஆண்டு, ஆகஸ்ட் 19ம் தேதி, பாக்தாத்தில் நடத்தப்பட்ட பயங்கரவாத தாக்குதலில் உயிரிழந்த, ஐ.நா.வின் சிறப்புப் பிரதிநிதி Sergio Vieira de Mello அவர்கள் நினைவாக, உலக மனிதநேய நாள் கடைப்பிடிக்கப்படுகிறது கிறிஸ்டோபர் பிரான்சிஸ் – வத்திக்கான் செய்திகள் கடும் துன்பங்களை அனுபவிக்கும் மக்களைத் தேடிச் சென்று, அவர்களுக்கு உதவி செய்கின்ற, நெஞ்சுரமுள்ள பெண்களை, மனிதநேய உலக நாளான, ஆகஸ்ட் 19, இத்திங்களன்று நினைவுகூர்வோம் என்று, திருத்தந்தை பிரான்சிஸ் அவர்கள், தன் டுவிட்டர் செய்தியில் கூறியுள்ளார். மனிதாபிமானப் பணியாற்றும் பெண்களை, நன்றியுடன் வாழ்த்துவதற்கு அழைப்பு விடுத்து, ஐ.நா. நிறுவனம், மனித நேய உலக நாளை, ஹாக்ஸ்டாக்குடன், (#WomenHumanitarians) இத்திங்களன்று கடைப்பிடித்தவேளை, திருத்தந்தை பிரான்சிஸ் அவர்களும், தன் டுவிட்டர் செய்தியை, ஹாக்ஸ்டாக்குடன், இத்தகைய பெண்களுக்கு அர்ப்பணித்துள்ளார். “இன்னல்களை எதிர்கொள்ளும் நம் சகோதரர், சகோதரிகளை நாடிச்சென்று, அவர்களுக்கு உதவிக்கரம் நீட்டுகின்ற, துணிச்சல்மிக்க பெண்களை இன்று நினைவுகூர்கிறோம், அவர்கள் ஒவ்வொருவரும், கடவுளின் அருகாமை மற்றும், அவரின் பரிவன்பின் அடையாளமாக உள்ளார்கள்” என்ற சொற்கள், திருத்தந்தை பிரான்சிஸ் அவர்களின் டுவிட்டர் செய்தியில், ஹாக்ஸ்டாக் (#WomenHumanitarians) குடன் வெளியானது. 2003ம் ஆண்டு, ஆகஸ்ட் 19ம் தேதி, ஈராக்கின் பாக்தாத்திலுள்ள, ஐ.நா. தூதரகத்தைக் குறிவைத்து நடத்தப்பட்ட பயங்கரவாத தாக்குதலில் உயிரிழந்த, ஈராக்கில், ஐ.நா.வின் சிறப்புப் பிரதிநிதியாகப் பணியாற்றிய Sergio Vieira de Mello அவர்கள் நினைவாக, அவர் இறந்த ஆகஸ்ட் 19ம் நாள், உலக மனிதநேய நாளாக கடைப்பிடிக்கப்பட்டு வருகிறது. அல்கொய்தா அமைப்பு, வாகனத்தில் குண்டுகளை வைத்து நடத்திய மிகப்பெரிய பயங்கரவாத தாக்குதலில், பிரேசில் நாட்டவரான, 55 வயது நிரம்பிய செர்ஜோ அவர்கள் உட்பட, 22 பேர் உயிரிழந்தனர். மேலும் பலர் படுகாயம் அடைந்தனர். செர்ஜோ அவர்கள், ஐ.நா. நிறுவனத்தில், 34 ஆண்டுகளுக்கும்மேல் முக்கிய பணிகள் ஆற்றியவர். [2019-08-23 02:56:34]


கிறிஸ்தவர்களிடையே ஒருமைப்பாட்டுணர்வு இன்றியமையாதது

இயேசுவோடு நாம் கொள்ளும் உறுதியான உறவின் வழியாக, அவரின் திருஉடலாம் திருஅவையின் அங்கத்தினர்களோடும் அன்பின் பிணைப்பை உருவாக்குகிறோம் கிறிஸ்டோபர் பிரான்சிஸ் – வத்திக்கான் திருத்தூதர் பணிகள் நூலில் காணப்படும் முதல் கிறிஸ்தவர்களின் நடவடிக்கைகள் குறித்து கடந்த சில வாரங்களாக தன் புதன் மறைக்கல்வித் தொடரை வழங்கிவரும் திருத்தந்தை பிரான்சிஸ் அவர்கள், புனித திருத்தந்தை ஆறாம் பவுல் அரங்கில் குழுமியிருந்த திருப்பயணிகளுக்கு, திருஅவையின் பிறப்பில் தூய ஆவியார், அதன் வளர்ச்சியில் இயேசுவின் சீடர்களின் பங்களிப்பு ஆகியவை குறித்து இன்று எடுத்துரைத்தார். அன்பு சகோதரர் சகோதரிகளே, திருத்தூதர் பணிகள் குறித்த நம் தொடர் மறைக்கல்வி உரையில் இன்று, எவ்வாறு கிறிஸ்தவ சமுதாயம் தூய ஆவியாரின் கொடைகளால் பிறந்தது என்பதையும், இயேசுவின் சீடர்கள் தங்களுக்கிடையே வாழ்வை பகிர்ந்துகொண்டதன் வழியாக எவ்வாறு திருஅவையை வளர்த்தனர் என்பதையும் நோக்குவோம். இறைக்குடும்பத்தைக் கட்டியெழுப்புவதில், கிறிஸ்தவர்களுக்கிடையே ஒருமைப்பாட்டுணர்வு என்பது இன்றியமையாதது. இந்த உடன்பிறந்த உணர்வும், இயேசுவின் உடல் மற்றும் இரத்தமெனும் அருளடையாளத்தைப் பெறுவதன் வழியாக ஊட்டம் பெறுகிறது. இயேசுவோடு நாம் கொள்ளும் உறுதியான உறவின் வழியாக அவரின் திருஉடலாம் திருஅவையின் அங்கத்தினர்களோடும் அன்பின் பிணைப்பை உருவாக்குகிறோம் என்பதை இங்கு காண்கிறோம். துவக்ககால கிறிஸ்தவர்களிடையே திருநற்கருணையில் பங்கெடுப்பது என்பது, தங்கள் பொருட்களை பொதுவில் வைத்து, ஏழை சகோதர சகோதரிகளுக்கு உதவும் அக்கறையை வெளிப்படுத்துவதை நோக்கி அவர்களை இட்டுச்சென்றது. சகோதரத்துவ பிறரன்பை உண்மையாக வாழ்வதன் வழியாக, ஒன்றிப்பின் தீச்சுடரைத் தாங்கியவர்களாக, கிறிஸ்துவின் சீடர்கள் என்ற தனித்தன்மையை நாம் வெளிப்படுத்த முடியும். இத்தகைய அழைப்பிற்கு உண்மையுள்ளவர்களாக நாம் செயல்பட முயலும்வேளையில், இறைவன், கனிவு எனும் தூய ஆவியாரை நம்மீது பொழிந்து, நம் ஒருமைப்பாட்டுணர்வை, குறிப்பாக, உதவித் தேவைப்படுவோருடன் நம் ஒருமைப்பாட்டுணர்வைப் பலப்படுத்துவாராக. இவ்வாறு, தன் புதன் பொது மறைக்கல்வி உரையை வழங்கிய திருத்தந்தை பிரான்சிஸ் அவர்கள், புனித திருத்தந்தை ஆறாம் பவுல் அரங்கில் குழுமியிருந்த அனைவருக்கும் தன் அப்போஸ்தலிக்க ஆசீரையும் அளித்தார். [2019-08-22 02:19:52]


திருத்தந்தை - இறையன்பின் தீ, பிறரன்பில் பற்றியெரிகிறது

தங்களின் ஓய்வு நேரங்களை, நோயாளிகள், ஏழைகள் மற்றும் மாற்றுத்திறனாளிகள் மத்தியில் செலவழிப்பதற்கு பல இளையோர் முன்வருகின்றனர். கடவுள் அன்பின் தீ, நம் அன்பைச் சுத்திகரிக்கிறது - திருத்தந்தை கிறிஸ்டோபர் பிரான்சிஸ் – வத்திக்கான் செய்திகள் மற்றவர் மீது அக்கறையின்மையை அகற்றி, அவர்களின் தேவைகளுக்கு நம் இதயங்களைத் திறப்பதற்காகவே, இயேசு, இம்மண்ணுலகில் கடவுள் அன்பின் தீயைக் கொணர்ந்தார் என்று, திருத்தந்தை பிரான்சிஸ் அவர்கள், இஞ்ஞாயிறு மூவேளை செப உரையில் கூறினார். ஆகஸ்ட் 18, இஞ்ஞாயிறு நண்பகலில், வத்திக்கான் புனித பேதுரு வளாகத்தில், கூடியிருந்த ஆயிரக்கணக்கான மக்களுக்கு மூவேளை செப உரையாற்றிய திருத்தந்தை பிரான்சிஸ் அவர்கள், நற்செய்தியின் ஒளியில், உறுதியான தீர்மானம் எடுப்பதற்கு நேரம் வந்துள்ளது என, இயேசு தம் சீடர்களுக்குக் கூறும், இஞ்ஞாயிறு நற்செய்தி வாசகம் (லூக்.12:49-33) பற்றிய சிந்தனைகளை வழங்கினார். மண்ணுலகில் தீ மூட்ட வந்தேன். அது இப்பொழுதே பற்றி எரிந்து கொண்டிருக்க வேண்டும் என்பதே என் விருப்பம் என்று, இயேசு தம் சீடர்களிடம் கூறிய இந்நற்செய்திப் பகுதியில், அவர் குறிப்பிட்டுள்ள தீ உருவகத்தைப் போன்று, வாழ்வு பற்றி நாம் எடுக்கும் தீர்மானம் தள்ளிப்போடப்படக் கூடாது என திருத்தந்தை கூறினார். கடவுள் அன்பின் தீயை வரவேற்பதற்கு, சோம்பல், அக்கறையின்மை, புறக்கணிப்பு, தனக்குள்ளே முடங்கிப்போதல் போன்ற எண்ணங்களைக் கைவிட வேண்டும் என்றுரைத்த திருத்தந்தை, நற்செய்திக்கு கிறிஸ்தவர்கள் எவ்வாறு சான்று பகர வேண்டுமென்பதையும் விளக்கினார். நற்செய்திக்கு சான்று பகர்தல் என்பது, நன்மையை நல்கும் தீ போன்றது என்றும், தனிமனிதர்கள், இனங்கள், மக்கள், மற்றும், நாடுகள் மத்தியில் ஏற்படும் அனைத்துப் பிரிவினைகளையும் விலக்கி வாழ்வதாகும் என்றும் கூறியத் திருத்தந்தை, கடவுள் அன்பின் தீ, எதிலும் தனித்துநின்று வாழ்வதை எரித்து, அனைவருக்கும் பிறரன்புப் பணியாற்ற நம் இதயங்களைத் திறக்க வைக்கும் என்றும் தெரிவித்தார். தங்களின் ஓய்வு நேரங்களை, நோயாளிகள், ஏழைகள் மற்றும் மாற்றுத்திறன் கொண்டவர்கள் மத்தியில் செலவழிப்பதற்கு பல இளையோர் முன்வருகின்றனர் என்று குறிப்பிட்ட திருத்தந்தை பிரான்சிஸ் அவர்கள், கடவுள் அன்பின் தீ, நம் அன்பைச் சுத்திகரிக்கிறது என்று கூறினார். [2019-08-20 02:40:44]


இறைவன், நம் வாழ்வின் சுமைகளில் தோள்கொடுக்கிறார்

நம் வாழ்வின் சுமைகளைத் தாங்கிக் கொள்வதற்கு, தூய ஆவியார், நமக்குத் திடமளித்து, சக்தியளிக்கிறார் மேரி தெரேசா – வத்திக்கான் செய்திகள் வாழ்வின் சுமைகளை நாம் தனியே சுமக்கவிடாமல், இறைவனும், அதில் தோள் கொடுக்கிறார் என்ற ஆறுதல்தரும் சொற்களை, திருத்தந்தை பிரான்சிஸ் அவர்கள், இச்சனிக்கிழமையன்று, தன் டுவிட்டர் செய்தியாகப் பதிவு செய்திருந்தார். ஒருபுறம் கனமழை, பெருவெள்ளம், மறுபுறம் வறட்சி, தண்ணீர்ப் பஞ்சம், இன்னொரு புறம், போர்கள், துப்பாக்கிச்சூடுகள், புலம்பெயர்வுகள், குடும்பப்பாரங்கள், அரசியல் அழுத்தங்கள் என, பல்வேறு வழிகளில், உலகில் மக்கள் ஒவ்வொரு நாளும் துன்புற்றுவரும்வேளை, திருத்தந்தை பிரான்சிஸ் அவர்களின் டுவிட்டர் செய்தி, புண்பட்ட மனதிற்கு நல்மருந்தாக அமைந்துள்ளது. “நம் வாழ்வின் சுமைகள், நம் தோள்களில் தனியே விடப்படுவதில்லை, தூய ஆவியார், நம் சுமைகளைத் தாங்கிக் கொள்வதற்கு, நமக்கு ஊக்கமளித்து, சக்தியளிக்கிறார்” என்ற வார்த்தைகள், திருத்தந்தை பிரான்சிஸ் அவர்களின் டுவிட்டர் செய்தியில், ஆகஸ்ட் 17, இச்சனிக்கிழமையன்று, இடம்பெற்றிருந்தன. @pontifex என்ற வலைத்தள முகவரியில், ஏறக்குறைய ஒவ்வொரு நாளும் திருத்தந்தை பிரான்சிஸ் அவர்கள் வெளியிட்டுவரும் டுவிட்டர் செய்திகள், ஆகஸ்ட் 16, இவ்வெள்ளி முடிய, 2,081 என்பதும், அவரது டுவிட்டர் பதிவுகளை, ஆங்கில மொழியில் பின்பற்றுவோரின் எண்ணிக்கை மட்டும், 1 கோடியே 81 இலட்சம் என்பதும் குறிப்பிடத்தக்கன. இதற்கிடையே, அமெரிக்க ஐக்கிய நாட்டின் டெக்சாஸ் மாநிலத்தின் எல் பாசோவில் நடத்தப்பட்ட துப்பாக்கிச்சூடு தாக்குதலுக்குப்பின், அந்நாட்டில் ஆயுத விற்பனை இருமடங்காகியுள்ளது என்றும், துப்பாக்கிச்சூடு பயிற்சிகள் 700 விழுக்காடு அதிகரித்துள்ளன என்றும், panampost.com வலைத்தள செய்தி கூறுகிறது. [2019-08-20 02:35:21]


மரியாவின் 'ஆம்' என்ற ஒப்புதல் - டுவிட்டர் செய்தி

"நாசரேத்தில் மரியா கூறிய 'ஆம்' என்ற சொல்லின் வழியே, அவரது விண்ணகப் பயணம் துவங்கியது. இறைவனுக்கு வழங்கப்படும் 'ஆம்' என்ற ஒவ்வொரு ஒப்புதலும், விண்ணகம் நோக்கி எடுத்துவைக்கப்படும் ஓர் அடி." ஜெரோம் லூயிஸ் - வத்திக்கான் செய்திகள் புனித கன்னி மரியாவின் விண்ணேற்பு பெருவிழாவையொட்டி திருத்தந்தை பிரான்சிஸ் அவர்கள் வெளியிட்ட டுவிட்டர் செய்தியில், மரியா வழங்கிய 'ஆம்' என்ற ஒப்புதல், மையக்கருத்தாக அமைந்தது. "நாசரேத்தில் மரியா கூறிய 'ஆம்' என்ற சொல்லின் வழியே, அவரது விண்ணகப் பயணம் துவங்கியது. இறைவனுக்கு வழங்கப்படும் 'ஆம்' என்ற ஒவ்வொரு ஒப்புதலும், விண்ணகத்தையும், முடிவில்லா வாழ்வையும் நோக்கி எடுத்துவைக்கப்படும் ஓர் அடி. ஏனெனில் இறைவன் நம் அனைவரையும் தன்னோடு, தன் வீட்டில் இருப்பதையே விரும்புகிறார்" என்ற சொற்களை திருத்தந்தை தன் டுவிட்டர் செய்தியாகப் பதிவு செய்திருந்தார். அன்னை மரியா புதைக்கப்பட்ட கல்லறையில் அவரது உடல் இல்லை என்பதை திருத்தூதர்கள் துவக்கத்திலிருந்தே நம்பி வந்தனர் என்பதும், மரியாவின் விண்ணேற்பு விழாவை, கீழை திருஅவை 'இறைவனின் அன்னை உறங்கிய திருநாள்' என்று துவக்கத்திலிருந்தே கொண்டாடி வந்தது என்பதும், குறிப்பிடத்தக்கன. மரியா உறங்கிய திருநாளை, 8ம் நூற்றாண்டிலிருந்து, கத்தோலிக்கத் திருஅவை, விண்ணேற்பு விழாவென்று சிறப்பிக்கத் துவங்கியது என்றாலும், இதை ஒரு மறையுண்மையாக, 1950ம் ஆண்டு, திருத்தந்தை 12ம் பயஸ் அவர்கள் அறிவித்தார் என்பது குறிப்பிடத்தக்கது. தன் தவறா வரத்தைப் பயன்படுத்தி, திருத்தந்தை 12ம் பயஸ் அவர்கள், “Munificentissimus deus” என்ற அறிக்கை வழியே, இறைவனின் மாசற்ற தாயான மரியா உடலோடும், ஆன்மாவோடும் விண்ணக மகிமைக்கு எடுத்துச் செல்லப்பட்டார் என்பதை மாற்ற இயலாத ஓர் உண்மையாக வெளியிட்டார். [2019-08-16 22:45:19]


பக்க இலக்கங்களை அழுத்தி எல்லா செய்திகளையும் பார்வையிடவும்