வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



கடவுள் மட்டுமே கொடுக்கக்கூடிய அமைதியை நாம் இறைஞ்சுவோம்

மார்ச் 1, இப்புதனன்று திருத்தந்தைக்குப் பதிலாக கர்தினால் பியோத்ரோ பரோலின் அவர்கள் உரோமையிலுள்ள சாந்தா சபீனா பெருங்கோவிலில் நிறைவேற்றிய சாம்பல் புதன் திருப்பலியில் கடவுள் மட்டுமே கொடுக்கக்கூடிய அமைதியை நாம் இறைஞ்சுகிறோம் என்று கூறினார். திருத்தந்தை பிரான்சிஸ் அவர்கள் கால் வலி காரணமாக சாம்பல் புதன் திருப்பலியை நிறைவேற்ற முடியாத நிலையில், அவரின் மறையுரையை திருப்பீடச் செயலர் கர்தினால் பியெத்ரோ பரோலின் அவர்கள் வாசித்தார். இறைவேண்டல், தவம் மற்றும் தொண்டு ஆகியவை நமக்கு மட்டுமல்ல, அனைவருக்கும் மருந்துகள் என்றும், அவை வரலாற்றை மாற்றும் என்றும், கடவுள் நம் வாழ்விலும் உலகிலும் தலையிடுவதற்கான முக்கிய வழிகளாக அவைகள் அமைந்துள்ளன என்றும், தனது மறையுரையில் அடிக்கோடிட்டுக் காட்டியுள்ளார் திருத்தந்தை பிரான்சிஸ். உக்ரைனுக்கான இறைவேண்டல் மற்றும் உண்ணா நோன்பினைக் கடைப்பிடிக்கும் இந்நாளில், ஆண்களும் பெண்களும் தாங்களாகவே கட்டமைக்க முடியாத அமைதியைக் கடவுளிடம் வேண்டுவோம் என்றும், கடவுள் நம் வேண்டுதல்களைக் கேட்டு, வன்முறையிலிருந்து தப்பி ஓடிக்கொண்டிருக்கும் துன்புறும் மக்களுக்கு உண்மையான அமைதியைக் கொடுக்கட்டும் என்றும் கூறியுள்ளார். இன்றைய நற்செய்தியில் நாம் கேட்டதுபோல, மற்றவர்கள் பார்த்து நம்மைப் பாராட்டவேண்டும் என்பதற்காக, நமது ஆன்மிக மற்றும் அறச்செயல்களை செய்யக்கூடாது என்று தனது மறையுரையின் தொடக்கத்தில் எடுத்துக்காட்டிய திருத்தந்தை பிரான்சிஸ் அவர்கள், இரண்டு விதமான வெகுமதிகளைக் எடுத்துக்காட்டிப் பேசியுள்ளார். முதலாவதாக, மனிதரிடமிருந்து நாம் பெரும் வெகுமதிகள் எவ்விதத்திலும் நிறைவினைத் தராது என்றும், இரண்டாவதாக, இறைத்தந்தையிடமிருந்து நாம் பெறவிருக்கும் வெகுமதிகளே நிலையானதும் நிறைவினைத் தரக்கூடியதாகவும் அமைந்துள்ளதால், இதனை அடைவதே நமது வாழ்வின் உண்மையான நோக்கமாக இருக்கவேண்டும் என்றும், திருத்தந்தை சுட்டிக்காட்டியுள்ளார். இன்று நமது நெற்றியில் பூசப்படும் சாம்பலானது, இறைத் தந்தையிடமிருந்து நாம் பெறும் வெகுமதியைவிட மற்றவர்களிடமிருந்து பெறப்பட்ட வெகுமதியை முன்னிலைப்படுத்தும் பிழையிலிருந்து நம்மைப் பாதுகாக்கிறது என்றும், கடவுளின் உதவியைப் பெறும் அடையாளமாக இருக்கின்றது என்றும் தெரிவித்துள்ளார். தவக்காலம் என்பது, நம்மையே நாம் புதுப்பித்துக் கொள்வதற்கும், உள்நோக்கிய நமது தேடலைத் தொடங்குவதற்கும், இயேசுவின் உயிர்ப்பை நோக்கிய பயணத்தில் இறைத்தந்தையின் வெகுமதியைப் பெறுவதற்குமான சிறந்ததொரு வழியாக அமைகிறது என்றும் எடுத்துரைத்துள்ளார், திருத்தந்தை பிரான்சிஸ். [2022-03-03 23:25:25]


உக்ரைன் பேராலயத்தின்மீது குண்டு வீச வேண்டாம்: பேராயர் வேண்டுகோள்

உக்ரைனில் உள்ள வரலாற்று சிறப்புமிக்க பேராலயத்தின்மீது மீது குண்டு வீச வேண்டாம் என, உக்ரைனில் உள்ள கிரேக்கக் கத்தோலிக்கத் திருஅவையின் தலைவரான பேராயர் Sviatoslav Shevchuk அவர்கள் இரஷ்யாவுக்கு அழைப்பு ஒன்றை விடுத்துள்ளார் Kyiv-Halychன் உக்ரைன் கத்தோலிக்க உயர்மறைமாவட்டம் மற்றும் திருப்பீடத்திற்கான உக்ரைன் தூதரகம், கீவ்வில் உள்ள புனித சோபியா பேராலயத்தின்மீது இரஷ்யா வான்வழித் தாக்குதல் நடத்தத் திட்டமிட்டுள்ளதாக கொடுத்த தகவலின் அடிப்படையில் பேராயர் அவர்கள், இந்த வேண்டுகோளை விடுத்துள்ளார். இந்தக் கொடிய அழிவுச் செயலிலிருந்து பேராலயத்தைக் காக்க இறைவேண்டல் செய்யுமாறு அனைத்து கிறிஸ்தவர்களுக்கும் அழைப்பு விடுத்துள்ள பேராயர் Shevchuk அவர்கள், இத்தகைய அழிவுச் செயலிலிருந்து விலகியிருக்குமாறு ஆக்ரமிப்பாளர்களிடம் விண்ணப்பித்துள்ளதுடன், இந்தக் குற்றத்தைச் செய்ய நினைத்தவர்களின் மனதை, புனித சோபியா மாற்றட்டும் என்றும் கூறியுள்ளார். புனித சோபியா பேராலயம் அனைத்து ஸ்லாவிய மக்களுக்கும் புனிதமானது மட்டுமல்ல, இது யுனெஸ்கோவின் உலகப் பாரம்பரிய சின்னமாகவும் விளங்குகிறது. ஆர்த்தடாக்ஸ் மற்றும் உக்ரேனிய கத்தோலிக்கர்களுக்கு இப்பேராலயம் மத முக்கியத்துவம் வாய்ந்தது. உக்ரேனிய கத்தோலிக்கர்கள் திருப்பீடத்துடன் தங்கள் ஒன்றிப்பை அறிவித்து, ஆர்த்தடாக்ஸ் திருஅவையுடனான ஒன்றிப்பை முறித்துக் கொள்வதற்குப் பல நூறு ஆண்டுகளுக்கு முன்பு, 11ஆம் நூற்றாண்டில் அதன் கட்டுமானம் தொடங்கப்பட்டது. (UCAN) [2022-03-03 23:09:31]


பிரேசில் தவக்கால முயற்சிக்கு திருத்தந்தையின் செய்தி

மார்ச் 2, இப்புதனன்று பிரேசில் தலத்திருஅவையின் மனித உடன்பிறந்த உணர்வு நிலைகுறித்த முயற்சிக்கு, செய்தி ஒன்றை வழங்கியுள்ள திருத்தந்தை பிரான்சிஸ் அவர்கள், கத்தோலிக்கக் கல்வி நிறுவனங்கள் தங்களைப் புதுப்பித்துக்கொள்ள வேண்டியதன் அவசியத்தையும், அதில் சுட்டிக்காட்டியுள்ளார். கல்விக்கும், சகோதரத்துவ உடன்பிறந்த உணர்வு நிலைக்கும் இடையேயான உறவின் முக்கியத்துவத்தை எடுத்துக்காட்டும் இவ்வாண்டுக்கான அவர்களின் மையப்பொருளானது, சமூகத்தின் விளிம்புகளில் மிகவும் பாதிக்கப்படக்கூடிய விடயங்களை முன்வைப்பதாகவும், கடவுளின் படைப்பைக் கவனித்துக்கொள்வதன் முக்கியத்துவத்தை எடுத்துக்காட்டி அனைவரையும் விழிப்படையச் செய்வதாகவும் கூறியுள்ளார். உண்மையில், இன்றையச் சமுதாயத்தைப் பார்க்கும்போது, ​​உலகளாவிய கல்வி உடன்படிக்கைக்கான அழைப்பில் நினைவுகூரப்பட்டபடி, உலகளாவிய உடன்பிறந்த உணர்வுநிலை மற்றும் ஒருங்கிணைந்த மனிதநேயத்தை ஊக்குவிக்கும் கல்வியைப் பெறுவதற்குக் கல்வித் துறையில் மாற்றியமைக்கும் நடவடிக்கைகளை மேற்கொள்ள வேண்டிய அவசரத் தேவை மிகவும் தெளிவாகத் தெரிகிறது என்பதையும் எடுத்துரைத்துள்ளார் திருத்தந்தை பிரான்சிஸ். தங்கள் குழந்தைகளின் கல்வியில் குடும்பங்களுக்கு உதவுதல், அனைவருக்கும் கல்வி என்ற உத்தரவாதம் ஆகியவற்றில் அரசுகளின் பொறுப்பை அங்கீகரித்து மதிப்பிடும் அதேவேளையில், கல்வித் துறையில் திருஅவையின் முக்கியப் பணி அங்கீகரிக்கப்பட்டு மதிப்பிடப்பட வேண்டும் என்றும் அறிவுறுத்தியுள்ளார் திருத்தந்தை பிரான்சிஸ். மதங்கள் எப்போதும் கல்வியுடன் நெருங்கிய உறவைக் கொண்டுள்ளதுடன், கல்வியைத் தங்களின் மத நடவடிக்கைகளுடன் இணைத்துள்ளன என்று எடுத்துரைத்த திருத்தந்தை பிரான்சிஸ் அவர்கள், கடந்த காலத்தைப் போலவே, இன்றும், நமது மத மரபுகளின் ஞானத்துடனும் மனிதநேயத்துடனும், உலகளாவிய உடன்பிறந்த உணர்வுநிலையை வளர்க்கக்கூடிய ஒரு புதுப்பிக்கப்பட்ட கல்வி நடவடிக்கைக்கு, நாம் ஒரு தூண்டுதலாக இருக்க விரும்புகிறோம் என்றும் விளக்கினார். "சகோதரத்துவம் மற்றும் கல்வி" என்ற மையப்பொருளின் தேர்வு, ஒவ்வொரு திருஅவைச் சமூகத்திலும் பெரும் நம்பிக்கையை ஏற்படுத்துவதாகவும், கத்தோலிக்கப் பள்ளிகள் மற்றும் பல்கலைக்கழகங்களில் பயனுள்ள புதுப்பித்தலுக்குக் காரணமாகவும் இருக்கவேண்டும் என்று, தான் முழு மனதுடன் நம்புவதாகவும், திருத்தந்தை பிரான்சிஸ் அவர்கள் தெரிவித்தார். மேலும், கிறிஸ்துவை முன்மாதிரியாகக் கொண்டு அன்புடன் கல்வி கற்பதன் வழியாக ஞானத்தை பரவச் செய்யலாம் என்றும், இதனால் மற்ற கல்வி நிறுவனங்களும் இந்த ஒருங்கிணைந்த உருவாக்கத்தின் மாதிரியாக மாறுவதற்கு வாய்ப்புள்ளது என்றும் நம்பிக்கை தெரிவித்தார் திருத்தந்தை பிரான்சிஸ். [2022-03-02 23:48:05]


மியான்மார், உக்ரைனின் அமைதிக்காக தவக்கால இறைவேண்டல்

இராணுவ மோதல்களால் பாதிக்கப்பட்டுள்ள மியான்மார் மற்றும் உக்ரைனுக்கு அமைதியைக் கொண்டுவர இந்தத் தவக்காலத்தின்போது கத்தோலிக்கர்கள் உண்ணா நோன்பிருந்து இறைவேண்டல் செய்யுமாறு, மியான்மாரிலுள்ள பியாவின் ஆயர் அலெக்சாண்டர் பியோன் சோ அவர்கள் வலியுறுத்தியுள்ளார். அமைதி கிடைக்கும் என்ற நம்பிக்கையுடன் தவக்கால நாள்களில் சிறப்பு உண்ணா நோன்பினைக் கடைப்பிடிக்குமாறு கேட்டுக்கொண்ட ஆயர் பியோன் சோ அவர்கள், உக்ரைன் அமைதிக்கான தினமாக சாம்பல் புதனை அறிவித்திருக்கும் திருத்தந்தையோடு இணைந்து இறைவேண்டல் செய்வதற்கும் அந்நாட்டுக் கத்தோலிக்கர்களுக்கு அழைப்புவிடுத்துள்ளார். உலகெங்கிலும் உள்ள கிறிஸ்தவர்கள் உக்ரைனின் அமைதிக்காக இறைவேண்டல் செய்வதற்கு வலியுறுத்தப்பட்டுள்ள நிலையில், மியான்மாரும் உள்நாட்டுப் போர் மற்றும் இராணுவத்தின் கொடுஞ்செயல்களுக்குச் சான்றாகி வருகிறது என்றும், இதன் காரணமாக கடந்த 2021ம் ஆண்டு பிப்ரவரி மாதம் முதல் குடிமக்கள் காடுகளிலும், வழிபாட்டுத் தலங்களிலும் தஞ்சம்புகும் அளவிற்குத் தள்ளப்பட்டுள்ளனர் என்றும், ஆயர் பியோன் சோ அவர்கள் வேதனை தெரிவித்துள்ளார். இதற்கிடையில், யாங்கூனின் கர்தினால் பேராயர் சார்லஸ் போ அவர்கள், இந்நாள்களில் கத்தோலிக்கர்கள் பல சவால்களை எதிர்கொண்டு வரும் நிலையில் சோர்வடையவேண்டாம் என்றும், தங்களின் நம்பிக்கையை இழக்கவேண்டாம் என்றும், விசுவாசிகளுக்கு அழைப்பு விடுத்துள்ளார். மார்ச் 2, புதனன்று, புனித மரியன்னை பேராலயத்தில் சாம்பல் புதன் திருப்பலியின் மறையுரையின்போது, நாம் கடவுளின் சாயல் மற்றும் அவருக்குச் சொந்தமானவர்கள், எனவே நாம் நன்மை செய்வதில் சோர்வடைய வேண்டாம் என்ற புனித பவுலடியாரின் வார்த்தைகளை எடுத்துக்காட்டி விசுவாசிகளின் நம்பிக்கையை உறுதிப்படுத்தினார், பேராயர் சார்லஸ் போ. 2021ம் ஆண்டு பிப்ரவரி முதல், மியான்மார் இராணுவம் ஆட்சியை மீண்டும் கைப்பற்றியதைத் தொடர்ந்து இடம்பெற்றுவரும் இராணுவத்தின் கொடுஞ்செயல்களால், 1,500க்கும் மேற்பட்டோர் கொல்லப்பட்டுள்ளனர். மேலும், 12,000க்கும் மேற்பட்டோர் கைது செய்யப்பட்டு காவலில் வைக்கப்பட்டுள்ளனர் என்று செய்திகள் கூறுகின்றன. (UCAN) [2022-03-02 23:44:33]


போர் ஒருபோதும் வேண்டாம், போரினால் எல்லாமே இழக்கப்படுகின்றன

உக்ரைன் நாட்டில் இடம்பெற்றுவரும் போர் முடிவுக்குவரவும், அந்நாட்டில் அமைதி நிலவவும், அந்நாட்டிற்காக இறைவேண்டல் மற்றும், உண்ணாநோன்பைக் கடைப்பிடிக்கும் இச்சாம்பல் புதனன்று எல்லாரும் ஒன்றிணைந்து செபிப்போம் என்று, திருத்தந்தை பிரான்சிஸ் அவர்கள், மார்ச் 02, இப்புதன்கிழமையன்று கேட்டுக்கொண்டுள்ளார். உக்ரைன் நாட்டின் அமைதிக்காக நாம் கடவுளை மன்றாடவேண்டும் என்று தன் டுவிட்டர் பக்கத்தில், தொடர்ந்து செய்திகளைப் பதிவுசெய்துவரும் திருத்தந்தை பிரான்சிஸ் அவர்கள், இப்புதனன்றும் செய்திகளை வெளியிட்டுள்ளார். தவக்காலத்தில் நுழையும் இந்நாளில், நம் இறைவேண்டலும், உண்ணாநோன்பும், உக்ரைனில் அமைதிக்காக உருக்கமாக விண்ணப்பம் எழுப்புவதாக இருக்கவேண்டும் எனவும், உலகில் அமைதி நிலவுவது என்பது, கிறிஸ்துவைப் பின்செல்வது, மற்றும், நம் தனிப்பட்ட வாழ்க்கையின் மனமாற்றத்தோடு எப்போதும் துவங்குகின்றது என்பதை நாம் மனதில் இருத்தவேண்டும் எனவும், திருத்தந்தை தன் டுவிட்டர் செய்திகளில் குறிப்பிட்டுள்ளார். உக்ரைனுக்காக இறைவேண்டல் “அமைதியின் ஆண்டவராம் கடவுளே, எம் இறைவேண்டல்களுக்குச் செவிசாய்த்தருளும், “போர் ஒருபோதும் வேண்டாம்”, “போரினால் எல்லாமே இழக்கப்படுகின்றன” என்பதை எடுத்துரைக்க, துணிச்சலைத் தந்தருளும், எம் கண்களையும், இதயங்களையும் திறந்தருளும். அமைதியை நிலைநிறுத்த தெளிவான நடவடிக்கைகளை மேற்கொள்ள எம் இதயங்களில் துணிச்சலை ஊன்றியருளும், எம்மில், நம்பிக்கையின் சுடர் உயிரூட்டத்துடன் இருக்க உதவும், இதனால், பொறுமை மற்றும், விடாமனஉறுதி ஆகியவற்றோடு உரையாடல் மற்றும், ஒப்புரவுக்கு எம்மை அரப்ப்ணிப்போம், இறுதியில் இவ்வழியில் அமைதி என்ற வெற்றிவாகையைச் சூடுவோம், ஆமென்” என்றும், திருத்தந்தை தன் டுவிட்டர் பக்கத்தில், இறைவேண்டல் ஒன்றை வெளியிட்டுள்ளார். மேலும், மார்ச் 02, இப்புதன் பொது மறைக்கல்வியுரையை மையப்படுத்தி, டுவிட்டர் செய்தி ஒன்றை வெளியிட்டுள்ள திருத்தந்தை, தலைமுறைகளுக்கு இடையே நல்லிணக்க உறவுகள் நிலவவேண்டியதன் அவசியத்தை வலியுறுத்திக் கூறியுள்ளார். போலந்து மக்களுக்கு திருத்தந்தை நன்றி இன்னும், இப்புதன் பொது மறைக்கல்வியுரையில் போலந்து நாட்டுத் திருப்பயணிகளுக்கு வாழ்த்துக் கூறியபோது, உக்ரைன் நாட்டிலிருந்து புலம்பெயரும் மக்களுக்கு, போலந்து மக்கள், தங்கள் நாட்டு எல்லைகளையும், இதயங்களையும், இல்லக் கதவுகளையும் திறந்துவிட்டுள்ளதற்கு, திருத்தந்தை தன் நன்றியையும், பாராட்டையும் தெரிவித்துள்ளார். உக்ரைன் மக்கள் மாண்போடு வாழ்வதற்கு, முதலில் ஆதரவுக்கரம் நீட்டியவர்கள், போலந்து மக்களே என்றுரைத்து, அவர்களின் தாராளமனதையும் திருத்தந்தை பாராட்டியுள்ளார். வத்திக்கானில் சிலுவைப்பாதை தவக்காலத்தின் ஒவ்வொரு வெள்ளிக்கிழமையும், உரோம் நேரம் மாலை நான்கு மணிக்கு, வத்திக்கானின் புனித பேதுரு பெருங்கோவிலில் சிலுவைப்பாதை பக்திமுயற்சி நடைபெறும் என்று அறிவிக்கப்பட்டுள்ளது. [2022-03-02 23:40:41]


திருத்தந்தை: உக்ரைன் நாட்டிற்காக ஒன்றிணைந்து மன்றாடுவோம்

உக்ரைன் நாட்டின் மீது இரஷ்யா நடத்திவரும் தாக்குதல்கள் குறித்த தன் ஆழ்ந்த கவலையை வெளியிட்டு, அந்நாட்டில் அமைதி நிலவ இறைவேண்டல்களை எழுப்புமாறு அழைப்புவிடுத்துவரும் திருத்தந்தை பிரான்சிஸ் அவர்கள், பிப்ரவரி 28, இத்திங்களன்று தன் டுவிட்டர் பக்கம் வழியாகவும், அந்நாட்டிற்காக ஒன்றிணைந்து கடவுளை மன்றாடுவோம் என்று கேட்டுக்கொண்டுள்ளார். “குறிப்பிட்ட ஆதாயங்களைக் கணக்கிடுவது, மற்றும், ஆயுதங்களைப் பயன்படுத்துவதில் நம்பிக்கை வைப்பது ஆகியவற்றைவிட, அமைதிக்காக கலந்துரையாடல்களை மேற்கொள்வது, மிகவும் வலிமையானது” என்ற சொற்கள், திருத்தந்தையின் டுவிட்டர் செய்தியில், இத்திங்களன்று இடம்பெற்றிருந்தன. உலகில் போர்கள் நிறுத்தப்படவும், அவற்றால் துன்புறும் அப்பாவி மக்களுக்கு மனிதாபிமான உதவிகள் கிடைக்கவும் அடிக்கடி அழைப்புவிடுத்துவரும் திருத்தந்தை பிரான்சிஸ் அவர்கள், கடந்த வாரத்தில் உக்ரைனில் போர் தொடங்கியுள்ளதையடுத்து, அந்நாட்டில் அமைதி நிலவுவதற்கு நடவடிக்கைகள் மேற்கொள்ளப்படுமாறு தொடர்ந்து விண்ணப்பித்து வருகிறார் என்பது குறிப்பிடத்தக்கது. கர்தினால் மால்கம் இரஞ்சித் மேலும், இலங்கையின் கொழும்பு பேராயர் கர்தினால் மால்கம் இரஞ்சித் அவர்களும், பாரிஸ் நகரின் பெரிய மசூதியின் தலைவர் Chems-eddine Hafiz அவர்கள் தலைமையில் இருவரும், திருஅவையின் உச்ச நீதிமன்றத்தின் செயலர் ஆயர் Andrea Ripa அவர்களும், பிப்ரவரி 28, இத்திங்கள் காலையில், திருத்தந்தை பிரான்சிஸ் அவர்களை, திருப்பீடத்தில் தனித்தனியே சந்தித்து கலந்துரையாடினர். [2022-03-01 00:56:48]


போரை நடத்துபவர்கள், மனிதகுலம் குறித்து அக்கறையற்றவர்கள்

போரை நடத்துபவர்கள் அனைவரும், மனிதகுலம் குறித்து சிறிதும் அக்கறையற்றவர்கள் என்ற குற்றச்சாட்டை முன்வைத்த திருத்தந்தை பிரான்சிஸ் அவர்கள், அழிவுதரும் ஆயுதங்களைக் கைக்கொள்வது என்பது, இறைவிருப்பத்திற்கு எதிரானது என உரைத்தார். உக்ரைனில் இடம்பெறும் இரஷ்ய தாக்குதல் குறித்து, பிப்ரவரி 27, ஞாயிற்றுக்கிழமையன்று நண்பகல் மூவேளை செப உரைக்குப்பின் தன் ஆழ்ந்த கவலையை வெளியிட்ட திருத்தந்தை பிரான்சிஸ் அவர்கள், மார்ச் 2ம் தேதி, திருநீற்றுப் புதனன்று திருஅவையில் உக்ரைன் நாட்டின் அமைதிக்கான செபம் மற்றும் உண்ணாநோன்பு நாள் கடைப்பிடிக்கப்பட உள்ளதை மீண்டும் நினைவூட்டினார். உக்ரைன் மீது நடத்தப்படும் தாக்குதலால் அவதியுறும் மக்களுக்காகவும், போரிலிருந்து தப்பிக்க வெளியேறும் மக்களுக்கான மனிதாபிமான உதவிகளுக்காகவும், உக்ரைனிலும் உலகின் பல பகுதிகளிலும் இடம்பெறும் மோதல்களை முடிவுக்குக்கொணரும் அரசியல் தீர்மானங்களுக்காகவும் இறைவேண்டல் செய்யுமாறு அனைவருக்கும் அழைப்புவிடுத்தார் திருத்தந்தை பிரான்சிஸ். உக்ரைனில் துன்புறும் நம் சகோதரர் சகோதரிகளுடன் நம் நெருக்கத்தை வெளியிடும் நாளாக, திருநீற்றுப் புதனைச் சிறப்பிப்போம் என்ற அழைப்பை அனைத்து விசுவாசிகளுக்கும் விடுத்த திருத்தந்தை பிரான்சிஸ் அவர்கள், போரின் பாதை மேற்கொள்ளப்படக் கூடாது என்று, மீண்டும் மீண்டும் இறைவனை மன்றாடி வரும் நாம், போர் வேண்டாம் என்று குரல்கொடுப்பதை நிறுத்திவிடாமல், கடவுளிடம் மிக உருக்கமாக மன்றாடுவோம் என கேட்டுக்கொண்டார். போரைத் தொடங்கி நடத்துபவர்கள், மக்களின் உண்மையான வாழ்வு மீது அக்கறை காட்டுவதில்லை, மாறாக, அவர்கள், அனைத்திற்கும் மேலாக, கட்சிநலன்கள் மற்றும், அதிகாரத்தை முன்னிலைப்படுத்துபவர்களாக இருப்பதால், உண்மையாகவே, எல்லாப் போர்களிலும் அப்பாவி மக்களே பாதிக்கப்படுகிறார்கள் என்பதை சுட்டிக்காட்டிய திருத்தந்தை பிரான்சிஸ் அவர்கள், இந்நாள்களில் புகலிடம் தேடுகின்ற வயதுமுதிர்ந்தோர், தங்கள் பிள்ளைகளுடன் நாட்டைவிட்டு வெளியேறும் அன்னையர் போன்ற, நம் சகோதரர், சகோதரிகளுக்கு மனிதாபிமானக் கதவுகள் திறந்துவிடப்பட்டு, அவர்கள் வரவேற்கப்படவேண்டும் என கேட்டுக்கொண்டார். உக்ரைன் மற்றும், உலகெங்கும் இடம்பெற்றுவரும் போர்கள் குறித்த மிகுந்த மனவேதனையை வெளியிட்டு, வன்முறையைப் பயன்படுத்துவோருடன் அல்ல, மாறாக, அமைதியை ஏற்படுத்துவோருடன் கடவுள் இருக்கிறார் என்று கூறியத் திருத்தந்தை, உக்ரைன் மற்றும், உலகின் அமைதிக்காகவும், ஏமன், சிரியா, எத்தியோப்பியா போன்று, உலகின் பல்வேறு பகுதிகளில் போரினால் துன்புறும் மக்களுக்காகவும் செபிக்குமாறு அனைவரையும் வலியுறுத்திக் கேட்டுக்கொண்டார். [2022-03-01 00:50:45]


இத்தாலிய Alpine கழகத்தின் பணிகளுக்கு திருத்தந்தை பாராட்டு

இளையோர் செங்குத்தான மலை உச்சிகளில் ஏறுவதற்கும், படைப்பு மற்றும், காயமடைந்துள்ள நம் பொதுவான இல்லமாகிய இப்பூமிக்கோளத்தைப் பாதுகாப்பதற்கும் உதவிவரும், இத்தாலிய Alpine தேசிய கழகத்தினருக்கு, தன் பாராட்டுதல்களை வெளியிட்டுள்ளார், திருத்தந்தை பிரான்சிஸ். இத்தாலிய இராணுவத்தில், மலைப்பகுதியில் சிறப்பாகச் செயல்படும் Alpine படைப்பிரிவு, இவ்வாண்டில் தன் 150வது ஆண்டு நிறைவைச் சிறப்பிப்பதையொட்டி, அவ்வமைப்பின் 150 பிரதிநிதிகள், பிப்ரவரி 26, இச்சனிக்கிழமையன்று, திருத்தந்தை பிரான்சிஸ் அவர்களை திருப்பீடத்தில் சந்தித்து ஆசிர்பெற்றனர். முதல் மற்றும், இரண்டாம் உலகப் போர்களில் சிறப்பாகப் பணியாற்றிய இத்தேசியக் கழகத்தின் கிளைகள், இத்தாலியில் மட்டுமல்லாமல், அர்ஜென்டீனா நாடு உட்பட உலகின் பல பகுதிகளில் பணியாற்றி வருவதைக் குறிப்பிட்டுப் பேசிய திருத்தந்தை, இந்த கழகத்தினர், உடன்பிறப்பு உணர்வு மற்றும், சேவை ஆகிய இரு பண்புகளுக்குச் சான்றுகளாயத் திகழ்கின்றனர் என்று பாராட்டினார். உடன்பிறந்த உணர்வு Alpine படைப்பிரிவு, ஒரு நூற்றாண்டளவாக, ஒரு குடும்பமாகச் செயல்படுவதைக் காண முடிகின்றது என்றும், இராணுவத்தில் பணியாற்றும் படைவீரர்களோடும், பல்வேறு பிறரன்பு நிறுவனங்களோடும் இந்த படைப்பிரிவு ஒத்துழைப்பு வழங்க நன்மனம் காட்டி வருகின்றது என்றும் உரைத்துள்ள திருத்தந்தை, தனிமனிதப்போக்கால் துன்புற்றுவரும் இன்றைய சமுதாயத்திற்கு, மற்றவரைப் பராமரிப்பதில் ஆர்வத்தைத் தூண்டவேண்டிய அவசியம் ஏற்பட்டுள்ளது என்று கூறியுள்ளார். மற்றவருக்குப் பணியாற்றுவதன் வழியாக, உடன்பிறப்பு உணர்வு பேணி வளர்க்கப்படவேண்டும் என்றும், Alpine படைப்பிரிவு, தன் தன்னார்வச் செயல்களால் இந்த நல்லுணர்வுக்குச் சான்றாக விளங்குகின்றனர் என்றும் கூறிய திருத்தந்தை பிரான்சிஸ் அவர்கள், அக்கழகத்தினர் இந்த உடன்பிறப்பு உணர்வை, நிலநடுக்கம் உள்ளிட்ட இயற்கைப் பேரிடர்களால் பாதிக்கப்பட்ட பகுதிகளில் ஆற்றிவரும் சேவைகளில் வெளிப்படுத்தி வருகின்றனர் என்று கூறினார். மிகச் சிறியோராகிய என் சகோதரர் சகோதரிகளுள் ஒருவருக்கு நீங்கள் செய்ததையெல்லாம் எனக்கே செய்தீர்கள் என்ற நற்செய்திக் கூற்றுக்கு, இந்த படைப்பிரிவினர் சான்றாக உள்ளனர் என்றுரைத்து, அவர்களின் பணிகளை ஊக்குவித்தார், திருத்தந்தை பிரான்சிஸ். இத்தாலிய Alpine தேசிய கழகம், 1919ம் ஆண்டில் உருவாக்கப்பட்டது. இந்தக் கழகத்தின் பாதுகாவலர் புனித மவ்ரிசியோ. அவரின் திருநாள், ஒவ்வோர் ஆண்டும் செப்டம்பர் மாதம் 22ம் தேதி சிறப்பிக்கப்படுகின்றது. [2022-02-26 23:30:03]


உக்ரைன் நாட்டிற்காக ஒன்றிணைந்து செபிப்போம்

திருத்தந்தை பிரான்சிஸ் அவர்கள், போரில் ஈடுபட்டுள்ள, உக்ரைன் மற்றும், இரஷ்யா ஆகிய நாடுகளை மனதில்கொண்டு, போர் எப்போதும் தோல்வியையே வெளிப்படுத்தும் என்றும், உக்ரைன் நாட்டிற்காக ஒன்றிணைந்து செபிப்போம் என்றும், தன் டுவிட்டர் பக்கத்தில் செய்திகளைப் பதிவுசெய்துள்ளார். "ஒவ்வொரு போரும், நாம் காண்கின்ற உலகை மோசமான நிலையிலே விட்டுச்செல்கின்றது. போர் என்பது, அரசியல், மற்றும், மனித சமுதாயத்தின் தோல்வியாகும். தீமையின் சக்திகளுக்கு முன்பாகத் தோல்வியைத் தழுவுவதாகும், மற்றும், அச்சக்திகளுக்கு வெட்கத்துடன் சரணடைவதாகும் என்ற சொற்களை, திருத்தந்தை, தன் டுவிட்டர் செய்தியில் வெளியிட்டுள்ளார். அனைவரும் உடன்பிறந்தோர் என்ற தன் திருமடலை மையப்படுத்தி, இவ்வாறு தன் டுவிட்டர் பக்கத்தில் செய்திகளைப் பதிவுசெய்துள்ளார் திருத்தந்தை பிரான்சிஸ். அப்பக்கத்தில், திருச்சிலுவை படம் ஒன்றும், அதற்குக் கீழ் இரஷ்யம் மற்றும், உக்ரைன் மொழிகளில் திருத்தந்தையின் எண்ணங்களும் எழுதப்பட்டுள்ளன. மேலும், பிப்ரவரி 25, இவ்வெள்ளியன்று, உக்ரைன் நாட்டின் கிரேக்க கத்தோலிக்கப் பேராயர் Sviatoslav Shevchuk அவர்களோடு தொலைபேசியில் உரையாடிய திருத்தந்தை பிரான்சிஸ் அவர்கள், அந்நாட்டின் அமைதிக்காகத் தான் தொடர்ந்து செபிப்பதாக உறுதி கூறியுள்ளார். இன்னும், பிப்ரவரி 26, இச்சனிக்கிழமையன்று, Sovereign Military Order of Malta எனப்படும் மால்ட்டா கத்தோலிக்க பிறரன்பு அமைப்பின் பிரதிநிதிகள், திருத்தந்தை பிரான்சிஸ் அவர்களை திருப்பீடத்தில் சந்தித்து கலந்துரையாடினர் [2022-02-26 23:26:14]


உக்ரைன் நாட்டிற்காக உலகெங்கும் இறைவேண்டல்கள்

கடந்த நூற்றாண்டில் ஐரோப்பியக் கண்டத்தில் நிகழ்ந்தவற்றின் நினைவு, அனைத்துவிதமான வெறுப்புப் பேச்சுகளை விட்டொழிக்க, அனைத்து மக்களையும் தூண்டவேண்டும் என்று, இத்தாலிய கத்தோலிக்க ஆயர்கள் வலியுறுத்திக் கூறியுள்ளனர். உக்ரைனில் போர் துவங்கிய முதல் நாளில், உரோம், பொலோஞ்ஞா, அசிசி போன்ற இத்தாலிய நகரங்களில், பல்வேறு அமைப்புகளோடு இணைந்து திருவிழிப்பு செபத்தில் ஈடுபட்டு அறிக்கை ஒன்றை வெளியிட்டுள்ளனர், இத்தாலிய ஆயர்கள், உரோம் நகரத்தின் கொலோசேயம் என்ற இடத்தில் பிப்ரவரி 24ம் தேதி இரவில் உக்ரைன் நாட்டுக் கொடிகள் ஏற்றப்பட்டு, அந்நாட்டிற்காக செப வேண்டல்கள் எழுப்பப்பட்டன. பிப்ரவரி 26, இச்சனிக்கிழமை இரவில், அசிசி நகர் திருத்தலத்திலும் உக்ரைன் நாட்டிற்காக மக்கள் செபிக்கவுள்ளனர். உக்ரைன் நாட்டிற்கு மனிதாபிமான உதவி மேலும், இரஷ்யா உக்ரைன் நாட்டை ஆக்ரமித்துள்ள இவ்வேளையில், உக்ரைன் நாட்டின் கத்தோலிக்கருக்கு உதவும்வண்ணம் பத்து இலட்சம் யூரோக்களை அனுப்பத் திட்டமிட்டுள்ளது, ACN எனப்படும், கத்தோலிக்கப் பிறரன்பு அமைப்பு. உக்ரைன் நாட்டின் 4,879 அருள்பணியாளர்கள், மற்றும், 1,350 அருள்சகோதரிகளுக்கு உதவுவதற்கென்று, ACN அமைப்பு இந்நிதியுதவியை அனுப்பவுள்ளது. அதோடு, கிழக்கு உக்ரைன் பகுதியிலுள்ள இரு இலத்தீன் வழிபாட்டுமுறை மறைமாவட்டங்களுக்கும், மற்றுமொரு கிரேக்க கத்தோலிக்க வழிபாட்டுமுறை மறைமாவட்டத்திற்கும், இந்த அமைப்பு உதவுவதற்குத் தீர்மானித்துள்ளது. (CNA) [2022-02-26 00:22:58]


பக்க இலக்கங்களை அழுத்தி எல்லா செய்திகளையும் பார்வையிடவும்