வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



விமானப் பயணத்தில் பத்திரிகையாளர் சந்திப்பு

திருத்தந்தை பிரான்சிஸ் அவர்கள், மால்ட்டாவிலிருந்து உரோம் நகருக்குத் திரும்பிய ஒன்றரை மணிநேர விமானப் பயணத்தின்போது, தன்னோடு பயணம் மேற்கொண்ட பன்னாட்டு ஊடகவியலாளர்கள் 74 பேரின் பணிகளுக்கு நன்றி கூறியதோடு, அவர்களில் சிலரின் கேள்விகளுக்கும் பதிலளித்தார். மால்ட்டாவில், இஞ்ஞாயிறன்று, புனித ஜார்ஜ் பிரேகா அவர்களின் கல்லறை அமைந்துள்ள சிற்றாலயம் சென்று செபித்து மால்ட்டா மக்களை வியப்பில் ஆழ்த்தியது, இத்திருத்தூதுப் பயணம் பற்றிய நினைவுகள், திருத்தந்தையின் உடல்நலம் போன்ற கேள்விகளை, மால்ட்டா தொலைக்காட்சி ஊடகவியலாளர் Andrea Rossitto என்பவர் முதலில் திருத்தந்தையிடம் கேட்டார். திருத்தந்தையின் உடல்நலம், புலம்பெயர்ந்தோர் எனது உடல்நலம் அவ்வப்போது மாறுபடுகிறது. முழங்காலில் வலி. இரு வாரங்களுக்குமுன் ஒன்றும் செய்ய இயலாமல் இருந்தேன், இப்போது பரவாயில்லை, எனினும், இந்த வயதில் உடல்நிலையில் நிலவும் இந்த விளையாட்டு எப்படிப்போய் முடியும் என்று தெரியவில்லை, நன்றாக இருக்கும் என நம்புவோம். மேலும், இத்திருத்துப் பயணத்தில் மால்ட்டா மற்றும், கோசோ தீவுகளின் மக்களின் மிகுந்த ஆர்வம் என்னை மகிழச்செய்தது. மொத்தத்தில் இப்பயணம் எனக்கு மிகுந்த மகிழ்ச்சியளித்தது, அதேநேரம், புலம்பெயர்ந்தோர் பிரச்சனையையும் பார்த்தேன் கிரேக்கம், சைப்ரஸ், மால்ட்டா, இத்தாலி மற்றும் இஸ்பெயின் ஆகிய நாடுகள், என்று ஆப்ரிக்கா மற்றும், மத்தியக் கிழக்குக்கு அருகில் உள்ளன. ஆதலால் இவர்கள், இந்நாடுகளுக்கு வருகின்றனர். இதில் பிரச்சனை என்னவெனில், இவர்களில் எத்தனை பேர் இந்நாடுகளில் தங்கவேண்டும் என்பதை ஒவ்வொரு நாடும் கூறவேண்டியுள்ளது. ஐரோப்பா, புலம்பெயர்ந்தோரால் அமைக்கப்பட்டுள்ள கண்டம் என்பதை நாம் மறந்துவிடுகின்றோம். இம்மக்கள் குறித்த அனைத்துப் பிரச்சனைகளையும், இவர்களை மிகத் தாராளமாக வரவேற்கும் மால்ட்டா உள்ளிட்ட அருகாமை நாடுகளிடம் சுமத்தக்கூடாது. புலம்பெயர்ந்தோர் வரவேற்கப்படவேண்டும். மால்ட்டாவில் புலம்பெயர்ந்தோர் மையத்தில் அவர்களைச் சந்தித்தபோது, அம்மக்கள் எதிர்கொள்ளும் பயங்கரமான துன்பங்கள் பற்றி அறிந்தேன். இவ்வாறு திருத்தந்தை பிரான்சிஸ் அவர்கள் பதிலளித்தார். விமானப் பயணத்தில் பத்திரிகையாளர் சந்திப்பு விமானப் பயணத்தில் பத்திரிகையாளர் சந்திப்பு உக்ரைன் திருத்தூதுப் பயணம் குறித்து திருத்தந்தை திருத்தந்தை பிரான்சிஸ் அவர்களிடம், உக்ரைனின் கீவ் நகருக்குத் திருத்தூதுப்பயணம் மேற்கொள்வதற்குள்ள வாய்ப்பு குறித்து Jorge Antelo Barcia என்பவர் (RNA) கேள்வி கேட்டார். கீவ் நகருக்கு அருகிலுள்ள Bucha கிராமத்திலிருந்து இரஷ்யப் படைகள் சென்றபின்னர், அங்குத் தெருக்களில் பல மனித உடல்கள் கிடந்தன. அவற்றில் சில உடல்கள் தூக்கிலிடப்பட்டதுபோன்று கைகள் கட்டப்பட்டுக்கிடந்தன என்று இஞ்ஞாயிறு செய்திகள் வெளியாகியுள்ளன என்று கூறியதைக் கேட்ட திருத்தந்தை, இத்தகவலை அளித்ததற்கு நன்றி, போர் எப்போதுமே, மனிதமற்ற கொடூரமான ஒரு செயலாகும். இது மனித உணர்விற்கு முரணானது. கிறிஸ்தவர் என்ற முறையில் அல்ல, மாறாக, மனிதர் என்ற வகையில் இதைச் சொல்கிறேன். இது காயினின் உணர்வாகும். போரை நிறுத்துவதற்கு ஆற்ற இயன்ற அனைத்தையும் திருப்பீடம், குறிப்பாக தூதரக வழிகளில், கர்தினால் பரோலின் அவர்களும், பேராயர் காலகர் அவர்களும் செய்துவருகின்றனர். விவேகம், இரகசியம் போன்ற காரணங்களுக்காக, இவை அனைத்தையும் பொதுப்படையாகக் கூற இயலாது. மேலும், கீவ் நகருக்குத் திருத்தூதுப்பயணம் மேற்கொள்வதற்குரிய அழைப்பிதழ் எனது மேஜையில் உள்ளது. உக்ரைனுக்கு கர்தினால் Krajewski அவர்களை அனுப்புமாறு, போலந்து அரசுத்தலைவர் என்னிடம்கேட்டபோது அவரை அனுப்பினேன். அவர் என்னையும் வருமாறு கூறினார். ஆனால் எனது உக்ரைன் பயணம் நடைபெறுமா? சரியானதுதானா, அங்கு நான் போகவேண்டுமா என்பதுதான் தெரியவில்லை என்று திருத்தந்தை கூறினார். உக்ரைனில் போரை நிறுத்துவது குறித்து திருத்தந்தை திருத்தந்தை உக்ரைனுக்குத் திருத்தூதுப் பயணம் மேற்கொள்வதற்கு ஆவலாக இருப்பதைக் கூறியவுடன், அமெரிக்க இதழின் Gerry O'Connell என்பவர் திருத்தந்தையிடம், மால்ட்டா திருத்தூதுப் பயணத்தில் பலநேரங்களில் போர் பற்றிக் கூறினீர்கள், போர் தொடங்கியதற்குப்பின், இரஷ்ய அரசுத்தலைவர் புடினிடம் பேசியுள்ளீர்கள், இன்று அவரிடம் என்ன பேசுவீர்கள் என்று கேட்டார். அக்கேள்விக்குப் பதிலளித்த திருத்தந்தை, இருதரப்பு அதிகாரிகளிடம் நான் பேசியிருப்பதில் எதுவுமே இரகசியம் கிடையாது. இரஷ்ய ஆர்த்தடாக்ஸ் முதுபெரும்தந்தை கிரில் அவர்களுடன் நான் பேசியபிறகு, நாங்கள் உரையாடியது குறித்து, நல்லதோர் அறிக்கையை அவர் வெளியிட்டார். இரஷ்ய அரசுத்தலைவர் கடந்த ஆண்டு இறுதியில் எனக்குப் பிறந்த நாள் வாழ்த்துச் சொல்ல அழைத்தபோது அவரிடம் பேசினேன். உக்ரைன் அரசுத்தலைவரிடம் இருமுறை பேசியுள்ளேன். போர் தொடங்கிய முதல் நாளன்று உரோம் நகரிலுள்ள இரஷ்யத் தூதரகம் சென்று அதிகாரிகளிடம் பேசி, போர் குறித்த எனது உணர்வுகளை வெளிப்படுத்தினேன். உக்ரைனின் கீவ் பேராயர் Shevchuk அவர்களிடமும் பேசியுள்ளேன். கீவ் நகரில் இருந்து இப்போது Odessaவில் இருக்கும் உங்களைப் போன்ற செய்தியாளர் Elisabetta Piqué என்பவரிடம், இரண்டு அல்லது மூன்று நாள்களுக்கு ஒருமுறை பேசி வருகிறேன். போரில் பலியாகியுள்ள பத்திரிகையாளர்களுக்கு எனது ஆழ்ந்த அனுதாபங்கள். துணிச்சலோடு பணியாற்றும் அவர்களை நாம் மறக்கக் கூடாது. மேலும், புடின் அவர்களோடு பேசுவதற்கு எனக்கு வாய்ப்புக் கிடைத்தால், எல்லா அதிகாரிகளிடமும் கூறியதையே அவரிடமும் கூறுவேன், இதில் இரட்டைவேடம் என்பது கிடையாது, நான் எப்போதும் ஒரே மாதிரியாகவே பேசுவேன். உங்களது கேள்வியில், நியாயமான மற்றும், அநீதியான போர்கள் குறித்து சந்தேகம் இருப்பதாக உணர்கிறேன். இவ்வாறு கூறிய திருத்தந்தை பிரான்சிஸ் அவர்கள் மேலும் தொடர்ந்து பேசினார். போர் குறித்த சிந்தனைகள் விமானப் பயணத்தில் பத்திரிகையாளர் சந்திப்பு விமானப் பயணத்தில் பத்திரிகையாளர் சந்திப்பு ஒவ்வொரு போரும், எப்போதும் ஓர் அநீதியிலிருந்து துளிர்விடுகின்றது. இது அமைதி ஏற்படுவதற்குரிய வழிமுறை அல்ல. எடுத்துக்காட்டாக, ஆயுதங்களை வாங்குவதற்காக முதலீடுகள் செய்வது. தங்களின் பாதுகாப்புக்காக இவ்வாறு செய்வதாக சிலர் கூறுகின்றனர். இதுவே போரின் வழிமுறை. இரண்டாம் உலகப் போர் முடிவுற்றபோது, இனிமேல் ஒருபோதும் போர் வேண்டாம், அமைதியே வேண்டும் என்றே எல்லாரும் கூறினர். ஹிரோஷிமா, நாகசாகி நகரங்களில் அணுகுண்டுகள் வீசப்பட்டபின், அமைதியை உருவாக்க, ஆயுதங்களைக் களைவது குறித்த நன்மனம் அதிகம் உருவானது. இப்போர் முடிவுற்று எழுபது ஆண்டுகளுக்கு மேல் ஆகியுள்ள இவ்வேளையில், அனைத்தையும் நாம் மறந்துவிட்டோம். காந்தி போன்ற மாமனிதர்களும், மற்றவர்களும் அமைதியை நிலைநாட்டும் முறைகளைக் கூறியுள்ளனர். ஆனால், மனித சமுதாயமாகிய நாம், பிடிவாதமாக இருக்கிறோம். காயின் உணர்வுகளோடு, போர்கள் மீது நாம் காதல்கொண்டுள்ளோம். 2014ம் ஆண்டில் Redipugliaவுக்குச் சென்றபோது இறந்தவர்களின் பெயர்களைப் பார்த்து உண்மையிலேயே மனகசப்பால் அழுதேன். அதற்குப்பின்னர் இறந்தோர் நினைவு நாளின்போது Anzioவில் திருப்பலி நிறைவேற்றினேன். அங்கு கல்லறைகளில் இறந்தவர்களின் பெயர்களை வாசித்தபோது, அவர்கள் எல்லாரும் இளையோர் என அறிந்து அங்கும் கண்ணீர் வடித்தேன். நாம் இக்கல்லறைகளை நினைத்து கண்ணீர் சிந்தவேண்டும். பிரான்சின் வடமேற்கிலுள்ள நார்மாண்டியில் உலகப் போர் நினைவுகூரப்பட்ட நிகழ்வில் கலந்துகொண்ட பல்வேறு அரசுத்தலைவர்களில் எவரும், அக்கடற்கரைகளில் இறந்த ஏறத்தாழ முப்பதாயிரம் இளையோர் பற்றிப் பேசியதாக நினைவில்லை. அது எனக்கு வியப்பைத் தந்தது. நாம் ஒருபோதும் வரலாற்றிலிருந்து பாடம் கற்றுக்கொள்வதில்லை. நாம் எல்லாருமே குற்றவாளிகள். ஆண்டவரே எம்மீது இரக்கம் வையும். இவ்வாறு திருத்தந்தை பிரான்சிஸ் அவர்கள், தனது 36வது வெளிநாட்டு திருத்தூதுப் பயணமாகிய மால்ட்டா நாட்டுத் பயணத்தை முடித்துத் திரும்பும் விமானப் பயணத்தில் ஊடகவியலாளர்களின் கேள்விகளுக்குப் பதில்களை அளித்தார். [2022-04-04 21:48:46]


அமைதி, வரவேற்பு நற்செய்தியோடு மால்ட்டா திருத்தூதுப் பயணம்

மத்தியதரைக் கடல் பகுதி தீவு நாடான மால்ட்டாவுக்கு, திருத்தந்தை பிரான்சிஸ் அவர்கள் மேற்கொள்ளும் திருத்தூதுப் பயணம், மனித வாழ்வைக் காப்பாற்றுவதற்கு அனைவரும் தங்களை அர்ப்பணிக்கவேண்டியதன் முக்கியத்துவத்தை வலியுறுத்துவதாக இருக்கும் என்று, திருப்பீட உயர் அதிகாரி ஒருவர் கூறியுள்ளார். ஏப்ரல் 2,3 அதாவது இச்சனி, ஞாயிறு ஆகிய இரு நாள்களில் திருத்தந்தை பிரான்சிஸ் அவர்கள் மேற்கொள்ளவிருக்கும் மால்ட்டா நாட்டுத் திருத்தூதுப் பயணம் குறித்து, வத்திக்கான் செய்திகளுக்குப் பேட்டியளித்த திருப்பீடச் செயலர் கர்தினால் பியெத்ரோ பரோலின் அவர்கள் இவ்வாறு கூறியுள்ளார். திருத்தந்தையின் மால்ட்டா திருத்தூதுப் பயணம், தேவையில் இருப்போர், மக்களின் புலம்பெயர்வு, உக்ரைன் போர் உட்பட அனைத்துப் போர்கள் ஆகிய அம்சங்களில் கவனம் செலுத்துவதாக இருக்கும் என்று, கர்தினால் பரோலின் அவர்கள் எடுத்துரைத்தார். போர்கள், சித்ரவதை, அடக்குமுறை, வன்முறை போன்றவற்றுக்கு அஞ்சியும், சிறந்ததொரு வருங்காலத்தைத் தேடியும் தங்களின் பிறப்பிடங்களைவிட்டு வெளியேறும் மக்களை ஏற்பதற்கு, திருத்தந்தை பிரான்சிஸ் அவர்கள், வரவேற்றல், பாதுகாப்பளித்தல், ஊக்குவித்தல், மற்றும், ஒருங்கிணைத்தல் ஆகிய நான்கு வினைச்சொற்களைச் சுட்டிக்காட்டிவருவதையும், கர்தினால் பரோலின் அவர்கள் நினைவுகூர்ந்தார். ஐரோப்பியர்கள் அனைவரும், வளங்களை ஒருவர் ஒருவரோடு பகிர்ந்து, கடமையுணர்வோடு வாழுமாறு திருத்தந்தை அழைப்புவிடுத்து வருவதைக் குறிப்பிட்ட கர்தினால் பரோலின் அவர்கள், இன்றைய உலகிற்கு அதிகம் தேவைப்படும், வாழ்வு மீது நம்பிக்கை ஏற்படுவதற்குரிய காரணங்களை எடுத்துரைக்கும்வண்ணம், நற்செய்தியை அறிவிப்பது, இத்திருத்தூதுப் பயணத்தின் மையமாக இருக்கும் என்றும் கூறினார். 2020ம் ஆண்டில் நடைபெறுவதாய் திட்டமிடப்பட்டிருந்த திருத்தந்தையின் மால்ட்டா திருத்தூதுப் பயணம், கோவிட்-19 பெருந்தொற்றால் தள்ளிவைக்கப்பட்டிருந்ததால், திருத்தந்தை தற்போது இந்நிகழ்வை ஆவலோடு எதிர்பார்த்திருக்கிறார் எனவும், உக்ரைனில் இடம்பெறும் போரினால் திருத்தந்தை மிகுந்த கவலையோடு இருக்கிறார் எனவும், கர்தினால் பரோலின் அவர்கள் கூறியுள்ளார். ஐரோப்பா, உக்ரைன் புலம்பெயர்ந்தோருக்கு உதவி வருகின்ற இந்நேரத்தில், "நீலப் பாலைவனம்" என்று திருத்தந்தை குறிப்பிட்டுள்ள, மத்தியதரைக் கடல் பகுதி வழியாக வருகின்ற புலம்பெயர்ந்தோருக்கு கூடுதலாக எத்தகைய உதவிகள் எதிர்பார்க்கப்படுகின்றன என்று கேட்ட கேள்விக்கும் கர்தினால் பரோலின் அவர்கள் பதிலளித்தார். உக்ரைன் புலம்பெயர்ந்தோருக்கு உதவுகின்ற ஐரோப்பாவிற்கு நன்றி தெரிவித்த கர்தினால் பரோலின் அவர்கள், இந்த உணர்வு, மற்ற புலம்பெயர்ந்தோர் மீது அதிகரிக்கப்படவேண்டும் என்ற தன் எதிர்பார்ப்பை வெளிப்படுத்தினார். திருத்தந்தை பிரான்சிஸ் அவர்கள் மால்ட்டா குடியரசுக்கு மேற்கொள்ளும் திருத்தூதுப் பயணம், அவரது 36வது வெளிநாட்டுத் திருத்தூதுப் பயணமாகும். [2022-04-04 21:43:02]


திருத்தந்தையின் மால்ட்டா திருத்தூதுப் பயணம், ஒரு முன்தூது

“சுடர்ஒளி வீசுகின்ற பூமி” என்று, திருத்தந்தை பிரான்சிஸ் அவர்கள், மார்ச் 30, இப்புதன் பொது மறைக்கல்வியுரைக்குப்பின், அன்பொழுக அழைத்துள்ள மால்ட்டா நாட்டுக்கு, அவர் தனது 36வது வெளிநாட்டுத் திருத்தூதுப் பயணத்தை, ஏப்ரல் 2,3 அதாவது வருகிற சனி. ஞாயிறு ஆகிய இருநாள்களில் மேற்கொள்கிறார். திருத்தூதர் புனித பவுலடியாரின் பாதம் பட்டு, அவரது போதனையின்படி வாழ்ந்துவரும் மால்ட்டா மக்களை, அதே திருத்தூதரின் அடிச்சுவடுகளைப் பின்பற்றி, தானும் அந்நாட்டுக்கு இரண்டு நாள் திருத்தூதுப் பயணம் ஒன்றை மேற்கொள்வதாகவும் திருத்தந்தை கூறியிருக்கிறார். மத்திய ஐரோப்பிய நாடான உக்ரைனில் போர் கடுமையாக இடம்பெற்றுவரும் இவ்வேளையில், ஐரோப்பாவின் தென்முனையில் உள்ள மால்ட்டா நாட்டுக்குத் திருத்தந்தையின் திருத்தூதுப் பயணம் தவிர்க்கமுடியாத ஒன்றாக உள்ளது என்று அறிவிக்கப்பட்டுள்ளது. 2020ம் ஆண்டில் திருத்தந்தையின் மால்ட்டா திருத்தூதுப் பயணம் திட்டமிடப்பட்டிருந்தது. ஆயினும், கோவிட்-19 பெருந்தொற்று விதிமுறைகளால் அது தள்ளிவைக்கப்பட்டது. மால்ட்டா தீவு நாடு மத்தியதரைக் கடலின் மத்தியில், ஒரு புள்ளிபோன்று காட்சியளிக்கின்ற மால்ட்டா அல்லது மோல்ட்டா (Malta) தீவு, முக்கிய யுக்திகள் நிறைந்த, பல்வேறு தீவுக்கூட்டங்களைக்கொண்ட ஒரு குடியரசாகும். ஆப்ரிக்கா, மற்றும், மத்தியக் கிழக்குப் பகுதியின் பழமையான கலாச்சாரங்கள், வளர்ந்துவந்த ஐரோப்பா ஆகியவற்றுக்கு இடையே, மத்தியதரைக் கடல் பகுதியில் ஆதிக்கம் செலுத்தும் ஒரு குடியரசாக அமைவதற்கு, அந்நாடு பல கடும் முயற்சிகளை மேற்கொள்ளவேண்டியிருந்தது. பல்வேறு வல்லரசுகளுக்கு முக்கிய கடற்படைத் தளமாக இது அமைந்திருந்தது. எனவே மால்ட்டா சமுதாயம், போனிசியர், உரோமர், கிரேக்கர், அராபியர், நார்மானியர், சிசிலித்தீவினர், அரகோனியர், புனித யோவான் வீரப்பெருந்தகையர், பிரெஞ்சுக்காரர், பிரித்தானியர்.. இவ்வாறு பல்வேறு வெளிநாட்டு ஆதிக்கச் சக்திகளால், பல நூற்றாண்டுகளாக உருவானதாகும். மால்ட்டா தீவு, இரண்டாம் உலகப் போர் சமயத்தில், நேச நாடுகளின் இராணுவ அடித்தளமாக அமைந்திருந்ததால், அத்தீவு, ஜெர்மானிய மற்றும், இத்தாலிய வான்வழித் தாக்குதல்களால் வெகு அதிகமாகப் பாதிக்கப்பட்டது. இரண்டாம் உலகப் போர் முடிவுற்ற சமயத்தில் மிக மோசமாக அழிக்கப்பட்டிருந்த மால்ட்டா மக்கள், போர்க் காலத்தில் காட்டிய திறமை, மற்றும் துணிச்சலைப் பாராட்டி, 1942ம் ஆண்டில் அவர்களுக்கு பிரித்தானிய அரசு George Cross விருதை வழங்கியது. 2ம் உலகப் போருக்குப்பின்னர் தன்னாட்சி பெறுவதில் அந்நாட்டினர் அதிகக் கவனம் செலுத்தியதன் விளைவாக, 1813ம் ஆண்டிலிருந்து பிரித்தானியாவின் காலனி நாடாக அமைந்திருந்த மால்ட்டா, 1964ம் ஆண்டில் விடுதலை அடைந்து, காமன்வெல்த் அமைப்போடும் இணைந்தது. 1974ம் ஆண்டு டிசம்பர் 13ம் தேதி, மால்ட்டா ஒரு குடியரசாக அறிவிக்கப்பட்டது. வல்லமை மற்றும், நிலைகுலையாமை என்ற விருதுவாக்கோடு ஆட்சியை அமைத்துள்ள இக்குடியரசு, 2004ம் ஆண்டில் EU எனப்படும் ஐரோப்பிய ஒன்றியத்தில் இணைந்தது. 2008ம் ஆண்டில் யூரோ பணம் பயன்படுத்தப்படும் நாடுகளில் ஒன்றாகவும் இது மாறியது. கி.பி. அறுபதாம் ஆண்டில் திருத்தூதர் பவுல், கப்பல் விபத்தில் சிக்கி மால்ட்டா தீவில் கரை இறங்கியபோது அவரை அன்போடு வரவேற்ற அம்மக்கள், இன்றுவரை அந்நியர்களை மனத்தாராளத்தோடு இன்கனிவுடன் வரவேற்பதிலும், விருந்தோம்புவதிலும் சிறந்து விளங்குகின்றனர் என்று பலராலும் புகழப்பட்டு வருகின்றனர். மக்களின் குடியேற்றம் மால்ட்டா தீவில், கி.மு.5,900மாம் ஆண்டிலிருந்து மக்கள் வாழத்தொடங்கியுள்ளனர். மத்தியதரைக் கடலில் அமைந்துள்ள இரு தீவு நாடுகளில் ஒன்றான மால்ட்டா, பெரிய தீவான மால்ட்டா, Gozo, Comino ஆகிய மக்கள் குடியிருக்கும் மூன்று தீவுகள் உட்பட ஐந்து தீவுகளைக் கொண்டிருக்கிறது. இத்தீவுகள் பெரும்பாலும், சுண்ணாம்புக்கற்களையும், அவற்றின் பெரும்பாலான கடற்கரைகள், சுண்ணாம்புக்கற்கள்கொண்ட செங்குத்தான பாறைகள், வளைகுடாக்கள், மற்றும், கழிமுகங்களையும் கொண்டிருக்கின்றன. சிசிலித் தீவிற்கே தெற்கே (93 கி..மீ), லிபியா நாட்டிற்கு வடக்கே (290 கி.மீ), துனிசியாவிற்கு கிழக்கே (290 கி.மீ.) இத்தீவு அமைந்துள்ளது. 316 சதுர கிலோ மீட்டர் பரப்பளவில், ஏறத்தாழ ஐந்து இலட்சத்து 16 ஆயிரம் மக்களைக் கொண்டிருக்கும் இத்தீவு நாடு, பரப்பளவில், உலகில் பத்தாவது சிறிய நாடாகவும், இறையாண்மைபெற்ற நாடுகளில் மக்கள் தொகையை அதிகமாகக் கொண்டிருக்கும் நான்காவது நாடாகவும் உள்ளது. மால்ட்டாவின் தலைநகரமான வல்லேட்டா, ஐரோப்பிய ஒன்றியத்தில் சிறிய தேசிய தலைநகரமாக அமைந்துள்ளது. வரலாற்று புகழ்பெற்ற வல்லெட்டா நகரத்தில் அமைந்துள்ள, 16ம் நூற்றாண்டு கட்டடங்கள், உலகப் பாரம்பரிய அடையாளங்களாக, 1980ம் ஆண்டில் யுனெஸ்கோவினால் அறிவிக்கப்பட்டுள்ளது. மால்ட்டா, பொதுவாக, நகர நாடு என்றே குறிப்பிடப்பட்டாலும், பெருநகரங்கள் பட்டியலிலும் அது இணைக்கப்பட்டுள்ளது. இந்நாட்டின் அதிகாரப்பூர்வ மொழிகள், ஆங்கிலம், மற்றும், மால்ட்டீஸ் ஆகும். எனினும், 66 விழுக்காட்டு மால்ட்டா மக்கள், இத்தாலிய மொழியையும் பேசுகின்றனர். இயற்கைச் சூழல் மால்ட்டா கடல்பகுதியில், மத்தியதரைக் கடல் பகுதிகளுக்கே உரிய கடற்பாசிகள் மற்றும், மரவடைகள் அதிகமாக உள்ளன. மேலும், மால்ட்டா காடுகளின் பெரும்பகுதி மரவேலைகளுக்கும், வேளாண்மைக்கும் அழிக்கப்பட்டுள்ளன, ஆயினும் அக்காடுகளில் சில ஊசியிலை மரங்களைக் காண முடிகின்றது என்று சொல்லப்படுகிறது. அந்நாட்டில் இஸ்பானியச் சிட்டுக் குருவிகளை அதிகமாகக் காணலாம். நீலப் பாறை பாடும் பறவை, அந்நாட்டின் தேசிய பறவையாகும். மால்ட்டாவில், 96 விழுக்காட்டினர் மால்ட்டீஸ் இனத்தவர். 2 விழுக்காட்டினர் பிரித்தானியர். சிந்து, பாலஸ்தீனியர், கிரேக்கர் போன்ற இனத்தவரும் உள்ளனர். இந்நாட்டில் 2000மாம் ஆண்டுகளில் ஆப்ரிக்காவின் சஹாராவையடுத்த பகுதிகளிலிருந்து மக்கள் குடியேறத் தொடங்கியுள்ளனர். மால்ட்டாவின் இதமான காலநிலையும், அந்நாட்டில் அமைந்துள்ள கலையழகுமிக்க, மற்றும், வரலாற்று நினைவிடங்களும், சுற்றுலாப் பயணிகளை அதிகமாக ஈர்த்து வருகின்றன. மதம் உலகில் கிறிஸ்தவம் பரவத்தொடங்கிய காலக்கட்டத்தில், மால்ட்டா முஸ்லிம்களால் ஆளப்பட்டுவந்தாலும், அந்நாட்டில் கிறிஸ்தவர்கள் ஏற்றுக்கொள்ளப்பட்டதால், அந்நாட்டு மக்கள் பிரச்சனையின்றி தொடர்ந்து கிறிஸ்தவத்தைப் பின்பற்றி வந்தனர். 1091ம் ஆண்டில் முதலாம் ரோஜர் அவர்களால் மால்ட்டா ஆக்ரமிக்கப்பட்டபோது, அப்பகுதியில் முஸ்லிம்களின் ஆட்சி முடிவுக்கு வந்தது. இன்று, மால்ட்டாவில் கத்தோலிக்கம் அரசு மதமாகும். ஆயினும், அந்நாட்டு அரசியலமைப்பு, மனச்சான்று சுதந்திரம் மற்றும், மதச் சுதந்திரம் ஆகியவற்றுக்கு உறுதியளிக்கிறது. அந்நாட்டில் 85 விழுக்காட்டினர் கத்தோலிக்கர், மற்றும், 15 விழுக்காட்டினர் மற்ற மதத்தினர். இந்நாடு கத்தோலிக்கரைப் பெரும்பான்மையாகக் கொண்டிருந்தாலும், புதியவழியில் நற்செய்தி அறிவிக்கப்படவேண்டியதன் சவாலை எதிர்கொள்கிறது என்று கூறப்படுகிறது. மால்ட்டா நாடு சுதந்திரம் பெற்றபின்னர், 1965ம் ஆண்டு டிசம்பர் 15ம் தேதி அந்நாட்டிற்கும் திருப்பீடத்திற்கும் இடையே தூதரக உறவுகள் உருவாக்கப்பட்டன. [2022-03-31 23:16:07]


உக்ரைன் சென்றது திருத்தந்தை வழங்கிய மருத்துவ அவசர ஊர்தி

போரினால் பெரும் துன்பங்களை அடைந்துவரும் உக்ரேனிய மக்களுக்குத் தனது நெருக்கம், ஆதரவு மற்றும் உதவி ஆகியவற்றின் உறுதியான அடையாளமாக, Lviv நகருக்குத் திருத்தந்தை வழங்கிய மருத்துவ அவசர ஊர்தி ஒன்றைக் கொண்டு சென்றார், திருத்தந்தையின் தர்மச்செயல்களுக்குப் பொறுப்பான கர்தினால் Konrad Krajewski. உக்ரைனுக்குத் திருத்தந்தை கொடையாக வழங்கிய இந்த மருத்துவ அவசர ஊர்தியை அவரின் சார்பாக ஒப்படைப்பது எனக்குக் கிடைத்த பெரும் பாக்கியம் என்று கூறிய கர்தினால் Krajewski அவர்கள், மனித உயிர்களைக் காப்பாற்றப் பயன்படும் இந்த ஊர்தி ஒரு குறியீட்டு மதிப்பைப் பெற்றுள்ளது என்றும் தெரிவித்தார். திருத்தந்தை எப்போதும் உறவு பாலங்களைக் கட்டுபவர், அமைதியைக் கொண்டு வருபவர் என்றும், இந்த மருத்துவ அவசர ஊர்தி, குறிப்பாகத் துன்பப்படும் மக்களை அரவணைக்கும் திருத்தந்தையின் அடையாளமாக உள்ளது என்றும் கூறிய கர்தினால் Krajewski, “நான் உங்களுக்கு நெருக்கமாக இருக்கிறேன், நான் உங்களுடன் துயரப்படுகிறேன், மிகுந்த சிரமத்தில் இருக்கும் இந்த நாட்டிற்கு அமைதியைக் கேட்கிறேன், அதற்காக இறைஞ்சுகிறேன்” என்று கூறும் திருத்தந்தையின் அடையாளமாகவே இந்த ஊர்தி உள்ளது என்றும் எடுத்துரைத்தார். திருத்தந்தை வழங்கிய இந்த மருத்துவ அவசர ஊர்தியைப் பெற்றுக்கொண்ட உக்ரேனிய அதிகாரிகளில் ஒருவர், திருத்தந்தையின் அன்பிற்கும் செபத்திற்கும் நிறைந்த உள்ளத்துடன் நன்றி தெரிவித்ததுடன், இவ்வூர்தி புலம்பெயர்ந்து வரும் மக்களுக்குப் பேருதவியாக அமைந்துள்ளது என்று கூறியதாகவும் தெரிவித்தார் கர்தினால் Krajewski. உக்ரைனில் போர் தொடங்கிய பிறகு திருத்தந்தையின் நெருக்கத்தையும், ஆதரவையும் தெரிவிக்கும் விதமாக அந்நாட்டிற்கு கர்தினால் Krajewski மேற்கொண்ட இரண்டாவது பயணம் இதுவாகும். அவர், மார்ச் 6 முதல் 12 வரை Rivne, Zhovkva மற்றும் பிரச்சனைகளுக்குரிய சில இடங்களுக்கும் சென்று போரினால் பாதிக்கப்பட்ட மக்களைச் சந்தித்தார். [2022-03-31 23:09:20]


திருத்தந்தை: மன்னிப்பு, ஒரு மனித உரிமை

ஒப்புரவு அருளடையாளத்தைப் பெற வருகிறவர்கள், அந்நேரத்தில் தாங்கள் கூறுவது, இறைத்தந்தை தம் பிள்ளைகளுக்கென்று வைத்துள்ள நம்பிக்கை, மற்றும், பிறரன்பு ஆகியவற்றோடு கேட்கப்படுவதற்கு உரிமையைக் கொண்டிருக்கின்றனர் என்று திருத்தந்தை பிரான்சிஸ் அவர்கள், மார்ச் 25, இவ்வெள்ளியன்று கூறினார். Apostolic Penitentiary எனப்படும் வத்திக்கானின் மனச்சான்று பேராயம், மார்ச் 21 இத்திங்கள் முதல், 25 இவ்வெள்ளிவரை நடத்திய 32வது பயிற்சியில் பங்குபெற்ற நூற்றுக்கணக்கான அருள்பணியாளர்களை திருப்பீடத்தில் சந்தித்து உரையாற்றிய திருத்தந்தை, ஒப்புரவு அருளடையாளத்தை நிறைவேற்றும் அருள்பணியாளர்களிடம் மன்னிப்பு குறித்து எடுத்துரைத்தார். ஒப்புரவு அருளடையாளத்தை நிறைவேற்றும் அருள்பணியாளர்கள், அதைப் பெற வருபவர்களை வரவேற்று, அவர்கள் கூறுவதற்குச் செவிசாய்த்து, அவர்களோடு பயணிக்கவேண்டும், இவ்வாறு உதவுவதால், உலகில் ஓர் ஆன்மீகச் சூழலியல் உருவாக உதவமுடியும் என்று திருத்தந்தை கூறினார். கடவுளின் மன்னிப்பைத் தாராளமாக வழங்குவதன் வழியாக மக்களையும், உலகையும் குணமாக்குவதிலும், ஒவ்வொரு மனித இதயமும் ஏங்கும் அன்பு மற்றும், அமைதியைக் கொணர்வதிலும், அதாவது உலகில் ஓர் ஆன்மீகச் சூழலியலை உருவாக்குவதிலும் அருள்பணியாளர்களாகிய நாம் ஒத்துழைப்பாளர்களாக இருக்க இயலும் எனவும் திருத்தந்தை கூறினார். புனிதத்துவத்திற்கு அனைவரும் அழைக்கப்பட்டுள்ளனர் என்பதை, ஒப்புரவு அருளடையாளத்தை நிறைவேற்றுபவர்கள் எப்போதும் கருத்தில் கொண்டிருக்கவேண்டும் என்றும், அவ்வருளடையாளத்தைப் பெற வருபவர்கள், கடவுளின் திட்டத்தைப் புரிந்துகொள்ளவும், ஏற்கவும் உதவவேண்டும் என்றும் திருத்தந்தை எடுத்துரைத்தார். இறைத்தந்தையால் அன்புகூரப்படும் பிள்ளைகளாக அனைவரும் உணரும்வகையில், அனைவருக்கும் மன்னிப்பு தேவைப்படுகிறது என்றுரைத்த திருத்தந்தை, அருளடையாளத்தை நிறைவேற்றுபவர் வழங்கும் ஆசிர், ஆன்மாவிற்கு மிகவும் வல்லமைமிக்க மருந்து மற்றும், அனைவரின் மனதிற்கும் மருந்து என்று தெரிவித்தார். 2025ம் யூபிலி ஆண்டை மனச்சான்று பேராயத்திற்கு நினைவுபடுத்திய திருத்தந்தை, பாவத்திற்காக மனம் வருந்துதல், ஒவ்வொரு யூபிலிக்கும் மிக மையமாக அமைந்துள்ளது எனவும், கடவுளின் இரக்கம் அனைவரையும் சென்றடையும்வண்ணம் யூபிலி ஆண்டு பயனுள்ளதாக அமைய கவனமுடன் செயலாற்ற வேண்டும் எனவும் கேட்டுக்கொண்டு தன் உரையை நிறைவுசெய்தார். [2022-03-26 23:43:24]


அன்னை மரியாவுக்கு அர்ப்பணித்ததில் இரஷ்ய கத்தோலிக்கர் நம்பிக்கை

உலகமனைத்தையும், குறிப்பாக, இரஷ்யா, மற்றும், உக்ரைன் ஆகிய இரு நாடுகளை அன்னை மரியாவின் களங்கமில்லா திருஇதயத்திற்கு அர்ப்பணிப்பது, நம்பிக்கையின் அன்னையாகிய மரியா மீது, கத்தோலிக்கர், வைத்திருக்கும் நம்பிக்கையின் வெளிப்பாடாகும் என்று, மாஸ்கோ, இறையன்னை உயர்மறைமாவட்ட முதன்மை குரு Kirill Gorbunov அவர்கள் கூறினார். திருத்தந்தை பிரான்சிஸ் அவர்கள், உலகையும், இவ்விரு நாடுகளையும், அன்னை மரியாவுக்கு அர்ப்பணித்தது குறித்து வத்திக்கான் செய்திகளுக்குப் பேட்டியளித்த, அருள்பணி Gorbunov அவர்கள், இந்நிகழ்வு, புனித கன்னி மரியா மீது நாம் வைத்துள்ள ஆழமான நம்பிக்கை மற்றும் பக்தியின் வெளிப்பாடாகவும், இது, போர்கள் அனைத்தும் முடிவுறும் என்பதற்கு ஒரு மாயவித்தை அல்ல எனவும் குறிப்பிட்டார். திருத்தந்தை இந்நிகழ்வை மேற்கொண்டதன் முக்கியத்துவம், இரஷ்யா உக்ரைனை ஆக்ரமித்து போரிட்டுவரும் இவ்வேளையில் இரஷ்யர்களின் மனநிலை என்ன? இந்த அர்ப்பணிப்பு கத்தோலிக்கருக்கு மட்டுமா அல்லது மற்ற மக்களுக்கும் உரியதா? போன்ற கேள்விகளுக்கும் பதிலளித்தார், அருள்பணி Gorbunov. இந்த அர்ப்பண நிகழ்வு, உக்ரைனில் தற்போதுள்ள நிலவரத்தை மாற்றுவதற்கு சில புதுமையை ஆற்றும் என்ற ஏமாற்று செயல் அல்ல என்றும், ஆயினும், இப்பெருந்துயருக்கு ஓர் அமைதியான தீர்வு காண மக்களின் மனங்களில் ஒரு மாற்றத்தை இது உருவாக்கும் என்று நம்புகிறோம் என்றும், அருள்பணி Gorbunov அவர்கள் கூறினார். தற்போதைய நிலவரம் இரஷ்யாவிலுள்ள எமக்கு அதிர்ச்சியாகவும், நிச்சயமற்ற உணர்வையும் கொடுத்துள்ளது என்றும், இந்த மாதிரிப் போர் இடம்பெறும் என்று எவருமே நினைத்துப் பார்க்கவில்லை என்றும் உரைத்த அருள்பணி Gorbunov அவர்கள், அமைதி மற்றும் உரையாடலின் அவசியம் குறித்தும் வலியுறுத்திக் கூறினார். மார்ச் 25, இவ்வெள்ளி உரோம் நேரம் மாலை ஐந்து மணிக்கு, வத்திக்கான் தூய பேதுரு பெருங்கோவிலில் துவங்கிய "ஆண்டவரோடு 24 மணி நேரங்கள்" என்ற தவக்கால திருவழிபாட்டின் இறுதியில், திருத்தந்தை பிரான்சிஸ் அவர்கள், உலகின் அனைத்து ஆயர்களோடு ஆன்மீக முறையில் ஒன்றித்து, இரஷ்யாவையும், உக்ரைனையும் அன்னை மரியாவின் களங்கமற்ற திருஇதயத்திற்கு அர்ப்பணித்து செபித்தார். [2022-03-26 23:37:35]


இரஷ்யா மற்றும் உக்ரைனை அன்னைக்கு அர்ப்பணிக்கும் திருத்தந்தை

மார்ச் 25, வெள்ளியன்று திருத்தந்தை பிரான்சிஸ் அவர்கள் இரஷ்யா மற்றும் உக்ரைன் நாடுகளை அமல அன்னையின் மாசற்ற திருஇதயத்திற்கு அர்ப்பணித்து இறைவேண்டல் செய்யும் திருச்சடங்கின் அதிகாரப்பூர்வ உரையைத் திருப்பீடச் செய்தி தொடர்பகம் வெளியிட்டுள்ளது. புனித பேதுரு பெருங்கோவிலில் உரோம் நேரப்படி மாலை 5 மணிக்குத் தொடங்கும் "இறைவனுக்கான 24 மணிநேரம்" என்ற தலைப்பிலான மன்னிப்பு வழிபாட்டின்போது இந்த அர்ப்பணிப்பு நிகழ்வு நடத்தப்படும் என்றும் மாலை 6.30 மணிக்கு இதற்கான இறைவேண்டலை திருத்தந்தை நிகழ்த்துவார் என்றும் திருப்பீடச் செய்தித் தொடர்பகம் தெரிவிக்கிறது. மரியாவின் களங்கமில்லா திருஇதயத்திற்கு அர்ப்பணிப்பு ஓ மரியே, இறைவனின் அன்னையும், எம் அன்னையுமானவரே, இக்கொடுந்துன்ப நேரத்தில், நாங்கள் உம்மை நாடிவருகிறோம். நீர் எம் அன்னை. நீர் எம்மை அன்புகூர்கிறீர், எம்மை அறிந்திருக்கிறீர். நாங்கள் எங்கள் இதயத்தில் மறைத்து வைத்திருப்பது எதுவும் உமக்கு மறைவாயில்லை. இரக்கத்தின் அன்னையே, பல நேரங்களில் நாங்கள் உமது கனிவுள்ள பராமரிப்பை அனுபவித்துள்ளோம். உமது பிரசன்னம் எமக்கு அமைதியைக் கொணர்கின்றது. ஏனெனில் நீர் எப்போதும் எம்மை அமைதியின் இளவரசராம் இயேசுவிடம் வழிநடத்திச் செல்கின்றீர். ஆயினும் நாங்கள் அமைதியின் பாதையை இழந்து நிற்கிறோம். கடந்த நூற்றாண்டின் கொடுந்துயரங்களிலிருந்து கற்றுக்கொண்ட பாடங்களை, உலகப் போர்களில் உயிரிழந்த இலட்சக்கணக்கான மக்களின் தியாகத்தை நாங்கள் மறந்துவிட்டோம். நாடுகளின் ஒரே குழுமமாக நாங்கள் மேற்கொண்ட அர்ப்பணங்களை புறக்கணித்துவிட்டோம். மக்களின் அமைதிக்கான கனவுகள், மற்றும், இளையோரின் நம்பிக்கைகளுக்குத் துரோகம் செய்துவருகிறோம். பேராசையால் நோயாளிகளாக மாறிவிட்டோம். தேசிய நலன்களுக்குள் எம்மை முடக்கிவைத்துள்ளோம். புறக்கணிப்பு மற்றும், தன்னலத்தால் முடங்கிக்கிடக்க எம்மையே அனுமதித்துள்ளோம். எம் அயலவர், மற்றும், பொதுவான இல்லமாகிய இப்பூமியின் பாதுகாவலர்கள் என்பதை மறந்து, கடவுளை மறக்கவும், எம் தவறுகளோடு வாழவும், பகைமையைப் பேணிவளர்க்கவும், மனித வாழ்வை அழிக்கவும் ஆயுதங்களைச் சேமிக்கவும் நாங்கள் விரும்புகிறோம். இப்பூமியின் தோட்டத்தை போரால் நாசமாக்குகிறோம். சகோதரர், சகோதரிகளாக வாழவேண்டும் என்று விரும்புகின்ற இறைத்தந்தையின் இதயத்தைப் பாவத்தால் காயப்படுத்தியுள்ளோம். ஒவ்வொருவரும் தன்னைத் தவிர மற்ற எல்லாரையும் புறக்கணிப்பவர்களாக மாறிவிட்டோம். ஆண்டவரே, எம்மை மன்னித்தருளும்! என வெட்கத்தோடு கூறுகிறோம். பாவத்தின் துயரில், எம் சோர்வு மற்றும் பலவீனத்தில், தீமை மற்றும் போர்க் கொடுமையின் புதிரான நிலையில், கடவுள் எம்மைக் கைவிடவில்லை, அவர் எம்மை தொடர்ந்து அன்போடு நோக்குகிறார், எம்மை மன்னிக்கவும் எம்மைத் தூக்கிவிடவும் ஆவலாக இருக்கிறார் என்பதை, புனித அன்னையே நீர் எமக்கு நினைவூட்டும். அன்னையே, கடவுளே உம்மை எமக்கு அளித்தார். திருஅவை மற்றும், மனித சமுதாயத்தின் புகலிடமாக உமது அமல இதயத்தில் எம்மை அவர் வைத்தார். உமது விண்ணக நன்மைத்தனத்தில் நீர் எம்மோடு இருக்கின்றீர். வரலாற்றின் வேதனையோடு உம்மிடம் வரும்போதுகூட நீர் எம்மை உம் கனிவன்பால் வழிநடத்துகிறீர். எனவே அன்னையே, உம்மை நோக்கி மன்றாடுகிறோம். எமக்காக உம் இதயக் கதவைத் தட்டுகிறோம். உம் அன்புப் பிள்ளைகளாகிய நாங்கள், எல்லா நேரங்களிலும் உம்மைச் சந்திப்பதற்கு ஒருபோதும் சோர்வடைவதில்லை. இருளான இந்நேரத்தில் எமக்கு உதவிசெய்தருளும், எமக்கு ஆறுதலளித்தருளும். நான் உங்கள் அன்னை அல்லவா, நான் இங்கே இருக்கவில்லையா என, எம் ஒவ்வொருவரிடமும் கூறும். எம் இதயங்களின் சிக்கல்கள் மற்றும், எம் காலத்தின் முடிச்சுகளை அவிழ்த்துவிடுவது எவ்வாறு என்பது உமக்குத் தெரியும். அன்னையே நீர், குறிப்பாக இச்சோதனை காலத்தில் எம் வேண்டுதல்களைப் புறக்கணிக்கமாட்டீர், எமக்கு உதவிபுரிய வருவீர் என்பதில் நாங்கள் உறுதியாய் இருக்கிறோம். கலிலேயாவின் கானாவில் இயேசுவின் தலையீட்டுக்காக விரைந்து செயலாற்றி, அவர் உலகிற்கு முதல் புதுமையை ஆற்றச் செய்தீர். திருமண விழா சோகமாக மாறியபோது, “திராட்சை இரசம் தீர்ந்துவிட்டது” (யோவா.2:3) என்று நீர் அவரிடம் கூறினீர். ஓ அன்னையே, அதையே மீண்டும் இறைவனிடம் கூறும். ஏனெனில், இன்று நாங்கள் நம்பிக்கை என்ற திராட்சை இரசம் இல்லாமல் இருக்கின்றோம். மகிழ்ச்சி மறைந்துவிட்டது. வன்முறைகள் மற்றும் அழிவை நடத்த திறமையுள்ளவர்களாக மாறிவிட்டோம். உமது அன்னைக்குரிய தலையீடு எமக்கு அவசரமாகத் தேவைப்படுகின்றது. ஓ அன்னையே, எம் மன்றாட்டுக்களை ஏற்றருளும். கடலின் விண்மீனே, போர் என்ற புயலின் சேதங்களுக்கு அனுமதிக்காதேயும். புதிய உடன்படிக்கைப் பேழையே, ஒப்புரவுத் திட்டங்கள் மற்றும் பாதைகளை எம்மில் தூண்டியருளும் விண்ணகத்தின் மண்ணகமே, கடவுளின் உடன்படிக்கையை உலகிற்குக் கொணரும். பகைமைத் தீயை அணைத்தருளும். பழிவாங்குதலைத் தணித்தருளும், மன்னிப்பைக் கற்றுத்தாரும் போரிலிருந்து எம்மை விடுவித்தருளும், அணு ஆயுத அச்சுறுத்தலிலிருந்து உலகைக் காப்பாற்றும். செபமாலையின் அரசியே, செபிக்கவும் அன்புகூரவும் உள்ள தேவையை எம்மில் தட்டியெழுப்பியருளும் மனிதக் குடும்பத்தின் அரசியே, உடன்பிறந்த உணர்வுநிலையின் பாதையை மக்களுக்குக் காட்டியருளும். அமைதியின் அரசியே, உலகுக்கு அமைதியைப் பெற்றுத்தாரும். ஓ அன்னையே, உம் கண்ணீர்கள், எம் கடின இதயங்களை இளகச்செய்யும். நீர் எமக்காகச் சிந்திய கண்ணீர்த் துளிகள், எம் பகைமையால் வறண்டுபோயுள்ள இத்துன்ப பள்ளத்தாக்கை மலரச்செய்வனவாக. ஆயுதங்களின் சப்தம் அடங்காதவேளை, உம் செபம் அவற்றை அமைதிப்படுத்தும். குண்டுகளின் தாக்குதலால் துன்புறும் மற்றும், இடங்களைவிட்டு வெளியேறும் மக்களை, உம் தாய்மைக்குரிய கரங்களால் அரவணைத்தருளும். உம் தாய்க்குரிய அரவணைப்பு, தங்கள் வீடுகள் மற்றும் நாட்டைவிட்டு கட்டாயமாக வெளியேறும் மக்களுக்கு ஆறுதலாயிருப்பதாக. உமது துயர் நிறைந்த இதயம், காயமடைந்தவர்கள் மற்றும், சமுதாயத்தில் புறக்கணிக்கப்பட்டவர்களைப் பராமரிக்கவும், அவர்களுக்குக் கதவுகளைத் திறந்துவிடவும் நாங்கள் பரிவன்புடன் இருக்கச் செய்வதாக. இறைவனின் புனித அன்னையே, நீர் சிலுவையடியில் நின்றபோது, உமக்கு அருகில் நின்ற சீடரைப் பார்த்து, இயேசு உம்மிடம் “அம்மா, இவரே உம் மகன்” (யோவா.19:26) என்றார். அவ்வாறு அவர் எம் ஒவ்வொருவரையும் உம்மிடம் ஒப்படைத்தார். பின்னர், சீடரிடமும், எம் ஒவ்வொருவரிடமும் அவர் “இவரே உம் தாய்” (வச. 27) என்றார். அன்னையே, இப்போது நாங்கள் உம்மை எம் வாழ்விலும் உலகிலும் வரவேற்க விரும்புகிறோம். சோர்வடைந்தும் கலக்கமடைந்தும் இருக்கும் மனித சமுதாயம் உம்மோடு சிலுவையடியில் நிற்கின்றது. அது உம்மிடம் தன்னை கையளிக்கவேண்டும், உம் வழியாக கிறிஸ்துவிடம் தன்னை அது அர்ப்பணிக்கவேண்டும். உமது தூய இதயம், உக்ரேனிய மற்றும் இரஷ்ய மக்களுக்காகவும், போர், பசி, அநீதி மற்றும் கடுந்துயர் ஆகியவற்றால் துன்புறும் அனைத்து மக்களுக்காகவும் துடிக்கின்றது. இவ்வேளையில் உம்மை அன்போடு வணங்குகின்ற, உக்ரேனிய மற்றும் இரஷ்ய மக்கள் உம்மிடம் வேண்டுகின்றனர். எனவே இறைவனின் அன்னையே, நாங்கள் எம்மையும், திருஅவையையும் மனித சமுதாயம் அனைத்தையும், குறிப்பாக, இரஷ்யா மற்றும் உக்ரேனை, உமது களங்கமற்ற அமல இதயத்திடம் ஒப்படைக்கின்றோம், அதற்கு அர்ப்பணிக்கின்றோம். நம்பிக்கை மற்றும் அன்போடு நாங்கள் ஆற்றும் இந்த எம் அர்ப்பணத்தை ஏற்றருளும். போரை முடிவடையச் செய்யும். உலகிற்கு அமைதியை வழங்கும். உம் இதயத்திலிருந்து வெடித்துச் சிதறும் 'ஆகட்டும்' என்பது, வரலாற்றின் கதவுகளை அமைதியின் இளவரசருக்குத் திறக்கின்றது. உமது இதயத்தின் வழியாக அமைதி வரும் என நம்புகிறோம். முழு மனிதக் குடும்பத்தின் வருங்காலம், மக்களின் தேவைகள் மற்றும் எதிர்பார்ப்புகள், உலகின் ஏக்கங்கள், மற்றும் நம்பிக்கைகள் ஆகிய அனைத்தையும் அன்னையே உமக்கு அர்ப்பணிக்கின்றோம். உம் வழியாக இறை இரக்கம் இப்பூமியின் மீது பொழியப்படுவதாக. அமைதியின் இனிமையான துடிப்பு மீண்டும் எம் நாள்களைக் குறிப்பதாக. தூய ஆவியார் இறங்கிவந்த ஆகட்டும் என்றுரைத்த பெண், நம் மத்தியில் கடவுளின் நல்லிணக்கத்தைக் கொணர்வாராக. அவர், நம் இதயங்களின் வறட்சியை அகற்றுவாராக. நம்பிக்கையின் வற்றாத ஊற்றே மரியே, நீர் மனித குலத்தை இயேசுவிடம் கொணர்ந்தீர். எம்மை ஒன்றிப்பின் கைவினைஞர்களாக ஆக்கியருளும். எம் பாதைகளில் நீர் நடந்து வருகின்றீர். அமைதியின் பாதைகளில் எம்மை வழிநடத்தும். ஆமென். [2022-03-25 01:41:09]


நேர்காணல்: மறைசாட்சி அருளாளர் தேவசகாயம்

மறைசாட்சி தேவசகாயம், இன்றைய குமரி மாவட்டத்திலுள்ள நட்டாலம் என்னும் கிராமத்தில் 1712ஆம் ஆண்டு, ஏப்ரல் 23 ஆம் நாளன்று நாயர் குலத்தில் பிறந்தார். இவரின் இயற்பெயர் நீலகண்ட பிள்ளை என்பதாகும். சிறுவயதிலேயே சமசுகிருதம், கலை ஆகியவற்றை படித்து அறிந்தார். இளைஞரானதும் வில் வித்தை, வர்ம கலைகள், மற்றும், போர்க் கருவிகளைப் பயன்படுத்தும் முறைகளையும் படித்து அறிந்தார். அதன்பின்னர் இவர் மார்த்தாண்ட வர்மாவின் அரண்மனையான பத்மநாபபுரம் கோட்டையில் பணியில் அமர்த்தப்பட்டார். இவருக்கும் மேக்கோடு என்னும் ஊரைச் சேர்ந்த பர்கவியம்மாளுக்கும் திருமணம் நடைபெற்றது. 1741ம் ஆண்டில் குளச்சல் துறைமுகத்தைப் பிடிக்க வந்த டச்சுப் படைகள் மார்த்தாண்ட வர்மாவின் படைகளால் தோற்கடிக்கப்பட்டன. டச்சு படைத்தலைவரான கத்தோலிக்க மதத்தைச் சார்ந்த பெனடிக்டுஸ் தே டிலனாய் அவருடைய படைகளுடன் சிறைப்பிடிக்கப்பட்டார். நாளடைவில் இந்த டிலனாய், நீலகண்ட பிள்ளையின் நண்பரானார். ஒருநாள் நீலகண்ட பிள்ளை மிகுந்த சோகமாய் இருப்பதைக் கண்ட அவர் நலம் விசாரித்தார். அப்போது நீலகண்ட பிள்ளை குடும்பத்தில் நிறைய துக்க காரியங்கள் நிகழ்ந்து கொண்டிருப்பதாகவும், தங்கள் கால் நடைகள் இறந்து போவதாகவும். பயிர்கள் நாசம் அடைந்து போவதாகவும், பொருளாதார ரீதியாகப் பெரும் நஷ்டம் ஏற்பட்டுள்ளதாகவும் தெரிவித்தார். அப்போது திருவிவிலியத்தில் உள்ள யோபுவின் கதையை சொல்லிக் கிறித்தவத்தை டிலனாய் அவருக்கு அறிமுகப்படுத்தினார். நாளடைவில் கிறித்தவத்தின் மீது நல்ல நம்பிக்கை வந்ததும் திருமுழுக்குப் பெற்று கிறித்தவராக நீலகண்ட பிள்ளை விருப்பம் கொண்டார். திருநெல்வேலி மாவட்டத்தின் வடக்கன்குளம் கத்தோலிக்க ஆலயத்தின் பங்குத்தந்தையாகப் பணிபுரிந்த ஜொவான்னி பத்தீஸ்தா புத்தாரி இவர் நீலகண்ட பிள்ளைக்குத் திருமுழுக்கு வழங்கி, "தேவசகாயம்" என்னும் பொருள்தருகின்ற "இலாசர்" என்னும் பெயரைச் சூட்டினார். அவரின் மனைவியும் ஞானப்பூ எனும் பெயருடன் திருமுழுக்கு பெற்று கத்தோலிக்க கிறித்தவர் ஆனார். தேவசகாயம், கத்தோலிக்க மதத்திற்கு மாறியதும், இந்துப் பாரம்பரிய நாயர் குடும்பங்களில் இருந்த மூட நம்பிக்கைகளை எதிர்த்தார். எனவே இவருக்கெதிராகப் பல பொய் குற்றச்சாட்டுகள் அரசு அதிகாரிகளால் சுமத்தப்பட்டன. பலரும் அவரை மீண்டும் இந்து மதத்திற்கு மதம் மாறும்படி வற்புறுத்தினார்கள். ஆயினும் இவர் கிறித்தவ நம்பிக்கையில் உறுதியாக இருந்தார். இதனால் தேவசகாயம் அவர்கள், மூன்று ஆண்டுகள் கடுமையான சித்ரவதைகளுக்கு உட்பட்டு 1752-ஆம் ஆண்டு சனவரி மாதம் 14ம் தேதி தென் திருவாங்கூர் மன்னராக ஆட்சிசெய்த மார்த்தாண்ட வர்மா காலத்தில், குமரி மாவட்டத்தில், ஆரல்வாய்மொழியில் உள்ள காற்றாடி மலை என்னும் இடத்தில் சுட்டுக் கொல்லப்பட்டார். சிறைத்தண்டனை அருளாளர் தேவசகாயம் அவர்கள், சிறையில் அடைக்கப்பட்டு பல்வேறு முறைகளில் மூன்று ஆண்டுகள் சித்ரவதைகளுக்கு உள்ளானார். அவருடைய உடம்பில் கரும்புள்ளியும், செம்புள்ளியும் குத்தப்பட்டன. கைகள் பின்புறமாகக் கட்டப்பட்டு கழுத்தில் எருக்கம் பூ மாலை அணிவிக்கப்பட்டு எருமை மாட்டின் மீது பின்னோக்கி அமரவைத்து அவரைக் கேவலப்படுத்தும் படியாகவும் கிறிஸ்தவத்திற்கு மாறினால் இப்படித்தான் மற்றவருக்கும் இருக்கும் என்பதற்கு பாடமாகவும் அவரை ஊர்ஊராக அழைத்துச் சென்றார்கள். இவர் தான் இறப்பதற்கு முன்பாகத் தன்னை சந்தித்த அருள்பணியாளரிடமிருந்து திருநற்கருணை பெற்றுக்கொண்டார். தேவசகாயம் பிள்ளையின் உடல் காட்டிலேயே எறியப்பட்டது. குமரி மாவட்ட கத்தோலிக்க மக்கள் அவரது உடல் பகுதிகளை எடுத்து, நாகர்கோவிலில் உள்ள கோட்டாறு புனித சவேரியார் கோவிலில் அடக்கம் செய்தனர். (நன்றி https://www.church.catholictamil.com) மறைசாட்சி தேவசகாயம் அவர்கள், 2012ஆம் ஆண்டு, டிசம்பர் மாதம் 02ம் தேதியன்று அருளாளர் என அறிவிக்கப்பட்டார். 2022ம் ஆண்டு மே மாதம் 15ம் தேதி அவர் புனிதராக அறிவிக்கப்படவுள்ளார். இந்நிகழ்வையொட்டி, கோட்டாறு மறைமாவட்டத்தின் அருள்முனைவர் ஜான் குழந்தை அவர்கள், வத்திக்கான் வானொலியில் மறைசாட்சி தேவசகாயம் அவர்களின் வாழ்க்கை பற்றி விரிவாகப் பேசினார். ஒவ்வோர் இல்லத்திற்குள்ளும் திருத்தந்தையின் வார்த்தையை நாங்கள் கொணர்வதில் உங்களின் ஆதரவு ஒவ்வோர் இல்லத்திற்குள்ளும் திருத்தந்தையின் வார்த்தையை நாங்கள் கொணர்வதில் உங்களின் ஆதரவு 22 March 2022, 08:14 அனுப்புக அச்சிடுக Angelus prayer and Holy Rosary 25-03-2022 11:00 Angelus prayer and Holy Rosary From St Peter's Basilica, recitation of the Angelus prayer and Rosary மேலும் வரவிருக்கும் நிகழ்வுகள்: 25-03-2022 15:55 Penance Celebration and Act of Consecration 25-03-2022 18:00 Basilica of Saint Andrew delle Fratte, Holy ஒலியோடையை கேட்க ஒலியோடையை கேட்க செய்தி மடல் செய்தி மடல் அண்மைச் செய்திகள் பெற சாந்தா மார்த்தா மறையுரை சாந்தா மார்த்தா மறையுரை மூவேளை செப உரை மூவேளை செப உரை மறைக்கல்வி உரை மறைக்கல்வி உரை ஓர் உயரிய பணிக்கு உங்களின் பங்களிப்பு.ஓர் உயரிய பணிக்கு உங்களின் பங்களிப்பு. Vatican News திருத்தந்தையின் பயணங்கள் மூவேளை செபம் சாந்தா மார்த்தா திருப்பலி திருத்தந்தை மறைக்கல்வியுரை பயனுள்ள தகவல் நாங்கள் யார் தொடர்புக்கு சட்ட அறிவிப்புகள் Privacy Policy Cookie Policy Faq மற்ற இணையதளங்கள் Vatican.va Vaticanstate.va Peter's Pence Photovat.com மற்ற சேனல்கள் Schedules ஒலியோடை செய்திமடல் பதிவு Short Waves பதிவிறக்கத்திற்கு Facebook Youtube Instagram Rss Copyright © 2017-2022 Dicasterium pro Communicatione - அ [2022-03-25 01:31:11]


சீன விமான விபத்தில் இறந்தோருக்குத் திருத்தந்தை இரங்கல்

வில் நிகழ்ந்த விமான விபத்தில் இறந்தோருக்குத் திருத்தந்தை பிரான்சிஸ் அவர்கள் தனது ஆழ்ந்த இரங்கலைத் தெரிவித்துள்ளார். மார்ச் 21, இத்திங்களன்று சீனாவின் குவாங்சியில் நடந்த நிகழ்த்த விமான விபத்தில் இறந்தோருக்கு திருத்தந்தை பிரான்சிஸ் அவர்கள் பெயரில் தந்தி செய்தி ஒன்றை, சீன அரசுத் தலைவருக்குக் கையெழுத்திட்டு அனுப்பியுள்ளார் திருப்பீடச் செயலர் கர்தினால் பியெத்ரோ பரோலின். இந்த விபத்தில் இறந்த அனைவருக்கும் தனது ஆழ்ந்த இரங்கலைத் தெரிவிப்பதாகவும், அவர்களை இழந்து தவிக்கும் அவர்தம் குடும்பங்களுக்கு தனது நெருக்கத்தை வெளிப்படுத்துவதோடு அவர்களுக்காக இறைவேண்டல் செய்வதாகவும் அத்தந்தி செய்தியில் குறிப்பிட்டுள்ளார் திருத்தந்தை பிரான்சிஸ். மார்ச் 21 திங்களன்று, 132 பேருடன் பயணித்த சீனாவின் ஈஸ்டர்ன் ஏர்லைன்ஸ் நிறுவனத்திற்குச் சொந்தமான MU5735 விமானம் குவாங்சி மாநிலத்தில் மலைப்பகுதி ஒன்றில் மோதி பெரும் விபதிக்குள்ளானதில் அதில் பயணம் செய்த அனைவரும் உயிரிழந்திருக்கலாம் என அஞ்சப்படுகிறது. விமானத்தில் 123 பயணிகளும் 9 பணிக்குழுவினரும் இருந்தனர் என சீன விமானப் போக்குவரத்துத் துறை கூறியுள்ள நிலையில், உயிரிழந்தவர்களின் எண்ணிக்கை மற்றும் விபத்துக்கான காரணம் இன்னும் முழுமையாகத் தெரியவில்லை. எனினும் இதுவரை உயிர்பிழைத்தோர் பற்றிய தகவல் ஏதும் இல்லை. மேலும், இவ்விமானம் சாதாரணமாகத் தரையிறங்குவதற்கு முன்பாக கீழே இறங்கத் தொடங்கும் நேரத்தில், பயண உயரத்திலிருந்து திடீர் சரிவு ஏற்பட்டதால் இந்த விபத்து நிகழ்ந்ததாகச் செய்திகள் தெரிவிக்கின்றன. ஒவ்வோர் இல்லத்திற்குள்ளும் திருத்தந்தையின் வார்த்தையை நாங்கள் கொணர்வதில் உங்களின் ஆதரவு ஒவ்வோர் இல்லத்திற்குள்ளும் திருத்தந்தையின் [2022-03-24 03:23:49]


திருத்தந்தை: உக்ரைனில் அமைதி நிலவ ஒன்றிணைந்து செபிப்போம்

உக்ரைன் நாட்டில் அமைதி நிலவ ஒன்றிணைந்து கடவுளை இறைஞ்சுவோம் என்று, மார்ச் 22, இச்செவ்வாயன்று திருத்தந்தை பிரான்சிஸ் அவர்கள், தன் டுவிட்டர் பக்கத்தில் வெளியிட்டுள்ள குறுஞ்செய்தி வழியாக கேட்டுக்கொண்டுள்ளார். “மரியாவுக்கு இயேசு பிறப்பு அறிவிக்கப்பட்ட திருநாளாகிய மார்ச் 25, வருகிற வெள்ளிக்கிழமையன்று மனித சமுதாயத்தை, குறிப்பாக, இரஷ்யா மற்றும், உக்ரைனை மரியாவின் களங்கமற்ற இதயத்திற்கு அர்ப்பணிக்கவுள்ளேன், இதன் வழியாக, அமைதியின் அரசியாம் அன்னை மரியா, அமைதியைப் பெறுவதற்கு நமக்கு உதவுவார். இந்த அர்ப்பணிப்பு நிகழ்வில், என்னோடு ஒன்றித்திருக்குமாறு அனைத்து குழுமங்கள் மற்றும், நம்பிக்கையாளர்களுக்கு அழைப்புவிடுக்கிறேன்” என்ற சொற்களை திருத்தந்தை, தன் டுவிட்டர் செய்தியில் பதிவுசெய்துள்ளார். இந்த அர்ப்பணிப்பு நிகழ்வின்போது, முன்னாள் திருத்தந்தை 16ம் பெனடிக்ட் அவர்கள், தான் தங்கியிருக்கும் இல்லத்திலிருந்தே திருத்தந்தை பிரான்சிஸ் அவர்களோடு ஒன்றிணைவார் என்று அறிவிக்கப்பட்டுள்ளது. உக்ரைன் குறித்து கர்தினால் மாரியோ கிரெக் [2022-03-22 22:20:37]


பக்க இலக்கங்களை அழுத்தி எல்லா செய்திகளையும் பார்வையிடவும்