வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



நம்பிக்கைக்கொள்வோருக்கு இரக்கத்தை வழங்கும் இறைவன்

தங்களை உயர்ந்தவர்களாக எண்ணாமல், தாழ்ச்சி பண்புடன் வாழும் மக்கள் வழியாக இறைவன் அரும்பெரும் செயல்களை ஆற்றுகிறார் என, ஜனவரி 8, சனிக்கிழமையன்று வெளியிட்ட டுவிட்டர் செய்தியில் கூறியுள்ளார் திருத்தந்தை பிரான்சிஸ். தாழ்ச்சி பண்புடன் வாழ்வதுடன், தங்கள் வாழ்வில் இறைவனுக்கு அதிக இடத்தைக் கொடுப்பவர் வழியாக அரும்பெரும் செயல்களை ஆற்றும் இறைவன், அவரில் நம்பிக்கைக் கொள்வோருக்கு இரக்கத்தை வழங்குவதுடன், தங்களைத் தாழ்த்துவோரை உயர்த்துகிறார் என ஜனவரி 8ம் தேதி சனிக்கிழமையன்று வெளியிட்ட திருத்தந்தையின் டுவிட்டர் செய்தி உரைக்கிறது. மேலும், இதே நாளில் திருத்தந்தை பிரான்சிஸ் அவர்கள், ஆயர்களுக்கான திருப்பீட அவையின் தலைவர் கர்தினால் Marc Quallet, திருபீடத்திற்கான எகிப்தின் தூதர் Mahmoud Talaat, போலந்தின் செனட் அவைத்தலைவர் Tomasz Grodzki, உரோம் மேயர் Roberto Gualtieri, Lazio மாகாணத் தலைவர் Nicola Zingaretti, மற்றும் புனித பேதுரு பவுல் அமைப்பின் அங்கத்தினர்களையும் திருப்பீடத்தில் சந்தித்து உரையாடினார். [2022-01-10 01:17:59]


திருஅவையில் இவ்வாண்டில் இடம்பெற உள்ள 3 முக்கிய நிகழ்வுகள்

கோவிட் பெருந்தொற்று இவ்வுலகை தொடர்ந்து அச்சுறுத்திக்கொண்டிருக்கும் வேளையில், இவ்வாண்டில் மூன்று முக்கிய நிகழ்வுகள் உரோம் நகரில் இடம்பெற உள்ளதாக திருஅவை அறிவித்துள்ளது. 2019ம் ஆண்டு அக்டோபர் மாதம் ஜான் ஹென்றி நியூமேன் அவர்களுடன் மேலும் நான்கு பேர் புனிதர்களாக அறிவிக்கப்பட்டதைத் தொடர்ந்து, இரண்டாண்டு 7 மாதங்களுக்குப்பின், இவ்வாண்டு மே மாதம் 15ம் தேதி புனிதர் பட்ட அறிவிப்பு திருப்பலி வத்திக்கானில் இடம்பெற உள்ளது. தமிழகத்தின் முதல் புனிதர் தேவசகாயம் உட்பட 7 பேரின் புனிதர் பட்ட நிகழ்வு மேமாதம் 15ம் தேதி வத்திக்கானில் இடம்பெறும். இந்தியாவின் பொதுநிலையினர் ஒருவர் திருஅவையில் புனிதராக அறிவிக்கப்பட உள்ளது இதுவே முதன்முறையாகும். இப்புனிதர் பட்டமளிப்பு விழாவைத் தொடர்ந்து ஜூன் மாதம் 22 முதல் 26 வரை, பத்தாவது உலக குடும்பங்கள் மாநாடு வத்திக்கானில் இடம்பெறும். கோவிட் பெருந்தொற்று காரணமாக ஏறத்தாழ 2000 பேர் மட்டுமே இக்கருத்தரங்கில் கலந்துகொள்வர் எனவும், அதே நாட்களில் இணையதளம் வழியாகவும், மறைமாவட்டங்களிலும் கருத்தரங்குகள் இடம்பெறும் எனவும் அறிவிக்கப்பட்டுள்ளது. இவ்வாண்டு திருஅவையில் இடம்பெற உள்ள மூன்றாவது முக்கிய நிகழ்வாக, செப்டம்பர் 4ம் தேதி 'புன்னகையின் திருத்தந்தை' என அறியப்படும், இறையடியார் திருத்தந்தை முதலாம் யோவான் பவுல் அவர்களை அருளாளராக அறிவிக்கும் கொண்டாட்டம் வத்திக்கானில் இடம்பெறும் என அறிவிக்கப்பட்டுள்ளது. [2022-01-06 01:54:24]


மனிதரைத் தேடி இறைவன் வந்துள்ளதே கிறிஸ்மஸ்

உண்மையைத் தேடிவந்த மனித குலம், உண்மையை எடுத்துரைக்க வந்த உண்மையாம் இறைமகனைக் கண்டுகொண்டது குறித்து தியானிக்க, கிறிஸ்மஸ் நமக்கு அழைப்புவிடுக்கிறது என, தன் டுவிட்டர் செய்தியில் அழைப்பு விடுத்துள்ளார் திருத்தந்தை பிரான்சிஸ். ஜனவரி 3ம் தேதி, திங்கள்கிழமையன்று திருத்தந்தையால் வெளியிடப்பட்ட டுவிட்டர் செய்தி, 'வரலாற்றின் முக்கிய நிகழ்வைக் குறித்து தியானிக்க கிறிஸ்மஸ் நமக்கு அழைப்பு விடுக்கிறது. நமக்கு மீட்பை வழங்கும் உண்மையை எடுத்துரைக்கவும், அவர் வாழ்வில் நம்மை பங்குதாரர் ஆக்கவும்; பாவத்தால் காயமுற்றுள்ளபோதிலும், உண்மையையும், இரக்கத்தையும், மீட்பையும், கடவுளின் நன்மைத்தனத்தையுயம் தேடிவரும், மனிதரைத் தேடி இறைவன் வந்துள்ளதே இந்நிகழ்வு' என எடுத்துரைக்கிறது. மேலும், இதே நாளில் உரோம் நகரின் கிரகோரியன் பல்கலைக்கழக பேராசிரியர், இயேசு சபை அருள்பணி Marko Ivan Rupnik, இத்தாலியின் நேப்பிள்ஸ் நகரின் முன்னாள் பேராயர், கர்தினால் Crescenzio Sepe, புதிய நற்செய்தி அறிவிப்பு திருப்பீட அவையின் தலைவர், பேராயர் சல்வதோரே பிசிக்கெல்லா, கர்தினால் Edoardo Menichelli, பேராயர் Adriano Bernardini, பேரருட்திரு Vito Pio Pinto ஆகியோர் திருத்தந்தையைத் திருப்பீடத்தில் சந்தித்து உரையாடினர். [2022-01-04 00:35:34]


செப்டம்பர் 22, 2022ல் திருத்தந்தை முதலாம் யோவான் பவுல் அருளாளராக

இறைஊழியர் திருத்தந்தை முதலாம் யோவான் பவுல் அவர்கள், 2022ம் ஆண்டு செப்டம்பர் 22ம் தேதி அருளாளர் நிலைக்கு உயர்த்தப்படுவார் என்று, புனிதர் பட்ட வழிமுறைகளை ஒருங்கிணைக்கும் பேராயம் அறிவித்துள்ளது. 2022ம் ஆண்டு செப்டம்பர் 22ம் தேதி, திருத்தந்தை பிரான்சிஸ் அவர்கள், வத்திக்கானில் தலைமையேற்று நிறைவேற்றும் திருப்பலியில், திருத்தந்தை முதலாம் யோவான் பவுல் அவர்கள் அதிகாரப்பூர்வமாக அருளாளர் என அறிவிக்கப்படுவார். கத்தோலிக்கத் திருஅவையின் 263வது திருத்தந்தையாக, அத்திருஅவையில் 34 நாள்களே தலைமைப் பணியாற்றிய திருத்தந்தை முதலாம் யோவான் பவுல் அவர்களின் பரிந்துரையால் நடைபெற்ற ஒரு புதுமையை திருத்தந்தை பிரான்சிஸ் அவர்கள், இவ்வாண்டு அக்டோபர் மாதத்தில் அங்கீகரித்து ஆவணத்தில் கையெழுத்திட்டதையடுத்து, அத்திருத்தந்தையை அருளாளராக அறிவிக்கும் தேதியை அறிவித்துள்ளது, அப்பேராயம். திருத்தந்தை முதலாம் யோவான் பவுல் – வாழ்க்கை குறிப்புகள் திருத்தந்தை முதலாம் யோவான் பவுல் அவர்களின் பரிந்துரையை வேண்டியதால், அர்ஜென்டீனா நாட்டில், சிறுமி ஒருவர் முற்றிலும் குணமடைந்த நிகழ்வு, புதுமையென ஏற்றுக்கொள்ளப்பட்டதையடுத்து, வணக்கத்துக்குரிய இறையடியார் திருத்தந்தை முதலாம் யோவான் பவுல் அவர்கள் அருளாளராக உயர்த்தப்பட, திருத்தந்தை பிரான்சிஸ் அவர்கள், அக்டோபர் 13ம் தேதியன்று இசைவளித்தார். பத்து ஆண்டுகளுக்கு முன், அர்ஜென்டீனா நாட்டில், நரம்பு தொடர்பான நோயினால், இறக்கும் நிலையில் இருந்த பத்து வயது சிறுமிக்காக, அவரது பங்கு அருள்பணியாளர், திருத்தந்தை முதலாம் யோவான் பவுல் அவர்களின் பரிந்துரையை வேண்டியதன் பயனாக, அச்சிறுமி நலமடைந்த புதுமையின் விவரங்களை, புனிதர் பட்ட வழிமுறைகளை ஒருங்கிணைக்கும் பேராயத்தின் தலைவர் கர்தினால் மார்செல்லோ செமராரோ அவர்கள் திருத்தந்தையிடம் சமர்ப்பித்தார். 1912ம் ஆண்டு அக்டோபர் 17ம் தேதி இத்தாலியின் Forno di Canale என்ற ஊரில் பிறந்த அல்பீனோ லூச்சியானி அவர்கள், 1978ம் ஆண்டு, ஆகஸ்ட் மாதம் 26ம் தேதி, அவரது 66வது வயதில் கத்தோலிக்கத் திருஅவையின் தலைமைப் பொறுப்பிற்கு தெரிவு செய்யப்பட்டார். இவரது தந்தை, ஓர் எளிய தொழிலாளியாக சுவிட்சர்லாந்து நாட்டில் பணிபுரிந்துவந்த வேளையில், இளையவர் அல்பீனோ லூச்சியானி அவர்கள், அருள்பணித்துவ பயிற்சிக்கு செல்ல விழைவதை அறிந்த வேளையில், இவரது தந்தை அவருக்கு, "நீ ஒரு அருள்பணியாளராக இருக்கும்போது, வறியோர் பக்கமே இருக்கவேண்டும், ஏனெனில் இயேசு அவர்கள் பக்கமே இருந்தார்" என்று எழுதி அனுப்பிய ஒரு மடலை, திருத்தந்தை முதலாம் யோவான் பவுல் அவர்கள், தன்னுடன், இறுதிவரை வைத்திருந்தார். 1935ம் ஆண்டு, அருள்பணியாளராக திருப்பொழிவு பெற்ற அல்பீனோ லூச்சியானி அவர்களை, 1958ம் ஆண்டு, திருத்தந்தை புனித 23ம் யோவான் அவர்கள், திருத்தந்தையாகப் பொறுப்பேற்ற சிறிது காலத்தில், Vittorio Venetoவின் ஆயராக நியமித்தார். இரண்டாம் வத்திக்கான் சங்கத்தில் முழுமையாகப் பங்கேற்ற ஆயர் லூச்சியானி அவர்களை, திருத்தந்தை புனித 6ம் பவுல் அவர்கள், 1969ம் ஆண்டு வெனிஸ் உயர் மறைமாவட்டத்தின் முதுபெரும் தந்தையாக நியமித்து, 1973ம் ஆண்டு அவரை கர்தினாலாக உயர்த்தினார். "தாழ்ச்சி" என்ற ஒரு சொல்லை, தன் ஆயர் பணியின் விருதுவாக்காக தெரிவு செய்திருந்த கர்தினால் லூச்சியானி அவர்கள், இரண்டாம் வத்திக்கான் சங்கத்தைத் தொடர்ந்துவந்த நாள்களில் வெனிஸ் உயர் மறைமாவட்டத்தில் பல சவால்கள் நிறைந்த சூழல்களைச் சந்தித்து, திறமையுடன் மறைமாவட்டத்தை வழிநடத்திச் சென்றார். 1978ம் ஆண்டு ஆகஸ்ட் 6ம் தேதி, கிறிஸ்து தோற்றமாற்றம் பெற்ற திருநாளன்று, திருத்தந்தை புனித 6ம் பவுல் அவர்கள் இறையடி சேர்ந்ததையடுத்து, ஆகஸ்ட் 26ம் தேதி கூடிய கர்தினால்கள் அவை, ஒரே நாளில், கர்தினால் லூச்சியானி அவர்களை, திருத்தந்தையாக தெரிவு செய்தது. திருஅவை வரலாற்றிலேயே முதல்முறையாக திருத்தந்தை ஒருவர், இரண்டு பெயர்களை இணைத்து ‘யோவான் பவுல்’ என்பதை, தன் பெயராகத் தெரிவு செய்தார். 'புன்னகைக்கும் திருத்தந்தை' என்ற பெயரைப் பெற்ற முதலாம் யோவான் பவுல் அவர்கள், அதுவரை திருத்தந்தையர் தங்கள் உரைகளில் பயன்படுத்தி வந்த 'நாம்' என்ற சொல்லை விட்டுவிட்டு, 'நான்' என்று தன்னைப்பற்றிக் குறிப்பிட்டுப் பேசினார். திருஅவை வரலாற்றில் மிகக் குறுகியகாலம் பணியாற்றிய திருத்தந்தையர் வரிசையில், 33 நாள்கள் மட்டுமே திருத்தந்தையாகப் பணியாற்றிய முதலாம் யோவான் பவுல் அவர்கள், 1978ம் ஆண்டு, செப்டம்பர் 28ம் தேதி இறையடி சேர்ந்தார். [2021-12-31 02:07:54]


2021ல் 22 மறைபணியாளர்கள் கொல்லப்பட்டுள்ளனர்

2021ம் ஆண்டில் உலகம் முழுவதும் 13 அருள்பணியாளர்கள் உட்பட 22 மறைப்பணியாளர்கள் கொல்லப்பட்டுள்ளதாக, திருஅவையின் Fides செய்தி நிறுவனம் அறிவிக்கிறது. இவ்வாண்டில் கொல்லப்பட்ட மறைப்பணியாளர்கள் குறித்த புள்ளிவிபரங்களை வெளியிட்டுள்ள இச்செய்தி நிறுவனம், 7 அருள்பணியாளர்கள், 2 துறவிகள், 2 பொதுநிலையினர் என மொத்தம் 11 பேர் ஆப்ரிக்கக் கண்டத்தில் கொல்லப்பட்டுள்ளதாகவும், 7 பேர் அமெரிக்கக் கண்டத்திலும் 3 பேர் ஆசியாவிலும், ஒருவர் ஐரோப்பாவிலும் கொல்லப்பட்டுள்ளதாகவும் தெரிவிக்கிறது. மறைப்பணியாளர்கள் கொல்லப்பட்டதில், ஆப்ரிக்கா முதல் இடத்திலும் அமெரிக்கா இரண்டாமிடத்திலும் உள்ளன. ஆசியாவில் இவ்வாண்டு கொல்லப்பட்ட மூவரில், ஒருவர் அருள்பணியாளர், ஏனைய இருவர் பொதுநிலையினர். 2000 முதல் 2020ம் ஆண்டுவரையுள்ள புள்ளிவிபரங்களின்படி, உலகில் 536 மறைப்பணியாளர்கள் தங்கள் சமய நடவடிக்களுக்காகக் கொல்லப்பட்டுள்ளனர். [2021-12-31 02:02:54]


மிகச்சிறியோரில் இயேசுவைக் கண்டு அரவணைப்போம்

இந்நாட்களில் உலகில் காணப்படும் மிகச்சிறியோரில் இயேசுவைக் கண்டு அவரை அரவணைப்போம், என டிசம்பர் 27, திங்களன்று வெளியிட்ட தன் டுவிட்டர் செய்தியில் அழைப்பு விடுத்துள்ளார் திருத்தந்தை பிரான்சிஸ். 'இக்காலத்தின் மிகச்சிறியோரில் இயேசுவைக் கண்டு அவரை அரவணைப்போம், மிகச்சிறியோராகிய சகோதரர் சகோதரிகளில் அவரை அன்புகூர்வோம்,' என தன் டுவிட்டர் செய்தியில் அழைப்பு விடுத்துள்ள திருத்தந்தை பிரான்சிஸ் அவர்கள், 'ஏழையாகப் பிறந்த இயேசுவைப் போன்றவர்கள் இவர்கள், இவர்களில் தான் கௌரவிக்கப்படவேண்டும் என இயேசு விரும்புகிறார்', என மேலும் அதில் கூறியுள்ளார். திருத்தந்தையின் இந்த கிகிறிஸ்மஸ் கால டுவிட்டர் செய்தி, ஏழைகளுக்கும், சமுதாயத்தில் ஓரம் கட்டப்பட்டவர்களுக்கும் உதவுவதை வலியுறுத்துவதாக உள்ளது. ஏறக்குறைய ஒவ்வொரு நாளும் திருத்தந்தையால் வழங்கப்பட்டுவரும் டுவிட்டர் செய்திகளை இணையத்தில் ஆங்கில மொழியில் இதுவரை பின்பற்றியுள்ளோரின் எண்ணிக்கை 1 கோடியே 88 இலட்சத்தைத் தாண்டியுள்ளது. [2021-12-28 01:38:41]


பெருந்தொற்று ஏற்படுத்தியுள்ள பொருளாதார, நல, சமூக பாதிப்புக்கள்

கோவிட் பெருந்தொற்று, கல்வித்துறையிலும், குழந்தைகளிலும் ஏற்படுத்தியுள்ள பாதிப்புக்கள் குறித்த இரு ஏடுகளை, வாழ்வு திருப்பீடக் கழகம் இப்புதன்கிழமையன்று வெளியிட்டது. 'கோவிட் பெருந்தொற்றும், கல்வியின் சவாலும்', என்ற தலைப்பில் திருப்பீடத்தின் ஒருங்கிணைந்த மனித முன்னேற்ற அவையுடன் இணைந்து தயாரித்த ஏட்டையும், திருப்பீடத்தின் கோவிட்-19 அவையுடன் இணைந்து தயாரித்த,'குழந்தைகளும் கோவிட்-19 பெருந்தொற்றால் பெருமளவில் பாதிக்கப்பட்டோர்', என்ற தலைப்பில் உருவாக்கப்பட்ட ஏட்டையும், டிசம்பர் 22, இப்புதன் காலையில் வெளியிட்டது, வாழ்வு திருப்பீடக்கழகம். கோவிட் பெருந்தொற்றால் எண்ணற்ற குழந்தைகள் ஏழ்மை நிலைக்கும், கைவிடப்பட்ட நிலைக்கும், பெற்றோரை இழந்து தனிமைப்படுத்தப்பட்ட நிலைக்கும் தள்ளப்பட்டுள்ளதைப் பற்றி எடுத்துரைக்கும் இவ்வேடுகள், பெருந்தொற்றுக் காலத்தில், குழந்தைகள் சுரண்டப்படுவது, உரிமைகள் பறிக்கப்படுவது, கல்வி நிலையங்கள் மூடப்பட்டுள்ளது போன்றவைகளையும் குறிப்பிடுகின்றன. இன்றைய பெருந்தொற்றுக் காலத்தில் பெருமளவில் பாதிக்கப்பட்டுள்ள குழந்தைகளின் துயர்களை அகற்ற திருஅவையின் ஒன்றிணைந்த நடவடிக்கைகளை எடுத்துரைக்கும் இவ்வேடுகள், சமுதாயத்தின் கடமைகளையும் விரிவாக ஆய்வு செய்துள்ளன. குழந்தைகள் மீது இந்த பெருந்தொற்றுக் காலம் ஏற்படுத்தியுள்ள பொருளாதார, நல, மற்றும் சமூகப் பாதிப்புக்கள் குறித்தும், ஏழ்மை அதிகரிப்பு, உணவு நெருக்கடி, உரிமை மீறல்கள் அதிகரிப்பு போன்றவை குறித்தும் புள்ளி விவரங்களுடன் விவரிக்கின்றன இவ்வேடுகள். இவ்வாண்டு செப்டம்பர் 30 வரையுள்ள கணக்கெடுப்பின்படி, கோவிட் பெருந்தொற்று காலத்தில், 50 இலட்சம் குழந்தைகள்வரை தங்கள் பெற்றோர், அல்லது, தங்களை வளர்த்தவர்களை இழந்துள்ளதாகவும், 15 கோடிக் குழந்தைகள் ஏழ்மை நிலைக்குத் தள்ளப்பட்டுள்ளதாகவும், பாலர் தொழிலாளர் எண்ணிக்கை 16 கோடியை எட்டியுள்ளதாகவும் இவ்வேடுகள் கூறுகின்றன. [2021-12-23 16:16:00]


படைப்பு, ஊழல் சிறையிலிருந்து விடுதலைபெற காத்திருக்கிறது

திருத்தந்தை பிரான்சிஸ் அவர்களின் 55வது உலக அமைதி நாள் செய்தியை டிசம்பர் 21, இச்செவ்வாயன்று செய்தியாளர் கூட்டத்தில் வெளியிட்ட குழுவில் ஒருவரான விவசாயிகள் அமைப்பின் தலைவர் டாக்டர் Aboubakar Soumahoro அவர்கள், இச்செய்தியை வெளியிட தனக்குக் கிடைத்த வாய்ப்புக்கு முதலில் நன்றி கூறினார். இக்காலத்தில், அமைதியை கட்டியெழுப்புவது, தவிர்க்கமுடியாத ஒரு பணியாக மாறியுள்ளது என்றும், நமக்குத் தேவையான அமைதி, இந்த உலகம் கொடுக்கும் அமைதி அல்ல, மாறாக, எவ்விதச் சவால்களையும் எதிர்கொள்வதற்கு, துணிவையும், சக்தியையும் கொடுக்கும், மற்றும், நம் ஆன்மாவுக்கு இளைப்பாற்றிதரும் அமைதியாகும் என்றும் Soumahoro அவர்கள் கூறினார். திருத்தந்தை, 55வது உலக அமைதி நாள் செய்தியில் கூறியிருப்பதுபோன்று, ஏழைகள், மற்றும், இப்பூமியின் அழுகுரலைக் கேட்பது, இக்காலத்தில் நாம் எதிர்கொள்ளும் முக்கியமான சவால்களில் ஒன்று என்று கூறிய Soumahoro அவர்கள், கோவிட்-19 பெருந்தொற்று உருவாக்கியுள்ள நெருக்கடிகளால், இன்று உலகில் பத்து கோடிக்கு மேற்பட்ட மக்கள், கடும் ஏழ்மையில் வாழ்கின்றனர் என்று குறிப்பிட்டார்.. இன்று படைப்பு அனைத்தும், பேராசை உணர்வில் இடம்பெறும் ஊழல் என்ற சிறையிலிருந்து விடுதலைபெறுவதற்காக பொறுமையின்றி காத்திருக்கிறது எனவும், ஏழைகள், மற்றும், இப்பூமியின் அழுகுரல், பணம் என்ற கடவுளால் ஆளப்படும் சமுதாயத்தில் பிறப்பிக்கப்படும் தன்னலம் மற்றும், தனிமனிதக்கோட்பாட்டால் உருவாகும் ஆன்மீக வெறுமையைக் களைவதன் தேவையையும் வலியுறுத்துகின்றது எனவும், Soumahoro அவர்கள் கூறினார். உண்மையான வாழ்க்கையில் நுழைவதற்கு, ஓர் ஆன்மீகப் புரட்சியை முன்னெடுக்கவும், மனிதக் குடும்பத்தில் நானும் ஓர் அங்கம் என்ற உணர்வில் வாழவும், நமக்கு துணிச்சல் தேவை எனவும், இவற்றை எட்டுவதற்கு, செவிமடுத்தல், மனத்தாராளம் மற்றும், தியாகம் அவசியம் எனவும், Soumahoro அவர்கள் கூறினார். ஐவரி கோஸ்ட் நாட்டவரான Aboubakar Soumahoro அவர்கள், விவசாயிகள் அமைப்பின் தலைவர் மற்றும், இத்தாலியில் புலம்பெயர்ந்தோருக்காகப் பரிந்துபேசுபவர் என்பது குறிப்பிடத்தக்கது. [2021-12-23 16:13:14]


திருத்தந்தை : இதயக் கதவை புலம்பெயர்ந்தோருக்கு திறப்போம்

மத்தியதரைக்கடல் பகுதியில், புலம்பெயர்ந்தோர் தொடர்ந்து கடுந்துயரங்களை எதிர்கொண்டுவரும் இவ்வேளையில், அம்மக்களின் நெருக்கடி நிலைகளைக் களைவதற்கு, உடனடியாகவும், உறுதியானமுறையிலும், அரசியல் மட்டத்தில் நடவடிக்கைகள் மேற்கொள்ளப்படுமாறு, திருத்தந்தை பிரான்சிஸ் அவர்கள், டிசம்பர் 22, இப்புதன் மறைக்கல்வியுரைக்குப்பின் அழைப்புவிடுத்தார். ஐரோப்பாவில் புகலிடம்தேடி வருகின்ற புலம்பெயர்ந்தோரின் வாழ்வும், மாண்பும் பாதுகாக்கப்படுவதற்கு, உறுதியான தீர்வுகளைக் காண, ஐரோப்பிய அரசியல் தலைவர்கள், மற்றும், அதிகாரிகளுக்கு இடையே ஒன்றிணைந்த முயற்சிகள் மேற்கொள்ளப்படுமாறும் திருத்தந்தை கேட்டுக்கொண்டார். அண்மையில், லிபியா மற்றும், இத்தாலியின் லாம்பெதூசா தீவுக்கு இடைப்பட்ட கடல் பகுதியில், பயணம் மேற்கொண்ட புலம்பெயர்ந்தோரில் குறைந்தது 160 பேர் நீரில் மூழ்கி இறந்துள்ளதை முன்னிட்டு, இப்புதன் மறைக்கல்வியுரையில் இவ்வாறு அழைப்புவிடுத்தார், திருத்தந்தை பிரான்சிஸ். அண்மையில் சைப்பிரசு மற்றும், கிரேக்க நாடுகளுக்கு தான் மேற்கொண்ட திருத்தூதுப் பயணத்தின்போது, புலம்பெயர்ந்தோர் மற்றும், குடிபெயர்ந்தோராகிய, காயமடைந்துள்ள ஒரு மனித சமுதாயத்தைச் சந்தித்ததுபற்றியும் குறிப்பிட்ட திருத்தந்தை, அந்நாடுகளிலிருந்து சில புலம்பெயர்ந்தோரை இத்தாலிக்கு என்னால் அழைத்துவர முடிந்தது என்றும், இம்மக்கள் மீது இத்தாலிய அதிகாரிகள் காண்பித்துவரும் மனத்தாராளத்திற்கு நன்றி கூறுகிறேன் என்றும் தெரிவித்தார். . இத்தாலிக்கு வந்துள்ள புலம்பெயர்ந்துள்ள மக்களில் சிலர், இப்புதன் மறைக்கல்வியுரையில் பங்குகொள்கின்றனர் எனவும், அவர்கள், வருகிற மாதங்களில் திருஅவையில் பராமரிக்கப்படுவார்கள் எனவும், பல பங்குத்தளங்கள், துறவு சபைகள் கத்தோலிக்க நிறுவனங்கள் போன்றவை, இம்மக்களை வரவேற்பதற்குத் தயாராக உள்ளன எனவும் திருத்தந்தை கூறினார் புலம்பெயர்ந்தோர் பிரச்சனைகளை, சில ஐரோப்பிய நாடுகளே பெருமளவாக எதிர்கொள்கின்றன என்றுரைத்த திருத்தந்தை, திருஅவையின் இச்செயல், மற்ற ஐரோப்பிய நாடுகளுக்கு முன்மாதிரிகையாய் இருக்கும் என்று தான் நம்புவதாகவும், நமக்குத் தேவைப்படுவதெல்லாம், நம் இதயக் கதவுகளைத் திறப்பதே எனவும் எடுத்துரைத்தார். சுலோவேனியா ஆயர்கள் மேலும், திருத்தந்தையின் இந்த அழைப்பை ஏற்று, புலம்பெயர்ந்தோருடன் தோழமையுணர்வுகொண்டு, அவர்களுக்கு உதவிகள் ஆற்றுவதற்கு சுலோவேனியா நாட்டு ஆயர்கள் இசைவுதெரிவித்துள்ளனர். இன்னும், ஐரோப்பிய ஆயர் பேரவைகள் கூட்டமைப்பின் (COMECE) தலைவர் கர்தினால் Jean-Claude Hollerich அவர்களும், புலம்பெயர்ந்தோருக்கு உதவுமாறு விண்ணப்பித்துள்ளார். ஒவ்வோர் இல்லத்திற்குள்ளும் திருத்தந்தையின் வார்த்தையை நாங்கள் கொணர்வதில் உங்களின் ஆதரவு [2021-12-23 15:57:55]


மியான்மாரில் கொண்டாட்டம் இல்லாத கிறிஸ்மஸ்

மியான்மாரில் இவ்வாண்டு பிப்ரவரி முதல் தேதியன்று இராணுவம் ஆட்சியைக் கைப்பற்றியதையடுத்து அந்நாட்டில் வன்முறைகள் தொடர்ந்து இடம்பெற்றுவரும்வேளை, இவ்வாண்டு கிறிஸ்மஸ் பெருவிழா, அமைதி, இறைவேண்டல், மற்றும், தோழமையுணர்வில் ஆடம்பரமின்றி சிறப்பிக்கப்படும் என்று, அந்நாட்டு ஆயர்கள் வெளியிட்டுள்ள கிறிஸ்மஸ் செய்தி கூறுகின்றது. அந்நாட்டில் இடம்பெற்றுவரும் உள்நாட்டுப் போரால், காடுகளுக்குச் சென்று வாழ்கின்ற மக்களின் எண்ணிக்கை அதிகரித்து வருவதாலும், கெரில்லாப் போர், வன்முறை, கொலைகள் போன்றவற்றாலும், கடும் நெருக்கடிகளை, மக்கள் தொடர்ந்து எதிர்கொண்டு வருகின்றனர் என்று ஆயர்களின் செய்தி கூறுகின்றது. இந்நிலையால் கைவிடப்பட்டவர்கள், நோயாளிகள், ஏழைகள் போன்றவர்களோடு, மியான்மார் கத்தோலிக்கர் தோழமையுணர்விலும், இறைவேண்டலிலும், அமைதியிலும், கடவுள், மனிதராகப் பிறந்ததைச் சிறப்பிக்கும் பெருவிழாவன்று வாழ்வார்கள் என்று அக்கிறிஸ்மஸ் செய்தி உரைக்கின்றது. "மகிழ்வாரோடு மகிழுங்கள்; அழுவாரோடு அழுங்கள்" (உரோ.12:15) என்று புனித பவுல் உரோமையருக்கு எழுதியுள்ளதைக் குறிப்பிட்டு, கிறிஸ்மஸ் செய்தி வெளியிட்டுள்ள, மியான்மாரின் யாங்கூன், மாண்டலே, பாத்தியென், பியாய் உள்ளிட்ட பல மறைமாவட்ட ஆயர்கள், துயருறுவோடு தோழமையுணர்வை வெளிப்படுத்துமாறு, கத்தோலிக்கருக்கு அழைப்புவிடுத்துள்ளனர். கிறிஸ்தவர்கள் பெரும்பான்மையாக இருக்கின்ற மியான்மாரின் மேற்கிலுள்ள சின் மாநிலம், கிழக்கிலுள்ள காயா மாநிலம் போன்றவற்றில், ஆயிரக்கணக்கான மக்கள், காடுகளிலும் முகாம்களிலும் வாழ்ந்து வருகின்றனர். இம்மாநிலங்களின் ஆலயங்களில் நிறைவேற்றப்படும் கிறிஸ்மஸ் திருப்பலி வழியாக, "கடவுள் இம்மானுவேலராய், நம்மோடு இருக்கிறார்" என்ற ஆறுதல் உணர்வை கத்தோலிக்கரில் ஏற்படுத்தவுள்ளோம் என்று, ஆயர்கள் தங்கள் கிறிஸ்மஸ் செய்தியில் குறிப்பிட்டுள்ளனர். மியான்மாரில் நாட்டுக்குள்ளே புலம்பெயர்ந்துள்ள ஏறத்தாழ 2 இலட்சம் மக்களுக்கு, தேசிய காரித்தாஸ் அமைப்பும், உலகளாவிய காரித்தாஸ் நிறுவனமும் மனிதாபிமான உதவிகளை வழங்குவதற்கு அனுமதிக்கப்படாதநிலையில், கிறிஸ்மஸ் காலத்தில், கத்தோலிக்கர் அனைவரும் பிறரன்புச் செயல்களில் ஈடுபடுமாறும் ஆயர்கள் கேட்டுக்கொண்டுள்ளனர். (fides) [2021-12-20 10:29:46]


பக்க இலக்கங்களை அழுத்தி எல்லா செய்திகளையும் பார்வையிடவும்