வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)



பக்க இலக்கங்களை அழுத்தி எல்லா செய்திகளையும் பார்வையிடவும்



திருத்தந்தையின் கண்களில், இதயத்தில் அமேசான்

“திருஅவைக்கும், ஒருங்கிணைந்த சூழலியலுக்கும் புதிய பாதைகளைக் கண்டுபிடிக்க” என்ற தலைப்பில் துவங்கியுள்ள ஆயர்கள் மாமன்றம், அக்டோபர் 27ம் தேதி நிறைவடையும். கிறிஸ்டோபர் பிரான்சிஸ்: வத்திக்கான் செய்திகள் பளுவான சிலுவைகளைச் சுமக்கின்ற மற்றும், நற்செய்தியின் விடுதலையளிக்கும் ஆறுதலுக்காகவும், திருஅவையின் அன்புநிறைந்த பராமரிப்புக்காகவும் ஆவலோடு காத்திருக்கின்ற, அமேசானில் வாழ்கின்ற நம் சகோதரர், சகோதரிகளை நினைவுபடுத்தி, அவர்களுக்காக, அவர்களோடு ஒன்றுசேர்ந்து நாம் பயணிப்போம் என்று அமேசான் பகுதி பற்றிய உலக ஆயர்கள் பேரவையில் கூறினார், திருத்தந்தை பிரான்சிஸ். அமேசான் பற்றிய டுவிட்டர் மேலும், “நற்செய்திக்குச் சான்று பகரும் வழிகளை எப்போதும் காட்டுகின்ற தூய ஆவியாருக்குப் பணிவு மற்றும், உடன்பிறப்பு குழும உணர்வை அனுபவிக்கும்பொருட்டு, இந்த முக்கியமான திருஅவை நிகழ்வில், செபங்களோடு எம்முடன் ஒன்றித்திருங்கள்” என்ற டுவிட்டர் செய்தியையும், ஹாஸ்டாக்(#SinodoAmazonico) குடன், இத்திங்களன்று வெளியிட்டுள்ளார், திருத்தந்தை பிரான்சிஸ். மேலும், Rosh Ha-Shanah, Yom Kippur மற்றும், Sukkot யூத மத விழாவுக்கென, உரோம் யூதமத ரபி Riccardo Di Segni அவர்களுக்கு வாழ்த்துச் செய்தி ஒன்றையும் திருத்தந்தை அனுப்பியுள்ளார். [2019-10-08 23:52:43]


அமேசான் மாமன்றத்தை இயக்குபவர் தூய ஆவியார்

இத்திங்கள் காலையில் முதல் நிகழ்வாக, அமேசான் உலக ஆயர்கள் மாமன்றப் பிரதிநிதிகள், வத்திக்கான் பசிலிக்காவில் செபித்தபின், புனித திருத்தந்தை ஆறாம் பவுல் அரங்கத்திற்குப் பவனியாகச் சென்றனர் கிறிஸ்டோபர் பிரான்சிஸ்: வத்திக்கான் செய்திகள் உலக ஆயர்கள் மாமன்றம் என்பது, தூய ஆவியாரின் தூண்டுதல் மற்றும், வழிகாட்டுதலில் ஒன்றுசேர்ந்து நடப்பதாகும், இம்மான்றத்தின் முக்கிய கதாநாயகர் தூய ஆவியாரே, அவரைத் தயவுசெய்து, இந்த அரங்கைவிட்டு வெளியேற்றாமல் இருப்போம் என்று, திருத்தந்தை பிரான்சிஸ் அவர்கள், இத்திங்களன்று மாமன்றப் பிரதிநிதிகளிடம் கேட்டுக்கொண்டார். அக்டோபர் 07, இத்திங்கள் காலையில், அமேசான் பகுதி பற்றிய உலக ஆயர்கள் மாமன்றப் பிரதிநிதிகள், வத்திக்கான் பேதுரு பசிலிக்காவில் விசுவாசிகளுடன் சேர்ந்து செபித்தபின், புனித திருத்தந்தை ஆறாம் பவுல் அரங்கத்திற்குப் பவனியாக வந்தனர். காலை செபம் மற்றும், திருத்தந்தையின் துவக்க உரையுடன் இந்த மாமன்றம் துவங்கியது. இஸ்பானிய மொழியில் துவக்கவுரையாற்றிய திருத்தந்தை பிரான்சிஸ் அவர்கள், தூய ஆவியாரின் பணியை உறுதிசெய்யும்பொருட்டு நிறையச் செபிக்குமாறும், சிந்தித்து, கலந்துரையாடி, தாழ்மையுடன் உற்றுக்கேட்குமாறும், மாமன்றப் பரிதிநிதிகளிடம் கூறினார். மாமன்ற நடைமுறைகள் துவக்க உரையில், மாமன்ற நடைமுறைகள் பற்றி விளக்கிய திருத்தந்தை, புதிதாகப் பிறந்த குழந்தையைப் பராமரிப்பது போன்ற அக்கறையும், உடன்பிறந்த உணர்வு மற்றும், மதிப்புநிறை சூழலும், நெருக்கமான உறவுக் காற்றும், இக்காற்று அடிக்கையிலேயே, அதை வெளியேற்றாமல் இருப்பதும், இதற்குத் தேவைப்படுகின்றது என்றும் கூறினார். இம்மான்றம் பற்றி செய்தியாளர்களுக்கு அறிவிப்பதற்குப் பொறுப்பானவர்கள் அதை ஆற்றுவார்கள், அதேநேரம், இந்த அரங்கத்திற்கு வெளியே, மக்கள் தங்கள் கருத்துக்களை வெளிப்படுத்தினால், மாமன்ற நடைமுறை சிறிது சேதப்படுத்தப்படும் என்றும் திருத்தந்தை எச்சரித்தார். அமேசானில் வாழும் மக்கள் மீது, மேய்ப்புப்பணி இதயத்தையும், அம்மக்களின் வரலாறு, கலாச்சாரங்கள், வாழ்வுமுறை ஆகியவற்றை மதிக்கும் அணுகுமுறையையும் கொண்டிருக்குமாறு கூறியத் திருத்தந்தை, கருத்தியல் காலனி ஆதிக்கப் போக்கிற்கு எதிராய் தனது கண்டனத்தைத் தெரிவித்தார். மாமன்றம், வட்டரங்கு கலந்துரையாடலோ, பாராளுமன்றமோ, தொலைபேசி அழைப்பு மையமோ அல்ல, மாறாக, அது, மக்களைப் புரிந்துகொள்தலும், அவர்களுக்குப் பணியாற்றுவதுமே மாமன்ற நடைமுறையாகும் என்றும் திருத்தந்தை கூறினார். [2019-10-08 00:10:23]


கடவுளின் பரிவன்பைப் பெற்றவர் என்ற உணர்வு அவசியம்

அந்த அல்லது இந்த சகோதரர், சகோதரி மீது, அந்த ஆயர், அந்த அருள்பணியாளர் மீது பரிவுடன் நடந்துகொள்கிறேனா? அல்லது, எனது தீர்ப்பு மற்றும், புறக்கணிப்புப் போக்கால் அவர்களைத் தொடர்ந்து துன்புறுத்துகிறேனா? மேரி தெரேசா: வத்திக்கான் செய்திகள் அக்டோபர் 5, இச்சனிக்கிழமை மாலையில், 13 புதிய கர்தினால்களை உயர்த்திய திருவழிபாட்டில் வாசிக்கப்பட்ட, பெருந்திரளான மக்கள் ஆயரில்லா ஆடுகளைப்போல் இருந்ததால், இயேசு அவர்கள் மீது பரிவு கொண்டு, அவர்களுக்குப் பலவற்றைக் கற்பித்து பின்னர் உணவளித்த மாற்கு நற்செய்தியை (மாற்.6:30-37) மையப்படுத்தி, மறையுரைச் சிந்தனைகளை வழங்கினார், திருத்தந்தை பிரான்சிஸ். இந்நற்செய்தி பகுதியில், இயேசுவின் பரிவே, மையமாக உள்ளது, பரிவே, நற்செய்தியில் மையச் சொல்லாகும், கிறிஸ்துவின் இதயத்தில் எழுதப்பட்டுள்ள இச்சொல், கடவுளின் இதயத்தில் என்றென்றும் எழுதப்பட்டுள்ளது என்று கூறினார், திருத்தந்தை. இயேசுவின் பரிவு வெளிப்படும் நற்செய்திப் பகுதிகளையும், பழைய ஏற்பாட்டில் மோசேயை கடவுள் அழைத்த நிகழ்வு தொடங்கி, பல்வேறு நிகழ்வுகளில் கடவுளின் பரிவு வெளிப்படும் பகுதிகளையும் சுட்டிக்காட்டி மறையுரையாற்றிய திருத்தந்தை, நம் வாழ்வில் கடவுளின் பரிவால், இரக்கத்தால், நாம் எப்போதும் வழிநடத்தப்பட்டுள்ளோம் என்ற விழிப்புணர்வு உள்ளதா? என்ற கேள்வியை, கர்தினால்களிடம் முன்வைத்தார். கர்தினால்களின் சிவப்பு தொப்பி கர்தினால்களின் தொப்பியின் நிறம், அவர்கள், தங்கள் சொந்த குருதியைச் சிந்துவதற்குத் தயாராக இருப்பதைக் குறித்துக் காட்டுகின்றது என்றும், தாங்கள் கடவுளின் இரக்கத்தைப் பெற்றவர்கள் மற்றும், அந்த இரக்கத்தை மற்றவருக்குக் காட்ட வேண்டியவர்கள் என்ற விழிப்புணர்வில் இருக்கையில், அந்நிலை பாதுகாப்பாக இருக்கும் என்றும், திருத்தந்தை கூறினார். இந்த ஒரு விழிப்புணர்வின்றி எவரும், தனது பணிக்கு விசுவாசமாக இருக்க இயலாது என்றும், திருஅவையின் அதிகாரிகளில் நிலவும் பல நேர்மையற்ற நடவடிக்கைகளுக்கு, பரிவிரக்கம் காட்டப்பட்டவர்கள் என்ற உணர்வு குறைவுபடுவதும், புறக்கணிப்புடன் நடந்துகொள்வதுமே காரணம் என்றும், திருத்தந்தை கூறினார். நம்மைச் சிறப்பாகத் தேர்ந்தெடுத்து, திருப்பொழிவுசெய்து, தமது மீட்பின் நற்செய்தியை அனைவருக்கும் அறிவிக்க நம்மை அனுப்பியுள்ள ஆண்டவருக்குச் சாட்சிகளாக வாழும்பொருட்டு, இரக்கமுள்ள இதயத்தைப் பெறுவதற்கு, திருத்தூதர் பேதுருவின் பரிந்துரையை இறைஞ்சுவோம் என, தனது மறையுரையை நிறைவு செய்தார், திருத்தந்தை பிரான்சிஸ். இத்திருவழிபாட்டில், புதிய கர்தினால் புதிய கர்தினால் Miguel Ángel Ayuso Guixot அவர்கள், திருத்தந்தைக்கு நன்றியுரையாற்றினார். [2019-10-06 00:09:02]


சிறப்பு திருத்தூது மாதம் புனித குழந்தைதெரேசாவுக்கு அர்ப்பணிப்பு

2017ம் ஆண்டு அக்டோபர் 22ம் தேதி ஞாயிறு மூவேளை செப உரையில், 2019ம் ஆண்டு அக்டோபர் மாதம், சிறப்பு திருத்தூது மாதமாகச் சிறப்பிக்கப்படும் என, திருத்தந்தை பிரான்சிஸ் அவர்கள் அறிவித்தார் கிறிஸ்டோபர் பிரான்சிஸ்: வத்திக்கான் செய்திகள் அக்டோபர் 1, இச்செவ்வாயன்று துவங்கியுள்ள சிறப்பு திருத்தூது மாதத்தை, புனித குழந்தை தெரேசாவிடம் அர்ப்பணிப்போம் என்று, ஹாஸ்டாக் (#ExtraordinaryMissionaryMonth) குடன், இச்செவ்வாயன்று தன் டுவிட்டர் செய்தியை வெளியிட்டுள்ளார், திருத்தந்தை பிரான்சிஸ். “சிறு சிறு அன்பு முயற்சிகள் வழியாக, கடவுள் மாபெரும் செயல்கள் ஆற்றுகின்றார், உலகின் மீட்பை நிறைவேற்றுகிறார், இன்று துவங்கும் சிறப்பு திருத்தூது மாதத்தை, நம் உண்மையான நண்பராகிய புனித குழந்தை தெரேசாவிடம் அர்ப்பணிப்போம்” என்ற சொற்களை, ஹாஸ்டாக் (#MissionaryOctober) குடன், இச்செவ்வாயன்று தன் டுவிட்டர் செய்தியில் பதிவுசெய்துள்ளார், திருத்தந்தை பிரான்சிஸ். சிறப்பு திருத்தூது மாத திருப்பலி மேலும், அக்டோபர் 1, இச்செவ்வாய் மாலை 6 மணிக்கு, வத்திக்கான் புனித பேதுரு பசிலிக்கா பேராலயத்தில், திருப்பலி நிறைவேற்றி, சிறப்பு திருத்தூது மாதத்தைத் துவங்கி வைக்கிறார், திருத்தந்தை பிரான்சிஸ். 2017ம் ஆண்டு அக்டோபர் 22ம் தேதி ஞாயிறன்று சிறப்பிக்கப்பட்ட உலக திருத்தூது ஞாயிறன்று, திருத்தந்தை பிரான்சிஸ் அவர்கள் ஆற்றிய மூவேளை செப உரையில், 2019ம் ஆண்டு அக்டோபர் மாதம் முழுவதும், சிறப்பு திருத்தூது மாதமாகச் சிறப்பிக்கப்படும் என அறிவித்தார். திருத்தந்தை 15ம் பெனடிக்ட் அவர்கள் வெளியிட்ட Maximum Illud என்ற திருத்தூது மடலின் நூறாம் ஆண்டு நிறைவைக் கொண்டாடுவதற்கென, இந்த சிறப்பு திருத்தூது மாதத்தை அறிவிப்பதாகவும், திருத்தந்தை பிரான்சிஸ் அவர்கள் கூறினார். இந்த நிகழ்வுக்குத் தயாரிப்புக்களை, குறிப்பாக, தலத்திருஅவைகள், துறவு நிறுவனங்கள், திருஅவை கழகங்கள், இயக்கங்கள், குழுமங்கள் மற்றும், ஏனைய திருஅவை சார்ந்த அமைப்புகளில், இம்மாதம் குறித்த விழிப்புணர்வை ஏற்படுத்தும் பொறுப்பை, நற்செய்தி அறிவிப்பு பேராயத் தலைவர் கர்தினால் பெர்னான்டோ பிலோனி அவர்களிடம் ஒப்படைத்தார், திருத்தந்தை பிரான்சிஸ். இந்த சிறப்பு மாதத்திற்கு, “உலகில், கிறிஸ்துவின் திருஅவையின் திருத்தூதுப்பணியாற்ற திருமுழுக்குப் பெற்றவர்கள் மற்றும், அனுப்பப்பட்டவர்கள்” என்ற தலைப்பையும் திருத்தந்தை பிரான்சிஸ் அவர்கள் வழங்கினார். [2019-10-02 02:56:30]


அமெரிக்க கர்தினால் Levada மரணம், திருத்தந்தை இரங்கல்

2005ம் ஆண்டில் திருப்பீடத்தின் விசுவாசக் கோட்பாட்டு பேராயத் தலைவராக நியமிக்கப்பட்ட, மறைந்த கர்தினால் Levada அவர்கள், 2006ம் ஆண்டில் கர்தினாலாக உயர்த்தப்பட்டார் மேரி தெரேசா: வத்திக்கான் செய்திகள் திருப்பீடத்தின் விசுவாசக் கோட்பாட்டு பேராய முன்னாள் தலைவரான, அமெரிக்க ஐக்கிய நாட்டு கர்தினால் வில்லியம் ஜோசப் லெவாதா அவர்கள், தனது 83வது வயதில், செப்டம்பர் 26, இவ்வியாழன் இரவில் உரோம் நகரில் இறைபதம் சேர்ந்தார். கர்தினால் Levada அவர்களின் மறைவையொட்டி, இரங்கல் செய்தி அனுப்பியுள்ள, திருத்தந்தை பிரான்சிஸ் அவர்கள், இவர் திருஅவையின் தலைமைப் பீடத்திற்கும், தலத்திருஅவைக்கும் ஆற்றியுள்ள நற்பணிகளைப் பாராட்டியதோடு, அவரின் ஆன்மா இறைவனில் நிறைசாந்தியடைய, தனது செபங்களையும் தெரிவித்துள்ளார். லாஸ் ஆஞ்சலெஸ் நகரில் பிறந்த கர்தினால் Levada அவர்கள், 1983ம் ஆண்டில், லாஸ் ஆஞ்சலெஸ் மறைமாவட்டத்திற்குத் துணை ஆயராக நியமிக்கப்பட்டார். இவர், கத்தோலிக்கத் திருஅவையின் மறைக்கல்வி ஏடு தயாரிப்பில், 1980களில், முன்னாள் திருத்தந்தை 16ம் பெனடிக் அவர்களுடன் இணைந்து பணியாற்றியவர். 2005ம் ஆண்டில் திருப்பீடத்தின் விசுவாசக் கோட்பாட்டு பேராயத் தலைவராக நியமிக்கப்பட்ட இவர், 2006ம் ஆண்டில் கர்தினாலாக உயர்த்தப்பட்டார். கர்தினால் Levada அவர்களின் அடக்கச்சடங்கு திருப்பலியை, வத்திக்கான் புனித பேதுரு பசிலிக்கா பேராலயத்தில், செப்டம்பர் 27, இவ்வெள்ளி நண்பகலில், கர்தினால் தர்ச்சிசியோ பெர்த்தோனே அவர்கள், தலைமையேற்று நிறைவேற்றினார். திருப்பலியின் இறுதியில், திருத்தந்தை பிரான்சிஸ் அவர்கள், கர்தினாலின் உடலை மந்திரித்தார். கர்தினால் Levada அவர்களின் மறைவையொட்டி, திருஅவையில் மொத்த கர்தினால்களின் எண்ணிக்கை 212 ஆகவும், திருத்தந்தையைத் தேர்ந்தெடுக்கும் தகுதியுடைய எண்பது வயதுக்குட்பட்டவர்களின் எண்ணிக்கை 118 ஆகவும் மாறியது. [2019-09-30 02:39:04]


திருவழிபாடு, முதல் மறைக்கல்வி ஆசிரியர்

இக்கால திருஇசை அமைப்பாளர்கள், கடந்தகால இசை மரபை மறக்காமல், புதிய இசைகளோடு அதைப் புதுப்பித்து அதிகரிக்கவேண்டும் என, முன்னாள் திருத்தந்தை 16ம் பெனடிக்ட் கூறினார் - திருத்தந்தை பிரான்சிஸ் மேரி தெரேசா: வத்திக்கான் செய்திகள் திருவழிபாடுகளில் இறைமக்கள் அனைவரும் உள்ளார்ந்த உணர்வோடு, உயர்த்துடிப்புடன் பாடுவதற்கு, பாடகர் குழு உதவ வேண்டும் என்று, திருத்தந்தை பிரான்சிஸ் அவர்கள், இத்தாலிய செசிலீயா பாடகர் கழகத்தினரிடம் கேட்டுக்கொண்டார். இத்தாலிய புனித செசிலீயா கழகத்தின் இசைப் பள்ளியின் ஏறத்தாழ மூவாயிரம் பேரை, செப்டம்பர் 28, இச்சனிக்கிழமை நண்பகலில், புனித திருத்தந்தை ஆறாம் பவுல் அரங்கத்தில் சந்தித்து உரையாற்றிய திருத்தந்தை பிரான்சிஸ் அவர்கள், கடந்த 140 ஆண்டுகளாக, இக்கழகம், திருஅவைக்கு ஆர்வத்துடன் பணியாற்றி வருவதைப் பாராட்டினார். திருவழிபாடுகளில் இறைமக்கள் அனைவரோடும் நெருக்கமாக இருப்பது முக்கியமானது என்றும், புதிய மெல்லிசைகளை உருவாக்குவது, பங்குத்தள பாடகர் குழுக்கள், திருஇசை பள்ளிகள், இளையோர், குருத்துவ மற்றும், துறவற பயிற்சி மையங்களில் பாடுவதை ஊக்குவிப்பது போன்ற பல்வேறு பணிகளை இந்தக் கழகம் ஆற்றி வருவதையும் குறிப்பிட்டார். ஆலயத்தில் பாடுதல், இசைக்கருவிகளை மீட்டல், மக்களைப் பாடுவதற்கு ஊக்குவித்தல் போன்றவை, இறைவனைப் புகழும் மிக அழகான காரியங்களாக உள்ளன, இசையின் கலையை வெளிப்படுத்துதல் மற்றும், இறைப் பேருண்மைகளில் பங்குபெற உதவுதல், கடவுளிடமிருந்து பெறும் கொடையாகும் என்றும் திருத்தந்தை கூறினார். மறைக்கல்வி ஆசிரியர் திருவழிபாடு, முதல் மறைக்கல்வி ஆசிரியர் எனவும், திருவழிபாட்டில், கிரகோரியன் இசை, மரபு இசை மற்றும், தற்கால இசை போன்றவற்றை, கிறிஸ்தவ வரலாற்றில் இணைக்கும் பணியை திருஇசை கொண்டிருக்கின்றது எனவும், திருஇசை, எல்லா தரப்பினருக்கும் நற்செய்தி அறிவிக்கும் வழியைக் குறித்து நிற்கின்றது எனவும், திருத்தந்தை கூறினார். அது மட்டுமல்ல, திருஇசையும், பொதுவாகவே இசையும், நாடு, இனம், நிறம் போன்றவற்றுக்கு எல்லைகளைக் கொண்டிருப்பதில்லை, இது மொழிகளையும் கடந்து எல்லா மக்களையும் ஈடுபடுத்துகின்றது மற்றும், ஒன்றிணைக்கின்றது என்றும் கூறிய திருத்தந்தை பிரான்சிஸ் அவர்கள், சிலவேளைகளில், அருகில் இருக்கவில்லை என உணரும் நம் சகோதரர் சகோதரிகளையும்கூட, திருஇசை நெருக்கத்தில் கொணர்கின்றது என்றும் கூறினார். [2019-09-29 01:10:56]


ப்ரெஞ்ச் முன்னாள் அரசுத்தலைவர் சிராக் இறப்பிற்கு அஞ்சலி

அரசுத்தலைவர் சிராக் அவர்களின் மரணத்தையொட்டி, திருமதி சிராக் மற்றும், அவரின் குடும்பத்தினருக்கு அனுதாபங்களைத் தெரிவித்துள்ள ப்ரெஞ்ச் ஆயர்கள், வருகிற திங்களன்று நடைபெறும் அடக்கச்சடங்கில் கலந்துகொள்வதாக அறிவித்துள்ளனர் மேரி தெரேசா: வத்திக்கான் செய்திகள் "ஆண்டவர் நமக்களிக்கும் அன்பு மற்றும், நம்பிக்கையை வாழவும், பகிர்ந்துகொள்ளவும், நமக்கு மற்றவர் தேவைப்படுகின்றனர்" என்ற வார்த்தைகள், திருத்தந்தை பிரான்சிஸ் அவர்களின் டுவிட்டர் செய்தியில், செப்டம்பர் 28, இச்சனிக்கிழமையன்று வெளியாயின. மெக்சிகோ கால்பந்து அணிக்கு வாழ்த்து மேலும், "அமெரிக்க அணி" என்ற மெக்சிகோ நாட்டு கால்பந்து விளையாட்டு அமைப்பின் 103வது ஆண்டு நிறைவையொட்டி, அக்குழுவிற்கு, செப்டம்பர் 27, இவ்வெள்ளியன்று, காணொளிச் செய்தி அனுப்பிய திருத்தந்தை பிரான்சிஸ் அவர்கள், மெக்சிகோ நாடு, ஒருங்கிணைப்பு மற்றும், பொது நலனின் பாதைகளைப் பின்பற்றுவதற்கு, அந்நாட்டிற்காகச் செபிப்போம் என, அனைவருக்கும் அழைப்பு விடுத்துள்ளார். பல்வேறு ஒருமைப்பாட்டு நடவடிக்கைகளுடன், விளையாட்டையும், சமுதாய ஒருங்கிணைப்பையும் இணைத்துச் செயல்படும், இந்த "அமெரிக்க அணிக்கு" தனது நல்வாழ்த்துக்களைத் தெரிவித்துள்ள திருத்தந்தை, வருங்காலம், புகார்களோடு அல்ல, மாறாக, தீர்மானங்களோடு கட்டியெழுப்பப்பட வேண்டும் என்று கேட்டுக்கொண்டுள்ளார். அன்புக்குரிய மெக்சிகோ நாட்டின் எல்லா இடங்களிலும், எல்லாப் பிரிவுகளிலும் உள்ள அனைத்து விளையாட்டு அணிகளுக்கும் தன் நல்வாழ்த்துக்களை தெரிவித்துள்ள திருத்தந்தை பிரான்சிஸ் அவர்கள், பொது நலன் மற்றும், ஒருங்கிணைப்பு வழிகளைத் தேடுகையில், மெக்சிகோ மக்களின் ஒற்றுமையை வலுப்படுத்த வேண்டும் என்றும் கூறியுள்ளார். இந்த நிகழ்வில், மெக்சிகோ நகர் பேராயர், கர்தினால் Carlos Aguiar Retes அவர்கள், அமெரிக்க அணியின் அடையாளமான, அழிவின் ஆபத்திலுள்ள, தங்க கழுகைப் பாதுகாப்பது குறித்து திட்டத்தை ஆசீர்வதித்துள்ளார் என்றும் கூறியுள்ள திருத்தந்தை, நம் பொதுவான இல்லமாகிய இப்பூமியையும், பல்லுயிர்களையும் பாதுகாக்க வேண்டியதன் உடனடி தேவையையும், தனது காணொளிச் செய்தியில் குறிப்பிட்டுள்ளார். அரசுத்தலைவர் சிரியாக் இறப்புக்கு செய்தி இன்னும், பிரான்ஸ் நாட்டு முன்னாள் அரசுத்தலைவர் ஜாக் சிராக் அவர்கள் இறைபதம் சேர்ந்ததையொட்டி, அந்நாட்டு அரசுக்கும், மக்களுக்கும், தனது அனுதாபங்களையும், செபங்களையும் தெரிவிக்கும் தந்திச் செய்தியை, அந்நாட்டு அரசுத்தலைவர் இம்மானுவேல் மக்ரோன் அவர்களுக்கு திருத்தந்தை பிரான்சிஸ் அவர்கள் அனுப்பியுள்ளார். 1995ம் ஆண்டு முதல், 2007ம் ஆண்டு வரை, பிரான்ஸ் நாட்டின் அரசுத்தலைவராகப் பணியாற்றிய, சிராக் அவர்கள், தனது 86வது வயதில் செப்டம்பர் 26, இவ்வியாழனன்று காலமானார். [2019-09-29 01:05:14]


பந்தய விளையாட்டு நடவடிக்கைகள், சந்திக்கும் இடங்கள்

பன்னாட்டு பனி ஹாக்கி விளையாட்டு கூட்டமைப்பு நடத்திவரும் கூட்டத்தில் பங்கெடுக்கும் பிரதிநிதிகளை, இவ்வெள்ளியன்று திருப்பீடத்தில் சந்தித்து உரையாற்றினார், திருத்தந்தை பிரான்சிஸ் மேரி தெரேசா: வத்திக்கான் செய்திகள் பனி ஹாக்கி விளையாட்டில் கலந்துகொள்ளும் எல்லாருக்கும் பாதுகாப்பை உறுதிசெய்வதற்கு, பன்னாட்டு பனி ஹாக்கி விளையாட்டு கூட்டமைப்பு எடுத்துவரும் சிறப்பு நடவடிக்கைகள் தொடர்ந்து இடம்பெற ஊக்கப்படுத்தியுள்ளார், திருத்தந்தை பிரான்சிஸ். பன்னாட்டு பனி ஹாக்கி விளையாட்டு கூட்டமைப்பு நடத்திவரும் கூட்டத்தில் பங்கெடுக்கும் ஏறத்தாழ 176 பிரதிநிதிகளை, செப்டம்பர் 27, இவ்வெள்ளியன்று திருப்பீடத்தின் கிளமெந்தினா அறையில் சந்தித்து உரையாற்றிய திருத்தந்தை பிரான்சிஸ் அவர்கள், இந்த விளையாட்டுக்குத் தேவைப்படும் தனிப்பட்ட திறமைகள் மற்றும், சக்தி பற்றியும் குறிப்பிட்டார். பனிச்சறுக்கு, பனியில் சமநிலை காப்பது, விழுந்தபின் உடனே எழுந்து விளையாடுவது போன்ற தொழில்நுட்பங்களை உள்ளடக்கிய இந்த பனி ஹாக்கி விளையாட்டு போன்றவற்றிற்கு, மணிக்கணக்கில் பயிற்சி தேவைப்படுகின்றது என்றுரைத்த திருத்தந்தை, இந்த விளையாட்டை உலக அளவில் வளர்ப்பதற்கு ஆதரவு தரும் முயற்சியில், இளையோர், வயதானவர், ஆண், பெண் என, எல்லா தரப்பினரிலும் உள்ள சிறந்த திறமைகளை ஊக்குவித்து, உறவுகளை வளர்க்கவும், இந்த கூட்டமைப்பு உழைத்து வருகின்றது என்று பாராட்டினார். இந்த கூட்டமைப்பு இவ்வாண்டு மே மாதம் அனுமதி பெற்றுள்ள நன்னெறி விதிமுறைகள் பற்றியும் குறிப்பிட்ட திருத்தந்தை, விளையாட்டு வீரர்கள், விதிமுறைகளின்படி விளையாடுவதோடு, போட்டியாளர்களை மதிப்பதில் நீதியோடு நடந்துகொள்ளுமாறு கேட்டுக்கொண்டார். விளையாட்டு, அமைதி, மற்றும், ஒன்றிப்பை ஊக்குவிப்பதோடு, நம் வளர்ச்சியிலும், ஒருங்கிணைந்த முன்னேற்றத்திலும் அங்கம் வகிக்கின்றது என்பதை நினைவில் இருத்த வேண்டியது முக்கியம் எனவும், திருத்தந்தை பிரான்சிஸ் அவர்கள் கூறினார். [2019-09-28 01:53:41]


துணிச்சலுடன் சிலுவையை ஏற்பவர்கள் அருகில் கடவுள்

பாலஸ்தீனாவைச் சேர்ந்த மாற்றுத்திறனாளி சிறார் உட்பட, பல்வேறு நோயாளிகள், முதியோர் மற்றும், அவர்களுக்கு உதவுகின்ற தன்னார்வலர்களைக் கொண்ட இத்தாலிய தேசிய திருப்பயணிகள் குழு, லூர்து நகர் திருத்தலத்தில் திருப்பயணம் மேற்கொண்டுள்ளது மேரி தெரேசா: வத்திக்கான் செய்திகள் ஒவ்வொரு நாளும், தங்களின் துன்பங்களை, துணிச்சலுடனும், விடாமனஉறுதியுடனும் ஏற்பவர்களோடு கடவுள் தோழமையுணர்வு கொண்டு, நெருக்கமாக இருக்கிறார் என்று, திருத்தந்தை பிரான்சிஸ் அவர்கள், லூர்து நகர் திருப்பயணிகள் குழு ஒன்றிடம் கூறினார். இத்தாலிய UNITALSI அமைப்பு, பிரான்ஸ் நாட்டு லூர்து நகர் திருத்தலத்திற்கு அழைத்துச் சென்றுள்ள ஆயிரக்கணக்கான திருப்பயணிகளுக்கு, திருத்தந்தையின் பெயரில் தந்திச் செய்தி அனுப்பியுள்ள, திருப்பீட செயலர் கர்தினால் பியெத்ரோ பரோலின் அவர்கள், திருத்தந்தையின் செபமும், வாழ்த்தும் கலந்த செய்திகளைத் தெரிவித்துள்ளார். இந்த தேசிய திருப்பயணத்தில் கலந்துகொள்ளும், பாலஸ்தீன மாற்றுத்திறனாளிச் சிறார், ஏழைகள், மற்றும், நோயாளிச் சகோதரர் சகோதரிகள், துன்புற்று மகிமையடைந்த இயேசுவை ஏற்பதற்கு, செபமும், பிறரன்பும் நிறைந்த இத்திருப்பயணம் உதவும் என்று திருத்தந்தை நம்புவதாக, அதில் தெரிவிக்கப்பட்டுள்ளது. இறுதியில், லூர்து அன்னை திருத்தலத்தில் திருப்பயணம் மேற்கொண்டுள்ள அனைத்து அருள்பணியாளர்கள், திருப்பயணிகள், குறிப்பாக நோயாளிகளுக்கு, திருத்தந்தை தனது அப்போஸ்தலிக்க ஆசீரை வழங்குவதாகவும் அதில் கூறப்பட்டுள்ளது. பாலஸ்தீனாவைச் சேர்ந்த மாற்றுத்திறனாளி சிறார் உட்பட, பல்வேறு நோயாளர்கள், முதியோர் மற்றும், அவர்களுக்கு உதவுகின்ற தன்னார்வலர்களைக் கொண்ட இத்தாலிய தேசிய திருப்பயணிகளின் முதல் குழு, இச்செவ்வாயன்று நிறைவு செய்துள்ளது. அடுத்த குழு தற்போது திருப்பயணத்தைத் தொடங்கியுள்ளது. மேலும், இந்த இத்தாலிய தேசிய திருப்பயணத்தை வழிநடத்திச் சென்ற ஆயர் Luigi Bressan அவர்கள், இச்செவ்வாயன்று லூர்து நகர் புனித பெர்னதெத் ஆலயத்தில் திருப்பலி நிறைவேற்றியவேளை, நீங்கள் சுமையாக இல்லை, மாறாக. எம் ஒவ்வொருவருக்கும் ஒரு செய்தியை வழங்குகிறீர்கள் என்று, மாற்றுத்திறனாளிகள் மற்றும், வயது முதிர்ந்த நோயாளர்களிடம் கூறினார். [2019-09-26 01:41:10]


காலநிலை மாற்றத்தைத் தடுப்பதற்கு, நேர்மை, பொறுப்பு, துணிவு...

வருங்காலத் தலைமுறைகளுக்கு சிறந்ததோர் வாழ்வை உறுதிசெய்வதற்கும், ஒருங்கிணைந்த மனித முன்னேற்றத்தை வளர்ப்பதற்கும், உலகத் தலைவர்கள் தங்களை அர்ப்பணிக்குமாறு அழைப்பு கிறிஸ்டோபர் பிரான்சிஸ்: வத்திக்கான் வானொலி “காலநிலை மாற்றத்திற்கு எதிரான நடவடிக்கை மற்றும், காலநிலை மாற்றத்தை ஒருநிலைக்குக் கொண்டுவருதல்” என்ற தலைப்பில், நியு யார்க் ஐ.நா. நிறுவன தலைமையகத்தில், செப்டம்பர் 23, இத்திங்களன்று துவங்கியுள்ள ஐ.நா. உலக உச்சி மாநாட்டிற்கு, காணொளிச் செய்தி ஒன்றை அனுப்பியுள்ளார், திருத்தந்தை பிரான்சிஸ். அறுபதுக்கும் அதிகமான உலகத் தலைவர்கள் கலந்துகொள்ளும் இம்மாநாட்டிற்கு திருத்தந்தை பிரான்சிஸ் அவர்கள் அனுப்பியுள்ள செய்தியில், இந்த நம் காலத்தில் அனைவரையும் மிகவும் கவலைப்பட வைக்கின்ற, கடுமையான பிரச்சனைகளில் ஒன்றான, காலநிலை மாற்றத்தைத் தடுப்பதற்கு, நேர்மை, கடமையுணர்வு, துணிவு ஆகிய மூன்று மாபெரும் மனிதப் பண்புகள் அவசியம் என்று கூறியுள்ளார். காலநிலை மாற்றத்தைத் தடுப்பது குறித்த, பாரிஸ் ஒப்பந்தத்திற்கு உலக நாடுகள் இசைவு தெரிவித்து நான்கு ஆண்டுகள் ஆகியும், அந்த ஒப்பந்தக் கூறுகள் எட்டப்படுவதற்கு இன்னும் வெகு தொலைவு உள்ளது என்றும் திருத்தந்தை குறிப்பிட்டுள்ளார். வருங்காலத் தலைமுறைகளுக்கு சிறந்ததோர் வாழ்வை உறுதிசெய்வதற்கும், ஒருங்கிணைந்த மனித முன்னேற்றத்தை வளர்ப்பதற்கும், நாடுகளின் தலைவர்கள் தங்களை உறுதியுடன் அர்ப்பணிக்குமாறும் அழைப்பு விடுத்துள்ளார், திருத்தந்தை பிரான்சிஸ். இவ்வாறு தலைவர்கள் தங்களை அர்ப்பணிக்கையில், சூழலியல் சீரழிவு, நன்னெறி மற்றும், சமுதாயச் சீரழிவோடு தொடர்புடையது என்பதை ஏற்பது முக்கியம் என்று கூறியுள்ள திருத்தந்தை, நம் நுகர்வுகள் மற்றும் உற்பத்திப் பொருள்கள் பற்றி சிந்தித்து, அவை முன்வைக்கும் கலாச்சார சவாலை துணிவுடன் எதிர்கொள்ளுமாறு கூறியுள்ளார். இவை மனித மாண்புடன் ஒத்திணங்கிச் செல்வதாய் அமைய வேண்டும் என்றும் குறிப்பிட்டுள்ள திருத்தந்தை பிரான்சிஸ், இம்மாநாட்டில் கலந்துகொள்ளும் அனைவருக்கும், வாழ்த்தும், நன்றியும் தெரிவித்துள்ளார். [2019-09-25 02:16:18]


பக்க இலக்கங்களை அழுத்தி எல்லா செய்திகளையும் பார்வையிடவும்