வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



திருத்தந்தை பிரான்சிஸ் அவர்களுக்கு, பிறந்த நாள் நல்வாழ்த்து

தன் 83வது பிறந்த நாளைச் சிறப்பித்த திருத்தந்தை பிரான்சிஸ் அவர்களுக்கு, உலகெங்கிலுமிருந்து செபங்களுடன் நல்வாழ்த்துக்கள் குவிந்துள்ளன மேரி தெரேசா: வத்திக்கான் செய்திகள் டிசம்பர் 17, இச்செவ்வாயன்று தன் 83வது பிறந்த நாளைச் சிறப்பித்த திருத்தந்தை பிரான்சிஸ் அவர்களுக்கு, முன்னாள் திருத்தந்தை 16ம் பெனடிக்ட் அவர்கள், பல்வேறு சமயத் தலைவர்கள், அரசுகளின் தலைவர்கள் உட்பட, உலகெங்கிலுமிருந்து பலதரப்பு மக்கள், செபங்களும் நல்வாழ்த்துக்களும் நிறைந்த செய்திகளை அனுப்பியுள்ளனர். ஆயிரக்கணக்கான வாழ்த்து மின்னஞ்சல்கள் மற்றும், சிறாரின் நல்வாழ்த்துக் கடிதங்களும் திருத்தந்தைக்கு வந்து சேர்ந்துள்ளன. இத்தாலிய அரசுத்தலைவரின் வாழ்த்து இத்தாலிய அரசுத்தலைவர் செர்ஜோ மத்தரெல்லா அவர்கள் அனுப்பியுள்ள வாழ்த்துச் செய்தியில், பிரிவினைகளைப் பின்னுக்குத் தள்ளி, அமைதியைக் காக்கவும், உரையாடலில் ஈடுபடவும், இப்பூமியின் வளங்களை ஞானத்தோடு நிர்வகித்து காக்கவும், தனது அயராத மேய்ப்புப்பணி நடவடிக்கைகள் வழியாக, திருத்தந்தை பிரான்சிஸ் அவர்கள், மக்களையும் நாடுகளையும் தொடர்ந்து ஊக்கப்படுத்தி வருகிறார் என்று குறிப்பிட்டுள்ளார். தன் அருள்பணித்துவ வாழ்வில், ஐம்பது ஆண்டுகள் மிகத் தாராளமாக பணியாற்றியுள்ளது, மணிமகுடமாக விளங்கும் இவ்வேளையில், மனித சமுதாயம் அனைத்திற்கும் நன்மைதரவல்ல, சிறந்ததொரு வருங்காலத்தை அமைப்பதற்கு, தொலைநோக்கு மற்றும், பொறுப்புணர்வுடன் செயல்படுமாறு, மத நம்பிக்கையாளர் மற்றும், மத நம்பிக்கையற்ற அனைவரின் மனசாட்சிகளுக்கும் திருத்தந்தை அழைப்பு விடுத்து வருவதை, தன் செய்தியில் பாராட்டியுள்ளார், இத்தாலிய அரசுத்தலைவர். கத்தோலிக்க திருஅவைக்கும், இத்தாலிய அரசுக்கும் இடையே இலாத்தரன் ஒப்பந்தம் கையெழுத்திடப்பட்டதன் 90ம் ஆண்டு நிறைவு இவ்வாண்டில் நினைவுகூரப்படுவதை திருத்தந்தை பல்வேறு மேய்ப்புப்பணிகளில் குறிப்பிட்டிருப்பதைச் சுட்டிக்காட்டியுள்ள மத்தரெல்லா அவர்கள், இத்தாலியில் திருத்தந்தை மேற்கொள்ளும் மேய்ப்புப்பணிகள், கத்தோலிக்க திருஅவைக்கும், இத்தாலிய அரசுக்கும் இடையேயுள்ள உறவை மேலும் வலுப்படுத்துகின்றன என்று கூறியுள்ளார். பல்வேறு கடுமையான துயர நிகழ்வுகள் மனித சமுதாயத்தைப் பாதித்து வரும் இவ்வேளையில், மனித உடன்பிறந்தநிலை மற்றும் பகிர்வு பற்றிய திருத்தந்தையின் செய்திகளுக்கு நன்றி சொல்லியுள்ளார் இத்தாலிய அரசுத்தலைவர் மத்தரெல்லா. திருத்தந்தை பிரான்சிஸ் ஹோர்கே மாரியோ பெர்கோலியோ என்ற இயற்பெயர் கொண்ட திருத்தந்தை பிரான்சிஸ் அவர்கள், 1936ம் ஆண்டு டிசம்பர் 17ம் தேதி, அர்ஜென்டீனா நாட்டின் புவனஸ் அயிரஸ் நகரில் பிறந்தார். இயேசு சபையில், 1969ம் ஆண்டு, டிசம்பர் 13ம் தேதி, அருள்பணியாளராக தன் பணிவாழ்வைத் துவங்கிய அவர், 1973ம் ஆண்டு முதல், 1979ம் ஆண்டு முடிய, அர்ஜென்டீனா இயேசு சபையின் மாநிலத் தலைவராகப் பணியாற்றினார். இவர், அருள்பணியாளராக 50 ஆண்டுகளையும், ஆயராக, 27 ஆண்டுகளையும் நிறைவு செய்துள்ளார். 2001ம் ஆண்டு கர்தினாலாக உயர்த்தப்பட்ட இவர், 2013ம் ஆண்டு மார்ச் 13ம் தேதி, பிரான்சிஸ் என்ற பெயருடன், கத்தோலிக்கத் திருஅவையின் தலைவராகப் பொறுப்பேற்றார். [2019-12-18 01:33:15]


அருள்பணித்துவ பொன்விழாவுக்கு திருத்தந்தைக்கு வாழ்த்து

1936ம் ஆண்டு டிசம்பர் 17ம் தேதி பிறந்த ஹோர்கே மாரியோ பெர்கோலியோ அவர்கள், தன் 33வது பிறந்தநாளுக்கு நான்கு நாள்கள் முன்னதாக, 1969ம் ஆண்டு, டிசம்பர் 13ம் தேதி, இயேசு சபையில், அருள்பணியாளராக அருள் பொழிவு செய்யப்பட்டார் மேரி தெரேசா: வத்திக்கான் செய்திகள் தன் அருள்பணித்துவ வாழ்வில் ஐம்பது ஆண்டுகளை நிறைவு செய்யும் திருத்தந்தை பிரான்சிஸ் அவர்களுக்கு, கர்தினால்கள் அவைத் தலைவர் கர்தினால் ஆஞ்சலோ சொதானோ அவர்களும், உலகின் தலத்திருஅவைத் தலைவர்களும், ஏனையோரும் தங்கள் நல்வாழ்த்துக்களைத் தெரிவித்துள்ளனர். திருத்தந்தை பிரான்சிஸ் அவர்கள், வத்திக்கானில் தங்கியிருக்கும் சாந்தா மார்த்தா இல்லச் சிற்றாலயத்தில், டிசம்பர் 13, இவ்வெள்ளி காலையில் நன்றி திருப்பலியை நிறைவேற்றியவேளை, அத்திருப்பலியின் துவக்கத்தில், அனைத்து கர்தினால்கள் சார்பாக நல்வாழ்த்துக்களைத் தெரிவித்தார், கர்தினால் சொதானோ. கடவுளிடமிருந்து பெற்ற நன்மைகளுக்கு நன்றி சொல்வதற்கு நூற்றாண்டுகளாக திருஅவை ஒலித்துவரும் 'தே தேயும்' என்ற பழங்கால நன்றிப் பண்ணே இன்று நம் இதயங்களில் எழுகின்றது என்று கூறிய கர்தினால் சொதானோ அவர்கள், 1969ம் ஆண்டு டிசம்பர் 13ம் தேதியன்று திருத்தந்தை பெற்ற அருளுக்காக, அவருடன் இணைந்து நாமும் நன்றி சொல்கிறோம் என்று கூறினார். திருத்தந்தை பிரான்சிஸ் அவர்களிடம் ஆண்டவர் ஒப்படைத்த இந்த உன்னதப் பணிக்காகத் தொடர்ந்து செபிக்கின்றோம், ஆதரவை வழங்குகின்றோம் என்றும், திருத்தந்தை, கடவுளின் புனித திருஅவைக்கு ஒவ்வொரு நாளும் தாராள மனதுடன் ஆற்றிவரும் நற்சேவைக்கு உளம்கனிந்த நன்றி சொல்கிறோம் என்றும், கர்தினால் சொதானோ அவர்கள் கூறினார். Scholas Occurrentes மேலும், இவ்வெள்ளி மாலை 4 மணிக்கு, உரோம் நகரிலுள்ள புனித கலிஸ்தோ வளாகத்தில் Scholas Occurrentes புதிய மையத்தைத் திறந்து வைக்கிறார், திருத்தந்தை பிரான்சிஸ். அந்நேரத்தில், Scholas Occurrentes அமைப்பைச் சார்ந்த, ஜப்பான், அர்ஜென்டீனா, அமெரிக்க ஐக்கிய நாடு, ஹெய்ட்டி, இஸ்ரேல், மொசாம்பிக், மெக்சிகோ, இஸ்பெயின், இத்தாலி, கொலம்பியா போன்ற நாடுகளின் பிரதிநிதிகள், திருத்தந்தைக்கு நல்வாழ்த்துக்களைத் தெரிவிக்கின்றனர். இன்னும், காணொளி கருத்தரங்கம் வழியாக, அமெரிக்க ஐக்கிய நாட்டின் லாஸ் ஆஞ்செஸ் நகரின் Scholas Occurrentes புதிய மையத்தோடும் திருத்தந்தை உரையாடுகிறார். திருத்தந்தை பிரான்சிஸ் ஹோர்கே மாரியோ பெர்கோலியோ அவர்கள், தன் 33வது வயதில், 1969ம் ஆண்டு, டிசம்பர் 13ம் தேதி, இயேசு சபையில், அருள்பணியாளராக அருள் பொழிவு செய்யப்பட்டார். இதைத் தொடர்ந்து, அவர், 1973ம் ஆண்டு, அர்ஜென்டீனா இயேசு சபையின் மாநிலத் தலைவராகப் பொறுப்பேற்று, ஆறு ஆண்டுகள் பணியாற்றினார். அருள்பணி பெர்கோலியோ அவர்கள், 1998ம் ஆண்டு, Buenos Aires உயர் மறைமாவட்டத்தின் பேராயராகவும் பொறுப்பேற்றார். அவரை, திருத்தந்தை புனித 2ம் ஜான் பால் அவர்கள், 2001ம் ஆண்டு, கர்தினாலாக உயர்த்தினார். 2013ம் ஆண்டு மார்ச் 13ம் தேதி, திருஅவையின் தலைமைப் பொறுப்பை ஏற்றுக்கொண்ட கர்தினால் பெர்கோலியோ அவர்கள், வறியோரின் தோழராக பணியாற்றிய அசிசி நகர் புனித பிரான்சிஸ் நினைவாக, திருத்தந்தை பிரான்சிஸ் என்ற பெயரை ஏற்றார். [2019-12-14 23:15:44]


மறைக்கல்வியுரை: புனித பவுலுக்கும் இயேசுவுக்கும் நடந்த சம்பவங்கள்

புனித பவுல் அனுபவித்த துன்பங்கள் அனைத்தும், சிலுவையில் அறையப்பட்டு உயிர்த்தெழுந்த இயேசுவைக் குறித்து வீரத்துடன் பறைசாற்றுவதாக உள்ளன. கிறிஸ்டோபர் பிரான்சிஸ் – வத்திக்கான் இத்தாலியில் குளிர்காலம் துவங்கிவிட்டபோதிலும், திருப்பயணிகளின் கூட்டத்தை கணக்கில்கொண்டு, புனித பேதுரு பெருங்கோவில் வளாகத்தில் திருத்தந்தையின் மறைக்கல்வியுரைகள் கடந்த வாரம்வரை இடம்பெற்று வந்தன. ஆனால், இப்புதனன்று, சூரியன் பிரகாசமாக ஒளி வீசினாலும், குளிர்ந்த காற்று வீசிக்கொண்டிருந்ததால், புனித திருத்தந்தை ஆறாம் பவுல் அரங்கில் திருப்பயணிகளைச் சந்தித்தார், திருத்தந்தை பிரான்சிஸ். உக்ரைனிலிருந்து வந்திருந்த திருப்பயணிகள் குழு ஒன்றை முதலில் புனித பேதுரு பெருங்கோவிலில் சந்தித்த பின், புனித ஆறாம் பவுல் அரங்கிற்கு வந்தார், திருத்தந்தை பிரான்சிஸ். முதலில், திருத்தூதர் பணிகள் நூலில் இருந்து ஒரு பகுதி (தி.ப. 26, 22-23) பல்வேறு மொழிகளில் வாசிக்கப்பட்டது. (புனித பவுல் அரசர் அகிரிப்பாவை நோக்கி,) ஆயினும் கடவுளின் உதவிபெற்று, இந்நாள் வரை இறைவாக்கினரும் மோசேயும் நடக்கவிருப்பதாகக் கூறியதையே நானும் சிறியோருக்கும் பெரியோருக்கும் சான்றாகக் கூறி வருகிறேன். 23அதாவது, மெசியா துன்பப்படுவார்; எனினும் இறந்த அவர்முதலில் உயிர்த்தெழுந்து நம் மக்களும் பிற இனத்தாரும் ஒளி பெறுவர் என அவர்களுக்கு அறிவிப்பார் என்று அவர்கள் கூறியதையே நானும் கூறி வருகிறேன் (என்றார்) (தி.ப. 26, 22-23). பின்னர் திருத்தந்தை பிரான்சிஸ் அவர்கள், திருத்தூதர் பணிகள் குறித்த தன் மறைக்கல்வியைத் தொடர்ந்தார். அன்பு சகோதர சகோதரிகளே, திருத்தூதர் பணிகள் குறித்த நம் தொடர் மறைக்கல்வி உரையில் இன்று, எவ்வாறு புனித பவுலின் மறைத்தூதுப்பணி, காலம் செல்ல, செல்ல, மிகுந்த துன்பங்கள் நிரம்பியதாக மாறியது என்பது குறித்து நோக்குவோம். அவர் எருசலேம் நகருக்குத் திரும்பி வந்தது, அவரை, பெரும் சித்திரவதைகளுக்கு உள்ளாகும் நிலைக்குத் தள்ளியது. சட்டத்திற்கு எதிராகவும் கோவிலுக்கு எதிராகவும் போதித்தார் என்ற குற்றச்சாட்டின்பேரில் அவர் கைது செய்யப்பட்டு விலங்கிடப்பட்டார். நூற்றுவர் படைத்தலைவனால் விசாரிக்கப்பட்டபின், புனித பவுல், செசாரியாவுக்கு எடுத்துச் செல்லப்படுகிறார். அங்கு, ஆளுநர் ஃபீலிக்சும் அரசர் அகிரிப்பாவும் இவர் குறித்த வழக்கிற்கு செவி மடுக்கின்றனர். இறுதியாக, பேரரசரிடம் தன் விண்ணப்பத்தை முன்வைத்தபின், உரோம் நகருக்குத் திரும்புகிறார், புனித பவுல். இவையனைத்திலும், புனித லூக்கா, புனித பவுலுக்கும், இயேசுவுக்கும், நடந்த சம்பவங்களின் ஒற்றுமையைக் காட்டுகிறார். புனித பவுல் அனுபவித்த துன்பங்கள் அனைத்தும், சிலுவையில் அறையப்பட்டு உயிர்த்தெழுந்த இயேசுவைக் குறித்து வீரத்துடன் பறைசாற்றுவதாக உள்ளன. புனித பவுல், இயேசுவின் மீது கொண்டிருந்த அன்பு, அவர் பிணைக்கப்பட்டிருந்த சங்கிலியையும், நற்செய்தியின் விடுதலை சக்தியை எடுத்துரைக்கும் கருவியாக மாற்றியது. பேரிடர்கள், மற்றும், கைது விசாரணைகளின்போது உறுதியுடன் செயல்பட்ட, மற்றும், அனைத்தையும் விசுவாசக் கண்களோடு பார்த்த புனித பவுலின் எடுத்துக்காட்டு, நம்மை விசுவாசத்தில் பலப்படுத்தி, நற்செய்தியின் மகிழ்வுக்கு நம் சான்றிலும், மறைப்பணி சீடத்துவத்திற்கான அழைப்பிலும் உறுதிப்படுத்துவதாக. இவ்வாறு, தன் புதன் மறைக்கல்வி உரையை வழங்கிய திருத்தந்தை பிரான்சிஸ் அவர்கள், புனித ஆறாம் பவுல் அரங்கத்தின் மேடையில் வைக்கப்பட்டிருந்த புனித லூசியாவின் திருஉருவச் சிலையை அர்ச்சித்தார். உரோம் நகருக்கு வடகிழக்கே அமைந்துள்ள Fonte Nuova நகரில், 2000 ஆண்டுகள் பழமையுடைய ஒரு மலைக்குகை வாயிலில், புனித லுசியாவின் சிலை, டிசம்பர் 13, இவ்வெள்ளிக்கிழமையன்று, அதாவது, இப்புனிதரின் திருநாளன்று நிறுவப்படவுள்ளது. அத்திருவுருவச் சிலையை அர்ச்சித்த திருத்தந்தை பிரான்சிஸ் அவர்கள், அதன் பின், அனைவருக்கும், தன் அப்போஸ்தலிக்க ஆசீரை வழங்கினார். [2019-12-12 00:48:12]


காணாமல்போன ஆட்டைக் கண்டுபிடித்த இறைவனின் மகிழ்வு

ஆட்டுக்குட்டியைத் தோளில் சுமந்துசெல்லும் நல்லாயனைப்போல், இறைவன் தம் மக்களை வழிநடத்தி, ஆறுதலளித்து, ஒரு தந்தைக்குரிய அக்கறையுடன் தண்டிக்கவும் செய்கிறார் கிறிஸ்டோபர் பிரான்சிஸ் - வத்திக்கான் செய்திகள் தன்னிடம் மன்னிப்பை வேண்டி வருவோரை ஆரத்தழுவி அவர்களுக்கு ஒப்புரவு அருளின் பாதையை திறக்கும் நல்மேய்ப்பர் இறைவன் என, இச்செவ்வாய்க்கிழமை காலை வழங்கிய மறையுரையில் கூறினார் திருத்தந்தை பிரான்சிஸ். தான் தங்கியிருக்கும் சாந்தா மார்த்தா இல்லத்தின் சிற்றாலயத்தில் காலை திருப்பலி நிறைவேற்றி மறையுரை வழங்கிய திருத்தந்தை பிரான்சிஸ் அவர்கள், தாய் ஆட்டை வழி நடத்தும் அதேவேளை, ஆட்டுக்குட்டியைத் தோளில் சுமந்துசெல்லும் நல்லாயனைப்போல், இறைவன் தம் மக்களை வழிநடத்தி, ஆறுதலளித்து, ஒரு தந்தைக்குரிய அக்கறையுடன் தண்டிக்கவும் செய்கிறார் என்று கூறினார். இச்சிறியோருள் ஒருவர்கூட நெறி தவறிப் போகக்கூடாது என்பதே உங்கள் விண்ணகத் தந்தையின் திருவுளம் (மத். 18:14) என்று இயேசு இன்றைய நற்செய்தியில் கூறிய வார்த்தைகளை மையமாக வைத்து தன் மறையுரையை வழங்கிய திருத்தந்தை, தன்னை ஆறுதல்படுத்த அனுமதிக்கும் ஒவ்வொருவரையும், இறைவனே முன்வந்து ஆறுதல்படுத்துகிறார் என்றார். ஒரு பாவி மன்னிப்பை வேண்டி இறைவனை அணுகும்போது, இறைவனிடம் உருவாகும் மகிழ்ச்சி, அவரை இளகிய இதயமுடையவராக மாற்றுகின்றது என்று தன் மறையுரையில் கூறியத் திருத்தந்தை, 'காணாமற்போன மகன்' உவமையில், மகனுக்காக காத்திருக்கும் தந்தை, மகன் திரும்பி வந்ததும், அவனை பேசவிடாமல், அவன் திரும்பி வந்த மகிழ்ச்சியை கொண்டாடுவதிலேயே கவனமாக இருந்ததைச் சுட்டிக்காட்டினார். காணாமல்போன ஓர் ஆட்டைக் கண்டுபிடித்த இறைவனின் மகிழ்வு, தன்னிடமுள்ள 99 ஆடுகள் குறித்த மகிழ்வைவிட அதிகமாக இருக்கும் என்பதால், பாவிகளாகிய நாம் அவரின் மன்னிப்பை வேண்டி அவரை நோக்கிச் செல்வோம் என்ற அழைப்பையும் விடுத்தார் திருத்தந்தை பிரான்சிஸ். [2019-12-10 22:20:08]


உலக மனித உரிமைகள் தினம் – திருத்தந்தையின் டுவிட்டர்

'மனிதர்கள், புனிதத்தன்மையும், மீற முடியாத உரிமைகளும் உடையவர்கள் என்ற நம்பிக்கை பொய்க்குமானால், மனித உரிமைகளைப் பாதுகாப்பதற்கு, நிலையான அடிப்படை இல்லாமல் போய்விடும்' - திருத்தந்தையின் டுவிட்டர் கிறிஸ்டோபர் பிரான்சிஸ் - வத்திக்கான் செய்திகள் மனிதர்கள், தங்கள் முன்னேற்றத்தின் எந்நிலையிலும், சூழலிலும் புனிதத்தன்மையும், மீற முடியா உரிமைகளையும் கொண்டவர்கள் என்ற கருத்தை வலியுறுத்தி, இச்செவ்வாயன்று, தன் டுவிட்டர் செய்தியை வெளியிட்டுள்ளார், திருத்தந்தை பிரான்சிஸ். 'முன்னேற்றப்பாதையில் எந்தச் சூழலிலும், நிலையிலும் மனிதர்கள், புனிதத்தன்மை கொண்டவர்கள், மற்றும், மீற முடியாத உரிமைகளை உடையவர்கள். இந்த நம்பிக்கை பொய்க்குமானால், மனித உரிமைகளைப் பாதுகாப்பதற்கு, உறுதியான மற்றும் நிலையான அடிப்படை இல்லாமல் போய்விடும்' என்ற சொற்கள் திருத்தந்தையின் டுவிட்டர் செய்தியில் பதிவாகியிருந்தன. டிசம்பர் 10, இச்செவ்வாய்க்கிழமையன்று உலக மனித உரிமைகள் தினம் சிறப்பிக்கப்பட்டதையொட்டி, திருத்தந்தையின் டுவிட்டர் செய்தி, மனித உரிமைகளை பாதுகாப்பதன் அவசியம் குறித்து சிறப்பாக வலியுறுத்தியது. மேலும், தங்களது 'அத் லிமினா' சந்திப்பையொட்டி உரோம் நகர் வந்திருந்த அமெரிக்க ஐக்கிய நாட்டின் ஆயர்கள் குழு ஒன்றை, இச்செவ்வாய்க்கிழமையன்று, திருப்பீடத்தில் சந்தித்து உரையாடினார், திருத்தந்தை பிரான்சிஸ். [2019-12-10 22:02:21]


குழந்தையின் அழுகுரல் இறைவனை நோக்கி எழுகிறது

டிசம்பர் மாதத்திற்குரிய தன் செபக்கருத்தை, "மிக மிக இளையோரின் எதிர்காலம்" என்ற மையக்கருத்தில், திருத்தந்தை பிரான்சிஸ் அவர்கள், டிசம்பர் 5, இவ்வியாழன் மாலையில் வெளியிட்டார். ஜெரோம் லூயிஸ் - வத்திக்கான் செய்திகள் குழந்தைகளின் எதிர்காலத்தை, குறிப்பாக, இன்று துன்புறும் குழந்தைகளின் எதிர்காலத்தை, ஒரு முக்கிய நோக்கமாகக் கொண்டு, உலகின் ஒவ்வொரு நாடும், செயலாற்றுமாறு, திருத்தந்தை பிரான்சிஸ் அவர்கள் விண்ணப்பித்துள்ளார். இயேசு சபையினரால் நடத்தப்படும், இறைவேண்டலின் திருத்தூது பணி அமைப்பு, ஒவ்வொரு மாதமும், திருத்தந்தையின் செபக்கருத்துக்களை 'The Pope Video' என்ற காணொளி வழியே வெளியிட்டு வருகிறது. டிசம்பர் மாதத்திற்குரிய தன் செபக்கருத்தை, "மிக மிக இளையோரின் எதிர்காலம்" என்ற மையக்கருத்தில், திருத்தந்தை பிரான்சிஸ் அவர்கள், டிசம்பர் 5, இவ்வியாழன் மாலையில் வெளியிட்டார். "கல்வியும், நலவாழ்வு பராமரிப்பும் தரப்படாமல், ஒதுக்கப்பட்ட, தவறாகப் பயன்படுத்தப்பட்ட, ஆதரவின்றி விடப்பட்ட ஒவ்வொரு குழந்தையின் அழுகுரலும் இறைவனை நோக்கி எழுகிறது. பாதுகாப்பு ஏதுமின்றி நம் உலகிற்கு வந்த கிறிஸ்து, அவர்கள் ஒவ்வொருவரிலும் இருக்கிறார்; அவர்கள் கண்கள் வழியே கிறிஸ்து நம்மை உற்றுநோக்குகிறார். ஒவ்வொரு நாடும், குழந்தைகளின் எதிர்காலத்தை, குறிப்பாக, இன்று துன்புறும் குழந்தைகளின் எதிர்காலத்தை, தங்கள் முதன்மையான நோக்கமாகக் கொண்டு நடவடிக்கைகளை மேற்கொள்ள நாம் செபிப்போமாக" என்ற சொற்கள், திருத்தந்தை பிரான்சிஸ் அவர்களின் டிசம்பர் இறைவேண்டல் கருத்தாக வெளியாகியுள்ளன. மேலும், இறைவேண்டலைக் குறித்து, திருத்தந்தை வெளியிட்டுள்ள ஒரு கருத்து, அவரது டுவிட்டர் செய்தியாக, இவ்வெள்ளியன்று வெளியாகியுள்ளது. "இறைவேண்டல், நம்பிக்கையின் கதவாக விளங்குகிறது; இதயத்திற்கு மருந்தாகவும் உள்ளது" என்ற சொற்கள், திருத்தந்தை பிரான்சிஸ் அவர்கள் வெளியிட்ட டுவிட்டர் செய்தியில் பதிவாகியிருந்தன. [2019-12-08 20:50:11]


பிறரன்பில் பிரதிபலிக்கப்படும் இறைவழிபாடு

கடவுளை உண்மையாக வழிபடுவது என்பது, ஒருவர் தமக்கு அடுத்திருப்பவர் மீது காட்டும் அன்பில் வெளிப்படுத்தப்படுகின்றது – திருத்தந்தையின் டுவிட்டர் செய்தி கிறிஸ்டோபர் பிரான்சிஸ் - வத்திக்கான் செய்திகள் அடுத்திருப்பவர் மீது நாம் காட்டும் அன்பிற்கும், இறைவழிபாட்டிற்கும் இடையே இருக்கும் தொடர்பு குறித்து, டிசம்பர் 7, இச்சனிக்கிழமை, தன் டுவிட்டர் செய்தியை வெளியிட்டுள்ளார், திருத்தந்தை பிரான்சிஸ். கடவுளை உண்மையாக வழிபடுவது என்பது, ஒருவர் தமக்கு அடுத்திருப்பவர் மீது காட்டும் அன்பில் வெளிப்படுத்தப்படுகின்றது, என்ற சொற்கள், திருத்தந்தை வெளியிட்ட டுவிட்டர் செய்தியில் இடம்பெற்றிருந்தன. மேலும், இச்சனிக்கிழமையன்று, எகிப்து வெளியுறவு அமைச்சர் Sameh Shoukry அவர்களையும், மால்ட்டா பிரதமர் Joseph Muscat அவர்களையும் சந்தித்த திருத்தந்தை பிரான்சிஸ் அவர்கள், ஆயர்கள் பேராயத்தின் தலைவர் கர்தினால் Marc Ouellet, தொமினிக்கன் துறவு சபையின் உலகத் தலைவர், அருள்பணி Gerard Francisco Timoner III ஆகியோரையும் சந்தித்து உரையாடினார். [2019-12-08 00:53:40]


கிறிஸ்து பிறப்பு காட்சியை அமைத்தோருக்கு திருத்தந்தை நன்றி

புனித பேதுரு வளாகத்தில் உருவாக்கப்பட்டுள்ள கிறிஸ்து பிறப்பு காட்சி அமைப்பிற்கும், கிறிஸ்மஸ் மரத்திற்கும் தேவையான ஏற்பாடுகளையும், பொருளுதவிகளையும், செய்தோருக்கு திருத்தந்தை நன்றி தெரிவித்தார் ஜெரோம் லூயிஸ் - வத்திக்கான் செய்திகள் புனித பேதுரு வளாகத்தில் உருவாக்கப்பட்டுள்ள கிறிஸ்து பிறப்பு காட்சி அமைப்பிற்கும், அங்கு வைக்கப்பட்டிருக்கும் கிறிஸ்மஸ் மரத்திற்கும் தேவையான ஏற்பாடுகளையும், பொருளுதவிகளையும், செய்தோரை, திருத்தந்தை பிரான்சிஸ் அவர்கள், டிசம்பர் 5, இவ்வியாழன் மதியம் புனித 6ம் பவுல் அரங்கத்தில் சந்தித்து தன் வாழ்த்துக்களைத் தெரிவித்தார். Trento, Vicenza மற்றும் Treviso, பகுதிகளிலிருந்தும், Trento, Padua மற்றும் Vittorio Veneto மறைமாவட்டங்களிலிருந்தும் வந்திருந்த அனைத்து திருப்பயணிகளையும் வாழ்த்துவதாகக் கூறிய திருத்தந்தை, இப்பகுதிகளில், சென்ற ஆண்டு நிகழ்ந்த இயற்கைப் பேரிடர்களையும் நினைவுகூர்ந்தார். வெட்டப்பட்ட மரங்களுக்கு ஈடாக 40 கன்றுகள் இந்த கிறிஸ்து பிறப்பு காட்சியையும், கிறிஸ்மஸ் மரத்தையும் உருவாக்க வெட்டப்பட்ட மரங்களுக்கு ஈடு செய்யும் வண்ணம் 40க்கும் மேற்பட்ட மரங்கள் அப்பகுதியில் நடப்படுவது குறித்து தான் மிகவும் மகிழ்வதாக திருத்தந்தை இச்சந்திப்பில் கூறினார். புனித பேதுரு வளாகத்தில் மட்டுமல்லாமல், புனித 6ம் பவுல் அரங்கத்திலும் உருவாக்கப்பட்டுள்ள கிறிஸ்து பிறப்பு காட்சிகள், Conegliano பகுதியின் கலாச்சாரத்தை வெளிப்படுத்துகின்றன என்றும், இக்காட்சிகள், கிறிஸ்மஸ் காலத்தில் வத்திக்கானுக்கு வருகை தரும் அனைத்துலக மக்களையும் கவரும் என்று, திருத்தந்தை பிரான்சிஸ் அவர்கள் தன் மகிழ்வைத் தெரிவித்தார். வியாபாரத்திலிருந்து திசைதிருப்ப, கிறிஸ்மஸ் குடில்கள் வயதில் வளர்ந்தோர், குழந்தைகள் அனைவரையும் மகிழ்விக்கும் கிறிஸ்மஸ் குடில்கள், இக்கிறிஸ்மஸ் காலத்தை வெறும் வியாபாரமயமாக்கும் இவ்வுலக போக்குகளிலிருந்து இறைவனை நோக்கி திருப்புகின்றன என்று, திருத்தந்தை தன் உரையில் எடுத்துரைத்தார். புனித பேதுரு பெருங்கோவில் வளாகத்தில் உருவாக்கப்பட்டுள்ள கிறிஸ்து பிறப்பு காட்சி, கிறிஸ்மஸ் மரம் ஆகியவற்றை, டிசம்பர் 5, இவ்வியாழன் மாலை, வத்திக்கான் நகர அரசின் தலைவர், கர்தினால் Giuseppe Bertello அவர்களும், செயலரான ஆயர் Fernardo Vérgez Alzaga அவர்களும் திறந்து வைத்து, ஒளியேற்றினர். [2019-12-06 01:27:58]


திருத்தந்தை பிரான்சிஸ் – அருள்பணியாளராக 50 ஆண்டுகள்

டிசம்பர் 8, வருகிற ஞாயிறன்று, உரோம் மறைமாவட்டத்தின் அனைத்து ஆலயங்களிலும், ஞாயிறு திருப்பலிகளில், திருத்தந்தையின் குருத்துவப் பொன்விழாவுக்கென சிறப்பு மன்றாட்டுக்கள் எழுப்புமாறு விண்ணப்பித்துள்ளார். ஜெரோம் லூயிஸ் - வத்திக்கான் செய்திகள் டிசம்பர் 13, அடுத்த வெள்ளிக்கிழமை, தன் அருள்பணி வாழ்வில் பொன்விழாவைச் சிறப்பிக்கவிருக்கும் திருத்தந்தை பிரான்சிஸ் அவர்களுக்காக செபிக்கும்படி, அவர் சார்பாக, உரோம் மறைமாவட்டத்தின் ஆயராகப் பணியாற்றிவரும் கர்தினால் ஆஞ்செலோ தே தொனாத்திஸ் (Angelo De Donatis) அவர்கள் அறிக்கையொன்றை வெளியிட்டுள்ளார். "திருத்தந்தை பிரான்சிஸ் அவர்கள், அருள்பணியாளராக 50 ஆண்டுகளும், ஆயராக 27 ஆண்டுகளும் ஆற்றிவரும் பணிகளுக்காக இறைவனுக்கு நன்றி சொல்வோம்" என்ற சொற்களுடன், தன் அறிக்கையைத் துவங்கியுள்ள கர்தினால் தே தொனாத்திஸ் அவர்கள், டிசம்பர் 8, வருகிற ஞாயிறன்று, உரோம் மறைமாவட்டத்தின் அனைத்து ஆலயங்களிலும், ஞாயிறு திருப்பலிகளில், திருத்தந்தைக்கென சிறப்பு மன்றாட்டுக்கள் எழுப்புமாறு விண்ணப்பித்துள்ளார். 2013ம் ஆண்டு மார்ச் 13ம் தேதி, திருத்தந்தை பிரான்சிஸ் அவர்கள், திருஅவையின் தலைவராகத் தேர்ந்தெடுக்கப்பட்டு, புனித பேதுரு வளாக மேல்மாடத்திலிருந்து, மக்களின் செபங்களை வேண்டி நின்றது, நமக்கெல்லாம் நினைவிலிருக்கும் என்று கர்தினால் தே தொனாத்திஸ் அவர்கள் இம்மடலில் குறிப்பிட்டுள்ளார். மேலும், ஒவ்வொரு ஞாயிறன்றும் மூவேளை செப உரையின் இறுதியில், தனக்காகச் செபிக்கும்படி திருத்தந்தை விடுத்துவரும் விண்ணப்பம், நம் அனைவரையும், மீண்டும், மீண்டும் அவருக்காக செபிக்கும்படி அழைக்கிறது என்று, கர்தினால் தே தொனாத்திஸ் அவர்கள் கூறியுள்ளார். 1969ம் ஆண்டு, டிசம்பர் 13ம் தேதி, திருவருகைக் காலத்தின் மகிழும் ஞாயிறன்று, அருள்பணியாளராக அருள்பொழிவு பெற்ற இளையவர் ஹோர்கே மாரியோ பெர்கோலியோ அவர்கள், Córdoba பேராயர், Ramón José Castellano அவர்களால் அருள்பணியாளராக திருப்பொழிவு பெற்றார். 1936ம் ஆண்டு, டிசம்பர் 17ம் தேதி பிறந்த ஹோர்கே மாரியோ பெர்கோலியோ, தன் 33வது வயதில் அருள் பணியாளராகவும், 56வது வயதில் ஆயராகவும் அருள் பொழிவு பெற்று, 2013ம் ஆண்டு, தன் 77வது வயதில் திருஅவையின் தலைவராகப் பொறுப்பேற்றார். 83 வயதான திருத்தந்தை பிரான்சிஸ் அவர்கள், இயேசு சபை துறவியாக 61 ஆண்டுகளையும், ஓர் அருள் பணியாளராக, 50 ஆண்டுகளையும் நிறைவு செய்துள்ளார். [2019-12-06 01:17:47]


குடும்பங்களில் இயேசு பிறப்பு குடில் பாரம்பரியம் ஊக்குவிக்கப்பட

திருத்தந்தை : நாம் கடவுளுடன் கொண்டிருக்கும் நெருக்கம், அனைவருக்கும் இரக்கம் காட்ட வேண்டும் என்ற அழைப்பை விடுக்கிறது கிறிஸ்டோபர் பிரான்சிஸ் - வத்திக்கான் செய்திகள் நம் சகோதர சகோதரிகளிடம் நாம் இரக்கமுடன் செயல்பட வேண்டும் என இத்திங்களன்று வெளியிட்ட டுவிட்டர் செய்தியில் அழைப்பு விடுத்துள்ளார், திருத்தந்தை பிரான்சிஸ். 'நாம் கடவுளுடன் கொண்டிருக்கும் நெருக்கம், நம் சகோதர சகோதரிகளை அன்புடன் அணுகி, அவர்கள் அனைவருக்கும் இரக்கம் காட்ட வேண்டும் என்ற அழைப்பை விடுக்கிறது’, என்ற சொற்கள் திருத்தந்தையின் டுவிட்டர் செய்தியில் இடம்பெற்றிருந்தன. மேலும், இத்திங்களன்று, திருத்தந்தைக்கு ஆலோசனை வழங்கும் C-9 எனப்படும் கர்தினால்கள் அவையின் ஆலோசனைக் கூட்டம் திருத்தந்தையின் முன்னிலையில் வத்திக்கானில் துவங்கியது. மேலும், இதே நாளில், 7 திருத்தந்தையர்களின் கீழ் வத்திக்கானில் பணியாற்றியுள்ள அருள்சகோதரி Maria do Ceu Pereira அவர்களின் 90வது பிறந்த நாளையொட்டி, அவரை, சாந்தா மார்த்தா இல்லத்தில், காலை திருப்பலிக்குப்பின் சந்தித்து, வாழ்த்துக்களைத் தெரிவித்தார், திருத்தந்தை பிரான்சிஸ். மேலும், இஞ்ஞாயிறன்று, நான்கு டுவிட்டர் செய்திகளை வெளியிட்டுள்ளார் திருத்தந்தை. வெளிநாட்டவரின் உதவியுடனும், பலரின் மௌனத்துடனும் காங்கோ குடியரசின் கிழக்குப் பகுதியில் மோதல்கள் தொடர்ந்து கொண்டிருக்கும் நிலையில், அந்நாட்டின் அமைதிக்காக இன்று செபிப்போம், என தன் முதல் டுவிட்டரில் கூறியுள்ளார் திருத்தந்தை. இரண்டாவது டுவிட்டரில், ஞாயிறு நற்செய்தி வாசகத்தின் அடிப்படையில், விழிப்பாயிருத்தலை வலியுறுத்தி, ஏழைகளின் தேவைகள் குறித்து நாம் அக்கறையுடன் செயல்பட வேண்டும் எனவும், மூன்றாவது டுவிட்டரில், திருவருகைக் காலத்தின் அர்த்தத்தை எடுத்துரைத்து, நம்மிடையே இயேசுவின் இருப்பு நமக்கு ஆறுதலை வழங்கும் என்றும் கூறியுள்ளார், திருத்தந்தை பிரான்சிஸ் தொழில்கூடங்களிலும், கல்விச்சாலைகளிலும், மருத்துவமனைகளிலும், நகர் சந்திப்புகளிலும், வீடுகளிலும், இயேசு பிறப்பு குடில் உருவாக்கப்படும் பாரம்பரியத்தை தான் ஊக்குவிப்பதாக, திருத்தந்தை வெளியிட்ட 4வது டுவிட்டர் கூறியுள்ளது. [2019-12-03 00:54:54]


பக்க இலக்கங்களை அழுத்தி எல்லா செய்திகளையும் பார்வையிடவும்