வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



வாழ்வு புனிதமானது, கருணைக்கொலைக்கு மறுப்பு

மருத்துவப் பணிகளில் ஒவ்வொரு மனிதரின் மாண்பும், வாழ்வும் ஊக்குவிக்கப்பட வேண்டும், குணமாக்க முடியாத நிலையில் உள்ளவர்களையும்கூட, கருணைக்கொலைச் செய்வதற்கு எவ்விதத்திலும் உடன்படக் கூடாது மேரி தெரேசா: வத்திக்கான் செய்திகள் உலகில் ஒவ்வொருவரும் தங்களின் உடல்நலனைப் பாதுகாத்து பேணுவதற்கு உதவுவதற்கென, தகுந்த சகிச்சைகள் வழங்கப்படுவதில் ஒத்துழைப்பை உறுதிசெய்வதற்கு தோழமையுணர்வு மற்றும், அரசின் கொள்கைகளால் முயற்சிகள் எடுக்கப்படும் என்ற தனது நம்பிக்கையை வெளியிட்டுள்ளார், திருத்தந்தை பிரான்சிஸ். வருகிற பிப்ரவரி மாதம் 11ம் தேதி சிறப்பிக்கப்படும், 28வது நோயாளர் உலக நாளுக்கென, சனவரி 3, இவ்வெள்ளியன்று செய்தி வெளியிட்டுள்ள திருத்தந்தை பிரான்சிஸ் அவர்கள், நிதி குறித்த கவலையில், சமுதாய நீதி புறக்கணிக்கப்படக் கூடாது என, உலகிலுள்ள அனைத்து நலவாழ்வு நிறுவனங்கள் மற்றும், அரசுத் தலைவர்களை விண்ணப்பிப்பதாகக் கூறியுள்ளார். “பெருஞ்சுமை சுமந்து சோர்ந்திருப்பவர்களே, எல்லாரும் என்னிடம் வாருங்கள், நான் உங்களுக்கு இளைப்பாறுதல் தருவேன்” (மத்.11:28) என்ற இயேசு கிறிஸ்துவின் அருள்வாக்கை மையப்படுத்தி, இச்செய்தியை வெளியிட்டுள்ள திருத்தந்தை, கிறிஸ்துவின் இச்சொற்கள், புண்பட்டுள்ள மற்றும், துன்புறும் மக்களுடன், அவரின் தோழமையுணர்வை வெளிப்படுத்துகின்றன என்று கூறியுள்ளார். இயேசு எவரையும் ஒதுக்காமல், அவர்களின் உடல்நல நிலைகளுடன், அனைவரையும் முழுமையாக அணைத்துக் கொள்கிறார் என்றும், இவர்கள் நோய்களால் உடல் அளவில் மட்டுமன்றி, உறவு, அறிவு, பாசம், ஆன்மீகம் போன்ற எல்லா நிலைகளிலும் துன்புறுகின்றனர் என்றும், இதனால், நோயாளிகள் தங்களுக்கு மருத்துவ சிகிச்சை வழங்கப்படுவதோடு, தங்கள் மீது அக்கறை காட்டப்பட வேண்டுமென எதிர்பார்க்கின்றனர் என்றும் எடுத்துரைத்துள்ளார். நோயாளிகளுடன் அவர்களின் குடும்பங்களும் துன்புறுகின்றன, அதனால் அக்குடும்பங்களுக்கும் ஆதரவும், ஆறுதலும் அவசியம் எனவும், நோயாளிகள் எல்லாருமே, ஒருவிதத்தில், “பெருஞ்சுமை சுமந்து சோர்ந்திருப்பவர்கள்தான்” எனவும் கூறியுள்ள திருத்தந்தை, திருஅவை இவர்களுக்கு, அதிகமதிகமாக நல்ல சமாரியராக மாறுவதற்கு விரும்புகின்றது என்றும் குறிப்பிட்டுள்ளார். மருத்துவத்துறைப் பணியாளர்கள் மருத்துவப் பணியாளர்கள் மற்றும், நோயாளிகளுக்கு உதவுகின்ற தன்னார்வலர்கள் எல்லாருக்கும் நன்றி கூறிய திருத்தந்தை பிரான்சிஸ் அவர்கள், நோய்கள் பற்றிய ஆய்வு, சிகிச்சை, மறுவாழ்வு போன்ற அனைத்திலும் மனிதர் என்பதற்கு முன்னுரிமை வழங்கப்பட வேண்டும் என வலியுறுத்தியுள்ளார். கருணைக்கொலைக்கு மறுப்பு மருத்துவப் பணிகளில் ஒவ்வொரு மனிதரின் மாண்பும், வாழ்வும் ஊக்குவிக்கப்பட வேண்டும், குணமாக்க முடியாத நிலையில் உள்ளவர்களையும்கூட, கருணைக்கொலைச் செய்வதற்கும், மருத்துவர் உதவியுடன் செய்யப்படும் தற்கொலைக்கும் எவ்விதத்திலும் உடன்படக் கூடாது என்று கேட்டுக்கொண்ட திருத்தந்தை, வாழ்வு புனிதமானது, அது கடவுளுக்கு உரியது, அது மீறப்பட முடியாதது, எனவே வாழ்வை, தன்விருப்பத்துடன் முடித்துக்கொள்ள எவருக்கும் உரிமை கிடையாது என்பதை வலியுறுத்தியுள்ளார். மனித வாழ்வு, தாயின் கருவில் உருவானது முதல், இயற்கையான மரணம் அடையும்வரை, பாதுகாக்கப்பட வேண்டும், மருத்துவத் துறையில் பணியாற்றுகின்றவர்கள், கிறிஸ்தவப் பிறரன்பால் உந்தப்பட்டு, வாழ்வதற்குள்ள உண்மையான மனித உரிமையைப் பாதுகாப்பதற்கு உழைக்க வேண்டும் என்று திருத்தந்தை வலியுறுத்தினார். மருத்துவப் பணியாளர்கள் தாக்கப்படுதல் போர்கள் மற்றும், வன்முறைச் சூழல்கள் சிலவற்றில், மருத்துவப் பணியாளர்கள் தாக்கப்படுகின்றனர், சில பகுதிகளில், அரசியல் அதிகாரிகள் தங்களின் ஆதாயங்களுக்காக, மருத்துவக் கவனிப்புக்களைத் தடுக்க முயற்சிக்கின்றனர், இவ்வாறு, மருத்துவத் துறையினரின் நியாயமான சுதந்திரத்தைக் கட்டுப்படுத்துகின்றனர், இப்பணியாளர்கள் தாக்கப்படுகையில் அதுபற்றி எவரும் கவலைப்படாமலும் இருக்கின்றனர் என்றும் திருத்தந்தையின் செய்தி கூறுகிறது. வறுமையில் வாழ்கின்ற காரணத்தால், மருத்துவ உதவிகள் கிடைக்காமல் உலகெங்கும் துன்புறும் பல சகோதரர் சகோதரிகளை, இந்த 28வது நோயாளிகள் உலக நாளில் நினைத்துப் பார்க்கிறேன் என்று குறிப்பிட்டுள்ள, திருத்தந்தை பிரான்சிஸ் அவர்கள், இக்காரணத்தால், நிதி குறித்த கவலையில், இவர்களுக்கு சமுதாய நீதி புறக்கணிக்கப்படக் கூடாது என, உலகிலுள்ள அனைத்து நலவாழ்வு நிறுவனங்கள் மற்றும், அரசுத் தலைவர்களை விண்ணப்பிப்பதாகக் கூறியுள்ளார். புனித திருத்தந்தை 2ம் ஜான் பால் அவர்களால், கத்தோலிக்கத் திருஅவையில் 1992ம் ஆண்டு மே மாதம் 13ம் தேதி உருவாக்கப்பட்ட நோயாளிகள் உலக நாள், 1993ம் ஆண்டு பிப்ரவரி 11ம் தேதி லூர்து அன்னை திருநாளன்று முதல் முறையாக சிறப்பிக்கப்பட்டது. அதைத் தொடர்ந்து ஒவ்வோர் ஆண்டும் பிப்ரவரி 11ம் தேதி, இந்த உலக நாள் சிறப்பிக்கப்பட்டு வருகிறது. டுவிட்டர் மேலும், “பெருஞ்சுமை சுமந்து சோர்ந்திருப்பவர்களே, எல்லாரும் என்னிடம் வாருங்கள், நான் உங்களுக்கு இளைப்பாறுதல் தருவேன்” (மத்.11:28). 28வது உலக நோயாளிகள் நாளுக்குச் செய்தி என்ற சொற்கள், திருத்தந்தையின் டுவிட்டர் செய்தியிலும் இடம்பெற்றுள்ளன. [2020-01-04 01:56:49]


கர்தினால் Grech அவர்களுக்கு திருத்தந்தையின் இறுதி மரியாதை

"அன்னை மரியாவிடமிருந்து, மென்மையின் புரட்சி ஆரம்பமானது. குழந்தை இயேசுவைக் காணும் திருஅவை, அந்தப் புரட்சியைத் தொடர அழைக்கப்பட்டுள்ளது" - திருத்தந்தையின் டுவிட்டர் [2020-01-04 01:51:23]


'மரியா, இறைவனின் தாய்' பெருவிழா - திருத்தந்தையின் மறையுரை

இன்றைய உலகில் பெண்மையும், தாய்மையும் பல்வேறு கொடுமைகளுக்கு உள்ளாக வேண்டியுள்ளது. பெண்களுக்கு எதிராக நிகழும் வன்முறைகள், பெண்ணிடமிருந்து பிறந்த கடவுளுக்கு எதிரான குற்றம் – திருத்தந்தை பிரான்சிஸ் ஜெரோம் லூயிஸ் - வத்திக்கான் செய்திகள் 'மரியா, இறைவனின் தாய்' பெருவிழாவான, சனவரி 1, இவ்வியாழன் காலை 10 மணிக்கு, புனித பேதுரு பெருங்கோவிலில் திருத்தந்தை பிரான்சிஸ் அவர்கள், திருப்பலியை தலைமையேற்று நடத்தினார். இத்திருப்பலியில், திருத்தந்தை வழங்கிய மறையுரையின் சுருக்கத்திற்கு இப்போது செவிமடுப்போம்: மறையுரை சுருக்கம் "காலம் நிறைவேறியபோது, கடவுள் தம் மகனை, பெண்ணிடம் பிறந்தவராக அனுப்பினார்." (கலா. 4:4). ஒரு பெண்ணின் உதரத்தில் கருவாகத் தோன்றி, ஒவ்வொரு நாளாக, ஒவ்வொரு மாதமாக வளர்ச்சியடைந்ததன் வழியே, இறைவன் மனிதத்தை முழுமையாக ஏற்றுக்கொண்டார். நம் இறைவனில் மனிதரின் சதை உள்ளது! இறைவனுக்கும், மனிதருக்கும் இடையே நிகழ்ந்த இந்த திருமண உறவை, ஆண்டின் முதல் நாளன்று நாம் கொண்டாடுகிறோம். பெண்ணிடம் பிறந்தவர். மனிதம் மீண்டும் பிறந்தது, பெண்ணிடமிருந்து துவங்கியது. பெண்கள், வாழ்வின் ஊற்றுகள். எனினும், அவர்கள் தொடர்ந்து, அடிபட்டு, பாலின வல்லுறவுக்கு உட்பட்டு, கருவில் வளரும் குழந்தையைக் கொல்வதற்கு கட்டாயப்படுத்தப்பட்டு வருகின்றனர். இன்றைய உலகில் பெண்மையும், தாய்மையும் பல்வேறு கொடுமைகளுக்கு உள்ளாக வேண்டியுள்ளது. பெண்களுக்கு எதிராக நிகழும் வன்முறைகள், பெண்ணிடமிருந்து பிறந்த கடவுளுக்கு எதிரான குற்றம். பெண்ணிடம் பிறந்தவர். வாழ்வைப் பேணிக்காக்கும் பண்பு, பெண்களுக்கு அதிகம் உண்டு. வாழ்வின் அனைத்து அம்சங்களையும் அவர்கள் உள்ளத்தில் ஏந்துவதால், அவர்களால் வாழ்வைப் பேணவும், காக்கவும் முடிகிறது. இதையே இன்று நற்செய்தியில் நாம் கேட்டோம். "மரியா இந்நிகழ்ச்சிகளையெல்லாம் தம் உள்ளத்தில் இருத்திச் சிந்தித்துக் கொண்டிருந்தார்." (லூக். 2:19) உள்ளத்தில் இருத்துவது எப்போதும் மகிழ்வைத் தருவது அல்ல, இருந்தாலும், மரியா அதை தன் பழக்கமாகக் கொண்டிருந்தார். அதனால், அவரால் வாழ்வை பேணிக்காக்க முடிந்தது. புத்தாண்டினை துவங்கும் இவ்வேளையில், நாம் நம்மையே இக்கேள்வி கேட்போம்: "என்னால், பிறரை என் உள்ளத்தால் பார்க்க முடிகிறதா? அவர்கள் மேல் அக்கறை கொள்ள முடிகிறதா? அனைத்திற்கும் மேலாக, ஆண்டவரை என் உள்ளத்தின் மையமாகக் கொண்டிருக்க முடிகிறதா?" வாழ்வின் மீது நமக்கு அக்கறை இருந்தால் மட்டுமே, அதை எவ்விதம் உள்ளத்தில் இருத்தி பாதுகாக்க முடியும் என்பதை அறிந்துகொள்வோம். அப்போதுதான், உலகில் நிலவும் அக்கறையற்ற நிலை மாறி, மற்றவர்களைப் பாதுகாக்கும் பண்பு வளரும். அமைதியின் இளவரசர், ஒரு பெண்ணிடமிருந்து பிறந்தார். பெண், அமைதியை மற்றவர்களுக்கு வழங்கும் வழியாக விளங்குகிறார். நம்பிக்கை கொண்ட அனைவரையும் இணைக்கும் இறைவனின் தாயை நாடி வந்திருக்கிறோம். ஓ அன்னையே, எங்கள் உள்ளங்களில் நம்பிக்கையை உருவாக்கும். ஒற்றுமையைக் கொணரும். மீட்பின் வாயிலாக விளங்கும் அன்னையே, இந்த ஆண்டினை உம்மிடம் நாங்கள் ஒப்படைக்கிறோம். அதை உமது உள்ளத்தில் இருத்தும். உம்மை நாங்கள் இறைவனின் அன்னையே, இறைவனின் அன்னையே, இறைவனின் அன்னையே என்று வாழ்த்துகிறோம்! [2020-01-02 01:21:37]


வன்முறைக்கு பலியானோருக்காக அனைவரும் செபிக்க அழைப்பு

Mogadishu நகரில் தற்கொலை குண்டுவெடிப்புத் தாக்குதலில் உயிரிழந்துள்ளோர் குறித்து தன் ஆழ்ந்த கவலையை வெளியிட்ட திருத்தந்தை கிறிஸ்டோபர் பிரான்சிஸ் - வத்திக்கான் செய்திகள் சொமாலியாவின் Mogadishu நகரில், இச்சனிக்கிழமையன்று நிகழ்ந்த, தற்கொலை குண்டுவெடிப்புத் தாக்குதலில் ஏறத்தாழ 90 பேர் உயிரிழந்துள்ளது குறித்து, தன் ஆழ்ந்த கவலையை வெளியிட்டார் திருத்தந்தை பிரான்சிஸ். இஞ்ஞாயிறு நண்பகல் மூவேளை செப உரைக்குப்பின் சொமாலியா தாக்குதல் குறித்து தன் கவலையை வெளியிட்ட திருத்தந்தை, இந்த தீவிரவாத தாங்குதலுக்கு பலியானோர், மற்றும், காயமடைந்தோருடன் தான் செபத்தால் ஒன்றித்திருப்பதாகக் கூறினார். இறந்தோர், மற்றும், காயமுற்றோரின் குடும்ப அங்கத்தினர்களுடன் தான் மிக நெருக்கமாக இருப்பதாக உரைத்த திருத்தந்தை பிரான்சிஸ் அவர்கள், பலியானோர், மற்றும், பாதிக்கப்பட்டோருக்காக அனைவரும் செபிக்குமாறு அழைப்புவிடுத்து, புனித பேதுரு பெருங்கோவில் வளாகத்தில் கூடியிருந்த அனைவரோடும் இணைந்து, 'அருள்நிறை மரியே' என்ற செபத்தை செபித்தார். சொமாலியாவின் தென்பகுதியை, தலைநகர் Mogadishuவுடன் இணைக்கும் பகுதியில் உள்ள சோதனைச் சாவடியின் மீது, வெடிகுண்டு ஏற்றிய காரைக் கொண்டு மோதியதில், இதுவரை 90 பேர் உயிரிழந்துள்ளனர், நூற்றுக்கும் மேற்பட்டோர் காயமடைந்துள்ளனர். இச்சனிக்கிழமையன்று காலையில் இடம்பெற்ற இத்தாக்குதலில், பல்கலைக்கழக மாணவர்களும், இராணுவ வீரர்களும், பொதுமக்கள் பலரும் உயிரிழந்துள்ளனர். [2019-12-31 13:57:55]


உறவுகளின் தரத்தால், வாழ்வு, முக்கியத்துவம் பெறுகிறது

திருக்குடும்பத்தின் கரங்களில் இவ்வுலகின் அனைத்துக் குடும்பங்களையும், குறிப்பாக, சிரமங்களாலும், மனத்துயரங்களாலும் பாதிக்கப்பட்டுள்ள குடும்பங்களை ஒப்படைப்போம் - திருத்தந்தை கிறிஸ்டோபர் பிரான்சிஸ் - வத்திக்கான் செய்திகள் வாழ்வில் எளிமையின் அவசியத்தை நமக்கு கிறிஸ்மஸ் குடில் கற்றுத்தருகிறது என்ற கருத்தை மையமாக வைத்து தன் டுவிட்டர் செய்தியை, டிசம்பர் 30, இத்திங்களன்று வழங்கியுள்ளார், திருத்தந்தை பிரான்சிஸ். கொண்டிருக்கும் பொருட்களின் எண்ணிக்கைகளால் அல்ல, மாறாக, உறவுகளின் தரத்தைக் கொண்டே வாழ்வு முக்கியத்துவம் பெறுகிறது என்பதை, கிறிஸ்மஸ் குடில் காட்சியின் உண்மையான எளிமை நினைவூட்டுகிறது. உடைமைகளில் ஏழையாகவும், அன்பில் வளமுடையவராகவும் இருக்கும் இறைவனை நோக்கி நம் பார்வையைத் திருப்பும்போது, வாழ்வில் எது முக்கியமானது என்பது நினைவுக்கு வருகிறது, என உரைக்கிறது, திருத்தந்தையின் திங்கள் தின டுவிட்டர் செய்தி. மேலும், திருத்தந்தை பிரான்சிஸ் அவர்கள், இஞ்ஞாயிறன்று வெளியிட்டுள்ள டுவிட்டர் செய்தியில், 'இன்று திருக்குடும்பத்தின் கரங்களில் இவ்வுலகின் அனைத்துக் குடும்பங்களையும் ஒப்படைப்போம், குறிப்பாக, சிரமங்களாலும், மனத்துயரங்களாலும் பாதிக்கப்பட்டுள்ள குடும்பங்களை ஒப்படைத்து, அவர்கள் மீது இறைபாதுகாப்பை இறைஞ்சுவோம்’, என்ற சொற்களைப் பதிவுசெய்துள்ளார். [2019-12-31 13:46:24]


பிலிப்பீன்ஸ் சூறாவளியால் பாதிக்கப்பட்டோருக்கு செபங்கள்

பிலிப்பீன்ஸ் நாட்டைத் தாக்கியுள்ள Phanfone சூறாவளியால் பாதிக்கப்பட்டுள்ளோரின் துயரங்களோடு தான் இணைவதாக, திருத்தந்தை பிரான்சிஸ் அவர்கள், டிசம்பர் 26, இவ்வியாழனன்று வழங்கிய மூவேளை செப உரையின் இறுதியில் கூறினார் ஜெரோம் லூயிஸ் - வத்திக்கான் செய்திகள் பிலிப்பீன்ஸ் நாட்டைத் தாக்கியுள்ள Phanfone சூறாவளியால் பாதிக்கப்பட்டுள்ளோரின் துயரங்களோடு தான் இணைவதாக, திருத்தந்தை பிரான்சிஸ் அவர்கள், டிசம்பர் 26, இவ்வியாழனன்று வழங்கிய மூவேளை செப உரையின் இறுதியில் கூறினார். இந்தச் சூறாவளியால் இறந்தோர், காயமுற்றோர், மற்றும் அவர்களது குடும்பத்தினர் அனைவருக்காகவும் தான் செபிப்பதாகக் கூறியத் திருத்தந்தை, புனித பேதுரு பெருங்கோவில் வளாகத்தில் கூடியிருந்த அனைவரோடும் இணைந்து, 'அருள்நிறை மரியே' செபத்தைச் சொன்னார். மேலும், கிறிஸ்து பிறப்புப் பெருவிழாவையொட்டி, உரோம் நகரிலிருந்தும், உலகின் பல பகுதிகளிலிருந்தும், தனக்கு அனுப்பப்பட்ட வாழ்த்துக்களுக்காக நன்றி கூறிய திருத்தந்தை பிரான்சிஸ் அவர்கள், அவர்கள் ஒவ்வொருவருக்கும், தன்னால், தனிப்பட்ட முறையில் பதில் அளிக்க இயலாது என்றும், அவர்கள் அனைவருக்காகவும் தான் செபிப்பதாகவும் தெரிவித்தார். வாழ்த்துக்களுடன், தங்கள் செபங்களை தனக்காக எழுப்பியுள்ள உள்ளங்களுக்கு, தன் சிறப்பான நன்றி என்று கூறிய திருத்தந்தை, மீண்டும் ஒருமுறை, அனைவருக்கும் கிறிஸ்து பிறப்பு பெருவிழா காலத்தின் மகிழ்வைப் பகிர்ந்துகொள்வதாகக் கூறினார். டிசம்பர் 24, இச்செவ்வாய் இரவு முதல், பிலிப்பின்ஸ் நாட்டைத் தாக்கிய Phanfone சூறாவளியால் இதுவரை, 13 பேர் உயிரிழந்துள்ளனர் என்றும், 58,000த்திற்கும் அதிகமானோர் பாதிக்கப்பட்டுள்ளனர் என்றும் ஊடகங்கள் கூறுகின்ற [2019-12-28 22:14:16]


புனித ஸ்தேவான் திருநாள் - திருத்தந்தையின் மூவேளை செப உரை

தன்னைக் கொலை செய்தோரையும் மன்னித்த வண்ணம் இறந்த புனித ஸ்தேவான், கிறிஸ்மஸ் காலத்தின் உண்மையான உணர்வுகளை வெளிப்படுத்துகிறார் - திருத்தந்தை பிரான்சிஸ் ஜெரோம் லூயிஸ் - வத்திக்கான் செய்திகள் மகிழ்வு நிறைந்த கிறிஸ்து பிறப்பு பெருவிழா காலத்தில், முதல் கிறிஸ்தவர் ஒருவர் கொல்லப்பட்டதன் நினைவைக் கொண்டாடுவது பொருத்தமற்றதாகத் தெரியலாம், ஆனால், நம் கிறிஸ்தவ நம்பிக்கையின் கண்ணோட்டத்தில், இதுதான் உண்மையாகவே, கிறிஸ்மஸ் காலத்தின் பொருளை விளக்குகிறது என்று, திருத்தந்தை பிரான்சிஸ் அவர்கள், டிசம்பர் 26, இவ்வியாழனன்று கூறினார். வன்முறையை அன்பு வென்றது முதல் மறைசாட்சியாக உயிர் துறந்த புனித ஸ்தேவான் திருநாள், டிசம்பர் 26ம் தேதி சிறப்பிக்கப்பட்டதையொட்டி, வத்திக்கான் புனித பேதுரு பெருங்கோவில் வளாகத்தில் கூடியிருந்த ஆயிரக்கணக்கான பக்தர்களுக்கு வழங்கிய மூவேளை செப உரையில் திருத்தந்தை இவ்வாறு கூறினார். ஸ்தேவானின் மறைசாட்சிய மரணத்தில், வன்முறையை அன்பு வென்றது, மரணத்தை வாழ்வு வென்றது என்று தன் உரையில் சுட்டிக்காட்டிய திருத்தந்தை பிரான்சிஸ் அவர்கள், தன்னைக் கொலை செய்தோரையும் மன்னித்த வண்ணம் இறந்த புனித ஸ்தேவான், கிறிஸ்மஸ் காலத்தின் உண்மையான உணர்வுகளை வெளிப்படுத்துகிறார் என்று கூறினார். நம் எண்ணங்களை வான் நோக்கித் திருப்பும் ஸ்தேவான் தூய ஆவியாரின் வல்லமையை நிறைவாய்ப் பெற்று, வானத்தை உற்று நோக்கியவண்ணம் தன் உயிரை ஈந்த ஸ்தேவான், நமது கண்களையும், எண்ணங்களையும் வான் நோக்கித் திருப்புகிறார் என்றும், மனிதமானது அனைத்தும் விண்ணை நோக்கித் திருப்பப்படவேண்டும் என்பதை உணர்த்துகிறார் என்றும் கூறினார் திருத்தந்தை. திருஅவையில் முதல் முதலாகத் தேர்ந்தெடுக்கப்பட்ட ஏழு தியாக்கோன்களில், ஸ்தேவானும் ஒருவர் (காண்க. தி.ப. 6:1-6) என்பதை தன் மூவேளை செப உரையில் சிறப்பாகக் குறிப்பிட்டுப் பேசியத் திருத்தந்தை பிரான்சிஸ் அவர்கள், உடன்பிறந்த உணர்வையும், நற்செய்தியின் பிறரன்பையும் இணைப்பது எவ்விதம் என்பதை நாம் இப்புனிதரிடம் கற்றுக்கொள்ளவேண்டும் என்று கூறினார். மறைசாட்சிகளை நினைவுகூருவோம் மத நம்பிக்கைக்காகக் கொல்லப்பட்ட முதல் சாட்சியான புனித ஸ்தேவானை நினைவுகூரும் விழா, வரலாற்றில், மறைசாட்சிகளாக இறந்த அனைவரையும், இன்றும் கொல்லப்படும் அனைவரையும் எண்ணிப்பார்க்க நம்மை அழைக்கிறது என்று திருத்தந்தை பிரான்சிஸ் அவர்கள் தன் மூவேளை செப உரையின் இறுதியில் கூறினார். [2019-12-27 03:10:59]


இறைவனின் நெருக்கத்தை கொண்டாட...

கிறிஸ்து பிறப்புப் பெருவிழா, ஞாயிறு நற்செய்தி மற்றும் குடில் ஆகிய மூன்று கருத்துக்களை மையப்படுத்தி, திருத்தந்தை பிரான்சிஸ் அவர்கள் வெளியிட்டுள்ள மூன்று டுவிட்டர் செய்திகள் கிறிஸ்டோபர் பிரான்சிஸ் - வத்திக்கான் செய்திகள் கிறிஸ்து பிறப்புப் பெருவிழா, ஞாயிறு நற்செய்தி மற்றும் குடில் ஆகிய மூன்று கருத்துக்களை மையப்படுத்தி, திருத்தந்தை பிரான்சிஸ் அவர்கள், ஞாயிறு மற்றும் திங்கள் ஆகிய இரு நாள்களில், மூன்று டுவிட்டர் செய்திகளை வெளியிட்டுள்ளார். கிறிஸ்மஸ் குடில் நினைவுறுத்துவது... "கடவுள், விண்ணகத்தில், நம் கண்களுக்குத் தோன்றாத வகையில் தங்கிவிடவில்லை, மாறாக, இவ்வுலகில், மனிதராக இறங்கிவந்தார் என்பதை, கிறிஸ்மஸ் குடில் நமக்கு நினைவுறுத்துகிறது. எனவே, குடில் அமைப்பதன் வழியே, இறைவனின் நெருக்கத்தை கொண்டாடவும், அவரது உண்மையான அன்பை கண்டுகொள்ளவும் முடிகிறது" என்ற சொற்கள், #குடில் என்ற ஹாஷ்டாக்குடன், இத்திங்களன்று, திருத்தந்தை வெளியிட்ட டுவிட்டர் செய்தியில் இடம்பெற்றன. ஞாயிறு டுவிட்டர் செய்திகள் மேலும், இஞ்ஞாயிறன்று வழங்கப்பட்ட நற்செய்தியை மையப்படுத்திய ஒரு சிந்தனையையும், தன் மூவேளை செப உரையில் கூறிய ஒரு கருத்தையும், இரு டுவிட்டர் செய்திகளாக இஞ்ஞாயிறு வெளியிட்டார் திருத்தந்தை. "இன்றைய நற்செய்தியில் (மத். 1:18-24) கூறப்பட்டுள்ள யோசேப்பின் அனுபவம், நம்மை கிறிஸ்மசை நோக்கி அழைத்துச் செல்கிறது. நம்மிடம் வரும் இயேசுவுக்கு செவிசாய்க்கவும், அவரை, நமது திட்டங்களிலும், நாம் எடுக்கும் முடிவுகளிலும் இணைத்துக்கொள்ளவும், யோசேப்பு நமக்கு கற்றுத்தருகிறார்" என்ற கருத்து, திருத்தந்தை பிரான்சிஸ் அவர்கள், இஞ்ஞாயிறு வெளியிட்ட முதல் டுவிட்டர் செய்தியாக அமைந்தது. “இன்னும் மூன்று நாள்களில் கிறிஸ்து பிறப்பு பெருவிழாவைக் கொண்டாடுவோம். இவ்விழாவையொட்டி, வெகு தூரங்களிலிருந்து குடும்பமாகக் கூடிவருவதற்கு முயற்சிகள் மேற்கொள்வோரை எண்ணிப்பார்க்கிறேன். கிறிஸ்து பிறப்புப் பெருவிழா, நமக்குள் உடன்பிறந்த உணர்வை வளர்க்கும் நேரமாகவும், தேவையில் இருப்போருடன் ஒருங்கிணையும் விழாவாகவும் அமையட்டும்” என்ற சொற்கள், அவரது இரண்டாவது டுவிட்டர் செய்தியில் இடம்பெற்றன. இதுவரை, 2,263 டுவிட்டர் செய்திகள் ஒவ்வொரு நாளும் @pontifex என்ற வலைத்தள முகவரியில் திருத்தந்தை வழங்கிவரும் டுவிட்டர் செய்திகள், இத்தாலியம், ஆங்கிலம், பிரெஞ்சு, இஸ்பானியம், போர்த்துகீசியம், ஜெர்மன், போலந்து, இலத்தீன் மற்றும் அரேபியம் ஆகிய ஒன்பது மொழிகளில் வெளியாகின்றன. டிசம்பர் 24, இத்திங்கள் முடிய, திருத்தந்தை பிரான்சிஸ் அவர்கள் வெளியிட்டுள்ள டுவிட்டர் செய்திகள், 2,263 என்பதும், அவரது டுவிட்டர் பதிவுகளை, ஆங்கில மொழியில் பின்பற்றுவோரின் எண்ணிக்கை மட்டும், 1 கோடியே 82 இலட்சம் என்பதும் குறிப்பிடத்தக்கன. [2019-12-25 04:21:36]


மனிதாபிமானம் நிறைந்த தூதராக விளங்கும் திருத்தந்தை

உலகில் மிகவும் நலிந்தவர்கள் சார்பாகப் பேசும் ஆன்மீகக் குரலாக திருத்தந்தை பிரான்சிஸ் அவர்கள் விளங்குகிறார் - ஐ.நா. அவையின் பொதுச்செயலர், அந்தோனியோ கூட்டேரஸ் மேரி தெரேசா: வத்திக்கான் செய்திகள் மனித துயரங்களைக் குறைத்து, மனித மாண்பை உயர்த்த, திருத்தந்தை பிரான்சிஸ் அவர்கள், நம்பிக்கையும் மனிதாபிமானமும் நிறைந்த ஒரு தூதராக விளங்குகிறார் என்று ஐ.நா. அவையின் பொதுச்செயலர், அந்தோனியோ கூட்டேரஸ் அவர்கள் கூறினார். திருத்தந்தை பிரான்சிஸ் அவர்களும், ஐ.நா. பொதுச்செயலரும், டிசம்பர் 20, இவ்வெள்ளியன்று, வத்திக்கானில் சந்தித்த வேளையில், கூட்டேரஸ் அவர்கள் திருத்தந்தையை வாழ்த்திப் பேசியபோது இவ்வாறு கூறினார். உலகில் மிகவும் நலிந்தவர்கள் சார்பாக, குறிப்பாக, புலம்பெயர்ந்தோர் மற்றும் குடிபெயர்ந்தோர் சார்பாகவும், வறுமையாலும், சமுதாய ஏற்றத்தாழ்வுகளாலும் பாதிக்கப்போட்டோர் சார்பாகவும் பேசும் ஆன்மீகக் குரலாக திருத்தந்தை பிரான்சிஸ் அவர்கள் விளங்குகிறார் என்று கூட்டேரஸ் அவர்கள் எடுத்துரைத்தார். பூமிக்கோளம், மற்றும் சுற்றுச்சூழலுக்கு இழைக்கப்படும் கொடுமைகளை, உலகறியச் செய்யும் வகையில், 'இறைவா உமக்கே புகழ்' என்ற சுற்றுமடலை திருத்தந்தை வெளியிட்டதற்காக கூட்டேரஸ் அவர்கள், பாராட்டுக்களைத் தெரிவித்தார். மத்ரித் நகரில் நடைபெற்ற COP 25 மாநாடு முடிவுற்ற நிலையில், உரோம் நகருக்கு வருகை தந்துள்ள தான், 2050ம் ஆண்டுக்குள் கார்பன் வெளியீட்டை முற்றிலும் குறைப்பதற்கு, திருத்தந்தை பிரான்சிஸ் அவர்களோடு இணைந்து, உலகத் தலைவர்களிடம் விண்ணப்பிப்பதாக, ஐ.நா.அவை பொதுச்செயலர் கூறினார். [2019-12-23 00:51:45]


புன்னகையின் முக்கியத்துவத்தைக் கண்டுணருங்கள்

புதிதாகப் பிறந்துள்ள குழந்தையைக் காண்கையில், அதைப் பார்த்து நாமும் புன்னகை புரிகிறோம், அக்குழந்தையும், தனது பார்வையால் அதற்குப் பதிலளிக்கின்றது, அக்குழந்தையின் புன்னகை, மிகுந்த வல்லமை மிக்கது மேரி தெரேசா: வத்திக்கான் செய்திகள் வத்திக்கானிலும், திருப்பீடத்தின் பல்வேறு அலுவலகங்களிலும் பணியாற்றும் நாம் அனைவரும், குழந்தை இயேசுவின் புன்னகையால் புதுப்பிக்கப்பட நம்மையே நாம் அனுமதிக்க வேண்டும் என்று, திருத்தந்தை பிரான்சிஸ் அவர்கள், இச்சனிக்கிழமையன்று, தான் சந்தித்த திருப்பீட பணியாளர்களிடம் கூறினார். கிறிஸ்மஸ் நல்வாழ்த்துக்களைப் பகிர்ந்துகொண்டு ஆசீர் பெறுவதற்காக, புனித திருத்தந்தை ஆறாம் பவுல் அரங்கத்தில், டிசம்பர் 21, இச்சனிக்கிழமை நண்பகலில் காத்திருந்த, வத்திக்கான் மற்றும், திருப்பீடத்தின் பல்வேறு அலுவலகங்களில் பணியாற்றுவோரைச் சந்தித்து உரையாற்றிய திருத்தந்தை பிரான்சிஸ் அவர்கள், நம் வாழ்வில் புன்னகையின் முக்கியத்துவம் பற்றிய சிந்தனைகளைப் பகிர்ந்துகொண்டார். புன்னகை நாடு கடந்த மாதத்தில், இறுதியாக தான் திருத்தூதுப்பயணம் மேற்கொண்ட நாடுகளில் ஒன்றான தாய்லாந்திலிருந்து, புன்னகை பற்றிய சிந்தனை எழுந்தது என்றுரைத்த திருத்தந்தை, தாய்லாந்திலுள்ள மக்கள், மிகுந்த புன்முறுவலுடன் உள்ளதால், இவ்வாறு அந்நாடு அழைக்கப்படுகின்றது என்றும், அம்மக்களிடம் விளங்கும் சிறப்பான கனிவு, பெருந்தன்மை போன்ற நற்புண்புகள் அனைத்தும் அவர்களின் முகங்களிலும், செயல்களிலும் பிரிதிபலிக்கின்றன என்று கூறினார். புதிதாகப் பிறந்துள்ள குழந்தையைக் காண்கையில், அதைப் பார்த்து நாமும் புன்னகை புரிகிறோம், அக்குழந்தையும், தனது பார்வையால் அதற்குப் பதிலளிக்கின்றது, மேலும், அக்குழந்தையின் புன்னகை, மிகுந்த வல்லமை மிக்கது என்று கூறியத் திருத்தந்தை, அப்புன்னகை, ஊற்றுத் தண்ணீர் போல புதியதும், தூய்மையானதும் ஆகும், இன்னும், அது நம் குழந்தைப்பருவத்தின் மீது ஏக்கத்தை எழுப்புகின்றது என்றும் கூறினார். இயேசு, கடவுளின் புன்னகை அன்னை மரியா, யோசேப்பு மற்றும், இயேசுவுக்கு இடையே இந்த புன்னகை தனித்துவமிக்க முறையில் விளங்கியது, இயேசு கடவுளின் புன்னகை என்றும், இறைத்தந்தை நம்மீது கொண்டுள்ள அன்பை, நன்மைத்தனத்தை வெளிப்படுத்துவதற்காக மனிதராய்ப் பிறந்த இயேசுவின் புன்னகையில், கன்னி மரியாவும், புனித யோசேப்பும், தங்கள் மீதும், இயேசுவின் வருகைக்காகக் காத்திருந்தோர் மீதும் வைத்துள்ள கடவுளின் கருணையை கண்டுகொண்டனர் என்றும், திருத்தந்தை கூறினார். தீவனத்தொட்டியில் குழந்தை இயேசுவை நாம் காண்கையில் இதே அனுபவத்தை மீண்டும் வாழ்கிறோம் எனவும், நம்மிலுள்ள சிறந்தவற்றை மற்றவருக்கு வழங்குவதற்குத் தடைசெய்யும் அனைத்திலிருந்தும், குழந்தை இயேசுவின் புன்னகை நம்மைத் தூய்மைப்படுத்துவதாக எனவும் திருத்தந்தை கூறினார். நாளின் அதிகமான நேரங்களை வேலைகளில் செலவழிக்கிறோம், எனினும், வேலையின் தரம், குறிப்பாக, திருஅவைக்கும், கிறிஸ்துவின் பெயராலும் பணியாற்றுகையில், நாம் வாழும்முறை, மனித உறவுகளின் தன்மை போன்றவற்றைச் சார்ந்துள்ளது என்றும் திருத்தந்தை கூறினார். கடவுளின் புன்னகை பல்வேறு காரணங்களுக்காக, சிலநேரங்களில் புன்னகை புரிய கடினமாக மாறுகிறது, அச்சமயத்தில் நமக்கு கடவுளின் புன்னகை தேவைப்படுகின்றது, இதற்கு நம் ஒரே மீட்பராகிய இயேசுவால் மட்டுமே நமக்கு உதவ முடியும், சிலவேளைகளில், அவரை நம் வாழ்வில் தெளிவாக அனுபவிக்கின்றோம் என்றும், திருத்தந்தை பிரான்சிஸ் அவர்கள் கூறினார். நம் வாழ்வின் நிகழ்வுகள் எல்லாம் சரியாகச் சென்றுகொண்டிருக்கையில், பாதுகாப்பாக இருப்பதாக உணருகின்றோம், துன்புறுவோரை மறக்கின்றோம், அந்நேரத்தில் நம் போலியான பாதுகாப்பை அகற்றுவதற்கும் கடவுளின் புன்னகை தேவைப்படுகின்றது என்றும் திருத்தந்தை கூறினார். கிறிஸ்மஸ் பெருவிழா திருவழிபாட்டில் கலந்துகொள்கையில், தீவனத்தொட்டியைத் தியானிக்கையில், நல்வாழ்த்துக்களைப் பகிர்ந்துகொள்கையில், இயேசு கொணர்ந்த கடவுளின் புன்னகையால் வியப்படைவோம் என்றுரைத்த திருத்தந்தை பிரான்சிஸ் அவர்கள், எல்லாருக்கும் கிறிஸ்மஸ் நல்வாழ்த்துக்களைத் தெரிவித்து உரையை நிறைவு செய்தார். [2019-12-22 03:04:36]


பக்க இலக்கங்களை அழுத்தி எல்லா செய்திகளையும் பார்வையிடவும்