வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



பிரித்தானிய தேர்தலையொட்டி, ஸ்காட்லாந்து ஆயர்களின் மடல்

மத நம்பிக்கை குறித்த சகிப்புத்தன்மை குறைந்துவரும் இக்காலத்தில், கிறிஸ்தவ மத நம்பிக்கைக்கு நெருக்கமான கொள்கைகளை கொண்டுள்ள வேட்பாளர்களை தேர்ந்தெடுக்கவேண்டும் - ஸ்காட்லாந்து ஆயர்களின் விண்ணப்பம் ஜெரோம் லூயிஸ் - வத்திக்கான் செய்திகள் மத நம்பிக்கை குறித்த சகிப்புத்தன்மை குறைந்துவரும் இக்காலத்தில், கிறிஸ்தவ மத நம்பிக்கைக்கு நெருக்கமான கொள்கைகளை கொண்டுள்ள வேட்பாளர்களை தேர்ந்தெடுக்கவேண்டும் என்ற விண்ணப்பத்துடன், ஸ்காட்லாந்து ஆயர்கள், மடல் ஒன்றை வெளியிட்டுள்ளனர். பிரித்தானியாவில் டிசம்பர் 12ம் தேதி நடைபெறவிருக்கும் தேர்தலையொட்டி, இம்மடலை வெளியிட்டுள்ள ஸ்காட்லாந்து ஆயர்கள், கத்தோலிக்க மக்கள் வாக்களிக்க தவறக்கூடாது என்றும், தகுந்த வேட்பாளர்களைத் தேர்ந்தெடுக்கவேண்டும் என்றும் அழைப்பு விடுத்துள்ளனர். கருவிலிருந்து கல்லறை வரை மனித வாழ்வு மதிக்கப்படுத்தல், திருமணம் மற்றும் குடும்ப வாழ்வைப் போற்றுதல், வறுமையை நீக்குதல், மதச் சுதந்திரம் மற்றும் மனசாட்சியின் சுதந்திரம் காக்கப்படுதல், அணு ஆயுதங்களை உற்பத்தி செய்வதையும், விற்பனை செய்வதையும் தடுத்தல் என்ற ஐந்து கருத்துக்களை வலியுறுத்தி ஆயர்களின் மடல் வெளியாகியுள்ளது. கட்சி மனப்பான்மையை விடுத்து, உண்மையையும், நன்மையையும் போற்றிக்காக்கும் தலைவர்களை மக்கள் தெரிவு செய்யவேண்டும் என்று ஸ்காட்லாந்து ஆயர்கள் இம்மடலில் வலியுறுத்தியுள்ளனர். நவம்பர் 23, 24, வருகிற சனி, மற்றும் ஞாயிறு ஆகிய இருநாள்கள், ஸ்காட்லாந்து பகுதியில் உள்ள 500க்கும் மேற்பட்ட கத்தோலிக்க ஆலயங்களில், ஆயர்களின் மடல் வாசிக்கப்படும் என்று, ஸ்காட்லாந்து ஆயர் பேரவை அறிவித்துள்ளது. [2019-11-20 23:45:09]


வறியோரின் அழுகுரலுக்குச் செவிசாய்ப்போம்

இஞ்ஞாயிறு காலை 10 மணிக்கு, வத்திக்கான் புனித பேதுரு பெருங்கோவிலில், வறியோர் உலக நாள் திருப்பலியை நிறைவேற்றும் திருத்தந்தை, அன்று, ஏறத்தாழ 1,500 ஏழைகளுடன், புனித திருத்தந்தை 6ம் பவுல் அரங்கத்தின் முன்பக்கம் மதிய உணவு அருந்துவார். மேரி தெரேசா: வத்திக்கான் செய்திகள் “வறியோரின் அழுகுரலுக்குச் செவிசாய்க்கும் சக்தியை நாம் பெறுவதற்காக, கடவுளின் அருளை மன்றாடுவோம், வறியோரின் அழுகுரல், திருஅவையின் நம்பிக்கையின் அழுகுரல்” என்று, திருத்தந்தை பிரான்சிஸ் அவர்கள், இச்சனிக்கிழமையன்று கூறியுள்ளார். நவம்பர் 17, இஞ்ஞாயிறன்று, மூன்றாவது வறியோர் உலக நாள் கடைப்பிடிக்கப்படும்வேளை, ஏழைகளின் அழுகுரலுக்கு நாம் செவிமடுக்க வேண்டும் என்று, நவம்பர் 16, இச்சனிக்கிழமையன்று தன் டுவிட்டர் செய்தி வழியாக, திருத்தந்தை கேட்டுக்கொண்டுள்ளார். வறியோர் உலக நாள் இஞ்ஞாயிறு காலை பத்து மணிக்கு, வத்திக்கான் புனித பேதுரு பெருங்கோவிலில், வறியோர் உலக நாள் திருப்பலியை நிறைவேற்றும் திருத்தந்தை பிரான்சிஸ் அவர்கள், அன்று, ஏறத்தாழ 1,500 ஏழைகளுடன், புனித திருத்தந்தை 6ம் பவுல் அரங்கத்தின் முன்பக்கம் மதிய உணவு அருந்துவார். ஏழைகளுக்கு 150 மேஜைகளில் உணவு பரிமாறப்படும். வறியோர் உலக நாளை முன்னிட்டு, ஏழைகளின் அன்னை மரியாவைச் சித்தரிக்கும் மூன்று திருவுருவங்களை, பெல்ஜியம் நாட்டின் Banneaux திருத்தலம், திருத்தந்தை பிரான்சிஸ் அவர்களுக்கு வழங்கவுள்ளது. "வறியவரின் நம்பிக்கை ஒருபோதும் வீண்போகாது" (தி.பா.9,18) என்ற தலைப்பில், மூன்றாவது வறியோர் உலக நாள், நவம்பர் 17, இஞ்ஞாயிறன்று கடைப்பிடிக்கப்படுகிறது. வறியோர் உலக நாள், 2017ம் ஆண்டிலிருந்து, பொதுக்காலம் 33ம் ஞாயிறன்று கடைப்பிடிக்கப்பட்டு வருகிறது. [2019-11-17 19:38:47]


நவம்பர் 17ல் கொலம்பியாவுக்காக செபம்

கொலம்பியாவை, ஓர் இல்லமாகவும், எல்லாருக்கும் உரிய இல்லமாகவும் அமைப்பதற்குரிய செயல்திட்டங்களை நடைமுறைப்படுத்துமாறு, அரசையும், குடிமக்கள் சமுதாயத் தலைவர்களையும் ஆயர்கள் கேட்டுக்கொண்டுள்ளனர் மேரி தெரேசா: வத்திக்கான் செய்திகள் தென் அமெரிக்க நாடான கொலம்பியாவில், நவம்பர் 21, வருகிற வியாழனன்று, நாடு தழுவிய போராட்டம் அறிவிக்கப்பட்டுள்ளவேளை, வறியோர் உலக நாள் கடைப்பிடிக்கப்படும் நவம்பர் 17, இஞ்ஞாயிறன்று, நாட்டிற்காக இறைவனிடம் மன்றாடுமாறு ஆயர்கள் அழைப்பு விடுத்துள்ளனர். போராட்டங்கள், குடிமக்களின் பேச்சு சுதந்திரம் மற்றும், கடமையுணர்வை வெளிப்படுத்தும் சனநாயக உரிமையாக உள்ளன, அதேநேரம், போராட்டங்களின்போது, வன்முறை, சூறையாடல், நாசவேலைகள் மற்றும், மரணங்கள் தவிர்க்கப்படுமாறு, கொலம்பிய ஆயர்கள் கேட்டுக்கொண்டுள்ளனர். தேசிய அளவில் நடைபெறவுள்ள போராட்டங்கள் குறித்து வெளியிட்டுள்ள அறிக்கையில், திருத்தந்தை பிரான்சிஸ் அவர்கள், கொலம்பியாவுக்குத் திருத்தூதுப் பயணம் மேற்கொண்டபோது விடுத்த வேண்டுகோள்களையும், ஆயர்கள் சுட்டிக்காட்டியுள்ளனர். நாட்டின் ஒற்றுமையைக் கட்டியெழுப்பும் முயற்சிகளைக் குறைத்துவிட வேண்டாமெனவும், சந்திப்பு கலாச்சாரத்திற்கு ஆதரவாகச் செயல்படுங்கள் எனவும் திருத்தந்தை கொலம்பிய மக்களுக்கு அழைப்பு விடுத்ததைக் குறிப்பிட்டுள்ள ஆயர்கள், எந்தவித சமுதாய பிரச்சனைகளும், உற்றுக்கேட்டல் மற்றும், உரையாடல் வழியாக தீர்வு காணப்பட வேண்டுமென்ற கத்தோலிக்கத் திருஅவையின் நிலைப்பாட்டை மீண்டும் தெரிவித்துள்ளனர். (Fides) [2019-11-17 19:33:11]


திருத்தந்தை - குணப்படுத்தும் கரங்கள் பேறுபெற்றவை

உரோம் குழந்தை இயேசு மருத்துவமனை துவங்கப்பட்டதன் 150ம் ஆண்டு நிறைவை முன்னிட்டு, அம்மருத்துவமனை பணியாளர், சிறார் மற்றும் குடும்பத்தினர் என ஏறத்தாழ ஆறாயிரம் பேரைச் சந்தித்தார், திருத்தந்தை பிரான்சிஸ் மேரி தெரேசா: வத்திக்கான் செய்திகள் உரோம் குழந்தை இயேசு (Bambino Gesu) சிறார் மருத்துவமனைப் பணியாளர்கள், நோயாளிச் சிறாரைக் குணமாக்குவதற்கு மட்டும் தங்களை அர்ப்பணிக்காமல், அரிய நோய்களைக் குணமாக்குவதற்குரிய முயற்சிகளை இரட்டிப்பாக்க வேண்டுமென்று, திருத்தந்தை பிரான்சிஸ் அவர்கள் கேட்டுக்கொண்டார். திருப்பீடத்தின் உரோம் குழந்தை இயேசு மருத்துவமனை துவங்கப்பட்டதன் 150ம் ஆண்டு நிறைவை முன்னிட்டு, அம்மருத்துவமனையின் நிர்வாகத்தினர், மருத்துவர்கள், செவிலியர், ஏனைய பணியாளர், சிறார் மற்றும் குடும்பத்தினர் என ஏறத்தாழ ஆறாயிரம் பேரை, புனித 6ம் பவுல் அரங்கத்தில், நவம்பர் 16, இச்சனிக்கிழமையன்று, சந்தித்து உரையாற்றினார், திருத்தந்தை பிரான்சிஸ். திருப்பீடம், இந்த புகழ்மிக்க நிறுவனத்திற்கு, தனது அயராத ஒத்துழைப்பை வழங்கி வருகின்றது என்று குறிப்பிட்ட திருத்தந்தை, 1869ம் ஆண்டில், இத்தாலியின் முதல் சிறார் மருத்துவமனையாக ஆரம்பிக்கப்பட்ட இது, ஒரு கொடை மற்றும், உள்தூண்டுதல் என்று கூறினார். ஒரு பெண் மற்றும், ஓர் அன்னையாக, Arabella Salviati அவர்கள், சிறார்க்கென மனத்தாராளத்துடன் இம்மருத்துவமனையைத் துவக்கினார் என்றும், இது 1924ம் ஆண்டில் வத்திக்கானுக்கு நன்கொடையாக வழங்கப்பட்டது என்றும் உரையாற்றிய திருத்தந்தை பிரான்சிஸ் அவர்கள், அன்றிலிருந்து, கத்தோலிக்கத் திருஅவை, இப்பூமியின் எல்லா இடங்களிலும் உள்ள சிறார்க்கென, உலகின் சிறாரின் பாரம்பரிய சொத்தாக இதை அமைத்துள்ளது என்றும் கூறினார். இம்மருத்துவமனையின் உண்மையான தனித்துவம் பற்றியும் குறிப்பிட்ட திருத்தந்தை, வெனெசுவேலா நாட்டு அன்னை ஒருவர், தனது மகன் இம்மருத்துவமனையில் குணமாக்கப்பட்டது பற்றி எழுதியிருப்பது, சிறந்த சான்றாக உள்ளது என்று கூறினார். பிறரைக் குணமாக்குவது ஒரு கொடையாகும் எனக் கூறிய திருத்தந்தை, அந்நிகழ்வில் கலந்துகொண்ட மருத்துவர்கள் மற்றும், செவிலியரின் கரங்களை ஆசீர்வதித்தார். மேலும், இம்மருத்துவமனையின் பணிகளைப் பாராட்டி ஊக்குவித்தார், திருத்தந்தை பிரான்சிஸ். [2019-11-17 19:29:12]


கடவுள் உங்கள் செபங்களை கேட்டருள்கிறார்

இயேசுவே உங்களின் அரும்பொருட்செல்வம் என உலகிற்கு எடுத்துச் சொல்லுங்கள், அன்னை மரியாவுடன் செல்லுங்கள், அந்த அன்னை, கடவுளின் கனிவின் திருத்தூதர்களாக உங்களை மாற்றுவார் மேரி தெரேசா: வத்திக்கான் செய்திகள் சிறியோராய், வறியோராய், நலிந்தோராய் இருக்கும் நீங்கள், திருஅவையின் செல்வக்குவியல், நீங்கள் திருத்தந்தையின், அன்னை மரியாவின் மற்றும், கடவுளின் இதயத்தில் இருக்கின்றீர்கள் என்று, லூர்து நகரில் கருத்தரங்கு ஒன்றில் கலந்துகொள்ளும் திருப்பயணிகளிடம் கூறியுள்ளார், திருத்தந்தை பிரான்சிஸ். நவம்பர் 17, வருகிற ஞாயிறன்று, மூன்றாவது வறியோர் உலக நாள் கடைப்பிடிக்கப்படுவதை முன்னிட்டு, Fratello என்ற கழகம், பிரான்ஸ் நாட்டின் லூர்து நகரில் நடத்திவரும் நான்கு நாள் கருத்தரங்கில் கலந்துகொள்ளும் திருப்பயணிகளிடம், நவம்பர் 15, இவ்வெள்ளியன்று காணொளி வழியாகப் பேசிய திருத்தந்தை, இவ்வாறு கூறினார். லூர்து நகர் திருத்தலத்தில் நோயாளிகளைப் பராமரிக்கும் திருப்பயணிகளை ஊக்கப்படுத்திய திருத்தந்தை பிரான்சிஸ் அவர்கள், கடவுள் உங்கள் செபங்களை கேட்டருள்கிறார் என்று கூறினார். பிறருக்கு கொடுப்பதற்கு எதுவுமில்லாத நிலையில், எவரும் வறியோராய் இல்லை என்று கூறியுள்ள திருத்தந்தை, அன்பு உலகைக் காப்பாற்றுகிறது, மற்றும், அன்பு பொழியப்படும் பாத்திரங்களாக நாம் இருக்குமாறு கடவுள் விரும்புகிறார் என்றும், இந்த திருத்தலத்தைவிட்டுச் செல்கையில், நம்பிக்கையுடன், உங்களைச் சுற்றியிருப்பவர்களுக்கு கடவுளன்பின் சாட்சிகளாகச் செல்லுங்கள் என்றும் கேட்டுக்கொண்டுள்ளார். இயேசுவே உங்களின் அரும்பொருட்செல்வம் என உலகிற்கு எடுத்துச் சொல்லுங்கள், அன்னை மரியாவுடன் செல்லுங்கள், அந்த அன்னை, கடவுளின் கனிவின் திருத்தூதர்களாக உங்களை மாற்றுவார், திருத்தந்தை உங்களை அன்புகூர்கிறார் மற்றும், உங்களை நம்புகிறார் என்றும், தனது காணொளிச் செய்தியில் பேசியுள்ளார், திருத்தந்தை பிரான்சிஸ். ‘வறியோர்க்காக வறியோர் திருஅவை’ என, திருத்தந்தை பிரான்சிஸ் அவர்கள் விடுத்துவரும் அழைப்பிற்குப் பதிலளிக்கும் விதமாக, Fratello கழகம், லூர்து திருத்தலத்தில், சமுதாயத்தால் புறக்கணிக்கப்பட்டோருக்கு, இந்த கருத்தரங்கை ஏற்பாடு செய்திருந்தது. திருத்தந்தை பிரான்சிஸ் அவர்கள், Misericordia et Misera என்ற தன் திருத்தூது மடல் வழியாக, இரக்கத்தின் சிறப்பு யூபிலி ஆண்டின் நிறைவில், வறியோர் உலக நாளை அறிவித்தார். உலக வறியோர் நாள், 2017ம் ஆண்டிலிருந்து, ஆண்டின் 33ம் ஞாயிறன்று கடைப்பிடிக்கப்பட்டு வருகிறது. [2019-11-15 20:54:59]


டிஜிட்டல் உலகில் குழந்தையின் மாண்பு காக்கப்பட...

டிஜிட்டல் உலகின் தொழில்நுட்பங்கள், இளையோரை, பெரும் தீமைகளுக்கு அழைத்துச் செல்வதை உணர்ந்து, அத்தீமைகளிலிருந்து அவர்களைக் காப்பதற்கு முயற்சிகளை மேற்கொள்ளவேண்டும் - திருத்தந்தை பிரான்சிஸ் ஜெரோம் லூயிஸ் - வத்திக்கான் செய்திகள் சமூக வலைத்தளங்கள், சிறுவர் சிறுமியரை தவறான முறையில் பயன்படுத்தாமல், அவர்களுக்கு உரிய மாண்பை வழங்கும் முயற்சியில், அனைத்துத் துறைகளும் இணைந்து செயலாற்றவேண்டும் என்று திருத்தந்தை பிரான்சிஸ் அவர்கள் தன்னைச் சந்திக்க வந்திருந்த பன்னாட்டு உறுப்பினர்களிடம் கூறினார். "டிஜிட்டல் உலகில் குழந்தையின் மாண்பு" என்ற தலைப்பில், நவம்பர் 14, மற்றும் 15 ஆகிய இரு நாள்கள், வத்திக்கானில் நடைபெறும் ஒரு பன்னாட்டுக் கருத்தரங்கில் கலந்துகொள்ளும் உறுப்பினர்களை, நவம்பர் 14, இவ்வியாழன் காலை திருப்பீடத்தில் சந்தித்த திருத்தந்தை பிரான்சிஸ் அவர்கள், குழந்தைகளைக் காக்கும் பொறுப்பு அனைத்துத் துறைகளையும் சார்ந்த கடமை என்பதை வலியுறுத்திக் கூறினார். இதே மையக்கருத்துடன், 2017ம் ஆண்டு, அக்டோபர் 3ம் தேதி முதல் 6ம் தேதி முடிய உரோம் நகரில் நடைபெற்ற கருத்தரங்கைப் பற்றியும், அக்கருத்தரங்கில் கலந்துகொண்டோரை தான் சந்தித்தது குறித்தும் திருத்தந்தை தன் உரையில் நினைவுகூர்ந்தார். சிறுவர், சிறுமியர் அடைந்துள்ள துன்பங்கள் குறித்து அண்மைய ஆண்டுகளில் கத்தோலிக்கத் திருஅவை சந்தித்துள்ள வேதனைகளும், சவால்களும் மிகப் பெரியவை என்பதை தன் உரையில் எடுத்துரைத்த திருத்தந்தை பிரான்சிஸ் அவர்கள், இந்தப் பிரச்சனையைத் தீர்க்க நெடுநாள் நீடிக்கும் தீர்வுகள் தேவை என்பதை வலியுறுத்திக் கூறினார். டிஜிட்டல் உலகம் கண்டுபிடித்துவரும் பல்வேறு தொழில்நுட்பங்கள், மக்களுக்கு, குறிப்பாக, இளையோருக்கு பெரும் உதவியாக உள்ளன என்பதை நாம் மறுக்கமுடியாது என்பதைச் சுட்டிக்காட்டியத் திருத்தந்தை, இதே தொழில்நுட்பங்கள், இளையோரை பெரும் தீமைகளுக்கும் அழைத்துச் செல்வதை உணர்ந்து, அத்தீமைகளிலிருந்து அவர்களைக் காப்பதற்கு முயற்சிகளை மேற்கொள்ளவேண்டும் என்று கேட்டுக்கொண்டார். குழந்தைகளைக் கொண்டு உருவாக்கப்படும் ஆபாச வலைத்தளங்கள், மனித வர்த்தகம், பாலியல் கொடுமைகள் ஆகியவற்றை வளர்க்கின்றன என்பதை தன் உரையில் கவலையுடன் எடுத்துரைத்த திருத்தந்தை பிரான்சிஸ் அவர்கள், இத்தகையக் கொடுமைகளுக்கு உள்ளாகும் குழந்தைகளும், சிறுவர் சிறுமியரும் தங்கள் வாழ்வு முழுவதையும் வேதனையில் கழிக்கும் தண்டனைக்கு உள்ளாகின்றனர் என்று கூறினார். சிறுவர் சிறுமியரை டிஜிட்டல் வழியில் தவறாகப் பயன்படுத்தும் நிறுவனங்களை தண்டிக்கும், மற்றும், தடுத்து நிறுத்தும் வழிமுறைகளை, அரசுகள் உடனடியாக நடைமுறைப்படுத்தவேண்டும் என்று திருத்தந்தை தன் உரையில் அழைப்பு விடுத்தார். தொடர்புத் துறையில் பயன்படுத்தப்படும் தொழில்நுட்பங்களை உருவாக்கும் பல்வேறு நிறுவனங்கள், தங்கள் பணி, தொழில் நுட்பத்தோடு நின்று விடுகிறது என்று சாக்கு சொல்லி தப்பித்துக்கொள்ளக்கூடாது என்பதையும், அவர்கள் உருவாக்கும் தொழில்நுட்பங்கள், தகுதியான முறையில் பயன்படுத்தப்படுவதையும் அவர்கள் உறுதி செய்யவேண்டும் என்றும், திருத்தந்தை பிரான்சிஸ் அவர்கள் வேண்டுகோள் விடுத்தார். ஒவ்வொரு மனிதரின் தனிப்பட்ட அடையாளங்கள் டிஜிட்டல் முறையில் பதிவாகும் இன்றையச் சூழலில், குறிப்பாக, குழந்தைகள் மற்றும் சிறுவர் சிறுமியரின் தனிப்பட்ட அடையாளங்கள் தவறான முறையில் பயன்படுத்தப்படுவதைத் தடுக்கும் வழிகளையும் டிஜிட்டல் தொழில்நுட்ப நிறுவனங்கள் மக்கள் நடுவே அறிமுகம் செய்வது அவர்களது கடமை என்பதையும் திருத்தந்தை தன் உரையில் வலியுறுத்திக் கூறினார். நம்மைச் சுற்றியுள்ள குழந்தைகளின் கண்களை நேருக்கு நேர் காணும்போது, அவர்களை, இறைவனின் ஒப்பற்ற கலைப்படைப்பாகக் கண்டு, அவர்களுக்கு உரிய மாண்பை வழங்க நாம் அழைக்கப்பட்டுள்ளோம் என்றும், உலகில் பிறக்கும் ஒவ்வொரு குழந்தையும் நல்லதொரு வாழ்வை அமைத்துக்கொள்ளும் உரிமை பெற்றுள்ளது என்பதை அனைவரும் உணரவேண்டும் என்றும் கூறி, திருத்தந்தை பிரான்சிஸ் அவர்கள் தன் உரையை நிறைவு செய்தார். [2019-11-15 01:06:23]


வத்திக்கான் வளாகத்தில் ஏழைகளுக்கு மருத்துவ முகாம் நவ.10-17

மூன்றாவது வறியோர் உலக நாளையொட்டி புனித வத்திக்கான் பேதுரு வளாகத்தில், ஏழைகளுக்கென அமைக்கப்படும் தற்காலிக மருத்துவ முகாம், நவம்பர் 10 முதல், நவம்பர் 17 வரை இயங்கும் மேரி தெரேசா: வத்திக்கான் செய்திகள் நவம்பர் 9, இச்சனிக்கிழமை, உரோம் நகரில் உள்ள இலாத்தரன் பசிலிக்கா பேராலய நேர்ந்தளிப்பு விழா சிறப்பிக்கப்பட்டதையொட்டி, திருத்தந்தை பிரான்சிஸ் அவர்கள், இப்பேராலயத்தில், மாலை 5.30 மணிக்கு ஆடம்பரத் திருப்பலியொன்றை தலைமையேற்று நடத்துகிறார். இந்த பசிலிக்காவில் புதிதாக அமைக்கப்பட்டுள்ள மறையுரை மேடை ஒன்றையும், புதிதாக வடிவமைக்கப்பட்டுள்ள சிலுவையில் அறையுண்ட இயேசுவின் திரு உருவத்தையும் திருத்தந்தை அர்ச்சிக்கிறார் என்றும், இந்த நேர்ந்தளிப்பு விழாவுக்கென உருவாக்கப்பட்டுள்ள புதிய செபங்களை, திருத்தந்தை முதல் முறையாகப் பயன்படுத்துகிறார் என்றும், உரோம் மறைமாவட்ட அறிக்கை கூறுகிறது. மூன்றாவது வறியோர் உலக நாள் மேலும், நவம்பர் 17ம் தேதி, பொதுக்காலத்தின் 33ம் ஞாயிறன்று சிறப்பிக்கப்படும், மூன்றாவது வறியோர் உலக நாளையொட்டி, திருத்தந்தை பிரான்சிஸ் அவர்கள், புனித பேதுரு பசிலிக்கா பேராலயத்தில், காலை 10 மணிக்கு திருப்பலியாற்றுவார் என்று திருப்பீட வழிபாட்டுத் துறை அறிவித்துள்ளது. இத்திருப்பலிக்குப் பின்னர், புனித திருத்தந்தை 6ம் பவுல் அரங்கத்தில், உரோம் மற்றும், லாட்சியோ மாநிலத்திலுள்ள 1,500க்கும் அதிகமான வறியோருடன் மதிய உணவு அருந்துவார், திருத்தந்தை பிரான்சிஸ். இந்த உலக நாளை முன்னிட்டு, நவம்பர் 10, இஞ்ஞாயிறன்று புனித வத்திக்கான் பேதுரு வளாகத்தில், கடந்த ஆண்டைப் போலவே தற்காலிக மருத்துவ முகாம் அமைக்கப்படும். நவம்பர் 17, ஞாயிறுவரை இயங்கும் இந்த முகாம், ஒவ்வொரு நாளும், காலை 8 மணி முதல் இரவு பத்து மணி வரை செயல்படும், இதில் ஏழைகளுக்கு கட்டணமில்லா மருத்துவப் பரிசோதனைகள் வழங்கப்படும் என்று, புதியவழி நற்செய்தி அறிவிப்பு திருப்பீட அவை அறிவித்துள்ளது. கடந்த ஆண்டில் இத்தகைய முகாமில் 3,500க்கும் அதிகமான மருத்துவர்களும், செவிலியர்களும் உதவி செய்தனர் என்பது குறிப்பிடத்தக்கது. [2019-11-12 23:45:28]


சந்தியுங்கள், உரையாடுங்கள், மற்றவர்களுக்கு செவிசாயுங்கள்

'நம் நடவடிக்கைகள் குறித்த தவிப்பில் நாம் மாட்டிக்கொள்ளாமல், ஆன்மீக உதவியுடன், இறைவனின் இருப்பு மற்றும் நடவடிக்கைகள் குறித்து புரிந்து கொள்ள முயல்வோம் – திருத்தந்தையின் மறையுரை கிறிஸ்டோபர் பிரான்சிஸ் - வத்திக்கான் செய்திகள் மக்களைச் சென்று சந்தியுங்கள், அவர்களோடு உரையாடலை மேற்கொள்ளுங்கள், தாழ்ச்சி, நன்றி, இதய ஏழ்மை ஆகிய உணர்வுகளுடன் மற்றவர்களுக்கு செவிசாயுங்கள் என இச்சனிக்கிழமையன்று மறையுரையாற்றினார், திருத்தந்தை பிரான்சிஸ். உரோம் நகரின் புனித ஜான் இலாத்தரன் பசிலிக்கா நேர்ந்தளிப்புத் திருவிழாவை சிறப்பிக்கும் விதமாக, அப்பசிலிக்காவில் இச்சனிக்கிழமையன்று மாலை திருப்பலி நிறைவேற்றி மறையுரையாற்றிய திருத்தந்தை பிரான்சிஸ் அவர்கள், பிறரைச் சென்று சந்திப்பது, அவர்களோடு உரையாடுவது, அவர்களுக்கு தாழ்மையுடன் செவிமடுப்பது என்ற மூன்று வாக்கியங்களை உரோம் நகர் கிறிஸ்தவர்களுக்கு, ஒரு கொடையாக, தான் வழங்குவதாகத் தெரிவித்தார். 'நம் நடவடிக்கைகள் குறித்த தவிப்பில் நாம் மாட்டிக்கொள்ளாமல், ஆன்மீக உதவியுடன், இந்நகரில் இறைவனின் இருப்பு மற்றும் நடவடிக்கைகள் குறித்து புரிந்துகொள்ள முயல்வோம் என்ற விண்ணப்பத்தையும் முன்வைத்தார், திருத்தந்தை பிரான்சிஸ். மக்களை நோக்கிச் சென்று அவர்களுக்காகப் பணிபுரியும்போது, அவர்களில் ஒரு விடயம் குறித்த நம்பிக்கையையும் விழிப்புணர்வையும் ஏற்படுத்துவது அவசியம் என்றுரைத்தத் திருத்தந்தை, கிறிஸ்துவுக்கு விருப்பமில்லாத, மற்றும், அவரால் மீண்டும் பிறப்பெடுக்க முடியாத இதயம் என்று எதுவும் இல்லை, ஏனெனில், நம் உறவுகள் எவ்வளவு இடிபாடுகளுக்கு உள்ளாக்கப்பட்டிருந்தாலும் மூன்று நாட்களில் அவற்றை மீண்டும் கட்டியெழுப்பி விடுவார் இயேசு என்பதே அவ்விடயம், என மேலும் உரைத்தார். [2019-11-12 00:47:33]


நற்செய்திக்கு வாழ்வால் விளக்கம் சொல்பவர்களாக மாறுவோம்

“திருஅவை, திருஇசை, பொருள் விளக்குபவர்கள்: ஓர் உரையாடல் அவசியம்” என்ற தலைப்பில், திருப்பீட கலாச்சார அவை, மூன்றாவது பன்னாட்டு கருத்தரங்கை நடத்தியது மேரி தெரேசா: வத்திக்கான் செய்திகள் இறைத்தந்தை, கிறிஸ்து இயேசுவில் நமக்கு வெளிப்படுத்தியிருக்கின்ற நற்செய்தியை, ஒவ்வொருவரும் அவரவர் பாணியில், ஒவ்வொரு நாளும் சிறப்பாக விளக்கம் சொல்பவர்களாக மாற வேண்டும் என்ற தன் ஆவலை வெளிப்படுத்தினார், திருத்தந்தை பிரான்சிஸ். நவம்பர் 09, இச்சனிக்கிழமையன்று, திருப்பீடத்தில் தன்னை சந்தித்த, “திருஅவை, திருஇசை, பொருள் விளக்குபவர்கள்: ஓர் உரையாடல் அவசியம்” என்ற தலைப்பில், வத்திக்கானில் நடைபெற்ற மூன்றாவது பன்னாட்டு கருத்தரங்கில் கலந்துகொண்ட பிரதிநிதிகளுக்கு உரையாற்றிய திருத்தந்தை பிரான்சிஸ் அவர்கள், இவ்வாறு கூறினார். இறைத்தந்தை, கிறிஸ்து இயேசுவில் நமக்கு வெளிப்படுத்தியிருக்கின்ற அழகை, மற்றும், அவரோடு நமக்குள்ள பிள்ளைக்குரிய உறவை வெளிப்படுத்தும் புகழ்பாடலை, நாளுக்கு நாள் நன்றாக பொருள் விளக்கம் சொல்பவர்களாக மாற வேண்டும் என்றும், திருத்தந்தை கூறினார். பொருள் விளக்குபவரை நாம் நினைக்கையில், அவர் ஒரு மொழி பெயர்ப்பாளராக, பிறர் புரிந்துகொள்ளும்முறையில் விளக்குபவராக இருப்பதைப் பார்க்கிறோம், இசையிலும், அதன் அழகையும், சிறந்த கலை அனுபவத்தையும் வெளிப்படுத்துவதற்கு, அதனை விளக்குபவர், அதனை இயற்றியவர் பற்றி தனது சொந்த பாணியில் விளக்குகிறார் என்று திருத்தந்தை கூறினார். உண்மையில், ஒவ்வொரு கிறிஸ்தவரும், தனது தனிப்பட்ட வாழ்வில், கடவுளைப் புகழ்வது மற்றும், நன்றிகூர்தலால், கடவுளின் திட்டத்தை விளக்குபவராக இருக்கிறார் என்றும், திருஅவையும், அந்தப் புகழ்பாடல் வழியாக, வரலாற்றில் மேற்கொள்ளும் பயணத்தில் நற்செய்தியை விளக்குகின்றது என்றும், திருத்தந்தை பிரான்சிஸ் அவர்கள் கூறினார் திருஇசை பாப்பிறை நிறுவனம் மற்றும், புனித ஆன்செல்ம் பாப்பிறை திருவழிபாடு நிறுவனத்தின் ஒத்துழைப்புடன், திருப்பீட கலாச்சார அவை, வத்திக்கானில் “திருஅவை, இசை, பொருள் விளக்குபவர்கள்: ஓர் உரையாடல் அவசியம்” என்ற தலைப்பில், வத்திக்கானில் மூன்றாவது பன்னாட்டு கருத்தரங்கை நடத்தியது. [2019-11-09 23:51:26]


திருத்தந்தை, லித்துவேனிய அரசுத்தலைவர் Nauséda சந்திப்பு

பால்டிக் நாடுகளில் ஒன்றான லித்துவேனியாவில், 2011ம் ஆண்டின் கணக்கெடுப்பின்படி, ஏறத்தாழ 77 விழுக்காட்டினர் உரோமன் கத்தோலிக்கர் மேரி தெரேசா: வத்திக்கான் செய்திகள் திருத்தந்தை பிரான்சிஸ் அவர்களை, லித்துவேனிய அரசுத்தலைவர் Gitanas Nauséda அவர்கள், நவம்பர் 08, இவ்வெள்ளி காலையில், திருப்பீடத்தில் தனியே சந்தித்து கலந்துரையாடினார். இச்சந்திப்பிற்குப்பின், திருப்பீடச் செயலர் கர்தினால் பியெத்ரோ பரோலின் அவர்களையும், பன்னாட்டு உறவுகள் திருப்பீட அவையின் செயலர், பேராயர் ரிச்சர்ட் பால் காலகர் அவர்களையும் சந்தித்து உரையாடினார், லித்துவேனிய அரசுத்தலைவர் Nauséda. லித்துவேனிய குடியரசுக்கும், திருப்பீடத்திற்கும் இடையே நிலவிவரும் நல்லுறவுகள், அந்நாட்டின் துன்ப வரலாற்றிலும், சவால்கள் நிறைந்த தற்போதைய சமுதாய-பொருளாதாரச் சூழல்களிலும் கத்தோலிக்கத் திருஅவை ஆற்றிவரும் பணிகள், குடும்ப முன்னேற்றம், சமுதாய நீதி, அந்நியரை வரவேற்றல் போன்ற தலைப்புகளில், இத்தலைவர்கள் கருத்துக்களைப் பகிர்ந்துகொண்டனர். மேலும், தேசிய மற்றும், பன்னாட்டு விவகாரங்கள், உக்ரைனில் இடம்பெறும் போர், ஐரோப்பா தற்போது எதிர்கொள்ளும் சவால்களைச் சந்திக்க, ஐரோப்பிய நாடுகள் மத்தியில் நிலவவேண்டிய ஒத்துழைப்பு போன்ற விவகாரங்களும், இச்சந்திப்புக்களில் இடம்பெற்றன என்று, திருப்பீட தகவல் தொடர்பகம் அறிவித்தது. டுவிட்டர் மேலும், திருத்தந்தை பிரான்சிஸ் அவர்கள், நவம்பர் 08, இவ்வெள்ளியன்று வெளியிட்ட டுவிட்டர் செய்தியில், “விசுவாசம், ஒரு பயணத்திற்கும், வெளியே சென்று செயலாற்றுவதற்கும் அழைப்பு விடுக்கிறது. இந்த வாழ்வுப் பயணத்தில் புனிதப்படுத்தும் செயல் இடம்பெறுகின்றது, இந்தப் பயணம், முன்னோக்கி இட்டுச் செல்வதால், இது மேல்நோக்கியதாகும்” என்ற சொற்கள் பதிவாகியிருந்தன [2019-11-08 16:34:28]


பக்க இலக்கங்களை அழுத்தி எல்லா செய்திகளையும் பார்வையிடவும்