வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



போர் ஒருபோதும் வேண்டாம் என கடவுளின் பெயரால் கேட்கிறேன்

போரில் இறந்தோரை, காயமடைந்தோரை, போரினால் அநாதைகளாக ஆக்கப்பட்டுள்ளோரை, போரில் எஞ்சியுள்ள கழிவுகளோடு விளையாடும் சிறாரை முதலில் நினைத்துப் பாருங்கள் – திருத்தந்தை பிரான்சிஸ் மேரி தெரேசா: வத்திக்கான் ஒருபோதும் போர் வேண்டாம் என, கடவுளின் பெயரால் கேட்கிறேன், போரில் எஞ்சியுள்ள கழிவுகளோடு விளையாடும் சிறாரை, போரில் இறந்தோரை, காயமடைந்தோரை, போரினால் அநாதைகளாக ஆக்கப்பட்டுள்ளோரை, மாண்புடைய ஒரு வாழ்வு புறக்கணிக்கப்பட்டுள்ளோரை முதலில் நினைத்துப் பாருங்கள் என்று, திருத்தந்தை பிரான்சிஸ் அவர்கள், மார்ச் 12, இச்சனிக்கிழமையன்று கேட்டுக்கொண்டுள்ளார். உக்ரைன் நாட்டிற்காக ஒன்றிணைந்து செபிப்போம் என்ற ஹாஷ்டாக்குடன் தன் டுவிட்டர் செய்தியை வெளியிட்டுள்ள திருத்தந்தை, போரினால் பாதிக்கப்படும் சிறாரையும், மற்றவர்களையும் நினைத்துப் பார்க்குமாறு உலகினருக்கு அழைப்புவிடுத்துள்ளார். ஓர் உடன்பாட்டிற்கு வருவதற்கு இன்னும் காலம் கடந்துவிடவில்லை மேலும், திருப்பீடச் செயலர் கர்தினால் பியெத்ரோ பரோலின் அவர்கள், வத்திக்கான் ஊடகத்துறைக்கு அளித்த பேட்டி ஒன்றில், அமைதியான நல்லிணக்கம் நிறைந்த மற்றும், தற்போதைய நிலையிலிருந்து மாறுபட்ட ஒரு வருங்காலத்தை நோக்கித் துணிச்சலான நடவடிக்கைகளை மேற்கொள்வதைவிட்டு, கடந்த காலத்திற்குள் நாம் வீழ்ந்து வருகிறோம் என்று கூறினார். ஐரோப்பாவின் இதயத்தில் போரின் கொடூரம் அதிகரித்துவருவது குறித்து, திருப்பீடத் சமூகத்தொடர்பு அவையின் செய்திப் பிரிவு இயக்குனர், முனைவர் அந்த்ரேயா தொர்னியெல்லி அவர்களுக்கு, மார்ச் 12, இச்சனிக்கிழமையன்று அளித்த பேட்டியில் இவ்வாறு கூறியுள்ளார், கர்தினால் பரோலின். பேரழிவுகளை ஏற்படுத்தும் போர் நிறுத்தப்படவேண்டும் என்றும், போரின் பெரும் அழிவுகள் போதும் என்றும், ஓர் உடன்பாட்டிற்கு வருவதற்கு இன்னும் காலம் கடந்துவிடவில்லை என்றும் உக்ரைன் போர் குறித்து மிகுந்த கவலையோடு எடுத்துரைத்தார், கர்தினால் பரோலின். பெர்லின் சுவர் வீழ்ச்சிக்குப் பின்னும், அமைதியான நல்லிணக்கம்கொண்ட ஓர் உலகை நம்மால் கட்டியெழுப்ப இயலவில்லை என்பதை நாம் ஏற்கவேண்டும் என்றுரைத்த கர்தினால் பரோலின் அவர்கள், போர் முட்டாள்தனமானது, அது நிறுத்தப்படவேண்டும் என்று வலியுறுத்திக் கூறினார். இந்தப் போரை முடிவுக்குக் கொண்டுவருவதற்கு மேற்கொள்ளப்படும் எந்த வகையான பேச்சுவார்த்தைகளிலும் இடைநிலை வகிக்க திருப்பீடம் தயாராக உள்ளது என்பதை, மீண்டும் எடுத்துரைத்த திருப்பீடச் செயலர், இரத்த ஆறுகளும் கண்ணீர்களும் தொடர்ந்து ஓடிக்கொண்டிருக்கும்போது அவற்றை நிறுத்துவதற்கு முயற்சிகளை மேற்கொள்ளாமல் இருப்பது, நாம் கல்லான இதயத்தைக் கொண்டிருக்கிறோம் என்பதையே காட்டுகின்றது என்றார். திருத்தந்தை பிரான்சிஸ் அவர்கள், உரோம் நகரிலுள்ள, இரஷ்யாவின் திருப்பீடத் தூதரகத்திற்குத் திடீரென்று சென்று, போர் குறித்த தன் கவலையை தெரிவித்தார், இரஷ்ய வெளியுறவுத்துறை அமைச்சர் Lavrov அவர்களோடு தொலைபேசியில் உரையாடி போரை நிறுத்துமாறு கேட்டுக்கொண்டேன், இவையனைத்திற்கும் மத்தியில் போர் தொடர்ந்து இடம்பெற்று வருவது குறித்து தன் கருத்துக்களைப் பகிர்ந்துகொண்டார், கர்தினால் பரோலின். போர், புற்றுநோய் போன்றது போர், புற்றுநோய் போன்றது, இது வளர்ந்து, பரவி, தனக்கே உணவளித்துக்கொள்வது. அதனால் எந்தப் பலனுமில்லை, வன்முறை, வெறுப்புணர்வு, போர் போன்ற தர்க்கவாதங்களுக்குள் நம்மை உட்படுத்தக் கூடாது, மாறாக, திருத்தந்தை செயல்படுவதுபோன்று, ஆயுத ஒலிகள் அடங்கவேண்டும், அமைதி நிலைநிறுத்தப்படவேண்டும் என்று, நாம் அனைவரும் கடவுளிடமும், முழு மனித சமுதாயத்திடமும் மன்றாடவேண்டும் என்று கர்தினால் பரோலின் அவர்கள் தன் பேட்டியில் கூறினார். [2022-03-13 22:42:11]


இரஷ்யாவின் மனமாற்றத்திற்காக பாத்திமா அன்னை திருத்தலங்கள்

இரஷ்யாவின் மனமாற்றத்திற்காக, மார்ச் 13 இஞ்ஞாயிறன்று நடைபெறும் இறைவேண்டல் நிகழ்வில், உலகெங்கும் இருக்கின்ற பாத்திமா அன்னை மரியா திருத்தலங்கள் அனைத்தும் இணையுமாறு கேட்டுக்கொள்ளப்பட்டுள்ளன. கடந்த பிப்ரவரி மாதம் 24ம் தேதியிலிருந்து, உக்ரைன் நாட்டை இரஷ்யா ஆக்ரமித்து முழுவீச்சாக கடுமையான தாக்குதல்களை மேற்கொண்டுவருவதை முன்னிட்டு, உக்ரைன் நாட்டின் மேற்குப் பகுதியிலுள்ள Krisovychi நகரின் பாத்திமா அன்னை மரியா திருத்தல அதிபர் அருள்பணி Andrzej Draws அவர்கள், இரஷ்யாவுக்காகச் செபிக்குமாறு, உலகின் அனைத்து பாத்திமா அன்னை திருத்தலங்களுக்கு அழைப்புவிடுத்துள்ளார். உக்ரைன் மற்றும், இரஷ்யாவை, அன்னை மரியாவின் களங்கமற்ற இதயத்திற்கு அர்ப்பணிக்குமாறு, உக்ரைன் நாட்டின் இலத்தீன் வழிபாட்டுமுறை கத்தோலிக்க ஆயர்கள், திருத்தந்தை பிரான்சிஸ் அவர்களைக் கேட்டுக்கொண்டுள்ளதையடுத்து (மார்ச் 2,2022) அருள்பணி Andrzej Draws அவர்கள், இச்செப விண்ணப்பத்திற்கு வேண்டுகோள்விடுத்துள்ளார். 1917ம் ஆண்டில் போர்த்துக்கல் நாட்டு பாத்திமாவில் அன்னை மரியா, லூசியா, பிரான்சிஸ் ஜசிந்தா ஆகிய மூன்று சிறாருக்குக் காட்சியளித்தபோது, மூன்று இரகசியங்களை வெளிப்படுத்தினார். அவற்றில், இரண்டாவது இரகசியம், முதல் உலகப்போர் முடிவடையும் என்பது பற்றியாகும். மூன்றாவது இரகசியம், மக்கள் கடவுளை தொடர்ந்து புண்படுத்தி வந்தாலும், இரஷ்யா, அன்னை மரியாவின் களங்கமற்ற இதயத்திற்கு அர்ப்பணிக்கப்படாமல் இருந்தாலும், திருத்தந்தை பதினோராம் பயஸ் அவர்களின் தலைமைப் பணிக் காலத்தில் மற்றொரு போர் ஒன்று தொடங்கும் என்பது பற்றியதாகும். திருத்தந்தையர் 12ம் பயஸ், திருத்தந்தை புனித 2ம் யோவான் பவுல், பிரான்சிஸ் ஆகியோர் உட்பட பல்வேறு திருத்தந்தையர், இரஷ்யாவையும் உலகையும் அன்னை மரியாவின் களங்கமற்ற இதயத்திற்கு அர்ப்பணித்துள்ளனர். 1984ம் ஆண்டு மார்ச் மாதம் 25ம் தேதியன்று, வத்திக்கானின் புனித பேதுரு வளாகத்தில் பாத்திமா அன்னை மரியா திருவுருவத்தின் முன்பாக, எண்ணற்ற ஆயர்கள், கர்தினால்கள் உட்பட, ஏறத்தாழ இரண்டு இலட்சம் நம்பிக்கையாளர்களின் பிரசன்னத்தில், திருத்தந்தை புனித 2ம் யோவான் பவுல் அவர்கள், இரஷ்யாவை அன்னை மரியாவின் களங்கமற்ற இதயத்திற்கு அர்ப்பணித்தார். (CNA) [2022-03-13 22:14:57]


உக்ரைனில் போர் நிறுத்தப்பட திருப்பீடத்தின் முயற்சிகள்

உக்ரைனில் இடம்பெற்றுவரும் கடுமையான போர் முடிவுக்குவரவும், அந்நாட்டில் அமைதி ஏற்படவும் திருப்பீடம் பல்வேறு நிலைகளில் நடவடிக்கைகளை மேற்கொண்டு வருகிறது என்று, திருப்பீடச் செயலர் கர்தினால் பியெத்ரோ பரோலின் அவர்கள், TV2000 என்ற இத்தாலிய தொலைக்காட்சிக்கு அளித்த பேட்டி ஒன்றில் கூறியுள்ளார். முதலாவதாக, அனைத்து நம்பிக்கையாளர்களிடம் இறைவேண்டல் தொடர்ந்து வலியுறுத்தப்பட்டு வருகின்றது, இரண்டாவதாக, மனிதாபிமானக் கண்ணோட்டத்தில், காரித்தாஸ் மற்றும், மறைமாவட்ட அளவில் உதவிகள் ஆற்றப்பட்டு வருகின்றன, தூதரக அளவிலும் அமைதிக்கான முயற்சிகள் மேற்கொள்ளப்பட்டு வருகின்றன என்று திருப்பீடத்தின் செயல்பாடுகளை விவரித்துள்ளார், கர்தினால் பரோலின். முதன்முதலாக, உக்ரைனில் ஆயுதப் பரவலும், ஆயுதத் தாக்குதல்களும் வன்முறையை அதிகரிக்கும் சொற்கள் பரப்பப்படுவதும் நிறுத்தப்படவேண்டும், ஏனென்றால் அச்சொற்கள் உணர்ச்சிகளைத் தூண்டிவிடும் என்றுரைத்த கர்தினால் பரோலின் அவர்கள், தற்போது மரணத்தை வருவிக்கும் ஆயுதங்கள் பயன்படுத்தப்படுவதைக் காண முடிகின்றது என்று கவலை தெரிவித்தார். உக்ரைனில் அன்னை தெரேசா சபையினர் மேலும், உக்ரைனில் பணியாற்றும், புனித அன்னை தெரேசா சபையைச் சேர்ந்த இரு இந்திய அருள்சகோதரிகள் நாட்டைவிட்டுச் செல்லுமாறு வலியுறுத்தப்பட்டும், அதற்கு மறுப்பு தெரிவித்து கீவ் நகரில் தொடர்ந்து பணியாற்ற உறுதி எடுத்துள்ளனர். இந்தியாவின் மிசோராம் மாநிலத்தைச் சேர்ந்த அருள்சகோதரிகள் Rosela Nuthangi, Ann Frida ஆகிய இருவரும், கீவ் நகரில் போரினால் பாதிக்கப்பட்ட மக்கள் அருகில் இருந்து பணியாற்றி வருகின்றனர் என்று செய்திகள் கூறுகின்றன. (AsiaNews) [2022-03-11 02:05:51]


உதவிக்கு நன்றி தெரிவித்த உக்ரேனிய புலம்பெயர்ந்தோர்

திருத்தந்தை பிரான்சிஸ் அவர்களின் நெருக்கத்தைத் தெரிவிப்பதற்காகவும், தேவையான மனிதாபிமான உதவிகளைச் செய்வதற்காகவும், உக்ரைன் சென்றுள்ள வத்திக்கானின் அதிகாரி ஒருவர், தன் கள அனுபவங்களைப் பகிர்ந்துள்ளார். மார்ச் 8, இச்செவ்வாயன்று உக்ரைனின் Lviv நகர் சென்றடைந்துள்ள, திருத்தந்தையின் தர்மச் செயல்களுக்குப் பொறுப்பாளரான, கர்தினால் Konrad Krajewski அவர்கள், தான் பெற்ற கள அனுபவங்களை வத்திக்கானின் செய்தித்துறைக்கு வழங்கியுள்ளார். தான் Lviv நகரில் இருப்பதாகவும், ஐரோப்பிய சமூகத்தின் பெரிய அளவிலான உதவிகள் போலந்து வழியாக இங்குதான் வந்து சேருகின்றன என்றும் தெரிவித்துள்ள கர்தினால் Krajewski அவர்கள், இங்கே கொண்டுவரப்படும் எல்லா வகையான உதவிப்பொருள்களும் பெரிய லாரிகளில் கீவ், ஒதேசா மற்றும் கார்கிவ் நகரங்களுக்குக் கொண்டு செல்லப்படுகின்றன என்று கூறியுள்ளார். திருத்தந்தை பிரான்சிஸ் அவர்களின் ஆதரவு இங்கே பெருமளவு நடைமுறையில் இருப்பதை எடுத்துக்காட்டியுள்ள கர்தினால் Krajewski அவர்கள், இங்கு எரிபொருளைப் பெறுவதில் அதிக சிரமங்கள் இருப்பதால், மக்களுக்கு உதவிப்பொருள்களைக் கொண்டுசெல்லும் லாரிகளுக்கு திருத்தந்தையின் அறக்கட்டளை அமைப்பிலிருந்துதான் எரிபொருளுக்கான செலவுகள் மேற்கொள்ளப்படுகின்றன என்பதையும் தெரிவித்தார். நம்பிக்கை மலைகளை நகர்த்த முடியும் என்பதை நாம் அறிவோம். இவ்வாறு நாம் நற்செய்தியிலும் வாசிக்கிறோம், அதில் உறுதியாகவும் இருக்கிறோம் என்றுரைத்த கர்தினால் Krajewski அவர்கள், நமது இறைவேண்டலாலும், நம்பிக்கையாலும் இந்தப் போரை முழுவதுமாக நிறுத்துவதில் நாம் வெற்றி பெற முடியும் என்று நம்பிக்கைத் தெரிவித்துள்ளார். ஒற்றுமையும் இறைவேண்டலும்தான் நம்பிக்கைக்கு உயிர்மூச்சு அளிக்கின்றது. இந்த இக்கட்டான நிலையில் தங்கள் நாட்டைவிட்டு வெளியேற வேண்டும் என்ற கட்டாயச் சூழலுக்குத் தள்ளப்பட்டாலும், ஒருநாள் மீண்டும் தங்கள் சொந்தநாடு திரும்புவோம் என்ற நம்பிக்கையுடன்தான் உக்ரேனியர்கள் அனைவரும் தங்கள் நாட்டைவிட்டு வெளியேறிச் செல்கின்றனர் என்ற அவர்களின் நம்பிக்கையையும் வெளிப்படுத்தினார் கர்தினால் Krajewski. [2022-03-11 01:52:43]


ஆர்த்தடாக்ஸ் முதுபெரும்தந்தை போருக்கு எதிராக குரல்எழுப்பவேண்டும்

இரஷ்யாவில் திருப்பீடத் தூதராகப் பணியாற்றும் பேராயர் Giovanni D'Aniello அவர்கள், இரஷ்ய ஆர்த்தடாக்ஸ் முதுபெரும்தந்தை கிரில் (Kiril) அவர்களை, மாஸ்கோவிலுள்ள ஆர்த்தடாக்ஸ் சபை தலைமையகத்தில் சந்தித்து, கிறிஸ்தவ சபைகள் அமைதிக்கு ஆற்றவேண்டிய முக்கிய பங்கு பற்றி எடுத்துரைத்தார். கியூபா நாட்டில், திருத்தந்தை பிரான்சிஸ் அவர்களுக்கும், முதுபெரும்தந்தை கிரில் அவர்களுக்கும் இடையே இடம்பெற்ற சந்திப்பு பற்றிக் குறிப்பிட்ட பேராயர் Giovanni D'Aniello அவர்கள், கிறிஸ்தவ சபைகள் போரில் ஒருபோதும் ஈடுபடக்கூடாது, மாறாக, அவை, அமைதியை ஏற்படுத்தும் கருவிகளாகச் செயல்படவேண்டும் என்பதை வலியுறுத்திக் கூறினார். (AsiaNews) WCC மன்றம் முதுபெரும்தந்தை கிரில் அவர்களுக்கு மடல் மேலும், WCC எனப்படும் உலக கிறிஸ்தவ சபைகள் மன்றத்தின் இடைக்காலப் பொதுச்செயலர் பேராசிரியர் Ioan Sauca அவர்கள், இரஷ்ய ஆர்த்தடாக்ஸ் முதுபெரும்தந்தை கிரில் அவர்களுக்கு அனுப்பியுள்ள மடலில், உக்ரைனுக்கும், இரஷ்யாவுக்கும் இடையே இடம்பெறும் போரை நிறுத்தும்வண்ணம், அவ்விரு தரப்புகளுக்கும் இடையே அமைதிக்கான உரையாடலை ஊக்குவித்து, அதற்கு நடுவராயிருந்து செயல்படுமாறு கேட்டுக்கொண்டுள்ளார். உக்ரைனில் இடம்பெற்றுவரும் போருக்கு, ஓர் அமைதியான தீர்வு காணப்படுவதற்கு, நம்பிக்கையின் அடையாளங்களைக் காண, உலகினர் அனைவரும் மிகுந்த கவலையோடும், ஆவலோடும் உள்ளனர் என்று, அம்மடலில் Sauca அவர்கள் குறிப்பிட்டுள்ளார். இப்போதைய நம்பிக்கையின்மைச் சூழல்களில், அமைதியான ஒரு தீர்வைக் கொண்டுவருவதற்கு, நம்பிக்கையின் ஓர் அடையாளமாக, முதுபெரும்தந்தை கிரில் அவர்களையே, WCC மன்றத்தைச் சேர்ந்த கிறிஸ்தவத் தலைவர்களும், கிறிஸ்தவர்களும் நோக்குகின்றனர் என்று, Sauca அவர்கள், தன் மடலில் கூறியுள்ளார். மிகுந்த வேதனையோடும், நொறுங்கிய இதயத்தோடும் எழுதுகிறேன் என்று, தன் மடலைத் தொடங்கியுள்ள Sauca அவர்கள், மேற்கத்திய கிறிஸ்தவர்கள், சாம்பல் புதனோடு தவக்காலத்தைத் துவக்கியிருக்கும் இவ்வேளையில், ஆர்த்தடாக்ஸ் கிறிஸ்தவர்களாகிய நாம், மார்ச் 07, வருகிற திங்களன்று தவக்காலத்தை ஆரம்பிப்பதன் அடையாளமாக, மார்ச் 6, இஞ்ஞாயிற்றுக்கிழமையை மன்னிப்பு ஞாயிறாகச் சிறப்பிக்கிறோம் என்பதை நினைவுபடுத்தியுள்ளார். இத்தவக்காலத் திருவழிபாடுகள், மனவருத்தம், அமைதி, மற்றும், ஒப்புரவு ஆகியவற்றுக்கு அழைப்புவிடுக்கும்வேளை, இரத்தம்சிந்துதலையும், துன்பங்களையும் கொணரும் போரை நிறுத்துவதற்கு, முதுபெரும்தந்தை கிரில் அவர்கள், அதிகாரிகளோடு உரையாடலை மேற்கொள்ளுமாறு வலியுறுத்திக் கேட்டுக்கொண்டுள்ளார், WCC மன்றத்தின் இடைக்காலப் பொதுச்செயலர் பேராசிரியர் Ioan Sauca அவர்கள். (ICN) [2022-03-06 22:54:36]


மே 15ல், கூடுதலாக மூன்று அருளாளர்களுக்கு புனிதர் பட்டம்

திருத்தந்தை பிரான்சிஸ் அவர்கள், இவ்வாண்டு மே மாதம் மேலும் மூன்று அருளாளர்களுக்குப் புனிதர் பட்டமளிப்பதற்குத் தீர்மானித்துள்ளார். மார்ச் 04, இவ்வெள்ளி காலையில், திருப்பீடத்தில், திருத்தந்தை பிரான்சிஸ் அவர்கள், ஒன்பது கர்தினால்களுடன் நடத்திய கூட்டத்தில், டச்சு நாட்டு அருள்பணியாளர் ஒருவர், பிரான்ஸ் மற்றும், இத்தாலி ஆகிய நாடுகளைச் சேர்ந்த இரு அருள்சகோதரிகளுக்கு, வருகிற மே மாதம் 15ம் தேதி, வத்திக்கானில் புனிதர் பட்டம் வழங்கத் தீர்மானம் நிறைவேற்றப்பட்டது. டச்சு நாட்டு கார்மேல் சபை அருள்பணியாளர் Titus Brandsma, காணிக்கை அன்னை அருள்சகோதரிகள் சபையை நிறுவிய பிரெஞ்சு அருள்சகோதரி Maria Rivier, இயேசுவின் லூர்து அன்னையின் கப்புச்சின் அருள்சகோதரிகள் சபையைத் தோற்றுவித்த இத்தாலிய அருள்சகோதரி இயேசுவின் மரியா ஆகிய மூவரும், 2022ம் ஆண்டு மே மாதம் 15ம் தேதி புனிதர்கள் என அதிகாரப்பூர்வமாக அறிவிக்கப்படுவார்கள். மறைசாட்சியான அருள்பணியாளர் Titus Brandsma அவர்கள், ஓர் இறையியலாளர், பத்திரிகையாளர் மற்றும், எழுத்தாளர். இவர், இரண்டாம் உலகப் போரின்போது, ஜெர்மனியின் நாத்சி கொள்கைவாதிகள் அறிவித்த யூதர்களுக்கு எதிரான சட்டங்களை வெளிப்படையாக எதிர்த்தவர். 1942ம் ஆண்டு சனவரி மாதத்தில், ஜெர்மனி, நெதர்லாந்து நாட்டை ஆக்ரமித்தபோது இவர் கைது செய்யப்பட்டார். இவர் வெளியிட்ட கத்தோலிக்க தினத்தாள்கள், நாத்சி கொள்கைகளைப் பரப்பினால் அவர் துறவுமடத்தில் தங்கியிருக்க அனுமதிக்கப்படுவார் என்று அதிகாரிகள் கூறியதற்கு மறுப்புதெரிவித்தார். இதனால் இவர் Dachau வதைமுகாமில் அடைக்கப்பட்டார். இறுதியில் அவர், அதே ஆண்டு ஜூலை மாதம் 26ம் தேதி, நச்சு ஊசி ஏற்றப்பட்டு கொல்லப்பட்டார். அப்போது அவரது வயது 61. அருள்சகோதரி Maria Rivier அவர்கள், பிரான்ஸ் நாட்டில் பிரெஞ்சு புரட்சி நடைபெற்றபோது, 1796ம் ஆண்டில், காணிக்கை அன்னை அருள்சகோதரிகள் சபையை நிறுவியவர். வருகிற மே மாதம் 15ம் தேதி மறைசாட்சி தேவசகாயம் அவர்கள் உட்பட ஏழு பேருடன், இந்த மூவரும் புனிதர்களாக அறிவிக்கப்படவுள்ளனர். ஒவ்வோர் இல்லத்திற்குள்ளும் திருத்தந்தையின் வார்த்தையை நாங்கள் கொணர்வதில் உங்களின் ஆதரவு [2022-03-06 01:04:26]


புற்றுநோயாளிகளோடு தோழமை, குடும்பங்களுக்கு ஆதரவு

புற்றுநோயாளிகள் மற்றும், அவர்களின் குடும்பங்களுக்கு கடந்த நூறு ஆண்டுகளாக ஆதரவுக்கரங்களை நீட்டிவரும், LILT என்ற இத்தாலிய அமைப்பின் உறுப்பினர்களுக்கு, தன் நன்றியையும் பாராட்டையும் தெரிவித்தார், திருத்தந்தை பிரான்சிஸ். LILT அமைப்பு உருவாக்கப்பட்டதன் நூறாம் ஆண்டு நினைவை அண்மையில் சிறப்பித்த, அந்த அமைப்பின் நூற்றுக்கு மேற்பட்ட பிரதிநிதிகளை, மார்ச் 04, இவ்வெள்ளியன்று திருப்பீடத்தில் சந்தித்து உரையாற்றிய திருத்தந்தை, புறக்கணிப்பு கலாச்சாரச் சூழலில், புற்றுநோயோளிகளை, அடுத்திருப்பவராக நோக்கி, அவர்களுக்குப் பணியாற்றிவருவதைப் பாராட்டியுள்ளார். தாங்கள் பராமரிக்கப்படுவதற்கும், சிகிச்சை பெறுவதற்கும், நோயாளிகள் அனைவரும் உரிமையைக் கொண்டுள்ளனர், மற்றும், இந்த உரிமைக்கு முன்னுரிமை அளிக்கப்படவேண்டும் என்பதை வலியுறுத்திக் கூறிய திருத்தந்தை பிரான்சிஸ் அவர்கள், துன்பத்திலும் நோயிலும்கூட நாம் முழு மனிதர்களாக இருக்கிறோம் என்று உரைத்துள்ளார். கிறிஸ்துவின் துன்பங்களில் ஒருவர் பங்குதாரராக இருக்கும்போது, ஒருவகையில், எல்லா மனிதத் துன்பங்களிலும் அவர் பங்குதாரராக இருக்கின்றார், நம்பிக்கை மூலம், கிறிஸ்துவின் மீட்பளிக்கும் துன்பத்தைக் கண்டுணர்கையில், மனிதர் தன் துன்பங்களின் பொருளையும் கண்டுணர்கிறார் என்று, திருத்தந்தை புனித 2ம் யோவான் பவுல் அவர்கள் Salvifici doloris என்ற தன் திருத்தூது மடலில் கூறியிருப்பதை, திருத்தந்தை பிரான்சிஸ் அவர்கள் சுட்டிக்காட்டினார். இறுதியில், புற்றுநோயாளிகளின் பாதுகாவலரான புனித Leopold Mandić அவர்களிடம், LILT அமைப்பினருக்காகச் செபித்து, அந்த அமைப்பினர், தங்களின் நற்பணிகளைத் தொடர்ந்து ஆற்றுமாறு ஊக்கமும் ஆசிரும் அளித்தார், திருத்தந்தை பிரான்சிஸ். [2022-03-06 01:00:02]


உக்ரைன், இரஷ்யாவை, அமல அன்னைக்கு அர்ப்பணிக்க..

நம் வாழ்வுக்கும், வரலாற்றுக்கும் தேவையான மருந்துகள் எவை என்பது குறித்து, திருத்தந்தை பிரான்சிஸ் அவர்கள், மார்ச் 04, இவ்வெள்ளியன்று வெளியிட்டுள்ள தன் டுவிட்டர் செய்தியில் குறிப்பிட்டுள்ளார். தவக்காலம் (#Lent) என்ற ஹாஸ்டாக்குடன் திருத்தந்தை வெளியிட்டுள்ள டுவிட்டர் செய்தியில், “இறைவேண்டல், பிறரன்பு, மற்றும் உண்ணாநோன்பு ஆகியவை, நமக்கு மட்டும் அல்ல, அனைவருக்கும் உரிய மருந்துகளாகும். அவை, வரலாற்றை மாற்றவல்லது. ஏனெனில் அவை, நம் வாழ்விலும், உலகிலும் கடவுளின் தலையீடு இடம்பெற முக்கியமான வழிகளாகும். அவை ஆன்மாவின் ஆயுதங்கள்” என்ற சொற்கள் இடம்பெற்றிருந்தன. உக்ரைன், இரஷ்யா, அமல அன்னை மரியாவுக்கு அர்ப்பணம் மேலும், உக்ரைன் நாட்டில் இடம்பெற்றுவரும் போர் குறித்து தங்கள் கவலையையும், அச்சத்தையும் வெளியிட்டுள்ள அந்நாட்டு இலத்தீன் வழிபாட்டுமுறை கத்தோலிக்க ஆயர்கள், உக்ரைன், மற்றும், இரஷ்யா ஆகிய நாடுகளை, அன்னை மரியாவின் அமல இதயத்திற்கு அர்ப்பணிக்குமாறு கேட்டுக்கொண்டுள்ளனர். 1917ம் ஆண்டில் பாத்திமாவில் அன்னை மரியா கேட்டுக்கொண்டதுபோல, எம் மக்கள் கணக்கிடமுடியாத கடுந்துயரங்களை எதிர்க்கொண்டுவரும் இந்நாள்களில், இவ்விரு நாடுகளையும் அன்னை மரியாவின் களங்கமற்ற திருஇதயத்திடம் பொதுப்படையாக அர்ப்பணிக்கவேண்டும் என்று, உக்ரைன் ஆயர்கள், திருத்தந்தைக்கு அனுப்பியுள்ள மடலில் கூறியுள்ளனர். கடந்த ஆறு நாள்களில், 4,53,000த்திற்கும் மேற்பட்ட உக்ரைன் மக்கள் போலந்து நாட்டில் அடைக்கலம் தேடியுள்ளனர். மார்ச் முதல் தேதியன்று மட்டும், 98 ஆயிரம் பேர், போலந்துக்குச் சென்றுள்ளனர். [2022-03-06 00:45:41]


கர்தினால் காச்சியாவில்லன் இறைபதம் சேர்ந்தார்

திருப்பீடத்தின் பாரம்பரியச் சொத்துக்கள் மேலாண்மை அமைப்பின் (APAS) முன்னாள் தலைவரும், இந்தியா, நேபாளம் உட்பட பல்வேறு நாடுகளில் திருப்பீடத் தூதராகப் பணியாற்றியவருமான, கர்தினால் அகுஸ்தீனோ காச்சியாவில்லன் அவர்கள் (Agostino Cacciavillan), தனது 95வது வயதில், மார்ச் 05 இச்சனிக்கிழமை அதிகாலையில் இறைபதம் சேர்ந்தார். கர்தினால் அகுஸ்தீனோ காச்சியாவில்லன் 1926ம் ஆண்டு ஆகஸ்ட் 14ம் தேதி, வட இத்தாலியின் Novale di Valdagno என்ற ஊரில் பிறந்த கர்தினால் காச்சியாவில்லன் அவர்கள், 1949ம் ஆண்டில் அருள்பணித்துவ வாழ்வுக்குத் திருநிலைப்படுத்தப்பட்டார். திருஅவை சட்டத்தில் முனைவர் பட்டம் பெற்றுள்ள இவர், பாப்பிறை திருஅவை நிறுவனத்தில் ஈராண்டுகள் (1957-1959) படிப்பை முடித்து, திருப்பீடச் செயலகத்தில் பணியைத் தொடங்கினார். பின்னர் பிலிப்பீன்ஸ், இஸ்பெயின், போர்த்துக்கல் ஆகிய நாடுகளின் திருப்பீடத் தூதரகங்களில் செயலராகப் பணியாற்றிய இவர், பின்னர் கென்யாவின் திருப்பீடத் தூதராகப் பணியாற்றியபோது, ஐ.நா.வின் சுற்றுச்சூழல் திட்ட அமைப்பில் திருப்பீடத்தின் நிரந்தரப்பார்வையாளராகவும் பணியாற்றினார். 1981ம் ஆண்டில் இந்தியாவின் திருப்பீடத் தூதராகவும் பணியைத் தொடங்கிய கர்தினால் காச்சியாவில்லன் அவர்கள்,1985ம் ஆண்டில் நேபாளத்திற்கும் முதல் திருப்பீடத் தூதராக நியமிக்கப்பட்டார். 1990ம் ஆண்டில் அமெரிக்க ஐக்கிய நாட்டின் திருப்பீடத் தூதராகப் பணியைத் தொடங்கிய இவர், அமெரிக்க நாடுகள் அமைப்பில் திருப்பீடத்தின் நிரந்தரப்பார்வையாளராகவும் பணியாற்றினார். இவர், 1998ம் ஆண்டில் திருப்பீடத்தின் பாரம்பரியச் சொத்துக்கள் மேலாண்மை அமைப்பின் தலைவராகவும், Centesimus Annus-Pro Pontifice பாப்பிறை அமைப்பின் பொறுப்பாளராகவும் இருந்தார். இவர், 2001ம் ஆண்டில் திருத்தந்தை புனித 2ம் யோவான் பவுல் அவர்களால் கர்தினாலாக உயர்த்தப்பட்டார். மார்ச் 05, இச்சனிக்கிழமை காலையில் இறைவனடி சேர்ந்த கர்தினால் காச்சியாவில்லன் அவர்களின் அடக்கச்சடங்கு, மார்ச் 07, இத்திங்களன்று இடம்பெறும். கர்தினால் காச்சியாவில்லன் அவர்களது இறப்போடு, திருஅவையில் மொத்த கர்தினால்களின் எண்ணிக்கை 212 ஆகவும், அவர்களில் புதிய ஒரு திருத்தந்தையைத் தேர்ந்தெடுக்கும் தகுதியுடைய எண்பது வயதுக்கு உட்பட்டவர்களின் எண்ணிக்கை 119 ஆகவும் மாறியுள்ளன. [2022-03-06 00:36:28]


அமைதியின் அரசியாம் மரியாவிடம் உக்ரைனுக்காக வேண்டுவோம்

கடுமையாய்ப் போர் இடம்பெற்றுவரும் உக்ரைன் நாட்டில் அமைதி நிலவ, நாம் எல்லாரும் ஒன்றுசேர்ந்து செபிப்போம் என்று, மார்ச் 05, இச்சனிக்கிழமையன்று திருத்தந்தை பிரான்சிஸ் அவர்கள் கேட்டுக்கொண்டுள்ளார். இச்சனிக்கிழமையன்று பத்தாவது நாளாக, போர் இடம்பெற்றுவரும் உக்ரைன் நாட்டிற்காக, ஒன்றிணைந்து செபிப்போம், உக்ரைனில் அமைதி என்ற ஹாஷ்டாக்குகளுடன் (#PrayTogether #Ukraine #Peace), தன் டுவிட்டர் செய்தி வழியாக, அன்னை மரியாவிடம் மன்றாடியுள்ளார், திருத்தந்தை பிரான்சிஸ். “அமைதியின் அரசியாம் அன்னை மரியா, தன் மேற்போர்வையை நம்மீது விரிக்குமாறு அவரிடம் மன்றாடுவோம். அன்னையே, உமது பாதுகாவலில் நாங்கள் அடைக்கலம் தேடுகிறோம். இறைவனின் புனித அன்னையே, எம் தேவைகளில் எம்மைக் கைவிடாதேயும். மகிமைநிறைந்த ஓ புனித கன்னி மரியே! எம்மை எல்லா ஆபத்துக்களிலிருந்தும் காப்பாற்றும்” என்ற சொற்கள் திருத்தந்தையின் டுவிட்டர் செய்தியில் பதிவாகியிருந்தன. உக்ரைனுக்காக உலகளாவிய உதவி மேலும், உக்ரைனில் மார்ச் 05 இச்சனிக்கிழமை நிலவரம் குறித்து, வத்திக்கான் செய்தித்துறைக்கு தகவல் அனுப்பியுள்ள, உக்ரைன் கிரேக்க கத்தோலிக்கச் செயலகம், ஏறக்குறைய இருபது செ.மீ. அளவிற்குப் பனிபொழிந்துள்ள கார்கீவ் நகரத்தில், இவ்வெள்ளி இரவில் குண்டுகள் வீசப்பட்ட சப்தத்தைக் கேட்க முடிந்தது என்று குறிப்பிட்டுள்ளது. எதிரிகளின் கொடும்கரங்களிலுள்ள நகரங்களைவிட்டு மக்கள் வெளியேற இயலாமல் உள்ளனர் என்றுரைத்துள்ள அவ்வலுவலகம், அந்நகரங்களுக்கு மனிதாபிமான உதவிகளாவது சென்றடைவதற்கு உலகளாவிய சமுதாயம், தன்னால் இயன்ற அனைத்தையும் ஆற்றுமாறும், உக்ரைன் விவகாரத்தில் மௌனமாய் இருக்கவேண்டாம் என்றும் கேட்டுக்கொண்டுள்ளது. [2022-03-06 00:30:51]


பக்க இலக்கங்களை அழுத்தி எல்லா செய்திகளையும் பார்வையிடவும்