ஆண்டவரே இயேசுவே,
‌அன்பான இயேசுவிற்கு, ஆராதனை! ஆறுதலின் இறைவனே! உம்மைப் போற்றுகின்றேன். பரிசுத்த ஆவியானவரே! உம்மைப் புகழ்கின்றேன். ஆற்றல் மிக்க அருள் நாதரே! உமக்கு நன்றி கூறுகின்றேன். "யோசேப்பு தம் சகோதரர்களிடம் அனுப்பப்படுவதையும்; குத்தகை உவமையின் மூலமாக, கட்டுவோர் புறக்கணித்த கல் கட்டடத்துக்கு மூலைக்கல் ஆகும்" என்பதையும் இன்றைய இறைவார்த்தையில் வாசிக்கின்றேன். பல தடவைகளில் உமது குரலுக்கும் வார்த்தைக்கும் செவி கொடுக்காதவனாக வாழ்ந்த நிலைகளை எண்ணி மன்னிப்புக் கேட்கின்றேன் இயேசுவே. “மீட்பருளும் ஊற்றுகளிலிருந்து நீங்கள் அகமகிழ்வோடு தண்ணீர் முகந்து கொள்வீர்கள்” என்னும் உமது உயிருள்ள வார்த்தையை வாசிக்கும் நான், நீர் என் வாழ்வில் அனுமதிக்கும் இறை உறவுகளை மதிக்கவும்; அவர்கள் காட்டும் பாதையில் பணிவுடன் நடக்கவும், அவற்றின் மூலமாக உமது உயிருள்ள நிலைவாழ்வின் ஊற்றை என் வாழ்வில் கண்டு கொள்ளவும் அருள் தாரும். ஆண்டவரே இயேசுவே! இன்றைய நாளில் என்னை வாழிநடத்தும். "நான் உனக்கு அறிவுபுகட்டி நடக்க வேண்டிய வழிகளைக் கற்பிப்பேன்" என்று, வாக்குத்தந்தீர். அந்த உயிருள்ள வார்த்தையால் என்னை உமது பாதையில் நடத்தும். உமது ஆவியை என்னில் நிறைவாகப் பொழியும்; அதனால் மெய்யுணர்வு, ஞானம், அறிவு, ஆற்றல், உம்மைப் பற்றிய அச்ச உணர்வில் வாழ கிருபை பாராட்ட வேண்டும் என்று, இயேசுவின் நாமத்தில் செபிக்கிறேன். ஆமென்