வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



மடகாஸ்கர் தலைநகரில் வரவேற்பு

ஆந்தனனரிவோ நகரத் தெருக்களிலும், நகரின் முக்கிய வளைவுகளிலும், ‘Tonga soa’ என்று எழுதப்பட்ட வரவேற்பு விளம்பரத் தட்டிகள் வைக்கப்பட்டிருந்தன. மேரி தெரேசா - வத்திக்கான் மொசாம்பிக், மடகாஸ்கர், மொரீஷியஸ் ஆகிய மூன்று, இந்தியப் பெருங்கடல் பகுதி ஆப்ரிக்க நாடுகளுக்கென, திருத்தந்தை பிரான்சிஸ் அவர்கள், செப்டம்பர் 4, இப்புதனன்று தனது 31வது வெளிநாட்டுத் திருத்தூதுப் பயணத்தை தொடங்கினார். முதலில் மொசாம்பிக் நாட்டுத் தலைநகர் மப்புத்தோவில் திருத்தூதுப் பயண நிகழ்வுகளை ஆரம்பித்த திருத்தந்தை, அமைதி, நம்பிக்கை மற்றும், ஒப்புரவுக்கு அழைப்பு விடுத்தார். சமுதாயத்தின் பல்வேறு நிலைகளில் துன்புறும் வறியோர்க்கு ஆற்றும் பணிக்கு, ஆண்டவர் வெகுமதியளிப்பார் என்று, அந்தப் பணியாளர்களை ஊக்குவித்தார். அமைதியான வருங்காலத்தைச் சமைப்பதில் நம்பிக்கையை மட்டும் இழந்துவிடாதீர்கள் என்று மொசாம்பிக் மக்களுக்கு அழைப்பு விடுத்து, செப்டம்பர் 6, இவ்வெள்ளி நண்பகலில் மடகாஸ்கர் நாட்டிற்குப் புறப்பட்டார் திருத்தந்தை பிரான்சிஸ். விமானத்திலேயே மதிய உணவை முடித்த திருத்தந்தை, 1,725 கிலோ மீட்டர் தூரத்தை, 2 மணி 50 நிமிடங்கள் பயணம் செய்து, மடகாஸ்கர் தலைநகர், ஆந்தனனரிவோ (Antananarivo) நகரை அடைந்தபோது உள்ளூர் நேரம் ஏறத்தாழ மாலை நான்கு மணியாக இருந்தது. விமானத்தளத்தில், அந்நாட்டு மரபில் வரவேற்புகள் வழங்கப்பட்டன. அரசுத்தலைவர் Andry Rajoelina அவர்கள், துணைவியார் Mialy Rajoelina அவர்களுடன் திருத்தந்தையை விமானத்தளத்தில் கைகுலுக்கி வரவேற்றார். இரு சிறார் மரபு ஆடைகளில், திருத்தந்தைக்கு மலர்கள் கொடுத்து வரவேற்றனர். அரசுப் பிரதிநிதிகளும், பல ஆயர்களும் ஏறத்தாழ 300 விசுவாசிகளும் அங்கு நின்று திருத்தந்தைக்கு வரவேற்பளித்தனர். சுற்றி நின்ற மக்கள் கூட்டம், கரவொலி எழுப்பி தங்கள் மகிழ்ச்சியை வெளிப்படுத்தியது. நாட்டுக்கொடிகளுக்கு மரியாதை செலுத்தப்பட்டது. அரசு மரியாதையுடன் வரவேற்பும் வழங்கப்பட்டது. இதற்குப் பின், அங்கிருந்து 13.4 கிலோ மீட்டர் தூரத்திலுள்ள திருப்பீடத் தூதரகத்திற்குக் காரில் சென்றார் திருத்தந்தை பிரான்சிஸ். வழியெங்கும் திரளான மக்கள் இருபக்கங்களிலும் நின்றுகொண்டு, திருத்தந்தை பிரான்சிஸ் எனப் பாடிக்கொண்டிருந்தனர். மலகாசி மொழியில், வருக வருக எனப் பொருள்படும் ‘Tonga soa’ என்று எழுதப்பட்ட விளம்பரத் தட்டிகள் வைக்கப்பட்டிருந்தன. நகரின் முக்கிய வளைவுகளிலும், பெரிய விளம்பரத் தட்டிகள் வைக்கப்பட்டிருந்தன. அவற்றிற்கு இரு பக்கங்களிலும், அமைதி மற்றும் நம்பிக்கையை விதைப்பவர் என்ற இத்திருத்தூதுப் பயணத்தின் இலச்சினையோடு, திருத்தந்தையின் படமும், வத்திக்கான் மற்றும், மடகாஸ்கர் நாடுகளின் கொடிகளும் நாட்டப்பட்டிருந்தன. திருப்பீட தூதரகத்திற்கு சிறிது தூரத்தில் திறந்த காரில் சென்ற திருத்தந்தையை மக்கள் கண்டு மகிழ்ந்தனர். அத்தூதரகத்தில் ஐம்பது சிறார் பாடகர் குழு, திருத்தந்தை பிரான்சிஸ் அவர்களைப் பாராட்டிப் பாடியது. அந்த இல்லத்தில் இரவு உணவருந்தி உறங்கச் சென்றார், திருத்தந்தை பிரான்சிஸ். இத்துடன் இவ்வெள்ளி நிகழ்வுகள் முற்றுப்பெற்றன. [2019-09-09 02:48:55]


பஹாமாசில் கடும்புயலால் பாதிக்கப்பட்டுள்ளவர்களுக்காக செபம்

பஹாமாசில் Dorian கடும்புயலால் பாதிக்கப்பட்டுள்ள மக்களுக்காக, திருத்தந்தை பிரான்சிஸ் அவர்கள் செபித்தார். இப்புயல், இந்நாட்டு வரலாற்றில் இடம்பெற்றுள்ள மிகப்பெரிய தேசியப் பேரிடர்களில் ஒன்று என்று பஹாமாஸ் பிரதமர் Hubert Minnis அவர்கள் கூறியுள்ளார். கிறிஸ்டோபர் பிரான்சிஸ் – வத்திக்கான் செய்திகள் செப்டம்பர் 04, இப்புதன் காலையில், மொசாம்பிக், மடகாஸ்கர், மற்றும், மொரீஷியஸ் நாடுகளுக்கென, தனது 31வது வெளிநாட்டுத் திருத்தூதுப்பயணத்தைத் தொடங்கிய திருத்தந்தை பிரான்சிஸ் அவர்கள், பஹாமாசில் Dorian கடும்புயலால் பாதிக்கப்பட்டுள்ள மக்களுக்காகச் செபித்தார். மொசாம்பிக் தலைநகர் மப்புத்தோ நகருக்கு, A330 ஆல் இத்தாலியா விமானத்தில் பயணம் செய்த திருத்தந்தை, தன்னுடன் பயணம் மேற்கொள்ளும், பன்னாட்டு செய்தியாளர்களை வாழ்த்தியதுடன், தற்போது பஹாமாசைத் தாக்கிவரும் Dorian கடும்புயல் பற்றிக் குறிப்பிட்டு, அதில் பாதிக்கப்பட்டுள்ள மக்களை நினைத்துச் செபித்தார். இப்புயலில், ஏறத்தாழ 13 ஆயிரம் வீடுகள் அழிக்கப்பட்டுள்ளன. விமானத்தில் செய்தியாளர் சந்திப்பு இந்த நீண்ட விமானப் பயணம் நிறையப் பலன்களைத் தரும் என நம்புவோம் என்றுரைத்த திருத்தந்தை, தனது எண்பதாவது ஆண்டு நிறைவைச் சிறப்பிக்கும் EFE எனப்படும் இஸ்பானிய செய்தி நிறுவனத்திற்குத் தனது நல்வாழ்த்துக்களையும் தெரிவித்தார். அதோடு, இத்திருத்தூதுப் பயணத்தை முடித்து திரும்பும் விமானப் பயணத்தில் நடைபெறும் செய்தியாளர் சந்திப்பில், இந்நிறுவனத்தின் செய்தியாளர்கள் கூடுதலாகக் கேள்விகள் கேட்பதற்கு வாய்ப்புப் பெறுவார்கள் என்றும் திருத்தந்தை கூறினார். மேலும், 153 திருத்தூதுப் பயணங்களில் பணியாற்றிய, "Televisa" ஊடகத்திற்கு, வத்திக்கான் பற்றிய செய்திகள் வழங்கும் குழுவின் தலைவர் Valentina Alazraki அவர்கள், இப்பயணத்தில் கலந்துகொள்ளாதது பற்றியும் குறிப்பிட்ட திருத்தந்தை, பல்வேறு வகைகளில் உரிமைகள் மீறப்பட்ட பெண்கள் பற்றி வலந்தீனா அவர்கள் எழுதிய நூலையும் சுட்டிக்காட்டினார் என்று திருப்பீட தகவல் தொடர்பாளர் Matteo Bruni அவர்கள் கூறினார். தனது 50 வது பிறந்த நாளைச் சிறப்பித்த, இஸ்பானிய செய்தியாளர் கிறிஸ்டினாவுக்கும் திருத்தந்தை நல்வாழ்த்துக்களைத் தெரிவித்தார். திருத்தந்தையின் மொசாம்பிக், மடகாஸ்கர், மற்றும், மொரீஷியஸ் நாடுகளுக்கான, திருத்தூதுப்பயணம், ஆப்ரிக்காவிற்கு அவர் மேற்கொள்ளும் நான்காவது பயணமாகவும், 31வது வெளிநாட்டுத் திருத்தூதுப்பயணமாகவும் அமைகின்றது. [2019-09-05 01:02:20]


நோய், மற்றும், நோயாளி மீது காட்டப்படும் அக்கறை

ஒருவரையொருவர் எதிர்த்துக் கொண்டு வாழும் இன்றைய உலகில், பொதுநலனைக் கட்டியெழுப்பும் அர்ப்பணத்துடன் செயல்படும் இத்தாலிய புற்றுநோய் மருத்துவ ஆய்வு குழு கிறிஸ்டோபர் பிரான்சிஸ் - வத்திக்கான் செய்திகள் மக்களின் நலவாழ்வில் அதிக அக்கறை கொண்டு, புற்றுநோய் மருத்துவத்தில் ஆய்வுகளை மேற்கொண்டுவரும் இத்தாலிய குழுவைப் பாராட்டினார், திருத்தந்தை பிரான்சிஸ். புற்றுநோய் மருத்துவம் குறித்த ஆய்வுகளை மேற்கொண்டுவரும் இத்தாலியக் குழுவை இத்திங்களன்று காலை திருப்பீடத்தில் சந்தித்து உரை வழங்கிய திருத்தந்தை பிரான்சிஸ் அவர்கள், 1973ம் ஆண்டு முதல் புற்றுநோயியல் துறையில் ஆய்வுகளையும், தடுப்பு முறைகளையும், பயிற்சி வகுப்புக்களையும் தீவிர சிகிச்சைகளையும் மேற்கொண்டுவரும் இவ்வமைப்பிற்கு தன் பாராட்டுக்களை வெளியிட்டார். எவ்வித இலாப நோக்கமுமின்றி, புற்றுநோயியல் துறையில், இவ்வமைப்பு ஆற்றிவரும் பணிகள் குறித்து தன் பாராட்டுக்களை வெளியிட்ட திருத்தந்தை பிரான்சிஸ் அவர்கள், மனிதர்கள், ஒருவரையொருவர் எதிர்த்துக் கொண்டு வாழும் இன்றைய உலகில், பொதுநலனைக் கட்டியெழுப்பும் அர்ப்பணத்துடன் செயல்பட வேண்டியதை இவ்வமைப்பின் நடவடிக்கைகள் கற்பிக்கின்றன என்று கூறினார். புற்று நோயியல் குறித்த இந்த இத்தாலிய அமைப்பின் செயல்பாடுகள், நோய் குறித்த ஆய்வுகளை மட்டுமல்ல, ஒவ்வொரு நோயாளி மீதான தனிப்பட்ட அக்கறையை வெளிப்படுத்துவதாக உள்ளன என்பதையும் எடுத்தியம்பிய திருத்தந்தை பிரான்சிஸ் அவர்கள், சகோதரத்துவ உணர்வுடன் கூடிய ஆதரவு ஒவ்வொரு நோயாளிக்கும் வழங்கப்பட வேண்டும் என்பதை, இவ்வமைப்பின் நடவடிக்கை, முழு சமூகத்திற்கும் கற்றுத்தருகிறது எனவும் பாராட்டினார். மக்களுக்கு சேவை புரிவதை நோக்கமாகக் கொண்டு ஆற்றப்படும் புற்றுநோயியல் ஆய்வுகளும், குணமளிக்கும் பணிகளும், இரக்கத்தின் செயல்பாடுகளாக உள்ளன என, மேலும் கூறினார், திருத்தந்தை பிரான்சிஸ். மனிதனை ஒரு பொருளாகவோ, சுமையாகவோ நடத்தும்போது ஏற்படும் தீய விளைவுகள் குறித்து, தன் கவலையை வெளியிட்ட திருத்தந்தை பிரான்சிஸ் அவர்கள், இன்றைய உலகில், கருணைக் கொலை குறித்த அனுமதிகள் பலநாடுகளில் வழங்கப்பட்டு வருவது, தனக்கு வருத்தமளிப்பதாகத் தெரிவித்தார். [2019-09-04 02:13:28]


உக்ரைன் கிரேக்க கத்தோலிக்க ஆயர்களுடன் திருத்தந்தை

கருத்துக்களைப் பகிர்ந்துகொள்வதும், வேறுபட்டக் கருத்துக்களை வலியுறுத்துவதும், நம் குழுமங்களில் இடம்பெற்றாலும், அந்தப் பகிர்வுகள், பாராளுமன்றத்தைப்போல், அரசியல் இசைவுகளின் வழி செல்லும் இடமல்ல - திருத்தந்தை கிறிஸ்டோபர் பிரான்சிஸ் - வத்திக்கான் செய்திகள் செப்டம்பர் 2, இத்திங்கள் காலை, உக்ரைன் கிரேக்க கத்தோலிக்க வழிபாட்டு முறை ஆயர் மாமன்றத்தின் உறுப்பினர்களை திருப்பீடத்தில் சந்தித்தத் திருத்தந்தை பிரான்சிஸ் அவர்கள், அவர்களிடம், குழுமப்பண்பும், தூய ஆவியாரும் என்ற கருத்துக்களில் தன் எண்ணங்களைப் பகிர்ந்துகொண்டார். ஒரே குழுவாக, கிறிஸ்தவ சமுதாயம் ஒன்றிணைந்து செல்லும் பயணத்தின்போது, தூய ஆவியாரின் இருப்பு முக்கியமானது என்பதை எடுத்துரைத்த திருத்தந்தை, கிறிஸ்தவக் குழுமம் என்பது, ஓருவருக்கொருவர் கேள்விகளை எழுப்பி, விவாதம் செய்யும் பாராளுமன்றக் குழுக்களைப்போல் நோக்கப்படக் கூடாது என்பதைத் தெளிவுபடுத்தினார். ஒருவருக்கொருவர் கருத்துக்களைப் பகிர்ந்துகொள்வதும், வேறுபட்டக் கருத்துக்களை வலியுறுத்துவதும், நம் குழுமங்களில் இடம்பெறுகின்றன என்றாலும், அந்தப் பகிர்வுகள், பாராளுமன்றத்தைப்போல், அரசியல் இசைவுகளின் வழி செல்லும் இடமல்ல என்று கூறினார் திருத்தந்தை. திருஅவையின் அழைப்பும், தனித்தன்மையும், அதன் நற்செய்தி அறிவிப்பாகும் என்றும் வலியுறுத்திக் கூறியத் திருத்தந்தை பிரான்சிஸ் அவர்கள், இதே உணர்வுடன், தூய ஆவியாரோடு இணைந்து, ஆயர் மாமன்ற கருத்துப்பரிமாற்றங்கள் இடம்பெறவேண்டும் என்று கேட்டுக்கொண்டார். தூய ஆவியாரை நோக்கி செபியுங்கள், அவர் உங்களை வழிநடத்துவார், அன்னை மரியா உங்களுக்குத் துணைநிற்பார் என்ற ஆசி மொழிகளுடன், திருத்தந்தை பிரான்சிஸ் அவர்கள், உக்ரைன் கிரேக்க கத்தோலிக்க வழிபாட்டு முறை ஆயர் மாமன்ற உறுப்பினர்களுக்கு வழங்கிய உரையை நிறைவு செய்தார். [2019-09-04 02:08:49]


திருஅவைக்கு மேலும் 13 புதிய கர்தினால்கள்

திருஅவைப் பணியிலிருந்து ஓய்வு பெற்று, 80 வயதைத் தாண்டியுள்ள மூவரை, அவர்களின் சிறப்புப் பணிகளுக்காக கர்தினாலாக உயர்த்தியுள்ளார், திருத்தந்தை கிறிஸ்டோபர் பிரான்சிஸ் - வத்திக்கான் செய்திகள் தாங்கள் திருஅவையில் ஆற்றிய சிறப்புப் பணிகளுக்கு என 80 வயதிற்கு மேற்பட்ட மூன்று ஆயர்கள் உட்பட, 13 பேரை, இஞ்ஞாயிறன்று, புதிய கர்தினால்களாக அறிவித்தார், திருத்தந்தை பிரான்சிஸ். மதங்களிடையே உரையாடலை ஊக்குவித்துவரும் திருப்பீட அவையின் தலைவர், இஸ்பெயின் நாட்டு ஆயர் Miguel Angel Ayuso Guixot, திருப்பீட ஆவணக்காப்பகம், மற்றும், திருப்பீட நூலகத் தலைவர், பேராயர் José Tolentino Medonça, இந்தோனேசியாவின் ஜகார்த்தா பேராயர் Ignatius Suharyo Hardjoatmodjo, கியூபா பேராயர் Juan de la Caridad García Rodríguez, காங்கோ ஜனநாயக குடியரசின் பேராயர் Fridolin Ambongo Besungu, லக்ஸம்பர்க் பேராயர் Jean-Claude Höllerich, குவாத்தமாலா நாட்டு ஆயர் Alvaro L Ramazzini Imeri, இத்தாலியின் போலோஞ்ஞா பேராயர் Matteo Zuppi, மொராக்கோ நாட்டு Rabat பேராயர், Cristóbal López Romero, திருப்பீடத்தின் புலம்பெயர்ந்தோர் மற்றும் குடியேற்றத்தாரர் துறையின் நேரடிச் செயலர், இயேசுசபை அருள்பணி Michael Czerny என திருஅவைப் பணியில் செயலாற்றிக் கொண்டிருக்கும் 10 பேரின் பெயர்களை, இஞ்ஞாயிறு மூவேளை செப உரையின் இறுதியில் முதலில் அறிவித்தார் திருத்தந்தை பிரான்சிஸ். மேலும், திருஅவைப் பணியிலிருந்து ஓய்வு பெற்று, 80 வயதைத் தாண்டியுள்ள மூவரை, அவர்களின் சிறப்புப் பணிகளுக்காக கர்தினாலாக உயர்த்தியுள்ளார், திருத்தந்தை. திருப்பீட தலைமையகத்தில் பல ஆண்டுகள் பணியாற்றியபின், எகிப்திற்கான திருப்பீடத் தூதுவராகவும் பணியாற்றி ஓய்வுப்பெற்றுள்ள பேராயர் Michael Louis Fitzgerald, லித்வேனியாவின் முன்னாள் பேராயர், Sigitas Tamkevicius, அங்கோலாவின் Benguela முன்னாள் ஆயர் Eugenio Dal Corso ஆகியோரை கர்தினால்களாக அறிவித்தார் திருத்தந்தை பிரான்சிஸ். இந்த புதிய 13 கர்தினால்களும் தேர்வுச்செய்யப்பட்டுள்ளது, திருஅவையின் மறைப்பணி அழைப்பின் சிறப்பிடங்களைக் குறிப்பதாக உள்ளது என்றார், திருத்தந்தை பிரான்சிஸ். இந்த புதிய கர்தினால்கள், அக்டோபர் மாதம் 5ம் தேதி, வத்திக்கான் புனித பேதுரு பசிலிக்காப் பேராலயத்தில் இடம்பெறும் திருவழிபாட்டில் கர்தினால் நிலைக்கு உயர்த்தப்படுவர். [2019-09-04 02:02:06]


குணப்படுத்தி, நம்பிக்கை வழங்குபவர் தூய ஆவியானவர்

திருத்தூதுப்பயணம் வெற்றியடைய உரோம் மேரி மேஜர் பசிலிக்கா சென்று, அன்னை மரியாவிடம் செபித்தார் திருத்தந்தை பிரான்சிஸ் விக்டர்தாஸ் – வத்திக்கான் செய்திகள் நம் வாழ்வின் வேதனை நிறைந்த நினைவுகளுக்கு மருந்திட்டு குணப்படுத்துகிறவர் தூய ஆவியார் என்று, திருத்தந்தை பிரான்சிஸ் அவர்கள், இச்செவ்வாயன்று, தன் டுவிட்டர் செய்தியில் கூறியுள்ளார். “தூய ஆவியானவரை, நம் காயங்களுக்குள் அழைக்கும்போது, நம் வேதனையான நினைவுகளை, நம்பிக்கை எனும் எண்ணெயால் தடவி குணப்படுத்துகிறார், ஏனெனில், தூய ஆவியார், நம்பிக்கையை வழங்குபவர்” என்ற சொற்களை, திருத்தந்தை பிரான்சிஸ் அவர்கள், செப்டம்பர் 3, இச்செவ்வாயன்று, தன் டுவிட்டர் செய்தியாக வெளியிட்டுள்ளார். செப்டம்பர் 3, இச்செவ்வாய் முடிய, @pontifex என்ற வலைத்தள முகவரியில் திருத்தந்தை பிரான்சிஸ் அவர்கள் வெளியிட்டுள்ள டுவிட்டர் செய்திகள், 2,103 என்பதும், அவரது டுவிட்டர் பதிவுகளை, ஆங்கில மொழியில் பின்பற்றுவோரின் எண்ணிக்கை மட்டும், 1 கோடியே 81 இலட்சம் என்பதும் குறிப்பிடத்தக்கன. இத்துடன், திருத்தந்தை பிரான்சிஸ் அவர்களின் செயல்பாடுகளை மையப்படுத்தி, வெளியிடப்படும் புகைப்படங்கள், மற்றும், காணொளிகள் அடங்கிய instagram தளத்தில், இதுவரை வெளியான புகைப்படங்கள், மற்றும், காணொளிகள், 753 என்பதும், அவற்றைப் பின்பற்றுவோரின் எண்ணிக்கை 62 இலட்சம் என்பதும் குறிப்பிடத்தக்கன. மேரி மேஜர் பசிலிக்காவில் செபம் மேலும், திருத்தந்தை பிரான்சிஸ் அவர்கள், செப்டம்பர் 4, இப்புதனன்று, மொசாம்பிக், மடகாஸ்கர், மொரீஷியஸ் ஆகிய ஆப்ரிக்க நாடுகளுக்கு, ஒரு வாரம் திருத்தூதுப்பயணம் மேற்கொள்ளவிருப்பதை முன்னிட்டு, செப்டம்பர் 03, இச்செவ்வாய் காலையில், உரோம் மேரி மேஜர் பசிலிக்கா சென்று, அன்னை மரியாவிடம் செபித்தார். வெளிநாடுகளுக்கு திருத்தூதுப் பயணங்களைத் தொடங்குவதற்கு முன்னும், அவற்றை நிறைவுசெய்து திரும்பும்வேளையிலும், உரோம், மேரி மேஜர் பசிலிக்காவிலுள்ள Salus Populi அன்னை மரியாவிடம் சென்று, மலர்களை அர்ப்பணித்து, செபிப்பதை வழக்கமாகக் கொண்டிருக்கிறார், திருத்தந்தை பிரான்சிஸ். திருத்தந்தை பிரான்சிஸ் அவர்கள், செப்டம்பர் 4, இப்புதன், உரோம் நேரம் காலை 7.20 மணிக்கு, வத்திக்கானிலிருந்து தனது 31வது வெளிநாட்டுத் திருப்பயணத்தைத் தொடங்குகிறார். செப்டம்பர் 10ம் தேதி வரை திருத்தந்தை மேற்கொள்ளும், இந்த திருத்தூதுப்பயணத்தில், இந்தியப் பெருங்கடல் பகுதியில் உள்ள மூன்று நாடுகளுக்குச் செல்கிறார். [2019-09-04 01:58:30]


புனிதத்தை அணுகிச் செல்ல உதவும் திருவழிபாடு

கத்தோலிக்கத் திருவழிபாட்டின் ஆழத்தை புரிந்துகொள்வதற்கும், இந்த அருள் அடையாளங்களில் இறைவனையும், அயலவரையும் சந்திப்பதற்கும் நாம் அனைவரும் அழைப்பு பெற்றுள்ளோம் – கர்தினால் பரோலின் ஜெரோம் லூயிஸ் - வத்திக்கான் செய்திகள் நம் ஆண்டவரையும், சகோதரர், சகோதரிகளையும் சந்திப்பதற்கு உதவியாக, திருவழிபாட்டு வாழ்வில் நாம் தகுந்த உருவாக்கம் பெறவேண்டும் என்று திருப்பீடச் செயலர், கர்தினால் பியெத்ரோ பரோலின் அவர்கள், இத்தாலியில் நடைபெறும் ஒரு கருத்தரங்கிற்கு செய்தி ஒன்றை அனுப்பியுள்ளார். "திருவழிபாடு: திருமுழுக்கின் புனிதத்திற்கு அழைப்பு" என்ற மையக்கருத்துடன், ஆகஸ்ட் 26ம் தேதி முதல் 29ம் தேதி முடிய, இத்தாலியின் மெஸ்ஸீனா (Messina) என்ற இடத்தில் நடைபெறும் ஒரு கருத்தரங்கிற்கு, கர்தினால் பரோலின் அவர்கள் அனுப்பிய செய்தியில் இவ்வாறு கூறியுள்ளார். பொருள் நிறைந்த, அடையாளங்கள் மிகுந்த கத்தோலிக்கத் திருவழிபாட்டின் ஆழத்தை அனைவரும் புரிந்துகொள்வதற்கும், இந்த அருள் அடையாளங்களில் இறைவனையும், அயலவரையும் சந்திப்பதற்கும் நாம் அனைவரும் அழைப்பு பெற்றுள்ளோம் என்று கர்தினால் பரோலின் அவர்கள் தன் செய்தியில் குறிப்பிட்டுள்ளார். இந்த நான்குநாள் கருத்தரங்கை ஏற்பாடு செய்துள்ள ஆயர் Claudio Maniago அவர்களுக்கு, கர்தினால் பரோலின் அவர்கள் அனுப்பியுள்ள இச்செய்தியில், திருவழிபாடுகள், ஒவ்வொருவரையும், 'நான்' என்ற நிலையிலிருந்து, 'நாம்' என்ற நிலைக்கு அழைத்துச் செல்கிறது என்று திருத்தந்தை பிரான்சிஸ் அவர்கள் கூறிய கருத்தையும் சுட்டிக்காட்டியுள்ளார். இறைவனின் அணுக இயலாத புனிதத்தை அணுகிச்செல்ல உதவும் திருவழிபாடுகளில், பொருளுள்ள முறையில் பங்கேற்க, இரண்டாம் வத்திக்கான் சங்கம் வழி அமைத்ததைத் தொடர்ந்து, திருத்தந்தையர் அனைவரும், மக்களை, இந்தப் புனிதப்பாதையில் பயணிக்க அழைப்பு விடுத்துவருகின்றனர் என்பதை, கர்தினால் பரோலின் அவர்கள், தன் செய்தியில் எடுத்துக்காட்டுகளுடன் கூறியுள்ளார். [2019-09-02 00:35:09]


கடல்களும் பெருங்கடல்களும் பாதுகாக்கப்படும்படியாக..

செப்டம்பர் 1, இஞ்ஞாயிறு முதல், வருகிற அக்டோபர் 4, அசிசி நகர் புனித பிரான்சிஸ் விழா வரை, ‘படைப்பின் காலம்’ என்று, திருத்தந்தையோடு இணைந்து அனைவரும் கொண்டாடுவதற்கு, கத்தோலிக்க அமைப்புக்களும், பல்வேறு கிறிஸ்தவ சபைகளும் அழைப்பு விடுத்துள்ளன மேரி தெரேசா- வத்திக்கான் செய்திகள் பெரும்பாலான கடல்களும் பெருங்கடல்களும், பல்வேறு காரணங்களால் அச்சுறுத்தலுக்கு உள்ளாகியிருக்கும்வேளை, அவை பாதுகாக்கப்படும்படியாக, இந்த செப்டம்பர் மாதத்தில் கடவுளிடம் மன்றடுவோம் என்று, திருத்தந்தை பிரான்சிஸ் அவர்கள் கூறியுள்ளார். இந்த செப்டம்பர் மாதத்திற்குரிய தனது செபக் கருத்து பற்றி காணொளியில் பேசியுள்ள திருத்தந்தை பிரான்சிஸ் அவர்கள், இப்பூமிக்கோளத்தின் நீர் விநியோகத்தைப் பெருமளவு கொண்டிருக்கும் பகுதிகள் மற்றும், நீரில் வாழ்கின்ற பெருமளவான பல்வேறு பல்லுயிர்கள் பற்றி நாம் நினைத்துப் பார்க்குமாறு கேட்டுக்கொண்டுள்ளார். கடல்கள் மற்றும், பெருங்கடல்களின் தற்போதைய நிலை பற்றி கவலைகொண்டுள்ள அதேநேரம், அனைத்து அரசியல்வாதிகளும், அறிவியலாளர்களும், பொருளியலாளர்களும் அவற்றைப் பாதுகாக்க, ஒன்றிணைந்து நடவடிக்கைகள் எடுக்குமாறு கத்தோலிக்கர் எல்லாரும் செபிக்க வேண்டுமென்று, திருத்தந்தை அச்செய்தியில் அழைப்பு விடுத்துள்ளார். உலகிலுள்ள கிறிஸ்தவர்கள் அனைவரையும் ஒன்றிணைக்கும், உலகளாவிய ஆண்டு நிகழ்வான, ‘படைப்பின் காலம்’, செப்டம்பர் 1, இஞ்ஞாயிறன்று துவங்கும்வேளை, திருத்தந்தை பிரான்சிஸ் அவர்களும், படைப்பு, குறிப்பாக, கடல்களும் பெருங்கடல்களும் பாதுகாக்கப்படும்படியாக, சிறப்பாகச் செபிக்குமாறு கேட்டுக்கொண்டுள்ளார். நெகிழிப் பொருள்கள் தற்போது ஒவ்வோர் ஆண்டும் பெருங்கடலில், ஒரு கோடியே 30 இலட்சம் டன் நெகிழிப் பொருள்கள் குவிகின்றன. இவை, பல்வேறு சேதங்களை ஏற்படுத்துவதோடு, கடல்களில் வாழும், ஒரு இலட்சம் உயிரினங்களின் இறப்புக்கும் காரணமாகின்றன. பெருங்கடல்களில் குவியும் பல நெகிழிப் பொருள்கள், பல ஆண்டுகளாக அல்லது நூற்றாண்டுகளாக அழியாமல் இருப்பதோடு, அவை மெல்ல மெல்ல நுண்நெகிழிப்பொருள்களாக மாறி, அவற்றை மீன்கள் மற்றும், ஏனைய கடல்வாழ் உயிரினங்கள் சாப்பிடுகின்றன என்று, ஐ.நா. நிறுவனம் எச்சரித்துள்ளது. [2019-09-01 03:19:19]


கர்தினால் சில்வெஸ்திரினி மறைவுக்கு திருத்தந்தை இரங்கல்

1991ம் ஆண்டு மே 24ம் தேதி, திருப்பீடத்தின் கீழை வழிபாட்டுமுறை பேராயத்தின் தலைவராக நியமிக்கப்பட்ட, கர்தினால் சில்வெஸ்திரினி அவர்கள், 2000மாம் ஆண்டு நவம்பர் 25ம் தேதி பணி ஓய்வுபெற்றார் மேரி தெரேசா- வத்திக்கான் செய்திகள் கர்தினால் அக்கிலே சில்வெஸ்திரினி அவர்கள் இறைபதம் அடைந்ததையொட்டி, அவரின் ஆன்மா இறைவனில் நிரந்தரமாக இளைப்பாறுவதற்காகச் செபிப்பதாக உறுதிகூறியுள்ள அதேநேரம், கர்தினால் ஆற்றிய சிறப்பான பணிகளுக்கு நன்றியும் தெரிவித்துள்ளார், திருத்தந்தை பிரான்சிஸ். திருப்பீடத்தின் கீழை வழிபாட்டுமுறை பேராயத்தின் முன்னாள் தலைவரான, கர்தினால் சில்வெஸ்திரினி அவர்கள், தனது 95வது வயதில், ஆகஸ்ட் 29, இவ்வியாழனன்று இறைவனடி சேர்ந்தார். அவரின் இறுதி வழியனுப்பும் திருவழிபாடு, ஆகஸ்ட் 30, இவ்வெள்ளி மாலையில், வத்திக்கான் புனித பேதுரு பசிலிக்காவில் நடைபெற்றது. கர்தினால்கள் அவையின் துணைத் தலைவர், கர்தினால் ஜொவான்னி பத்திஸ்தா ரே அவர்கள் தலைமையேற்று நிறைவேற்றிய இறுதிச்சடங்கு திருப்பலியின் இறுதியில், திருத்தந்தை பிரான்சிஸ் அவர்கள், கர்தினால் சில்வெஸ்திரினி அவர்களின் உடலை மந்திரித்து, இறுதி மரியாதை செய்தார். கர்தினால் சில்வெஸ்திரினி அவர்களின் மறைவோடு, திருஅவையில் மொத்த கர்தினால்களின் எண்ணிக்கை 215 ஆகவும், 80 வயதுக்குட்பட்டவர்களின் எண்ணிக்கை 118 ஆகவும் மாறியது. கர்தினால் சில்வெஸ்திரினி இத்தாலியின் Brisighella என்ற ஊரில் 1923ம் ஆண்டு பிறந்த கர்தினால் சில்வெஸ்திரினி அவர்கள், தனது 30வது வயதில், திருப்பீடத்தின் தூதரகப் பணிகளில் சேர்ந்தார். திருப்பீட செயலகத்தில், திருஅவையின் சிறப்பு விவகாரத்துறையில் பணியாற்றிய இவர், வியட்நாம், சீனா, இந்தோனேசியா, மற்றும், தென்கிழக்கு ஆசியாவில் இடம்பெற்ற பிரச்சனைகளைக் களைவதில் முனைப்புடன் செயல்பட்டவர். அணுஆயுதங்கள் பரவல் தடை ஒப்பந்தத்தில் திருப்பீடம் இணைவது தொடர்பான ஏட்டை சமர்ப்பிப்பதற்கு, 1971ம் ஆண்டில், கர்தினால் அகுஸ்தீனோ கசரோலி அவர்களுடன் மாஸ்கோ சென்றவர், கர்தினால் சில்வெஸ்திரினி. 1988ம் ஆண்டு ஜூன் 28ம் தேதி கர்தினாலாக உயர்த்தப்பட்ட இவர், வத்திக்கான் மனசாட்சி நீதிமன்றத்தின் தலைவராக நியமிக்கப்பட்டார். [2019-08-31 01:57:05]


இஸ்ரேல் அரசின் தாக்குதல்களுக்கு கர்தினாலின் கண்டனம்

இஸ்ரேல் அரசு, Droneகளைக் கொண்டு பெய்ரூட்டின் புறநகர்ப் பகுதியில் அண்மையில் மேற்கொண்ட தாக்குதல்களை, கர்தினால் Boutros Rai அவர்கள், வன்மையாகக் கண்டனம் செய்துள்ளார். ஜெரோம் லூயிஸ் - வத்திக்கான் செய்திகள் இஸ்ரேல் அரசு, Droneகளைக் கொண்டு பெய்ரூட்டின் புறநகர்ப் பகுதியில் அண்மையில் மேற்கொண்ட தாக்குதல்களை, லெபனான் நாட்டு கர்தினால், Bechara Boutros Rai அவர்கள், வன்மையாகக் கண்டனம் செய்துள்ளார். பெய்ரூட்டின் புறநகர்ப் பகுதியில், Shiite பிரிவைச் சார்ந்த மக்கள் மீது, சனிக்கிழமை மற்றும் ஞாயிறுக்கு இடைப்பட்ட இரவு நேரத்தில் மேற்கொள்ளப்பட்ட இத்தாக்குதல், வன்மையாகக் கண்டனம் செய்யப்படவேண்டியது என்று, மாறனைட் வழிபாட்டு முறை கர்தினால் Boutros Rai அவர்கள், ஆகஸ்ட் 27, இச்செவ்வாயன்று அறிக்கையொன்றை வெளியிட்டார். லெபனான் நாட்டின் தெற்குப் பகுதியிலிருந்து இஸ்ரேல் இராணுவம் வெளியேற வேண்டும் என்று, 2006ம் ஆண்டு, ஐ.நா. அவை வெளியிட்ட ஓர் ஒப்பந்தத்தை இஸ்ரேல் இராணுவம் தொடர்ந்து மீறிவருகிறது என்றும், அத்துமீறிய இத்தகையத் தாக்குதல்களை மேற்கொண்டு வருகிறது என்றும் கர்தினால் Boutros Rai அவர்கள் தன் அறிக்கையில் குறிப்பிட்டுள்ளார். மத்தியக் கிழக்குப் பகுதியில் தொடர்ந்து வரும் மோதல்களில், அண்மையக் காலமாக, Droneகளைக் கொண்டு மேற்கொள்ளப்படும் தாக்குதல்கள், அப்பகுதியில் மேலும் பல வேதனைகளை உருவாக்கியுள்ளன என்று பீதேஸ் செய்தி கூறுகிறது. (Fides) [2019-08-30 01:51:21]


பக்க இலக்கங்களை அழுத்தி எல்லா செய்திகளையும் பார்வையிடவும்