வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



தாய்லாந்தில் திருத்தந்தையின் திருத்தூதுப் பயணம்

ருத்தந்தையை முகமுமாய்ப் பார்ப்பது, வாழ்நாளில் ஒருமுறை மட்டுமே கிடைப்பது, திருத்தந்தையை மிக அருகில் பார்த்தது, ஒரு புதுமையாக இருந்தது – பாங்காக்கில் 23 வயது நிரம்பிய இளைஞர் Ai மேரி தெரேசா: வத்திக்கான் தாய்லாந்து நாடு, தென்கிழக்கு ஆசியாவின் மத்திய பகுதியில், சியாம் வளைகுடா என முற்காலத்தில் அழைக்கப்பட்ட தாய்லாந்து வளைகுடாவில் அமைந்துள்ளது. 13ம் நூற்றாண்டிலிருந்து பல்வேறு மன்னர்களால் உருவாக்கப்பட்ட இந்நாடு, மியான்மார், கம்போடியா ஆகிய அண்டை நாடுகளின் வல்லசுகளால் அடிக்கடி தாக்கப்பட்டது. தாய்லாந்தில், 1932ம் ஆண்டுவரை மன்னராட்சியே நடைபெற்றது. அவ்வாண்டில் அரசர், அரசியலமைப்பை ஏற்க வேண்டுமென கட்டாயப்படுத்தப்பட்ட புரட்சியால் முடியாட்சி வீழ்ந்தது. துவக்கத்திலிருந்து சியாம் என அழைக்கப்பட்டு வந்த இந்நாடு, 1939ம் ஆண்டு ஜூன் மாதம் 23ம் தேதி, தாய்லாந்து என பெயர் சூட்டப்பட்டது. இரண்டாம் உலகப் போரில் ஜப்பானால் ஆக்ரமிக்கப்பட்டிருந்த தாய்லாந்து, 1946ம் ஆண்டு முதல், 1948ம் ஆண்டு வரை, மீண்டும் சியாம் எனவும், அதற்குப்பின் தாய்லாந்து எனவும் பெயர் மாற்றப்பட்டது. தாய்லாந்து என்றால் “அயலவர் ஆட்சிக்கு உட்படாத நிலம்”, தன்னுரிமையுடைய நிலம் என்று பொருள். ஏனெனில் தென்கிழக்கு ஆசியாவில் இந்நாடு மட்டுமே, ஐரோப்பியர்களின் காலனி ஆதிக்கத்திற்கு உட்படாமல் உள்ளதாகும். அழகிய வெப்பமண்டல கடற்கரைகளையும், செல்வமிக்க அரண்மனைகளையும், சிதைவுற்ற பழங்கால கட்டடங்களையும், புத்தர் திருவுருவத்தைக் கொண்ட பகட்டான கோவில்களையும் தாய்லாந்தில் காணலாம். தலைநகர் பாங்காக்கின் அடையாளங்களாக, Wat Arun, Wat Pho உட்பட பச்சைக்கல் மரகத (Wat Phra Kaew) புத்தமத கோவில்கள் கவினுற காட்சி தருகின்றன. இத்தகைய அழகான தாய்லாந்திற்கு, நவம்பர் 20, இப்புதன்கிழமை உள்ளூர் நேரம் பகல் 12 மணியளவில் சென்ற திருத்தந்தை பிரான்சிஸ் அவர்கள், அடுத்த இரு நாள்களும் அந்நாட்டில் திருத்தூதுப் பயண நிகழ்வுகளை நிறைவேற்றினார். திருத்தந்தையின் தாய்லாந்து பயணம் பற்றி... திருத்தந்தையின் இந்தப் பயணம் பற்றி ஆசியச் செய்தியிடம் பேசிய, 23 வயது நிரம்பிய கணனி தொழில்நுட்ப மாணவர் Thidarat ‘Ai’ Taneame அவர்கள், இப்பயணம், தாய்லாந்தில் கத்தோலிக்கருக்கு மட்டுமல்லாமல், அனைத்து மக்களுக்கும் நம்பிக்கையைக் கொணர்ந்துள்ளது என்று தெரிவித்தார். திருத்தந்தையை முகமுமாய்ப் பார்ப்பது, வாழ்நாளில் ஒருமுறை மட்டுமே கிடைப்பது, திருத்தந்தையை மிக அருகில் பார்த்தது, ஒரு புதுமையாக இருந்தது என்றும் Ai அவர்கள் கூறினார். தாய்லாந்தில் நாங்கள் சிறிய சமுதாயமாக இருந்தாலும், இளம் கத்தோலிக்கர் பாங்காக் நகரில், பெரும்பாலும் ஞாயிறு தினங்களில் சந்திக்கிறோம், நேரம் கிடைக்கும்போது ஒருவருக்கொருவர் ஆதரவான செய்திகளைப் பகிர்ந்து கொள்கிறோம், இது, ஓர் உண்மையான குடும்ப உணர்வை ஏற்படுத்துகின்றது. நாங்கள் குறுகிய வட்டத்திற்குள் வாழவில்லை, எமக்கு நிறைய புத்த மற்றும் இஸ்லாம் மதங்களின் நண்பர்களும் உள்ளனர் என்றும், தாய்லாந்து இளையோர் பகிர்ந்துகொண்டுள்ளனர். [2019-11-24 03:04:04]


திருத்தந்தையின் மாணவர், மொழிபெயர்ப்பாளராக...

திருத்தந்தை பிரான்சிஸ் அவர்களின் வருகை ஜப்பான் நாடெங்கும் நேர்மறையான அதிர்வலைகளை உருவாக்கி வருகிறது - Renzo De Luca ஜெரோம் லூயிஸ்: வத்திக்கான் நவம்பர் 23 முதல் 26 வரை திருத்தந்தை பிரான்சிஸ் அவர்கள் ஜப்பான் நாட்டில் மேற்கொண்டுள்ள திருத்தூதுப் பயணத்தில், ஸ்பானிய மொழியில் அவர் ஆற்றும் அனைத்து உரைகளையும், ஜப்பான் இயேசு சபையின் மாநிலத் தலைவராகப் பணியாற்றும் அருள்பணி ரென்ஸோ தே லூக்கா (Renzo De Luca) அவர்கள் ஜப்பானிய மொழியில் மொழிபெயர்த்து வழங்குகிறார். திருத்தந்தை பிரான்சிஸ் அவர்களுக்கும், அருள்பணி லூக்கா அவர்களுக்கும் இடையே உருவான உறவு, பல ஆண்டுகள் கடந்து வந்த ஒரு பாதை. தற்போது திருத்தந்தையாகப் பணியாற்றும் பிரான்சிஸ் அவர்கள், அர்ஜென்டீனாவில், இயேசு சபை பயிற்சி இல்லத்தின் பொறுப்பாளராகப் பணியாற்றிய வேளையில், இளம் இயேசு சபை துறவி, லூக்கா அவர்கள் அவரிடம் பயின்றார். பின்னர், அவர், ஜப்பான் நாட்டிற்கு, மறைபரப்புப் பணியாளராக அனுப்பப்பட்டார். 35 ஆண்டுகளுக்குப் பின், 2017ம் ஆண்டு, மார்ச் மாதம், அருள்பணி ரென்ஸோ தே லூக்கா அவர்கள், ஜப்பான் இயேசு சபையினருக்கு தலைவராகப் பொறுப்பேற்றுள்ளார். திருத்தந்தை வழங்கும் அனைத்து உரைகளையும், ஜப்பானிய மொழியில் மொழிபெயர்த்து வழங்கும் பொறுப்பு அவருக்கு வழங்கப்பட்டுள்ளது. அருள்பணி லூக்கா அவர்கள், திருத்தந்தை பிரான்சிஸ் அவர்களை கடந்த ஆறு ஆண்டுகளில் இரு முறை சந்தித்துள்ளதாக வத்திக்கான் வானொலிக்கு அளித்த பேட்டியொன்றில் குறிப்பிட்டுள்ளார். திருத்தந்தையும் தானும் 2014ம் ஆண்டு மார்ச் மாதம், வத்திக்கான் சாந்தா மார்த்தா இல்லத்தில் முதல் முறையாகச் சந்தித்ததாகவும், அவ்வேளையில், எவ்வித தடையுமின்றி தங்கள் உறவைப் புதுப்பித்துக் கொண்டதாகவும், அருள்பணி லூக்கா அவர்கள் கூறினார். 1981ம் ஆண்டு, புனித திருத்தந்தை 2ம் ஜான்பால் அவர்கள் ஜப்பான் நாட்டுக்கு மேற்கொண்ட திருத்தூதுப் பயணம், கத்தோலிக்கத் திருஅவையின் மீது அந்நாட்டு மக்கள் கொண்டிருந்த எண்ணங்களை பெருமளவு மாற்றியது என்று தன் பேட்டியில் நினைவு கூர்ந்த அருள்பணி லூக்கா அவர்கள், தற்போது, திருத்தந்தை பிரான்சிஸ் அவர்களின் வருகை ஜப்பான் நாடெங்கும் நேர்மறையான அதிர்வலைகளை உருவாக்கி வருகிறது என்று குறிப்பிட்டார். [2019-11-24 02:56:49]


பாங்காக் Amphorn அரச மாளிகை

தாய்லாந்து அரசர் 5ம் ராமாவின் ஆணையின்பேரில், அரச மாளிகையின் கட்டடப் பணிகள், 1890ம் ஆண்டில் துவங்கி, 1906ம் ஆண்டில் முடிக்கப்பட்டன. இது முதலில், 'தந்தம் தோட்டம்' என்று பெயரிடப்பட்டது கிறிஸ்டோபர் பிரான்சிஸ்: வத்திக்கான் நவம்பர் 21, இவ்வியாழன் உள்ளூர் நேரம் மாலை 5 மணியளவில், பாங்காக் நகரிலுள்ள Amphorn அரச மாளிகை சென்று, கடந்த மே 4ம் தேதி, அரசராக முடிசூட்டப்பட்ட 66 வயது நிரம்பிய அரசர் Maha Vajiralongkorn (Rama X) அவர்களையும், அரசி Suthida அவர்களையும் சந்தித்து கலந்துரையாடினார், திருத்தந்தை பிரான்சிஸ். பரிசுப்பொருள்களும் பரிமாறப்பட்டன. தாய்லாந்து அரச குடும்பத்தினர் சந்திப்பிற்கு செய்தியாளர்கள் அனுமதிக்கப்படவில்லை என்று சொல்லப்பட்டுள்ளது. இந்த மாளிகையில், 1984ம் ஆண்டில் புனித திருத்தந்தை 2ம் ஜான் பால் அவர்கள், அரசர் Maha Vajiralongkorn அவர்களைச் சந்தித்து வாழ்த்தினார். அச்சமயத்தில் இவர், வாரிசுரிமை இளவரசராக இருந்தார். தாய்லாந்தை நீண்ட காலமாக ஆட்சி செய்த, அரசர் Maha Vajiralongkorn அவர்களின் தந்தை Bhumibol Adulyadej அவர்கள், 2016ம் ஆண்டில் உயிரிழந்ததைத் தொடர்ந்து, இவர் அரசராக முடிசூட்டப்பட்டிருக்கலாம். ஆயினும், அரச பதவியை ஏற்பதற்குமுன், தன் தந்தைக்காக துக்கம் அனுசரிப்பதற்காக, இவர் உடனடியாக முடிசூட்டப்பட அனுமதிக்கவில்லை. 2019ம் ஆண்டில் மூன்று நாள்கள் நடைபெற்ற, இந்த அரசரின் முடிசூட்டு விழா நிகழ்வில், 7.3 கிலோ கிராம் எடையுள்ள ‘வெற்றியின் மாபெரும் கீரிடம்’ இவரது தலையில் வைக்கப்பட்டது. தாய்லாந்து அரசர் Chulalongkon (5ம் ராமா) அவர்கள், தான் குடியிருப்பதற்கு, Dusit தோட்டங்களுக்கு மத்தியில் மிகப்பெரிய அரண்மனை வேண்டும் என விரும்பினார். எனவே, இந்த அரசரின் ஆணையின்பேரில், பிரமாண்டமான தாய்லாந்து அரச மாளிகையின் கட்டடப் பணிகள், 1890ம் ஆண்டில் துவங்கி, 1906ம் ஆண்டில் முடிக்கப்பட்டன. 'தந்தம் தோட்டம்' என முதலில் பெயரிடப்பட்ட இம்மாளிகை, நாளடைவில், ‘Amphorn Sathan Residential Hall’ எனப் பெயர் மாற்றம் அடைந்தது. இதற்கு தாய் மொழியில், “விண்ணில் அரச இருப்பிடம்” என்று பொருள். 1900களின் துவக்கம் வரை, தாய்லாந்து ஒரு நாடாக விளங்கவில்லை. தாய்லாந்து புத்த மதத்திற்கு, அரசரே அதிகாரப்பூர்வ புறங்காவலர் ஆவார். [2019-11-23 01:54:31]


இளையோர் திருப்பலியில் திருத்தந்தையின் மறையுரை

இளையோராகிய உங்கள் வழியே, இந்நாட்டின், மற்றும் உலகத்தின் எதிர்காலம் வருகிறது. தான் தெரிவு செய்த மக்களுக்கு இறைவன் உருவாக்கிய திட்டத்தைப் போல, உங்கள் ஒவ்வொருவருக்கும் அவர் திட்டம் வகுத்துள்ளார். ஜெரோம் லூயிஸ் - வத்திக்கான் செய்திகள் அன்பு நண்பர்களே, "ஆண்டவராகிய இயேசு வருகிறார், அவரை எதிர்கொள்ள வாருங்கள்!" நாம் இப்போது செவிமடுத்த நற்செய்தி, நாம் புறப்பட்டுச் சென்று, எதிர்காலத்தைச் சந்திக்க அழைப்பு விடுக்கிறது. இளையோருக்கே உரிய மகிழ்வோடும், ஆர்வத்தோடும், நாம் கிறிஸ்துவை நம் நடுவே வரவேற்போமாக. இளையோர், தாய்லாந்தின், உலகின் எதிர்காலம் இளையோராகிய உங்கள் வழியே, இந்நாட்டின், மற்றும் உலகத்தின் எதிர்காலம் வருகிறது. தான் தெரிவு செய்த மக்களுக்கு இறைவன் உருவாக்கிய திட்டத்தைப் போல, உங்கள் ஒவ்வொருவருக்கும் அவர் திட்டம் வகுத்துள்ளார். இறைவனின் விருந்தில் பங்கேற்க அழைப்பு பெற்றிருந்த பத்து கன்னியரைக் குறித்து, இன்றைய நற்செய்தி பேசுகிறது. அவர்களில் ஒருசிலர், இந்த விருந்தில் பங்கேற்பதற்கு சரியான முறையில் தயாராக இல்லை. துவக்கத்தில் ஆர்வமாக இருந்தவர்கள், நேரம் செல்ல செல்ல ஆர்வம் இழந்தனர். நம் ஒவ்வொருவர் வாழ்விலும் நிகழ்வதை இந்த உவமை எடுத்துரைக்கிறது. இறையரசில் பங்கேற்க நம் ஒவ்வொருவருக்கும் விடப்படும் அழைப்பைக் கேட்டு, முதலில் நாம் உற்சாகம் கொள்கிறோம். ஆனால், பிரச்சனைகளும், தடைகளும் எழும்போது, நமக்கு நெருங்கியவர்கள் துன்புறுவதைக் கண்டும் ஒன்றும் செய்ய இயலாமல் நாம் தவிக்கும்போது, நம்பிக்கை இழக்கிறோம், வெறுப்பும், கசப்பும் நம் உள்ளங்களை நிறைக்கின்றன. திருத்தந்தையின் மூன்று கேள்விகள் உங்களிடம் நான் மூன்று கேள்விகளைக் கேட்க விழைகிறேன். உங்கள் உள்ளங்களில் ஏற்றப்பட்ட ஒளியை, இருள் மற்றும் தொல்லைகள் நடுவே, தொடர்ந்து ஒளிரச் செய்ய விரும்புகிறீர்களா? ஆண்டவரின் அழைத்தலுக்குப் பதிலிருக்க விரும்புகிறீர்களா? அவரது விருப்பத்தை நிறைவேற்ற விருப்பமா? நற்செய்தியின் அறிவிப்பு, உங்கள் வரலாற்றில் ஒரு சிறந்த கருவூலமாக வழங்கப்பட்டுள்ளது. நாம் கூடியிருக்கும் இந்த அழகிய பேராலயம் இதற்கு ஒரு சாட்சி. இந்த ஆலயத்தைவிட மிக அழகிய மனித சமுதாயத்தை நம் முன்னோர்கள் எழுப்பியுள்ளனர். முன்னோரின் நம்பிக்கையில் வேரூன்றி... உங்கள் உள்ளங்களில் ஏற்றப்பட்டுள்ள ஒளியை தொடர்ந்து ஒளிரச் செய்வதற்கு, உங்கள் முன்னோரின், குறிப்பாக, உங்கள் பெற்றோர், தாத்தா, பாட்டி மற்றும் ஆசிரியர்கள் ஆகியோரின் நம்பிக்கையில் நீங்களும் வேரூன்றி நிற்கவேண்டும். இறந்த காலத்திலேயே தங்கிவிடாமல், எதிர்காலத்தையும், புதியச் சூழல்களையும் சந்திக்கும் துணிவை நீங்கள் கண்டுகொள்ளவேண்டும். சில வேளைகளில் நான், இளம் மரங்கள் உயரமாக வளர்ந்து, காற்றில் தங்கள் கிளைகளைப் பரப்பி அசைந்தாடுவதைக் கண்டிருக்கிறேன். பின்னர், புயலொன்று வீசியதும், அவை சாய்ந்துவிடுவதையும் பார்த்திருக்கிறேன். ஆணித்தரமாக தங்கள் வேர்களை ஊன்றாததால், அவை சாய்ந்துவிடுகின்றன. ஆணிவேர் ஏதுமின்றி, எதிர்காலத்தை உருவாக்க நினைக்கும் இளையோர், விரைவில் மனமுடைந்து போவதைக் காணும்போது நான் வருத்தமடைகிறேன். ஆழமாக வேரூன்றாமல், வாழ்வதால், இளையோர் எளிதில் அடித்துச் செல்லப்படுகின்றனர் (Christus Vivit, 179). இளையோர், வேரற்ற மரங்களாக... ஆழமான வேரில்லாதபோது, நம்மைச் சுற்றியெழும் 'குரல்களால்' அலைக்கழிக்கப்படுகிறோம். இந்தக் குரல்கள், ஆரம்பத்தில் அழகாக, கவர்ச்சிகரமாக ஒலிக்கின்றன; ஆனால், காலம் செல்ல, செல்ல, அவை, நம்மை மனத்தளர்ச்சிக்கும் வெறுமைக்கும் இட்டுச்செல்கின்றன. அன்பு, இளம் நண்பர்களே, நீங்கள் ஒரு புதிய தலைமுறை. புதிய எதிர்நோக்குகள், கனவுகள், அதேவேளையில், கேள்விகள், ஐயங்கள் ஆகியவற்றைக் கொண்டிருந்தாலும், கிறிஸ்துவில் வேரூன்றிய இளம் தலைமுறையினர் நீங்கள். உங்கள் மகிழ்வில் நிலைத்திருந்து, எதிர்காலத்தை நம்பிக்கையுடன் சந்திக்க, உங்களை நான் உற்சாகப்படுத்துகிறேன். எதிர்காலத்தைக் குறித்து அச்சம் கொள்ளாமல், அதை சந்திக்க முன்வாருங்கள்! உங்கள் எதிர்காலத்தில் நீங்கள் இறைவனைச் சந்தித்து, அவர் தரும் இறையரசு விருந்தில் பங்கேற்பீர்கள்! [2019-11-23 01:48:29]


Chulalongkorn பல்கலைக்கழகத்தில், கிறிஸ்தவ, பல்சமயத்தவர்

1897ம் ஆண்டில், தாய்லாந்து அரசர் Chulalongkorn அதாவது 5வது இராமா அவர்கள், உரோம் நகர் வந்தபோது, திருத்தந்தை 13ம் லியோ அவர்களைச் சந்தித்தார். கிறிஸ்தவரல்லாத ஒரு நாட்டுத் தலைவர், வத்திக்கானில் வரவேற்கப்பட்டது அதுவே முதன்முறையாகும் மேரி தெரேசா: வத்திக்கான் நவம்பர் 22, இவ்வெள்ளி உள்ளூர் நேரம் மாலை 3.20 மணிக்கு, திருத்தந்தை பிரான்சிஸ் அவர்கள், பாங்காக் Chulalongkorn பல்கலைக்கழகம் சென்றார். அப்பல்கலைக்கழக அரங்கத்தில், பிரிந்த கிறிஸ்தவ சபை மற்றும், பிற மதங்களின் தலைவர்கள் என, 18 பேர் அமர்ந்திருந்தனர். முதலில் இவர்கள் ஒவ்வொருவரையும் கைகுலுக்கி வாழ்த்தினார் திருத்தந்தை பிரான்சிஸ். இரு மாணவர்கள் திருத்தந்தைக்கு மலர்கொத்து கொடுத்து வரவேற்றனர். Chulalongkorn பல்கலைக்கழகத் தலைவர், பேராசிரியர் முனைவர் Bundit Eur-arporn அவர்களும், தாய்லாந்து ஆயர் பேரவையின் கிறிஸ்தவ ஒன்றிப்பு மற்றும், பல்சமய உரையாடல் பணிக்குழுத் தலைவரும் வரவேற்புரையாற்றினர். பேராசிரியர் Eur-arporn உரை Chulalongkorn பல்கலைக்கழகம், தாய்லாந்தின் முதல் பல்கலைக்கழகமாகும். இது, 1917ம் ஆண்டில், தாய்லாந்து அரசர் Chulalongkorn பெயரால் உருவாக்கப்பட்டது. இனம், மதம், பாலினம், சமுதாயநிலை, பொருளாதாரப் பின்புலம் போன்ற வேறுபாடுகள் எதுவுமின்றி, எல்லாருக்கும் உயர்கல்வி வழங்கப்பட வேண்டும் என்ற நோக்கத்தில் அரசர் இதை எழுப்பினார். திருத்தந்தையே, 1984ம் ஆண்டில், புனித திருத்தந்தை 2ம் ஜான் பால் அவர்கள் இங்கு வந்தபின்னர், தாங்கள் தாய்லாந்திர்கு வருகை தந்துள்ளீர்கள். உலகிலுள்ள ஏழைகள் மற்றும், நலிந்தவர்கள் மீது பரிவன்பு, படைப்பைப் பாதுகாத்தல், அர்த்தமுள்ள பல்சமய உரையாடல், மதங்கள், நாடுகள் மற்றும், கலாச்சாரங்கள் மத்தியில் அமைதியைக் கட்டியெழுப்புதல் போன்ற ஞானமுள்ள தங்களின் வார்த்தைகளைக் கேட்பதற்குக் காத்திருக்கிறோம். இவ்வாறு Bundit Eur-arporn அவர்கள், வரவேற்புரையாற்றினார். பின்னர், திருத்தந்தை பிரான்சிஸ் அவர்களும் உரையாற்றினார். சிக்கலான சவால் நிறைந்த இன்றைய உலகில், ஒத்துழைப்பும், சந்திப்பும், ஒருவரையொருவர் மதித்தலும் தேவைப்படுகின்றன என்று திருத்தந்தை கூறினார் [2019-11-23 01:42:11]


புனித லூயிஸ் மருத்துவமனையில் திருத்தந்தையின் உரை

அவசரத் தேவைகளுடன் மருத்துவமனைக்குள் வருவோரின் உயிர்களை கருணையுடன் பேணிக்காத்து வருகிறீர்கள். அவர்களுக்கு குணமளிக்கும் வேளையில், அவர்களுடைய மனித மாண்பை நீங்கள் மீண்டும் வழங்குகிறீர்கள். ஜெரோம் லூயிஸ் - வத்திக்கான் செய்திகள் அன்பு நண்பர்களே, புனித லூயிஸ் மருத்துவமனையில் பணியாற்றும் மருத்துவர்கள், தாதியர், உதவியாளர்கள் அனைவரையும் சந்திப்பதில் எனக்கு மகிழ்ச்சி. தாய்லாந்தின் தலத்திருஅவை, இந்நாட்டு மக்களுக்கு, குறிப்பாக, அதிகத் தேவையில் இருப்போருக்கு ஆற்றும் பணிகளை நேரில் காண்பதை, நான் பெற்ற ஆசீராகக் கருதுகிறேன். "அன்பு எங்கே உள்ளதோ, அங்கே இறைவன் இருக்கிறார்" என்ற கொள்கையுடன் இம்மருத்துவமனை செயலாற்றிவருகிறது. "மிகச் சிறியோராகிய என் சகோதரர் சகோதரிகளுள் ஒருவருக்கு நீங்கள் செய்ததையெல்லாம் எனக்கே செய்தீர்கள் என உறுதியாக உங்களுக்குச் சொல்லுகிறேன்" (மத். 25:40). நலவாழ்வளிக்கும் பணியில் ஈடுபட்டுள்ள நீங்கள் அனைவரும், மறைப்பணியாற்றும் சீடர்கள். நலவாழ்வு வழங்க, நீங்கள் மேற்கொள்ளும் பணி, வெறும் மருத்துவப் பணி மட்டுமல்ல; அது, கருணையின் தலைசிறந்த பணி. அவசரத் தேவைகளுடன் மருத்துவமனைக்குள் வருவோரின் உயிர்களை கருணையுடன் பேணிக்காத்து வருகிறீர்கள். அவர்களுக்கு குணமளிக்கும் வேளையில், அவர்களுடைய மனித மாண்பை நீங்கள் மீண்டும் வழங்குகிறீர்கள். உங்களிடம் ஒப்படைக்கப்பட்டுள்ள நோயாளிகளை, நீங்கள் பெயர்சொல்லி அழைக்கும்போது, உண்மையானச் சீடர்களாக மாறுகிறீர்கள். இப்பணி, மிகக் கடினமானது. எனவே, உங்கள் பணியில் ஒருவருக்கொருவர் உறுதுணையாக இருங்கள். இவ்வாண்டு, புனித லூயிஸ் மருத்துவமனை, தன் 120வது ஆண்டைச் சிறப்பிக்கின்றது. எத்தனையோ மக்கள் இம்மருத்துவமனை வழியே, உதவிகள் பெற்றுள்ளனர். உங்கள் பணிக்கென நான் இறைவனுக்கு நன்றி கூறும் அதே வேளையில், இம்மருத்துவமனை, கிறிஸ்துவின் குணமளிக்கும் அன்பை, இன்னும் அதிகமாகக் கொணரவேண்டும் என்று வேண்டுகிறேன். எந்த ஒரு நோயும், ஆழமானக் கேள்விகளைக் கொணர்கிறது. நோயுற்றதும், அதை எதிர்ப்பதும், அதனால் மனம் தளர்ந்து போவதும் நாம் தரும் பதிலிறுப்பு. வேதனையில் நாம் கலங்குகிறோம். இயேசுவும் வேதனையுற்றார். நம் வேதனையில் பங்கேற்கிறார். இயேசுவின் பாடுகளில் பங்கேற்பதன் வழியே, அவரது அருகாமையை அதிகம் உணர்கிறோம். நாம் மேற்கொண்டுள்ள இச்சந்திப்பை, அன்னை மரியாவின் பாதுகாக்கும் மேல் போர்வையின் கீழ் வைப்போம். காயப்பட்ட தன் மகன் வழியே, நாமும், நம் காயங்கள் வழியே அருள்பெறுவதற்கு, அன்னை மரியா உதவி செய்வாராக! [2019-11-22 00:09:02]


பாங்காக் திருப்பலியில் திருத்தந்தையின் மறையுரை

தாய்லாந்து நாட்டில் முதன் முதலாக அடியெடுத்து வைத்த மறைப்பணியாளர்கள், இரத்த உறவு, கலாச்சாரம், இனம் என்ற எல்லைகளைக் கடந்த பரந்துபட்ட ஒரு குடும்பத்தினருக்கு, நற்செய்தியைக் கொணர்ந்தனர். ஜெரோம் லூயிஸ் - வத்திக்கான் செய்திகள் அன்பு சகோதரர், சகோதரிகளே, "என் தாய் யார்? என் சகோதரர்கள் யார்?" (மத். 12:48). என்ற இக்கேள்வியின் வழியே, இயேசு, தன்னைச் சுற்றியிருந்தோரையும், இன்று, நம்மையும் சிந்திக்க அழைக்கிறார். யார் நமது குடும்பத்தினர், நம் உறவுகள்? இக்கேள்விக்கு, இயேசுவே பதில் அளிக்கிறார்: "விண்ணகத்திலுள்ள என் தந்தையின் திருவுளத்தை நிறைவேற்றுபவரே, என் சகோதரரும், சகோதரியும், தாயும் ஆவார்" (மத். 12:50). இன்றைய நற்செய்தி, பல கேள்விகளை முன்னிறுத்தி, வாழ்வு தரும் உண்மையைத் தேட அழைக்கிறது. இயேசுவின் கேள்விகள், நம் வாழ்வை மறுமலர்ச்சி அடையச் செய்வதெற்கென எழுப்பப்படுகின்றன. இந்நாட்டில் முதன் முதலாக அடியெடுத்து வைத்த மறைப்பணியாளர்கள், ஆண்டவரின் சொற்களைக் கேட்டு, அவற்றிற்கு பதில் அளித்ததன் வழியே, தாங்கள், பரந்துபட்ட ஒரு குடும்பத்தைச் சார்ந்தவர்கள் என்பதை உணர்ந்தனர். இரத்த உறவு, கலாச்சாரம், இனம் என்ற எல்லைகளைக் கடந்த இந்தக் குடும்பத்தின் உறுப்பினர்களுக்கு, நற்செய்தியைக் கொணர்ந்தனர். அம்மக்களோடு, தங்கள் நற்செய்தியைப் பகிர்ந்துகொண்டதோடு நில்லாமல், அவர்களிடமிருந்து கற்றுக்கொள்ளவும் முயன்றனர். இந்நாட்டில் அறிமுகமான நற்செய்தி, இத்தகையச் சந்திப்பு இல்லாமல், இந்நாட்டிற்குரிய முகத்தைப் பெற்றிருக்காது. தாய்லாந்து நாட்டிற்கே உரிய புன்முறுவல், பாடல்கள், நடனங்கள் ஆகியவற்றை இழந்த நற்செய்தியாக இருந்திருக்கும். தந்தையாம் இறைவனின் அன்புத் திட்டம், ஒரு சிலருக்கு மட்டும் உரியதல்ல, மாறாக, அனைவரையும் உள்ளடக்கியது என்பதை, இந்நாட்டிற்கு வந்த மறைப்பணியாளர்கள் உணர்ந்திருந்தனர். "நான் விருந்து ஏற்பாடு செய்திருக்கிறேன். எனவே நீங்கள் போய்ச் சாலையோரங்களில் காணும் எல்லாரையும் திருமண விருந்துக்கு அழைத்து வாருங்கள்" (மத். 22:4,9) என்று தன் மகிழ்வில் கலந்துகொள்ள இறைவன் விடுக்கும் அழைப்பு, அனைவருக்கும் உரியது என்பதைப் புரிந்துகொண்டனர். இந்நாட்டில், சியாம் அப்போஸ்தலிக்க பிரதிநிதித்துவம் உருவானதன் (1669-2019) 350ம் ஆண்டு நிறைவை நாம் சிறப்பிக்கின்றோம். மறைபரப்புப்பணியாளர்களான இருவர் விதைத்த விதை, இன்று, பல திருத்தூது முயற்சிகளை உள்ளடக்கிய ஓர் அமைப்பாக உருவெடுத்துள்ளது. இது, வரலாற்றை நினைவுகூரும் விழா மட்டுமல்ல, மாறாக, அன்று காணப்பட்ட உறுதியுடன் தொடர்ந்து பணியாற்ற விடுக்கப்படும் ஓர் அழைப்பு. இறைவனின் குடும்பத்தில் ஓர் உறுப்பினராக நாம் இணையும்போது, அனைவரும் மறைப்பணியில் ஈடுபடும் சீடர்களாகிறோம். ஆண்டவர் இயேசுவின் வழிகளைப் பின்பற்றும்போது, நாமும் இக்குடும்பத்தின் உறுப்பினர்கள் ஆகிறோம். பாவிகளைத் தேடிச் சென்று அவர்களோடு உணவருந்துதல், தீட்டு என ஒதுக்கப்பட்டவர்களைத் தொடுதல் போன்ற செயல்களால், இயேசு அவர்களுக்கு, கடவுளின் அருகாமையை உணர்த்தினார். இந்நேரத்தில், இந்நாட்டில், மனித வர்த்தகம், பாலியல் தொழில் ஆகியவற்றால் தங்கள் மாண்பை இழந்திருக்கும் குழந்தைகளையும், பெண்களையும் நினைத்துப் பார்க்கிறேன். போதைப்பொருள் பயன்பாட்டிற்கு அடிமைப்பட்டிருக்கும் இளையோரை எண்ணிப்பார்க்கிறேன். தங்கள் சொந்த நாட்டையும், குடும்பத்தையும் விட்டு, இங்கு வந்திருக்கும் குடிபெயர்ந்தோரை எண்ணிப்பார்க்கிறேன். இவர்கள் அனைவருமே, இறைவனின் குடும்பத்தைச் சேர்ந்தவர்கள். அவர்களே நம் அன்னையர், சகோதரர்கள் மற்றும் சகோதரிகள். மறைபரப்புப்பணி என்பது, திருஅவையில், அதிகமான எண்ணிக்கையில், மனிதர்களைச் சேர்க்கும் முயற்சி அல்ல. மாறாக, உள்ளம் என்ற கதவைத் திறந்து, அனைவரையும் வரவேற்று, அவர்கள் தந்தையாம் இறைவனின் கருணை மிகுந்த அன்பைக் சுவைப்பதற்கு உதவுவதாகும். அன்பு தாய்லாந்து வாழ் குழுமங்களே, நம் முதல் மறைபரப்புப்பணியாளர்களின் அடிச்சுவடுகளைப் பின்பற்றி, முன்னேறிச் செல்வோம். மற்றவர்களைச் சந்தித்து, அவர்களில் நம் தந்தையை, தாயை, சகோதரரை, சகோதரியை அடையாளம் கண்டுகொள்ளவும், அவர்களை இறைவனின் விருந்துக்கு அழைத்துவரவும் முயல்வோம். [2019-11-21 23:50:16]


32வது வெளிநாட்டுத் திருப்பயணம் : தாய்லாந்தில் திருத்தந்தை

திருத்தந்தை : மேற்கிலிருந்து வெகு தொலைவிலுள்ள இந்த கலாச்சாரங்களை, மற்ற மக்கள் அறியும்படிச் செய்வது நல்லது. மேரி தெரேசா – வத்திக்கான் திருத்தந்தை பிரான்சிஸ் அவர்கள், தனது 32வது வெளிநாட்டுத் திருத்தூதுப் பயணம் மற்றும், கிழக்கு ஆசியாவுக்கான அவரின் நான்காவது திருத்தூதுப் பயணமாக, நவம்பர் 19, இச்செவ்வாய் மாலை 7 மணிக்கு, தாய்லாந்து மற்றும் ஜப்பான் நாடுகளுக்குப் புறப்பட்டார். ஏழு நாள்கள் கொண்ட இந்தப் பயணத்தைத் துவங்குவதற்கு முன்னதாக, திருத்தந்தை சாந்தா மார்த்தா இல்லத்தில், உரோம் நகரில், ஏழைகளின் சிறிய அருள்சகோதரிகள் பராமரிக்கும் முதியோர் இல்லத்திலிருந்து வந்திருந்த பத்து வயது முதிர்ந்தவர்களைச் சந்தித்துப் பேசினார். பின்னர், உரோம் பியூமிச்சினோ பன்னாட்டு விமான நிலையத்திற்குக் காரில் புறப்பட்ட திருத்தந்தை பிரான்சிஸ் அவர்கள், தன்னை வழியனுப்ப விமான நிலையத்திற்கு வந்திருந்த இத்தாலிய அரசு மற்றும், திருஅவை அதிகாரிகளை வாழ்த்தினார். தாய்லாந்திற்குத் தான் பயணம் மேற்கொள்ளவிருந்த ஆல் இத்தாலியா A330 விமானப் படிகளில், தனது வழக்கமான கறுப்புநிற கைப்பையுடன் ஏறிய திருத்தந்தை, விமானத்தில் தனது இருக்கையில் அமர்வதற்கு முன்னர், 58 வயது நிரம்பிய விமான ஓட்டுனர் Alberto Colautti அவர்களையும், ஏனைய மூன்று இணை ஓட்டுனர்கள் மற்றும், ஆறு விமானப் பணிப்பெண்களையும் வாழ்த்தினார். பாங்காக் நகர் நோக்கிச் சென்ற இவ்விமானப் பயணத்தில், தன்னுடன் பயணம் செய்த, ஏறத்தாழ எழுபது பன்னாட்டு செய்தியாளர்களின் பணிகளுக்கு, நல்வாழ்த்தை தெரிவித்தார், திருத்தந்தை. மேற்கிலிருந்து வெகு தொலைவிலுள்ள இந்த கலாச்சாரங்களை, மற்ற மக்கள் அறியும்படிச் செய்வது நல்லது எனவும், செய்தியாளர்களிடம் திருத்தந்தை கூறினார். இந்த நீண்ட விமான பயணத்தில், தான் கடந்து சென்ற, குரோவேஷியா, போஸ்னியா-எர்செகொவினா, செர்பியா, மொந்தெனெக்ரோ, பல்கேரியா, துருக்கி, ஈரான், ஆப்கானிஸ்தான், பாகிஸ்தான், இந்தியா மற்றும் மியான்மார் நாடுகளின் தலைவர்களுக்கு, அந்தந்த நாடுகளைக் கடந்துசெல்கையில் தந்திச் செய்திகளையும் திருத்தந்தை அனுப்பினார். அந்நாடுகளில், அமைதியும் வளமையும், நலமும் நிரம்ப, இறைவனிடம் மன்றாடுவதாக, அச்செய்திகளில் திருத்தந்தை பிரான்சிஸ் அவர்கள் குறிப்பிட்டிருந்தார். பாங்காக் விமான நிலைய வரவேற்பு தாய்லாந்து நாட்டுத் தலைநகர் பாங்காக் பன்னாட்டு விமான நிலையத்தை, நவம்பர் 20, இப்புதன் பகல் 12.30 மணிக்குச் சென்று சேர்ந்தார், திருத்தந்தை பிரான்சிஸ். அப்போது இந்திய இலங்கை நேரம், இப்புதன் முற்பகல் 11 மணியாக இருந்தது. அவ்விமான நிலையத்தில், தாய்லாந்து அரச அவையின் பிரதிநிதிகள், தாய்லாந்து அரசின் ஆறு அதிகாரிகள், மற்றும், அந்நாட்டு ஆயர் பேரவையின் உறுப்பினர்கள் திருத்தந்தையை வரவேற்றனர். தாய்லாந்தில் வாழ்கின்ற ஏறத்தாழ மூன்று இலட்சம் கத்தோலிக்கரைக் குறிக்கும் விதமாக, 11 சிறார், மரபு உடைகளில் திருத்தந்தையை மலர் கொத்துக் கொடுத்து வரவேற்றனர் விமானநிலையத்தில், இராணுவ அணிவகுப்பு மரியாதையும் திருத்தந்தை பிரான்சிஸ் அவர்களுக்கு வழங்கப்பட்டது. இதற்குப் பின்னர், அங்கிருந்து 34.5 கிலோ மீட்டர் தூரத்திலுள்ள, பாங்காக் திருப்பீடத் தூதரகத்திற்குக் காரில் சென்று மதிய உணவருந்தினார் திருத்தந்தை. 11 மணி 30 நிமிடங்கள் கொண்ட இந்த விமானப் பயண களைப்பைப் போக்க ஓய்வெடுத்தார் திருத்தந்தை பிரான்சிஸ். 1984ம் ஆண்டு புனித திருத்தந்தை 2ம் ஜான் பால் அவர்கள் தாய்லாந்து நாட்டில் திருத்தூதுப் பயணம் மேற்கொண்ட 35 ஆண்டுகளுக்குப் பின், திருத்தந்தை ஒருவர் தாய்லாந்தில் மேற்கொள்ளும் திருத்தூதுப் பயணமாக, திருத்தந்தை பிரான்சிஸ் அவர்களின் இப்பயணம் அமைந்துள்ளது. தாய்லாந்தில், ஏறத்தாழ 95 விழுக்காட்டினர் புத்தமதத்தினராக இருந்தாலும், ஏனைய மதத்தவரும் இங்கு மதிக்கப்படுகின்றனர் என்பது குறிப்பிடத்தக்கது. புத்த புத்தமதத்தினரும், திருத்தந்தையின் இப்பயணத்தை ஆவலோடு எதிர்நோக்கியுள்ளனர் என்று தலத்திருஅவை அதிகாரிகள் கூறியுள்ளனர். தாய்லாந்து திருத்தூதுப் பயணத்தில், திருத்தந்தைக்கு மொழிபெயர்ப்பாளராகப் பணியாற்றுபவர் 77 வயது நிரம்பிய அருள்சகோதரி Ana Rosa Sivori ஆவார். இவர் திருத்தந்தை பிரான்சிஸ் அவர்களின் உறவினர் மற்றும், சிறுவயது தோழர். இச்சகோதரி தாய்லாந்து நாட்டுப் பள்ளிகளில், ஐம்பது ஆண்டுகளுக்குமேல் பணியாற்றியிருப்பவர். தாய்லாந்தில் (சியாமில்) 1669ம் ஆண்டு, சியாம் அப்போஸ்தலிக்க ஆட்சிப்பீடம் நிறுவப்பட்டதன் 350ம் ஆண்டு நிறைவையொட்டி, திருத்தந்தையின் இப்பயணம் நடைபெறுகின்றது. தாய்லாந்தில் வியாழன் நிகழ்வுகள் தாய்லாந்தில், திருத்தந்தையின் பயண நிகழ்வுகள், நவம்பர் 21, இவ்வியாழன் உள்ளூர் நேரம் காலை 8.45 மணிக்கு ஆரம்பமாகும். அப்போது இந்திய இலங்கை நேரம், இவ்வியாழன் காலை 7 மணி 15 நிமிடங்களாக இருக்கும். இவ்வியாழன் காலையில் முதலில், தாய்லாந்து அரசு மாளிகைக்குச் செல்லும் திருத்தந்தைக்கு அரசு மரியாதையுடன்கூடிய அதிகாரப்பூர்வ வரவேற்பு வழங்கப்படும். அம்மாளிகையில், தாய்லாந்து அரசு, பொதுமக்கள் சமுதாய குழுக்கள், மற்றும், தூதரக அதிகாரிகளைச் சந்தித்து உரையாற்றுவதற்கு முன்னர், அந்நாட்டு பிரதமர் இராணுவ அதிபர் Prayuth Chan-ocha அவர்களை தனியே சந்தித்துப் பேசுவார் திருத்தந்தை பிரான்சிஸ். பின்னர், Wat Ratchabophit Sathit Maha Simaram புத்தமத ஆலயத்தில், புத்தமத முதுபெரும்தந்தை Somdej Phra Maha Muneewong அவர்களைச் சந்தித்து கலந்துரையாடுவார், திருத்தந்தை. மதிய உணவுக்கு முன்னர், பாங்காக் புனித லூயிஸ் மருத்துவமனையில், மருத்துவர்கள் மற்றும், நோயாளிகளைச் சந்திப்பார். இந்த மருத்துவமனை, 1898ம் ஆண்டில் கத்தோலிக்கரால் கட்டப்பட்டது. இவ்வியாழன் மாலையில், தாய்லாந்து அரசர் Maha Vajiralongkorn Rama X அவர்களை, Amphorn அரச மாளிகையில் சந்திப்பார், பாங்காக் தேசிய அரங்கத்தில் இளையோர்க்கு திருப்பலி நிறைவேற்றுவார் திருத்தந்தை பிரான்சிஸ். இத்துடன் இவ்வியழன் தின பயண நிகழ்வுகள் நிறைவு பெறும். அமைதி மற்றும், புரிந்துணர்வை ஊக்குவிப்பதற்காக, உங்கள் நாட்டிற்கு வருகை தருகிறேன் என்ற காணொளிச் செய்தியை, திருத்தந்தை ஏற்கனவே தாய்லாந்திற்கு அனுப்பியிருந்தார் என்பது குறிப்பிடத்தக்கது. [2019-11-20 23:55:16]


பிரித்தானிய தேர்தலையொட்டி, ஸ்காட்லாந்து ஆயர்களின் மடல்

மத நம்பிக்கை குறித்த சகிப்புத்தன்மை குறைந்துவரும் இக்காலத்தில், கிறிஸ்தவ மத நம்பிக்கைக்கு நெருக்கமான கொள்கைகளை கொண்டுள்ள வேட்பாளர்களை தேர்ந்தெடுக்கவேண்டும் - ஸ்காட்லாந்து ஆயர்களின் விண்ணப்பம் ஜெரோம் லூயிஸ் - வத்திக்கான் செய்திகள் மத நம்பிக்கை குறித்த சகிப்புத்தன்மை குறைந்துவரும் இக்காலத்தில், கிறிஸ்தவ மத நம்பிக்கைக்கு நெருக்கமான கொள்கைகளை கொண்டுள்ள வேட்பாளர்களை தேர்ந்தெடுக்கவேண்டும் என்ற விண்ணப்பத்துடன், ஸ்காட்லாந்து ஆயர்கள், மடல் ஒன்றை வெளியிட்டுள்ளனர். பிரித்தானியாவில் டிசம்பர் 12ம் தேதி நடைபெறவிருக்கும் தேர்தலையொட்டி, இம்மடலை வெளியிட்டுள்ள ஸ்காட்லாந்து ஆயர்கள், கத்தோலிக்க மக்கள் வாக்களிக்க தவறக்கூடாது என்றும், தகுந்த வேட்பாளர்களைத் தேர்ந்தெடுக்கவேண்டும் என்றும் அழைப்பு விடுத்துள்ளனர். கருவிலிருந்து கல்லறை வரை மனித வாழ்வு மதிக்கப்படுத்தல், திருமணம் மற்றும் குடும்ப வாழ்வைப் போற்றுதல், வறுமையை நீக்குதல், மதச் சுதந்திரம் மற்றும் மனசாட்சியின் சுதந்திரம் காக்கப்படுதல், அணு ஆயுதங்களை உற்பத்தி செய்வதையும், விற்பனை செய்வதையும் தடுத்தல் என்ற ஐந்து கருத்துக்களை வலியுறுத்தி ஆயர்களின் மடல் வெளியாகியுள்ளது. கட்சி மனப்பான்மையை விடுத்து, உண்மையையும், நன்மையையும் போற்றிக்காக்கும் தலைவர்களை மக்கள் தெரிவு செய்யவேண்டும் என்று ஸ்காட்லாந்து ஆயர்கள் இம்மடலில் வலியுறுத்தியுள்ளனர். நவம்பர் 23, 24, வருகிற சனி, மற்றும் ஞாயிறு ஆகிய இருநாள்கள், ஸ்காட்லாந்து பகுதியில் உள்ள 500க்கும் மேற்பட்ட கத்தோலிக்க ஆலயங்களில், ஆயர்களின் மடல் வாசிக்கப்படும் என்று, ஸ்காட்லாந்து ஆயர் பேரவை அறிவித்துள்ளது. [2019-11-20 23:45:09]


வறியோரின் அழுகுரலுக்குச் செவிசாய்ப்போம்

இஞ்ஞாயிறு காலை 10 மணிக்கு, வத்திக்கான் புனித பேதுரு பெருங்கோவிலில், வறியோர் உலக நாள் திருப்பலியை நிறைவேற்றும் திருத்தந்தை, அன்று, ஏறத்தாழ 1,500 ஏழைகளுடன், புனித திருத்தந்தை 6ம் பவுல் அரங்கத்தின் முன்பக்கம் மதிய உணவு அருந்துவார். மேரி தெரேசா: வத்திக்கான் செய்திகள் “வறியோரின் அழுகுரலுக்குச் செவிசாய்க்கும் சக்தியை நாம் பெறுவதற்காக, கடவுளின் அருளை மன்றாடுவோம், வறியோரின் அழுகுரல், திருஅவையின் நம்பிக்கையின் அழுகுரல்” என்று, திருத்தந்தை பிரான்சிஸ் அவர்கள், இச்சனிக்கிழமையன்று கூறியுள்ளார். நவம்பர் 17, இஞ்ஞாயிறன்று, மூன்றாவது வறியோர் உலக நாள் கடைப்பிடிக்கப்படும்வேளை, ஏழைகளின் அழுகுரலுக்கு நாம் செவிமடுக்க வேண்டும் என்று, நவம்பர் 16, இச்சனிக்கிழமையன்று தன் டுவிட்டர் செய்தி வழியாக, திருத்தந்தை கேட்டுக்கொண்டுள்ளார். வறியோர் உலக நாள் இஞ்ஞாயிறு காலை பத்து மணிக்கு, வத்திக்கான் புனித பேதுரு பெருங்கோவிலில், வறியோர் உலக நாள் திருப்பலியை நிறைவேற்றும் திருத்தந்தை பிரான்சிஸ் அவர்கள், அன்று, ஏறத்தாழ 1,500 ஏழைகளுடன், புனித திருத்தந்தை 6ம் பவுல் அரங்கத்தின் முன்பக்கம் மதிய உணவு அருந்துவார். ஏழைகளுக்கு 150 மேஜைகளில் உணவு பரிமாறப்படும். வறியோர் உலக நாளை முன்னிட்டு, ஏழைகளின் அன்னை மரியாவைச் சித்தரிக்கும் மூன்று திருவுருவங்களை, பெல்ஜியம் நாட்டின் Banneaux திருத்தலம், திருத்தந்தை பிரான்சிஸ் அவர்களுக்கு வழங்கவுள்ளது. "வறியவரின் நம்பிக்கை ஒருபோதும் வீண்போகாது" (தி.பா.9,18) என்ற தலைப்பில், மூன்றாவது வறியோர் உலக நாள், நவம்பர் 17, இஞ்ஞாயிறன்று கடைப்பிடிக்கப்படுகிறது. வறியோர் உலக நாள், 2017ம் ஆண்டிலிருந்து, பொதுக்காலம் 33ம் ஞாயிறன்று கடைப்பிடிக்கப்பட்டு வருகிறது. [2019-11-17 19:38:47]


பக்க இலக்கங்களை அழுத்தி எல்லா செய்திகளையும் பார்வையிடவும்