வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



உக்ரைன் போரால் பாதிக்கப்பட்ட குழந்தைகளுடன் திருத்தந்தை

உக்ரைனில் இடம்பெறும் போரால் பாதிக்கப்பட்டு உரோம் நகரின் குழந்தை இயேசு (Bambino Gesu) மருத்துவமனையில் சிகிச்சைப் பெற்றுவரும் சிறார்களை மார்ச் 19, சனிக்கிழமையன்று சென்றுச் சந்தித்தார் திருத்தந்தை பிரான்சிஸ். போரால் பாதிக்கப்பட்ட ஏறக்குறைய 50 குழந்தைகள் சிகிச்சைக்கென உரோம் நகர் குழந்தை இயேசு மருத்துவமனைக்கு வந்துள்ள நிலையில், 19 பேர் அனுமதிக்கப்பட்டு, மீதியுள்ளோர் வெளிநோயாளிகளாகவும் சிகிச்சைப் பெற்று வருகின்றனர். மருத்துவமனையில் அனுமதிக்கப்பட்டிருக்கும் உக்ரைன் குழந்தைகளையும், ஏனையக் குழந்தைகளையும் அவர்கள் சிகிச்சைப் பெற்றுவரும் அறைகளுக்கேச் சென்று சந்தித்து ஆறுதல் கூறிய திருத்தந்தை பிரான்சிஸ் அவர்கள், அவர்களோடு பணியாற்றிவரும் மருத்துவர்களுக்கு தன் நன்றியையும் வெளியிட்டார். ஏற்கனவே, ஆப்கானிஸ்தான் நாட்டை இரஷ்ய துருப்புக்கள் ஆக்ரமித்த காலத்திலும், யூகோஸ்லாவியா போரின்போதும், ருவாண்டாவில் Tutsi, மற்றும் Hutu இன மக்கள் படுகொலைகளின்போதும், பாதிக்கப்பட்ட குழந்தைகளுக்கு சிகிச்சை வழங்கியுள்ள உரோம் நகர் குழந்தை இயேசு மருத்துவமனை, தற்போது உக்ரைன் போரால் பாதிக்கப்பட்ட குழந்தைகளுக்கும் மனிதாபிமான அடிப்படையில் உதவி வருகிறது. வத்திக்கான் நிதியுதவியுடன் இயங்கிவரும் இம்மருத்துவமனை, இனம், மதம், மொழி, நாடு என்ற எவ்வித பாகுபாடுமின்றி, அனைத்துக் குழந்தைகளுக்கும், குறிப்பாக, போரால் பாதிக்கப்பட்ட அனைத்துக் குழந்தைகளுக்கும் மனரீதியான, மற்றும் உடல் ரீதியான சிகிச்சைகளை இலவசமாக வழங்கிவருகிறது. [2022-03-22 22:12:33]


இக்காலத் தேவைகளைப் புரிந்துகொண்டு அவற்றை நிறைவேற்றுங்கள்

Murialdoவின் Josephites என்றழைக்கப்படும் புனித யோசேப்பு துறவு சபை தோற்றுவிக்கப்பட்டதன் 150வது ஆண்டு நிறைவைமுன்னிட்டு, அச்சபையின் தலைவர் அருள்பணி துல்லியோ லொகாத்தெல்லி அவர்களுக்கு நல்வாழ்த்து மடல் ஒன்றை, மார்ச் 19, இச்சனிக்கிழமையன்று அனுப்பியுள்ளார், திருத்தந்தை பிரான்சிஸ். புனித யோசேப்பு துறவு சபை, 1873ம் ஆண்டு மார்ச் 19ம் தேதி, இத்தாலியின் தூரின் நகரில் புனித லெயோநார்ட் முரியால்தோ (Leonard Murialdo) அவர்களால் ஆரம்பிக்கப்பட்டது. கடந்த காலங்களில் புனித யோசேப்பு துறவு சபைக்கு ஆண்டவர் பொழிந்துள்ள ஆசிர்வாதங்களை நினைவுகூர்ந்து, அச்சபையின் தனிவரமாகிய இளையோருக்குக் கல்வி வழங்குவதில் என்றென்றும் புதிய வழிகளைக் காண சக்தியை அருளுமாறு ஆண்டவரிடம் மன்றாடுமாறும் திருத்தந்தை அச்சபையினரைக் கேட்டுக்கொண்டார். புதிய காலத்தில் புதிய பணிகள் புனித லெயோநார்ட் முரியால்தோ புனித லெயோநார்ட் முரியால்தோ காலத்தின் அடையாளங்கள் முன்வைக்கும் சவால்களைப் புரிந்துகொண்டு அவற்றிற்கேற்ப வாழ்வதற்கு, புனித லெயோநார்ட் முரியால்தோ அவர்களின் அடிச்சுவடுகளைப் பின்பற்றுமாறும், புதிய வழிகளைக் காண, படைப்பாற்றல் திறனைப் பயன்படுத்துமாறும் திருத்தந்தை, பரிந்துரைத்தார். புனித முரியால்தோ வாழ்ந்த காலத்தில், அவர் தூரின் நகரில் பிறரன்புச் செயல்கள் வழியாக ஏழை மற்றும், கைவிடப்பட்ட இளையோருக்கு உதவினார், பின்னர், கல்வி மற்றும், தொழிற்கல்வி வழியாக அவர்களுக்கு மாண்புடைய ஒரு வருங்காலத்தை அமைத்துக்கொடுத்தார் என்றுரைத்த திருத்தந்தை, இப்புனிதர் கடவுளின் வல்லமையில் நம்பிக்கை வைத்து இவற்றை ஆற்றினார் என்று கூறினார். புனித யோசேப்பின் ஆன்மீகத்தால் தூண்டப்பட்டு பணியாற்றிய இப்புனிதர், நாம் கடவுளின் கரங்களில் இருக்கிறோம், நாம் நல்ல கரங்களில் இருக்கிறோம் என்று அடிக்கடி சொல்வார் என்றுரைத்த திருத்தந்தை, இச்சபையினர் இக்காலத்தில் உலகெங்கும் நவீன முறையில் இளையோருக்கு உதவிவருவதையும், குடும்பங்கள் மற்றும், மறைக்கல்வி வகுப்புக்களை நடத்தி வருவதையும் பாராட்டிப் பேசினார். இளையோருக்கு எக்காலத்தையும்விட இக்காலத்தில் நம்பகமான சான்றுகள் தேவைப்படுகின்றன என்றுரைத்த திருத்தந்தை, புனித யோசேப்பின் தாழ்மையான பண்பால் வழிநடத்தப்பட அனுமதித்து, காலத்தின் அறிகுறிகளை அறிந்து அதற்கேற்ப பணியாற்ற வேண்டும் என, புனித யோசேப்பு சபையினரைக் கேட்டுக்கொண்டார். ஒவ்வோர் இல்லத்திற்குள்ளும் திருத்தந்தையின் வார்த்தையை நாங்கள் கொணர்வதில் உங்களின் ஆதரவு [2022-03-19 23:27:03]


புனித யோசேப்பு, துறவியர், அருள்பணியாளர்களுக்கு முன்மாதிரிகை

மார்ச் 18, இவ்வெள்ளியன்று ஐரோப்பிய பாராளுமன்றத்தின் மக்கள் கட்சிக் குழுவின் பிரதிநிதிகளையும் திருப்பீடத்தில் சந்தித்த திருத்தந்தை பிரான்சிஸ் அவர்கள், திருப்பீடத்திற்கு, இஸ்பெயின் நாட்டு தூதராகப் பணியாற்ற நியமனம் பெற்றுள்ள புதிய தூதர் María Isabel Celaá Diéguez அவர்களிடமிருந்து நியமனச் சான்றிதழையும் பெற்றுக்கொண்டார். புனித அகுஸ்தீன் துறவு சபையின் பிரதிநிதிகள் மேலும், தங்களின் 56வது பொதுப் பேரவையை நடத்திவரும் புனித அகுஸ்தீன் துறவு சபையின் ஏறத்தாழ ஐம்பது பிரதிநிதிகளை, மார்ச் 17, இவ்வியாழனன்று திருப்பீடத்தில் சந்தித்த திருத்தந்தை பிரான்சிஸ் அவர்கள், புனித யோசேப்பு, துறவியர் மற்றும், அருள்பணியாளர்களுக்கு முன்மாதிரிகை என்ற கருத்தை மையப்படுத்தி, தன் எண்ணங்களை எடுத்துரைத்தார். மார்ச் 19, இச்சனிக்கிழமை புனித யோசேப்பு திருநாள் சிறப்பிக்கப்படும்வேளை, புனித அகுஸ்தீன் சபை பேரவைப் பிரதிநிதிகளைச் சந்தித்து உரையாற்றிய திருத்தந்தை பிரான்சிஸ் அவர்கள், இயேசுவின் வளர்ப்புத் தந்தையான புனித யோசேப்பு, கிறிஸ்தவர்களுக்கு முன்மாதிரிகை மற்றும், அவரது தந்தைக்குரிய இதயத்தாலும், படைப்பாற்றல்மிக்க துணிச்சலாலும் கவரப்படுகின்றனர் என்று கூறினார். ஒன்றிணைந்த பயணம் அவர்கள் வாழ்வுபெறும்பொருட்டு நான் இவ்வுலகிற்கு வந்தேன் என்ற தலைப்பில் இப்பொதுப்பேரவையை நடத்திவரும் பிரதிநிதிகளிடம், இந்நாள்களில் திருஅவை முழுவதும் ஒன்றிணைந்த பயணத்தின் பாதையை மேற்கொண்டுவருகிறது என்றும், நம் கண்களையும், இதயங்களையும் இயேசுவின் மீது பதித்து ஒன்றிணைந்து எப்போதும் முன்னோக்கி நடக்கும் காலம் இது என்றும் திருத்தந்தை எடுத்தியம்பினார். ஒன்றிணைந்த பயணத்திற்கு புனித யோசேப்பை முன்மாதிரியாகக் கொள்வோம் என்றும், அர்ப்பணிக்கப்பட்ட ஒவ்வொரு துறவியும், அருள்பணியாளரும், புனித யோசேப்பு போன்று தந்தையின் இதயத்தைக் கொண்டிருப்பதற்கு அழைக்கப்பட்டுள்ளனர் என்றும் திருத்தந்தை கூறினார். ஒவ்வொரு நாளும் கடவுள் பக்கம் நம்பிக்கையோடு திரும்புவதை நாம் விட்டுவிடக் கூடாது எனவும், அவர் நம் இதயங்களின் ஆசைகளுக்கும் ஏக்கங்களுக்கும் செவிசாய்க்கிறார் எனவும் உரைத்த திருத்தந்தை, புனித யோசேப்பின் படைப்பாற்றல்மிக்க துணிச்சல் பற்றியும் விளக்கினார். [2022-03-19 01:16:57]


இரஷ்யா, உக்ரைன் அர்ப்பணிப்பில் ஆயர்கள் கலந்துகொள்ள அழைப்பு

இம்மாதம் 25ம் தேதி வெள்ளிக்கிழமை உள்ளூர் நேரம் மாலை ஐந்து மணிக்கு, வத்திக்கானின் புனித பேதுரு பசிலிக்காவில், திருத்தந்தை பிரான்சிஸ் அவர்கள் இரஷ்யாவையும் உக்ரைனையும் அன்னை மரியாவின் களங்கமற்ற இதயத்திற்கு அர்ப்பணிக்கும் நிகழ்வு, உலகின் அனைத்துத் தலத்திருவைகளோடு ஒன்றித்து நடைபெறும் என்று, திருப்பீட செய்தித் தொடர்பகத்தின் இயக்குனர் மத்தேயோ புரூனி அவர்கள் அறிவித்துள்ளார். இரஷ்யா மற்றும் உக்ரைனை அன்னை மரியாவுக்கு அர்ப்பணித்து, அமைதிக்காகச் செபிக்கும் இந்நிகழ்வில் உலகின் அனைத்து ஆயர்களும், தங்களின் அருள்பணியாளர்களோடு கலந்துகொள்ளுமாறு திருத்தந்தை அழைப்புவிடுத்துள்ளார் என்றும் புரூனி அவர்கள் தெரிவித்தார். டுவிட்டர் செய்தி நம் அகவாழ்வைப் புதுப்பிப்பதற்கும், அதைப் பேணி வளர்ப்பதற்கும், ஆண்டவரால் நமக்கு வழங்கப்பட்டுள்ள காலம், தவக்காலம் என்று, திருத்தந்தை பிரான்சிஸ் அவர்கள், மார்ச் 18, இவ்வெள்ளியன்று கூறியுள்ளார். “கிறிஸ்துவின் உயிர்ப்புப் பெருவிழாவை நோக்கிய, இறைத்தந்தையிடமிருந்து நாம் பெறுகின்ற வெகுமதியை நோக்கிய பயணத்திற்கு, ஆண்டவரால் நமக்கு வழங்கப்பட்டுள்ள காலம், தவக்காலம் என்றும், தவக்காலம்” என்ற ஹாஷ்டாக்குடன் (#Lent) திருத்தந்தை, தன் டுவிட்டர் செய்தியில் குறிப்பிட்டுள்ளார். உக்ரைனில் அமைதி நிலவ மேலும், உக்ரைனில் அமைதியைக் கொணர்வதற்கு பல்வேறு வழிகளில் முயற்சிகளை மேற்கொண்டுவரும் திருத்தந்தை பிரான்சிஸ் அவர்கள், கிழக்கு ஐரோப்பாவில் இடம்பெற்றுவரும் போரை முடிவுக்குக்கொண்டுவரும் ஒப்பந்தம் ஒன்றை உருவாக்குவது குறித்து, மார்ச் 16, இப்புதனன்று ஜெர்மன் நாட்டு சான்சிலர் Olaf Scholz அவர்களுடன், தொலைபேசி வழியாகக் கலந்துபேசினார் என்று, திருப்பீட செய்தித் தொடர்பகத்தின் இயக்குநர் மத்தேயோ புரூனி அவர்கள் அறிவித்துள்ளார். ஆங்லிக்கன் பேராயர் ஜஸ்டின் வெல்பி மார்ச் 16, இப்புதன் மாலையில், திருத்தந்தை பிரான்சிஸ் அவர்கள், இரஷ்ய ஆர்த்தடாக்ஸ் முதுபெரும்தந்தை கிரில் அவர்களுடன் காணொளி வழியாக உரையாடியபின்னர், இங்கிலாந்தின் ஆங்லிக்கன் கான்டர்பரி பேராயர் ஜஸ்டின் வெல்பி அவர்களும், முதுபெரும்தந்தை கிரில் அவர்களோடு, உக்ரைனில் அமைதியைக் கொணர்வதன் உடனடித் தேவை குறித்து கலந்துரையாடியுள்ளார். போரும் வன்முறையும், பிரச்சனைகளுக்கு ஒருபோதும் தீர்வாக அமையாது என்று பேராயர் வெல்பி அவர்கள், முதுபெரும்தந்தை கிரில் அவர்களிடம் வலியுறுத்திக் கூறியுள்ளார். [2022-03-19 01:13:21]


உக்ரைன் சிறாரின் இரத்தமும் கண்ணீரும் மனச்சான்றை உலுக்குகின்றன

உக்ரைனில் இடம்பெற்றுவரும் போரால் உருவாகியுள்ள மிகப்பெரும் மனிதாபிமானப் பெருந்துயர் குறித்து கவலை தெரிவித்துள்ள அதேவேளை, போர், அரசியல் மற்றும், மனித சமுதாயத்தின் தோல்வி என்று கூறியுள்ளார், திருத்தந்தை பிரான்சிஸ். சுலோவாக்கியா நாட்டின் பிராட்டிஸ்லாவா நகரில், மார்ச் 17, இவ்வியாழனன்று ஐரோப்பிய ஆயர் பேரவைகளின் அவை, ஐரோப்பிய ஒன்றிய நாடுகளின் ஆயர் பேரவைகள் கூட்டமைப்புடன் இணைந்து தொடங்கியுள்ள, மூன்றாவது ஐரோப்பிய கத்தோலிக்க சமுதாய நாள்கள் என்ற கருத்தரங்கத்திற்கு அனுப்பியுள்ள செய்தியில் இவ்வாறு கூறியுள்ளார், திருத்தந்தை பிரான்சிஸ். போரின் பெருந்துயர் CCEE எனப்படும் ஐரோப்பிய ஆயர் பேரவைகள் அவையின் தலைவரான, வில்னியுஸ் பேராயர் Gintaras Grušas அவர்களுக்கு மார்ச் 18, இவ்வெள்ளியன்று வாழ்த்துக்கூறி அனுப்பியுள்ள செய்தியில், உக்ரைன் சிறாரின் இரத்தமும் கண்ணீரும் நம் மனச்சான்றை உலுக்குகின்றன என்று திருத்தந்தை பிரான்சிஸ் அவர்கள் குறிப்பிட்டுள்ளார். நாம் இந்நாள்களில் எதிர்கொண்டுவரும் துயரநிகழ்வுகள், கோவிட்-19 பெருந்தொற்று முடிவுற்றபின்னர் நாம் எதிர்பார்த்தவை அல்ல என்றும், தற்போது ஐரோப்பாவின் இதயத்தில் இடம்பெற்றுவரும் போர் நம்மை வியப்புக்குள்ளாக்கியுள்ளது என்றும், கடந்த நூற்றாண்டில் நாம் எதிர்கொண்ட பெரும் போர்களின் அழிவுகளை மீண்டும் காண்போம் என்று, ஒருபோதும் நாம் நினைத்ததே கிடையாது என்றும் திருத்தந்தை கூறியுள்ளார். போருக்கு அஞ்சி நாட்டைவிட்டு வெளியேறும் ஏராளமான மக்களை வரவேற்று, பாதுகாப்பு அளிப்பதில், ஐரோப்பிய நாடுகள் ஒன்றிணையவேண்டியதன் முக்கியத்துவத்தை வலியுறுத்திக் கூறியுள்ள திருத்தந்தை, ஐரோப்பாவின் சுவர்கள், நுழைவாயில்களாக மாறவேண்டும் என்று கேட்டுக்கொண்டுள்ளார். உக்ரைன் நாட்டு நம் சகோதரர் சகோதரிகள் எழுப்புகின்ற அழுகுரல்கள் உதவிக்காக விண்ணப்பிக்கின்றன என்றும், நாம் அவர்களோடு சேர்ந்து அழுவதோடு, அவர்களுக்கு ஏதாவது உதவிகள் ஆற்றவேண்டும் என்றும் கேட்டுக்கொண்டுள்ள திருத்தந்தை, அதிகாரத்தைத் தவறாகப் பயன்படுத்தல், மற்றும், வீணான ஆதாயநோக்கால், மனித சமுதாயம் மீண்டுமொருமுறை அச்சுறுத்தப்பட்டுள்ளது என்பதையும் சுட்டிக்காட்டினார். “பெருந்தொற்றுக்கு அப்பால் உள்ள ஐரோப்பா: புதியதொரு துவக்கம்” என்ற தலைப்புடன், நடைபெற்றுவரும் இந்த நான்கு நாள் கருத்தரங்கம், மார்ச் 20, வருகிற ஞாயிறன்று நிறைவடையும். இந்த தலைப்பு பற்றியும் தன் செய்தியில் குறிப்பிட்டுள்ள திருத்தந்தை பிரான்சிஸ் அவர்கள், ஐரோப்பிய சமுதாயத்தில் இடம்பெற்றுவரும் மாற்றங்கள் குறித்து சிந்திப்பதற்கு இது அழைப்புவிடுக்கிறது என்று கூறி, உடன்பிறப்பு உணர்வுநிலை வளரவேண்டுமென்ற தன் ஆவலையும் வெளிப்படுத்தியுள்ளார். [2022-03-19 01:05:44]


உக்ரைன் சிறாருக்காக திருத்தந்தை இறைவேண்டல்

மார்ச் 16, இப்புதன் உள்ளூர் நேரம் காலை 8.30 மணிக்கு, வத்திக்கான் புனித பேதுரு பெருங்கோவிலில், மிலான் நகரின் தொழிற்பயிற்சிப் பள்ளி ஒன்றின் ஏறத்தாழ இரண்டாயிரம் இளையோரைச் சந்தித்த திருத்தந்தை பிரான்சிஸ் அவர்கள், அம்மாணவர்களோடு சேர்ந்து உக்ரைன் நாட்டுச் சிறாருக்காகச் செபித்தார். திருத்தந்தை புனித ஆறாம் பவுல் அரங்கத்தில் அமர்ந்திருந்த ஆயிரக்கணக்கான திருப்பயணிகளுக்கு புதன் பொதுமறைக்கல்வி வழங்குவதற்குமுன்னர், மிலான் நகரின் “La Zolla“ பள்ளியின் இளையோரைச் சந்தித்த திருத்தந்தை, உக்ரைன் நாட்டை, போர் தொடர்ந்து அழித்துவரும்வேளை, குண்டுவீச்சுக்களுக்கு மத்தியில் வாழ்ந்துவரும் உக்ரைன் நாட்டுச் சிறாருக்காகச் செபித்தார். ஆண்டவராகிய இயேசுவே, வயதுவந்தோரின் ஆணவத்திற்குப் பலியாகும் உக்ரைன் நாட்டுச் சிறாரை கண்ணோக்கும், அவர்களை ஆசிர்வதித்தருளும், மற்றும், பாதுகாத்தருளும் என்று செபித்த திருத்தந்தை, போரை எதிர்கொள்கின்ற, அதனால் துயருறுகின்ற மற்றும், சாப்பிட உணவின்றி, கட்டாயமாகத் தங்கள் வீடுகள், உடைமைகள் என அனைத்தையும் விட்டுவிட்டு வெளியேறுகின்ற சிறுவர் சிறுமியரை நினைத்துப் பாருங்கள் என்று, “La Zolla“ பள்ளியின் இளையோரிடம் கூறினார். உங்களுக்கு வருங்காலம் ஒன்று உள்ளது, அமைதியான ஒரு சமுதாயத்தில் வாழ்கிறீர்கள், ஆனால், உக்ரைன் சிறார், குண்டுகளிலிருந்து தப்பிப்பதற்காக கடுங்குளிருக்கு மத்தியில் வீடுகளைவிட்டு வெளியேறியுள்ளனர் எனவும், மிலான் பள்ளி மாணவர்களிடம் திருத்தந்தை கூறினார். மேலும், மார்ச் 16, இப்புதன் மறைக்கல்வியுரையை நிறைவுசெய்த திருத்தந்தை பிரான்சிஸ் அவர்கள், ஆண்டவரே போருக்காக எங்களை மன்னியும் என்ற தலைப்பில், நேப்பிள்ஸ் பேராயர் Domenico Battaglia அவர்கள் எழுதிய இறைவேண்டலோடு தனது கருத்தையும் இணைத்துச் செபிப்பதாகக் கூறினார். [2022-03-16 22:31:33]


அமல அன்னையின் மாசற்ற இதயத்திற்கு அர்ப்பணம்

இரஷ்யா மற்றும் உக்ரைன் நாடுகளை அமல அன்னையின் மாசற்ற இதயத்திற்கு அர்ப்பணிக்கும் நிகழ்வொன்றை நடத்தவிருக்கிறார் திருத்தந்தை பிரான்சிஸ். மார்ச் 25, இம்மாதம் வெள்ளிக்கிழமையன்று, மாலை 5 மணியளவில் புனித பேதுரு பெருங்கோவிலில் நடைபெறவிருக்கும் பாவ மன்னிப்பு வழிபாட்டில், உக்ரைன் மற்றும் இரஷ்யாவை, அமல அன்னையின் மாசற்ற இதயத்திற்கு அர்ப்பணிக்கும் நிகழ்வொன்றை திருத்தந்தை பிரான்சிஸ் அவர்கள் நடத்தவிருப்பதாகத் திருப்பீடச் செய்தித் தொடர்பகம் தெரிவித்துள்ளது. மேலும், திருத்தந்தையின் சிறப்புத் தூதராக அனுப்பப்படும் கர்தினால் Konrad Krajewski அவர்கள் இந்நிகழ்வை அதேநேரத்தில், போர்த்துக்கல் நாட்டு பாத்திமாவில் நிகழ்த்துவார் என்றும் திருப்பீடச் செய்தித் தொடர்பகத்தின் இயக்குநர் Matteo Bruni அவர்கள் தெரிவித்துள்ளார். உக்ரைன் மற்றும் இரஷ்யாவை, அமல அன்னையின் இதயத்திற்கு அர்ப்பணிக்கும் இந்நிகழ்வானது மார்ச் 25, வெள்ளிக்கிழமையன்று ஆண்டவருடைய பிறப்பு அறிவிப்புப் பெருவிழாவன்று நடைபெறுவது மிகவும் பொருத்தமானதாக அமைந்துள்ளதாகவும் திருப்பீடச் செய்தித் தொடர்பகம் தெரிவிக்கிறது. 1942ம் ஆண்டு அக்டோபர் மாதம் 31ம் தேதி திருத்தந்தை 12ம் பயஸ் அவர்கள் உலகம் முழுவதையும், 1952ம் ஆண்டு ஜூலை 7ம் தேதி இரஷ்ய மக்கள் அனைவரையும் புனித அமல அன்னையின் மாசற்ற இதயத்திற்கு அர்ப்பணித்தார். 1964ஆம் ஆண்டு நவம்பர் 21ஆம் தேதி, இரண்டாம் வத்திக்கான் பொதுச்சங்கத் தந்தையர் முன்னிலையில், திருத்தந்தை புனித ஆறாம் பால் அவர்கள், அமல அன்னையின் மாசற்ற இதயத்திற்கு இரஷ்ய மக்கள் அர்ப்பணிக்கப்பட்டதை மீண்டும் புதுப்பித்தார். [2022-03-16 22:27:02]


தவக்காலம், தேவையில் இருப்போரைத் தேடிச்சென்று உதவ...

தவக்காலம், தேவையில் இருப்போரைத் தேடிச்சென்று, அவர்களின் உடல், உள்ளத் தேவைகளை நிறைவேற்றுவதற்கு ஏற்ற காலம் என்று, திருத்தந்தை பிரான்சிஸ் அவர்கள், மார்ச் 15, இச்செவ்வாயன்று தன் டுவிட்டர் பக்கத்தில் பதிவுசெய்துள்ள குறுஞ்செய்தி ஒன்றில் கூறியுள்ளார். தவக்காலம் (#Lent) என்ற ஹாஷ்டாக்குடன் திருத்தந்தை வெளியிட்டுள்ள டுவிட்டர் செய்தியில், “உதவி தேவைப்படுவோரைக் கண்டு விலகிச் செல்லாமல் அவர்களைத் தேடிச் சென்று, அவர்களுக்குப் பரிவன்போடு செவிமடுக்கவும், நல்ல வார்த்தைகளைக் கூறவும், தனிமையில் இருப்போரைப் பறக்கணியாமல் அவர்களைச் சந்திக்கவும் ஏற்ற காலம் தவக்காலம்” என்ற வார்த்தைகள் பதிவாகியிருந்தன. பேராயர் வின்சென்சோ பாலியா மேலும், உக்ரைனில் இடம்பெற்றுவரும் போர் குறித்து வத்திக்கான் செய்தித்துறையிடம் பேசிய, திருப்பீட வாழ்வுக் கழகத்தின் தலைவரான பேராயர் வின்சென்சோ பாலியா அவர்கள், உக்ரைனில் போர் முடிவுக்கு வரவேண்டும் மற்றும், அட்லாண்டிக் பெருங்கடல் முதல், Ural பகுதி வரை, அனைவரையும் அணைத்துக்கொள்ளும் ஐரோப்பாவின் வருங்காலம் குறித்து சிந்திக்கவேண்டும் என்று கூறினார். அனைவரின் உரிமைகள் மதிக்கப்படும் நியாயமான ஓர் அரசியல் தீர்வு எட்டப்படவேண்டும் என்றும், ஆயுதங்களும் போரும் நம் பிரச்சனைகளைத் தீர்ப்பதற்குரிய கருவிகளாக ஒருபோதும் உதவாது என்றும், பேராயர் பாலியா அவர்கள் எடுத்துரைத்தார் [2022-03-15 22:52:57]


கிறிஸ்தவ ஒன்றிப்பு, மனித சமுதாயம் என்ற கடல்மீது பயணிக்கிறது

கிறிஸ்தவ ஒன்றிப்பை மையப்படுத்தி, ஒப்புரவாக்கப்பட்ட பன்மைத்தன்மை என்ற தலைப்பில், Presbyterian கிறிஸ்தவ சபை திருப்பணியாளர் Marcelo Figueroa அவர்கள் எழுதிய நூலுக்கு அணிந்துரை எழுதியுள்ள திருத்தந்தை பிரான்சிஸ் அவர்கள், அந்நூல் ஆசிரியரின் கிறிஸ்தவ ஒன்றிப்பு குறித்த கண்ணோட்டத்தைப் பாராட்டியுள்ளார். இந்த இலக்கியப் படைப்பை மிகுந்த மகிழ்ச்சியோடு பெற்றுக்கொள்கிறேன் எனவும், இந்நூலைப் பார்த்தவுடனேயே, இது மதங்களுக்கு இடையே இடம்பெறும் உரையாடல் பற்றிய நூலாகத் தெரிகின்றது, ஆனால், இந்நூலை ஆழ்ந்து வாசிக்கும்போது, இது ஓர் உண்மையான, தனிப்பட்ட, எல்லாவற்றிற்கும் மேலாக ஆன்மீகம் சார்ந்த, கிறிஸ்தவ ஒன்றிப்பு திருப்பயணமாக அமைந்திருப்பதை உணர முடிகின்றது எனவும் திருத்தந்தை குறிப்பிட்டுள்ளார். 2016ம் ஆண்டிலிருந்து லொசர்வாத்தோரே ரொமானோ வத்திக்கான் நாளிதழில், பல்வேறு கிறிஸ்தவ சபைகளுக்கு இடையே இடம்பெறும் கிறிஸ்தவ ஒன்றிப்புப் பயணம் குறித்து Marcelo Figueroa அவர்கள் எழுதிய பல்வேறு கட்டுரைகளின் தொகுப்பாக இந்நூல் வெளிவந்துள்ளது. Marcelo அவர்கள் எழுதும் கட்டுரைகளை, எப்போதும் கவனத்தோடு வாசிப்பேன் என்றும், அவை கிறிஸ்தவ ஒன்றிப்புப் பாதையை நோக்குவதற்கு தனக்கு உதவுகின்றது என்பதால், அவற்றைத் தொடர்ந்து வாசிப்பேன் என்றும், திருத்தந்தை தன் அணிந்துரையில் குறிப்பிட்டுள்ளார். Marcelo Figueroa அவர்கள், வத்திக்கானின் தினத்தாளான லொசர்வாத்தோரே ரொமானோ (L’Osservatore Romano) அர்ஜென்டீனாவில் பிரசுரிக்கப்படும் பொறுப்பை ஏற்று நடத்துபவர் ஆவார். அர்ஜென்டீனா நாட்டைச் சேர்ந்த, Marcelo Figueroa அவர்கள் எழுதியுள்ள Reconciled Diversity: A Protestant in the Pope’s Newspaper என்ற நூல், மார்ச் 14 இத்திங்களன்று விற்பனைக்கு வந்துள்ளது. வத்திக்கான் பதிப்பகம் இந்நூலை வெளியிட்டுள்ளது. [2022-03-15 22:47:55]


உக்ரைனில் புலம்பெயர்ந்தோருடன் இந்திய அருள்சகோதரி

உக்ரைனில் மக்களை மரணத்திலிருந்து காப்பாற்றுவதற்கு, கடவுள் என்னை ஒரு கருவியாகப் பயன்படுத்துகிறார் என்று, அந்நாட்டில் கடந்த இருபது ஆண்டுகளாக மறைப்பணியாற்றிவரும் இந்திய அருள்சகோதரி Ligy Payyappilly அவர்கள் ஆசியச் செய்தியிடம் கூறியுள்ளார். உக்ரைன் நாட்டின் மேற்கிலுள்ள Mukachevo நகரில் பணியாற்றுகின்ற, புனிதர்கள் யோவான், மற்றும் மாற்கு அருள்சகோதரிகள் சபையைச் சார்ந்த அருள்சகோதரி Ligy அவர்கள், இந்நகர் வழியாக சுலோவாக்கியா, ஹங்கேரி, ருமேனியா ஆகிய நாடுகளுக்குப் புலம்பெயரும் உக்ரைன் மக்களுக்கு உதவி வருவதாகக் கூறியுள்ளார். தனது சபையின் 17 அருள்சகோதரிகளோடு சேர்ந்து புலம்பெயர்ந்தோருக்கு உதவிவரும் 48 வயது நிரம்பிய அருள்சகோதரி Ligy அவர்கள், தாங்கள் பாதுகாப்பாக இருப்பதாகவும், காவல்துறை மிகப்பெரிய பணியை ஆற்றுவதாகவும், இந்திய மாணவர்களில் பலர் நாட்டிற்குத் திரும்பிவிட்டதாகவும் தெரிவித்துள்ளார். 1845ம் ஆண்டில் பிரான்சில் அருள்பணி Pierre Paul Blanck அவர்களால் புனிதர்கள் யோவான், மற்றும் மாற்கு அருள்சகோதரிகள் சபை ஆரம்பிக்கப்பட்டது. கேரளாவைச் சேர்ந்த அருள்சகோதரி Ligy அவர்கள், Mukachevo கன்னியர் இல்லத்தின் தலைவராகப் பணியாற்றுகின்றார். (AsiaNews) உலகளாவிய சட்டம் மீறப்படுவதை தடுக்க நடவடிக்கை உக்ரைன் நாட்டை இரஷ்யா ஆக்ரமித்திருக்கும் இவ்வேளையில், அந்நடவடிக்கையால் பாதிக்கப்பட்டுள்ள மக்களுக்கு ஆதரவு வழங்குவதில், ஐ.நா.வின் உறுப்பு நாடுகள், தங்களின் ஒத்துழைப்பையும் ஒருமைப்பாட்டையும் ஒன்றிணைந்து வெளிப்படுத்துமாறு, ஐ.நா.வின் தலைமை பொதுச் செயலர் அந்தோனியோ கூட்டேரஸ் அவர்கள் கேட்டுக்கொண்டுள்ளார். உக்ரைனில் இடம்பெறும் போரில் உலகளாவிய சட்டம் மீறப்படுவதை தடுப்பதற்கும் ஐ.நா.வின் உறுப்பு நாடுகள், தங்களின் ஒத்துழைப்பையும் ஒருமைப்பாட்டையும் வழங்குமாறும், கூட்டேரஸ் அவர்கள் ஐ.நா. பொது அவையில், மார்ச் 10, இவ்வியாழனன்று விண்ணப்பித்துள்ளார். (UN) [2022-03-15 22:43:29]


பக்க இலக்கங்களை அழுத்தி எல்லா செய்திகளையும் பார்வையிடவும்