தமிழ் ஆன்மீகப் பணியகம், யேர்மனி

வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)

உங்கள் நம்பிக்கை உங்கள் கலாச்சாரமாக மாறட்டும்!

செப்டம்பர் 9, திங்கள்கிழமை இன்று, கிழக்கு திமோரின் தலைநகர் டிலியில் (Dili) உள்ள அரசுத்தலைவர் மாளிகையில் அந்நாட்டின் அரசு அதிகாரிகள், தூதரக அதிகாரிகள், பொதுநிலை அமைப்புகளின் பிரதிநிதிகளுக்குத் திருத்தந்தை பிரான்சிஸ் அவர்கள் வழங்கிய அருளுரை.
அன்புள்ள சகோதரர் சகோதரிகளே, ஆசியாவில் பிறந்த கிறித்தவம், ஐரோப்பிய மறைப்பணியாளர்கள் வழியாக, இந்தத் தொலைதூர கண்டத்தின் பகுதிகளுக்கு வந்து, அதன் உலகளாவிய இறையழைத்தல் மற்றும் மிகவும் மாறுபட்ட கலாச்சாரங்களுடன் இணக்கமாக இருக்கும் திறனை உறுதிப்படுத்துகிறது. இது நற்செய்தியை எதிர்கொள்ளும் போது உயர்ந்த மற்றும் ஆழமான ஒரு புதிய ஒருங்கிணைப்பைக் காண்கிறது.
இயற்கை வளம் கொழிக்கும் இந்த நாடு, ஆன்மாவில் அமைதி மற்றும் மகிழ்ச்சியின் உணர்வுகளைத் தூண்டும் ஒரு நிலமாக, கடந்த காலங்களில் ஒரு துயரமிகுந்த காலகட்டத்தை கடந்துள்ளது. மேலும் அது எழுச்சியையும் வன்முறையையும் அனுபவித்திருக்கிறது, மக்களின் சுதந்திரத்திற்கான ஒரு தேடல் நிறைந்த இந்தக் காலங்களைப் பார்க்கும்போது, சுயாட்சிக்கான அதன் தேடலை நிராகரிக்கவோ அல்லது முறியடிக்கவோ மட்டுமே இது அடிக்கடி நிகழ்ந்திருக்கிறது என்பதைக் காண முடிகிறது.
நம்பிக்கையை இழக்கவில்லை
1975-ஆம் ஆண்டு நவம்பர் 28 முதல் 2002-ஆம் ஆண்டு மே 20 வரை, அதாவது, சுதந்திரம் அறிவிக்கப்பட்ட நாளிலிருந்து அது உறுதியாக மீட்கப்படும் வரை, கிழக்கு திமோர் அதன் மிகப்பெரிய துயரத்தையும் சோதனையையும் தாங்கிக் கொண்டது.
உங்கள் வரலாற்றின் இத்தகைய வியத்தகு காலகட்டத்தை கடந்து செல்லும்போது நீங்கள் ஒருபோதும் நம்பிக்கையை இழக்கவில்லை என்பதாலும், இருண்ட மற்றும் கடினமான நாட்களுக்குப் பிறகு, அமைதி மற்றும் சுதந்திரத்தின் விடியல் இறுதியாக உதயமானது என்பதாலும், நாம் இறைவனுக்கு நன்றி கூறுவோம்.
கத்தோலிக்க நம்பிக்கையில் நீங்கள் வேரூன்றி இருந்ததுதான் இத்தகைய முக்கியமான இலக்குகளை அடைய பெரிதும் உதவியது. கடந்த 1989-ஆம் ஆண்டு உங்கள் நாட்டிற்கு அப்போஸ்தலிக்கத் திருப்பயணத்தை மேற்கொண்ட திருத்தந்தை புனித இரண்டாம் யோவான் பவுல் அவர்கள் இதை வலியுறுத்தினார் என்பதையும் நான் இங்கே நினைவுகூர விழைகிறேன்.
இது சம்மந்தமாக, இந்தோனேசியாவில் உள்ள உங்கள் சகோதரர் சகோதரிகளுடன் முழு நல்லிணக்கத்தை அடைவதற்கான உங்கள் விடாமுயற்சிகளை நினைவு கூரவும், பாராட்டவும் விரும்புகிறேன். துயரங்களின் மத்தியிலும் உங்கள் நம்பிக்கையில் உறுதியாக இருந்தீர்கள். உங்கள் மக்களின் நற்குணங்களாலும், உங்கள் நம்பிக்கையாலும், துயரத்தை மகிழ்ச்சியாக மாற்றிவிட்டீர்கள்!
உலகின் பல்வேறு பகுதிகளிலும் இடம்பெற்றுவரும் மற்ற மோதல்களில், காயங்களைக் கட்டுவதற்கும், வெறுப்பை மாற்றுவதற்கும், ஒன்றிப்புடன் ஒப்புரவை ஏற்படுத்துவதற்கும், எதிர்ப்புக்குப் பதிலாக ஒத்துழைப்பை நல்குவதற்கும் விரும்பும் விருப்பங்களை கடவுள் உங்களுக்கு அருள்வாராக!
2019-ஆம் ஆண்டு, பிப்ரவரி 4 அன்று, நான் அபுதாபியில் பெரிய இமாம் அல்-அசாருடன் இணைந்து கையெழுத்திட்ட உடன்பிறந்த உறவு குறித்த ஆவணத்தை ஏற்றக்கொண்டு பள்ளி பாடத்திட்டத்தில் அதனைச் சேர்க்கும் வகையில் இதைச் செய்திருக்கிறீர்கள். உண்மையில், கல்வி என்பது செயல்முறை அடிப்படையானது.
புதிய சவால்கள் மற்றும் சிக்கல்கள்
இப்போது, ஒரு புதிய கீழ்வானம் (Horizon) உண்மையில் உங்கள் முன் திறக்கப்பட்டுள்ளது. அது இருண்ட மேகங்களை நீக்கியுள்ளது என்றபோதிலும், எதிர்கொள்ள வேண்டிய புதிய சவால்களையும் தீர்க்கப்படவேண்டிய புதிய சிக்கல்களையும் உங்கள்முன் வைத்துள்ளது. அவற்றிலுள்ள பல்வேறு தற்போதைய சிக்கல்களில், புலம்பெயர்தல் நிகழ்வைப் பற்றி நான் நினைக்கிறேன். போதுமான அளவிற்கு இயற்கை வளங்களைப் பகிராமை, எல்லோருக்கும் வேலைவாய்ப்பை வழங்காமை, குடும்பங்களின் வருமானத்திற்குப் போதிய உத்திரவாதம் இல்லாமை ஆகியவற்றால் இந்தப் புலம்பெயர்தல் ஏற்படுகிறது.
அளவுக்கு அதிகமான மது பயன்பாடு, கும்பலாக இளைஞர்களை உருவாக்குவது ஆகியவை சமூக அவலங்களாகக் கருதப்படுவதாக நான் நினைக்கிறன். இந்த கும்பலில் உள்ள இளைஞர்கள், தற்காப்புக் கலைகளில் பயிற்சி பெற்றவர்கள், ஆனால் பாதுகாப்பற்றவர்களின் சேவையில் இந்த அறிவைப் பயன்படுத்துவதற்குப் பதிலாக, அவர்கள் வன்முறை மற்றும் தீங்கு விளைவிப்பதில் தங்களின் வலிமையைக் காட்ட விரும்புகின்றனர்.
இந்தக் குழந்தைகள் மற்றும் இளம் பருவத்தினர் தங்கள் மாண்பை மீறுகிறார்கள் என்பதையும் நாம் மறந்துவிடக் கூடாது. இதற்குப் பதிலளிக்கும் விதமாக, எல்லா வகையான முறைகேடுகளையும் தடுக்கவும், அனைத்து இளைஞர்களுக்கும் நலமான மற்றும் அமைதியான குழந்தைப் பருவத்திற்கு உத்தரவாதம் அளிக்க முடிந்த அனைத்தையும் செய்யவும் நாம் அனைவரும் அழைக்கப்பட்டுள்ளோம் என்பதை உணர்வோம்.
திருஅவையானது தனது சமூகக் கோட்பாட்டை அத்தகைய ஒரு உருவாக்கும் செயல்முறைக்கு அடித்தளமாக வழங்குகிறது. பல்வேறு அணுகுமுறைகளை உருவாக்குவதற்கும், அவைகள் உண்மையிலேயே ஒருங்கிணைந்த வளர்ச்சியை ஆதரிக்கின்றனவா அல்லது அதற்குப் பதிலாக தடைகளை ஏற்படுத்துகின்றனவா, ஏற்றுக்கொள்ள முடியாத ஏற்றத்தாழ்வுகளை உருவாக்குவதோடு, நிராகரிக்கப்பட்ட அல்லது விளிம்பு நிலையில் உள்ள ஏராளமான மக்களை உருவாக்குகிறதா என்பதைச் சரிபார்க்கவும் இந்தச் சமூகக் கோட்பாடு ஒரு தவிர்க்க முடியாத மற்றும் நம்பகமான தூணாக அமைகிறது.
மாண்பை மேம்படுத்தும் கல்வி
நீங்கள் ஓர் இளைஞர் கூட்டமாக இருக்கிறீர்கள். நான் உங்கள் கலாச்சாரம் மற்றும் வரலாற்றைக் குறிப்பிடவில்லை, அவை மிகவும் பழமையானவை, ஆனால் கிழக்கு திமோரின் மக்கள்தொகையில் ஏறத்தாழ 65 விழுக்காட்டினர் முப்பது வயதுக்குட்பட்டவர்கள்.
குடும்பம் மற்றும் பள்ளிகளில் நீங்கள் முதலீடு செய்ய வேண்டிய முதல் பகுதி கல்வி என்று இந்தப் புள்ளிவிவரம் கூறுகிறது. குழந்தைகள் மற்றும் இளைஞர்களை மையமாக வைத்து அவர்களின் மாண்பை மேம்படுத்துகிறது கல்வி.
உற்சாகம், புத்துணர்ச்சி, முன்னோக்கிப் பார்க்கும் கண்ணோட்டம், துணிவு, சீர்தூக்கி பார்த்தல் ஆகிய இவை அனைத்தும் இளைஞர்களின் பொதுவான அனுபவங்கள் மற்றும் முதியவர்களின் ஞானத்துடன் இணைந்து, அறிவின் கலவையை உருவாக்குகின்றன மற்றும் எதிர்காலத்தை நோக்கி ஒரு பெரிய உத்வேகத்தை வழங்குகின்றன.
கத்தோலிக்கத் திருஅவையின் சமூகக் கோட்பாடு, தேவைப்படுபவர்களுக்கு உதவி மற்றும் பிறரன்பு சேவைகள் வழங்கும் நிறுவனங்கள் மற்றும் கல்வி மற்றும் நலவாழ்வு நிறுவனங்கள் அனைத்திற்கும் சேவை செய்கின்றது, மேலும் இது ஒரு மதிப்புமிக்க வளமாக இருப்பதுடன், எதிர்காலத்தை மனவுறுதியுடனும் நம்பிக்கையுடனும் எதிர்பார்க்க அனைவருக்கும் வழிகாட்டுகிறது.
எவரும் ஒதுக்கப்பட்டதாக உணராத, அனைவரும் அமைதியுடனும் மனித மாண்புடனும் வாழக்கூடிய சுதந்திரமான, மக்களாட்சி நிறைந்த மற்றும் ஒன்றிணைந்த நாட்டைக் கட்டியெழுப்புவதற்கான உங்களின் பணியில் எப்போதும் அவர் உங்களுடன் வருவார். கடவுள் உங்கள் அனைவரையும் ஆசீர்வதிப்பாராக! [2024-09-10 12:11:59]

வியட்நாம் நாட்டுக்கு திருத்தந்தையின் இரங்கல் தந்தி

வியட்நாம் நாட்டின் கம்யூனிச கட்சியின் பொதுச் செயலரும் முன்னாள் அரசுத்தலைவருமான Nguyễn Phú Trọng அவர்களின் மரணத்திற்கு திருத்தந்தையின் ஆழ்ந்த அனுதாபங்களை வெளியிடும் இரங்கல் தந்தி அந்நாட்டிற்கு அனுப்பப்பட்டுள்ளது. திருத்தந்தையின் அனுதாபங்களை வெளியிட்டு திருப்பீடச் செயலர் கர்தினால் பியெத்ரோ பரோலின் அவர்களால் அனுப்பப்பட்டுள்ள இந்த இரங்கல் தந்தியில், வியட்னாம் கம்யூனிச கட்சியின் பொதுச்செயலரும், முன்னாள் அரசுத்தலைவருமான Nguyễn Phú Trọng அவர்களின் மரணத்தால் துயருறும் அனைவரும், குறிப்பாக உறவினர்கள், ஆறுதலையும் அமைதியையும் பெற திருத்தந்தை தன் செப உறுதியை வழங்குவதாகத் தெரிவிக்கப்பட்டுள்ளது.
வியட்நாமுக்கும் திருப்பீடத்திற்கும் இடையில் நல்லுறவுகள் வளர முன்னாள் அரசுத்தலைவர் எடுத்த அனைத்து நடவடிக்கைகளுக்கும் திருத்தந்தை தன் பாராட்டுக்களை வெளியிடுவதோடு, வியட்நாமின் துக்கம் நிறைந்த இவ்வேளையில் தற்போதைய அரசுத்தலைவருக்கும் வியட்நாம் மக்களுக்கும் தன் ஆன்மீக நெருக்கத்தை வெளியிடுவதாகவும் அத்தந்தி செய்தியில் மேலும் கூறப்பட்டுள்ளது.
1944ஆம் ஆண்டு ஏப்ரல் 14ஆம் தேதி வியட்நாமில் பிறந்த Nguyễn Phú Trọng அவர்கள் இம்மாதம் 19ஆம் தேதி தன் 80ஆம் வயதில் காலமானார். இவர் 2018 முதல் 21 வரை வியட்நாம் அரசுத்தலைவராக பதவி வகித்துள்ளதுடன், 2011 முதல் இறக்கும்வரை வியட்நாம் கம்யூனிச கட்சி பொதுச்செயலராகவும் பணியாற்றியுள்ளார். [2024-07-23 23:27:14]

வெஸ்ட் பேங்க் பகுதியில் குழந்தைகள் கொல்லப்படுவது அதிகரிப்பு

கடந்த அக்டோபர் மாதம் இஸ்ராயேல் மற்றும் ஹமாஸ் இடையே போர் துவங்கியதிலிருந்து பாலஸ்தீனிய வெஸ்ட் பேங்க் பகுதியில் குழந்தைகளின் இறப்பு விகிதம் 250 விழுக்காடு அதிகரித்துள்ளதாக ஐ.நா.வின் UNICEF அமைப்பு தன் ஆழ்ந்த கவலையை வெளியிட்டுள்ளது. Gaza Strip பகுதியில் மட்டுமே போர் இடம்பெற்று வந்தாலும், இப்போரின் விளைவுகள் பாலஸ்தீனத்தின் அனைத்து மக்களையும் பாதித்துள்ளதாக தெரிவிக்கும் ஐ.நா.வின் குழந்தைகளுக்கான அவசரகால நிதி அமைப்பு, கடந்த ஆண்டு அக்டோபர் மாதத்திலிருந்து இதுவரை, அதாவது ஒன்பது மாதங்களில் வெஸ்ட் பேங்க் பகுதியில் 143 குழந்தைகள் கொல்லப்பட்டுள்ளதாகவும், அதற்கு முந்தைய 9 மாதங்களில் 41 பாலஸ்தீனிய குழந்தைகள் கொல்லப்பட்டதாகவும் தெரிவிக்கிறது.
கடந்த ஒன்பது மாதங்களில் 440க்கும் மேற்பட்ட பாலஸ்தீனிய குழந்தைகள் படுகாயமுற்றுள்ளதாகவும், பள்ளிக்குச் செல்லும் பாலஸ்தீனிய குழந்தைகள் இடையில் தடுக்கப்படுவதாகவும், தெருக்களில் நடந்து செல்லும்போது சுடப்படுவதாகவும் கூறும் யுனிசெப் அமைப்பு, இத்தகைய வன்முறைகள் உடனடியாகத் தடுக்கப்பட வேண்டும் எனவும் விண்ணப்பிக்கிறது. [2024-07-23 23:26:08]

திருத்தந்தையின் லக்ஸம்பர்க், பெல்ஜியம் பயண விவரங்கள்

செப்டம்பர் மாதம் 26 முதல் 29 வரை லக்ஸம்பர்க் மற்றும் பெல்ஜியம் நாடுகளில் திருத்தந்தை மேற்கொள்ளும் திருத்தூதுப் பயணங்கள் குறித்த விவரங்களை வெளியிட்டுள்ளது திருப்பீட தகவல் தொடர்புத்துறை.
செப்டம்பர் மாதம் 26ஆம் தேதி வியாழனன்று காலை உள்ளூர் நேரம் 8 மணி 5 நிமிடங்களுக்கு உரோம் பன்னாட்டு விமான நிலையத்திலிருந்து புறப்படும் திருத்தந்தை 10 மணிக்கு லக்ஸம்பர்கின் Findel பன்னாட்டு விமான நிலையம் வந்தடைந்து முதலில் மன்னர் வழி வந்த அந்நாட்டுத் தலைவரைச் சந்தித்து உரையாடுவார்.
அதன் பின்னர் பிரதமர், அரசியல் தலைவர்கள், சமூகத் தலைவர்கள், அரசுத் தூதுவர்கள் ஆகியோரைச் சந்தித்தபின், மாலையில் அந்நாட்டு கத்தோலிக்க சமூதாயத்தை சந்தித்து உரையாடியபின்னர், அன்றே ல்க்ஸம்பர்க்கிலிருந்து விடைபெற்று பெல்ஜியம் நாட்டின் Brussels நகருக்கு விமானம் மூலம் வந்தடைவார். 27ஆம் தேதி காலையில் பெல்ஜியம் மன்னரை சந்தித்தபின் பிரதமர், அரசு அதிகாரிகள், சமூகத் தலைவர்கள் ஆகியோரை சந்திப்பார்.
அன்று மாலையில் பல்கலைக்கழக பேராசிரியர்களுடனான திருத்தந்தையின் சந்திப்பு இடம்பெறும்.
செப்டம்பர் 28ஆம் தேதி காலையில், பெல்ஜியம் ஆயர்கள், அருள்பணியாளர்கள், திருத்தொண்டர்கள், துறவியர், குருமட மாணவர்கள் மற்றும் மேய்ப்புப் பணியாளர்களைச் சந்தித்து உரை வழங்கியபின், பல்கலைக்கழக மாணவர்களையும், பின்னர் அங்குள்ள இயேசு சபை அங்கத்தினர்களையும் சந்தித்து உரையாடுவார்.
29ஆம் தேதி ஞாயிறன்று காலை விசுவாசிகளுக்கு திருப்பலி நிறைவேற்றுவதுடன், நண்பகல் 12.45 மணிக்கு உரோம் நகர் நோக்கிய பயணத்தைத் துவக்கி 2 மணி நேரம் 10 நிமிடங்கள் பயணம் செய்து உரோம் நகர் வந்தடைவார். [2024-07-19 23:43:21]

அதிக எண்ணிக்கையில் கிரீஸ் நாட்டில் புலம்பெயர்ந்தோர் குழந்தைகள்!

கடந்த 2023-ஆம் ஆண்டுடன் ஒப்பிடுகையில் கிரீஸ் நாட்டிற்குப் புலம்பெயர்ந்து வந்துள்ள குழந்தைகளின் எண்ணிக்கை நான்கு மடங்கு அதிகம் என்றும், அவர்களில் நான்கில் ஒருவர் குடும்ப உறுப்பினர்கள் அல்லது காப்பாளர் இல்லாமல் வந்துள்ளனர் என்றும் கூறியுள்ளது Save the Children எனப்படும் உலகளாவிய குழந்தைகள் நல அமைப்பு.
இந்தக் குழந்தைகள் நல அமைப்பும் புலம்பெயர்ந்தோருக்கான கிரேக்க அமைப்பும், அவர்கள் நாட்டில் தங்கிய முதல் நாளிலிருந்தே துணையில்லாத சிறார்களுக்கு ஒரு காப்பாளர் நியமிக்கப்படுவதை உறுதிசெய்யவும், குழந்தைகள் பாதுகாப்புச் சேவைகளுக்கு நிதியளிக்கவும், ஐரோப்பாவில் பாதுகாப்பைத் தேடும் குழந்தைகள் மற்றும் குடும்பங்களின் பாதுகாப்பிற்கு முன்னுரிமை அளிக்கவும் அதிகாரிகளுக்கு அழைப்புவிடுத்துள்ளன. இவ்வாண்டு 6,400-க்கும் மேற்பட்ட குழந்தை புலம்பெயர்ந்தோர் கிரேக்க நாட்டிற்குள் வந்துள்ளனர் என்றும், இது 2023-ஆம் ஆண்டின் இதே காலகட்டத்துடன் ஒப்பிடும்போது நான்கு மடங்கிற்கும் அதிகமாக உள்ளது என்றும் எடுத்துக்காட்டியுள்ளது அவ்வமைப்பு. கிடைத்திருக்கக்கூடிய தரவுகளின் அடிப்படையில், இந்த ஆண்டு ஜனவரி மற்றும் ஜூன் மாதங்களுக்கு இடையில், ஏறத்தாழ 5,580 குழந்தைகள் ஏஜியன் கடலில் உள்ள கிரேக்கத் தீவுகளுக்கு கடல் வழியாக வந்துள்ளனர் என்று உரைக்கும் அந்நிறுவனம், இவர்களில் ஏறக்குறைய 830 பேர் தரைவழியாக வந்துள்ளனர் என்றும், 2023 -ஆம் ஆண்டு முதல் பாதியில் குடியேறிய 1,280 குழந்தைகளுடன் ஒப்பிடும்போது இது 400 விழுக்காடு அதிகரித்ததுள்ளது என்றும் கூறியுள்ளது.
ஆபத்தில் உள்ள பெண்கள் மற்றும் சிறுவர்களைக் காப்பாற்ற 100 ஆண்டுகளுக்கும் மேலாகப் போராடி வரும் Save the Children எனப்படும் உலகளாவிய குழந்தைகள் நல அமைப்பு, அவர்களின் எதிர்காலத்தை உறுதிப்படுத்துதல், போர் மற்றும் பட்டினியால் இடம்பெயர்ந்து செல்லும் குழந்தைகளுக்கு அதிக பாதுகாப்பு அளித்தல் ஆகிய நற்பணிகளை ஆற்றி வருகின்றது. [2024-07-19 23:42:12]

காசாவில் வன்முரை தொடர்வதால் அதிக குழந்தைகள் ஆபத்தில் உள்ளனர்!

கடந்த 2023-ஆம் ஆண்டு முதல் காசாவில் 90 விழுக்காட்டு மக்கள் இடம்பெயர்ந்து சென்றுள்ளனர், இதில் பலர் குழந்தைகள் என்றும், மக்கள் செல்ல வேண்டிய கட்டாயத்தில் உள்ள இடங்களில் அடிப்படை வசதிகளும் பாதுகாப்பும் இல்லை என்றும் தெரிவித்துள்ளது யுனிசெப் நிறுவனம். தனது எக்ஸ்தல பக்கத்தில் இந்தத் தகவலை வழங்கியுள்ள அந்நிறுவனம், போர்களுக்கு முற்றுப்புள்ளி வைப்பதற்கும் நீடித்த போர் நிறுத்தத்துக்கும் தொடர்ந்து அழைப்பு ஒன்றையும் விடுத்துள்ளது. தெற்கு லெபனானில் வீடுகளுக்கு முன்பாக விளையாடிக் கொண்டிருந்த 3 குழந்தைகள் ஜூலை 16, இச்செவ்வாயன்று, குண்டுவெடிப்பில் கொல்லப்பட்டது கொடூரமானது என்று குறிப்பிட்டுள்ள அந்நிறுவனம், அனைத்துலக மனிதாபிமான சட்டத்தின் கீழ் குழந்தைகள் பாதுகாக்கப்பட வேண்டும் என்றும், பாதிக்கப்பட்ட அக்குடும்பத்தினருக்குத் தங்களின் ஆதரவு என்றும் உள்ளது என்றும் கூறியுள்ளது. [2024-07-19 23:41:30]

பாலஸ்தீனிய புலம்பெயர்ந்தோரின் தேவைகள் பூர்த்தி செய்யப்பட....

மத்திய கிழக்கில் துன்புறும் 50 இலட்சத்திற்கும் அதிகமான பாலஸ்தீனிய புலம்பெயர்ந்தோரின் அடிப்படைத் தேவைகளைப் பூர்த்தி செய்வதில் UNRWA எனப்படும் ஐக்கிய நாடுகள் நிறுவனத்தின் துயர்துடைப்புப்பணி அமைப்பின் முக்கிய பங்கை திருப்பீடம் மீண்டும் வலியுறுத்த விரும்புகிறது என்று கூறினார் பேராயர் கபிரியேலே காச்சா.
அண்மையில் அமெரிக்காவின் நியூயார்க் நகரில் நடைபெற்ற ஐக்கிய நாடுகள் பொதுஅவையின் தற்காலிகக் குழு கூட்டத்தில் பங்கேற்று உரையாற்றிய போது இவ்வாறு கூறினார் ஐ.நா.விற்கான திருப்பீட பிரதிநிதி, பேராயர் கபிரியேலே காச்சா. 2023 ஆம் ஆண்டு அக்டோபர் 7 ஆம் நாள் நடைபெற்ற இஸ்ரேலிய மக்களுக்கு எதிரான கொடூரமான பயங்கரவாதத் தாக்குதல்கள், இஸ்ரேலிலும் பாலஸ்தீனத்திலும் எண்ணற்ற மக்களின் வாழ்வில் ஆழமான எதிர்மறையான தாக்கத்தை ஏற்படுத்தியுள்ளன என்று கூறிய பேராயர் காச்சா அவர்கள், பாலஸ்தீனிய புலம்பெயர்ந்தோருக்கு நிவாரணம் மற்றும் வேலைவாய்ப்புக்கான தன்னார்வ பங்களிப்புகளை வழங்கவேண்டும் என்றும் வலியுறுத்தினார். எல்லா இடங்களிலும் போர்நிறுத்தம், காசாவில் உள்ள இஸ்ரேலிய பிணையக்கைதிகள் உடனடியாக விடுவிக்கப்படல், பாலஸ்தீன மக்களுக்கு அத்தியாவசிய உதவிகளை தடையின்றி வழங்குதல், பன்னாட்டு மனிதாபிமானச் சட்டத்தை அனைத்து தரப்பினரும் விதிவிலக்கு இல்லாமல் மதித்தல் போன்றவற்றையும் திருப்பீடம் வலியுறுத்துவதாக எடுத்துரைத்தார் பேராயர் காச்சா.
தேவையிலிருப்பவர்களுக்கு உதவ அயராத முயற்சிகளில் ஈடுபட்டுள்ள மனிதாபிமான பணியாளர்களின் பாதுகாப்பை உறுதி செய்வது அனைத்து தரப்பினரின் கடமை என்று வலியுறுத்திய பேராயர் காச்சா அவர்கள், "பாலஸ்தீனமும் இஸ்ரேலும் ஒன்றோடு ஒன்று இணைந்து வாழக்கூடிய நிலையான அமைதியை அடைவதற்கு நாம் அனைவரும் அர்ப்பணிப்புடன் உழைக்க வேண்டும் என்ற திருத்தந்தை பிரான்சிஸ் அவர்களின் கருத்துக்களை மேற்கோள்காட்டினார். 1948 அரபு-இஸ்ரேல் போரின் காரணமாக இடம்பெயர்ந்த பாலஸ்தீனிய புலம்பெயர்ந்தோருக்கு உதவி வழங்குவதற்கான நோக்கமுடன் 1949-ஆம் ஆண்டில் UNRWA எனப்படும் ஐக்கிய நாடுகள் நிறுவனத்தின் துயர்துடைப்புப்பணி அமைப்பு நிறுவப்பட்டது. [2024-07-14 23:38:19]

நம்பிக்கையின் முன்னோடிகளான புனிதர்கள் எர்மகோரா, ஃபொர்த்துனாத்தோ

ஆக்குயிலா தலத்திருஅவையில் நற்செய்தியானது ஒரு விதையைப் போல வேரூன்றி, கிளைபரப்பி, பழங்கள் தரும் மரமாக மாற நம்பிக்கையின் முன்னோடிகளாக புனிதர்கள் எர்மகோரா, ஃபொர்த்துனாத்தோ ஆகியோர் இருந்தனர் என்றும், தெய்வீக அமைதியைக் கொண்ட இவர்களின் நற்செய்திப்பணியானது மக்களுக்கு மீட்பின் ஒளியைக் கொண்டு வந்தது என்றும் கூறினார் பேராயர் பால் ரிச்சர்டு காலகர்.
ஜூலை 12 வெள்ளிக்கிழமை வடக்கு இத்தாலியின் ஆக்குயிலா நகரில் புனிதர்களான எர்மகோரா, ஃபொர்த்துனாத்தோ அவர்களை நினைவுகூர்ந்து நடைபெற்ற திருப்பலியில் பங்கேற்று மறையுரையாற்றியபோது இவ்வாறு கூறினார் திருப்பீட வெளியுறவுத்துறைச் செயலர் பேராயர் பால் ரிச்சர்டு காலகர். புனிதர்களான ஆயர் எர்மகோரஸ், திருத்தொண்டர் ஃபொர்த்துனாதுஸ் ஆகியோரின் வாழ்க்கையானது கவனிப்பு மற்றும் போராட்டம் எனும் இரண்டு கிறிஸ்தவ அனுபவங்களை எடுத்துரைப்பதாகக் கூறினார் பேராயர் பால் ரிச்சர்டு காலகர். "நல்ல ஆயனின் பண்புகளைக் கொண்டவர்களாக ஆக்குயிலா மக்களின் இதயங்களை வென்றனர் என்றும், காணாமல் போனதைத் தேடுவேன்; அலைந்து திரிவதைத் திரும்பக்கொண்டுவருவேன்; காயப்பட்டதற்குக் கட்டுப்போடுவேன்; நலிந்தவற்றைத் திடப்படுத்துவேன். என்ற எசேக்கியேல் இறைவாக்கினரின் வார்த்தைக்கிணங்க ஒவ்வொரு மக்களையும் நன்கு அறிந்து அவர்களில் கடவுளைக் கண்டு வாழ்ந்தவர்கள் புனிதர்கள் என்றும் கூறினார் பேராயர் காலகர்.
நாம் வாழ்கின்ற வாழ்க்கை மிக துயரமாக கசப்பாக இருந்தாலும், பிறர் நம்மை ஏமாற்றினாலும், பாவம் என்று தோன்றினாலும் கடவுள் பார்வையில் நாம் அனைவரும் விலைமதிப்பற்றவர்கள் என்பதை உணர்ந்து வாழவேண்டும் என்றும், மென்மை, அக்கறை கொண்ட கடவுள் மீது நமது இதயத்தின் பார்வையைத் திருப்புவது மிக அவசியம் என்றும் வலியுறுத்தினார் பேராயர் காலகர். குடும்பம் மற்றும் தொழில்சார் கடமைகளை நாம் அன்புடன் நிறைவேற்றுதல், நம்பிக்கை மற்றும் கிறிஸ்தவக் கோட்பாட்டின் உண்மையை உலகிற்கு சாட்சியாகக் காட்டும் துணிவு, மனித மாண்பு, அமைதி மற்றும் நீதியைப் பாதுகாக்க உழைத்தல் போன்றவற்றிந் போதெல்லாம் உள்ளார்ந்த ஒரு போராட்டம் நமக்குள் நடைபெறுகின்றது என்றும் அந்நிலையில் நாம் கிறிஸ்துவின் சீடர்களாகத் தொடர்ந்து உழைக்க வேண்டும் என்றும் கூறினார்.
ஒரு சீடன் தன் குருவுக்கு உண்மையாக இருக்க முற்படும்போது, இறைவன் அவர் அருகிலேயே இருக்கிறார், அவரை விட்டு விலகவில்லை, அவரில் அவர் தனது பலத்தைக் காண்கிறார் என்பதை அவர் அறிவார் என்று கூறிய பேராயர் காலகர் அவர்கள், நாங்கள் எல்லாச் சூழ்நிலைகளிலும் இன்னலுற்றாலும் மனம் உடைந்து போவதில்லை; குழப்பமுற்றாலும் நம்பிக்கை இழப்பதில்லை; துன்புறுத்தப்பட்டாலும் கைவிடப்படுவதில்லை; வீழ்த்தப்பட்டாலும் அழிந்துபோவதில்லை. இயேசுவின் வாழ்வே எங்கள் உடலில் வெளிப்படுமாறு நாங்கள் எங்கு சென்றாலும் அவருடைய சாவுக்குரிய துன்பங்களை எங்கள் உடலில் சுமந்து செல்கிறோம். என்ற திருத்த்தூதர் பவுலின் வார்த்தைகளை மேற்கோள்காட்டினார். [2024-07-14 23:37:45]

பிலிப்பீன்சிலுள்ள மாசின் பேராலயத்திற்குத் தேசிய ஆலயத் தகுதிநிலை!

பிலிப்பீன்சிலுள்ள மாசின் புனித விண்ணேற்பு அன்னை பேராலயத்திற்குத் தேசிய ஆலய தகுதிநிலை கிடைத்திருப்பது அன்னையின் பக்தர்கள் அனைவர்மீதும் பொழியப்படும் இறையருளைக் குறிக்கிறது என்று பெருமகிழ்வுடன் கூறியுள்ளார் மாசின் மறைமாவட்டத்தின் முதன்மைகுரு பேரருள்திரு Oscar Cadayona மேலும் இந்தப் புதிய அறிவின்படி, தேசிய ஆலய தகுதிநிலை பெற்றுள்ள இத்திருத்தலப் பேராலயம், இனி பிலிப்பீன்சின் கத்தோலிக்க ஆயர் பேரவையின் (CBCP) கட்டுப்பாட்டின்கீழ் வரும் என்றும் யூகான் செய்தி நிறுவனதிடம் தெரிவித்துள்ளார் பேரருள்திரு Cadayona. நாடு முழுவதிலும் இருந்தும் திருப்பயணிகள் வருவார்கள் என நாங்கள் எதிர்பார்க்கிறோம் என்று கூறிய கடயோனா அவர்கள், எங்கள் மறைமாவட்டப் பேராலயத்திற்குத் தேசியத் திருத்தலப் பேராலயம் என்ற தகுதிநிலை வழங்கப்பட்டுள்ளதில் நாங்கள் பெருமையடைகிறோம் மற்றும் ஆசீர்வதிக்கப்படுகிறோம் என்று மேலும் அச்செய்தி நிறுவனத்திடம் கூறியுள்ளார். மறைமாவட்டத் திருத்தலம் என்று அறியப்படும் இவ்வாலயம், கிழக்கு விசாயாஸ் பகுதியில் உள்ள முதல் தேசியத் திருத்தலப் பேராலயமாகும் என்றும், இதில் ஆறு மாநிலங்கள் உள்ளன மற்றும் 40 இலட்சம் மக்கள் வாழ்கின்றனர், அவர்களில் பெரும்பாலோர் கத்தோலிக்கர்கள் என்றும் உரைக்கிறது அச்செய்தி நிறுவனம்.
ஜூலை 6, சனிக்கிழமையன்று, தெற்கு தீவான மின்டானாவோவில் உள்ள ககாயன் டி ஓரோ நகரில் பிலிப்பீன்சின் ஆயர் பேரவையின் 128-வது அமர்வின் போது இந்த அறிவிப்பு வெளியிடப்பட்டது என்றும் அச்செய்திக்குறிப்பு உரைக்கின்றது. 85,000-க்கும் மேற்பட்ட குடியிருப்பாளர்களைக் கொண்டுள்ள மாசின், 1771-- ஆம் ஆண்டில், சேசு சபை அருள்பணியாளர்களின் கீழ் ஒரு பங்குத்தளமாக மாறியது என்றும், பின்னர் பிரான்சிஸ்கன் சபை அருள்பணியாளர்கள் பொறுப்பேற்றவுடன், இந்தப் பங்குத்தளம் 1843- ஆம் ஆண்டில் விண்ணேற்பு அன்னைக்கு அர்ப்பணிக்கப்பட்டது. [2024-07-10 23:19:24]

உக்ரைனில் தாக்குதலுக்கு உள்ளான மருத்துவமனைக்கு முதல் உதவி!

ஜூலை 9, இத்திங்களன்று, உக்ரைன் நாட்டின் கீவ் நகரில் தாக்குதலுக்கு உள்ளான Okhmatdyt குழந்தைகள் மருத்துவமனைக்கு முதலுதவி அளிக்கப்பட்டுள்ளதாக அதன் எக்ஸ் தல பக்கத்தில் தெரிவித்துள்ளது யுனிசெஃப் நிறுவனம். அவசர உடல் நலம் மற்றும் முதலுதவி பெட்டிகள், சூரிய ஒளியில் இயங்கும் விளக்குகள், குடிநீர், மனநலம் மற்றும் உளவியல் ஆதரவு, நல கருவிகள், பொழுதுபோக்கு கருவிகள் மற்றும் குழந்தைகளுக்கான பொருள்களை வழங்கியுள்ளதாகவும் அதன் எக்ஸ் தல பக்கத்தில் கூறியுள்ளது யுனிசெஃப் நிறுவனம்.
உள்ளூர் அரசு அதிகாரிகள் மற்றும் துணைவர்களுடன் (partners) இணைந்து மற்ற உடல் நல வசதிகளுக்கு இடமாற்றம் செய்யப்பட்ட குழந்தைகளின் தேவைகளை அடையாளம் கண்டு ஆதரிக்கவும், சேதமடைந்த மருத்துவமனை மற்றும் அண்மைய தாக்குதல்களால் பாதிக்கப்பட்ட பிற சமூகங்களுக்கு மேலும் அவசர உதவிகளை வழங்கவும் யுனிசெப் நிறுவனம் செயல்பட்டு வருவதாகவும் அதன் எக்ஸ் தல பக்கம் உரைக்கிறது.
குழந்தைகள், பொதுமக்கள், சேவைகள் மற்றும் அத்தியாவசிய வசதிகள் பாதுகாக்கப்பட வேண்டும் என்றும் இந்தத் தாக்குதலில் பாதிக்கப்பட்டுள்ள குழந்தைகள் மற்றும் குடும்பங்களின் உடனடித் தேவைகளுக்கு யுனிசெஃப் மற்றும் அதன் துணைவர்கள் உதவி வருகின்றனர் என்றும் சுட்டிக்காட்டியுள்ள யுனிசெஃப் நிறுவனம், எல்லாவற்றிற்கும் மேலாக, குழந்தைகளுக்கு நிலையான அமைதி தேவை என்றும் அதில் வலியுறுத்தியுள்ளது. [2024-07-10 23:18:11]